Πριν τι βακεράβ τουμένγκε σο αβιλό-πες σοράν, κα μανγκάβας τι βακεράβ τουμένγκε σαρ αρχισάλομ ι ολοχρόνια υπηρεσία.

Μπιάντιλομ ο μπρες 1942 κο Κουρασάο, εκχέ σουκάρ νησίστε κι Καραϊβική. Μο ντατ ισινέ κατά Σουρινάμ, αλλά γκιλόας τι μπεσέλ κο Κουρασάο μπουτιάκε. Ντούι μπρεσά πριν τι μπιάντιβαβ, ισινέ εκ κατά πρώτους Μάρτυρες ι Ιεχωβάσκε σο μπολντιλέ κο Κουρασάο. a Κερέλας μελέτη κατά Γραφή αμέντζαρ ι χουρντέντζαρ κάθε εβδομάδα, παρόλο σο να μανγκάας πάντα τι σικλιαρέλ-αμέν κατά Γραφή. Κάνα ισινόμας 14 μπρεσένγκο, γκιλάμ σαρί η φαμιλί τι μπεσάς κο Σουρινάμ για τι αρακχαβέλ μο ντατ πι πφουρέ νταγιά.

Κο Σουρινάμ, αρχισάλομ τι κεράβ παρέα τερνέντζαρ αντρέ κι κχανγκιρί σο κερένας μπουτ πράγματα ι Ιεχωβάσκε. Ισινέ χάνικ πο μπαρέ μάνταρ ντα κερένας τακτικός σκαπανικός. Κάνα βακερένας σαρ νακχένας κο έργος, λένγκε μουγιά λένας-πες κατά χαρά. Σοράν κατά συναθροίσεις, κεράας λάφι-ντα μι αμαλέντζαρ πραγματένγκε κατά Γραφή​—μπάζιμ, καζόμ μπεσάας αβρί ντα ντικχάας ο τσεργανιά. Ανταλά αμαλά βοηθιντέ-μαν τι αγαβάβ σο μανγκάβας τι κεράβ μι ζωγιάτε. Μανγκάβας τι κεράβ μπουτί ι Ιεχωβάσκε. Οτθάρ, μπολντιλόμ κάνα ισινόμας 16 μπρεσένγκο. Ντα κάνα αβιλόμ 18, αρχισάλομ ο τακτικός σκαπανικός.

Σικλιλόμ μπουτ πράγματα σαρ σκαπανέας, ντα ανταλά βοηθιντέ-μαν σαρέ ο μπρεσά σο κεράβα σκαπανικός. Για παράδειγμας, εκ κατά πρώτα πράγματα σο σικλιλόμ ισινέ καζόμ σημαντικός ισί τι σικλιαράς ι γιαβερέν. Κάνα αρχισάλομ ο σκαπανικός, εκ ιεραπόστολος, ο Βίλεμ φαν Ζέιλ, βοηθιντάς-μαν. b Σικλιαρντάς-μαν λατσσές σαρ τι κεράβ μο διορισμοί κι κχανγκιρί. Αζομάν να νακχέλας μι γκοντιάταρ καζόμ μπουτ χρειαζίντιβαβας ανταβά σικλιαριπέ. Ο γιαβέρ μπρες, διορισάλομ ειδικός σκαπανέας ντα σοράν αρχισάλομ τι βοηθίναβ χουρντέ ομίλους πφραλέντζαρ ντα πφενίντζαρ  σο μπεσένας κο δάσος κο Σουρινάμ, ντουρ γιαβερέ κχανγκιρίνταρ. Ισινόμ πφερντό εκτίμηση ι σικλιαριμάσκε σο λιντόμ κατά πφραλά αζομάν σο χρειαζίντιβαβας-λες! Οτθάρ μπερί, προσπαθίναβα τι μοιάζαβ λέντε ντα τι νταβ μι σαατίσταρ για τι σικλιαράβ γιαβερέν.

