1, 2. (α) Σαρ απαντιντάς ο Ιησούς κάνα ο Πέτρος βακερντάς λέσκε τι τζιτζίνελ πέσκε; (Ντικχ ι φωτογραφία σο ισί κι αρχή) (β) Σόσκε απαντιντάς αντικάς ο Ιησούς;

Ο ΜΑΘΗΤΕΣ ι Ιησούσκε ναστί πακιάνας οντουβά σο ασουντέας! Αμντίνενας ότι ο Ιησούς κα ανέλας πάλι ι βασιλεία κο Ισραήλ, αλλά βοβ βακερντάς ότι ατζεχάνικ κα τσσίντελας μπουτ ντα κα μερέλας. Ο απόστολος Πέτρος σιγκιαρντάς τι βακερέλ: «Τζίτζινε τούκε, Κύριε· να κα αβέλ-πες τούκε κάτι ασακό». Ο Ιησούς βακερντάς: «Νας ανγκλά-μάνταρ, Σατανά! Ισινάν μάνγκε εμπόδιος, σόσκε να σκεφτίνεσα ο σκέψεις ι Ντεβλέσκε, αλλά ι τζενένγκε».​—Ματθαίος 16:​21-23· Πράξεις 1:6.

² Οντουλέ λαφίντζαρ, ο Ιησούς σικαντάς ξεκάθαρα ότι ο σκέψεις ι Ιεχωβάσκε ισί διαφορετικές κατά σκέψεις ανταλέ ντουνιάσκε σο κερέλα-λες κουμάντος ο Μπενγκ. (1 Ιωάννη 5:​19) Ο Πέτρος βακερντάς κο Ιησούς τι ντικχέλ σάντε πο νεαυτός, σαρ κερένα μπουτ τζενέ κο ντουνιάς. Αλλά ο Ιησούς τζανέλας ότι ο Ιεχωβά μανγκέλας λέσταρ τι προετοιμάντιβελ ι βασανένγκε ντα ι μεριμάσκε σο κα αρακχέλας ατζεχάνικ ανγκλά-πέστε. Η απάντηση ι Ιησούσκι σικαντάς ξεκάθαρα ότι τραμπιντάς τι  σκεφτίνελ σαρ ο Ιεχωβά, όχι σαρ ο ντουνιάς.

3. Σόσκε ισί δύσκολος τι τραμπίνας τι σκεφτίνας σαρ ο Ιεχωβά ντα όχι σαρ ο ντουνιάς;

³ Αμέν σαρ σκεφτίνασα; Σαρ ο Ιεχωβά ή σαρ ο τζενέ κο ντουνιάς; Σαρ Χριστιανοί, κεράσα ο πιο λατσσό σο μπορίνασα για τι αβάς σίγουροι ότι ο Ντεβέλ χαιρίνελα οντουλέντζαρ σο κεράσα. Σο αβέλα-πες όμως με το τρόπος σο σκεφτίνασα; Κεράσα ο πιο λατσσό σο μπορίνασα για τι σκεφτίνας σαρ ο Ιεχωβά, δηλαδή για τι ντικχάς ο πράγματα σαρ ντικχέλα-λεν βοβ; Πρέπει τι προσπαθίνας μπουτ για τι κεράς-λες ανταβά. Αλλά ισί μπουτ εύκολος τι σκεφτίνας σαρ ο τζενέ κο ντουνιάς. Ανταβά αβέλα-πες επειδή ο πνεύμας ι ντουνιάσκο ισί παντού. (Εφεσίους 2:2) Επίσης, ο τζενέ κο ντουνιάς μπουτ φαρ σκεφτίνενα σάντε πουμαρό νεαυτός, οτθάρ μπορεί τι χουχάντιβας ντα τι σκεφτίνας σαρ βον. Βα, ισί δύσκολος τι σκεφτίνας σαρ ο Ιεχωβά αλλά μπουτ εύκολος τι σκεφτίνας σαρ ο τζενέ κο ντουνιάς.

