1. Σο μπέκιμ τι πουτσάσα-αμέν;

 ΜΗΠΩΣ μπάζιμα τσσουβένα τουμαρέ γκίστε κάνα ανένα τουμαρέ γκοντιάτε οντουλά σο κα αβέν-πες ανγκλ’ αμέντε, σαρ ισί ότι κα αβέλ καταστροφή η ψεύτικη θρησκεία, ότι ο Γωγ του Μαγώγ κα τσσουβέλ-λεν ι Ντεβλέσκε λαόσαρ ντα ότι κα αβέλ-πες ο Αρμαγεδδώνας; Μήπως πουτσένα-τουμέν: “Κα μπορίναβ τι ατσσάβ πιστός κάνα κα αβέν-πες ανταλά πράγματα;” Άμα νακχένα τουμαρέ γκοντιάταρ ασακέ ερωτήσεις, κα βοηθίντιβεν κατά λάφια ι Ιησούσκε σο ισί κο εδάφιος ανταλέ μαθημάσκο. Ο Ιησούς βακερντάς πι μαθητένγκε: «Μα τι νταρέλ τουμαρό γκι. Τι τθερέν πίστη». (Ιωάν. 14:1) Η ζουρανί πίστη κα βοηθίνελ-αμέν τι νταϊντίνας σο-ντα κα αβέλ-πες ανγκλ’ αμέντε.

2. Σαρ κα μπαριαράς αμαρί πίστη, ντα σο κα ντικχάς ανταλέ μαθημάστε;

² Άμα σκεφτίνασα σο κεράσα ακανά κάνα αβένα-πες πράγματα σο δοκιμάνενα αμαρί πίστη, κα τζανάς σαρ τι κεράς πο ζουρανί αμαρί πίστη. Κάνα ανάσα-λες αμαρέ γκοντιάτε ανταβά, κα αρακχάς καλέ πραγματέντε πρέπει τι μπαριαράς αμαρί πίστη. Κάθε φαρ σο νακχάσα εκ δοκιμασία, αμαρί πίστη αβέλα πο ζουρανί. Ανταβά κα βοηθίνελ-αμέν τι νταϊντίνας δοκιμασίες σο κα τθεράς ανγκλ’ αμέντε. Ανταλέ μαθημάστε, κα ντικχάς σταρ πράγματα σο νακχλέ ο μαθητές ι Ιησούσκε ντα σικαντέ ότι έπρεπε τι τθερέν πο μπουτ πίστη. Σοράν, κα ντικχάς σαρ μπέκιμ τι νακχάς αμέν-ντα ασακέ δυσκολίες αντιβές ντα σαρ μπορίνενα ανταλά δυσκολίες τι προετοιμάνεν-αμέν οντουλένγκε σο κα αβέν-πες ανγκλ’ αμέντε.

3. Σο βοηθίνενα-αμέν τι αγαβάς ο λάφια ι Ιησούσκε σο ισί κο εδάφια Ματθαίος 6:​30, 33;

³ Ισί λογικός εκχέ μουρσέσκε σο ισί ο σορό κι φαμιλί τι μανγκέλ τι ντελ χαμπέ, σέα ντα εκ τθαν τι μπεσέλ λέσκι ρομνί ντα λέσκε τσσαβέ. Ανταβά νανέ πάντα εύκολος ανταλέ δύσκολε  ντιβεσέντε. Μερικά πφραλά ντα πφενιά χασαρντέ πουμαρί μπουτί ντα παρόλο σο μαρένα-πες τι αρακχέν εκ γιαβέρ μπουτί ναστί αρακχλέ. Γιαβερά να μανγκλέ τι λεν εκ μπουτί σο ναστί κερένα ο Χριστιανοί. Κάνα αβένα-πες ασακέ πράγματα, πρέπει τι τθεράς ζουρανί πίστη ότι ο Ιεχωβά κα ντελ σίγουρα οντουλά σο χρειαζίντιβασα αμαρέ φαμιλιάκε. Ο Ιησούς σικαντάς-λες μπουτ λατσσές ανταβά πι μαθητένγκε κι Επί του Όρους Ομιλία σο κερντάς. (Διαβάνεν Ματθαίος 6:​30, 33) Κάνα ισινάμ ντιπ σίγουροι ότι ο Ιεχωβά να κα μουκχέλ-αμέν, κα μπορίνας τι τθεράς αμαρέ γιακχά κι υπηρεσία κι Ιεχωβάσκι. Καζόμ κα ντικχάς σαρ βοηθίνελα-αμέν ο Ιεχωβά οντουλέντζαρ σο τθεράσα ανάγκη, κα αβάς πο πασέ λέστε ντα αμαρί πίστη κα μπαριόλ.

