Πολ: Ισινάμας μπουτ χαρούμενοι! Ισινέ Νοέμβριος κο 1985, ντα ισινάμας κο ντρομ για τι τζας κο πρώτος διορισμός σο τθεράας σαρ ιεραπόστολοι κι Λιβερία, σο ισί κι Δυτική Αφρική. Αμαρί πτήση κερντάς στάση κι Σενεγάλη. «Σε εκ σαάτι κα ερεσάς κι Λιβερία!», βακερντάς η Αν. Αζομάν ασουντάμ εκ ανακοίνωση: «Οντουλά σο ισί τι τζαν κι Λιβερία πρέπει τι γουλίν κατά αεροπλάνος. Κάποια τζενέ περαντέ ι κυβέρνηση ντα οτθάρ ο αεροπλάνος ναστί τζάλα οτθέ». Ο γιαβερά ντες ντιβεσά, μπεσλάμ κο ιεραπόστολοι σο ισινέ κι Σενεγάλη, ντα ασουνάας αμπέρια ότι κι Λιβερία πφερένας φορτηγά μουλέ τζενέντζαρ ντα ότι η κυβέρνηση να μουκχέλας ι τζενέν τι νικιόν πουμαρέ κχερένταρ αρατί αλλιώς κα μουνταρένας-λεν αμέσως.

Αν: Να ισινάμ τζενέ σο να νταρένα. Χουρντιαρέλα μπερί τσσουντέας μάνγκε ο ναβ Νταρανί Άνι, επειδή νταράβας. Νταράβα ατζέ-ντα κάνα νακχάβα ο ντρομ! Αλλά ισινάμας αποφασισμέ τι τζας αμαρέ διορισμόστε.

Πολ: Η Αν ντα με μπαριλάμ κι ίδια περιοχή, κι δυτική Αγγλία. Μο ντατ ντα μι ντάι ντα ι Ανάκι ντάι πάντα τσσίντενας-αμέν τι κεράς τακτικός σκαπανικός, οτθάρ ο ντούι-ντα αρχισάλαμ ο σκαπανικός κάνα μπιτισκιαρντάμ ο σχολείος. Ισινέ μπουτ χαρούμενοι σο μανγκάας τι νακχάς αμαρί ζωή κι ολοχρόνια υπηρεσία. Κάνα αβιλόμ 19, τθεράβας ο προνόμιος τι τζαβ κο Μπέθελ, ντα η Αν κάνα παντρισάλαμ, κο 1982, ντινάς βόι-ντα κο Μπέθελ.

Αν: Μπεϊντίναας ο Μπέθελ, αλλά πάντα μανγκάας τι τζας οτθέ σο η ανάγκη ισινέ πο μπαρί. Επειδή κο Μπέθελ κεράας μπουτί γιεκ πφραλέντζαρ σο ισινέ ανγκλέ ιεραπόστολοι, αμαρί επιθυμία μπαριλί πο μπουτ. Κεράας συγκεκριμέ προσευχές ανταλέσκε κάθε ιράτ για τριν μπρες, ντα οτθάρ ισινάμας μπουτ χαρούμενοι κάνα λιντάμ εκ πρόσκληση κο 1985 για τι τζας κι Τάξη 79 κι Σχολή Γαλαάδ! Αμαρό διορισμός ισινέ τι τζας κι Λιβερία σο ισί κι Δυτική Αφρική.

