1. Σαρ νιωθίνελας ο απόστολος Παύλος ι διακονικέ υπηρετόνγκε;

 Ο ΔΙΑΚΟΝΙΚΟΙ υπηρέτες κερένα εκ μπουτ σημαντική μπουτί ι κχανγκιριάκε. Ο απόστολος Παύλος εκτιμίνελας ανταλέ πιστέ πφραλέν. Για παράδειγμας κάνα γραφιντάς κο Χριστιανοί κο Φίλιπποι, να χαιρετιντάς σάντε ι πρεσβυτερόν αλλά εμ ι διακονικέ υπηρετόν-ντα.​—Φιλιπ. 1:1.

2. Σαρ νιωθίνελα εκ πφραλ ο Λούις ι διορισμόσκε σο τθερέλα σαρ διακονικός υπηρέτης;

² Μπουτ μπολντέ πφραλά, είτε τερνέ είτε μπαρέ, λένα μπαρί χαρά κάνα βοηθίνενα ι κχανγκιρί σαρ διακονικοί υπηρέτες. Για παράδειγμας ο Ντέβαν αβιλό διακονικός υπηρέτης κάνα ισινέ 18 μπρεσένγκο. Όμως, εκ πφραλ, ο Λούις αβιλό διακονικός υπηρέτης κάνα ισινέ χάνικ πο μπουτ από 50 μπρεσένγκο. Σαρ νιωθίνελα ανταλέ διορισμόσκε; Βακερντάς: «Ισινόμ μπουτ χαρούμενος σο υπηρετίναβα μι πφραλέν ντα μι πφενίν κι κχανγκιρί ανταλέ τροπόσαρ. Σικαντέ μάνγκε καζόμ μπουτ μανγκένα-μαν ντα ακανά μπορίναβα με-ντα τι σικαβάβ λένγκε μι αγάπη». Μπουτ διακονικοί υπηρέτες νιωθίνενα αντικάς!

3. Καλά ερωτήσεις κα ντικχάς;

³ Άμα ισινέν μπολντέ πφραλά ντα να ισινέν ατζέ διακονικοί υπηρέτες, κα μπορίνενας τι τσσουβέν-λες στόχος; Σο κα τσσίντελ-τουμέν τι κερέν-λες ανταβά; Ντα σο βακερέλα η Γραφή ότι χρειαζίντιβελα τι τθερέν για τι αβέν; Ανταλέ μαθημάστε, κα ντικχάς ο απαντήσεις ανταλέ ερωτησιέντε. Αλλά πρώτα, κα ντικχάς σαρ βοηθίνενα ο διακονικοί υπηρέτες ι κχανγκιρί.

 ΣΑΡ ΒΟΗΘΙΝΕΝΑ Ο ΔΙΑΚΟΝΙΚΟΙ ΥΠΗΡΕΤΕΣ Ι ΚΧΑΝΓΚΙΡΙ;

4. Σαρ βοηθίνενα ο διακονικοί υπηρέτες ι κχανγκιρί; (Ντικχέν ι φωτογραφία-ντα)

⁴ Ο διακονικοί υπηρέτες ισί μπολντέ πφραλά σο διορίντιβενα κατά άγιος πνεύμας. Κερένα μπουτ σημαντικά πράγματα για τι βοηθίνεν ι πρεσβυτερόν. Μερικοί διακονικοί υπηρέτες φροντίνενα τι τθερέν ο πφραλά τομέας ντα έντυπα ι εργόσκε. Γιαβερά βοηθίνενα τι καθαρίντιβελ ντα τι ατσσόλ σε λατσσί κατάσταση η Αίθουσα Βασιλείας. Ο διακονικοί υπηρέτες υπηρετίνενα επίσης σαρ ταξιθέτες ντα βοηθίνενα κο ήχος ντα κι εικόνα κι συνάθροιση. Σαρέ ανταλά μπουτιά σο κερένα ο διακονικοί υπηρέτες ισί πρακτικά. Ο πο σημαντικός ισί ότι ο διακονικοί υπηρέτες ισί μουρσά σο μανγκένα ι Ιεχωβάς ντα τζουβντιόνα τροπόσαρ σο κερέλα λέσκο γκι. Επίσης μανγκένα μπουτ πουμαρέ πφραλέν ντα πφενίν. (Ματθ. 22:37-39) Σαρ μπορίνελα εκ μπολντό πφραλ τι αβέλ διακονικός υπηρέτης;