Εκ δεύτερος πράγμας σο σικλιλόμ ισινέ καζόμ λατσσί ισί εκ απλή ντα μπουτ οργανωμέ ζωή. Κι αρχή κάθε μάσεκ, ι πφραλέσαρ σο κεράας ειδικός σκαπανικός σκεφτίναας σο χαμπίματα ντα πράγματα κα χρειαζίντιβαας κο γιαβερά εβδομάδες. Σοράν, εκ κατά ντούι κερέλας μπαρό ντρομ για τι τζαλ κι πρωτεύουσα τι ψωνίνελ. Έπρεπε τι προσοχίνας σαρ κα χαλαβάας ο λοβέ ι κάθε μασικέσκε ντα τι ιλιαβάς ο χαμπίματα για τι ερεσέν-αμέν σαρό ο μάσεκ. Άμα ατσσιλάμας εκ πραγμάσταρ οντουλέ δασόστε, κα μπορίνενας τι βοηθίνεν-αμέν χάνικ τζενέ, αν όχι καέκ. Πακιάβα ότι επειδή σικλιλόμ χουρντιαρέλα τι τζουβντιάβ εκ απλή ζωή, αλλά τι αβάβ μπουτ οργανωμέ, ανταβά βοηθιντάς-μαν τι τθεράβ μο γιακχά κο έργος κι Ιεχωβάσκο σαρί μι ζωή.

Εκ τρίτος πράγμας σο σικλιλόμ ισινέ καζόμ λατσσό ισί τι σικλιαράς ι τζενέν λένγκε τσσιμπάτε. Χουρντιαρέλα κεράβας λάφι ολλανδικά, αγγλικά, παπιαμέντο ντα σράναν​—ι τσσιπ σο κερντιόλα λάφι κο Σουρινάμ. Αλλά κο δάσος σο οτθέ ντέλα μπρισίμ, αγαντάμ ότι ο τζενέ ασουνένας ο λατσσέ αμπέρια κάνα βακεράας-λεν λένγκε τσσιμπάτε. Δυσκολίντιβαβας μπάζιμα τι κεράβ λάφι ανταλέ τσσιμπέντε, σαρ ισί η σαραμάκαν, σόσκε πρέπει τι βάντες ή τι γουλιαρές τι φωνή. Παρόλο σο μαρντόμ-μαν, ισινόμ χαρούμενος σο κερντόμ-λες ανταβά. Σαρέ ανταλά μπρεσά, σικλιαρντόμ ι αλήθεια ατζέ πο μπουτ τζενέντε σόσκε κεράβας λάφι λένγκε τσσιμπάτε.

Σίγουρα όμως, ισινέ φαρ σο λατζασάλομ οντουλένταρ σο βακερντόμ. Για παράδειγμας, εκ φαρ μανγκάβας τι πουτσάβ κι τσσιπ σαραμάκαν εκχέ τζουβλιά σο κερέλας μελέτη σαρ ισινέ, επειδή ντουκχάλας-λα ο περ. Αλλά πουτσλόμ-λα άμα ισινέ κχαμνί! Αγαβένα ότι μι ερώτηση κερντάς-λα τι λατζάλ. Παρόλο σο κερντόμ ασακέ λάθη, ποτές να τσσιναντόμ τι κεράβ λάφι κι τσσιπ κι τζενένγκι οτθέ σο υπηρετίναβας.

Κο 1970, αβιλόμ επίσκοπος περιοχής. Οντουβά μπρες, τσσουντόμ μπουτέ ομιλόνγκε, σο ισινέ αντρέ κο δάσος ντουρ κατά γιαβερά, τι ντικχέν ι ομιλία «Επίσκεψις στα Κεντρικά Γραφεία των Μαρτύρων του Ιεχωβά», σο αντρέ σικάντιβενας φωτογραφίες-ντα. Για τι τζας οντουλέ τθανέντε, μερικά πφραλά ντα με λάας εκ μπαρί καστικανί βάρκα ντα νακχάας ι λεν. Τθεράας αμέντζαρ εκ γεννήτρια, βενζίνη, λάμπες πετρελαίου ντα μηχανήματα για τι τσσουβάς τι κχελέν ο φωτογραφίες ι ομιλιάκε. Κάνα ερεσάας οτθέ σο μανγκάας, ακχαράας σαρέ ανταλά πράγματα οτθέ σο κα τσσουβάας ι ομιλία. Οντουβά όμως σο ντάβα-μαν γκοντί πο μπουτ σαριλένταρ οντουλέ ταξιδίνταρ ισί καζόμ μπουτ μπεϊντίνενας ο τζενέ οντουλέ τθανέντε οντουλά σο ντικχένας. Αβέλας μο γκι σο βοηθίναβας γιαβερέν τι σικλιόν ι Ιεχωβάσκε ντα λέσκε οργανωσιάκε ατθέ κι πφουβ. Κάνα ντικχάβας καζόμ λατσσέ αμαλά αβένας ο γιαβερά ι Ιεχωβάσαρ, χαιρίναβας σο κεράβας ανταγιά μπαρί μπουτί.

