1. Σο μπεκλεντίνασα, ντα καλέ πραγμάσκε ισινάμ σίγουροι;

 ΜΠΕΚΛΕΝΤΙΝΑΣΑ ότι κα τζαν αμέντζαρ κόντρα ο τζενέ καζόμ κα κεράς αμαρό έργος. Ντα ανγκλ’ αμέντε μπέκιμ τι τζαν αμέντζαρ ατζέ πο μπουτ κόντρα. (Δαν. 11:​44· 2 Τιμ. 3:​12· Αποκ. 16:​21) Όμως, ισινάμ σίγουροι ότι ο Ιεχωβά κα ντελ-αμέν ι βοήθεια σο χρειαζίντιβασα. Σόσκε; Ο Ιεχωβά πάντα βοηθίνελας πι υπηρετόν τι κερέν πουμαρέ διορισμοί, καζόμ δύσκολοι-ντα τι ισινέας. Για τι ντικχάς εκ παράδειγμας ανταλέσκε, κα σικλιάς μερικά πράγματα σο αβιλέ-πες κο προφήτης Ιεζεκιήλ. Βοβ κερέλας έργος κο Ιουδαίοι σο λιντιλέας αιχμάλωτοι κι Βαβυλώνα.

2. Σαρ βακερντάς ο Ιεχωβά ότι ισινέ ο τζενέ κο τθαν σο τθερέλας τι κερέλ έργος ο Ιεζεκιήλ, ντα σο κα ντικχάς ανταλέ μαθημάστε; (Ιεζεκιήλ 2:​3-6)

² Σο τζενέντε τθερέλας τι κερέλ έργος ο Ιεζεκιήλ; Ο Ιεχωβά βακερντάς ότι οντουλά τζενέ “να τθερένας λατζ οπρά-πουμέντε”, “ισινέ σουκέ γκίσκε” ντα “μπεϊντίνενας τι τζαν κόντρα ι γιαβερέντζαρ”. Κερένας ζιάνι σαρ ο καντρέ ντα ισινέ επικίνδυνοι σαρ ο σκορπιοί. Άκ’ σόσκε ο Ιεχωβά μπερεκέτι φαρ βακερντάς κο Ιεζεκιήλ: «Μα ντάρα»! (Διαβάνεν Ιεζεκιήλ 2:​3-6) Ο Ιεζεκιήλ μπορισάλο τι κερέλ πο έργος σόσκε (1) μπουτσσάντιλοας κατά Ιεχωβά, (2) ο πνεύμας ι Ντεβλέσκο ντέλας-λες ι ζορ σο χρειαζίντιβελας ντα (3) ο λάφια ι Ντεβλέσκε κερένας ζουρανί λέσκι πίστη. Σαρ βοηθισάλο ο Ιεζεκιήλ ανταλέ τρινέ πραγματένταρ ντα σαρ βοηθίνενα αμέν αντιβές;

3. Καλά λάφια πρέπει τι ντινέ ζορ κο Ιεζεκιήλ, ντα σαρ σικαντάς λέσκε ο Ιεχωβά ότι κα αβέλας πασέ λέστε;