4, 5. Σο βοηθιντάς εκχέ φαμιλιά μα τι τσσουβέλ πι γκίστε οντουλένγκε σο τθερέλα ανάγκη;

⁴ Ντικχέν σαρ εκ φαμιλί κι Βενεζουέλα ντικχλάς ο βας ι Ιεχωβάσκο κάνα τσσουβέλας πι γκίστε οντουλένγκε σο τθερέλας ανάγκη. Ανγκλέ, η φαμιλί Κάστρο νικαβέλας μερικά λοβέ κατά φάρμα σο τθερένας. Εκ ντιβές όμως, μερικά μουρσά πιστολίντζαρ λιντέ λένγκο τθαν ντα κερντέ-λεν τι νασέν. Ο ντατ, ο Μιγκέλ, βακερέλα: «Ακανά κεράσα μπουτί εκχέ χουρντέ χωραφίστε σο ισί εκχέ γιαβερέ τζενέσκο. Κάθε πρωί, μανγκάβα κατά Ιεχωβά τι ντελ-αμέν οντουλά σο τθεράσα ανάγκη οντουβά ντιβές». Η ζωή ισί δύσκολη ι φαμιλιάκε Κάστρο, αλλά επειδή τθερένα μπαρί πίστη ότι αμαρό λατσσό Ντατ μπορίνελα τι ντελ-λεν ο πράγματα σο τθερένα ανάγκη κάθε ντιβές, να χασαρένα ο συναθροίσεις ντα νικιόνα κο έργος. Τσσουβένα πρώτα πουμαρέ ζωγιάτε ι Βασιλεία, ντα ο Ιεχωβά ντέλα-λεν σο-ντα τθερένα ανάγκη.

⁵ Ανταλέ δύσκολε ντιβεσέντε, ο Μιγκέλ ντα λέσκι ρομνί, η Γιουράι, τθερένα πουμαρέ γιακχά οντουλέντε σο κερντάς λένγκε ο Ιεχωβά. Μπάζιμα, ο Ιεχωβά χρησιμοποιηντάς πφραλέν ντα πφενίν τι ντεν-λεν μερικά πράγματα σο τθερένας ανάγκη ή τι βοηθίνεν ι Μιγκελίς τι αρακχέλ μπουτί. Γιαβερά φαρ, ο Ιεχωβά αντράλ κατά γραφείος τμήματος ντινάς-λεν μερικά πράγματα σο τθερένας ανάγκη. Ο Ιεχωβά ποτές να μουκχλάς-λεν. Αντικάς, η πίστη ι φαμιλιάκι αβιλί πο ζουρανί. Αφού βακερντάς σαρ βοηθιντάς-λεν ο Ιεχωβά, λένγκι μπαρί τσσάι, η Γιοσελίν, βακερντάς: «Λάβα μπαρί ζορ κάνα ντικχάβα ο βας ι Ιεχωβάσκο αζόμ λατσσές. Ισί μο αμάλ ντα ισινόμ σίγουρη ότι πάντα κα βοηθίνελ-μαν». Σοράν βακερντάς: «Ο προβλήματα σο νακχλάμ σαρ φαμιλί προετοιμαντέ-αμέν πο μπαρέ προβληματένγκε σο κα τθεράς ανγκλ’ αμέντε».

6. Σαρ κα μπαριαρέν τουμαρί πίστη κάνα τθερένα οικονομικά προβλήματα;

