1. Σαρ τζανάσα ότι ο Ιεχωβά μανγκέλα τι τζας πασέ λέστε;

 Ο ΙΕΧΩΒΑ βακερέλα αμένγκε τι τζας πασέ λέστε. (Ιακ. 4:8) Μανγκέλα τι αβέλ αμαρό Ντεβέλ, αμαρό Ντατ ντα αμαρό Αμάλ. Απαντίνελα αμαρέ προσευχιέντε ντα βοηθίνελα-αμέν κάνα νακχάσα δυσκολίες. Ντα χρησιμοποιήνελα πι οργάνωση για τι σικλιαρέλ-αμέν ντα τι αρακχαβέλ-αμέν. Αλλά σο πρέπει τι κεράς για τι τζας πο πασέ κο Ιεχωβά;

2. Σαρ μπορίνασα τι τζας πασέ κο Ιεχωβά;

² Μπορίνασα τι τζας πασέ κο Ιεχωβά κάνα προσευχίντιβασα λέστε ντα κάνα διαβάνασα λέσκο Λάφι ντα σκεφτίνασα-λες λατσσές. Καζόμ κεράσα-λες ανταβά, πφερντιάσα μανγκιπέ ντα εκτίμηση λέσκε. Νικιόλα αμένταρ τι ντας-λες καν ντα ο ισαριπέ σο αξίνελα λέσκε. (Αποκ. 4:​11) Καζόμ πο μπουτ τζανάσα ι Ιεχωβάς, αζόμ πο μπαρί μπέσα κα ντας λέσκε ντα κι οργάνωση σο ντινάς-αμέν για τι βοηθίνελ-αμέν.

3. Σαρ προσπαθίνελα ο Μπενγκ τι τσσιναβέλ-αμέν τι υπηρετίνας ι Ιεχωβάς, αλλά σο κα βοηθίνελ-αμέν μα τι μουκχάς ποτές αμαρέ Ντεβλές ντα λέσκι οργάνωση; (Ψαλμ. 31:​13, 14)

³ Ο Μπενγκ όμως προσπαθίνελα τι τσσιναβέλ-αμέν τι υπηρετίνας ι Ιεχωβάς, πο μπουτ κάνα νακχάσα δυσκολίες. Σαρ κερέλα-λες ανταβά; Χάνικ χάνικ, προσπαθίνελα τι κερέλ-αμέν τι τσσιναβάς τι ντας μπέσα κο Ιεχωβά ντα κι οργάνωση λέσκι. Αλλά αμέν μπορίνασα τι τζας λέσαρ κόντρα. Άμα αμαρί πίστη ισί ζουρανί ντα τθεράσα μπαρί μπέσα κο Ιεχωβά, να κα μουκχάς αμαρέ Ντεβλές ντα λέσκι οργάνωση.​—Διαβάνεν Ψαλμός 31:​13, 14.

4. Σο κα ντικχάς ανταλέ μαθημάστε;

⁴ Ανταλέ μαθημάστε, κα ντικχάς τριν δυσκολίες σο να αβένα κατά κχανγκιρί. Η κάθε εκ κα μπορίνελας τι κερέλ-αμέν τι χασαράς αμαρί μπέσα κο Ιεχωβά ντα κι οργάνωση λέσκι. Σαρ κα  μπορίνενας ανταλά δυσκολίες τι τσσιναβέν-αμέν τι υπηρετίνας ι Ιεχωβάς; Ντα σο μπορίνασα τι κεράς για μα τι μουκχάς ι Μπενγκές τι τσσιναβέλ-αμέν τι ατσσάς πιστοί κο Ιεχωβά ντα κι οργάνωση Λέσκι;

5. Σαρ κα μπορίνενας ο προβλήματα τι κερέν-αμέν τι τσσιναβάς τι ντας μπέσα κο Ιεχωβά ντα κι οργάνωση λέσκι;