Παρόλο σο ντικχάβας ο λατσσίματα σο τθεράβας μι διορισμόστε σαρ μπίπαντριμε, να τσσιναντόμας τι μανγκάβ τι παντρίναβ. Οτθάρ,  αρχισάλομ τι κεράβ συγκεκριμέ προσευχές τι αρακχάβ εκχέ ρομνιά σο κα αβέλας μάντζαρ κι ολοχρόνια υπηρεσία ντα κα νταϊντίνελας χαράσαρ ο δοκιμασίες σο ισινέ ανταλέ διορισμόστε κο δάσος. Περίπου εκ μπρες σοράν, αρχισάλαμ γνωριμία με ντα η Έθελ, εκ ειδική σκαπάνισσα σο κερέλας θυσίες ι Ιεχωβάσκε αντράλ πι γκίσταρ. Χουρντιαρέλα, η Έθελ μπεϊντίνελας μπουτ ο παράδειγμας ι απόστολε Παυλόσκο ντα μανγκέλας τι κερέλ σο νακχέλας λάκε βαστέσταρ κο έργος σαρ κερέλας βοβ. Παντρισάλαμ κο Σεπτέμβριος 1971 ντα αρχισάλαμ τι υπηρετίνας κο έργος περιοχής σαρ αντρόγυνος.

Πι φαμιλιάτε η Έθελ να τθερέλας μπουτ πράγματα καζόμ μπαριόλας, οτθάρ ισινέ λάκε εύκολος τι κερέλ ο έργος περιοχής κο δάσος σο οτθέ ντέλα μπρισίμ. Για παράδειγμας, κάνα ετοιμάναας-αμέν τι τζας κχανγκιρίντε σο ισί ντιπ αντρέ κο δάσος, λάας αμέντζαρ χάνικ πράγματα. Τθοβάας αμαρέ σέα ντα κεράας μπάνιος λενίντε. Ντα σικλιλάμας τι χας σο-ντα τι ντένας-αμέν ο πφραλά σο φιλοξενίνενας-αμέν​—ιγκουάνα, πιράνχας ή σο-ντα γιαβέρ ασταρντέας κο δάσος ή κο λενιά. Κάνα να ισινέ τσαρέ, χάας κο φύλλα κι μπανανάκε. Κάνα να ισινέ τσσουρί ντα πιρόνι, χάας βαστέντζαρ. Η Έθελ ντα με πακιάσα ότι, χάρη κο θυσίες σο κερντάμ γιεκ καζόμ κεράας μπουτί ι Ιεχωβάσκε, κχουντάμ εκ ζουρανό τριπλός σολό. (Εκκλ. 4:​12) Με τίποτα να κα μανγκάας τι τζουβντιάς γιαβέρσοϊ αμαρί ζωή!

Εκ ντιβές, κάνα αβάας αμένγκε κατά πφραλά σο γκιλάμας τι ντικχάς κο δάσος, αβιλό οντουβά σο βακερντόμ κι αρχή μι ιστοριάτε. Καζόμ η βάρκα ερεσέλας κο τθαν σο ο πανιά τθάβντενας ζουρανές, βουλιαξάλι για χάνικ, αλλά σουγκό νικλιντάς οπρέ. Πάλι λατσσές σο ιριάας σωσίβια ντα να πελάμ κατά βάρκα, σο πφερντιλί πανί. Τσουτσαρντάμ αμαρέ δοχεία ι χαμπιματέντζαρ κι λεν ντα σοράν χρησιμοποιηντάμ-λεν για τι νικαβάς ο πανί κατά βάρκα.

