1. Σόσκε χρειαζίντιβασα σαρέ παρηγοριά;

ΣΑΡΕ χρειαζίντιβασα παρηγοριά. Μπορεί αμαρί ζωή τι πφερντιλί ανησυχίες, στεναχώριες ντα βάσανα. Μπορεί τι ταλαιπωρίντιβασα επειδή ισινάμ νασφαλέ, πφουρίλιβασα ή μουλό εκ τζενό σο μανγκάσα. Μπορεί ο τζενέ τι τζάνα αμέντζαρ κόντρα. Ντα ο ντουνιάς, καζόμ τζάλα, αβέλα ατζέ πιο άγριος. Ισί μπαγιά ότι ανταλά «δύσκολα ντα επικίνδυνα» βακίτια σικαβένα ότι τζουβντιάσα κο «τελευταία ντιβεσά» ντα ότι κάθε ντιβές σο νακχέλα αβάσα πιο πασέ κο νεβό ντουνιάς. (2 Τιμόθεο 3:1) Όμως, μπορεί τι μπεκλεντίνασα μπουτ καιρός τι νικιόν μπαγιά ο υποσχέσεις ι Ιεχωβάσκε, ντα αμαρέ δυσκολίες ίσως τι μπαριόνα. Κατέ μπορίνασα τι αρακχάς παρηγοριά;

2, 3. (α) Σο τζανάσα για τον Αββακούμ; (β) Σόσκε κα εξετάνας ο βιβλίος Αββακούμ;

² Για τι αρακχάς ι απάντηση, κα εξετάνας ο βιβλίος σο γραφιντάς ο Αββακούμ. Παρόλο σο η Γραφή να βακερέλα μπουτ πράγματα οντουλένγκε σο κερντάς ο Αββακούμ πι ζωγιάτε,  λέσκο βιβλίος ντέλα μπαρί ενθάρρυνση. Ο ναβ Αββακούμ μάλλον μανγκέλα τι βακερέλ «Τατί Αγκάλι». Ανταβά κα μπορίνελας τι βακέρντιβελ για τη τατί αγκάλι ι Ιεχωβάσκι σο παρηγορίνελα λέσκε υπηρετόν. Ή μπορεί επίσης τι μανγκέλα τι σικαβέλ ότι ασταράσα-λες αμέν σικίς. Ο Αββακούμ κερντάς λάφι κο Ντεβέλ ντα πουτσλάς-λες κάποια πράγματα. Ο Ιεχωβά ντινάς πο πνεύμας κο Αββακούμ για τι γραφίνελ οντιά συζήτηση σόσκε τζανέλας ότι κα βοηθίντιβαας λάταρ.​—Αββακούμ 2:2.

³ Ανταγιά συζήτηση σο τθερέλας ο στεναχωριμέ Αββακούμ ι Ιεχωβάσαρ ισί ο μόνος πράγμας σο βακερέλα η Γραφή λέσκε. Λέσκο βιβλίος όμως ισί οντουλέ πραγματένταρ «σο γραφισάλε κο πουρανέ μπρεσά» κο Λάφι κι Ντεβλέσκο, «για τι τθεράς ελπίδα αντράλ κατά υπομονή σο κεράσα ντα αντράλ κατά παρηγοριά σο ντέλα η Γραφή». (Ρωμαίους 15:4) Σαρ μπορίνελα ο βιβλίος Αββακούμ τι βοηθίνελ ι κάθε εκχές αμένταρ; Βοηθίνελα-αμέν τι αγαβάς σο μανγκέλα τι βακερέλ τι τθεράς εμπιστοσύνη κο Ιεχωβά. Επίσης, η προφητεία σο γραφιντάς ο Αββακούμ ντέλα-αμέν ι σιγουριά ότι μπορίνασα τι τθεράς ειρήνη αμαρέ γκοντιάτε σο-ντα προβλήματα ντα δοκιμασίες τι νακχάσα.

