1, 2. (α) Καλά ερωτήσεις κα ντικχάς; (β) Σο σικαβέλα ότι ο Ιεχωβά μανγκέλα αντράλ πι γκίσταρ τι βοηθίνελ-αμέν;

 Ο ΙΕΧΩΒΑ μπορίνελα τι βοηθίνελ-αμέν τι νταϊντίνας αμαρέ προβλήματα ντα τι τθεράς χαρά κι υπηρεσία λέσκι. Καλέ τροπόντζαρ βοηθίνελα-αμέν; Ντα σαρ κα ντικχάς καζόμ αβέλα-πες πο μπαρό λατσσιπέ κατά βοήθεια σο ντέλα ο Ιεχωβά; Αμαρό μάθημας κα ντελ ο απαντήσεις. Πριν όμως τι ντικχάς ο απαντήσεις, κα ασχολίντιβας ακαλέ ερωτησιάσαρ σο τθερέλα τι κερέλ ανταλέντζαρ σο βακεράσα: Μανγκέλα μπαγιά ο Ιεχωβά τι βοηθίνελ-αμέν;

² Εκ λάφι σο βακερντάς ο απόστολος Παύλος κι επιστολή σο μπουτσσαντάς κο Εβραίοι βοηθίνελα-αμέν τι αρακχάς ι απάντηση. Ο Παύλος γραφιντάς: «Ο Ιεχωβά ισί μο βοηθός· να κα νταράβ. Σο μπορίνενα τι κερέν-μαν ο τζενέ;» (Εβρ. 13:6) Μερικές εγκυκλοπαίδειες ι Γραφιάκε βακερένα ότι ανταλέ εδαφιόστε ο λάφι «βοηθός» σικαβέλα εκχέ τζενές σο τθάβντελα για τι βοηθίνελ εκχές σο μανγκέλα βοήθεια βικόσαρ. Ανέν φαντασία ι Ιεχωβάς τι τθάβντελ τι σώνελ εκχές σο τθερέλα προβλήματα. Σίγουρα, κα συμφωνίνεν ότι ανταβά σικαβέλα ότι ο Ιεχωβά μανγκέλα αντράλ πι γκίσταρ τι αβέλ αμαρό Βοηθός. Καζόμ τθεράσα ι Ιεχωβάς πασέ αμέντε, μπορίνασα τι νταϊντίνας ο δοκιμασίες χαράσαρ.

3. Καλέ τρινέ τροπόντζαρ βοηθίνελα-αμέν ο Ιεχωβά τι νταϊντίνας αμαρέ δοκιμασίες χαράσαρ;

³ Καλέ τροπόντζαρ βοηθίνελα-αμέν ο Ιεχωβά τι νταϊντίνας αμαρέ δοκιμασίες χαράσαρ; Για τι αρακχάς ι απάντηση, κα τζας κο βιβλίος κι Ησαϊάσκο. Σόσκε; Επειδή μπουτ κατά προφητείες ι Ιεχωβάσκε σο σικαντάς κο Ησαΐας ισί ι Ντεβλέσκε υπηρετόνγκε αντιβές. Επίσης, ο Ησαΐας μπουτ φαρ εξηγίνελα αμένγκε ι Ιεχωβάς λαφίντζαρ σο μπορίνασα τι αγαβάς εύκολα. Κο Ησαΐας  κεφάλαιος 30, ισί μερικά παραδείγματα. Ανταλέ κεφαλαιόστε, ο Ησαΐας χρησιμοποιήνελα σουκάρ εικόνες σο σικαβένα σαρ ο Ιεχωβά βοηθίνελα πι λαός. Γραφιντάς ότι ο Ιεχωβά βοηθίνελα-αμέν (1) κάνα ασουνέλα προσεκτικά αμαρέ προσευχές ντα απαντίνελα λέντε, (2) κάνα οδηγίνελα-αμέν ντα (3) κάνα ντέλα-αμέν ευλογίες εμ ακανά εμ κο ντιβεσά σο κα αβέν. Για τι ντικχάς πο λατσσές ανταλά τριν τρόποι σο ο Ιεχωβά βοηθίνελα-αμέν λέντζαρ.