⁶ Μήπως τθερένα οικονομικά προβλήματα; Άμα βα, ανταβά ισί δύσκολος βακίτι τουμένγκε. Αλλά μπορίνενα τι κερέν ο πο λατσσό για τι κερέν πο ζουρανί τουμαρί πίστη. Κερέν προσευχή κο Ιεχωβά ντα διαβάνεν ο λάφια ι Ιησούσκε σο ισί γραμμέ κο εδάφια Ματθαίος 6:​25-34 ντα σκεφτίνεν-λεν μπουτ λατσσές. Ανέν τουμαρέ γκοντιάτε εμπειρίες αμαρέ ντιβεσένταρ σο σικαβένα ότι ο Ιεχωβά ντέλα ο αναγκαία οντουλέντε σο κερένα μπουτ πράγματα για τι υπηρετίνεν-λες. (1 Κορ. 15:​58) Ανταβά κα κερέλ-τουμέν τι  αβέν σίγουροι ότι, σαρ βοηθιντάς ο Ιεχωβά γιαβερέν σο τθερένας προβλήματα σαρ τουμαρέ, αντικάς κα βοηθίνελ τουμέν-ντα. Βοβ τζανέλα σο τθερένα ανάγκη ντα τζανέλα σαρ τι ντελ-λες τουμέντε. Καζόμ ντικχένα ο βας ι Ιεχωβάσκο τουμαρέ ζωγιάτε, τουμαρί πίστη κα αβέλ πο ζουρανί για τι μπορίνεν τι νταϊντίνεν ο πο μπαρέ δυσκολίες σο κα αβέν ανγκλά-τουμέντε.​—Αββακ. 3:​17, 18.

7. Σαρ δοκιμαντάς ι πίστη ι μαθητένγκι εκ «μπαρί καταιγίδα» σαρ βακερένα ο εδάφια Ματθαίος 8:​23-26;

⁷ Κάνα ο Ιησούς ντα λέσκε μαθητές νακχλέ εκ μπουτ μπαρί καταιγίδα κι ντεριάβ, ο Ιησούς αντράλ οντουλέσταρ σο αβιλό-πες βοηθιντάς-λεν τι αγαβέν ότι έπρεπε τι κερέν πο ζουρανί πουμαρί πίστη. (Διαβάνεν Ματθαίος 8:​23-26) Καζόμ η καταιγίδα αβέλας πο ζουρανί ντα ο καράβι πφερντιόλας πανιά, ο Ιησούς σοβέλας ήρεμα. Κάνα ο μαθητές σο νταρασάλε αζόμ μπουτ τζανγκαντέ-λες ντα μανγκλέ λέσταρ τι σώνελ-λεν, ο Κύριος βακερντάς λένγκε λατσσιμάσαρ: «Σόσκε νταρένα αζόμ μπουτ, αζόμ χάνικ πίστη τθερένα;» Ο μαθητές έπρεπε τι αγαβένας ότι ο Ιεχωβά κα μπορίνελας εύκολα τι αρακχαβέλ ι Ιησούς ντα οντουλέν σο ισινέ λέσαρ. Σο σικλιάσα αμέν ανταλέσταρ; Η ζουρανί πίστη κα βοηθίνελ-αμέν τι νταϊντίνας μπαρέ καταιγίδες ή μπαρέ προβλήματα σο ισί σαρ καταιγίδες.

8, 9. Σαρ δοκιμασάλι η πίστη σο τθερέλας η Ανέλ, ντα σο βοηθιντάς-λα;

⁸ Ντικχέν σαρ η πίστη εκχέ μπίπαντριμε πφενιάκι κατά Πόρτο Ρίκο σο βακερένα λάκε Ανέλ αβιλί πο ζουρανί επειδή νταϊντιντάς εκ μπαρό πρόβλημας. Βόι δοκιμασάλι κάνα αβιλί-πες μπαγιά εκ μπαρί καταιγίδα. Ο πρόβλημας αρχισάλο κο 2017, κάνα ο τυφώνας Μαρία κερντάς καταστροφή λάκο κχερ. Κατά καταιγίδα, χασαρντάς πι μπουτί-ντα. «Οντουλά δύσκολα ντιβεσά, τθεράβας μπαρό άγχος», βακερέλα η Ανέλ, «αλλά σικλιλόμ τι νταβ μπέσα κο Ιεχωβά αντράλ κατά προσευχή ντα να μουκχλόμ ο άγχος τι τσσιναβέλ-μαν οντουλένταρ σο τθεράβας τι κεράβ».

⁹ Η Ανέλ βακερέλα ότι κάτι γιαβέρ σο βοηθιντάς-λα τι νταϊντίνελ πο προβλήματα ισινέ ότι ντέλας καν. Βόι βακερέλα: «Επειδή κεράβας οντουλά σο βακερέλας η οργάνωση, μπορισάλομ τι ατσσάβ ήρεμη. Ο Ιεχωβά βοηθιντάς-μαν αντράλ κατά πφραλά ντα κατά πφενιά. Βον ντένας-μαν ζορ ντα οντουλά σο τθεράβας ανάγκη». Επίσης, βακερέλα: «Ο Ιεχωβά ντινάς-μαν πο μπουτ οντουλένταρ σο κα μπορίναβας τι μανγκάβ, ντα μι πίστη αβιλί μπουτ ζουρανί».