⁵ Μπάζιμα, νακχάσα προβλήματα. Για παράδειγμας, αμαρί φαμιλί μπέκιμ τι τζάλα αμέντζαρ κόντρα ή τι χασαρντάμ αμαρί μπουτί. Σαρ κα μπορίνενας ασακέ προβλήματα τι κερέν-αμέν τι τσσιναβάς τι ντας μπέσα κι οργάνωση κι Ιεχωβάσκι ντα τι τσσιναβέν-αμέν τι υπηρετίνας-λες; Κάνα νταϊντίνασα προβλήματα μπουτ βακίτι, μπέκιμ τι νιωθίνασα απελπισμέ ντα πφανγκέ γκίσκε. Ο Μπενγκ χρησιμοποιήνελα ασακέ ευκαιρίες, για τι κερέλ-αμέν τι αμντίνας ότι ο Ιεχωβά να μανγκέλα-αμέν. Ο Μπενγκ μανγκέλα τι κερέλ-αμέν τι σκεφτίνας μήπως φταίνελα ο Ιεχωβά ή η οργάνωση λέσκι αμαρέ βασανένγκε. Κάτι ασακό αβιλό-πες μερικέ Ισραηλιτένγκε κι Αίγυπτος. Κι αρχή, πακιαντέ ότι ο Μωυσής ντα ο Ααρών διορισάλεας κατά Ιεχωβά για τι ελευθερώνεν-λεν κατά σκλαβιά. (Έξοδ. 4:​29-31) Πο σοράν όμως, κάνα ο Φαραώ κερντάς πο δύσκολη λένγκι ζωή, τσσουντέ ο βάρετα κο Μωυσής ντα κο Ααρών πουμαρέ προβληματένγκε, ντα βακερντέ λένγκε: «Κερντέν ι Φαραώς ντα λέσκε υπηρετόν τι μισίνεν-αμέν ντα τσσουντέν σπαθίς λένγκε βαστέστε για τι μουνταρέν-αμέν». (Έξοδ. 5:​19-21) Τσσουντέ ο βάρετα κο αφοσιωμέ υπηρέτες κι Ντεβλέσκε. Σο μπέτι! Άμα νταϊντίνενα προβλήματα μπουτ βακίτι, σαρ μπορίνενα τι συνεχίνεν τι ντεν μπαρί μπέσα κο Ιεχωβά ντα κι οργάνωση λέσκι;

6. Σαρ σικλιάσα κατά προφήτης Αββακούμ τι νταϊντίνας αμαρέ προβλήματα; (Αββακούμ 3:​17-19)

⁶ Τι πουτρέν τουμαρό γκι κο Ιεχωβά αντράλ κατά προσευχή ντα τι μπεκλεντίνεν λέσκι βοήθεια. Ο προφήτης Αββακούμ νακχλάς μπουτ προβλήματα. Εκ φαρ, ντικχίντιβελα ότι να ισινέ σίγουρος άμα ο Ιεχωβά πφαμπόλας λέσκε. Οτθάρ, κερντάς προσευχή ντα βακερντάς ι Ιεχωβάσκε σαρ νιωθίνελας, ακαλέ λαφίντζαρ: «Μέχρι κάνα, Ιεχωβά, κα νταβ βίκος για βοήθεια ντα τούι να κα ασουνές; . . . Σόσκε μουκχέσα ι τζενέν τι ζορισκιαρέν ο εκ ι γιαβερές;» (Αββακ. 1:2, 3) Ο Ιεχωβά απαντιντάς κι προσευχή σο κερντάς αντράλ πι γκίσταρ λέσκο αφοσιωμέ υπηρέτης. (Αββακ. 2:2, 3) Κάνα ο Αββακούμ σκεφτιντάς λατσσές σαρ σωντάς ο Ιεχωβά πι λαός, αρακχλάς πάλι πι χαρά. Αβιλό σίγουρος ότι ο Ιεχωβά πφαμπόλας λέσκε ντα ότι κα βοηθίνελας-λες τι νταϊντίνελ σαρέ ο δοκιμασίες. (Διαβάνεν Αββακούμ 3:​17-19) Σο σικλιάσα αμέν; Κάνα νακχένα προβλήματα, τι προσευχίντιβεν κο Ιεχωβά ντα τι βακερέν λέσκε σαρ νιωθίνενα. Σοράν, τι μπεκλεντίνεν λέσκι βοήθεια. Άμα κερένα-λες ανταβά, μπορίνενα τι αβέν σίγουροι ότι ο Ιεχωβά κα ντελ-τουμέν ι ζορ σο τθερένα ανάγκη για τι νταϊντίνεν. Ντα κάνα αγαβένα λέσκι βοήθεια, τουμαρί πίστη λέστε κα αβέλ πο ζουρανί.