4. (α) Σο κα αβέλ-πες άμα μουκχάσα ι ντουνιάς τι επηρεάνελ ο τρόπος σο σκεφτίνασα; (β) Σο κα σικλιάς ανταλέ μαθημάστε;

⁴ Άμα μουκχάσα ι ντουνιάς τι επηρεάνελ ο τρόπος σο σκεφτίνασα, κα αβάς εγωιστές ντα κα μανγκάς τι αποφασίνας κορκορέ σο ισί σωστός ντα σο ισί λάθος. (Μάρκος 7:​21, 22) Οτθάρ, ισί σημαντικός τι σικλιάς τι σκεφτίνας «ο σκέψεις ι Ντεβλέσκε», όχι «ι τζενένγκε». Ανταβά μάθημας κα βοηθίνελ-αμέν τι κεράς-λες ανταβά. Κα εξετάνας σόσκε βακεράσα ότι όταν ντικχάσα ο πράγματα σαρ ντικχέλα-λεν ο Ιεχωβά να χασαράσα αμαρί ελευθερία, αλλά ισί αμαρέ λατσσιμάσκε. Ντα κα ντικχάς σαρ μπορίνασα μα τι επηρεάντιβας κατά τρόπος σκέψης ανταλέ ντουνιάσκο. Κο γιαβέρ μάθημας, κα σικλιάς σαρ μπορίνασα τι σκεφτίνας σαρ ο Ιεχωβά συγκεκριμέ πραγματέντε ντα τι κεράς λέσκο τρόπος σκέψης αμαρό.

5. Σόσκε να μανγκένα μερικά τζενέ τι επηρεάνελ-λεν καέκ;

⁵ Μερικά τζενέ να μανγκένα καέκ τι επηρεάνελ λένγκο τρόπος σκέψης. Βον βακερένα: «Με σκεφτίναβα μάνγκε». Μανγκένα τι βακερέν ότι αποφασίνενα βον πουμαρέ νεαυτόσκε ντα ότι τθερένα ο δικαίωμας τι κερέν-λες ανταβά. Να μανγκένα γιαβερά τζενέ τι κερέν-λεν κουμάντος ή τι πιένεν-λεν τι αβέν σαρ ο γιαβερά. * (Ντικχ ι υποσημείωση)

6. (α) Σο ελευθερία ντέλα-αμέν ο Ιεχωβά; (β) Ισί ανταγιά ελευθερία χωρίς όρια;

⁶ Ισί λατσσό τι τζανάς ότι άμα τραμπίνασα τι σκεφτίνας σαρ ο Ιεχωβά, μπορίνασα τι τθεράς αμαρέ απόψεις. Ο εδάφιος 2 Κορινθίους 3:​17 βακερέλα: «Οτθέ σο ισί ο πνεύμας ι Ιεχωβάσκο, ισί ελευθερία». Ο Ιεχωβά ντέλα-αμέν ι ελευθερία τι τθεράς αμαρό χαρακτήρας. Μπορίνασα τι τραμπίνας σο μπεϊντίνασα ντα καλά πράγματα μανγκάσα τι κεράς. Αντικάς κερντάς-αμέν ο Ιεχωβά. Αλλά ανταβά να μανγκέλα τι βακερέλ ότι τθεράσα ελευθερία χωρίς όρια. (Διαβάνεν 1 Πέτρου 2:​16) Κάνα πρέπει τι σικλιάς σο ισί σωστός ή λάθος, ο Ιεχωβά μανγκέλα τι χρησιμοποιήνας λέσκο Λάφι για τι οδηγίνελ-αμέν. Μήπως ανταβά λέλα αμένταρ αμαρί ελευθερία ή ισί αμαρέ λατσσιμάσκε;

7, 8. Χασαράσα αμαρί ελευθερία κάνα ντικχάσα ο πράγματα σαρ ντικχέλα-λεν ο Ιεχωβά; Βακερέν εκ παράδειγμας.

