Μπιάντιλομ κι Ολλανδία κο 1948. Ο γιαβέρ μπρες, γκιλάμ τι μπεσάς μι φαμιλιάσαρ κο Σάο Πάολο σο ισί κι Βραζιλία. Μο ντατ ντα μι ντάι τζάνας μπουτ φαρ κι κχανγκιρί, ντα σαρ φαμιλί ισινάμας σικλέ τι διαβάνας ι Αγία Γραφή κάθε ιράτ σοράν κατά χαμπέ. Κο 1959, νασλάμ κατά Βραζιλία ντα γκιλάμ κο Ηνωμένες Πολιτείες, σο οτθέ μπεσάας κι πολιτεία Μασαχουσέτης.

Μο ντατ μαρέλας-πες για τι ανέλ ο απαραίτητα αμαρέ φαμιλιάτε σο ισινάμας οχτώ τζενέ. Κερέλας σαβέ τι μανγκές μπουτιά: τζάλας τθαν τθανέστε για τι μπικινέλ, λατσσαρέλας ντρομά ντα κερέλας μπουτί εκχέ αεροπορικέ εταιριάκε. Σαρέ χαιρισάλαμας μπουτ κάνα ασταρντάς μπουτί κι αεροπορική εταιρία επειδή κα μπορίναας τι κεράς μπουτ ταξίδια.

Κάνα τζάβας γυμνάσιος, μπουτ φαρ σκεφτίναβας: “Σο κα αβάβ κάνα κα μπαριάβ;” Μερικοί μι αμαλένταρ τραμπιντέ τι τζαν κο πανεπιστήμιος ντα γιαβερά κο στρατός. Με όμως να μανγκάβας ιτς τι τζαβ κο στρατός σόσκε να μπεϊντίναβας ο καβγκάδες ντα ατζέ πο μπουτ ο τζένγκι. Αποφασιντόμ τι τζαβ κο πανεπιστήμιος για μα τι τζαβ κο στρατός. Αντρέ μάντε όμως μανγκάβας τι βοηθίναβ γιαβερέν, σόσκε τθεράβας μι γκοντιάτε ότι ανταβά κα πφερέλας μπαγιά μι ζωή.

Κο πανεπιστήμιος, μπεϊντιντόμ ι ανθρωπολογία, επειδή μανγκάβας τι σικλιάβ κατάρ αβιλί η ζωή. Σικλιαρένας-αμέν ι εξέλιξη ντα μπεκλεντίνενας αμένταρ τι πακιάς-λες ανταβά. Αλλά μερικά πράγματα σο βακερένας να ντικχίντιβενας μάνγκε λογικά ντα έπρεπε τι πακιάβ-λεν πφαντέ γιακχίντζαρ.

Κο μαθήματα σο κεράας, να σικλιαρένας-αμέν λατσσέ αρχές σο βακερένας καβά ισί ο σωστός ντα καβά ισί ο λάθος. Οκιά μπάνταρ, βακερένας αμένγκε τι κεράς σο νακχέλας αμαρέ βαστένταρ για τι τζας-λεν λατσσές κο πανεπιστήμιος. Νακχάβας σουκάρ κάνα ισινόμας μι αμαλέντζαρ κο πάρτι ντα κάνα δοκιμάναβας μερικά ναρκωτικά, αλλά ανταγιά χαρά να ατσσικιαρέλας μπουτ. Σκεφτίναβας: “Ισί μπαγιά πφερντί μι ζωή;”

Καζόμ αβένας-πες σαρέ ανταλά, γκιλόμ κι Βοστώνη ντα αρχισάλομ τι τζαβ εκχέ πανεπιστημιόστε οτθέ. Κο νιλάι, σο να τθεράβας μαθήματα, ασταρντόμ μπουτί για τι ποκινάβ ο πανεπιστήμιος. Οτθέ, κερντόμ πρώτη φορά λάφι εκχέ τζενέσαρ σο ισινέ Μάρτυρας ι Ιεχωβάσκο. Εκ τζενό σο κεράβας λέσαρ μπουτί βακερντάς μάνγκε για την προφητεία ι “εφτά βακιτίνγκι” σο ισί κο σταρ κεφάλαιος κο βιβλίος Δανιήλ, ντα εξηγιντάς μάνγκε ότι τζουβντιάσα κο βακίτι κι τελευταίε ντιβεσένγκο. (Δαν. 4:​13-17) Μπουτ σουγκό αγαντόμ ότι άμα κα συνεχίναβας τι κεράβ λέσαρ λάφι κατά Γραφή ντα τι πακιάβ οντουλά σο βακερέλα μάνγκε, έπρεπε τι αλλάναβ ο τρόπος σο τζουβντιάβας. Οτθάρ, κεράβας σο νακχέλας μι βαστένταρ για μα τι αρακχίντιβαβ οντουλέ τζενέσαρ.