5. Σαρ μπορίνελα εκ πφραλ τι μαρέλ-πες για τι αβέλ διακονικός υπηρέτης;

⁵ Η Αγία Γραφή βακερέλα αμένγκε καλά ιδιότητες χρειαζίντιβενα για τι αβέλ κάποιος διακονικός υπηρέτης. (1 Τιμ. 3:8-10, 12, 13) Μπορίνενα τι πετυχίνεν ανταβά στόχος άμα κα διαβάνεν ο ιδιότητες σο βακερέλα η Γραφή ντα κα μαρέν-τουμέν για τι τθερέν-λεν. Όμως πρώτα, πρέπει τι ντικχέν προσεκτικά σο ταρτίνελα-τουμέν τι κερέν-λες ανταβά.

ΣΟΣΚΕ ΜΑΝΓΚΕΝΑ ΤΙ ΑΒΕΝ ΔΙΑΚΟΝΙΚΟΙ ΥΠΗΡΕΤΕΣ;

6. Καβά πρέπει τι αβέλ ο λόγος σο μανγκένα τι υπηρετίνεν τουμαρέ πφραλέν ντα πφενίν; (Ματθαίος 20:28· ντικχέν ι φωτογραφία-ντα)

⁶ Σκεφτίνεν αμαρό πο μπαρό παράδειγμας, ι Ιησούς. Σο-ντα κερέλας βοβ, κερέλας-λες επειδή μανγκέλας πι Νταντές ντα ι τζενέν. Ανταγιά αγάπη κερντάς-λες τι μαρέλ-πες ι γιαβερένγκε ντα τι κερέλ ταπεινά μπουτιά λένγκε. (Διαβάνεν Ματθαίος 20:​28· Ιωάν. 13:5, 14, 15) Άμα τουμέν-ντα ταρτίνελα-τουμέν η αγάπη, ο Ιεχωβά κα ευλογίνελ-τουμέν ντα κα βοηθίνελ-τουμέν τι πετυχίνεν ο στόχος τι αβέν διακονικοί υπηρέτες.​—1 Κορ. 16:14· 1 Πέτρ. 5:5.

7. Σόσκε ισί λάθος τι μανγκέλ εκ πφραλ τι αβέλ κάποιος διακονικός υπηρέτης σάντε για τι σικαβέλ-πες;

⁷ Ο τζενέ κο ντουνιάς μπουτ φαρ θαυμάνενα οντουλέν σο μανγκένα τι σικαβέν-πες. Αλλά ανταβά να αβέλα-πες κι οργάνωση κι Ιεχωβάσκι. Εκ πφραλ σο μανγκέλα ι γιαβερέν, σαρ ο Ιησούς-ντα, να κερέλα κουμάντος ι γιαβερέν  ούτε μανγκέλα τι ντικχίντιβελ σημαντικός. Άμα εκ τζενό σο μανγκέλα τι σικαβέλ-πες κα διορίντιβελ κι κχανγκιρί, μάλλον να κα μανγκέλ τι κερέλ ταπεινά μπουτιά για τι φροντίνελ ι Ιεχωβάσκε μπρακέν. Επειδή αμντίνελα-πες μπαρό, σκεφτίνελα ότι ανταλά μπουτιά νανέ λέσκε. (Ιωάν. 10:12) Ο Ιεχωβά να κα ευλογίνελ ο προσπάθειες οντουλένγκε σο κερένα πράγματα σάντε για τι σικαβέν-πες.​—1 Κορ. 10:24, 33· 13:4, 5.