7. Σο προσπαθιντέ ο τζενέ της Σίρλεϊ τι κερέν-λα τι πακιάλ, ντα σο βοηθιντάς-λα μα τι χασαρέλ πι πίστη κο Ιεχωβά;

⁷ Μα τσσιναβέν τι κερέν πράγματα σο κα βοηθίνεν-τουμέν τι ατσσόν πασέ κο Ιεχωβά. Ντικχέν σαρ βοηθιντάς ανταβά εκχέ πφενιά σο βακερένα λάκε Σίρλεϊ, κατά Παπούα-Νέα Γουινέα, κάνα νακχέλας προβλήματα. b Λάκι φαμιλί ισινέ τσορορί, ντα μπάζιμα μαρένας-πες για τι τθερέν κάτι τι χαν. Εκ λάκε τζενένταρ προσπαθιντάς τι κερέλ-λα τι τσσιναβέλ τι ντελ μπέσα κο Ιεχωβά, κάνα βακερντάς: «Βακερέσα ότι ο άγιος πνεύμας ι Ντεβλέσκο βοηθίνελα-τουτ, αλλά κάι ισί η βοήθεια; Τι φαμιλί συνεχίνελα τι αβέλ τσορορί. Χασαρέσα το σαάτι  κο έργος». Η Σίρλεϊ βακερέλα: «Σκεφτιντόμ: “Τελικά, πφαμπόλα ο Ντεβέλ αμένγκε;” Σουγκό, κερντόμ προσευχή κο Ιεχωβά ντα βακερντόμ λέσκε σο-ντα τθεράβας μι γκοντιάτε. Να τσσιναντόμ τι διαβάναβ ι Γραφή ντα αμαρέ έντυπα, επίσης τι νικιάβ κο έργος ντα τι τζαβ κο συναθροίσεις». Η Σίρλεϊ μπουτ σουγκό αγαντάς ότι ο Ιεχωβά αρακχαβέλας λάκι φαμιλί. Να μποκχάλιλε ντα ισινέ χαρούμενοι. Η Σίρλεϊ βακερέλα: «Νιωθίναβας ότι ο Ιεχωβά απαντίνελας μι προσευχιέντε». (1 Τιμ. 6:​6-8) Άμα κα συνεχίνεν τι κερέν πράγματα σο κα βοηθίνεν-τουμέν τι ατσσόν πασέ κο Ιεχωβά, ούτε τουμέν κα μουκχέν κο προβλήματα ή κο αμφιβολίες τι τσσιναβέν-τουμέν τι υπηρετίνεν ι Ιεχωβάς.

8. Σο μπέκιμ τι αβέλ-πες κο υπεύθυνα πφραλά κι Ιεχωβάσκι οργάνωση;

⁸ Αντράλ κατά τηλεόραση ντα κατά κοινωνικά δίκτυα, αμαρέ ντουσμάνια βακερένα ψέματα ι υπεύθυνε πφραλένγκε κι οργάνωση κι Ιεχωβάσκι ή κερένα-αμέν τι τθεράς αμφιβολίες λένγκε. (Ψαλμ. 31:​13) Μερικά πφραλά τσσουβντιλέ φυλακή ντα κατηγορίντιλε για εγκλήματα. Ο Χριστιανοί κο πρώτος αιώνας νακχλέ βον-ντα εκ ασακί δυσκολία κάνα ο απόστολος Παύλος κατηγορίντιλο σινανέ ντα τσσουβντιλό φυλακή. Σο κερντέ;