Κο πανεπιστήμιος, τραμπιντόμ μαθήματα σο κα προετοιμάνενας-μαν για τι βοηθίναβ τζενέν κι Νότια Αμερική χωρίς τι ποκίντιβαβ. Πακιάβας ότι, άμα κα κεράβας λατσσέ πράγματα για τι βοηθίναβ οντουλέν σο τθερένας ανάγκη, μι ζωή κα αβέλας πφερντί. Αλλά αζομάν αγαντόμ ότι ατζέ-ντα ανταβά να πφερέλας μι ζωή. Στεναχωρισάλομ αζόμ μπουτ σο τσσιναντόμ ο πανεπιστήμιος.

Κο Μάιος 1970, γκιλόμ κο Άμστερνταμ, κι Ολλανδία, για τι κεράβ μπουτί κι αεροπορική εταιρία σο κερέλας μπουτί μο ντατ-ντα. Χάρη ανταλέ μπουτιάτε, κεράβας μπουτ ταξίδια ντα γκιλόμ τθεμέντε κι Αφρική, κι Βόρεια ντα κι Νότια Αμερική, κι Ευρώπη ντα κι Ασία. Μπουτ σουγκό αγαντόμ ότι, καλέ τθεμέστε-ντα τι τζάβας, σαρέ τθερένας μπαρέ προβλήματα ντα ντικχίντιβελας ότι καέκ ναστί νασκιαρέλας-λεν. Να τσσιναντόμ όμως τι μανγκάβ τι κεράβ κάτι σημαντικός μι ζωγιάτε. Οτθάρ, αποφασιντόμ τι βουρτίναβ παλάλ κο Ηνωμένες Πολιτείες ντα τι τζαβ πάλι κο ίδιος πανεπιστήμιος κι Βοστώνη.

Αλλά μπουτ σουγκό αγαντόμ ότι ο μαθήματα κο πανεπιστήμιος να βοηθίνενας-μαν τι αρακχάβ ο απαντήσεις κο ερωτήσεις σο τθεράβας ι ζωγιάκε. Να τζανάβας σο τι κεράβ, οτθάρ μανγκλόμ συμβουλή εκχέ καθηγητήσταρ. Ατσσιλόμ πουταρντέ μόσαρ κάνα βακερντάς μάνγκε: «Σόσκε συνεχίνεσα; Πο λατσσές τι τσσιναβές ο πανεπιστήμιος ακανά». Να ξαναβακερντάς-λες μάνγκε. Μουκχλόμ ο πανεπιστήμιος ντα να γκιλόμ ατζέκ φαρ.

Επειδή ατζέκ ατζέκ νιωθίναβας ότι μι ζωή να ισινέ πφερντί, τσσουντόμ-μαν εκχέ ομαδάτε σο βακέρντιβελα παιδιά των λουλουδιών. Μερικέ αμαλέντζαρ, για τι νασάς κατά Ηνωμένες Πολιτείες ντα τι τζας κο Ακαπούλκο, σο ισί κο Μεξικός, ατσσικιαράας αυτοκίνητα τι λεν-αμέν μέχρι τι ερεσάς οτθέ. Τζουβντιάας τζενέντζαρ σο να χάλας-λεν ανάγκη ο κανόνες ντα ντικχίντιβελας ότι να τθερένας προβλήματα ή να τσσουβένας πουμαρέ γκίστε. Αλλά καζόμ τζουβντιάβας λέντζαρ, αγαντόμ ότι ο τρόπος σο  τζουβντιόνας να τθερέλας νόημας ντα λένγκι ευτυχία να ατσσικιαρέλας μπουτ. Οκιά μπάνταρ, ντικχλόμ ότι μπουτ οντουλέ τζενένταρ ισινέ αντρέ κι παρανομία ντα να ισινέ πιστοί.

