1, 2. (α) Σο βοηθίνελα-αμέν τι νταϊντίνας ο κάθε ντιβές; Εξηγίνεν. (β) Σο κα ντικχάς ανταλέ μαθημάστε;

«ΚΑΝΑ σκεφτίναβα ι δοκιμασία σο νακχλόμ, τζανάβα ότι ναστί κα ντάβας-λεν πέρα μιρέ ζοριάσαρ». Βακερντέν τουμέν ποτές κάτι ασακό; Μπουτ αμένταρ βακερντάμ-λες. Μπορεί τι νταϊντιντέν εκ πφαρό νασφαλιπέ ή ο μεριπέ εκχέ τζενέσκο σο μανγκένας. Κάνα ανένα-λες ανταβά τουμαρέ γκοντιάτε, αγαβένα ότι νταϊντίνενας ο κάθε ντιβές σάντε επειδή ο άγιος πνεύμας ι Ιεχωβάσκο ντέλας-τουμέν ι «ζορ σο ισί πιο μπαρί [τουμαρέ] ζοριάταρ».​—2 Κορ. 4:​7-9.

² Επίσης, χρειαζίντιβασα ο άγιος πνεύμας για τι τζας κόντρα ανταλέ πφιρνέ ντουνιάστε. (1 Ιωάν. 5:​19) Πρέπει τι τζας κόντρα κο “δαίμονες-ντα”. (Εφεσ. 6:​12) Ακανά κα ντικχάς καλέ ντουέ τροπόντζαρ βοηθίνελα-αμέν ο άγιος πνεύμας σαρέ ανταλέ προβληματέντε. Σοράν κα ντικχάς σο τι κεράς για τι βοηθίντιβας κατά άγιος πνεύμας καζόμ πιο μπουτ αβέλα-πες.

3. Καβά ισί εκ τρόπος σο βοηθίνελα-αμέν ο Ιεχωβά τι νταϊντίνας ο δοκιμασίες;

³ Ο άγιος πνεύμας ι Ιεχωβάσκο βοηθίνελα-αμέν σόσκε ντέλα-αμέν ι ζορ τι κεράς πράγματα παρόλο σο τθεράσα δοκιμασίες. Ο απόστολος Παύλος αγαβέλας ότι οντουβά σο κερέλας-λες τι συνεχίνελ πι υπηρεσία, παρόλο σο τθερέλας δοκιμασίες, ισινέ ότι ντέλας μπέσα “κι ζορ κι Χριστόσκι”. (2 Κορ. 12:9) Κο δεύτερος ιεραποστολικός ταξίδι, ο Παύλος να ντέλας σάντε μπουτ πι σαατίσταρ κο έργος αλλά κερέλας μπουτί-ντα για τι νικαβέλ ο αναγκαία. Κι Κόρινθος μπεσλό κο Ακύλας ντα κι Πρίσκιλλα, σο λένγκι μπουτί ισινέ τι κερέν τσαντίρια. Η μπουτί ι Παυλόσκι-ντα ισινέ τι κερέλ τσαντίρια, οτθάρ μερικά ντιβεσά τζάλας λέντζαρ κι μπουτί. (Πράξ. 18:​1-4) Ο άγιος πνεύμας ντέλας κο Παύλος ι ζορ τι κερέλ εμ πι μπουτί εμ πο έργος.

4. Καλέ προβλημάσαρ μαρέλας-πες ο Παύλος σαρ βακερένα ο εδάφια 2 Κορινθίους 12:​7β-9;

⁴ Διαβάνεν 2 Κορινθίους 12:​7β-9. Σο μανγκέλας τι βακερέλ  ο Παύλος κάνα βακερντάς ότι μαρέλας-πες “εκχέ καντρέσαρ αντρέ κο σώμας”; Άμα κα τθερένας εκ καντρό αντρέ τουμαρέ σωμάστε, κα ντουκχάνας μπουτ. Ο Παύλος μανγκέλας τι βακερέλ ότι νακχέλας εκ μπαρό πρόβλημας σο ανέλας λέσκε ντουκχ. Βακερντάς ότι ανταβά πρόβλημας ισινέ σαρ «εκ άγγελος ι Μπενγκέσκο» σο να τσσιναβέλας τι “ντελ-λες σαμάρια” (“τι τσαλαβέλ-λες”, υποσ.). Ο Μπενγκ ντα ο δαίμονες μπορεί μα τι τσσουντέας ο καντρό κο σώμας κι Παυλόσκο, δηλαδή μα τι αντέ λέσκε βον ο προβλήματα. Αλλά κάνα ντικχλέ ο «καντρό», μπορεί τι μανγκλέ τι τσσουβέν-λες ατζέ πιο αντρέ, σαρ τι βακεράας, για τι ντουκχαβέν-λες πιο μπουτ. Σο κερντάς ο Παύλος;