³ Ο Ιεχωβά βακερντάς κο Ιεζεκιήλ: «Μπουτσσαβάβα-τουτ». (Ιεζ. 2:3, 4) Ανταλά λάφια πρέπει τι ντινέ ζορ κο Ιεζεκιήλ. Σόσκε; Σίγουρα, ντινάας-πες γκοντί ότι ο Ιεχωβά βακερντάας κάτι ασακό κάνα τραμπιντάς ι Μωυσής ντα ι Ησαϊάς τι αβέν Λέσκε  προφήτες. (Έξοδ. 3:​10· Ησ. 6:8) Ο Ιεζεκιήλ τζανέλας επίσης σαρ βοηθιντάας ο Ιεχωβά ανταλέ ντουέ προφητέν τι νακχαβέν δυσκολίες. Οτθάρ, κάνα ο Ιεχωβά βακερντάς λέσκε ντούι φαρ: «Μπουτσσαβάβα-τουτ», ο προφήτης ισινέ σίγουρος ότι ο Ιεχωβά κα αβέλας πασέ λέστε. Ατζέκ, ο Ιεζεκιήλ γραφιντάς μπουτ φαρ ο λάφια: «Αβιλό μάνγκε ακαβά λάφι ι Ιεχωβάσκο». (Ιεζ. 3:​16) Ντα μπουτ γιαβερά φαρ γραφιντάς: «Πάλι αβιλό μάνγκε ο λάφι ι Ιεχωβάσκο». (Ιεζ. 6:1) Ο Ιεζεκιήλ ισινέ σίγουρος ότι μπουτσσάντιλοας κατά Ιεχωβά. Επίσης, αφού λέσκο ντατ ισινέ ιερέας, ο Ιεζεκιήλ μπέκιμ σικλιλόας ότι ο Ιεχωβά πάντα βακερέλας πι προφητένγκε ότι κα αβέλας πασέ λέντε. Ο Ιεχωβά βακερντάας κο Ισαάκ, κο Ιακώβ ντα κο Ιερεμίας: «Με ισινόμ τούσαρ».​—Γέν. 26:​24· 28:​15· Ιερ. 1:8.

4. Καλά λάφια πρέπει τι ντινέ ζορ κο Ιεζεκιήλ;

⁴ Σο κα κερένας ο πο μπουτ Ισραηλίτες κάνα κα ασουνένας οντουβά σο κα βακερέλας λένγκε ο Ιεζεκιήλ; Ο Ιεχωβά βακερντάς: «Ο λαός Ισραήλ να κα μανγκέλ τι ασουνέλ τουτ, σόσκε να μανγκέλα τι ασουνέλ μαν». (Ιεζ. 3:7) Κάνα ο λαός να δεχτίνελας ο λάφια σο βακερέλας λένγκε ο Ιεζεκιήλ, να δεχτίνελας ι Ιεχωβάς. Ανταλά λάφια ντένας ι σιγουριά κο Ιεζεκιήλ ότι, παρόλο σο ο λαός να δεχτιντάς-λες, να μανγκέλας τι βακερέλ ανταβά ότι να ισινέ λατσσό προφήτης. Ο Ιεχωβά κερντάς-λες τι αβέλ σίγουρος-ντα ότι, κάνα κα νικιόνας μπαγιά ο λάφια σο βακερέλας, ο Ισραηλίτες κα “σικλιόνας ότι τθερένας εκχέ προφητής πουμέντζαρ”. (Ιεζ. 2:5· 33:​33) Σίγουρα, ανταλά λάφια ντινέ κο Ιεζεκιήλ ι ζορ σο τθερέλας ανάγκη για τι κερέλ πο έργος.

5. Κατάρ λάσα ζορ σαρ βακερέλα ο Ησαΐας 44:8;

⁵ Αμέν-ντα λάσα ζορ σο τζανάσα ότι μπουτσσάντιλαμ κατά Ιεχωβά. Βοβ ντέλα-αμέν αξία κάνα βακερέλα ότι ισινάμ λέσκε «μάρτυρες». (Ησ. 43:​10) Σο μπαρό προνόμιος ισί ανταβά! Σαρ ο Ιεχωβά βακερντάς κο Ιεζεκιήλ:  «Μα ντάρα», αντικάς βακερέλα αμένγκε-ντα: «Μα νταρέν». Σόσκε να τθεράσα καέκ λόγος τι νταράς οντουλένταρ σο τζάνα αμέντζαρ κόντρα; Σόσκε, σαρ ο Ιεζεκιήλ, μπουτσσάντιλαμ κατά Ιεχωβά ντα ισί πασέ αμέντε.​—Διαβάνεν Ησαΐας 44:8.