8. Καγιά συμβουλή ντινάς ο Ιησούς πι αποστολόντε;

⁸ Μπάζιμα, ατζέ-ντα ο πο λατσσέ αμαλά ι Ιησούσκε μανγκλέ τι λεν συγκεκριμέ διορισμούς αλλά όχι για το σωστός λόγος. Σκεφτίνεν σο κερντάς ο απόστολος Ιάκωβος ντα Ιωάννης. Μανγκλέ κατά Ιησούς τι ντελ-λεν σημαντικές θέσεις κι Βασιλεία λέσκι. Ο Ιησούς να ισαρντάς-λεν ανταλέσκε σο κερντέ. Οκιά μπάνταρ, βακερντάς κο 12 απόστολοι: «Κον τουμένταρ μανγκέλα τι αβέλ μπαρό πρέπει τι υπηρετίνελ-τουμέν, ντα κον τουμένταρ μανγκέλα τι τθερέλ ι πρώτη θέση πρέπει τι αβέλ ο δούλος σαριλένγκο». (Μάρκ. 10:35-37, 43, 44) Ο πφραλά σο μανγκένα τι αβέν διακονικοί υπηρέτες για το σωστός λόγος, δηλαδή για τι υπηρετίνεν ι γιαβερέν, κα αβέν ευλογία ι κχανγκιριάκε.​—1 Θεσ. 2:8.

ΣΟ ΚΑ ΒΟΗΘΙΝΕΛ-ΤΟΥΜΕΝ ΤΙ ΜΑΝΓΚΕΝ ΤΙ ΥΠΗΡΕΤΙΝΕΝ Ι ΠΦΡΑΛΕΝ;

9. Σο κα βοηθίνελ-τουμέν τι μανγκέν τι υπηρετίνεν ι γιαβερέν;

⁹ Σίγουρα μανγκένα ι Ιεχωβάς ντα μανγκένα τι υπηρετίνεν ι γιαβερέν. Όμως, μπορεί μα τι μανγκένα τι κερέν ο μπουτιά σο κερένα ο διακονικοί υπηρέτες. Σο κα βοηθίνελ-τουμέν τι μανγκέν τι κερέν ανταλά μπουτιά για τι υπηρετίνεν ι γιαβερέν; Σκεφτίνεν καζόμ χαρούμενοι κα αβέν επειδή υπηρετίνενα ι γιαβερέν. Ο Ιησούς βακερντάς: «Ισί πο ευτυχισμέ εκ τζενό κάνα ντέλα παρά κάνα λέλα». (Πράξ. 20:35) Ο λάφια ανταλέ εδαφιόσκε κερέλας-λεν ο ίδιος πι ζωγιάτε. Αρακχέλας μπαρί χαρά επειδή υπηρετίνελας ι γιαβερέν, ντα σίγουρα τουμέν-ντα κα νιωθίνεν αντικάς.

10. Σαρ σικαντάς ο Ιησούς ότι ισινέ χαρούμενος καζόμ υπηρετίνελας ι γιαβερέν; (Μάρκος 6:31-34)

¹⁰ Σκεφτίνεν εκ παράδειγμας σο σικαβέλα ι χαρά σο λέλας ο Ιησούς καζόμ υπηρετίνελας ι γιαβερέν. (Διαβάνεν Μάρκος 6:​31⁠-34) Εκ φαρ, ο Ιησούς ντα λέσκε μαθητές ισινέ κχινέ. Γκιλέ πέσκε εκχέ τθανέστε σο ισινέ ήσυχος για τι ξεκουράντιβεν. Αλλά οτθέ ισινέ γκιντιμέ μπουτ τζενέ ντα μανγκένας τι σικλιαρέλ-λεν ο Ιησούς. Ο Ιησούς κα μπορίνελας τι βακερέλ λένγκε όχι. Ντα ανταβά μπορεί τι αβέλας λογικός σόσκε βοβ ντα λέσκε απόστολοι “να ερεσαντέας ούτε τι χαν”. Ή ο Ιησούς κα μπορίνελας τι βακερέλ λένγκε σάντε χάνικ πράγματα. Αλλά επειδή μανγκέλας-λεν, «αρχισάλο τι σικλιαρέλ-λεν μπουτ πράγματα». Ντα συνεχιντάς τι σικλιαρέλ-λεν μέχρι σο “νακχλό ο σαάτι”. (Μάρκ. 6:35) Ανταβά κερντάς-λες, όχι επειδή έπρεπε, αλλά επειδή «τζιτζισάλο λένγκε». Ντέλας λέσκο γκι τι σικλιαρέλ-λεν επειδή μανγκέλας-λεν. Καζόμ ο Ιησούς υπηρετίνελας ι γιαβερέν λέλας μπαρί χαρά.