Πολ: Λιντάμ ι πρώτη πτήση σο μουκχλέ-αμέν τι λας για τι τζας κι Λιβερία. Ο τζενέ νταρένας μπουτ ντα ατζέ να μουκχένας-λεν τι νικιόν πουμαρέ κχερένταρ αρατί. Ο τζενέ νταρένας αζόμ μπουτ σο κάνα  εκ αυτοκίνητος κερντάς ξαφνικά εκ ζουρανό θόρυβος, σαρέ αρχισάλε τι ντεν βίκος ντα τι τθάβντεν. Για τι ατσσάς ήρεμοι, διαβάναας γιεκ ο Ψαλμοί κάθε ιράτ. Αλλά μανγκάας μπαγιά αμαρό διορισμός. Η Αν κερέλας έργος κάθε ντιβές ντα με ισινόμας κο Μπέθελ ντα κεράβας μπουτί με τον Τζον Τσάρουκ. a Σικλιλόμ μπουτ πράγματα λέσταρ σόσκε βοβ ισινέ μπουτ καιρός κι Λιβερία ντα τζανέλας σαρ ισινέ ο πράγματα οτθέ ντα ο δυσκολίες ι πφραλένγκε ντα ι πφενίνγκε μπουτ λατσσές.

Αν: Σόσκε μανγκλάμ αμαρό διορισμός κι Λιβερία αζόμ σουγκό; Ιτιρί κατά πφραλά ντα κατά πφενιά. Σικαντέ αμένγκε μπουτ αγάπη ντα ισινέ πιστοί. Αβιλάμ μπουτ πασέ λέντζαρ ντα αβιλέ αμαρί νεβί φαμιλί. Λένγκε συμβουλές ντένας-αμέν ζορ. Ο έργος οτθέ ισινέ μπουτ σουκάρ. Ο τζενέ να μπεϊντίνενας κάνα νασάας λένταρ μπουτ σουγκό! Ο τζενέ κερένας λάφι ι Γραφιάκε κάι-ντα ισινέ. Μπορίνεας απλά τι τζας ντα τι τσσουβές-τουτ κι συζήτηση λένγκι. Τθεράας αζόμ μπουτ μελέτες σο να ερεσαβάας τι κεράς-λεν σαρέ. Ισινέ μπουτ σουκάρ ανταβά πρόβλημας!

Πολ: Για σταρ μπρεσά ο πράγματα κο τθεμ ισινέ χάνικ ήρεμα. Αλλά κο 1989, αρχισάλο τζένγκι, δηλαδή πόλεμος. Κο 2 Ιουλίου 1990, οντουλά σο τζάνας κόντρα κι κυβέρνηση κερντέ κουμάντος κι περιοχή σο ισινέ ο Μπέθελ. Για τριν μασεκά ναστί τθεράας επικοινωνία καεκχέσαρ σο ισινέ αβρί κατά τθεμ, ούτε αμαρέ τζενέντζαρ ντα με το παγκόσμια κεντρικά γραφεία. Υπαρχίντιβελας παντού βία, να ισινέ μπουτ χαμπέ ντα λατζαβκιαρένας μπουτέ τζουβλίν. Ανταλά προβλήματα ατσσικιαρντέ 14 μπρεσά ντα επηρεαντέ σαρό ο τθεμ.

Αν: Ο τζενέ σε μερικές φάρες πολεμίνενας ντα μουνταρένας τζενέν κατά γιαβερά φάρες. Σαρέ κο ντρομά ισινέ στρατιώτες. Τθερένας μπουτ όπλα, ισινέ ιριαντέ παράξενα ντα τσσουβένας-πες κο κχερά για τι λεν σο-ντα μανγκένας. Μερικοί λένταρ βακερένας ότι τι μουνταρές εκχέ τζενές ισί σαρ τι τσσινές εκχέ κχανιά. Ο στρατιώτες σταματίνενας ι τζενέν σο νακχένας κατά ντρομ ντα μπουτ φαρ μουνταρένας-λεν. Ντα σοράν γκίντενας ι τζενένγκε σώματα ο εκ οπράλ κο γιαβέρ. Ανταβά αβέλας-πες εμ πασέ κο Μπέθελ. Δυστυχώς, πιστά πφραλά μουλέ ντα αντρέ ανταλέντε ισινέ ντούι ιεραπόστολοι-ντα.