6. (α) Σαρ ντέλα-αμέν ο Ιεχωβά πο λάφι ότι κα αβέλ πασέ αμέντε; (β) Σο λοκχιαρέλα αμαρό γκι ντα ντέλα-αμέν ζορ;

⁶ Ο Ιεχωβά ντέλα-αμέν πο λάφι ότι κα αβέλ πασέ αμέντε. Για παράδειγμας, χάνικ πριν τι βακερέλ: «Τουμέν ισινέν μο μάρτυρες», βακερντάς: «Κάνα νακχέσα αντράλ κατά πανιά, κα αβάβ τούσαρ, ντα κάνα νακχέσα κατά λενιά, να κα τασάντιβες. Κάνα πφιρέσα αντράλ κατά γιακ, να κα πφαμπός». (Ησ. 43:2) Κάνα κεράσα έργος, μπάζιμα τθεράσα αζόμ μπουτ εμπόδια σο ισί σαρ πανιά σο τασαβένα ντα νακχάσα αζόμ μπουτ δοκιμασίες σο ισί σαρ γιακ. Αλλά ατζέ-ντα κάνα αβέλα-πες ανταβά, ι Ιεχωβάσκε βοηθειάσαρ, να τσσιναβάσα τι κεράς έργος. (Ησ. 41:​13) Σαρ κο ντιβεσά σο τζουβντιόλας ο Ιεζεκιήλ, αντικάς αντιβές-ντα ο πο μπουτ τζενέ να μανγκένα τι ασουνέν. Αλλά αμέν ντάσα-αμέν γκοντί ότι, κάνα βον να δεχτίνενα-αμέν, ανταβά να μανγκέλα τι βακερέλ ότι να κεράσα λατσσές αμαρό έργος. Λοκχιόλα αμαρό γκι ντα λάσα ζορ σο τζανάσα ότι ο Ιεχωβά χαιρίνελα κάνα να τσσιναβάσα τι βακεράς πιστά κο τζενέ λέσκε λάφια. Ο απόστολος Παύλος βακερντάς: «Ο κάθε εκ κα λελ οντουβά σο αξίνελα λέσκε ανάλογα πι προσπαθειάσαρ». (1 Κορ. 3:8· 4:1, 2) Εκ πφεν σο ισί μπρεσά σκαπάνισσα βακερέλα: «Αβέλα μο γκι σο τζανάβα ότι ο Ιεχωβά ευλογίνελα αμαρέ προσπάθειες».

7. Σαρ πρέπει τι νιωθίνελας ο Ιεζεκιήλ κάνα ανέλας πι γκοντιάτε ι φαντασία σο ντικχλάς; (Ντικχέν ι φωτογραφία κι ανγκλαϊνί σελίδα)

⁷ Ο Ιεζεκιήλ ντικχλάς καζόμ ζουρανό ισί ο πνεύμας ι Ντεβλέσκο. Εκχέ φαντασιάτε, ντικχλάς ι ζορ ι άγιε πνευμάσκι οπράλ κο ζουρανέ άγγελοι ντα κο μπαρέ ρόδες εκχέ ουράνιε αμαξάκε. (Ιεζ. 1:​20, 21) Σο κερντάς; Βοβ γραφιντάς σο αβιλό-πες: «Κάνα ντικχλόμ-λες ανταβά, πελόμ τελέ μόσαρ». Ο Ιεζεκιήλ σαστισάλο αζόμ μπουτ σο πελό τελέ. (Ιεζ. 1:​28) Σοράν, κάνα ανέλας πι γκοντιάτε οντιά εντυπωσιακή φαντασία, πρέπει τι μπαριόλας λέσκι σιγουριά ότι ο άγιος πνεύμας ι Ντεβλέσκο κα βοηθίνελας-λες τι κερέλ πο έργος.

8, 9. (α) Σο ντινάς η εντολή ι Ιεχωβάσκι κο Ιεζεκιήλ; (β) Σαρ ντινάς ο Ιεχωβά πο μπουτ ζορ κο Ιεζεκιήλ για τι κερέλ έργος δύσκολε τζενέντε;