4. (α) Σαρ βακερντάς ο Ιεχωβά ι Ιουδαιόνγκε σο τζουβντιόνας κο ντιβεσά κι Ησαϊάσκε, ντα σο μουκχλάς τι αβέλ-πες τελικά; (β) Καλά λατσσέ αμπέρια τθερέλας ο Ιεχωβά ι πιστέ τζενένγκε; (Ησαΐας 30:​18, 19)

⁴ Κο πρώτα λάφια κι Ησαϊάσκε κο κεφάλαιος 30, ο Ιεχωβά βακερέλα ι Ιουδαιόνγκε «τσσαβέ σο μανγκένα τι νακχέλ λένγκο», σο “ανένα αμαρτία κι αμαρτία”. Σοράν βακερέλα: «Ισί λαός σο τζάλα κόντρα, . . . να μανγκένα τι ασουνέν ο νόμος ι Ιεχωβάσκο». (Ησ. 30:1, 9) Επειδή ο λαός να μανγκέλας τι ασουνέλ, ο Ησαΐας βακερντάς ότι ο Ιεχωβά κα μουκχέλας τι τσσίντεν μπουτ. (Ησ. 30:5, 17· Ιερ. 25:​8-11) Ντα ανταβά αβιλό-πες κάνα ο Βαβυλώνιοι λιντέ-λεν κι Βαβυλώνα σαρ αιχμάλωτους. Όμως, αντρέ κο Ιουδαίοι ισινέ κάποια πιστά τζενέ, ντα ο Ησαΐας τθερέλας λατσσέ αμπέρια λένγκε. Βακερντάς λένγκε ότι κα αβέλας ο βακίτι σο ο Ιεχωβά κα μουκχέλας-λεν τι βουρτίνεν ντα τι τζουβντιόν πάλι κο Ισραήλ. (Διαβάνεν Ησαΐας 30:​18, 19) Ντα ακριβώς ανταβά αβιλό-πες. Ο Ιεχωβά ελευθερωντάς-λεν κατά Βαβυλώνα. Όμως, νακχλέ μπουτ μπρεσά πριν τι ελευθερώνελ-λεν ο Ιεχωβά. Ο λάφια «ο Ιεχωβά μπεκλεντίνελα με υπομονή για τι σικαβέλ τουμένγκε λατσσιπέ» σικαβένας ότι κα νακχέλας βακίτι πριν τι σώντιβεν ο πιστά τζενέ. Κι πραγματικότητα, ο Ισραηλίτες μπεσλέ 70 μπρεσά σαρ αιχμάλωτοι κι Βαβυλώνα πριν τι βουρτίνεν κι Ιερουσαλήμ. (Ησ. 10:​21· Ιερ. 29:​10) Αζομάν ο Ισραηλίτες σο ισινέ αιχμάλωτοι κι Βαβυλώνα ροβένας επειδή ισινέ μπουτ στεναχωριμέ. Αλλά κάνα βουρτισάλεας πουμαρέ τθεμέστε, ροβένας επειδή ισινέ μπουτ χαρούμενοι.

5. Καγιά σιγουριά ντέλα-αμέν ο εδάφιος Ησαΐας 30:19;

⁵ Αντιβές, μπορίνασα τι λας ζορ ακαλέ λαφίνταρ: «Βοβ κα σικαβέλ τούκε σίγουρα λατσσιπέ μόλις κα ασουνέλ το βίκος σο ντέσα για βοήθεια». (Ησ. 30:​19) Ο Ησαΐας κερέλα-αμέν τι αβάς σίγουροι ότι ο Ιεχωβά κα ασουνέλ προσεκτικά κάνα ντάσα βίκος κάρινγκ Λέστε ντα κα απαντίνελ σουγκό αμαρέ προσευχιέντε. Ο Ησαΐας βακερέλα: «Κα απαντίνελ τούκε αμέσως μόλις κα ασουνέλ-λα». Ανταλά σουκάρ λάφια ανένα αμαρέ γκοντιάτε ότι αμαρό Ντατ μανγκέλα αντράλ πι γκίσταρ τι βοηθίνελ οντουλέν σο μανγκένα λέσκι βοήθεια. Επειδή τζανάσα-λες ανταβά βοηθίνελα-αμέν τι νταϊντίνας χαράσαρ.