Αφού χασαρντάμ αμαρό χαμπέ, μανγκλάμ τι ασταράς ματσσέν καζόμ γουλιάας ι λεν, αλλά να ασταράας τίποτα. Οτθάρ, κερντάμ προσευχή κο Ιεχωβά ντα μανγκλάμ λέσταρ τι ντελ-αμέν αμαρό  χαμπέ οντουλέ ντιβεσέσκε. Αμέσως σοράν κατά προσευχή, εκ πφραλ τσσουντάς πετονιά ντα ασταρντάς εκ μπαρό ματσσό για τι τσαλιάς ο παντς-ντα οντιά ιράτ.

Αφού κερντάμ ο έργος περιοχής παντς μπρες, η Έθελ ντα με λιντάμ εκ ευλογία σο να μπεκλεντίναας-λα. Κα αβάας ντατ ντα ντάι. Χαιρισάλομ κάνα σικλιλόμ-λες, αλλά να τζανάβας σαρ ανταβά κα επηρεάνελας αμαρί ζωή. Μανγκάας ο ντούι-ντα μπουτ τι ατσσάς κι ολοχρόνια υπηρεσία, άμα αβέλας-πες. Κο 1976, μπιάντιλο αμαρό τσσαβό ο Έθνιελ ντα, ντούι επκάς μπρεσά πο σοράν, μπιάντιλο ο δεύτερος τσσαβό-ντα, ο Τζιοβάνι.

Επειδή υπαρχίντιβελας ανάγκη αζομάν κο Σουρινάμ, ο γραφείος τμήματος βακερντάς τι συνεχίναβ τι κεράβ ο έργος σαρ επίσκοπος περιοχής καζόμ μπαριαράας αμαρέ τσσαβέν. Κάνα ισινέ χουρντέ, μπουτσσαβένας-μαν τθανέντε χάνικ κχανγκιρίντζαρ. Ο πο μπουτ φαρ ανταβά μουκχέλας-μαν τι υπηρετίναβ ντούι εβδομάδες κάθε μάσεκ σαρ επίσκοπος ντα σαρό ο γιαβέρ μάσεκ σαρ σκαπανέας κι κχανγκιρί σο ισινάμας διορισμέ. Η Έθελ ντα ο τσσαβέ αβένας μάντζαρ κάνα τζάβας κο κχανγκιριά σο ισινέ πασέ αμαρέ κχερέστε. Όμως, κεράβας ταξίδι κορκορό κάνα τζάβας κο κχανγκιριά ντα κο συνελεύσεις κο δάσος.

Χρειαζίντιβελας τι αβάβ μπουτ λατσσές οργανωμέ για τι κεράβ σαρέ μο ευθύνες. Κανονίναβας τι σικλιαράς-αμέν κατά Γραφή σαρ φαμιλί κάθε εβδομάδα. Κάνα νασάβας για τι τζαβ κχανγκιρίντε κο δάσος, η Έθελ κερέλας ο σικλιαριπέ ι φαμιλιάκο κατά Γραφή ι τσσαβέντζαρ κο κχερ. Όμως, καζόμ μπορίναας κεράας πράγματα γιεκ σαρ φαμιλί. Επίσης, η Έθελ ντα με νακχάας μπουτ σουκάρ αμαρέ τσσαβέντζαρ​—κχελάας παιχνίδια ή τζάας σουκάρ τθανέντε πασέ αμαρέ κχερέστε. Μπουτ φαρ ντισαράβας για τι ετοιμάναβ μο διορισμοί. Ντα η Έθελ, σαρ η άξια ρομνί σο βακέρντιβελα κο εδάφιος Παροιμίες 31:​15, ιστίλας πριν τι ντισιόλ για τι ετοιμάνελ σο-ντα χρειαζίντιβελας για τι διαβάνας ο εδάφιος ι ντιβεσέσκο σαρ φαμιλί ντα τι χας πρωινός γιεκ πριν ο τσσαβέ τι τζαν κο σχολείος. Ισινόμ πφερντό εκτίμηση σο τθεράβα εκχέ ασακέ ρομνιά σο ντέλα πι νεαυτόσταρ ντα ισί πάντα έτοιμη τι βοηθίνελ-μαν τι κεράβ ο διορισμοί σο ντέλα-μαν ο Ιεχωβά!