⁸ Ο Ιεχωβά βακερντάς κο Ιεζεκιήλ: «Τούι σο ισινάν τζενέσκο τσσαβό, ίστι ντα άτσσουβ τι πιντρέντε για τι κεράβ λάφι τούσαρ». Ανταγιά εντολή, γιεκ ι Ντεβλέσκε πνευμάσαρ, ντινάς κο Ιεζεκιήλ ι ζορ σο χρειαζίντιβελας για τι ιστίλ. Βοβ γραφιντάς: «Αβιλό αντρά-μάντε πνεύμας ντα κερντάς-μαν τι ατσσάβ μι πιντρέντε». (Ιεζ. 2:1, 2) Από αζομάν ντα σαρό ο βακίτι σο κερέλας πο έργος, ο Ιεζεκιήλ οδηγίντιβελας κατά βας ι Ντεβλέσκο, δηλαδή κατά άγιος πνεύμας. (Ιεζ. 3:​22· 8:1· 33:​22· 37:1· 40:1) Ο πνεύμας ι Ντεβλέσκο ντινάς κο Ιεζεκιήλ ι ζορ σο χρειαζίντιβελας για τι κερέλ ο διορισμός σο λιντάς, δηλαδή τι κερέλ έργος κο «σουκέ σορέσκε ντα γκίσκε τζενέ» σο ισινέ λέσκε τθανέστε. (Ιεζ. 3:7) Ο Ιεχωβά βακερντάς κο Ιεζεκιήλ: «Κερντόμ το μούι αζόμ σουκό καζόμ ισί λένγκο ντα το τσικάτ αζόμ σουκό καζόμ ισί λένγκο. Κερντόμ το τσικάτ σαρ διαμάντι, πο σουκό κατά πυρόλιθος. Μα ντάρα λένταρ ούτε τι ιζράς κατά νταρ λένγκε μόσταρ». (Ιεζ. 3:8, 9) Ισινέ σαρ τι βακερέλας ο Ιεχωβά κο Ιεζεκιήλ: “Μα μουκχ κο πείσμας κι λαόσκο τι κερέλ-τουτ τι χασαρές τι ζορ. Με κα πφεράβ-τουτ ζορ”.

⁹ Σοράν ανταλέσταρ, ο πνεύμας ι Ντεβλέσκο βοηθίνελας ι Ιεζεκιηλίς καζόμ κερέλας έργος. Βοβ γραφιντάς: «Ο βας ι Ιεχωβάσκο κερέλας μπαρί μπουτί οπρά-μάντε». Λιντάς εκ εβδομάδα  ι προφητής για τι σικλιόλ ντα τι αγαβέλ ντιπ λατσσές οντουλά σο έπρεπε τι βακερέλ ι τζενένγκε ντα τι κερέλ-λεν πιρέ. (Ιεζ. 3:​14, 15) Σοράν, ο Ιεχωβά βακερντάς λέσκε τι τζαλ εκχέ τθανέστε σο οτθέ «αβιλό πνεύμας αντρέ [λέστε]». (Ιεζ. 3:​23, 24) Ο Ιεζεκιήλ ισινέ έτοιμος τι αρχίνελ πο έργος.

10. Καγιά βοήθεια χρειαζίντιβασα για τι κεράς ο έργος, ντα σόσκε;

¹⁰ Καγιά βοήθεια χρειαζίντιβασα για τι κεράς αμαρό έργος; Για τι αρακχάς ι απάντηση, τι ανάς αμαρέ γκοντιάτε σο αβιλό-πες κο Ιεζεκιήλ. Πριν τι αρχίνελ τι κερέλ έργος, ο πνεύμας ι Ντεβλέσκο ντινάς-λες ι ζορ σο χρειαζίντιβελας. Σαρ αβιλό-πες κο Ιεζεκιήλ, αμέν-ντα αντιβές μπορίνασα τι κεράς ο έργος σάντε άμα τθεράσα ι βοήθεια ι Ντεβλέσκε πνευμάσκι. Σόσκε; Επειδή ο Μπενγκ κερέλα τζένγκι αμέντζαρ για τι τσσιναβάς τι κεράς έργος. (Αποκ. 12:​17) Κι τζενένγκε γιακχά, ντικχίντιβελα ότι ο Μπενγκ ισί αζόμ ζουρανό σο ναστί νικίνασα-λες. Αλλά κάνα ντάσα μαρτυρία, νικίνασα-λες! (Αποκ. 12:​9-11) Καλέ τροπόσαρ; Κάνα κεράσα έργος, σικαβάσα ότι τίποτα οντουλένταρ σο κερέλα να νταραβέλα-αμέν. Κάθε φαρ σο κεράσα έργος, ο Μπενγκ χασαρέλα. Σο αγαβάσα κάνα ντικχάσα ότι κεράσα έργος παρόλο σο τζάνα αμέντζαρ κόντρα αμαρέ ντουσμάνια; Αγαβάσα ντιπ λατσσές ότι λάσα ζορ κατά άγιος πνεύμας ντα ότι τθεράσα ι ευλογία ι Ιεχωβάσκι.​—Ματθ. 5:​10-12· 1 Πέτρ. 4:14.