4. Σόσκε ισινέ μπουτ στεναχωριμέ ο Αββακούμ;

⁴ Διαβάνεν Αββακούμ 1:2, 3. Ο Αββακούμ τζουβντιόλας μπουτ δύσκολε ντιβεσέντε. Ο τζενέ ντονταλάι λέσταρ ισινέ γκεραλέ ντα χάνας-πες ι γιαβερέντζαρ, ντα ανταβά στεναχωρίνελας-λες μπουτ. Κατέ-ντα τι ντικχέλας, υπαρχίντιβενας Ισραηλίτες σο αδικίνενας ντα ζορισκιαρένας ο εκ ι γιαβερές. Ο Αββακούμ σκεφτίνελας: “Κάνα κα τσσιναβέν τι κερέν ο γκεραλιπέ; Σόσκε αργίνελα αζόμ μπουτ ο Ιεχωβά τι κερέλ κάτι;” Νιωθίνελας ότι να τθερέλας βοήθεια. Οτθάρ, μολιντάς ι Ιεχωβάς τι κερέλ κάτι. Ο Αββακούμ μπορεί τι αρχίνελας τι αμντίνελ ότι ο Ιεχωβά τσσιναντάας τι πφαμπόλ πι λαόσκε ή ότι να κα κερέλας κάτι. Νιωσάλεν ποτές τουμέν αντικάς;

5. Σο μπορίνασα τι σικλιάς κατά βιβλίος Αββακούμ; (Ντικχ ι φωτογραφία σο ισί κι αρχή)

⁵ Μήπως ο Αββακούμ πουτσέλας ανταλά πράγματα επειδή χασαρντάας πι εμπιστοσύνη κο Ιεχωβά ντα κο υποσχέσεις λέσκε; Σίγουρα όχι! Ο Αββακούμ τθερέλας αμφιβολίες ντα προβλήματα, οτθάρ μανγκέλας βοήθεια κατά Ιεχωβά, κάτι σο σικαβέλα ότι να χασαρντάας πι ελπίδα ντα ότι συνεχίνελας τι τθερέλ εμπιστοσύνη λέστε. Ντικχίντιβελας ξεκάθαρα ότι ο Αββακούμ τθερέλας ανησυχίες ντα ισινέ μπερδεμέ. Ναστί αγαβέλας σόσκε ο Ιεχωβά αργίνελας ντα σόσκε μουκχέλας-λες τι ταλαιπωρίντιβελ αζόμ μπουτ. Κάνα ο Ιεχωβά πι πνευμάσαρ κερντάς-λες τι γραφίνελ πο ανησυχίες, ντινάς-αμέν εκ σημαντικός μάθημας. Δεν πρέπει τι νταράς τι βακεράς κο Ιεχωβά αμαρέ ανησυχίες ή αμφιβολίες. Κι πραγματικότητα, μανγκέλα αμένταρ τι προσευχίντιβας ντα τι πουτράς λέσκε αμαρό γκι. (Ψαλμός 50:​15· 62:8) Ο εδάφιος Παροιμίες 3:5 βακερέλα: «Τι τθερές εμπιστοσύνη κο Ιεχωβά σαρέ τι γκίσαρ ντα μα τι στηρίντιβες κο τρόπος σο  αγαβέσα τούι ο πράγματα». Ο Αββακούμ κερέλας ανταλά λάφια πι ζωγιάτε.