9. Σο κερντέ μερικοί Χριστιανοί κάνα ο απόστολος Παύλος τσσουβντιλό φυλακή;

⁹ Μερικοί Χριστιανοί κο πρώτος αιώνας τσσιναντέ τι αβέν πασέ κο απόστολος Παύλος κάνα γκιλό φυλακή κι Ρώμη. (2 Τιμ. 1:8, 15) Σόσκε; Μήπως λατζάνας ι Παυλόσκε επειδή ο πο μπουτ τζενέ πακιάνας ότι ισινέ εγκληματίας; (2 Τιμ. 2:8, 9) Μήπως νταρένας ότι κα τζάνας λέντζαρ-ντα κόντρα; Καβά-ντα τι αβέλας ο λόγος, ανέν τουμαρέ γκοντιάτε σαρ πρέπει τι νιωθίνελας ο Παύλος. Νταϊντιντάας μπουτ προβλήματα ντα τσσουντάας ατζέ-ντα σε κίνδυνος πι ζωή λένγκε. (Πράξ. 20:​18-21· 2 Κορ. 1:8) Μα τι αβάς ποτές σαρ οντουλέντε σο μουκχλέ ι Παυλός κάνα χρειαζίντιβελας-λεν αζόμ μπουτ! Σο πρέπει τι τθεράς αμαρέ γκοντιάτε κάνα υπεύθυνα πφραλά νακχένα διωγμός;

10. Σο πρέπει τι ντας-αμέν γκοντί κάνα υπεύθυνα πφραλά νακχένα διωγμός, ντα σόσκε;

 ¹⁰ Τι ντεν-τουμέν γκοντί σόσκε τζάνα αμέντζαρ κόντρα ντα κάσταρ αβέλα. Ο εδάφιος 2 Τιμόθεο 3:​12 βακερέλα: «Κα τζαν κόντρα σαρέ οντουλέ τζενέντζαρ-ντα σο μανγκένα τι αβέν αφοσιωμέ κο Ντεβέλ ντα τζουβντιόνα σαρ μανγκέλα ο Χριστός Ιησούς». Οτθάρ, δεν πρέπει τι κερέλ αμένγκε εντύπωση σο ο Μπενγκ τσσουβέλα κι γιακχ ι υπεύθυνε πφραλέν. Μανγκέλα ανταλά πφραλά τι τσσιναβέν τι ατσσόν πιστοί κο Ιεχωβά ντα μανγκέλα τι νταραβέλ-αμέν.​—1 Πέτρ. 5:8.

11. Σο σικλιάσα κατά Ονησίφορος; (2 Τιμόθεο 1:​16-18)

¹¹ Τι τσσίντεν αφοσιωμέ τουμαρέ πφραλένταρ. (Διαβάνεν 2 Τιμόθεο 1:​16-18) Ο Ονησίφορος, εκ Χριστιανός κο πρώτος αιώνας, κερντάς κάτι γιαβέρ κάνα ο Παύλος τσσουβντιλό φυλακή. “Να λατζασάλο λέσκε τζαντζιρίνγκε σο τθερέλας κι φυλακή”. Οκιά μπάνταρ, ροντιντάς ι Παυλόσκε, ντα κάνα αρακχλάς-λες, προσπαθιντάς τι βοηθίνελ-λες ντα τι ντελ-λες σο-ντα χρειαζίντιβελας. Κάνα κερντάς-λες ανταβά, ο Ονησίφορος τσσουντάς σε κίνδυνος πι ζωή. Σο σικλιάσα αμέν; Δεν πρέπει τι μουκχάς ι νταρ κατά τζενέ τι περαβέλ-αμέν ή τι κερέλ-αμέν τι τσσιναβάς τι τσσίντας αμαρέ πφραλένταρ σο νακχένα διωγμός. Οκιά μπάνταρ, πρέπει τι τσσίντας λένταρ ντα τι βοηθίνας-λεν. (Παρ. 17:​17) Χρειαζίντιβενα αμαρό μανγκιπέ ντα αμαρί βοήθεια.