⁷ Σκεφτίνεν εκ παράδειγμας. Ο νταντά ντα ο νταγιά προσπαθίνενα τι σικλιαρέν λατσσέ πράγματα πουμαρέ τσσαβέν, σαρ ισί τι αβέν τίμια, μπουτιαρνέ ντα τι πφαμπόν  ι γιαβερένγκε. Ανταβά να λέλα λένταρ λένγκι ελευθερία. Αλλά αντικάς ο νταντά ντα ο νταγιά προετοιμάνενα πουμαρέ τσσαβέν για τι τθερέν επιτυχία πουμαρέ ζωγιάτε. Κάνα ο τσσαβέ κα μπαριόν ντα κα νασέν κατά κχερ, κα αβέν ελεύθερα τι τραμπίνεν βον πουμένγκε. Άμα κα τραμπίνεν τι ακολουθίνεν πουμαρέ ζωγιάτε ο λατσσό σικλιαριπέ σο ντινέας-λεν λένγκε νταντά ντα νταγιά, κα αβέλ πιο σίγουρος ότι κα λεν λατσσέ αποφάσεις ντα να κα τθερέν μπουτ προβλήματα, ανησυχίες ντα τύψεις.

⁸ Σαρ εκ λατσσό ντατ, ο Ιεχωβά μανγκέλα λέσκε τσσαβέ τι τθερέν ι πιο πφερντί ζωή σο κα μπορίνενας τι τθερέν. (Ησαΐας 48:​17, 18) Οτθάρ, ντέλα-αμέν αρχές για τι σικλιαρέλ-αμέν σαρ τι ατσσάς πάκι λέσκε γιακχίντε ντα σαρ τι συμπεριφερίντιβας κο γιαβερά. Μανγκέλα αμένταρ τι σικλιάς τι ντικχάς ο πράγματα σαρ ντικχέλα-λεν βοβ ντα τι ακολουθίνας λέσκο σικλιαριπέ. Ανταβά να λέλα αμένταρ αμαρί ελευθερία. Αλλά κερέλα-αμέν τι αβάς πιο γκοντιαβέρ ντα βοηθίνελα-αμέν τι λας πιο λατσσέ αποφάσεις. (Ψαλμός 92:5· Παροιμίες 2:​1-5· Ησαΐας 55:9) Κα μπορίνας τι συνεχίνας τι τραμπίνας πράγματα σο μπεϊντίνασα, αλλά οντουλά σο κα τραμπίνας κα ανέν αμένγκε χαρά. (Ψαλμός 1:2, 3) Κάνα σκεφτίνασα σαρ ο Ιεχωβά, ανταβά ισί αμαρέ λατσσιμάσκε!

9, 10. Σο σικαβέλα ότι ο τρόπος σκέψης ι Ιεχωβάσκο ισί πιο λατσσό κατά τρόπος σκέψης ι ντουνιάσκο;

⁹ Εκ γιαβέρ λόγος σο μανγκάσα τι σκεφτίνας σαρ ο Ιεχωβά ισί ότι λέσκο τρόπος σκέψης ισί μπουτ πιο λατσσό κατά τρόπος σκέψης ι ντουνιάσκο. Ο ντουνιάς ντέλα συμβουλές για τι βακερέλ σο ισί σωστός, σαρ τι τθεράς ευτυχισμέ φαμιλί ντα σαρ τι τθεράς επιτυχία αμαρέ μπουτιάτε ντα γιαβερέ πραγματέντε. Αλλά ο πιο μπουτ συμβουλές ι ντουνιάσκε να συμφωνίνενα με το τρόπος σο σκεφτίνελα ο Ιεχωβά. Για παράδειγμας, ο ντουνιάς μπουτ φαρ κερέλα ι τζενέν τι ντικχέν σάντε πουμαρό συμφέρον ντα τι αμντίνεν ότι ο λουμνιπέ νανέ μπέτι πράγμας. Ντα ισί φαρ σο βακερέλα ότι ο αντρόγυνα κα αβέν πιο ευτυχισμέ άμα κα χωρίνεν ή κα λεν διαζύγιος, ατζέ-ντα χωρίς τι τθερέν σοβαρός λόγος. Ασακέ συμβουλές τζάνα κόντρα κι Γραφή. Αλλά μήπως αμαρέ ντιβεσέντε ο συμβουλές ι ντουνιάσκε ισί πιο λατσσέ κατά συμβουλές ι Γραφιάκε;