6. Σαρ σικαβένα ο λάφια ι Ησαϊάσκε ότι ο Ιεχωβά ασουνέλα ο προσευχές πι κάθε υπηρετίσκε;

⁶ Ντα σο γιαβέρ σικλιαρέλα-αμέν ανταβά εδάφιος αμαρέ προσευχιένγκε; Ο Ιεχωβά ασουνέλα προσεκτικά ι προσευχή ι κάθε εκχέσκι. Σόσκε μπορίνασα τι βακεράς-λες ανταβά; Κο πρώτος μέρος κατά Ησαΐας κεφάλαιος 30, ο Ιεχωβά ευλογίνελα πι λαός σαρ ομάδα. Όμως, κο εδάφιος 19 ο λάφια ισί ι κάθε εκχέ τζενέσκε ξεχωριστά. Ο Ησαΐας γραφίνελα: «Να κα ροβές», «βοβ κα σικαβέλ τούκε σίγουρα λατσσιπέ», «κα απαντίνελ τούκε». Σαρ εκ λατσσό Ντατ, ο Ιεχωβά να βακερέλα πι τσσαβέσκε ή πι τσσαγιάκε σο χασαρντάς πι ζορ: «Πρέπει τι αβές αζόμ ζουρανό σαρ ισί το πφραλ ή τι πφεν». Αλλά ντικχέλα ι κάθε εκχές ξεχωριστά ντα ντέλα προσοχή αμαρέ προσευχιέντε.​—Ψαλμ. 116:1· Ησ. 57:15.

7. Σαρ ο Ησαΐας ντα ο Ιησούς σικαβένα ότι ισί σημαντικός μα τι τσσιναβάς τι επιμίνας κάνα προσευχίντιβασα;

⁷ Κάνα προσευχίντιβασα κο Ντεβέλ ντα βακεράσα λέσκε κάτι σο απασχολίνελα-αμέν, ο  Ιεχωβά μπέκιμ κι αρχή τι ντελ-αμέν ι ζορ σο χρειαζίντιβασα για τι νταϊντίνας. Άμα αμαρί δοκιμασία να κα νασέλ αζόμ σουγκό καζόμ πακιάας, μπέκιμ τι χρειαζίντιβελ τι μανγκάς μπουτ φαρ κατά Ιεχωβά ι ζορ για τι νταϊντίνας. Βοβ βακερέλα αμένγκε τι κεράς-λες ανταβά. Ανταβά σικαβένα ακαλά λάφια ι Ησαϊάσκε: «Μα μουκχέν-λες τι ησυχάνελ». (Ησ. 62:7) Σο μανγκέλα τι βακερέλ ανταβά; Κάνα προσευχίντιβασα κάρινγκ κο Ιεχωβά πρέπει τι επιμίνας αζόμ μπουτ σαρ μα τι μουκχάας-λες τι ησυχάνελ. Ο λάφια σο βακερντάς ο Ησαΐας, ανένα αμαρέ γκοντιάτε ο παραβολές ι Ιησούσκε σο τθερένα τι κερέν ι προσευχιάσαρ. Ανταλά παραβολές ισί κο εδάφια Λουκάς 11:​8-10, 13. Οτθέ, ο Ιησούς βακερέλα αμένγκε κάνα προσευχίντιβασα τι “επιμίνας μπουτ” ντα τι “συνεχίνας τι μανγκάς” άγιος πνεύμας. Μπορίνασα ατζέ-ντα τι μολίνας ι Ιεχωβάς τι οδηγίνελ-αμέν για τι λας λατσσέ αποφάσεις.