6. Σόσκε ισί σημαντική η προσευχή;

⁶ Ο Αββακούμ τθερέλας εμπιστοσύνη κο Ιεχωβά, σο ισινέ λέσκο Αμάλ ντα Ντατ, ντα πλησιαντάς-λες πρώτα βοβ. Ο Αββακούμ να ανησυχίνελας απλά πι προβληματένγκε ούτε προσπαθίνελας τι αντιμετωπίνελ-λεν κορκορό. Αλλά πουτρέλας πο γκι ντα βακερέλας πο ανησυχίες αντράλ κατά προσευχή. Ανταβά ισί εκ λατσσό παράδειγμας αμένγκε. Ο Ιεχωβά, Οντουβά σο ασουνέλα προσευχή, μανγκέλα τι βακεράς λέσκε αμαρέ ανησυχίες αντράλ κατά προσευχή, ντα αντικάς τι σικαβάς λέσκε αμαρί εμπιστοσύνη. (Ψαλμός 65:2) Κάνα κα κεράς-λες ανταβά, κα ντικχάς σαρ κα απαντίνελ αμαρέ προσευχιέντε. Κα νιωθίνας ότι αγκαλιάνελα-αμέν τατές κάνα παρηγορίνελα ντα οδηγίνελα-αμέν. (Ψαλμός 73:​23, 24) Βοβ κα βοηθίνελ-αμέν τι αγαβάς σαρ ντικχέλα αμαρί κατάσταση, σο-ντα δοκιμασίες τι νακχάσα. Ο προσευχές σο κεράσα κο Ιεχωβά ισί εκ κατά πιο λατσσέ τρόπους για τι σικαβάς αμαρί εμπιστοσύνη λέστε.

7. Σο κερντάς ο Ιεχωβά κάνα ο Αββακούμ βακερντάς λέσκε πο ανησυχίες;

⁷ Διαβάνεν Αββακούμ 1:​5-7. Αφού ο Αββακούμ βακερντάς κο Ιεχωβά πο ανησυχίες, μπορεί τι σκεφτίνελας σο κα κερέλας ο Ιεχωβά. Σαρ Ντατ σο ισί πφερντό αγάπη, ο Ιεχωβά αγαντάς σαρ νιωθίνελας ο Αββακούμ. Τζανέλας ότι ο Αββακούμ ταλαιπωρίντιβελας ντα μολίνελας για βοήθεια. Οτθάρ, ο Ιεχωβά να νευριασάλο λέσαρ αλλά βακερντάς λέσκε σο κα κερέλας μπουτ σουγκό κο Ιουδαίοι σο να ισινέ πιστοί. Μάλλον ο Αββακούμ ισινέ ο πρώτος σο σικλιλό κατά Ιεχωβά ότι λένγκι τιμωρία ισινέ μπουτ πασέ.

8. Σόσκε η απάντηση ι Ιεχωβάσκι να ισινέ οντουβά σο μπεκλεντίνελας ο Αββακούμ;

⁸ Ο Ιεχωβά εξηγιντάς κο Αββακούμ ότι ισινέ έτοιμος τι κερέλ κάτι. Κα τιμωρίνελας ι άγριε ντα πφιρνέ Ιουδαιόν. Κάνα βακερντάς ότι ανταβά κα αβέλας-πες “λένγκε ντιβεσέντε”, ο Ιεχωβά σικαντάς ότι ανταγιά τιμωρία κα αβέλας καζόμ ο Αββακούμ ή ο Ισραηλίτες σο ισινέ αζομάν συνεχίνενας τι τζουβντιόν. Η απάντηση ι Ιεχωβάσκι να ισινέ ακριβώς οντουβά σο μπεκλεντίνελας ο Αββακούμ. Ο Χαλδαίοι, ή γιαβέρτουλους ο Βαβυλώνιοι, ισινέ άγριοι. Ισινέ πιο άγριοι κατά Ισραηλίτες, σο τζανένας μπάριμα ι Ιεχωβάσκε κανόνες. Άρα, σόσκε μανγκέλας ο Ιεχωβά τι χρησιμοποιήνελ ανταλέ άγριε λαός σο πακιάλας ψεύτικε ντεβλέντε για τι τιμωρίνελ πι λαός; Ανταβά κα ανέλας πιο μπουτ προβλήματα σαρό κο Ιούδας. Σο κα σκεφτίνενας άμα ισινένας ο Αββακούμ;