¹⁰ Ο Ιησούς βακερντάς: «Η σοφία αγαντίντιβελα δίκαια οντουλένταρ σο κερέλα». (Ματθαίος 11:​19) Παρόλο σο ο ντουνιάς κερντάς μπουτ πρόοδος κι τεχνολογία, να μπορισάλο τι λύνελ ο μπαρέ προβλήματα, σαρ ισί ο τζένγκια, ο ρατσισμός ντα ο έγκλημας, σο να μουκχένα-αμέν τι αβάς ευτυχισμέ. Επίσης, ο ντουνιάς πακιάλα ότι ο λουμνιπέ νανέ μπέτι πράγμας. Αλλά μπουτ τζενέ παραδεχτίνενα ότι καταστραφίνελα ο φαμιλιά, ανέλα νασφαλίματα ντα γιαβερά μπέτι αποτελέσματα. Οκιά μπάνταρ όμως, ο Χριστιανοί σο δεχτίνενα ο συμβουλές ι Ιεχωβάσκε τθερένα πιο ευτυχισμέ φαμιλιά,  πιο λατσσί υγεία ντα ειρηνικές σχέσεις πουμαρέ πφραλέντζαρ ντα πφενίντζαρ σαρό κο ντουνιάς. (Ησαΐας 2:4· Πράξεις 10:​34, 35· 1 Κορινθίους 6:​9-11) Ανταβά σικαβέλα ξεκάθαρα ότι ο τρόπος σκέψης ι Ιεχωβάσκο ισί πιο λατσσό κατά τρόπος σκέψης ι ντουνιάσκο.

11. Κον επηρεαντάς ο τρόπος σκέψης ι Μωυσίσκο, ντα καβά ισινέ ο αποτέλεσμας;

¹¹ Ο πιστοί υπηρέτες ι Ιεχωβάσκε κο πουρανέ μπρεσά τζανένας ότι ο τρόπος σκέψης ι Ιεχωβάσκο ισί πιο λατσσό. Για παράδειγμας, παρόλο σο ο Μωυσής σικλιλόας «σαρί η σοφία ι Αιγυπτιόνγκι», τζανέλας ότι η αληθινή σοφία αβέλα κατά Ιεχωβά. (Πράξεις 7:​22· Ψαλμός 90:​12) Οτθάρ, μολιντάς ι Ιεχωβάς: «Κερ-μαν τι σικλιάβ το ντρομ». (Έξοδος 33:​13) Ο Μωυσής μουκχέλας ι Ιεχωβάς τι επηρεάνελ λέσκο τρόπος σκέψης, οτθάρ ο Ιεχωβά χρησιμοποιηντάς-λες εκχέ μπουτ εντυπωσιακέ τροπόσαρ για τι κερέλ Πο σκοπός ντα ισαρντάς-λες κάνα βακερντάς ότι ισινέ εκ τζενό σο τθερέλας μπαρί πίστη.​—Εβραίους 11:​24-27.

12. Κατέ στηρίνελας ο Παύλος πο αποφάσεις;

¹² Ο απόστολος Παύλος ισινέ εκ έξυπνος ντα μορφωμέ τζενό σο κερέλας λάφι εμ εβραϊκά εμ μπαλαμανές. (Πράξεις 5:​34· 21:​37, 39· 22:2, 3) Αλλά να ακολουθιντάς ι ντουνιάσκι σοφία ντα λέλας αποφάσεις σο στηρίντιβενας κο Λάφι κι Ντεβλέσκο. (Διαβάνεν Πράξεις 17:2· 1 Κορινθίους 2:6, 7, 13) Οτθάρ, τθερέλας μπαρί επιτυχία κο έργος ντα μπεσέλας σαρ σαρ τι λελ εκ ευλογία σο κα ατσσόλ για πάντα.​—2 Τιμόθεο 4:8.