Αζομάν αρχισάλομ τι ανάβ μι γκοντιάτε μερικά πράγματα σο μανγκάβας τι κεράβ κάνα ισινόμας χουρντό. Μανγκάβας τι κεράβ ταξίδια κι ντεριάβ, όχι σαρ εκ απλός ναύτης, αλλά σαρ καπετάνιος. Ο μόνος τρόπος για τι κεράβ-λες ανταβά ισινέ τι τθεράβ μιρό καράβι. Με ντα μο αμάλ, ο Τομ, σο μανγκέλας βοβ-ντα τι κερέλ-λες ανταβά, αποφασιντάμ τι πφιράς ι ντουνιάς καραβίσαρ. Μανγκάβας τι αρακχάβ εκ μπουτ σουκάρ νησίς σο οτθέ κα μπορίναβας τι νασάβ κατά κανόνες ι ντουνιάσκε.

Ο Τομ ντα με γκιλάμ κο Αρένις ντε Μαρ, πασέ κι Βαρκελώνη, κι Ισπανία. Οτθέ, κιντάμ εκ καράβι σο ισινέ 9,4 μέτρα ντα βακέρντιβελας Λίγκρα. Αρχισάλαμ τι λατσσαράς οντουβά χουρντό καράβι για τι αβάς αρακχαντέ καζόμ κα κεράας λέσαρ ταξίδια κι ντεριάβ. Επειδή να σιγκιαράας τι ερεσάς οτθέ σο μανγκάας τι τζας, νικαντάμ ι μηχανή ντα λάκε θεσιάτε γκεραντάμ πο μπουτ πανί για τι τθεράς τι πιας. Για τι μπορίνας τι τσσουβάς ο καράβι κο χουρντέ λιμάνια, κιντάμ ντούι κουπιά σο ισινέ 5 μέτρα. Σοράν, αρχισάλαμ τι τζας κο Σεϋχέλλες, σο ισί κο Ινδικός Ωκεανός. Οντουβά σο μανγκάας τι κεράς ισινέ τι τζας ι καραβίσαρ κι δυτική ακτή κι Αφρική ντα κο Ακρωτήριος της Καλής Ελπίδας κι Νότια Αφρική. Χρησιμοποιήναας ο τσεργανιά, χάνικ χάρτες, βιβλία ντα απλά όργανα σο βοηθίνενας-αμέν τι τζας κο σωστός τθαν. Ατσσάβας πουταρντέ μόσαρ κανά μπορίναας τι αρακχάς κάι ισινάμας.

Μπουτ σουγκό όμως αγαντάμ ότι ανταβά πουρανό καστικανό καράβι ναστί κερέλας ταξίδια κι ντεριάβ. Κάθε σαάτι σο νακχέλας ο καράβι πφερντιόλας 22 λίτρα πανί! Σαρ βακερντόμ κι αρχή-ντα, κάνα αβιλί-πες ανταγιά μπαρί καταιγίδα νταρασάλομ ντα κερντόμ προσευχή πρώτη φαρ σοράν από μπουτ μπρεσά. Ντινόμ μο λάφι κο Ντεβέλ ότι άμα κα τζουβντιάας, κα προσπαθίναβας τι σικλιάβ λέσκε. Η καταιγίδα τσσινάντιλι, ντα με ατσσικιαρντόμ ο λάφι σο ντινόμ.

Αρχισάλομ τι διαβάναβ ι Αγία Γραφή κάνα ισινόμας κι ντεριάβ. Ανέν τουμαρέ γκοντιάτε σαρ ισινέ τι μπεσάβ κι Μεσόγειος Θάλασσα ντα ντονταλάι μάνταρ τι τθεράβ χελιδονόψαρα, δελφίνια ντα σαρί ι ντεριάβ ανγκλά-μάντε. Αρατί, να τσαλιάβας τι ντικχάβ ο μπουτ τσεργανιά ντα καζόμ τζάλας αβάβας πο σίγουρος ότι υπαρχίντιβελα Ντεβέλ σο πφαμπόλα ι τζενένγκε.