Σαρ ντατ ντα ντάι, μαράας-αμέν τι βοηθίνας αμαρέ τσσαβέν τι μανγκέν ι Ιεχωβάς ντα ο έργος. Μανγκάας αμαρέ τσσαβέ τι τραμπίνεν ι ολοχρόνια υπηρεσία πουμαρέ ζωγιάτε όχι επειδή μανγκάας-λες αμέν, αλλά επειδή κα τραμπίνενας-λες βον. Πάντα βακεράας λένγκε καζόμ χαρά κα τθερένας κι ολοχρόνια υπηρεσία. Βακεράας λένγκε ο  δυσκολίες-ντα, όμως ταρτίναας λένγκι προσοχή κο τρόπος σο βοηθίνελας-αμέν ντα ευλογίνελας-αμέν ο Ιεχωβά σαρ φαμιλί. Κανονίναας-ντα τι αβέν αμαρέ τσσαβέ Μαρτυρέντζαρ σο τσσουβένας ι Ιεχωβάς πρώτα πουμαρέ ζωγιάτε.

Ο Ιεχωβά ντέλας-αμέν σο-ντα χρειαζίντιβαας καζόμ μπαριαράας αμαρέ τσσαβέν. Σίγουρα, με-ντα κεράβας ο πο λατσσό σο μπορίναβας για τι βοηθίναβ μι φαμιλί. Οντουλά σο τζουβντιλόμ σαρ μπίπαντριμε ειδικός σκαπανέας κο δάσος σικλιαρντάς-μαν τι γκίνταβ λοβέ ι πραγματένγκε σο κα χρειαζίντιβελας τι κινάς. Αλλά ατζέ-ντα κάνα κεράας ο πο λατσσό σο μπορίναας, μπάζιμα να τθεράας σαρέ οντουλά σο χρειαζίντιβαας. Οντουλέ περιπτωσιέντε, πακιάβα ότι ο Ιεχωβά βοηθιντάς-αμέν. Για παράδειγμας, κο 1986 μέχρι κο 1992, ισινέ προβλήματα κο Σουρινάμ. Οντουλά μπρεσά, μπάζιμα ισινέ δύσκολος τι αρακχέλ εκ τζενό ατζέ-ντα ο βασικά πράγματα. Όμως ο Ιεχωβά ντέλας-λεν αμέντε.​—Ματθ. 6:32.

Σαρέ αμαρέ ζωγιάτε, ο Ιεχωβά πάντα αρακχαβέλας-αμέν ντα βοηθίνελας-αμέν τι αβάς χαρούμενοι ντα πφερντέ. Αμαρέ τσσαβέ ισί μπαρί ευλογία αμένγκε ντα ισινέ προνόμιος αμένγκε τι μπαριαράς-λεν ντα τι υπηρετίνεν ι Ιεχωβάς. Ισινάμ μπουτ χαρούμενοι σο τσσουντέ βον-ντα ι ολοχρόνια υπηρεσία κι πρώτη θέση πουμαρέ ζωγιάτε. Εμ ο Έθνιελ εμ ο Τζιοβάνι νακχλέ θεοκρατικές σχολές ντα υπηρετίνενα ακανά κο γραφείος τμήματος κο Σουρινάμ γιεκ πουμαρέ ρομνίντζαρ.

Η Έθελ ντα με ισινάμ ακανά πφουρέ, αλλά συνεχίνασα τι κεράς μπουτ πράγματα ι Ιεχωβάσκε κο έργος σαρ ειδικοί σκαπανείς. Ντα, ισί αζόμ πφερντό αμαρό πρόγραμμας σο να αρακχλόμ ατζέ σαάτι τι σικλιάβ τι κεράβ μπάνιος! Αλλά να μετανιώναβα οντουλένγκε σο τραμπιντόμ. Ακανά σο σκεφτίναβα οντουλά σο αβιλέ-πες μι ζωγιάτε, πακιάβα μπαγιά ότι η απόφαση σο λιντόμ κάνα ισινόμας τερνό τι τσσουβάβ ι ολοχρόνια υπηρεσία κι πρώτη θέση μι ζωγιάτε ισινέ εκ κατά πο λατσσέ αποφάσεις σο κα μπορίναβας τι λαβ ποτές.