13. Κον τθερέλα ι ευθύνη τι αλλάνελ αμαρό τρόπος σκέψης για τι ντικχάς ο πράγματα σαρ ο Ιεχωβά;

¹³ Σίγουρα, ο τρόπος σκέψης ι Ντεβλέσκο ισί μπουτ πιο λατσσό κατά τρόπος σκέψης ι ντουνιάσκο. Άμα ακολουθίνασα ο κανόνες ι Ντεβλέσκε, κα αβάς μπαγιά ευτυχισμέ ντα κα τθεράς επιτυχία αμαρέ ζωγιάτε. Αλλά ο Ιεχωβά να κα κερέλ-αμέν ζορίσαρ τι σκεφτίνας σαρ βοβ. «Ο πιστός ντα φρόνιμος δούλος» να κερέλα κουμάντος αμαρέ σκέψεις. Ούτε ο πρεσβύτεροι κερένα κάτι ασακό. (Ματθαίος 24:​45· 2 Κορινθίους 1:​24) Ο κάθε εκ αμένταρ τθερέλα ι ευθύνη τι αλλάνελ πο τρόπος σκέψης για τι ντικχέλ ο πράγματα σαρ ο Ιεχωβά. Σαρ μπορίνασα τι κεράς-λες ανταβά;

14, 15. (α) Καλά σκέψεις πρέπει τι κεράς για τι σκεφτίνας σαρ ο Ιεχωβά; (β) Σόσκε δεν πρέπει τι μουκχάς ο απόψεις ι ντουνιάσκε τι τζαν αντρέ αμαρέ γκοντιάτε; Βακερέν εκ παράδειγμας.

¹⁴ Ο εδάφιος Ρωμαίους 12:2 βακερέλα: «Μα μουκχέν τουμαρό νεαυτός τι επηρεάντιβελ ανταλέ ντουνιάσταρ, αλλά τι αλλάνεν ντα τι τσσουβέν νεβέ πράγματα τουμαρέ γκοντιάτε, ντα αντικάς τι σικαβέν τουμαρέ νεαυτόσκε ότι οντουβά σο μανγκέλα ο Ντεβέλ ισί λατσσό ντα σωστός ντα τέλειος». Ανταβά εδάφιος σικλιαρέλα-αμέν ότι σο-ντα επηρεάνελας ο τρόπος σο σκεφτίναας πριν τι σικλιάς ι αλήθεια, μπορίνασα τι αλλάνας αμαρέ σκέψεις ντα τι κεράς-λεν τι μοιάζεν πιο μπουτ κι Ντεβλέσκε σκέψεις. Παρόλο σο οντουλά σο νακχλάμ αμαρέ ζωγιάτε αλλά γιαβερά-ντα πράγματα επηρεαντέ ο τρόπος σο σκεφτίνασα, είτε χάνικ είτε μπουτ, αμαρί γκοντί μπορίνελα τι συνεχίνελ τι αλλάνελ. Ντα κα επηρεάνεν-λα πιο μπουτ ο πράγματα σο τραμπίνασα τι σκεφτίνας. Άμα κεράσα σκέψεις για τι αγαβάς σαρ σκεφτίνελα ο Ιεχωβά, κα σικαβάς αμαρέ νεαυτόσκε ότι λέσκε απόψεις ισί πάντα σωστές. Σοράν, κα μανγκάς τι ντικχάς ο πράγματα σαρ ντικχέλα-λεν βοβ.