11. Σαρ ο Ιησούς βοηθιντάς ι τζενέν πρακτικά; (Ντικχέν ι φωτογραφία-ντα)

¹¹ Ο Ιησούς βοηθιντάς ι τζενέν κάνα σικλιαρντάς-λεν ι Ντεβλέσκε. Αλλά βοηθιντάς-λεν πρακτικέ-ντα τροπόντζαρ. Ντινάς-λεν χαμπέ ντα σοράν βακερντάς πι μαθητένγκε τι μοιράνεν-λες κο τζενέ. (Μάρκ. 6:41) Αντικάς, σικλιαρντάς πι μαθητέν σαρ τι υπηρετίνεν ι γιαβερέν. Σικαντάς λένγκε ότι ο πρακτικά μπουτιά​—σαρ οντουλά σο μπορεί τι κερέν ο διακονικοί υπηρέτες​—ισί σημαντικά. Σκεφτίνεν σο μπαρί χαρά λιντέ ο απόστολοι κάνα βοηθιντέ ι Ιησούς τι ντελ ο χαμπέ εκχέ θαυμάσαρ μέχρι σο «χαλέ σαρέ ντα τσαλιλέ»! (Μάρκ. 6:42) Ανταβά ισί σάντε εκ παράδειγμας σο σικαβέλα σαρ ο Ιησούς τσσουβέλας πο οπρέ ο ανάγκες ι γιαβερένγκε κατά ανάγκες σο τθερέλας βοβ.  Ανταβά κερέλας-λες σαρέ ο μπρεσά σο ισινέ κι πφουβ. (Ματθ. 4:23· 8:16) Αβέλας ι Ιησούσκο γκι ντα αρακχέλας μπαρί χαρά καζόμ σικλιαρέλας ι γιαβερέν ντα φροντίνελας ταπεινά λένγκε ανάγκες. Σίγουρα τουμέν-ντα κα αρακχέν μπαρί χαρά καζόμ ντένα σαρ διακονικοί υπηρέτες χωρίς τι ντικχέν τουμαρό συμφέρον.

12. Σόσκε δεν πρέπει καέκ αμένταρ τι νιωθίνελ ότι να τθερέλα κάτι τι ντελ κι κχανγκιρί;

¹² Άμα νιωθίνενα ότι να τθερένα εκ ξεχωριστή ικανότητα, μα χασαρέν τουμαρί ζορ. Σίγουρα τθερένα ιδιότητες σο μπορίνενα τι χρησιμοποιήνεν-λεν για τι βοηθίνεν ι κχανγκιρί. Μπορεί τι βοηθίνελ-τουμέν τι διαβάνεν με προσευχή ο λάφια ι Παυλόσκε κι 1 Κορινθίους 12:12-30. Ανταλά σο βακερέλα ο Παύλος σικαβένα τουμένγκε ξεκάθαρα ότι, σαρ αβέλα-πες σαρέ ι Ιεχωβάσκε υπηρετόντζαρ, αντικάς τουμέν-ντα ισινέν πολύτιμοι ντα τθερένα μπουτ πράγματα τι ντεν κι κχανγκιρί. Άμα ακανά να μπορίνενα τι υπηρετίνεν σαρ διακονικοί υπηρέτες επειδή χρειαζίντιβελα τι κερέν μπουτί σε κάποιες κατά ιδιότητες σο χρειαζίντιβενα, μα χασαρέν τουμαρό κουράγιος. Κερέν ο πο λατσσό σο μπορίνενα για τι υπηρετίνεν ι Ιεχωβάς ντα τι βοηθίνεν τουμαρέ πφραλέν. Τι αβέν σίγουροι ότι ο πρεσβύτεροι σκεφτίνενα-τουμέν ντα κα ντεν-τουμέν διορισμούς σο μπορίνενα τι κερέν-λεν.​—Ρωμ. 12:4-8.