10. Σο μπορίνενα τι κερέν άμα τθερένα μπουτ μπαρέ προβλήματα;

¹⁰ Μήπως νακχένα εκ μπαρί καταιγίδα, σαρ τι βακεράας, τουμαρέ ζωγιάτε; Μπέκιμ τι νακχλέν εκ φυσική καταστροφή σο αντάς τουμένγκε προβλήματα. Ή μπέκιμ τι τθερένα εκ μπαρό νασφαλιπέ σο κερέλα-τουμέν τι χασαρέν τουμαρί ζορ ντα να τζανένα σο τι κερέν. Μπέκιμ τι τσσουβένα τουμαρέ γκίστε μπάζιμα, αλλά μα μουκχέν ανταβά πράγμας τι κερέλ-τουμέν τι τσσιναβέν τι ντεν μπέσα κο Ιεχωβά. Πουτρέν τουμαρό γκι κο Ιεχωβά αντράλ κατά προσευχή. Για τι μπαριαρέν  τουμαρί πίστη, σκεφτίνεν μπουτ λατσσές σαρ βοηθιντάς-τουμέν ο Ιεχωβά εκ γιαβέρ φαρ ανγκλέ. (Ψαλμ. 77:​11, 12) Μπορίνενα τι αβέν σίγουροι ότι βοβ να κα μουκχέλ-τουμέν ποτές​—ούτε ακανά ούτε ανγκλ’ αμέντε.

11. Σόσκε πρέπει τι μανγκάς τι ντας καν οντουλέντε σο κερένα κουμάντος;

¹¹ Σο γιαβέρ κα βοηθίνελ-τουμέν τι νταϊντίνεν ο δοκιμασίες; Σαρ βακερντάς η Ανέλ, τι ντεν καν. Σικλιόν τι ντεν μπέσα οντουλέντε σο ντέλα μπέσα ο Ιεχωβά ντα ο Ιησούς. Μπάζιμα, οντουλά σο τραμπίντιλε τι κερέν κουμάντος μπέκιμ τι βακερένα αμένγκε τι κεράς κάτι σο μπέκιμ να ντικχίντιβελα αμένγκε μπουτ λατσσό. Όμως, ο Ιεχωβά κα ευλογίνελ-αμέν άμα κα ντας καν. Τζανάσα αντράλ λέσκε Λαφίσταρ ντα κατά εμπειρίες πφραλένγκε ότι οντουλά σο ντένα καν σώνενα πουμαρί ζωή. (Έξοδ. 14:​1-4· 2 Χρον. 20:​17) Τι σκεφτίνεν μπουτ λατσσές ασακέ παραδείγματα. Ανταβά κα κερέλ-τουμέν τι μανγκέν ατζέ πο μπουτ τι κερέν οντουλά σο βακερέλα η οργάνωση ι Ιεχωβάσκι ακανά ντα οντουλά σο κα βακερέλ ανγκλ’ αμέντε. (Εβρ. 13:​17) Άμα κερένα-λες ανταβά, να κα τθερέν καέκ λόγος τι νταρέν ι πο μπαρέ δυσκολιένγκε σο κα αβέν ατζεχάνικ.​—Παρ. 3:25.

12. Σαρ σικαβένα ο εδάφια Λουκάς 18:​1-8 ότι εκ τζενό σο νταϊντίνελα ι αδικία πρέπει τι τθερέλ πίστη;