8. Σαρ νικίστιλε μπαγιά ο λάφια ι εδαφιόνγκε Ησαΐας 30:​20, 21 κο πουρανέ μπρεσά;

⁸ Διαβάνεν Ησαΐας 30:​20, 21. Κάνα ο βαβυλωνιακός στρατός πφαντάς ντονταλάι ι Ιερουσαλήμ για εκ επκάς μπρες, η στεναχώρια σο νιωθίνενας ο τζενέ ισινέ κάτι αζόμ συνηθισμέ καζόμ ο μαντρό ντα ο πανί. Αλλά σαρ βακερένα ο εδάφια 20 ντα 21, ο Ιεχωβά ντινάς πο λάφι κο Ιουδαίοι ότι, άμα κα μετανιώνενας ντα κα αλλάνενας, βοβ κα σώνελας-λεν. Ο Ησαΐας βακερντάς ότι ο Ιεχωβά ισινέ λένγκο «Μπαρό Εκπαιδευτής» ντα ντινάς πο λάφι κο λαός ότι ο Ιεχωβά κα σικλιαρέλας-λεν σαρ τι ντεν-λες λατρεία αντικάς σαρ μανγκέλας. Ανταλά λάφια νικίστιλε μπαγιά κάνα ο Ιουδαίοι ελευθερωσάλε κατά σκλαβιά. Ο Ιεχωβά σικάντιλο Μπαρό Εκπαιδευτής λένγκε, ντα χάρη κι καθοδηγία λέσκι ο λαός μπορισάλο τι ανέλ πάλι ι πάκι λατρεία. Ισινάμ μπουτ χαρούμενοι επειδή ο Ιεχωβά ισί αμαρό Μπαρό Εκπαιδευτής.

9. Καβά ισί εκ τρόπος σο οδηγίνελα-αμέν ο Ιεχωβά αντιβές;

⁹ Καζόμ συνεχίνελα τι κερέλ λάφι παραδειγματέντζαρ ανταλέ εδαφιόντε, ο Ησαΐας βακερέλα ότι ισινάμ σαρ μαθητές σο σικλιάσα κατά Ιεχωβά ντουέ τροπόντζαρ. Πρώτα, ο Ησαΐας βακερέλα: «Κα ντικχές τι γιακχίντζαρ τι Μπαρέ Εκπαιδευτής». Ατθέ ο Μπαρό Εκπαιδευτής ντικχίντιβελα σαρ τι ατσσόλα ανγκλάλ πι μαθητέντε. Τθεράσα ο προνόμιος τι ντικχάς λατσσιπέ λέσκε σικλιαριμάσταρ αντιβές. Σαρ σικλιαρέλα-αμέν ο Ιεχωβά; Αντράλ πι οργανωσιάταρ. Ισινάμ πφερντέ εκτίμηση ι λατσσέ οδηγιένγκε σο λάσα κατά Ιεχωβάσκι οργάνωση! Ο σικλιαριπέ σο ντιντιόλα κο συναθροίσεις ντα κο συνελεύσεις, αλλά εμ κατά εκδόσεις, κατά JW Broadcasting^® ντα γιαβερέ μπουτέ τροπόντζαρ,  βοηθίνελα-αμέν τι νταϊντίνας χαράσαρ ανταλέ δύσκολε βακιτίντε.

10. Καλέ τροπόσαρ “ασουνάσα εκ λάφι παλ’ αμέντε”;

¹⁰ Ο Ησαΐας γραφίνελα εκ δεύτερος τρόπος-ντα σο σικλιαρέλα-αμέν ο Ιεχωβά, κάνα βακερντάς: «Το κανά κα ασουνέν εκ λάφι παλά-τούταρ». Ατθέ ο προφήτης βακερέλα ότι ο Ιεχωβά ισί σαρ εκ προσεκτικός εκπαιδευτής, σο πφιρέλα παλάλ πι μαθητένταρ, καζόμ σικαβέλα λένγκε ο ντρομ ντα καζόμ οδηγίνελα-λεν. Αντιβές ασουνάσα ι Ντεβλέσκι φωνή παλ’ αμέντε. Σαρ; Ο λάφια ι Ντεβλέσκε γραφισάλε κι Αγία Γραφή πριν από μπουτ μπρεσά, μπουτ βακίτι ανγκλέ. Οτθάρ, κάνα διαβάνασα ι Γραφή, ισί σαρ τι ασουνάς ι φωνή ι Ντεβλέσκι παλ’ αμέντε.​—Ησ. 51:4.