¹⁵ Αλλά για τι σκεφτίνας σαρ ο Ιεχωβά, δεν πρέπει τι “μουκχάς αμαρό νεαυτός τι  επηρεάντιβελ ανταλέ ντουνιάσταρ”. Ανταβά μανγκέλα τι βακερέλ ότι πρέπει τι τσσιναβάς τι ντικχάς, τι διαβάνας ή τι ασουνάς πράγματα σο τζάνα κόντρα κι Ντεβλέσκε απόψεις. Για τι αγαβάς καζόμ σημαντικός ισί ανταβά, σκεφτίνεν ακαβά παράδειγμας: Εκ τζενό σο μανγκέλα τι τθερέλ πιο λατσσί υγεία μπορεί τι αποφασίνελ τι χαλ πιο λατσσέ χαμπίματα. Αλλά σαρέ λέσκε προσπάθειες κα τζαν χαμέ, άμα χάλα χαμπέ-ντα σο νανέ λατσσό! Αντικάς, ο προσπάθειες σο κεράσα τι σικλιάς σαρ σκεφτίνελα ο Ιεχωβά κα τζαν χαμέ άμα μουκχάσα ο απόψεις ι ντουνιάσκε τι τζαν αντρέ αμαρέ γκοντιάτε.

16. Καλέ πραγμάσταρ πρέπει τι αρακχαβάς-αμέν;

¹⁶ Αβέλα-πες μα τι ασουνάς ή μα τι ντικχάς καέκ πράγμας σο τθερέλα τι κερέλ με το τρόπος σκέψης ανταλέ ντουνιάσκο; Όχι. Καζόμ τζουβντιάσα ανταλέ ντουνιάστε, λέσκε σκέψεις κα αβέν ανγκλ’ αμέντε. (1 Κορινθίους 5:9, 10) Ατζέ-ντα κάνα κεράσα έργος, κα ασουνάς τζενέν σο κα βακερέν λάθος απόψεις ή πράγματα σο πακιάνα. Ατζέ-ντα κάνα ναστί νασάσα ντιπ κατά λάθος απόψεις, να ισινάμ υποχρεωμέ τι συνεχίνας τι σκεφτίνας-λεν ή τι δεχτίνας-λεν. Σαρ ο Ιησούς, πρέπει σουγκό τι κεράς πέρα ο σκέψεις σο κα μανγκέλας ο Μπενγκ τι τθεράς. Ντα μπορίνασα τι αρακχαβάς-αμέν κάνα προσπαθίνασα καζόμ πιο μπουτ αβέλα-πες μα τι ασουνάς ή τι ντικχάς ο πράγματα σο τθερένα τι κερέν με το τρόπος σο σκεφτίνελα ο ντουνιάς.​—Διαβάνεν Παροιμίες 4:23.

17. Σαρ μπορίνασα τι προσπαθίνας καζόμ πιο μπουτ αβέλα-πες μα τι ασουνάς ή τι ντικχάς πράγματα σο τθερένα τι κερέν με το τρόπος σο σκεφτίνελα ο ντουνιάς;

¹⁷ Για παράδειγμας, πρέπει τι τραμπίνας προσεκτικά αμαρέ αμαλέν. Η Γραφή βακερέλα ότι άμα αβάσα αμαλά τζενέντζαρ σο να ντένα λατρεία ι Ιεχωβάς, κα αρχίνας τι σκεφτίνας σαρ βον. (Παροιμίες 13:​20· 1 Κορινθίους 15:​12, 32, 33) Επίσης, πρέπει τι τραμπίνας προσεκτικά αμαρί διασκέδαση. Κάνα κεράσα πέρα ι διασκέδαση σο τσσουβέλα κι τζενένγκι γκοντί ο λουμνικανέ πράγματα, ι εξέλιξη ή ι βία να μουκχάσα τι δηλητηριάνεν αμαρί γκοντί ο απόψεις σο “εμποδίνενα ι τζενέν τι σικλιόν ι Ντεβλές”.​—2 Κορινθίους 10:5.