¹² Ο Ιησούς τζανέλας ότι η αδικία κα δοκιμάνελας ι πίστη λέσκε μαθητένγκι. Για τι βοηθίνελ-λεν τι νταϊντίνεν ι αδικία, βακερντάς λένγκε εκ παραβολή σο ισί γραμμέ κο βιβλίος Λουκά. Βακερντάς λένγκε εκχέ χηράκε σο να τσσιναβέλας τι μολίνελ εκχέ άδικε δικαστής για τι αρακχέλ πο δίκιος. Ισινέ σίγουρη ότι κα βοηθίνελας-λα άμα να κα τσσιναβέλας τι μολίνελ-λες. Τελικά, ο δικαστής ασουντάς-λα. Σο σικλιάσα αμέν; Ο Ιεχωβά νανέ άδικος. Οτθάρ, ο Ιησούς βακερντάς: «Άρα, να κα κερέλ ο Ντεβέλ τι ντιντιόλ δικαιοσύνη οντουλέντε σο τραμπιντάς ντα σο ντένα-λες βίκος ζουρανές ντισάρα ντα ιράτ;» (Διαβάνεν Λουκάς 18:​1-8) Σοράν, ο Ιησούς βακερντάς: «Κάνα κα αβέλ ο Τσσαβό ι τζενέσκο, κα αρακχέλ άραγες ασακί πίστη κι πφουβ;» Κάνα νακχάσα εκ αδικία, πρέπει τι κεράς υπομονή ντα τι νταϊντίνας για τι σικαβάς ότι τθεράσα ζουρανί πίστη σαρ οντιά χήρα. Άμα τθεράσα ασακί πίστη, μπορίνασα τι αβάς σίγουροι ότι ο Ιεχωβά κα βοηθίνελ-αμέν. Πρέπει τι πακιάς ότι η προσευχή-ντα τθερέλα μπουτ ζορ. Μπάζιμα, αμαρέ προσευχές μπέκιμ τι απαντίντιβεν εκχέ τροπόσαρ σο να μπεκλεντίναας.

13. Σαρ βοηθιντάς η προσευχή εκχέ φαμιλιά σο νακχλάς εκ μπαρί αδικία;

¹³ Ντικχέν σο αβιλό-πες κι πφεν Βέρο, σο τζουβντιόλα κι Λαϊκή Δημοκρατία κο Κονγκό. Η Βέρο, λάκο ρομ σο να υπηρετίνελα ι Ιεχωβάς ντα λένγκι τσσάι σο ισινέ 15 μπρεσένγκι νασλέ για τι σώντιβεν κατά στρατιώτες σο γκιλέας λένγκε γκαβέστε. Κο ντρομ, μερικοί στρατιώτες ασταρντέ-λεν ντα μανγκένας τι μουνταρέν-λεν. Κάνα η Βέρο αρχισάλι τι ροβέλ, λάκι τσσάι κερντάς προσευχή ζουρανές για τι ηρεμίνελ-λα ντα βακερέλας μπουτ φαρ ο ναβ ι Ιεχωβάσκο πι προσευχιάτε. Κάνα μπιτισκιαρντάς ι προσευχή, ο διοικητής ι στρατιωτένγκο πουτσλάς-λα: «Μι τσσάι, κον  σικλιαρντάς-τουτ τι κερές προσευχή;» Βόι βακερντάς: «Μι ντάι, κατά παράδειγμας σο ισί κο εδάφια Ματθαίος 6:​9-13». Ο διοικητής βακερντάς: «Μι τσσάι, τζα τι νταντέσαρ ντα τι νταγιάσαρ με ειρήνη, ντα ο Ιεχωβά τουμαρό Ντεβέλ τι αρακχαβέλ-τουμέν!»

14. Σο μπέκιμ τι δοκιμάνελ αμαρί πίστη, ντα σο κα βοηθίνελ-αμέν τι νταϊντίνας;

¹⁴ Ασακέ εμπειρίες σικλιαρένα-αμέν μα τι μπιστράς ποτές καζόμ αξία τθερέλα η προσευχή. Αλλά σο αβέλα-πες άμα να ντιντιόλα απάντηση τουμαρέ προσευχιέντε σουγκό ή εκχέ τροπόσαρ σο κερέλα-τουμέν τι σαστίνεν; Σαρ η χήρα κι παραβολή κι Ιησούσκι, μα τσσιναβέν τι κερέν προσευχή ντα τι αβέν σίγουροι ότι αμαρό Ντεβέλ να κα μουκχέλ-τουμέν ντα ότι κάποια στιγμή ντα εκχέ τροπόσαρ κα απαντίνελ τουμαρέ προσευχιέντε. Μα τσσιναβέν τι μολίνεν ι Ιεχωβάς τι ντελ-τουμέν πο άγιος πνεύμας. (Φιλιπ. 4:​13) Τι ντεν-τουμέν γκοντί ότι ατζεχάνικ ο Ιεχωβά κα ευλογίνελ-τουμέν αζόμ μπουτ σο κα μπιστρέν σαρέ ο βάσανα ι πουρανέ ντιβεσένγκε. Καζόμ νταϊντίνενα πιστά ο δοκιμασίες ι Ιεχωβάσκε βοηθειάσαρ, κα αβέν πο ζουρανέ ντα κα μπορίνεν τι νταϊντίνεν ο δοκιμασίες σο κα αβέν ανγκλά-τουμέντε.​—1 Πέτρ. 1:6, 7.

