ΜΠΟΥΤ πφραλά ντα πφενιά σο γκιλέ εκχέ γιαβερέ τθεμέστε για τι νικαβέν πιο μπουτ λοβέ βουρτισάλε πουμαρέ τθεμέστε. Επειδή μανγκένα ι Ιεχωβάς ντα ι τζενέν, γκιλέ τθανέντε σο ισί πιο μπαρί ανάγκη τι βακέρντιβεν ο λατσσέ αμπέρια. (Ματθ. 22:​37-39) Καλά πράγματα μουκχλέ για τι κερέν-λες ανταβά, ντα σαρ ευλογιντάς-λεν ο Ιεχωβά; Για τι λας απάντηση, κα ντικχάς παραδείγματα πφραλένγκε ντα πφενίνγκε κατά Καμερούν, σο ισί εκ τθεμ κι Αφρική.

Κο 1998, εκ πφραλ σο βακερένα λέσκε Ονεσίμ νασλό πι τθεμέσταρ κατά Καμερούν ντα 14 μπρεσά τζουβντιλό γιαβερέ τθεμέστε. Εκ ντιβές, εκχέ συναθροισιάτε, ασουντάς εκ παράδειγμας σο τθερέλας τι κερέλ ι εργόσαρ. Ο πφραλ σο κερέλας ι ομιλία βακερντάς: «Άμα ντούι αμαλά γκιλέ τι ασταρέν ματσσέν διαφορετικέ τθανέντε ντα ο εκ ασταρέλας πιο μπουτ ματσσέν, να κα τζάλας ο γιαβέρ-ντα οτθέ σο ισί πιο μπουτ ματσσέ;»

Κάνα ο Ονεσίμ ασουντάς ανταβά παράδειγμας, νακχλό λέσκε γκοντιάταρ τι βουρτίνελ κο Καμερούν, σο οτθέ μπουτ τζενέ μανγκένας τι κερέν μελέτη. Αλλά ανησυχίνελας. Κα σικλιόλας τι μπεσέλ πάλι κο Καμερούν αφού τζουβντιλόας αζόμ μπουτ μπρεσά γιαβερέ τθεμέστε; Για τι ντικχέλ άμα κα μπορίνελας, ο Ονεσίμ γκιλό κο Καμερούν σιοβ μάσεκ. Σοράν, κο 2012, γκιλό για τι τζουβντιόλ οτθέ.

Ο Ονεσίμ βακερέλα: «Έπρεπε τι σικλιάβ κι μπαρί κάψα ντα κο τρόπος σο τζουβντιόνα ο τζενέ. Κι Αίθουσα Βασιλείας, έπρεπε τι σικλιάβ τι μπεσάβ πάλι σε παγκάκια σο να ισινέ άνετα. Αλλά καζόμ πιο μπουτ τθεράβας μι γκοντί κο πρόγραμμας», βακερέλα ασαμάσαρ, «αζόμ πιο μπουτ μπιστράβας ο άνετες καρέκλες σο τθερένας γιαβερά Αίθουσες Βασιλείας».

Κο 2013, ο Ονεσίμ παντρισάλο με τη Ζεραλντίν, σο τζουβντιλίας εννιά μπρεσά κι Γαλλία ντα βουρτισάλιας κο Καμερούν. Σαρ ευλογιντάς-λεν ο Ιεχωβά επειδή τσσουντέ πρώτα πουμαρέ ζωγιάτε ι Ντεβλέσκε πράγματα; Ο Ονεσίμ βακερέλα: «Νακχλάμ γιεκ ι Σχολή για Ευαγγελιστές της Βασιλείας ντα υπηρετίνασα κο Μπέθελ. Κο μπρες σο νακχλό, 20 τζενέ σο κερένας μελέτη αμαρέ κχανγκιριάτε μπολντιλέ. Πακιάβα ότι ακανά ισινόμ κο σωστός τθαν για τι ασταράβ ματσσέν». (Μάρκ. 1:​17, 18) Η Ζεραλντίν βακερέλα: «Τθεράβα πιο μπουτ ευλογίες οντουλένταρ σο κα μπορίναβας τι σκεφτίναβ».