12. Σο σικλιάσα αμαρέ πφραλένταρ ντα αμαρέ πφενίνταρ κι Ρωσία;

¹² Σκεφτίνεν σαρ βοηθιντέ ο πφραλά ντα ο πφενιά κι Ρωσία πουμαρέ αγαπημέ πφραλέν σο γκιλέ φυλακή. Κάνα κάποιοι δικάντιβενα, μπουτ πφραλά ντα πφενιά τζάνα κο δικαστήριος για τι αβέν πασέ λέντε. Σο σικλιάσα αμέν; Κάνα υπεύθυνα πφραλά κατηγορίντιβενα, τζάνα κι φυλακή ή νακχένα διωγμός, μα νταρέν. Τι προσευχίντιβεν λένγκε, τι αρακχαβέν λένγκι φαμιλί ντα τι προσπαθίνεν τι βοηθίνεν-λεν ντα τι ντεν-λεν οντουλά σο χρειαζίντιβενα.​—Πράξ. 12:5· 2 Κορ. 1:​10, 11.

13. Κάνα πρασάνα-αμέν, σαρ μπορίνελα ανταβά τι κερέλ-αμέν τι τσσιναβάς τι ντας μπέσα κο Ιεχωβά ντα κι οργάνωση λέσκι;

¹³ Μπέκιμ αμαρέ τζενέ σο νανέ κι αλήθεια, τζενέ σο κεράσα λέντζαρ μπουτί ή αμαρέ συμμαθητές τι πρασάν-αμέν επειδή κεράσα έργος ή επειδή κεράσα ο εντολές ι Ιεχωβάσκε. (1 Πέτρ. 4:4) Μπέκιμ βακερένα: «Συμπαθίναβα-τουτ σαρ τζενό, αλλά τι θρησκεία ισί μπουτ αυστηρή ντα ανταλά σο βακερέλα αβένας-πες κο πουρανέ μπρεσά». Μερικοί μπέκιμ τι κρίνεν-αμέν για το τρόπος σο συμπεριφερίντιβασα κο αποκομμέ τζενέ, ακαλέ λαφίντζαρ: «Σαρ μπορίνενα τι βακερέν ότι σικαβένα μανγκιπέ;» Ασακέ λάφια μπορίνενα τι κερέν-αμέν τι σκεφτίνας άμα ο νόμοι ι Ιεχωβάσκε ισί δίκαιοι. Μπέκιμ τι αρχίνας τι πουτσάς-αμέν: “Μήπως ο Ιεχωβά μανγκέλα μάνταρ πο μπουτ πράγματα από ό,τι πρέπει; Μήπως λέσκι οργάνωση τσσιναβέλα-αμέν μπουτέ πραγματένταρ;” Άμα νιωθίνενα αντικάς, σαρ μπορίνενα τι ατσσόν πασέ κο Ιεχωβά ντα κι οργάνωση λέσκι;

14. Σο πρέπει τι κεράς κάνα ο γιαβερά πρασάνα-αμέν επειδή κεράσα ο κανόνες ι Ιεχωβάσκε; (Ψαλμός 119:​50-52)