13. Ο ιδιότητες σο πρέπει τι τθερέν ο διακονικοί υπηρέτες ισί σάντε ι διορισμέ πφραλένγκε; Εξηγίνεν.

¹³ Σκεφτίνεν ακαβά-ντα: Ο πο μπουτ κατά ιδιότητες σο βακερέλα η Αγία Γραφή ότι πρέπει τι τθερέν ο διακονικοί υπηρέτες ισί ιδιότητες σο πρέπει τι τθερέν σαρέ ο Χριστιανοί. Σαρέ ο Χριστιανοί πρέπει τι τζαν πασέ κο Ιεχωβά, τι νιωθίνεν ι χαρά σο αβέλα κάνα ντάσα ντα τι τζουβντιόν τροπόσαρ σο κερέλα ι Ντεβλέσκο γκι. Άρα, ήδη τθερένα ο πο μπουτ κατά ιδιότητες σο χρειαζίντιβενα ο διακονικοί υπηρέτες. Καλά συγκεκριμέ πράγματα πρέπει τι τθερέλ εκ πφραλ για τι αβέλ διακονικός υπηρέτης;

ΣΑΡ ΜΠΟΡΙΝΕΝΑ ΤΙ ΑΒΕΝ ΔΙΑΚΟΝΙΚΟΙ ΥΠΗΡΕΤΕΣ

14. Σο μανγκέλα τι βακερέλ «τι αβέν σοβαροί»; (1 Τιμόθεο 3:8-10, 12)

¹⁴ Για τι ντικχάς μερικές κατά ιδιότητες σο ισί κο εδάφια 1 Τιμόθεο 3:​8-10, 12. (Διαβάνεν) Ο διακονικοί υπηρέτες πρέπει «τι αβέν σοβαροί». Ανταβά μπορεί τι μεταφράντιβελ επίσης «αξίνενα τι λεν ι τιμή ντα ο σεβασμός κατά γιαβερά». Ανταβά να μανγκέλα τι βακερέλ ότι να κα ασάν ποτές ντα να κα κερέν σακάς. (Εκκλ. 3:1, 4) Όμως, πρέπει τι λεν σαρέ τουμαρέ ευθύνες κο  σοβαρά. Άμα πάντα κα μπιτισκιαρέν ο μπουτιά σο ντιντιόνα-τουμέν ντα κα κερέν-λεν λατσσές, ο πφραλά ντα ο πφενιά κι κχανγκιρί κα τζανέν ότι ισινέν μπεσαλήδες ντα κα σεβάνεν-τουμέν.

15. Σο μανγκέλα τι βακερέλ «μα τι αβέν ντουέ μουένγκε» ντα “μα τι μανγκέν τι κερδίνεν κάτι πφιρνικανές”;

¹⁵ Ο λάφι «μα τι αβέν ντουέ μουένγκε» μανγκέλα τι βακερέλ τι βακερέν ι αλήθεια ντα τι αβέν μπεσαλήδες. Ατσσικιαρένα τουμαρό λάφι ντα να χουχαβένα ι γιαβερέν. (Παρ. 3:32) Ο λάφι “να μανγκένα τι κερδίνεν κάτι πφιρνικανές” μανγκέλα τι βακερέλ ότι βακερένα ι αλήθεια κάνα συνεργαζίντιβενα γιαβερέντζαρ ντα ισινέν σωστοί κο τρόπος σο κερένα κουμάντος ο λοβέ. Να χρησιμοποιήνενα ο φιλίες σο τθερένα τουμαρέ πφραλέντζαρ κι κχανγκιρί για τι νικαβέν λοβέ.