9. Καλά γιαβερά πράγματα πουτσλάς ο Αββακούμ;

⁹ Διαβάνεν Αββακούμ 1:​12-14, 17. Παρόλο σο ο Αββακούμ αγαντάς ότι ο Ιεχωβά κα χρησιμοποιήνελας ι Βαβυλωνιόν για τι τιμωρίνελ ι γκεραλέ τζενέν αζομάν, συνεχίνελας τι αβέλ μπερδεμέ. Αλλά ισινέ ταπεινός ντα αποφασισμέ τι συνεχίνελ τι τθερέλ εμπιστοσύνη κο Ιεχωβά. Βακερντάς ότι ο Ιεχωβά συνεχίνελας τι αβέλ λέσκο «Μπαρ». (Δευτερονόμιο 32:4· Ησαΐας 26:4) Ο Αββακούμ ισινέ σίγουρος ότι ο Ντεβέλ σικαβέλα αγάπη ντα ισί λατσσό, οτθάρ να νταρασάλο τι πουτσέλ ι Ιεχωβάς γιαβερά-ντα πράγματα. Σόσκε κα μουκχέλας ο Ιεχωβά τι αβέν πιο χειρότερα ο πράγματα κο Ιούδας ντα λέσκο λαός τι ταλαιπωρίντιβελ ατζέ πιο μπουτ; Σόσκε να κερέλας κάτι οντιά στιγμή; Σόσκε ο Παντοδύναμος “να κερέλας λάφι” ντα μουκχέλας τι αβέλ πφιρνιπέ παντού αφού βοβ ισί ο «Άγιος»  ντα λέσκε “γιακχά ισί μπουτ πάκι σο ναστί ντικχέλα ο γκεραλιπέ”;

10. Σόσκε μπορεί τι νιωθίνασα αμέν-ντα μπάζιμα σαρ ο Αββακούμ;

¹⁰ Μπάζιμα, μπορεί τι νιωθίνασα σαρ ο Αββακούμ. Ασουνάσα ι Ιεχωβάς. Τθεράσα λέσκε εμπιστοσύνη, διαβάνασα ντα σκεφτίνασα λέσκο Λάφι σο κερέλα αμαρί ελπίδα πιο ζουρανί. Επίσης, σικλιάσα για το υποσχέσεις λέσκε κάνα ασουνάσα οντουλά σο σικλιαρέλα-αμέν λέσκι οργάνωση. Αλλά πάλι μπορεί τι σκεφτίνασα: “Κάνα κα τελειώνεν αμαρέ βάσανα;” Μπορίνασα τι σικλιάς ανταλέσταρ σο κερντάς πιο σοράν ο Αββακούμ.

11. Σο ισινέ αποφασισμέ τι κερέλ ο Αββακούμ;

¹¹ Διαβάνεν Αββακούμ 2:1. Η συζήτηση σο τθερέλας ο Αββακούμ ι Ιεχωβάσαρ βοηθιντάς-λες τι τθερέλ ειρήνη κι γκοντί. Ισινέ αποφασισμέ τι μπεκλεντίνελ τι κερέλ κάτι ο Ιεχωβά. Ο Αββακούμ σικαντάς πάλι ότι ισινέ αποφασισμέ κάνα βακερντάς: «Μπεκλεντίναβα ήσυχα ι ντιβεσέσκε σο κα αβέλ η στεναχώρια». (Αββακούμ 3:​16) Γιαβερά-ντα πιστοί υπηρέτες ι Ντεβλέσκε συνεχιντέ τι μπεκλεντίνεν με υπομονή τι κερέλ κάτι ο Ιεχωβά. Ο παράδειγμας λένγκο ενθαρρύνελα-αμέν επειδή σικαβέλα αμένγκε ότι μπορίνασα τι κεράς ο ίδιος.​—Μιχαίας 7:7· Ιακώβου 5:7, 8.