Ο πφραλά τσσουβένας πουμαρί ζωή σε κίνδυνος για τι γκεραβέν γιαβερέ πφραλέν σο ισινέ κατά φάρες σο ο στρατιώτες μανγκένας τι μουνταρέν. Ο ιεραπόστολοι ντα ο Μπεθελίτες γκεραβένας βον-ντα πφραλέν. Μερικά πφραλά σο έπρεπε τι νασέν πουμαρέ κχερένταρ σοβένας κο τελαϊνό όροφος κο Μπέθελ ντα γιαβερά μπεσένας αμέντζαρ αμαρέ δωματιόντε οπράλ. Αμέν μπεσάας αμαρέ δωματιόστε εφτά γιαβερέ πφραλέντζαρ.

 Πολ: Κάθε ντιβές, ο στρατιώτες προσπαθίνενας τι τσσουβέν-πες αντρέ κο Μπέθελ για τι ντικχέν άμα γκεραβάας τζενέν. Τθεράας σταρέ πφραλέν για τι αρακχαβέν: ντούι λένταρ ντικχένας κατά παράθυρος ντα ντούι γιαβερά τζάνας κι πόρτα σο ισινέ αβρί. Άμα ο ντούι πφραλά σο ισινέ κι πόρτα τθερένας πουμαρέ βαστά ανγκλάλ, να ισινέ κίνδυνος. Αλλά άμα κα τσσουβένας πουμαρέ βαστά παλάλ πουμαρέ ντουμέσταρ, ανταβά μανγκέλας τι βακερέλ ότι ο στρατιώτες μανγκένας τι κερέν φασαρία, ντα οντουλά σο ντικχένας κατά παράθυρος σουγκό γκεραβένας αμαρέ πφραλέν.

Αν: Εκ ντιβές, εκ ομάδα χολιαμέ στρατιωτένγκι τσσουντέ-πες αντρέ ζορίσαρ. Εκχέ πφενιάσαρ τσσουντάμ-αμέν αντρέ κο κινέφι ντα κλειδωντάμ ι πόρτα. Οτθέ ισινέ εκ χουρντό ντουλάπι σο νικιόλας λέσταρ ο πάτος ντα κάποιος κα μπορίνελας τι γκεραβέλ-πες τελάλ. Η πφεν τσσουντάς-πες αντρέ κο μπουτ χουρντό τθαν. Ο στρατιώτες αβιλέας οπρέ ντα τθερένας όπλα. Μπασκιαρντέ αμαρί πόρτα χολιάσαρ. Ο Πολ μολίνελας-λεν μα τι τσσουβέν-πες αντρέ ντα βακερντάς: «Μι ρομνί ισί κο κινέφι». Για τι τσσουβάβ πάλι ο πάτος ντα ο πράγματα σο ισινέ κο ντουλάπι αβέλας-πες θόρυβος ντα αργισάλομ-ντα, οτθάρ αρχισάλομ τι ιζράβ σαστί. Σαρ κα πουτράβας ι πόρτα αντικάς σαρ ισινόμας; Κερντόμ αντρά-μάνταρ εκ προσευχή ντα μολιντόμ ι Ιεχωβάς για βοήθεια. Σοράν πουταρντόμ λένγκε ντα μπορισάλομ τι χαιρετίναβ-λεν ήρεμα. Εκ λένταρ ταρτιντάς-μαν κι νάκρη, γκιλό κο ντουλάπι, πουταρντάς-λες ντα ροντιντάς. Ναστί πακιάλας ότι να αρακχλάς τίποτα. Σοράν ροντιντέ γιαβερά δωμάτια ντα κο τθαν τελάλ κατά σκεπή. Ντα πάλι να αρακχλέ τίποτα.