15. Καγιά δυσκολία τθερένας ο μαθητές ι Ιησούσκε σαρ ισί γραμμέ κο εδάφια Ματθαίος 17:​19, 20;

¹⁵ Ο Ιησούς σικλιαρντάς πι μαθητέν ότι λένγκι πίστη κα βοηθίνελας-λεν τι νακχαβέν δυσκολίες. (Διαβάνεν Ματθαίος 17:​19, 20) Εκ φαρ, ναστί νικαβένας εκχέ δαιμονάς παρόλο σο γιαβερά φαρ κερντέας-λες. Καβά ισινέ ο πρόβλημας; Ο Ιησούς βακερντάς λένγκε ότι έπρεπε τι τθερέν πο μπουτ πίστη. Βακερντάς λένγκε ότι, άμα κα τθερένας μπαρί πίστη, κα μπορίνενας τι νακχαβέν δυσκολίες ατζέ-ντα άμα οντουλά δυσκολίες ισινέ αζόμ μπαρέ σο ντικχίντιβενας σαρ μπαρέ βεσά! Αμέν-ντα αντιβές μπέκιμ τι τθεράσα δυσκολίες σο ντικχίντιβελα ότι ναστί νακχαβάσα-λεν.

16. Σαρ βοηθιντάς η πίστη ι Γκεϊντιά τι νταϊντίνελ σοράν κατά μεριπέ πι ρομέσκο;

¹⁶ Σκεφτίνεν σο αβιλό-πες κι Γκέιντι, εκ πφεν κατά Γουατεμάλα. Λακέ ρομές, ι Εντίς, μουνταρντέ-λες κάνα βουρτίνενας κχερέ σοράν εκχέ συναθροισιάταρ. Σαρ βοηθιντάς-λα λάκι πίστη τι νταϊντίνελ παρόλο σο τθερέλας αζόμ μπαρί ντουκχ αντρέ πι γκίστε; Βόι βακερέλα: «Η προσευχή βοηθίνελα-μαν τι μουκχάβ κο Ιεχωβά ο πφαριπέ σο βάνταβα, ντα ανταβά ηρεμίνελα-μαν. Ντικχάβα σαρ βοηθίνελα-μαν ο Ιεχωβά αντράλ μι φαμιλιάταρ ντα κατά πφραλά κι κχανγκιρί. Ο μπουτ πράγματα σο κεράβα κι υπηρεσία κι Ιεχωβάσκι κοβλιαρένα μι ντουκχ ντα βοηθίνενα-μαν τι ντικχάβ ο κάθε ντιβές χωρίς τι τσσουβάβ μι γκίστε αζόμ μπουτ ι γιαβερέ ντιβεσέσκε. Σοράν ανταλένταρ σο νακχλόμ, σικλιλόμ ότι, σο-ντα δοκιμασία τι τθεράβ ανγκλά-μάντε, κα μπορίναβ τι νακχαβάβ-λα χάρη κι βοήθεια σο κα ντελ ο Ιεχωβά, ο Ιησούς ντα η οργάνωση».

17. Σο μπορίνασα τι κεράς κάνα τθεράσα εκ μπαρό πρόβλημας σο ντικχίντιβελα σαρ βες;