5. Σαρ απαντιντάς ο Ιεχωβά κο προσευχές κι Παυλόσκε;

⁵ Κι αρχή, ο Παύλος μανγκέλας τι λοκχιόλ ανταλέ “καντρέσταρ”. Βακερντάς: «Τριν φαρ μολιντόμ ι Κυριός [ι Ιεχωβάς] τι νασέλ ανταβά μάνταρ». Αλλά παρόλο σο κερέλας προσευχές, ο καντρό ατσσόλας λέσκε σωμάστε. Μανγκέλας τι βακερέλ ανταβά ότι ο Ιεχωβά να απαντίνελας λέσκε προσευχιέντε; Νάα. Ο Ιεχωβά απαντιντάς. Να νασκιαρντάς ο πρόβλημας, αλλά ντινάς κο Παύλος ι ζορ τι νταϊντίνελ. Ο Ιεχωβά βακερντάς: «Μι ζορ σικάντιβελα σαστί τούκε κάνα ισινάν μπίζουρανο». (2 Κορ. 12:8, 9) Ο Ντεβέλ βοηθιντάς-λες, ντα ο Παύλος να τσσιναντάς τι αβέλ χαρούμενος ντα τι τθερέλ ειρήνη αντρέ πέστε!​—Φιλιπ. 4:​4-7.

6. (α) Σαρ μπορεί τι απαντίνελ ο Ιεχωβά αμαρέ προσευχιέντε; (β) Καλά λάφια κατά εδάφια σο ισί ατθέ ντένα-τουμέν ζορ;

⁶ Μολιντέν ποτές ι Ιεχωβάς τι νασκιαρέλ τουμένταρ εκ δοκιμασία, σαρ κερντάς ο Παύλος; Άμα κερντέν προσευχές αντράλ τουμαρέ γκίσταρ αλλά ο πρόβλημας να νασλό, ή ατζέ-ντα μπαριλό, μήπως νακχλό τουμαρέ γκοντιάταρ ότι ο Ιεχωβά νανέ ευχαριστιμέ τουμέντζαρ; Άμα βα, ντεν-τουμέν γκοντί ι Παυλός. Ο Ιεχωβά απαντιντάς λέσκε προσευχιέντε ντα σίγουρα κα απαντίνελ τουμαρέντε-ντα! Ο Ιεχωβά μπορεί μα τι νασκιαρέλ ο πρόβλημας. Αλλά αντράλ πι πνευμάσταρ, κα ντελ-τουμέν ι ζορ σο χρειαζίντιβενα για τι νταϊντίνεν-λες. (Ψαλμ. 61:3, 4) Μπορεί τι “περαβέν-τουμέν τελέ”, αλλά ο Ιεχωβά να κα μουκχέλ-τουμέν.​—2 Κορ. 4:8, 9· Φιλιπ. 4:13.

7, 8. (α) Σαρ μοιάζελα ο άγιος πνεύμας ι μπαρμπαλιάσαρ; (β) Σαρ σικαντάς ο Πέτρος σο μπουτί κερέλα ο άγιος πνεύμας;

⁷ Καλέ γιαβερέ τροπόσαρ βοηθίνελα-αμέν ο άγιος πνεύμας; Ο άγιος πνεύμας ισί σαρ εκ λατσσί μπαρμπάλ εκχέ φουρτουνιασμέ ντεριαβάτε. Παρόλο σο ακανά ισινάμ αντρέ κο προβλήματα, ο άγιος πνεύμας τσσίντελα-αμέν τι τζας κο λιμάνι κι νεβέ ντουνιάσκο σο ντινάς πο λάφι τι ανέλ ο Ντεβέλ.

