1, 2. Καβά «λατσσό» έργος κερέλα εκ πρεσβύτερος;

 ΑΜΑ ισινέν ήδη διακονικοί υπηρέτες, μπέκιμ κερντέν μπαρί πρόοδος για τι τθερέν ο ιδιότητες σο χρειαζίντιβενα για τι υπηρετίνεν σαρ πρεσβύτεροι. Κα μανγκένας τι κερέν ανταβά “λατσσό [έργος]” σο κερένα ο πρεσβύτεροι;—1 Τιμ. 3:1.

² Καβά έργος κερέλα εκ πρεσβύτερος; Ο πρεσβύτερος ντέλα λατσσό παράδειγμας καζόμ μουτθαβέλα ο λατσσέ αμπέρια αντράλ πι γκίσταρ. Μαρέλα-πες για τι φροντίνελ ντα τι σικλιαρέλ ι πφραλέν ντα ι πφενίν, ντα βοηθίνελα-λεν τι μπαριαρέν πουμαρί πίστη κο Ιεχωβά οντουλέντζαρ σο βακερέλα ντα κερέλα. Ανταλέσκε, η Αγία Γραφή βακερέλα ότι ο πρεσβύτεροι ισί “τζενέ σαρ δώρα”.—Εφεσ. 4:8.

3. Σο μπορίνελα τι κερέλ εκ πφραλ για τι υπηρετίνελ σαρ πρεσβύτερος; (1 Τιμόθεο 3:1-7· Τίτο 1:5-9)

³ Σο μπορίνενα τι κερέν για τι υπηρετίνεν σαρ πρεσβύτεροι; Για τι λεν-αμέν σε εκ μπουτί χρειαζίντιβελα τι τζανάς λατσσές ο μπουτιά σο μανγκέλα αμένταρ ο αφεντικός. Αλλά, άμα μανγκένα τι αβέν πρεσβύτεροι, να ερεσέλα σάντε τι αβέν λατσσέ κο έργος ντα τι κερέν λατσσέ ομιλίες. Ανταβά σο χρειαζίντιβελα τι τθερέλ εκ πρεσβύτερος, ισί ο ιδιότητες σο βακερένα ο εδάφια 1 Τιμόθεο 3:1-7 ντα Τίτο 1:5-9. (Διαβάνεν) Ανταλέ μαθημάστε, κα ντικχάς καλά τριν πράγματα πρέπει τι τθερέν ο πρεσβύτεροι. Πρώτον, τι τθερέν εκ λατσσό ναβ εμ αντρέ εμ αβρί κατά κχανγκιρί. Δεύτερον, τι αβέν λατσσέ παραδείγματα σαρ σορέ ι φαμιλιάκε. Ντα τρίτον, τι αβέν πρόθυμοι τι βοηθίνεν ι κχανγκιρί.

ΤΘΕΡΕΝ ΛΑΤΣΣΟ ΝΑΒ

4. Σο μανγκέλα τι βακερέλ μα “τι κατηγορίνελ-τουμέν καέκ”;

⁴ Για τι υπηρετίνεν σαρ πρεσβύτεροι, δεν πρέπει “τι κατηγορίνελ-τουμέν καέκ”, δηλαδή τι τθερέν λατσσό ναβ αντρέ κι κχανγκιρί επειδή τουμαρί συμπεριφορά ισί ντιπ σωστή. Επίσης,  πρέπει τι τθερέν «λατσσό ναβ κο τζενέ αβρί». Οντουλά σο να υπηρετίνενα ι Ιεχωβάς δεν πρέπει τι τθερέν καέκ λόγος τι βακερέν ότι να ισινέν τίμια τζενέ ή ότι να τθερένα λατσσί συμπεριφορά. (Δαν. 6:4, 5) Πουτσέν-τουμέν: “Τθεράβα λατσσό ναβ εμ αντρέ εμ αβρί κατά κχανγκιρί;”

5. Σαρ μπορίνενα τι σικαβέν ότι ισινέν τζενέ σο “μανγκένα ο λατσσιπέ”;

⁵ Άμα ισινέν τζενέ σο “μανγκένα ο λατσσιπέ”, κα ρόντεν ο λατσσό κο γιαβερά ντα κα ισαρέν-λεν για το σουκάρ ιδιότητες σο τθερένα. Επίσης, κα κερέν λατσσέ πράγματα ι γιαβερένγκε, ατζέ-ντα άμα να ισινέν υποχρεωμέ τι κερέν-λεν. (1 Θεσ. 2:8) Σόσκε ισί αζόμ σημαντική ανταγιά ιδιότητα ι πρεσβυτερόνγκε; Επειδή ντένα μπουτ πουμαρέ σαατίσταρ για τι φροντίνεν πουμαρέ πφραλέν ντα πφενίν κι κχανγκιρί. (1 Πέτρ. 5:1-3) Παρ’ όλο σο μαρένα-πες για τι βοηθίνεν ι γιαβερέν, τθερένα μπαρί χαρά.​—Πράξ. 20:35.