12. Σο μπορίνασα τι σικλιάς κατά Αββακούμ;

¹² Σο σικλιάσα κατά Αββακούμ; Πρώτον, δεν πρέπει ποτές τι τσσιναβάς τι προσευχίντιβας κο Ιεχωβά σο-ντα προβλήματα τθεράσα. Δεύτερον, πρέπει τι ασουνάς σο βακερέλα αμένγκε ο Ιεχωβά αντράλ πι Λαφίσταρ ντα κατά οργάνωση. Ντα τρίτον, πρέπει τι μπεκλεντίνας με υπομονή τι κερέλ κάτι ο Ιεχωβά ντα τι τθεράς εμπιστοσύνη ότι βοβ κα νασκιαρέλ αμαρί ντουκχ κάνα κα αβέλ λέσκο βακίτι. Αν κα μοιάζας κο Αββακούμ, κα τθεράς ειρήνη αμαρέ γκοντιάτε ντα κα μπορίνας τι νταϊντίνας. Αμαρί ελπίδα κα βοηθίνελ-αμέν τι τθεράς υπομονή ντα χαρά σο-ντα προβλήματα τι νακχάσα. Ισινάμ σίγουροι ότι αμαρό Ντατ σο ισί κο ουρανός κα κερέλ κάτι.​—Ρωμαίους 12:12.

13. Σαρ παρηγοριντάς ο Ιεχωβά τον Αββακούμ;

¹³ Διαβάνεν Αββακούμ 2:3. Μπορίνασα τι αβάς σίγουροι ότι ο Ιεχωβά χαιρισάλο σο ο Αββακούμ αποφασιντάας τι μπεκλεντίνελ λέσκε. Ο Παντοδύναμος τζανέλας ακριβώς σο νακχέλας ο Αββακούμ, οτθάρ παρηγοριντάς-λες ντα με αγάπη βακερντάς λέσκε ότι μπουτ σουγκό κα απαντίνελας λέσκε ερωτησιέντε σο νικιόνας λέσκε γκίσταρ. Μπουτ σουγκό κα νασέλας κατά Αββακούμ ο πφαριπέ σο ανένας λέσκε ο ανησυχίες. Ισινέ σαρ τι βακερέλας ο Ιεχωβά κο Αββακούμ: «Κερ υπομονή, τθερ μάνγκε εμπιστοσύνη. Κα απαντίναβ τι προσευχιάτε ατζέ-ντα άμα ντικχίντιβελα ότι αργίνελα μι απάντηση». Ο Ιεχωβά βακερντάς λέσκε ότι ήδη αποφασιντάας κάνα κα κερέλας τι νικιόν μπαγιά Λέσκε υποσχέσεις. Οτθάρ, ενθαρρυντάς-λες τι συνεχίνελ τι μπεκλεντίνελ. Τελικά, ο προφήτης  σίγουρα να κα χασαρέλας πο κουράγιος.

14. Σο πρέπει τι αβάς αποφασισμέ τι κεράς κάνα νακχάσα δοκιμασίες;

¹⁴ Αμέν-ντα πρέπει τι μπεκλεντίνας τι κερέλ κάτι ο Ιεχωβά. Επίσης, χρειαζίντιβελα τι ασουνάς προσεκτικά οντουλά σο βακερέλα αμένγκε. Αντικάς κα τθεράς σιγουριά ντα ειρήνη αμαρέ γκοντιάτε σο-ντα δοκιμασίες τι νακχάσα. Ο Ιησούς βακερντάς αμένγκε μα τι ντας σαρί αμαρί προσοχή “κο σαάτια ή κο βακίτια” σο ο Ντεβέλ να μουτθαντάς-λεν αμένγκε ατζέκ. (Πράξεις 1:7) Πρέπει τι τθεράς εμπιστοσύνη ότι ο Ιεχωβά τζανέλα καβά ισί ο πιο λατσσό βακίτι για τι κερέλ κάτι. Οτθάρ, δεν πρέπει τι παρατίνας-λεν αλλά πρέπει τι αβάς ταπεινοί ντα τι τθεράς υπομονή ντα πίστη κο Ντεβέλ. Ντα καζόμ μπεκλεντίνασα, ισί λατσσό τι χρησιμοποιήνας αμαρό χρόνος γκοντιάσαρ ντα τι υπηρετίνας ι Ιεχωβάς καζόμ αβέλα-πες πιο λατσσές.​—Μάρκος 13:​35-37· Γαλάτες 6:9.