18, 19. (α) Σόσκε πρέπει τι αρακχαβάς-αμέν μπουτ κατά σκέψεις ι ντουνιάσκε, ντα καλά ισί μερικά παραδείγματα; (β) Καλά ερωτήσεις πρέπει τι κεράς αμαρέ νεαυτόστε, ντα σόσκε;

 ¹⁸ Πρέπει επίσης τι αγαβάς καλά ισί ο απόψεις ι ντουνιάσκε ντα τι κεράς πέρα οντουλά σο νανέ αζόμ ξεκάθαρες. Για παράδειγμας, μερικές ειδήσεις βακέρντιβενα εκχέ τροπόσαρ σο κερέλα τι ντικχίντιβελ μπουτ λατσσί εκ πολιτική άποψη. Ντα μερικές ιστορίες νακχαβένα κο τζενέ στόχους ντα πράγματα σο μανγκέλα μπουτ ο ντουνιάς. Ισί σινεμάδες ντα βιβλία σο σικλιαρένα ι τζενέν τι τσσουβέν πρώτα πουμαρό νεαυτός ή πουμαρί φαμιλί ντα κερένα τι ντικχίντιβελ ότι ανταβά ισί λογικός, σουκάρ ντα σωστός. Αλλά ασακέ απόψεις τζάνα κόντρα κι Γραφή, σο βακερέλα ότι αμέν ντα αμαρί φαμιλί κα αβάς μπαγιά ευτυχισμέ κάνα μανγκάσα ι Ιεχωβάς πιο μπουτ σαριλένταρ. (Ματθαίος 22:​36-39) Επίσης, ισί βιβλία ι χουρντένγκε ντα γκαραγκοζάκια, σο ο πιο μπουτ τζενέ μπορεί τι μπεϊντίνενα-λεν, αλλά κερένα ι χουρντέν τι πακιάν ότι ο λουμνιπέ νανέ μπέτι πράγμας.

¹⁹ Ανταβά να μανγκέλα τι βακερέλ ότι ισί λάθος τι τθεράς λατσσί διασκέδαση. Αλλά πρέπει τι πουτσάς-αμέν: “Αγαβάβα καλά ισί ο απόψεις ι ντουνιάσκε ατζέ-ντα άμα να σικάντιβενα αζόμ ξεκάθαρα; Αρακχαβάβα μι τσσαβέν ντα μαν συγκεκριμέ βιβλιόνταρ ή πραγματένταρ σο ισί κι τηλεόραση; Βοηθίναβα μι τσσαβέν τι ντικχέν ο πράγματα σαρ ο Ιεχωβά για μα τι επηρεάντιβεν κατά ντουνιάσκε απόψεις σο ασουνένα ντα ντικχένα;” Άμα αγαβάσα ι διαφορά σο τθερέλα ο τρόπος σκέψης ι Ντεβλέσκο κατά τρόπος σκέψης ι ντουνιάσκο, να κα “μουκχάς αμαρό νεαυτός τι επηρεάντιβελ ανταλέ ντουνιάσταρ”.

20. Σαρ τραμπίνασα κον κα επηρεάνελ-αμέν;

²⁰ Πρέπει τι ντας-αμέν γκοντί ότι μπορίνασα τι σικλιάς πράγματα είτε κατά Ιεχωβά είτε κατά Μπενγκ ντα λέσκε ντουνιάσταρ. Κον επηρεάνελα-τουμέν; Η απάντηση ισί: Οντουβά σο σικλιόνα πράγματα λέσταρ. Άμα δεχτίνασα ο απόψεις ι ντουνιάσκε, ο ντουνιάς κα επηρεάνελ αμαρό τρόπος σκέψης ντα αντικάς κα σκεφτίνας ντα κα κεράς σάντε ο πράγματα σο μανγκέλα αμαρό νεαυτός. Οτθάρ, ισί μπουτ σημαντικός τι τραμπίνας προσεκτικά σο ντικχάσα, διαβάνασα, ασουνάσα ντα σκεφτίνασα.

21. Σο κα ντικχάς κο γιαβέρ μάθημας;

²¹ Ανταλέ μαθημάστε, σικλιλάμ ότι για τι σκεφτίνας ο πράγματα σαρ ο Ιεχωβά, πρέπει τι κεράς πέρα ο απόψεις ανταλέ ντουνιάσκε. Πρέπει τι σκεφτίνας ο σκέψεις ι Ντεβλέσκε-ντα για τι ντικχάς ο πράγματα σαρ ντικχέλα-λεν βοβ. Κο γιαβέρ μάθημας, κα σικλιάς σαρ τι κεράς-λες ανταβά.