Σοράν από μερικές εβδομάδες κι ντεριάβ, ερεσλάμ κο λιμάνι Αλικάντε, κι Ισπανία, σο οτθέ προσπαθιντάμ τι μπικινάς αμαρό καράβι για τι κινάς εκ πο λατσσό. Αλλά να ισινέ εύκολος τι αρακχάς εκχέ τζενές τι κινέλ εκ πουρανό καράβι σο να τθερέλας μηχανή ντα τζάνας πανιά αντρέ! Οκιά μπάνταρ όμως, ανταγιά ισινέ εκ μπουτ σουκάρ ευκαιρία για τι διαβάναβ ι Γραφή.

Καζόμ πο μπουτ διαβάναβας ι Γραφή, αζόμ πο μπουτ αγαβάβας ότι ισί εκ βιβλίος σο βακερέλα αμένγκε σαρ τι αβάς χαρούμενοι. Σαστισάλομ σο βακερέλας αζόμ ξεκάθαρα ότι πρέπει τι τζουβντιάς πάκι κι Ντεβλέσκε γιακχά ντα σκεφτίναβας σόσκε αζόμ μπουτ τζενέ​—αντρέ ανταλέντε με-ντα—​βακερένα ότι ισί Χριστιανοί αλλά να ντένα καν ανταλέντε σο βακερέλα.

Ισινόμας αποφασισμέ τι κεράβ μπαρέ πράγματα για τι αβέλ πάκι μι ζωή, οτθάρ τσσιναντόμ τι πιαβ ναρκωτικά. Πακιάβας ότι υπαρχίντιβενας τζενέ σο ντένας καν οντουλέντε σο σικλιαρέλα η Γραφή, ντα μανγκάβας τι κεράβ λέντζαρ λάφι. Ατζέκ εκ φαρ κερντόμ προσευχή ντα μανγκλόμ κατά Ντεβέλ τι βοηθίνελ-μαν τι αρακχάβ-λες.

Πακιάβας ότι ο πο λατσσό ισινέ τι ρόνταβ ι κάθε εκ θρησκεία μέχρι τι αρακχάβ καγιά ισί μπαγιά. Καζόμ πφιράβας κο ντρομά κο Αλικάντε, ντικχάβας μπουτ κχανγκιριά. Αλλά επειδή ο πο μπουτ τθερένας αντρέ εικόνες, ισινέ εύκολος τι αγαβάβ ότι οντουλά θρησκείες να ισινέ μπαγιά.

Εκ Κυριακή απόγευμας μπεσάβας εκχέ τθανέστε σο οτθάρ ντικχίντιβελας ο λιμάνι ντα διαβάναβας ο εδάφια Ιακώβου 2:​1-5, σο βακερένα μα τι ξεχωρίνας ι τζενέν σο ισί χουλανέ. Καζόμ βουρτίναβας αμαρέ καραβίστε, νακχλόμ ανγκλάλ εκχέ κτιριόσταρ σο ντικχίντιβελας ότι τθερέλας τι κερέλ ι θρησκειάσαρ ντα ανγκλάλ ισινέ γραμμέ ο λάφια: «Αίθουσα Βασιλείας ι Ιεχωβάσκε Μαρτυρένγκι».

Σκεφτιντόμ: “Ανταλέ τζενέν πρέπει τι δοκιμάναβ-λεν. Για τι ντικχάβ σαρ κα δεχτίνεν-μαν”. Οτθάρ, γκιλόμ κι Αίθουσα Βασιλείας πινανγκό, τσσορέντζαρ, ντα εκχέ τζιν παντελονίσαρ σο ισινέ πφαραντό. Ο ταξιθέτης τσσουντάς-μαν τι μπεσάβ πασέ εκχέ πφουριάτε σο βοηθίνελας-μαν λατσσιμάσαρ τι αρακχάβ ο εδάφια σο βακερέλας ο ομιλητής. Σοράν κατά συνάθροιση, κερντάς μάνγκε εντύπωση ο λατσσιπέ σαρέ οντουλένγκο σο αβιλέ τι χαιρετίνεν-μαν. Εκ τζενό καλιντάς-μαν πι κχερέστε για τι κεράς λάφι, αλλά επειδή να μπιτισκιαρντόμας ατζέκ ι Αγία Γραφή βακερντόμ λέσκε: «Κα βακεράβ τούκε κάνα κα αβάβ έτοιμος». Μέχρι τι αβέλ-πες ανταβά όμως, αρχισάλομ τι τζαβ σαρέ κο συναθροίσεις.