16. (α) Σο μανγκέλα τι βακερέλ «μα τι πιν μπουτ μολ»; (β) Σο μανγκέλα τι βακερέλ τι τθερέλ εκ τζενό «πάκι συνείδηση»;

¹⁶ Ο λάφι «μα τι πιν μπουτ μολ» μανγκέλα τι βακερέλ ότι να νακχαβένα ο όρια κο πιπέ ούτε ντένα ι εντύπωση κο γιαβερά ότι κερένα-λες ανταβά. Ο λάφι «πάκι συνείδηση» μανγκέλα τι βακερέλ ότι τζουβντιόνα αντικάς σαρ βακερένα ο κανόνες ι Ιεχωβάσκε. Παρόλο σο να ισινέν τέλειοι τθερένα εκ λατσσί φιλία ι Ντεβλέσαρ ντα ανταβά ντέλα-τουμέν ειρήνη.

17. Σο μανγκέλα τι βακερέλ τι “τθερέλ κάποιος ο ικανότητες ντα ο ιδιότητες” σο χρειαζίντιβενα; (1 Τιμόθεο 3:10· ντικχέν ι φωτογραφία-ντα)

¹⁷ Ο λάφι «τθερένα ο ικανότητες ντα ο ιδιότητες» μανγκέλα τι βακερέλ ότι ήδη σικαντέν ότι κερένα τουμαρέ διορισμούς λατσσές ντα ότι ο γιαβερά μπορίνενα τι ντεν τουμένγκε μπέσα. Άρα κάνα ο πρεσβύτεροι ντένα-τουμέν εκ διορισμός κερέν προσεκτικά οντουλά σο βακερένα τουμένγκε ντα ο οδηγίες σο ντέλα η οργάνωση. Τι αβέν σίγουροι ότι αγαβένα σαρ πρέπει τι κερέν εκ διορισμός ντα κάνα πρέπει τι μπιτισκιαρέν-λες. Καζόμ κερένα ο κάθε διορισμός προσεκτικά ο γιαβερά κι κχανγκιρί κα ντικχέν ότι αβένα πο λατσσέ ντα μπεσαλήδες. Πρεσβύτεροι τθερέν τουμαρέ γκοντιάτε τι σικλιαρέν ι μπολντέ πφραλέν. (Διαβάνεν 1 Τιμόθεο 3:​10) Υπαρχίντιβενα μπολντέ πφραλά τουμαρέ κχανγκιριάτε σο ισί 10 μέχρι 14 μπρεσένγκε ή ατζέ-ντα πο τερνέ; Τθερένα εκ λατσσό πρόγραμμας για τι σικλιαρέν-πες κατά Γραφή; Ντένα απαντήσεις κο συναθροίσεις ντα νικιόνα κο έργος; Άμα βα ντεν-λεν διορισμούς σο μπορίνενα τι κερέν-λεν ντα ισί λένγκε ηλικιάκε. Αντικάς, ανταλά τερνέ πφραλά κα μπορίνεν τι “τθερέν ο ικανότητες ντα ο ιδιότητες” σο χρειαζίντιβενα ο διακονικοί υπηρέτες. Σοράν μπορεί τι αβέν έτοιμοι τι διορίντιβεν διακονικοί  υπηρέτες κάνα κα αβέν 17 μπρεσένγκε ντα πο μπαρέ.