15, 16. (α) Καλά υποσχέσεις μπορίνασα τι αρακχάς κο βιβλίος Αββακούμ; (β) Σο σικλιαρένα-αμέν ανταλά υποσχέσεις;

¹⁵ Ο Ιεχωβά ντινάς πο λάφι: «Ο δίκαιος κα τζουβντιόλ χάρη κι πίστη σο τθερέλα» ντα «σαρέ ο τζενέ οπράλ κι πφουβ κα σικλιόν για τη δόξα ι Ιεχωβάσκι». (Αββακούμ 2:4, 14) Βα, ο Ιεχωβά ντέλα πο λάφι τι ντελ ζωή για πάντα οντουλέντε σο κερένα υπομονή ντα τθερένα λέσκε εμπιστοσύνη.

¹⁶ Η υπόσχεση σο αρακχάσα κο εδάφιος Αββακούμ 2:4 ισί αζόμ σημαντική σο ο απόστολος Παύλος τσσουντάς ανταβά  εδάφιος τριν φαρ πι επιστολέντε! (Ρωμαίους 1:​17· Γαλάτες 3:​11· Εβραίους 10:​38) Μπορίνασα τι αβάς σίγουροι ότι σο-ντα δυσκολίες νακχάσα, κα ντικχάς τι νικιόν μπαγιά ι Ιεχωβάσκε υποσχέσεις άμα τθεράσα λέσκε εμπιστοσύνη. Ο Ιεχωβά μανγκέλα αμένταρ τι ατσσικιαράς αμαρέ γκοντιάτε ι ελπίδα σο τθεράσα για το μέλλον.

17. Σο κα κερέλ αμένγκε ο Ιεχωβά άμα τθεράσα εμπιστοσύνη λέστε;

¹⁷ Ο βιβλίος Αββακούμ ντέλα σαρέ αμέντε σο τζουβντιάσα κο τελευταία ντιβεσά εκ σημαντικός μάθημας. Ο Ιεχωβά ντέλα πο λάφι ότι κα ντελ ζωή για πάντα σαρέ κο δίκαια τζενέ σο τθερένα εμπιστοσύνη λέστε. Οτθάρ, τι συνεχίνας τι κεράς πιο μπαρί αμαρί εμπιστοσύνη κο Ντεβέλ, σο-ντα προβλήματα ή ανησυχίες τθεράσα. Ο λάφια σο βακερντάς ο Ιεχωβά κο Αββακούμ ντένα-αμέν ι σιγουριά ότι κα στηρίνελ-αμέν ντα κα σώνελ-αμέν. Λατσσιμάσαρ, μανγκέλα αμένταρ τι τθεράς εμπιστοσύνη λέστε ντα τι μπεκλεντίνας με υπομονή ο βακίτι σο τραμπιντάς για τι κυβερνίνελ λέσκι Βασιλεία κι πφουβ. Αζομάν, η πφουβ κα αβέλ πφερντί ευτυχισμέ ντα ειρηνικέ τζενέντζαρ σο ντένα λατρεία ι Ιεχωβάς.​—Ματθαίος 5:5· Εβραίους 10:​36-39.