Η Τζούντιθ μπεσέλας κο Ηνωμένες Πολιτείες αλλά μανγκέλας τι κερέλ πιο μπουτ ι Ιεχωβάσκε. Βόι βακερέλα: «Κάθε φαρ σο τζάβας τι ντικχάβ μι φαμιλί κο Καμερούν ντα νασάβας, ροβάβας σόσκε μουκχάβας παλάλ μπερεκέτι τζενέν σο αρχισάλομας τι κεράβ-λεν μελέτη». Όμως, η Τζούντιθ σακιντίνελας τι  βουρτίνελ κο Καμερούν. Τθερέλας εκ λατσσί μπουτί ντα αντικάς μπορίνελας τι ποκινέλ ι γιατρόν σο ντικχένας λάκε νταντές κο Καμερούν. Αλλά η Τζούντιθ ντινάς μπέσα κο Ιεχωβά ντα βουρτισάλι. Βακερέλα ότι σικλιντίνελας μερικέ πραγματένγκε σο τθερέλας κο Ηνωμένες Πολιτείες. Προσευχισάλι όμως κο Ιεχωβά τι βοηθίνελ-λα τι σικλιόλ τι τζουβντιόλ οτθέ ντα ντινάς-λα ζορ εκ επίσκοπος περιοχής πι ρομνιάσαρ.

Κάνα η Τζούντιθ ντέλα-πες γκοντί σαρ γκιλέ ο πράγματα, βακερέλα: «Αντρέ τρινέ μπρεσέντε τθεράβας ι χαρά τι βοηθίναβ σταρέ τζενέν τι μπολντιόν». Η Τζούντιθ αρχισάλι τι υπηρετίνελ σαρ ειδική σκαπάνισσα. Αντιβές, βόι ντα λάκο ρομ, ο Σαμ-Καστέλ, υπηρετίνενα κο έργος περιοχής. Αλλά σο αβιλό-πες λάκε νταντέσαρ; Βόι ντα λάκι φαμιλί αρακχλέ εκ νοσοκομείος εκχέ γιαβερέ τθεμέστε σο κα ποκινέλας ι εγχείρηση λάκε νταντέσκι, ντα σαρέ γκιλέ λατσσές.

Εκ πφραλ σο βακερένα λέσκε Βίκτορ γκιλόας τι μπεσέλ κο Καναδάς. Κάνα διαβαντάς εκ θέμας κι Σκοπιά σο κερέλας λάφι για το πανεπιστήμιος, σκεφτιντάς σο κα κερέλας βοβ-ντα ανταλέσαρ. Τσσιναντάς ο πανεπιστήμιος ντα νακχλό εκ σχολή σο ατσσικιαρέλας πιο χάνικ. Βακερέλα: «Ανταβά βοηθιντάς-μαν τι αρακχάβ εκ μπουτί πιο σουγκό ντα τι κεράβ οντουβά σο μανγκάβας μπουτ βακίτι τι κεράβ​—σκαπανικός». Σοράν, ο Βίκτορ παντρισάλο με την Καρολίν, ντα γκιλέ γιεκ τι ντικχέν ο Καμερούν. Οτθέ, κάνα γκιλέ τι ντικχέν ο γραφείος τμήματος, μερικά πφραλά βακερντέ λένγκε τι σκεφτίνεν άμα κα μπορίνενας τι υπηρετίνεν κο Καμερούν. Ο Βίκτορ βακερέλα: «Να τθεράας κάτι τι τσσιναβέλ-αμέν, ντα επειδή ατσσικιαρντάμας απλή αμαρί ζωή, μπορίναας τι υπηρετίνας οτθέ». Παρόλο σο η Καρολίν τθερέλας κάποια προβλήματα υγείας, αποφασιντέ τι τζαν τι μπεσέν οτθέ.