¹⁴ Τι αβέν αποφασισμέ τι κερέν ι Ιεχωβάσκε κανόνες. Ο Ιώβ κερέλας ο κανόνες ι Ιεχωβάσκε, παρόλο σο πρασάνας-λες ανταλέσκε. Εκ μουρς σο κερέλας-πες ότι ισινέ αμάλ ι Ιωβίσκο προσπαθιντάς ατζέ-ντα τι κερέλ-λες τι πακιάλ ότι να χάλας ανάγκη ι Ντεβλές αν ο Ιώβ κα κερέλας ο σωστός. (Ιώβ 4:​17, 18· 22:3) Αλλά ο Ιώβ να μανγκλάς τι πακιάλ ασακέ ψέματα. Τζανέλας ότι ο κανόνες ι Ιεχωβάσκε σο σικαβένα ο σωστός ντα ο λάθος ισί σωστοί ντα ισινέ αποφασισμέ τι κερέλ-λεν. Να μουκχλάς ι γιαβερέν  τι νασκιαρέν λέσκι ακεραιότητα. (Ιώβ 27:5, 6) Σο σικλιάσα αμέν; Μα μουκχέν κο πρασαϊπέ τι κερέλ-τουμέν μα τι αβέν σίγουροι για το κανόνες ι Ιεχωβάσκε. Ντεν-τουμέν γκοντί τουμαρέ εμπειρίες. Να ντικχλέν μπουτ φαρ ότι ο κανόνες ι Ιεχωβάσκε ισί σωστοί ντα ότι βοηθίνενα-τουμέν; Τι αβέν αποφασισμέ τι τσσίντεν κατά οργάνωση σο κερέλα ανταλά κανόνες. Αζομάν καζόμ-ντα τι πρασάν-τουμέν ο τζενέ, να κα τσσιναβέν ποτές τι υπηρετίνεν ι Ιεχωβάς.​—Διαβάνεν Ψαλμός 119:​50-52.

15. Σόσκε πρασάνας την Μπρίτζιτ;

¹⁵ Ντεν-τουμέν γκοντί σο αβιλό-πες κι Μπρίτζιτ, εκχέ πφενιάτε σο μπεσέλα κι Ινδία. Τζενέ λάκε φαμιλιάταρ πρασάνας-λα οντουλένγκε σο πακιάλας. Χάνικ σοράν λάκε μπολντιμάσταρ κο 1997, ο ρομ λάκο σο να ισινέ Μάρτυρας χασαρντάς πι μπουτί. Οτθάρ, βοβ αποφασιντάς τι λελ την Μπρίτζιτ ντα πουμαρέ τσσαΐν ντα τι τζαν τι μπεσέν πι νταντέστε ντα πι νταγιάτε σο τζουβντιόνας σε εκ γιαβέρ πόλη. Αλλά η Μπρίτζιτ κα νακχέλας ατζέ πο μπαρέ δυσκολίες. Επειδή λάκο ρομ να τθερέλας μπουτί, έπρεπε τι κερέλ μπουτί βόι μπουτ σαάτια για τι ανέλ ο αναγκαία πι φαμιλιάτε. Επίσης, η κχανγκιρί σο ισινέ πο πασέ λάτε ισινέ περίπου 350 χιλιόμετρα ντουρ. Δυστυχώς, η φαμιλί λάκε ρομέσκι τζάλας λάσαρ κόντρα οντουλένγκε σο πακιάλας. Ο πράγματα αβιλέ αζόμ δύσκολα σο η φαμιλί της Μπρίτζιτ αναγκασάλι τι μετακομίνελ πάλι. Σοράν, λάκο ρομ μουλό ξαφνικά. Ντα πο σοράν, εκ λάκε τσσαΐνταρ μουλί από καρκίνος κάνα ισινέ 12 μπρεσένγκι. Ντα εκτός σαρέ ανταλένταρ, ο τζενέ της Μπρίτζιτ κατηγορίνενας-λα. Βακερένας ότι, άμα να αβιλίας Μάρτυρας ι Ιεχωβάσκι, σαρέ ανταλά μπέτι πράγματα να κα αβένας-πες. Βόι όμως να τσσιναντάς τι ντελ μπέσα κο Ιεχωβά ντα τι ατσσόλ πασέ κι οργάνωση λέσκι.