Πολ: Για μπουτ μασεκά ισινέ χάνικ χαμπέ. Μπουτ φαρ να τθεράας τίποτα τι χας το πρωί, αλλά κάνα ντικχάας ι πρωινή λατρεία κο Μπέθελ ισινέ σαρ τι χάας πρωινός. Σαρέ τζανάας ότι άμα κα διαβάναας ι Γραφή κα ντέλας-αμέν ζορ για τι νταϊντίνας ο κάθε ντιβές.

Άμα κα τελειώνελας ο χαμπέ ντα ο πανί, κα χρειαζίντιβελας τι νικιάς κατά Μπέθελ ντα αζομάν κα μουνταρένας ι πφραλέν σο γκεραβάας. Μερικές φορές ο Ιεχωβά ντέλας-αμέν ο αναγκαία οπράλ κο σαάτι ντα τροπόντζαρ σο να μπεκλεντίναας. Ισινέ σαρ εκ θαύμας! Ο Ιεχωβά φροντίνελας αμαρέ ανάγκες ντα βοηθίνελας-αμέν τι κεράς κουμάντος αμαρί νταρ.

Καζόμ ο πράγματα κο ντουνιάς αβένας πο μπέτι, η αλήθεια ντέλας-αμέν ζορ. Μπουτ φαρ, αμαρέ πφραλά ντα πφενιά νασλέ για τι σώνεν πουμαρί ζωή, αλλά ατσσικιαρντέ ζουρανί πουμαρί πίστη ντα ατσσιλέ ήρεμοι παρόλο σο τθερένας προβλήματα. Μερικά πφραλά βακερένας ότι οντουλά σο νακχένας ιτιρί κατά τζένγκι «προετοιμάνενας-λεν για τη μπαρί στεναχώρια». Πρεσβύτεροι ντα τερνέ πφραλά κερένας μπίνταρανες ο πο λατσσό σο μπορίνενας για τι βοηθίνεν πουμαρέ πφραλέν. Κάνα ο πφραλά νασένας πουμαρέ κχερένταρ, ατσσόνας γιεκ, μουτθαβένας ο λατσσέ αμπέρια κο νεβό τθαν σο γκιλέας ντα κερένας συναθροίσεις σε Αίθουσες Βασιλείας σο λατσσαρένας βον αντρέ κο δάσος. Οντουλέ  δύσκολε ντιβεσέντε, ο συναθροίσεις ντα ο έργος ντένας κο πφραλά μπουτ ζορ. Κάνα ιλιαβάας χαμπέ, σέα ντα γιαβερά πράγματα, λέλας-αμέν ροϊπέ σο ντικχάας ότι ο πφραλά μανγκένας βαλίτσες ι εργόσκε αντίς τι μανγκέν σέα. Τζενέ σο ισινέ πφανγκέ γκίσκε ντα τσσιντιντέας μπουτ κατά τζένγκι ασουνένας ο λατσσέ αμπέρια. Ατσσόνας πουταρντέ μόσαρ κάνα ντικχένας καζόμ χαρούμενοι ισινέ ο Μάρτυρες. Βον λένας-πες σαρ ο φως αντρέ κο καρανίκι. (Ματθ. 5:​14⁠-16) Επειδή αμαρέ πφραλά υπηρετίνενας ι Ιεχωβάς σαρέ πουμαρέ γκίσαρ, ατζέ-ντα μερικοί κατά γκεραλέ στρατιώτες τελικά αβιλέ αμαρέ πφραλά.

Πολ: Μερικές φορές έπρεπε τι νασάς κατά Λιβερία, τριν φαρ για χάνικ ντα ντούι φαρ για εκ μπρες. Εκ ιεραπόστολος σικαντάς πι λαφίντζαρ σαρ νιωθίναας αμέν-ντα: «Κι Γαλαάδ, σικλιαρντέ-αμέν τι κεράς αμαρό διορισμός σαρέ αμαρέ γκίσαρ, ντα ανταβά κερντάμ. Οτθάρ, κάνα έπρεπε τι μουκχάς αμαρέ πφραλέν ασακέ ντιβεσέντε, νιωθίναας ότι πφαράντιβελας αμαρό γκι!» Πάλι λατσσές, μπορίναας τι βοηθίνας αμαρέ πφραλέν κι Λιβερία επειδή μπεσάας τθεμέντε οτθέ πασέ.