Ο Βίκτορ ντα η Καρολίν αρχισάλε τι κερέν σκαπανικός για τι βοηθίνεν σαρέ οντουλέν σο μανγκένας τι σικλιόν πιο μπουτ πράγματα κατά Γραφή. Τθερένας λοβέ κι νάκρη, οτθάρ κι αρχή να κερένας μπουτί. Σοράν, γκιλέ χάνικ μάσεκ κο Καναδάς για τι κερέν μπουτί, ντα ανταβά βοηθιντάς-λεν τι βουρτίνεν κο Καμερούν ντα τι συνεχίνεν ο σκαπανικός. Σαρ ευλογιντάς-λεν ο Ιεχωβά; Νακχλέ ι Σχολή για Ευαγγελιστές της Βασιλείας, κερντέ ειδικός σκαπανικός ντα ακανά ισί κι οικοδόμηση. Ο Βίκτορ βακερέλα: «Επειδή μουκχλάμ αμαρί άνετη ζωή, έπρεπε τι ντας μπέσα κο Ιεχωβά, ντα αντικάς ντικχλάμ λέσκο βας».

Κο 2002, ο Αλέν, σο τζάλας κο πανεπιστήμιος κι Γερμανία, διαβαντάς ο φυλλάδιος Νεαροί​—Τι θα Κάνετε με τη Ζωή Σας; Οντουλά σο διαβαντάς τσσιντιντέ-λες τι σκεφτίνελ σο κα κερέλας πι ζωγιάσαρ. Κο 2006, νακχλάς ι Σχολή Διακονικής Εκπαίδευσης ντα μπουτσσάντιλο κο Καμερούν, κο τθεμ σο μπιάντιλο.

Κο Καμερούν, ο Αλέν αρακχλάς εκ μπουτί χάνικ σαατίντζαρ. Σοράν, αρακχλάς εκ γιαβέρ μπουτί ντα νικαβέλας πιο μπουτ λοβέ, αλλά ανησυχίνελας ότι να κα τθερέλας αζόμ μπουτ σαάτι για τι κερέλ έργος. Οντουλέσκε, κάνα βακερντέ λέσκε τι υπηρετίνελ σαρ ειδικός σκαπανέας, δεχτιντάς αμέσως. Λέσκο αφεντικός βακερντάς λέσκε ότι κα ντέλας-λες πιο μπουτ λοβέ, αλλά ο Αλέν να μανγκλάς ντα αβιλό ειδικός σκαπανέας. Σοράν, παντρισάλο με τη Στεφανί, σο μπεσλίας μπουτ μπρεσά κι Γαλλία. Καλά δυσκολίες τθερέλας βόι κάνα γκιλί κο Καμερούν;

Η Στεφανί βακερέλα: «Τθεράβας χουρντέ προβλήματα υγείας ντα αλλεργίες, αλλά τζάβα κο γιατρός ντα ακανά ισινόμ πιο λατσσές». Ευλογισάλε επειδή κερντέ υπομονή. Ο Αλέν  βακερέλα: «Κάνα γκιλάμ τι κεράς έργος κο Κατέ, εκχέ γκαβέστε σο ισί μπουτ ντουρ, αρακχλάμ μπουτέ τζενέν σο μανγκένας τι κερέν μελέτη. Σοράν, κεράας-λεν μελέτη κατά τηλέφωνος. Ντούι τζενέ ανταλένταρ μπολντιλέ, ντα κερντιλό εκ όμιλος». Η Στεφανί βακερέλα: «Η πιο μπαρί χαρά αβέλα κάνα βοηθίνεσα τζενέν τι αφιερώντιβεν κο Ιεχωβά. Ο έργος σο κερντάμ ακατέ ντινάς-αμέν ανταγιά χαρά μπουτ φαρ». Αντιβές, ο Αλέν ντα η Στεφανί υπηρετίνενα κο έργος περιοχής.

Η Ζιζέλ μπολντιλί καζόμ ισινέ κι Ιταλία ντα σπουδάνελας τι αβέλ γιατρός. Κερέλας-λα μελέτη εκ αντρόγυνος σο ισινέ σκαπανείς ντα τθερένας εκ απλή ζωή. Ανταβά κερντάς λάκε εντύπωση ντα μανγκέλας βόι-ντα τι κερέλ πιο μπουτ πράγματα κο έργος. Οτθάρ, η Ζιζέλ λιντάς ο σκαπανικός κάνα τελειωντάς ο σπουδές.