16. Σαρ ευλογισάλι η Μπρίτζιτ επειδή ατσσιλί πασέ κο Ιεχωβά ντα κι οργάνωση λέσκι;

¹⁶ Επειδή η Μπρίτζιτ μπεσέλας μπουτ ντουρ κατά κχανγκιρί, εκ επίσκοπος περιοχής βακερντάς λάκε τι κερέλ έργος οτθέ σο μπεσέλας ντα τι κερέλ συναθροίσεις πι κχερέστε. Κι αρχή, νιωσάλι ότι ανταβά ισί μπουτ δύσκολος. Αλλά κερντάς οντουβά σο βακερντάς λάκε. Βακερέλας ο λατσσέ αμπέρια κο γιαβερά, κερέλας συναθροίσεις πι κχερέστε ντα ντέλας πι  σαατίσταρ για τι κερέλ φαμιλιάκι λατρεία πι τσσαΐντζαρ. Καβά ισινέ ο αποτέλεσμας; Μπορισάλι τι αρχίνελ μπουτ μελέτες, ντα μπερεκέτι κατά τζενέ σο κερντάς-λεν μελέτη μπολντιλέ. Κο 2005 λιντάς ο τακτικός σκαπανικός. Η μπέσα σο ντέλας κο Ιεχωβά ντα η αφοσίωση κι οργάνωση λέσκι ευλογισάλε. Λάκε τσσαγιά υπηρετίνενα πιστά ι Ιεχωβάς, ντα ακανά οντουλέ τθανέστε ισί ντούι κχανγκιριά! Η Μπρίτζιτ ισί σίγουρη ότι ο Ιεχωβά ντινάς-λα ι ζορ τι νταϊντίνελ ο προβλήματα ντα ο πρασαϊπέ πι φαμιλιάταρ.

17. Σο πρέπει τι αβάς αποφασισμέ τι κεράς;

¹⁷ Ο Μπενγκ μανγκέλα τι πακιάς ότι ο Ιεχωβά κα μουκχέλ-αμέν κάνα κα νακχάς προβλήματα ντα ότι ο μόνος πράγμας σο κα καταφερίνας άμα κα τσσίντας κατά οργάνωση ι Ιεχωβάσκι ισί τι κεράς αμαρί ζωή ατζέ πο δύσκολη. Ο Μπενγκ μανγκέλα τι νταράς κάνα υπεύθυνα πφραλά κατηγορίντιβενα, νακχένα διωγμός ή τσσουβντιόνα κι φυλακή. Ντα αντράλ κατά πρασαϊπέ, μανγκέλα τι κερέλ-αμέν μα τι ντας μπέσα κο κανόνες κι Ιεχωβάσκε ντα κι οργάνωση Λέσκι. Όμως, αμέν τζανάσα λατσσές καζόμ πφιρνό ισί ντα να χουχάντιβασα. (2 Κορ. 2:​11) Τι αβέν αποφασισμέ μα τι δεχτίνεν ο ψέματα ι Μπενγκέσκε ντα τι ατσσόν αφοσιωμέ κο Ιεχωβά ντα κι οργάνωση Λέσκι. Τι ντεν-τουμέν γκοντί ότι ο Ιεχωβά ποτές να κα μουκχέλ-τουμέν. (Ψαλμ. 28:7) Οτθάρ, μα μουκχέν τίποτα τι τσσιναβέλ-τουμέν τι υπηρετίνεν ι Ιεχωβάς!​—Ρωμ. 8:​35-39.

18. Σο κα ντικχάς κο γιαβέρ μάθημας;

¹⁸ Ανταλέ μαθημάστε, ντικχλάμ μερικές δυσκολίες σο να αβένα κατά κχανγκιρί. Αλλά αμαρί μπέσα κο Ιεχωβά ντα κι οργάνωση λέσκι μπορίνελα επίσης τι δοκιμάντιβελ κατά δυσκολίες σο αβένα αντράλ κατά κχανγκιρί. Σαρ μπορίνασα τι τζας-λεν λατσσές ασακέ δυσκολιέντζαρ; Ανταβά κα ντικχάς-λες κο γιαβέρ μάθημας.