Αν: Κο Μάιος 1996, σταρ πφραλά αρχισάλαμ τι νασάς με το αμάξι του Μπέθελ σο ισινέ πφερντό σημαντικά χαρτιά. Μανγκάας τι τζας 16 χιλιόμετρα ντουρ, σε εκ πο αρακχαντό τθαν κι πόλη. Αζομάν, αβιλί επίθεση αμαρέ περιοχιάτε. Χολιαμέ στρατιώτες τσσίντενας οπρέ, σταματιντέ-αμέν, νικαντέ τρινέν αμένταρ αβρί ντα νασλέ με το αμάξι σο αντρέ ισινέ εμ ο Πολ. Ατσσιλάμ οτθέ πουταρντέ μόσαρ. Ξαφνικά ντικχλάμ τι αβέλ ο Πολ αντράλ μπουτέ τζενένταρ. Κατά τσικάτ λέσκο τθάβντελας ρατ. Κι αρχή, αμντίναας ότι πυροβολιντέ-λες, αλλά σοράν αγαντάμ ότι, άμα αβιλόας-πες ανταβά, ναστί κα πφιρέλας! Εκ στρατιώτης τσαλαντάς-λες καζόμ φουρτίνελας-λες αβρί κατά αμάξι. Ευτυχώς, ο ντιπέ να ισινέ μπαρό.

Οτθέ πασέ ισινέ εκ φορτηγός ι στρατόσκο πφερντό τζενέντζαρ σο νταρένας. Να λέλας-αμέν αντρέ, οτθάρ ασταρντάμ-αμέν σαρ τ’ αβέλ αβριάλ. Ο οδηγός αρχισάλο τι νασέλ μπουτ ντα παραλίγο τι περάς. Μολίναας-λες τι ατσσόλ αλλά νταρέλας μπουτ τι σταματίνελ. Ευτυχώς να πελάμ αλλά κάνα ο φορτηγός σταματισάλο ισινάμας μπουτ κχινέ ντα ιζράας κατά νταρ.

Πολ: Ατσσιλάμας σάντε ι μελαλέ ντα πφαραντέ σεΐντζαρ σο ιριάας. Ντικχάας-αμέν ντα ναστί πακιάας ότι ισινάμας τζουβντέ. Σοτάμ σε εκ χωράφι πασέ σε εκ ελικόπτερος πφαραντό κατά μπουτ σφαίρες, σο ντικχίντιβελας σαραβαλιαμέ. Ανταλέσαρ γκιλάμ κι Σιέρα Λεόνε κο γιαβέρ ντιβές. Ισινάμας πφερντέ εκτίμηση σο ισινάμας τζουβντέ, αλλά νταράας μπουτ αμαρέ πφραλένγκε.

Αν: Ερεσλάμ με ασφάλεια κο Μπέθελ κο Φρίταουν κι Σιέρα Λεόνε ντα ο πφραλά αρακχαβένας-αμέν λατσσές. Αλλά αβένας μι γκοντιάτε οντουλά σο νακχλάμ κι Λιβερία. Σαρό ο ντιβές νταράβας ότι κάτι μπέτι κα αβέλας ντα ναστί σκεφτίναβας καθαρά. Αρατί, τσσινέλας-μαν ο τέρι, τζανγκάντιβαβας, ιζράβας ντα νταράβας ότι κάτι μπέτι κα αβέλ. Τσσιντιόλας μι ανάσα. Ο Πολ ασταρέλας-μαν πι ανγκαλιάτε ντα προσευχίντιβελας μάντζαρ. Γκιλιαβάας ύμνους μέχρι τι ηρεμίναβ. Αμντίναβας ότι χασαράβας μι γκοντί ντα ότι ναστί κα υπηρετίναβας γιαβέρ σαρ ιεραπόστολος.