Αφού νακχλέ μπερεκέτι εβδομάδες, γκιλόμ κο κχερ οντουλέ τζενέσκο ντα απαντιντάς κο ερωτήσεις σο τθεράβας ι Γραφιάκε. Εκ εβδομάδα πο σοράν, ντινάς-μαν εκ τσάντα πφερντί σουκάρ σεΐντζαρ. Βακερντάς μάνγκε ότι ισινέ εκχέ τζενέσκε σο ισινέ κι φυλακή επειδή ντέλας καν κι εντολή κι Γραφιάκι τι μανγκάς ο εκ ι γιαβερές ντα τι τσσιναβάς τι σικλιάς ο τζένγκι. (Ησ. 2:4· Ιωάν. 13:​34, 35) Ακανά ισινόμας σίγουρος ότι αρακχλόμας οντουβά σο ρόνταβας, δηλαδή τζενέν σο ντένας καν οντουλέστε σο βακερέλα ξεκάθαρα η Γραφή τι τζουβντιάς πάκι κι Ντεβλέσκε γιακχά! Οντουβά σο μανγκάβας ακανά να ισινέ τι αρακχάβ εκ μπουτ σουκάρ νησίς, αλλά τι σικλιαράβ-μαν μπουτ λατσσές κατά Αγία Γραφή. Οτθάρ, βουρτισάλομ κι Ολλανδία.

Κερντόμ σταρ ντιβές τι ερεσάβ κι πόλη Χρόνινχεν, κι Ολλανδία. Οτθέ έπρεπε τι αρακχάβ μπουτί για τι νταβ-λεν πέρα. Εκχέ ξυλουργειόστε σο γκιλόμ για τι ρόνταβ μπουτιάκε, έπρεπε τι γραφίναβ κι αίτηση σο θρησκεία τθεράβα. Γραφιντόμ: «Μάρτυρας ι Ιεχωβάσκο». Κάνα ο τζενό σο τθερέλας ο μαγαζίς διαβαντάς-λες ανταβά, ντικχλόμ ότι λέσκο μούι αλλαξάλο. Βακερντάς: «Κα λαβ-τουτ τηλέφωνος». Αλλά ποτές να λιντάς.

 Εκχέ γιαβερέ ξυλουργειόστε πουτσλόμ ι τζενές σο τθερέλας ο μαζαγίς άμα μανγκέλας βοήθεια. Μανγκλάς τι σικαβάβ λέσκε σο σικλιαριπέ λιντόμ οπράλ κι μπουτί ντα σο γιαβερά μπουτιά κερντόμ. Βακερντόμ λέσκε ότι κερντόμας μπουτιά εκχέ καστικανέ καραβίστε. Σαστισάλομ κάνα βακερντάς: «Μπορίνεσα τι αρχίνες αντιβές κο απόγευμας, αλλά εκ πράγμας μανγκάβα σάντε. Να μανγκάβα τι ανές προβλήματα μι μαγαζίστε, επειδή ισινόμ Μάρτυρας ι Ιεχωβάσκο ντα τζουβντιάβα αντικάς σαρ βακερένα ο αρχές ι Γραφιάκε». Ντικχλόμ-λες πουταρντέ μόσαρ ντα βακερντόμ λέσκε: «Με-ντα ισινόμ!» Ντικχίντιβελα ότι, επειδή τθεράβας μπαρέ μπαλά, βοβ βακερντάς μάνγκε: «Άμα ισί αντικάς, κα κεράς γιεκ μελέτη!» Μανγκλόμ χαράσαρ οντουβά σο βακερντάς μάνγκε. Αζομάν αγαντόμ σόσκε ο τζενό σο τθερέλας ο γιαβέρ μαζαγίς να λιντάς-μαν τηλέφωνος. Ο Ιεχωβά απαντίνελας μι προσευχιέντε. (Ψαλμ. 37:4) Κεράβας μπουτί κο μαγαζίς οντουλέ πφραλέσκο ντα κεράβας μελέτη κατά Γραφή λέσαρ για εκ μπρες. Τελικά, μπολντιλόμ κο Ιανουάριος 1974.