11. Σο κα κερέλ ο πνεύμας ι Ντεβλέσκο αμένγκε, ντα σαρ μπορίνασα τι λας-λες;

¹¹ Σο γιαβέρ σικλιάσα κάνα σκεφτίνασα σαρ ντινάς ο Ιεχωβά κο Ιεζεκιήλ ι ζορ σο χρειαζίντιβελας για τι κερέλ έργος; Ο πνεύμας ι Ντεβλέσκο μπορίνελα τι βοηθίνελ-αμέν τι νακχαβάς σο-ντα πρόβλημας τθεράσα αμαρέ εργόστε. (2 Κορ. 4:​7-9) Σο μπορίνασα τι κεράς για τι λας σίγουρα ο πνεύμας ι Ντεβλέσκο; Χρειαζίντιβελα μα τι τσσιναβάς τι προσευχίντιβας ανταλέσκε ντα τι αβάς σίγουροι ότι ο Ιεχωβά κα ασουνέλ αμαρέ προσευχές. Ο Ιησούς σικλιαρντάς πι μαθητέν: «Συνεχίνεν τι  μανγκέν . . . συνεχίνεν τι ρόντεν . . . συνεχίνεν τι μπασκιαρέν». Ντα ο Ιεχωβά κα «ντελ . . . άγιος πνεύμας οντουλέντε σο μανγκένα-λες λέσταρ».​—Λουκ. 11:9, 13· Πράξ. 1:​14· 2:4.

12. Κατάρ αβιλό ο ρόλος ντα σο ισινέ γραμμέ αντρέ, σαρ ντικχίντιβελα κο εδάφια Ιεζεκιήλ 2:​9–3:3;

¹² Ο Ιεζεκιήλ να λέλας ζορ σάντε κατά πνεύμας ι Ντεβλέσκο αλλά εμ κατά Λάφι λέσκο. Εκχέ φαντασιάτε, ο Ιεζεκιήλ ντικχλάς εκ βας τι ασταρέλ εκ ρόλος. (Διαβάνεν Ιεζεκιήλ 2:​9–3:3) Κατάρ αβιλό ο ρόλος; Σο ισινέ γραμμέ αντρέ; Σαρ κερντάς ζουρανί ι πίστη ι Ιεζεκιηλίσκι; Κα ντικχάς-λες ακανά. Ο ρόλος αβιλό κατά θρόνος ι Ντεβλέσκο. Ντικχίντιβελα ότι, ο Ιεχωβά χρησιμοποιηντάς εκχές κατά σταρ άγγελοι σο ντικχλάας πο τζανγκλέ ο Ιεζεκιήλ για τι ντελ-λες ο ρόλος. (Ιεζ. 1:8· 10:7, 20) Κο ρόλος ισινέ γραμμέ ο λάφια ι Ντεβλέσκε, δηλαδή εκ τιμωρία μπερεκέτι λαφίντζαρ σο έπρεπε τι βακερέλ ο Ιεζεκιήλ ότι κα τθερένας οντουλά αιχμάλωτοι σο να ντένας καν. (Ιεζ. 2:7) Ο λάφια ισινέ γραμμέ εμ κι ανγκλαϊνί εμ κι παλαϊνί μπάντα κι ρολόσκι.