11. Καλά πράγματα πρέπει τι κεράς για τι νταϊντίνας χαράσαρ, ντα σόσκε;

¹¹ Σαρ μπορίνασα τι βοηθίντιβας καζόμ πο μπουτ αβέλα-πες κατά καθοδηγία σο ντέλα ο Ιεχωβά αντράλ πι οργανωσιάταρ ντα πι Λαφίσταρ; Ντικχέν ότι ο Ησαΐας βακερέλα ντούι πράγματα. Πρώτον, «ακαβά ισί ο ντρομ». Δεύτερον, «πφιρέν λέστε». (Ησ. 30:​21) Να ερεσέλα σάντε τι τζανάς «ο ντρομ». Χρειαζίντιβελα-ντα τι “πφιράς λέστε”. Αντράλ κατά Λάφι ι Ιεχωβάσκο, σαρ εξηγίνελα-λες η οργάνωση λέσκι, σικλιάσα σο μπεκλεντίνελα ο Ιεχωβά αμένταρ. Ντα σικλιάσα σαρ τι κεράς οντουλά σο σικλιάσα. Για τι νταϊντίνας χαράσαρ καζόμ υπηρετίνασα ι Ιεχωβάς, χρειαζίντιβελα τι κεράς ο ντούι-ντα πράγματα. Σάντε αζομάν μπορίνασα τι αβάς σίγουροι ότι κα τθεράς ι ευλογία ι Ιεχωβάσκι.

12. Σαρ κα ευλογίνελας ο Ιεχωβά πι λαός, σαρ βακερένα ο εδάφια Ησαΐας 30:​23-26;

¹² Διαβάνεν Ησαΐας 30:​23-26. Σαρ νικίστιλι μπαγιά ανταγιά προφητεία ι Ιουδαιόνγκε σο βουρτισάλε κο Ισραήλ σοράν κατά Βαβυλώνα σο ισινέ αιχμάλωτοι; Ο Ιεχωβά ντινάς-λεν μπουτ πράγματα για τι βοηθίνελ-λεν τι τζουβντιόν ντα τι συνεχίνεν τι υπηρετίνεν-λες. Ο Ιεχωβά ευλογιντάς πι λαός κάνα ντινάς-λες μπουτ χαμπέ. Αλλά ο πο σημαντικός, ντινάς-λεν σο χρειαζίντιβενας για τι αβέν πασέ λέστε ντα τι αρχίνεν τι ντεν-λες λατρεία αντικάς σαρ μανγκέλα. Ο λαός ι Ντεβλέσκο αζομάν, να λιντάας γιαβέρ φαρ αζόμ μπουτ λατσσέ πράγματα κατά Ντεβέλ. Ο εδάφιος 26 σικαβέλα ότι ο Ιεχωβά ντινάας-λεν πο μπουτ φως, δηλαδή βοηθιντάας-λεν τι αγαβέν Λέσκο λάφι. (Ησ. 60:2) Ο ευλογίες ι Ιεχωβάσκε βοηθιντέ λέσκε υπηρετόν τι συνεχίνεν τι υπηρετίνεν-λες χαράσαρ ντα ζοριάσαρ αντρέ πουμέντε “επειδή λένγκο γκι ισινέ πφερντό ευτυχία”.​—Ησ. 65:14.

13. Σαρ νικίστιλι μπαγιά η προφητεία σο τθερέλα τι κερέλ με την πάκι λατρεία αμαρέ ντιβεσέντε;

 ¹³ Ισί αμένγκε-ντα αντιβές η προφητεία σο τθερέλα τι κερέλ με την πάκι λατρεία; Σίγουρα! Σαρ; Κατά 1919 Κ.Χ., εκατομμύρια τζενέ σο ισινέ αιχμάλωτοι ελευθερωσάλε κατά Μπαρί Βαβυλώνα, σο ισί σαρέ ο ψεύτικες θρησκείες ι ντουνιάσκε. Οδηγίντιλε εκχέ μπουτ πο λατσσέ τθανέστε κατά Υποσχεμέ Τθεμ κο Ισραήλ. Οδηγίντιλε σε εκ πνευματικός παράδεισος. (Ησ. 51:3· 66:8) Σο ισί ανταβά πνευματικός παράδεισος;