⁸ Ο Πέτρος ισινέ ψαράς, οτθάρ τζανέλας μπουτ ι καραβίνγκε. Κάνα σικαντάς σο μπουτί κερέλα ο άγιος πνεύμας, βακερντάς εκ λάφι σο ντικχίντιβελα ότι τθερέλα τι κερέλ ι καραβίντζαρ. Γραφιντάς: «Ποτές να αβιλί προφητεία επειδή μανγκλάς-λες τζενό, αλλά ο άγιος πνεύμας τσσίντελας ι τζενέν τι βακερέν ι Ντεβλέσκε λάφια». Η πουρανί μπαλαμανί λέξη σο ατθέ βακέρντιβελα «τσσίντελας», μανγκέλα τι βακερέλ «γκερέλας· κατευθίνελας».​—2 Πέτρ. 1:​21· υποσ.

9. Σο αντάς ο Πέτρος κι τζενένγκι γκοντί ι λαφίσαρ «κατευθίνελας»;

⁹ Σο αντάς ο Πέτρος κι τζενένγκι γκοντί ι λαφίσαρ «κατευθίνελας»; Ο Λουκάς, σο γραφιντάς ο Πράξεις, βακερντάς εκ λάφι σο νικιόλα κατά ίδιος ρήμας κι πουρανί μπαλαμανί τσσιπ για τι σικαβέλ εκ καράβι σο γκερέλα-λες η μπαρμπάλ «εκ ακατάρ εκ οκουτάρ». (Πράξ. 27:​15) Εκ σπουδαγμέ τζενό σο ασχολίντιβελα ι Γραφιάσαρ βακερντάς ότι, κάνα ο Πέτρος γραφιντάς ότι ο τζενέ σο γραφιντέ ι Γραφή “κατευθίντιβενας”, βακερντάς εκ μπουτ σουκάρ λάφι σο ανέλας κι τζενένγκι γκοντί ο καράβια. Κι πραγματικότητα,  ο Πέτρος βακερντάς ότι σαρ η μπαρμπάλ τσσίντελα εκ καράβι για τι τζαλ οτθέ σο μανγκέλα, αντικάς ο άγιος πνεύμας-ντα τσσιντιντάς τζενέν τι γραφίνεν ι Γραφή. Οντουβά σπουδαγμέ τζενό βακερντάς ότι οντουλά σο γραφιντέ ι Γραφή ισινέ σαρ καράβια έτοιμα τι τσσίντελ-λεν η μπαρμπάλ. Ο Ιεχωβά κερντάς οντουβά σο χρειαζίντιβελας. Αντάς «ι μπαρμπάλ», ή γιαβέρτουλους ο άγιος πνεύμας. Οντουλά σο γραφιντέ ι Γραφή κερντέ βον-ντα οντουβά σο χρειαζίντιβελας. Κερντέ οντουβά σο σικαντάς λένγκε ο πνεύμας.

10, 11. Καλά ντούι πράγματα πρέπει τι κεράς για τι αβάς σίγουροι ότι τσσίντελα-αμέν ο άγιος πνεύμας; Βακερέν εκ παράδειγμας.

¹⁰ Ακανά ο Ιεχωβά να ντέλα πο άγιος πνεύμας πι υπηρετόντε για τι γραφίνεν βιβλία ι Γραφιάκε. Αλλά ντέλα-λες για τι σικαβέλ λένγκε σο τι κερέν. Ο Ιεχωβά να τσσιναντάς τι κερέλ οντουβά σο χρειαζίντιβελα. Σαρ κα βοηθίντιβας κατά άγιος πνεύμας ι Ντεβλέσκο; Πρέπει τι συνεχίνας αμέν-ντα τι κεράς οντουβά σο χρειαζίντιβελα. Σαρ;