Να κα μπιστράβ ποτές οντουβά σο αβιλό-πες σοράν. Οντιά εβδομάδα, λιντάμ ντούι περιοδικά. Ο εκ ισινέ ο Ξύπνα! 8 Ιουνίου 1996. Τθερέλας αντρέ ο θέμας «Πώς να Αντιμετωπίσετε τις Κρίσεις Πανικού». Επιτέλους αγαντόμ σο τθεράβας. Ο γιαβέρ ισινέ Η Σκοπιά 15 Μαΐου 1996, σο τθερέλας αντρέ ο θέμας «Από Πού Παίρνουν τη Δύναμή Τους;» Η Σκοπιά τθερέλας εκ φωτογραφία σο σικαβέλας εκ ντινί τσιλιμπίκα. Ο θέμας εξηγίνελας ότι, σαρ εκ τσιλιμπίκα μπορίνελα τι συνεχίνελ τι χαλ ντα τι πετάνελ ατζέ-ντα άμα λάκε φτερά παθισάλε μπαρό ζιάνι, αντικάς αμέν-ντα ι Ιεχωβάσκε πνευμάσαρ μπορίνασα τι συνεχίνας τι βοηθίνας γιαβερέν ατζέ-ντα άμα παθισάλαμ μπαρό ζιάνι συναισθηματικά. Ανταβά ισινέ ζουρανό χαμπέ κατά Ιεχωβά οπράλ κο σωστός βακίτι. (Ματθ. 24:​45) Ροντιντόμ ντα γκιντιντόμ σε εκ φάκελος θέματα σο βακερένας ανταλέσκε. Ανταβά βοηθιντάς-μαν μπουτ. Καζόμ νακχέλας ο καιρός, να τθεράβας αζόμ μπουτ νταρ ντα άγχος.

Πολ: Κάθε φαρ σο βουρτίναας κι Λιβερία, ισινάμας μπουτ χαρούμενοι. Κάνα τελειώνελας ο 2004, κα πφάνταας 20 μπρεσά αμαρέ διορισμόστε.  Ο τζένγκι σταματισάλοας. Κεράας σχέδια για οικοδόμηση κο Μπέθελ. Αλλά ξαφνικά μανγκλέ αμένταρ τι δεχτίνας εκ νεβό διορισμός.

Ανταβά ισινέ μπουτ δύσκολος αμένγκε. Ισινάμας μπουτ πασέ αμαρέ πφραλέντζαρ ντα πφενίντζαρ κι Λιβερία. Ισινέ σαρ φαμιλί αμένγκε ντα να μανγκάας τι μουκχάς-λεν. Αλλά ήδη τθεράας ντικχλό σαρ βοηθιντάς-αμέν ο Ιεχωβά κάνα μουκχλάμ αμαρέ φαμιλιά για τι τζας κι Γαλαάδ. Οτθάρ δεχτιντάμ. Αμαρό διορισμός ισινέ τι τζας κι Γκάνα, εκ τθεμ οτθέ πασέ.

Αν: Ροντάμ μπουτ κάνα νασάας κατά Λιβερία. Σαστισάλαμ κάνα ο Φρανκ, εκ γκοντιαβέρ πφουρό πφραλ, βακερντάς αμένγκε: «Αμέν πρέπει τι μπιστρέν-αμέν!» Σοράν εξηγιντάς: «Τζανάσα ότι να κα μπιστρέν-αμέν ποτές, αλλά πρέπει τι ντεν σαρό τουμαρό γκι τουμαρέ νεβέ διορισμόστε. Ισί κατά Ιεχωβά, οτθάρ τι τθερέν τουμαρέ γκοντιάτε ι πφραλέν ντα ι πφενίν οτθέ». Ανταβά ντινάς-αμέν ζορ τι κεράς εκ νεβί αρχή εκχέ τθεμέστε σο χάνικ τζενέ τζανένας-αμέν ντα σαρέ ισινέ νεβέ αμένγκε.