18. Σαρ επηρεαντέ ο λάφια ι Ιεχωβάσκε τον Αββακούμ;

¹⁸ Διαβάνεν Αββακούμ 3:​16-19. Ο λάφια σο βακερντάς ο Ιεχωβά κο Αββακούμ επηρεαντέ-λες μπουτ. Ο Αββακούμ σκεφτιντάς ο μπαρέ πράγματα σο κερντάας ο Ιεχωβά πι λαόσκε πιο τζανγκλέ. Οτθάρ, η εμπιστοσύνη σο τθερέλας κο Ιεχωβά μπαριλί. Τζανέλας ότι ο Ιεχωβά μπουτ σουγκό κα κερέλας κάτι! Ανταβά παρηγοριντάς-λες, παρόλο σο τζανέλας ότι μπορεί τι ταλαιπωρίντιβελας για χάνικ ατζέκ. Ο Αββακούμ τσσιναντάς τι τθερέλ αμφιβολίες. Πακιάλας σαρέ πι γκίσαρ ότι ο Ιεχωβά κα σώνελας-λες. Κι πραγματικότητα, ο λάφια σο βακερέλα κο εδάφιος 18 ισί κατά πιο σουκάρ λάφια ι Γραφιάκε σο σικαβένα εμπιστοσύνη. Μερικά σπουδαγμέ τζενέ σο ασχολίντιβενα ι Γραφιάσαρ πακιάνα ότι ανταλά λάφια μανγκένα τι βακερέν: «Κα χουτάβ χαράσαρ ι Κυριόσκε· κα κχελάβ κατά μπαρί χαρά σο τθεράβα ι Ντεβλέσκε». Σο σουκάρ μάθημας σαρέ αμένγκε! Ο Ιεχωβά να ντινάς-αμέν σάντε σουκάρ υποσχέσεις για το μέλλον, αλλά ντινάς-αμέν ι σιγουριά-ντα ότι μπουτ σουγκό κα κερέλ τι νικιόν μπαγιά λέσκε υποσχέσεις.

19. Σαρ μπορίνασα τι λας αμέν-ντα παρηγοριά κατά Ιεχωβά σαρ ο Αββακούμ;

¹⁹ Ο σημαντικός μάθημας σο σικλιάσα κατά βιβλίος Αββακούμ ισί τι τθεράς εμπιστοσύνη κο Ιεχωβά. (Αββακούμ 2:4) Για τι συνεχίνας τι τθεράς εμπιστοσύνη κο Ιεχωβά, πρέπει τι κεράς αμαρί φιλία λέσαρ πιο ζουρανί. Για τι κεράς-λες ανταβά χρειαζίντιβελα τι κεράς κάτι. (1) Τι κεράς συνέχεια προσευχή ντα τι βακεράς κο Ιεχωβά σαρέ ο ανησυχίες σο τθεράσα. (2) Τι ασουνάς προσεκτικά σο βακερέλα αμένγκε ο Ιεχωβά πι Λαφίσταρ ντα τι ακολουθίνας ο οδηγίες σο ντέλα κατά οργάνωση. (3) Τι τθεράς πίστη ντα υπομονή καζόμ μπεκλεντίνασα τι κερέλ ο Ιεχωβά πο υποσχέσεις τι νικιόν μπαγιά. Ανταβά κερντάς ο Αββακούμ. Παρόλο σο ισινέ μπουτ στεναχωριμέ κάνα αρχισάλο τι συζητίνελ ι Ιεχωβάσαρ, κο τέλος ενθαρρύντιλοας ντα ισινέ χαρούμενος! Αν κα μοιάζας κο Αββακούμ, αμέν-ντα κα παρηγορίντιβας κι τατί αγκάλι αμαρέ Νταντέσκι, κι Ιεχωβάσκι. Αβέλα-πες τι τθεράς πιο μπαρί παρηγοριά ανταλέ πφιρνέ ντουνιάστε;