¹¹ Ανέν τουμαρέ γκοντιάτε ακαβά παράδειγμας: Για τι βοηθίνελ-λεν η μπαρμπάλ, ο τζενέ σο ισί κο καράβι πρέπει τι κερέν ντούι πράγματα. Πρώτον, τι γκερέν ο καράβι οτθέ σο πφούντελα η μπαρμπάλ. Ο καράβι να κα τσσίντελ ανγκλάλ άμα κα ατσσόλ εκχέ λιμανίστε σο να κερέλα μπαρμπάλ. Δεύτερον, πρέπει τι βάντεν ο μπαρέ κοτορά ι καραβίσκε ντα τι πουτρέν-λεν καζόμ πιο λατσσές αβέλα-πες. Άμα να κα κερέν-λες ανταβά, ο καράβι να κα νασέλ, ατζέ-ντα άμα κερέλα μπαρμπάλ. Αντικάς αμέν-ντα κα νταϊντίνας κι υπηρεσία κι Ιεχωβάσκι σάντε άμα βοηθίνελα-αμέν ο άγιος πνεύμας. Για τι βοηθίντιβας ανταλέ πνευμάσταρ, πρέπει τι κεράς ντούι πράγματα. Πρώτον, πρέπει τι «γκεράς αμαρό νεαυτός» οτθέ σο ισί ο πνεύμας ι Ντεβλέσκο, ντα τι κεράς πράγματα σο σικαβέλα αμένγκε τι κεράς. Δεύτερον, πρέπει τι «βάντας αμαρέ κοτορά», ντα τι κεράς ανταλά πράγματα καζόμ πιο μπουτ ντα πιο λατσσές αβέλα-πες. (Ψαλμ. 119:​32) Κάνα κεράσα ανταλά πράγματα, ο άγιος πνεύμας κα ντελ-αμέν ζορ τι νταϊντίνας καζόμ τζάνα αμέντζαρ κόντρα ντα τθεράσα δοκιμασίες  μέχρι τι ερεσάς κο νεβό ντουνιάς κι Ντεβλέσκο.

12. Σο κα ντικχάς ακανά;

¹² Μέχρι ακανά, ντικχλάμ καλέ ντουέ τροπόντζαρ βοηθίνελα-αμέν ο άγιος πνεύμας. Ο άγιος πνεύμας ντέλα-αμέν ζορ ντα βοηθίνελα-αμέν τι ατσσάς πιστοί κάνα νακχάσα δοκιμασίες. Ο άγιος πνεύμας βοηθίνελα-αμέν επίσης τι τσσίντας ανγκλάλ ντα τι ατσσάς κο ντρομ σο ντέλα ζωή για πάντα. Ακανά κα ντικχάς σταρ πράγματα σο πρέπει τι κεράς για τι βοηθίντιβας καζόμ πιο μπουτ αβέλα-πες κατά άγιος πνεύμας.

13. Σο μπορίνελα τι κερέλ αμένγκε η Γραφή σαρ βακερένα ο εδάφια 2 Τιμόθεο 3:​16, 17, αλλά σο πρέπει τι κεράς αμέν;

¹³ Πρώτον, τι σικλιαρέν-τουμέν κατά Ντεβλέσκο Λάφι κάθε ντιβές. (Διαβάνεν 2 Τιμόθεο 3:​16, 17) Ο μπαλαμανό λάφι σο μεταφράντιβελα κο ρομανές «ο άγιος πνεύμας ι Ντεβλέσκο βοηθιντάς τι γραφίντιβελ», μανγκέλα τι βακερέλ «ο Ντεβέλ πφουντιντάς». Αντράλ πι πνευμάσταρ, ο Ντεβέλ πφουντιντάς, ή γιαβέρτουλους τσσουντάς κι γκοντί οντουλέ τζενένγκι σο γραφιντέ ι Γραφή οντουλά σο τθερέλας πι γκοντιάτε. Κάνα διαβάνασα ντα σκεφτίνασα ι Γραφή, ο συμβουλές ι Ντεβλέσκε τζάνα αμαρέ γκοντιάτε ντα αμαρέ γκίστε. Ανταλά συμβουλές κατά Ντεβέλ τσσίντενα-αμέν τι τζουβντιάς αντικάς σαρ μανγκέλα ο Ντεβέλ. (Εβρ. 4:​12) Αλλά για τι βοηθίντιβας καζόμ πιο μπουτ αβέλα-πες κατά άγιος πνεύμας, πρέπει τι αρακχάς χρόνος για τι σικλιαράς-αμέν κατά Γραφή κάθε ντιβές ντα τι σκεφτίνας λατσσές οντουλά σο διαβάνασα. Αζομάν ο Λάφι ι Ντεβλέσκο κα επηρεάνελ σαρέ οντουλά σο βακεράσα ντα κεράσα.