Πολ: Όμως, μπουτ σουγκό μανγκλάμ αμαρί νεβί πνευματική φαμιλί κι Γκάνα. Ισινέ μπουτ πφραλά οντουλέ τθεμέστε! Σικλιλάμ μπουτ πράγματα κατά αφοσίωση ντα κατά ζουρανί πίστη αμαρέ νεβέ αμαλένγκι. Σοράν, αφού υπηρετιντάμ κι Γκάνα 13 μπρεσά, αβιλό κάτι γιαβέρ-ντα σο να μπεκλεντίναας-λες. Μανγκλέ αμένταρ τι υπηρετίνας κο Μπέθελ της Ανατολικής Αφρικής κι Κένυα. Παρόλο σο σικλιντίναας μπουτ αμαρέ πφραλένγκε κι Γκάνα ντα κι Λιβερία, σουγκό αβιλάμ πασέ ι πιστέ πφραλέντζαρ κι Κένυα. Ντα συνεχίνασα τι υπηρετίνας εκχέ μπαρέ τομεάστε σο η ανάγκη ισί μπουτ μπαρί.

Αν: Μι ζωγιάτε νακχλόμ μπουτ δυσκολίες σο κερένας-μαν τι ιζράβ. Κάνα τζουβντιάσα επικίνδυνε τθανέντε ή νακχάσα μπαρέ δυσκολίες, ανταβά μπορίνελα τι κερέλ αμένγκε ζιάνι εμ κο σώμας εμ συναισθηματικά. Να μπεσάσα ότι ο Ιεχωβά κα αρακχαβέλ-αμέν ανταλένταρ. Ατζέ-ντα ακανά άμα κα ασουνάβ τι τσσίντεν, λέλα-μαν μο περ ντα μουδιάνενα μο βαστά. Αλλά σικλιλόμ τι στηρίντιβαβ κο πράγματα σο χρησιμοποιήνελα ο Ιεχωβά για τι ντελ-αμέν ζορ, σαρ ισί η βοήθεια αμαρέ πφραλένταρ ντα πφενίνταρ. Ντα αγαντόμ ότι άμα ατσσικιαράσα εκ λατσσό πνευματικός πρόγραμμας, ο Ιεχωβά μπορίνελα τι βοηθίνελ-αμέν τι ατσσάς αμαρέ διορισμόστε.

Πολ: Μερικά τζενέ πουτσένα-αμέν: «Μανγκένα τουμαρό διορισμός;» Ο τθεμά μπέκιμ ισί σουκάρ, αλλά μπορίνενα τι αβέν επικίνδυνα. Καβά ισί οντουβά σο μανγκάσα πο μπουτ κατά τθεμ; Αμαρέ πολύτιμε πφραλέν ντα πφενίν, αμαρί φαμιλί. Παρόλο σο σαρέ ισινάμ γιαβερέ φαμιλιένταρ ντα τθανένταρ, σκεφτίνασα ίδιε τροπόσαρ. Αμντίναας ότι μπουτσσάντιλαμ για τι ντας-λεν ζορ, αλλά βοβ ντινέ ζορ αμέντε.

Κάθε φαρ σο ακχαράσα-αμέν γιαβερτθέ, ντικχάσα εκ θαύμας: αμαρέ πφραλέν. Καζόμ ισινάμ εκχέ κχανγκιριάτε, τθεράσα φαμιλί ντα κχερ. Ισινάμ σίγουροι ότι, άμα κα συνεχίνας τι στηρίντιβας κο Ιεχωβά, βοβ κα ντελ-αμέν ζορ σο-ντα τι νακχάς.​—Φιλιπ. 4:13.