13. Σο βακερντάς ο Ιεχωβά κο Ιεζεκιήλ τι κερέλ ι ρολόσαρ, ντα σόσκε οντουβά ρόλος ισινέ γκουλντό;

¹³ Ο Ιεχωβά βακερντάς πι προφητίσκε τι χαλ ο ρόλος ντα τι “πφερέλ πο στομάχι λέσαρ”. Ο Ιεζεκιήλ ντινάς καν ντα χαλάς ντιπ σαρό ο ρόλος. Σο μανγκέλας τι σικαβέλ ανταβά κομμάτι ι φαντασιάκο; Ο Ιεζεκιήλ έπρεπε τι σικλιόλ ντα τι αγαβέλ ντιπ λατσσές ο λάφια σο τθερέλας τι βακερέλ. Ανταλά λάφια έπρεπε τι τζάνας ντιπ αντρέ-λέστε, σαρ τι βακεράας, για τι νικιόλας λέσταρ τι κερέλ έργος. Αζομάν αβιλό-πες κάτι εντυπωσιακός. Ο Ιεζεκιήλ αγαντάς ότι ο ρόλος «ισινέ γκουλντό σαρ αβγίν». (Ιεζ. 3:3) Σόσκε; Ο προνόμιος σο τθερέλας ο Ιεζεκιήλ τι βακερέλ ι Ιεχωβάσκε λάφια ισινέ λέσκε κάτι γκουλντό ντα σουκάρ. (Ψαλμ. 19:​8-11) Ισινέ πφερντό εκτίμηση σο ο Ιεχωβά τραμπιντάας-λες τι αβέλ λέσκο προφήτης.

14. Σο βοηθιντάς ι Ιεζεκιηλίς τι αβέλ έτοιμος τι αρχίνελ πο διορισμός;

¹⁴ Σοράν, ο Ιεχωβά βακερντάς κο Ιεζεκιήλ: «Τσσουβ αντρέ τι γκίστε ντα ασούν σαρέ ο λάφια σο κα βακεράβ τούκε». (Ιεζ. 3:​10) Ο Ιεχωβά μανγκέλας τι ντελ-πες γκοντί ο Ιεζεκιήλ ο λάφια σο ισινέ γραμμέ κο ρόλος ντα τι σκεφτίνελ-λεν λατσσές. Κάνα ο Ιεζεκιήλ κερντάς-λες ανταβά, λέσκι πίστη αβιλί πο ζουρανί ντα ντιντιλέ-λες ζουρανέ λάφια σο έπρεπε τι βακερέλ-λεν κο λαός. (Ιεζ. 3:​11) Ι Ντεβλέσκε λαφίντζαρ πι γκίστε ντα πι βουστέντε, ισινέ έτοιμος τι αρχίνελ πο διορισμός ντα τι κερέλ-λες.​—Ντικχέν Ψαλμός 19:14.

15. Σο χρειαζίντιβελα τι “τσσουβάς αντρέ αμαρέ γκίστε” για τι νταϊντίνας;

¹⁵ Για τι νταϊντίνας κο έργος, αμέν-ντα πρέπει τι μουκχάς κο λάφια κι Ντεβλέσκε τι κερέν αμαρί πίστη ζουρανί. Χρειαζίντιβελα “τι τσσουβάς αντρέ αμαρέ γκίστε” σαρέ οντουλά σο βακερέλα αμένγκε ο Ιεχωβά. Αντιβές, ο Ιεχωβά κερέλα αμέντζαρ λάφι αντράλ πι Λαφίσταρ, κατά Αγία Γραφή. Σαρ μπορίνασα τι αβάς σίγουροι ότι ο Λάφι ι Ντεβλέσκο να κα τσσιναβέλ τι επηρεάνελ ο τρόπος σο σκεφτίνασα, σο νιωθίνασα ντα σο κεράσα ο πράγματα;

16. Σο πρέπει τι κεράς ι Ντεβλέσκε Λαφίσαρ, ντα σαρ κα τσσουβάς-λες λατσσές αντρέ αμαρέ γκίστε;