14. (α) Σόσκε βακεράσα ότι αμαρέ συναθροισιέντε «πφούντελα μπαρμπάλ»; (β) Σαρ μπορίνασα τι παρακολουθίνας ο συναθροίσεις σαρ «καράβια σο ισί έτοιμα τι τσσίντελ-λεν η μπαρμπάλ»;

¹⁴ Δεύτερον, τι ντεν λατρεία ι Ντεβλές γιεκ ι γιαβερέντζαρ. (Ψαλμ. 22:​22) Κα μπορίναας τι βακεράς ότι ο συναθροίσεις ισί τθανά σο «πφούντελα μπαρμπάλ». Ο πνεύμας ι Ιεχωβάσκο ισί κο συναθροίσεις. (Αποκ. 2:​29) Σόσκε βακεράσα-λες ανταβά; Επειδή κάνα τζάσα κο συναθροίσεις αμαρέ πφραλέντζαρ για τι ντας λατρεία προσευχίντιβασα για άγιος πνεύμας, γκιλιαβάσα ύμνοι σο βασίντιβενα κο Λάφι κι Ντεβλέσκο ντα λάσα σικλιαριπέ κατά Γραφή πφραλένταρ σο διορισάλε κατά άγιος πνεύμας. Ανταβά άγιος πνεύμας βοηθίνελα ι πφενίν-ντα τι ετοιμάνεν ντα τι κερέν πουμαρέ μέρη. Αλλά για τι βοηθίντιβας καζόμ πιο μπουτ αβέλα-πες κατά άγιος πνεύμας, πρέπει τι τζας κο συναθροίσεις προετοιμασμέ ντα τι συμμετεχίνας. Αντικάς παρακολουθίνασα ο συναθροίσεις σαρ «καράβια σο ισί έτοιμα τι τσσίντελ-λεν η μπαρμπάλ».

15. Σαρ βοηθίνελα-αμέν ο άγιος πνεύμας κο έργος;

¹⁵ Τρίτον, τι νικιόν κο έργος. Άμα χρησιμοποιήνασα ι Γραφή κάνα βακεράσα ο λατσσέ αμπέρια ντα σικλιαράσα, μουκχάσα ο πνεύμας ι Ντεβλέσκο τι βοηθίνελ-αμέν κο έργος. (Ρωμ. 15:​18, 19) Αλλά για τι βοηθίντιβεν καζόμ πιο μπουτ αβέλα-πες κατά πνεύμας ι Ντεβλέσκο, πρέπει τι νικιόν συνέχεια κο έργος ντα τι χρησιμοποιήνεν ι Γραφή κάνα αβέλα-πες. Εκ τρόπος για τι κερέν τουμαρό έργος πιο λατσσές ισί τι χρησιμοποιήνεν ο συζητήσεις σο ισί κο Πρόγραμμας Ζωή ντα Έργος.

16. Καβά ισί ο πιο λατσσό τρόπος για τι λας άγιος πνεύμας;

¹⁶ Τέταρτον, τι προσευχίντιβεν κο Ιεχωβά. (Ματθ. 7:​7-11· Λουκ. 11:​13) Ο πιο λατσσό τρόπος για τι λας άγιος πνεύμας ισί τι μανγκάς-λες κατά Ιεχωβά αντράλ κατά προσευχή. Τίποτα ναστί τσσιναβέλα αμαρέ προσευχές τι ερεσέν κο Ιεχωβά ντα τίποτα ναστί τσσιναβέλα ανταβά λατσσό δώρος, ο πνεύμας ι Ντεβλέσκο, τι ερεσέλ αμέντε​—ούτε ο ντουβάρια ι φυλακιάκε ούτε ο Μπενγκ. (Ιακ. 1:​17) Σαρ πρέπει τι προσευχίντιβας για τι βοηθίντιβας καζόμ πιο μπουτ αβέλα-πες κατά άγιος πνεύμας; Για τι σικλιάς, κα ντικχάς εκ  παραβολή σο ισί σάντε κο Ευαγγέλιος κι Λουκάσκο. *