14. Σο ισί ο πνευματικός παράδεισος, ντα κον μπεσέλα οτθέ αντιβές; (Ντικχέν «Σο Μανγκέλα τι Βακερέλ»)

¹⁴ Κατά 1919 Κ.Χ., ο χρισμέ τζουβντιόνα σε εκ πνευματικός παράδεισος. b Καζόμ νακχένα ο μπρεσά, οντουλά σο τθερένα ι ελπίδα τι τζουβντιόν κι πφουβ, ο “γιαβερά μπρακέ”, γκιλέ βον-ντα ανταλέ πνευματικέ πφουβιάτε ντα λιντέ ο μπουτ ευλογίες ι Ιεχωβάσκε.​—Ιωάν. 10:​16· Ησ. 25:6· 65:13.

15. Κατέ ισί ο πνευματικός παράδεισος;

¹⁵ Κατέ ισί αντιβές ανταγιά πνευματική πφουβ, ή γιαβέρσοϊ πνευματικός παράδεισος; Ο υπηρέτες ι Ιεχωβάσκε ισί σαρέ κο τθανά κι πφουβιάκε. Οτθάρ, ο πνευματικός παράδεισος-ντα σο μπεσένα ισί σαρό κο ντουνιάς. Άρα, αντιβές, κάι-ντα τι τζουβντιάσα κι πφουβ, μπορίνασα τι αβάς αντρέ ανταλέ πνευματικέ παραδεισόστε άμα κεράσα ο πο λατσσό για τι ντας πάκι λατρεία.

16. Σαρ μπορίνασα τι συνεχίνας τι ντικχάς ο σουκαριπέ ι πνευματικέ παραδεισόσκο;

¹⁶ Για τι ατσσάς κο πνευματικός παράδεισος, πρέπει τι συνεχίνας τι τθεράς μπαρί εκτίμηση αμαρέ πφραλένγκε σαρό κο ντουνιάς. Σαρ μπορίνασα τι κεράς-λες ανταβά; Κάνα ντικχάσα ο σουκαριπέ ντα όχι ο ατέλειες οντουλένγκε σο μπεσένα οτθέ. (Ιωάν. 17:​20, 21) Σόσκε ισί αζόμ σημαντικός ανταβά; Ανέν τουμαρέ γκοντιάτε ακαβά παράδειγμας: Εκχέ σουκάρ παρκόστε, ή γιαβέρσοϊ κηπόστε, κα μπεκλεντίναας τι ντικχάς σαβέ τι μανγκές δέντρα. Αντικάς, ο πνευματικός παράδεισος-ντα σο ισί κο κχανγκιριά αντιβές, ισί στολισμέ σαβέ τι μανγκές τζενέντζαρ σο κα μπορίναας  τι μοιασκιαράς-λεν δεντρόντζαρ. (Ησ. 44:4· 61:3) Πρέπει τι συνεχίνας τι ντικχάς ο σουκαριπέ ι «δασόσκο» ντα όχι ο ελαττώματα χάνικ «δεντρόνγκε» σο ισί πο πασέ αμέντε. Δεν πρέπει τι μουκχάς κο ατέλειες αμαρέ ή κο ατέλειες κι γιαβερένγκε κι κχανγκιρί τι λεν αμαρί προσοχή κατά σουκαριπέ σο τθερέλα αμαρί κχανγκιρί σο ισί ενωμέ σαρό κο ντουνιάς.