Εκ μάσεκ πο σοράν, λιντόμ ο σκαπανικός, σο πφερντάς μι ζωή. Ο γιαβέρ μάσεκ, γκιλόμ τι μπεσάβ κο Άμστερνταμ για τι βοηθίναβ εκχέ ισπανικέ ομιλόστε σο κερντιλόας αζομάν. Καζόμ μπουτ χαιρίναβας σο κεράβας μελέτες κο ισπανικά ντα κο πορτογαλικά! Κο Μάιος 1975, ντιντιλό-μαν ο προνόμιος τι υπηρετίναβ σαρ ειδικός σκαπανέας.

Εκ ντιβές, εκ ειδική σκαπάνισσα, η Ίνεκε, αβιλί κι ισπανική συνάθροιση για τι γνωρίνελ αμένγκε εκχέ τζενιά κατά Βολιβία σο κερέλας μελέτη. Η Ίνεκε ντα με αποφασιντάμ τι σικλιάς-αμέν πο λατσσές αντράλ γραμματένταρ σο μπουτσσαβάας ο εκ κο γιαβέρ ντα μπουτ σουγκό ντικχλάμ ότι μανγκάας τι κεράς ο ίδια πράγματα. Παντρισάλαμ κο 1976 ντα συνεχίναας τι υπηρετίνας σαρ ειδικοί σκαπανείς μέχρι κο 1982 σο καλιντέ-αμέν τι νακχάς ι τάξη 73 κι Σχολή Γαλαάδ. Να μπεκλεντίναας-λες ντα αμαρί χαρά ισινέ μπουτ μπαρί κάνα μπουτσσαντέ-αμέν κι Ανατολική Αφρική, σο υπηρετιντάμ παντς μπρεσά κι Μομπάσα, κι Κένυα! Κο 1987, βακερντέ αμένγκε τι τζας κι Τανζανία, σο ανγκλέ η κυβέρνηση οτθέ να μουκχέλας τι αβέλ-πες αμαρό έργος. Μπεσλάμ οτθέ 26 μπρεσά πριν τι αβάς κι Κένυα.

Πφερντιόλα αμαρί ζωή σο σικλιαράσα ο αλήθειες ι Γραφιάκε τζενέντε σο ισί πφερντέ εκτίμηση. Για παράδειγμας, ο πρώτος τζενό σο κερντόμ-λες μελέτη κι Μομπάσα ισινέ εκ τζενό σο αρακχλόμ-λες καζόμ κεράβας έργος. Κάνα ντινόμ-λες ντούι περιοδικά, βοβ βακερντάς: «Σο κα κεράβ κάνα κα μπιτισκιαράβ-λεν;» Ι γιαβέρ εβδομάδα, αρχισάλαμ τι κεράς μελέτη ο βιβλίος Μπορείτε να Ζείτε για Πάντα στον Παράδεισο στη Γη, σο νικίστιλοας αζομάν κι τσσιπ σουαχίλι. Μπολντιλό εκ μπρες πο σοράν ντα αβιλό τακτικός σκαπανέας. Από αζομάν, βοβ ντα λέσκι ρομνί βοηθιντέ περίπου 100 τζενέν τι ερεσέν μέχρι κο μπολντιπέ.

Κάνα αγαντόμ καλά πράγματα πφερένα ι ζωή, νιωσάλομ σαρ ο έμπορας σο αρακχλάς εκ μαργαριτάρι σο τθερέλας μπαρί αξία ντα να μανγκέλας τι χασαρέλ-λες. (Ματθ. 13:​45, 46) Οντουβά σο μανγκάβας τι κεράβ σαρέ μι ζωγιάτε ισινέ τι βοηθίναβ γιαβερέν τι αρακχέν εκ ζωή σο κα πφερέλ-λεν. Γιεκ μι αγαπημέ ρομνιάσαρ, ντικχλόμ μι γιακχίντζαρ ότι ο Ιεχωβά βοηθίνελα πι λαός τι τθερέλ εκ πφερντί ζωή.