17. Σο σικλιάσα ι προσευχιάκε κατά παραβολή ι Ιησούσκι κο εδάφια Λουκάς 11:​5-9, 13;

¹⁷ Διαβάνεν Λουκάς 11:​5-9, 13. Η παραβολή ι Ιησούσκι σικαβέλα σαρ πρέπει τι μανγκάς ο άγιος πνεύμας αντράλ κατά προσευχή. Ο τζενό κι παραβολή λιντάς σο χρειαζίντιβελας “επειδή επιμίνελας μπουτ”. Να λατζασάλο τι μανγκέλ βοήθεια πι αμαλέσταρ παρόλο σο ισινέ αργά ιράτ. (Ντικχ Παραπομπές του Φυλλαδίου Εργασίας για τη Συνάθροιση Ζωή και Διακονία, Ιούλιος 2018, σημείωση μελέτης «ανυποχώρητης υπομονής») Σο σικλιαρέλα-αμέν ανταγιά παραβολή ι προσευχιάκε; Ο Ιησούς βακερντάς: «Συνεχίνεν τι μανγκέν ντα κα ντιντιόλ-τουμέν· συνεχίνεν τι ρόντεν ντα κα αρακχέν· συνεχίνεν τι μπασκιαρέν ντα κα πουτάρντιβελ τουμένγκε». Οντουβά σο σικλιάσα ισί ότι για τι λας άγιος πνεύμας, δεν πρέπει τι τσσιναβάς τι μανγκάς-λες αντράλ κατά προσευχή.

18. Σόσκε μπορίνασα τι αβάς σίγουροι ότι ο Ιεχωβά κα ντελ-αμέν πο άγιος πνεύμας σαρ βακερέλα η παραβολή ι Ιησούσκι;

¹⁸ Η παραβολή ι Ιησούσκι βοηθίνελα-αμέν επίσης τι ντικχάς σόσκε ο Ιεχωβά κα ντελ-αμέν άγιος πνεύμας. Ο τζενό κι παραβολή μανγκέλας τι κερέλ ο πιο λατσσό πι μισαφιρίσκε. Τζανέλας ότι έπρεπε τι ντελ-λες χαμπέ αλλά να τθερέλας τίποτα. Ο Ιησούς βακερντάς ότι ο γείτονας ντινάς-λες μαντρό σόσκε ο τζενό επιμίνελας μπουτ. Σο μανγκέλας τι σικλιαρέλ ο Ιησούς; Άμα εκ ατελής τζενό μανγκέλα τι βοηθίνελ εκχέ γειτονάς σο επιμίνελα, καζόμ πιο μπουτ κα βοηθίνελ αμαρό λατσσό Ντατ σο ισί κο ουρανός οντουλέν σο να τσσιναβένα τι μανγκέν λέσταρ άγιος πνεύμας! Οντουλέσκε, μπορίνασα τι αβάς σίγουροι ότι ο Ιεχωβά κα ντελ-αμέν πο άγιος πνεύμας κάνα μανγκάσα-λες λέσταρ αντράλ κατά προσευχή.​—Ψαλμ. 10:​17· 66:19.

19. Σόσκε μπορίνασα τι αβάς σίγουροι ότι κα νικίνας;

¹⁹ Μπορίνασα τι αβάς σίγουροι ότι, σο-ντα τι κερέλ ο Μπενγκ για τι περαβέλ-αμέν, αμέν κα νικίνας. Σόσκε; Επειδή ο άγιος πνεύμας βοηθίνελα-αμέν ντουέ τροπόντζαρ. Πρώτον, ντέλα-αμέν ι ζορ σο χρειαζίντιβασα για τι νακχαβάς ο δοκιμασίες. Δεύτερον, ισί η ζορ σο βοηθίνελα-αμέν μα τι τσσιναβάς τι υπηρετίνας ι Ιεχωβάς μέχρι τι ερεσάς κο νεβό ντουνιάς σο κα ανέλ. Τι μανγκάς σαρέ αμαρέ γκίσαρ τι βοηθίντιβας κατά άγιος πνεύμας καζόμ πιο λατσσές αβέλα-πες!