17. Σο μπορίνελα ο κάθε εκ αμένταρ τι κερέλ για τι ατσσικιαρέλ ι κχανγκιρί ενωμέ;

¹⁷ Σο μπορίνελα ο κάθε εκ αμένταρ τι κερέλ για τι ατσσικιαρέλ ι κχανγκιρί ενωμέ; Μπορίνασα τι αβάς τζενέ σο ανένα ειρήνη. (Ματθ. 5:9· Ρωμ. 12:​18) Κάθε φαρ σο αμέν προσπαθίνασα πρώτοι τι ανάς ειρήνη ι γιαβερέντζαρ κι κχανγκιρί, κεράσα πο σουκάρ ο πνευματικός παράδεισος. Ντάσα-αμέν γκοντί ότι ο Ιεχωβά ταρτιντάς κι πάκι λατρεία κάθε τζενές σο μπεσέλα κο πνευματικός παράδεισος. (Ιωάν. 6:​44) Σκεφτίνεν καζόμ πρέπει τι αβέλα ι Ιεχωβάσκο γκι κάνα ντικχέλα-αμέν τι μαράς-αμέν για τι μπαριαράς ι ειρήνη ντα ι ενότητα αντρέ λέσκε υπηρετόντε σο ισί αζόμ πολύτιμοι λέσκε!​—Ησ. 26:3· Αγγ. 2:7.

18. Καλά πράγματα πρέπει τι σκεφτίνας λατσσές μπουτ φαρ, ντα σόσκε;

¹⁸ Σαρ μπορίνασα τι βοηθίντιβας καζόμ πο μπουτ αβέλα-πες κατά ευλογίες σο λάσα σαρ υπηρέτες ι Ντεβλέσκε; Μπορίνασα τι σκεφτίνας λατσσές οντουλά σο σικλιαράσα-αμέν κατά Λάφι ι Ντεβλέσκο ντα κατά έντυπα ι Γραφιάκε. Άμα κα κεράς-λες ανταβά κα μπαριαράς Χριστιανικές ιδιότητες σο κα τσσίντεν-αμέν “τι μανγκάς αντράλ αμαρέ γκίσταρ ο εκ ι γιαβερές σαρ μανγκάσα αμαρέ πφραλέν” αντρέ κι κχανγκιρί. (Ρωμ. 12:​10) Κάνα σκεφτίνασα λατσσές ο ευλογίες σο τθεράσα ακανά, αβάσα πο λατσσέ αμαλά ι Ιεχωβάσαρ. Ντα κάνα σκεφτίνασα λατσσές ο ευλογίες σο κα ντελ-αμέν ο Ιεχωβά ανγκλ’ αμέντε, η ελπίδα τι υπηρετίνας-λες για πάντα κα ατσσόλ μπουτ πραγματική αμένγκε. Σαρέ ανταλά κα βοηθίνεν τι τθεράς χαρά καζόμ υπηρετίνασα ι Ιεχωβάς ακανά.

19. (α) Καλέ πραγμάσκε μπορίνασα τι αβάς σίγουροι, σαρ βακερέλα ο εδάφιος Ησαΐας 30:​18; (β) Σο κα βοηθίνελ-αμέν τι νταϊντίνας χαράσαρ;

¹⁹ Ο Ιεχωβά «κα ιστίλ» μάξους αμένγκε κάνα κα ανέλ ο τέλος ανταλέ πφιρνέ ντουνιάσκο. (Ησ. 30:​18) Ισινάμ ντιπ σίγουροι ότι ο Ιεχωβά, σο ισί εκ «δίκαιος Ντεβέλ», να κα μουκχέλ κι Μπενγκέσκο ντουνιάς τι ατσσόλ πο μπουτ οντουλέσταρ σο χρειαζίντιβελα. (Ησ. 25:9) Μπεκλεντίνασα γιεκ ι Ιεχωβάσαρ με υπομονή τι αβέλ ανταβά ντιβές απελευθέρωσης. Μέχρι αζομάν, ισινάμ αποφασισμέ μα τι τσσιναβάς τι εκτιμίνας ο προνόμιος ι προσευχιάκο, τι σικλιαράς-αμέν ντα τι κεράς ο Λάφι ι Ντεβλέσκο αμαρέ ζωγιάτε ντα τι σκεφτίνας λατσσές αμαρέ ευλογίες. Άμα κεράσα-λεν ανταλά, ο Ιεχωβά κα βοηθίνελ-αμέν τι νταϊντίνας χαράσαρ καζόμ ντάσα-λες λατρεία.