Η Ζιζέλ μανγκέλας τι βουρτίνελ κο Καμερούν για τι κερέλ πιο μπουτ πράγματα κι Ιεχωβάσκι υπηρεσία, αλλά ανησυχίνελας. Βακερέλα: «Κα χασαράβας ο δικαίωμας σο τθεράβας τι μπεσάβ κι Ιταλία ντα κα μουκχάβας μι αμαλέν ντα μι τζενέν σο μπεσένας οτθέ». Όμως, κο Μάιος 2016, η Ζιζέλ βουρτισάλι κο Καμερούν. Χάνικ πιο σοράν, παντρισάλι με τον Λεόνς, ντα ο γραφείος τμήματος κο Καμερούν βακερντάς λένγκε άμα κα μανγκένας τι τζαν κο Αγιός, εκ πόλη σο τθερέλας μπαρί ανάγκη τι βακέρντιβεν ο λατσσέ αμπέρια.

Σαρ ισινέ η ζωή κο Αγιός; Η Ζιζέλ βακερέλα: «Μπάζιμα, να τθεράας ρεύμας για εβδομάδες, ντα ναστί πφεράας αμαρέ κινητά. Ο πιο μπουτ σαάτι ισινέ πφαντέ. Σικλιλόμ τι κεράβ χαμπέ κι γιακ σο πφαμπαράβας καστέντζαρ. Αρατί, λάας καρότσια ντα φακούς για τι ανάς πανί, σόσκε αζομάν τζάνας πιο χάνικ τζενέ». Σο βοηθιντάς-λεν τι νταϊντίνεν; Η Ζιζέλ βακερέλα: «Ο πνεύμας ι Ιεχωβάσκο βοηθιντάς-αμέν τι νταϊντίνας. Κάτι γιαβέρ ισινέ ότι μο ρομ ντα με βοηθίναας μπουτ ο εκ ι γιαβερές. Επίσης, αμαρί φαμιλί ντα αμαρέ αμαλά ντένας-αμέν ζορ ντα μπάζιμα βοηθίνενας-αμέν πουμαρέ λοβέντζαρ».

Ισί χαρούμενη η Ζιζέλ σο βουρτισάλι πι τθεμέστε; «Βα! Σίγουρα!», βακερέλα. «Τθεράας δυσκολίες κι αρχή ντα νιωθίναας ότι να τθεράας ζορ, αλλά κάνα νακχαντάμ-λεν σαρέ ανταλά, αγαντάμ ότι κερντάμ ακριβώς οντουβά σο έπρεπε τι κεράς. Ντάσα μπέσα κο Ιεχωβά ντα νιωθίνασα πιο πασέ λέστε». Ο Λεόνς ντα η Ζιζέλ νακχλέ ι Σχολή για Ευαγγελιστές της Βασιλείας, ντα ακανά ισί προσωρινοί ειδικοί σκαπανείς.

Σαρ ο ψαράδες τζάνα τι ασταρέν ματσσέν παρόλο σο τθερένα δυσκολίες, αντικάς οντουλά-ντα σο βουρτίνενα πουμαρέ τθεμέστε κερένα θυσίες αντράλ πουμαρέ γκίσταρ για τι βοηθίνεν ι τζενέν σο τθερένα λατσσό γκι ντα μανγκένα τι ασουνέν ο αμπέρια ι Βασιλειάκε. Ο Ιεχωβά να κα μπιστρέλ σαρέ οντουλά σο κερντέ ανταλά μπουτιαρνέ πφραλά ντα πφενιά ντα ι αγάπη σο σικαντέ λέσκε ναβέσκε. (Νεεμ. 5:​19· Εβρ. 6:​10) Άμα τζουβντιόνα εκχέ γιαβερέ τθεμέστε ντα ισί ανάγκη τι βακέρντιβεν ο λατσσέ αμπέρια τουμαρέ τθεμέστε, μήπως μπορίνενα τι βουρτίνεν; Άμα κα κερέν-λες ανταβά, ο Ιεχωβά κα ευλογίνελ-τουμέν.​—Παρ. 10:22.