18. Σο μανγκέλα τι βακερέλ ο λάφι «καέκ να κατηγοριντάς-λεν»;

¹⁸ Ο λάφι «καέκ να κατηγοριντάς-λεν» μανγκέλα τι βακερέλ ότι να υπαρχίντιβελα πραγματικός λόγος τι κατηγορίνελ-τουμέν κάποιος ότι κερντέν κάτι μπέτι. Ισί μπαγιά όμως ότι σαρέ ι Χριστιανόν μπορεί τι κατηγορίνεν-λεν σινανέ. Ι Ιησούς-ντα κατηγοριντέ-λες σινανέ ντα βοβ βακερντάς ότι ανταβά κα αβέλας-πες οντουλέντζαρ-ντα σο τζάνας παλά-λέστε. (Ιωάν. 15:20) Όμως άμα κα ατσσικιαρέν τουμαρί συμπεριφορά πάκι, σαρ κερντάς ο Ιησούς-ντα, κα τθερέν εκ λατσσό ναβ κι κχανγκιρί.​—Ματθ. 11:19.

19. Σο μανγκέλα τι βακερέλ «τι τθερέν σάντε εκχέ ρομνιά»;

¹⁹ «Τι τθερέν σάντε εκχέ ρομνιά». Κάνα ο Ιεχωβά κερντάς ο πρώτος μπιαβ βακερντάς ότι έπρεπε τι παντρίνεν εκ μουρς εκχέ τζουβλιάσαρ ντα ανταβά πρέπει τι ακολουθίνεν-λες σαρέ ο Χριστιανοί. (Ματθ. 19:3-9) Εκ Χριστιανός μουρς ποτές δεν πρέπει τι κερέλ λουμνιπέ. (Εβρ. 13:4) Αλλά νανέ σάντε ανταβά. Πρέπει τι ατσσόν αφοσιωμέ τουμαρέ ρομνιάτε ντα ποτές μα τι ντικχέν γιαβερέ τζουβλιά.​—Ιώβ 31:1.

20. Σαρ εκ μουρς φροντίνελα πι φαμιλί «λατσσέ τροπόσαρ»;

²⁰ “Τι κερέν κουμάντος τουμαρέ τσσαβέν ντα τουμαρό κχερ λατσσέ τροπόσαρ”. Άμα ισινέν σορό ι φαμιλιάκο λεν κο σοβαρά τουμαρέ ευθύνες. Μα χασαρέν τουμαρί φαμιλιάκι λατρεία. Νικιόν κο έργος ι κάθε τζενέσαρ κατά φαμιλί καζόμ πο μπουτ φαρ αβέλα-πες. Βοηθίνεν τουμαρέ τσσαβέν τι μπαριαρέν εκ φιλία ι Ιεχωβάσαρ. (Εφεσ. 6:4) Εκ μουρς σο φροντίνελα πι φαμιλί σικαβέλα ότι μπορίνελα τι φροντίνελ ι κχανγκιρί-ντα.​—Ντικχέν 1 Τιμόθεο 3:5.

21. Άμα να ισινέ ατζέκ διακονικοί υπηρέτες, σο μπορίνενα τι κερέν;

²¹ Πφραλάλεν, άμα να ισινέν ατζέ διακονικοί υπηρέτες, μολίνασα-τουμέν τι σκεφτίνεν με προσευχή ανταβά μάθημας. Ντικχέν προσεκτικά ο ιδιότητες σο χρειαζίντιβενα ο διακονικοί υπηρέτες ντα μαρέν-τουμέν για τι τθερέν-λεν. Σκεφτίνεν καζόμ μπουτ μανγκένα ι Ιεχωβάς ντα τουμαρέ πφραλέν ντα πφενίν. Μπαριαρέν τουμαρί αγάπη ι πφραλένγκε ντα ι πφενίνγκε ντα σκεφτίνεν σόσκε μανγκένα τι υπηρετίνεν-λεν. (1 Πέτρ. 4:8, 10) Κερέν ο πο λατσσό για τι αβέν διακονικοί υπηρέτες ντα κα τθερέν μπαρί χαρά καζόμ υπηρετίνενα τουμαρέ πφραλέν ντα πφενίν κι κχανγκιρί. Μακάρι ο Ιεχωβά τι ευλογίνελ τουμαρέ προσπάθειες τι αβέν διακονικοί υπηρέτες!​—Φιλιπ. 2:13.