¹⁷ Μήπως τθερένα ντουκχ αντρέ τουμαρέ γκίστε επειδή χασαρντέν εκχέ τζενές σο μανγκένα μπουτ κο μεριπέ; Για τι μπαριαρέν  τουμαρί πίστη ότι ο μουλέ κα τζουβντιόν, διαβάνεν ιστορίες ι Γραφιάκε τζενένγκε σο αναστισάλε. Μήπως τθερένα ντουκχ αντρέ τουμαρέ γκίστε επειδή εκ τζενό τουμαρό χαλάς αποκοπή; Διαβάνεν για τι σικαβέν τουμαρέ νεαυτόσκε ότι ο τρόπος σο διορθώνελα ο Ντεβέλ ισί πάντα ο πο λατσσό. Σο-ντα πρόβλημας τι τθερένα, ντικχέν-λες σαρ ευκαιρία τι μπαριαρέν τουμαρί πίστη. Πουτρέν τουμαρό γκι κο Ιεχωβά. Μα τσσίντεν-τουμέν ντουρ κατά γιαβερά, αλλά τι ατσσόν πασέ τουμαρέ πφραλέντε ντα πφενίντε. (Παρ. 18:1) Κερέν πράγματα σο κα βοηθίνεν-τουμέν τι νταϊντίνεν, ατζέ-ντα άμα οντουλά σο ντένα-τουμέν γκοντί κερένα-τουμέν τι ροβέν. (Ψαλμ. 126:5, 6) Μα τσσιναβέν τι τζαν κο συναθροίσεις, τι κερέν έργος ντα τι διαβάνεν ι Γραφή. Ντα μα τσσιναβέν τι ανέν τουμαρέ γκοντιάτε ο μπουτ σουκάρ ευλογίες σο κα ντελ-τουμέν ο Ιεχωβά. Καζόμ ντικχένα σαρ βοηθίνελα-τουμέν ο Ιεχωβά, τουμαρί πίστη λέστε καζόμ τζάλα κα αβέλ πο ζουρανί.

18. Άμα κα αγαβέν ότι τουμαρί πίστη νανέ αζόμ ζουρανί, σο μπορίνενα τι κερέν;

¹⁸ Άμα ο δοκιμασίες σο τθερένας ανγκλέ ή ακανά σικαντέ ότι τουμαρί πίστη νανέ αζόμ ζουρανί, μα χασαρέν τουμαρί ζορ. Ντικχέν-λες σαρ ευκαιρία τι μπαριαρέν τουμαρί πίστη. Μανγκέν οντουβά σο μανγκλέ ο απόστολοι ι Ιησούσκε-ντα σο βακερντέ: «Ντε-αμέν πο μπουτ πίστη». (Λουκ. 17:5) Επίσης, σκεφτίνεν ο παραδείγματα σο ντικχλάμ ανταλέ μαθημάστε. Σαρ ο Μιγκέλ ντα η Γιουράι, ανέν τουμαρέ γκοντιάτε σαρέ ο φορές σο βοηθιντάς-τουμέν ο Ιεχωβά. Σαρ η τσσάι ι Βεράκι ντα η Ανέλ, τι κερέν προσευχή αντράλ τουμαρέ γκίσταρ κο Ιεχωβά, ντα ατζέ πο μπουτ κάνα τθερένα εκ μπαρό πρόβλημας. Σαρ η Γκέιντι, τι αγαβέν ότι ο Ιεχωβά κα ντελ-τουμέν οντουλά σο τθερένα ανάγκη αντράλ τουμαρέ φαμιλιάταρ ή κατά πφραλά. Άμα μουκχένα ι Ιεχωβάς τι βοηθίνελ-τουμέν τι νταϊντίνεν ο δοκιμασίες σο τθερένα ακανά, κα μπαριόλ τουμαρί σιγουριά ότι κα βοηθίνελ-τουμέν τι νταϊντίνεν σο-ντα δοκιμασίες κα τθερέν ανγκλά-τουμέντε.

19. Καλέ πραγμάσκε ισινέ σίγουρος ο Ιησούς, ντα καλέ πραγμάσκε μπορίνενα τι αβέν σίγουροι τουμέν;

¹⁹ Ο Ιησούς βοηθιντάς πι μαθητέν τι ντικχέν κατέ χρειαζίντιβελας τι τθερέν πο μπουτ πίστη, αλλά ποτές να πακιάλας ότι να κα νταϊντίνενας ι Ιεχωβάσκε βοηθειάσαρ πιστά ο δοκιμασίες σο κα αβένας λένγκε. (Ιωάν. 14:1· 16:​33) Ισινέ σίγουρος ότι εκ μπαρό πλήθος κα σώντιβελας κατά μπαρί στεναχώρια επειδή κα τθερέλας ζουρανί πίστη. (Αποκ. 7:9, 14) Κα αβέν τουμέν-ντα λέντζαρ; Ι Ιεχωβάσκε βοηθειάσαρ κα αβέν, άμα κερένα σο νακχέλα τουμαρέ βαστένταρ ακανά για τι μπαριαρέν τουμαρί πίστη!​—Εβρ. 10:39.