¹⁶ Κάνα χάσα χαμπέ ντα χονίνασα-λες αμαρό σώμας αβέλα πο ζουρανό. Αντικάς, κάνα σικλιαράσα-αμέν κατά Ντεβλέσκο Λάφι ντα σκεφτίνασα-λες λατσσές αμαρί πίστη αβέλα πο ζουρανί. Πρέπει τι ντας-αμέν γκοντί οντουβά σο σικλιάσα κατά ρόλος. Ο Ιεχωβά μανγκέλα αμένταρ τι “πφεράς αμαρό στομάχι” λέσκε Λαφίσαρ, δηλαδή τι αγαβάς  λέσκο Λάφι λατσσές. Κεράσα-λες ανταβά κάνα προσευχίντιβασα, διαβάνασα ντα σκεφτίνασα λατσσές οντουλά σο διαβαντάμ. Πρώτα, προσευχίντιβασα για τι αβέλ έτοιμος αμαρό γκι τι λελ ο λάφια ι Ντεβλέσκε. Σοράν, διαβάνασα εκ κομμάτι κατά Γραφή. Ντα πο σοράν, ατσσάσα για τι σκεφτίνας λατσσές οντουλά σο διαβαντάμ. Καβά κα αβέλ ο αποτέλεσμας; Καζόμ πο μπουτ σκεφτίνασα λατσσές οντουλά σο διαβαντάμ, αζόμ πο μπουτ κα αγαβάς ο Λάφι ι Ντεβλέσκο ντα κα αβέλ ζουρανί αμαρί πίστη.

17. Σόσκε ισί σημαντικός τι σκεφτίνας λατσσές οντουλά σο διαβάνασα κι Γραφή;

¹⁷ Σόσκε ισί σημαντικός τι διαβάνας ι Γραφή ντα τι σκεφτίνας-λα λατσσές; Σόσκε ανταβά ντέλα-αμέν ι ζορ σο χρειαζίντιβασα για τι βακεράς ο λατσσέ αμπέρια ι Βασιλειάκε ακανά ντα ο πφαρέ λάφια ι τιμωριάκε σο μπέκιμ τι βακεράς ανγκλ’ αμέντε. Ντα κάνα σκεφτίνασα λατσσές ο σουκάρ ιδιότητες ι Ιεχωβάσκε, αβάσα πο λατσσέ αμαλά λέσαρ. Αντικάς, κα τθεράς κάτι σο ισί μπαγιά γκουλντό ή μπουτ σουκάρ, δηλαδή κα τθεράς ειρήνη αντρ’ αμέντε ντα κα αβάς πφερντέ.​—Ψαλμ. 119:​103.

18. Σο κα αγαβέν ζορίσαρ ο τζενέ αμαρέ τθανέστε, ντα σόσκε;

¹⁸ Ο Ιεζεκιήλ ισινέ προφήτης, αλλά αμέν να ισινάμ. Όμως, μανγκάσα σαρέ αμαρέ γκίσαρ μα τι τσσιναβάς τι βακεράς ι Ιεχωβάσκε λάφια, σο ατσσικιαρντάς-λεν πι Λαφίστε, μέχρι βοβ τι βακερέλ ότι ο έργος μπιτισάλο. Κάνα κα αβέλ ο βακίτι ι τιμωριάκο, ο τζενέ αμαρέ τθανέστε ναστί κα βακερέν ότι να λιντέ προειδοποίηση ή ότι ο Ντεβέλ να ντινάς-λεν σημασία. (Ιεζ. 3:​19· 18:​23) Οκιά μπάνταρ, κα αγαβέν ζορίσαρ ότι ο λάφια σο βακεράας ισινέ κατά Ντεβέλ.

19. Σο κα ντελ-αμέν ι ζορ σο χρειαζίντιβασα για τι κεράς αμαρό έργος;

¹⁹ Σο κα ντελ-αμέν ι ζορ σο χρειαζίντιβασα για τι κεράς αμαρό έργος; Ο τριν πράγματα σο ντινέ ζορ κο Ιεζεκιήλ-ντα. Συνεχίνασα τι κεράς έργος σόσκε τζανάσα ότι μπουτσσάντιλαμ κατά Ιεχωβά, ο πνεύμας ι Ντεβλέσκο ντέλα-αμέν ι ζορ σο χρειαζίντιβασα ντα ο λάφια ι Ντεβλέσκε κερένα ζουρανί αμαρί πίστη. Ι Ιεχωβάσκι βοήθεια τσσίντελα-αμέν τι κεράς αμαρό έργος ντα τι νταϊντίνας «μέχρι κο τέλος».​—Ματθ. 24:13.