6. Καλέ τροπόντζαρ σικαβένα ότι ισινέν “φιλόξενοι”; (Εβραίους 13:2, 16· ντικχέν ι φωτογραφία-ντα)

⁶ Σικαβένα ότι ισινέν “φιλόξενοι” κάνα κερένα λατσσέ πράγματα ι γιαβερένγκε, ατζέ-ντα οντουλένγκε σο να ισινέν λέντζαρ λατσσέ αμαλά. (1 Πέτρ. 4:9) Εκ λεξικός ι Γραφιάκο βακερέλα ότι ο τζενό σο ισί φιλόξενος σικαβέλα λατσσιπέ ατζέ-ντα κο τζενέ σο να τζανέλα ντα χαιρίνελα τι καλίνελ-λεν πι κχερέστε. Σκεφτίνεν: “Τζανένα-μαν ο γιαβερά σαρ εκ τζενό σο σικαβέλα φιλοξενία κο τζενέ σο αβένα μι κχανγκιριάτε;” (Διαβάνεν Εβραίους 13:2, 16) Ο φιλόξενος τζενό ντέλα οντουβά σο μπορίνελα κο γιαβερά. Για παράδειγμας, οντουλέντε σο ισί τσορορέ, οντουλέντε σο αβένα αμαρέ κχανγκιριάτε για τι κερέν ομιλίες ντα οντουλέντε σο μαρένα-πες μπουτ τι ντεν ζορ κο πφραλά ντα κο πφενιά, σαρ ο επίσκοποι περιοχής.​—Γέν. 18:2-8· Παρ. 3:27· Λουκ. 14:13, 14· Πράξ. 16:15· Ρωμ. 12:13.

7. Σαρ σικαβέλα εκ πρεσβύτερος ότι “να μανγκέλα μπουτ ο λοβέ”;

⁷ “Μα τι μανγκέν μπουτ ο λοβέ”. Ανταβά μανγκέλα τι βακερέλ ότι ο λοβέ ντα ο πράγματα σο τθερένα νανέ ο πο σημαντικά πράγματα λένγκε. Είτε ισινέν χουλανέ είτε τσορορέ, τσσουβένα πρώτα τουμαρέ ζωγιάτε ι Βασιλεία ι Ντεβλέσκι. (Ματθ. 6:33) Χρησιμοποιήνενα τουμαρό σαάτι, τουμαρί ζορ ντα γιαβερά-ντα πράγματα σο τθερένα για τι ντεν λατρεία κο Ιεχωβά, τι φροντίνεν τουμαρί φαμιλί ντα τι υπηρετίνεν τουμαρί κχανγκιρί. (Ματθ. 6:24· 1 Ιωάν. 2:15-17) Πουτσέν τουμαρό νεαυτός: “Σαρ ντικχάβα ο λοβέ; Ερεσένα-μαν ο βασικά πράγματα; Ή χάλα-μαν ανάγκη πο μπουτ τι νικαβάβ λοβέ ντα τι τθεράβ ατζέ πο μπουτ πράγματα;”​—1 Τιμ. 6:6, 17-19.

8. Καλά ισί μερικοί τρόποι σο σικαβένα ότι “να νακχαβένα ο όρια” ντα “ατσσικιαρένα τουμαρό νεαυτός”;

 ⁸ Άμα “να νακχαβένα ο όρια κο συνήθειες” ντα “ατσσικιαρένα τουμαρό νεαυτός”, ισινέν λογικοί σαρέ κο πράγματα τουμαρέ ζωγιάτε. Για παράδειγμας, να νακχαβάσα ο όρια κο χαμπέ, κο πιπέ, ή κάνα τραμπίνασα σο σέα κα ιριάς ή σαρ κα τσσινάς ή κα λατσσαράς αμαρέ μπαλά. Επίσης τραμπίνασα γκοντιάσαρ αμαρί διασκέδαση. Να τζουβντιόνα αντικάς σαρ τζουβντιόνα ο τζενέ σο να υπηρετίνενα ι Ιεχωβάς. (Λουκ. 21:34· Ιακ. 4:4) Ατσσόνα ήρεμοι ατζέ-ντα κάνα ο γιαβερά συμπεριφερίντιβενα τουμένγκε μπέτι τροπόσαρ. “Να ματιόνα” ούτε τζανένα-τουμέν ο γιαβερά σαρ τζενό σο πίλα μπουτ. Πουτσέν τουμαρό νεαυτός: “Σικαβέλα ο τρόπος σο τζουβντιάβα ότι να νακχαβάβα ο όρια ντα ατσσικιαράβα μο νεαυτός;”

9. Σο μανγκέλα τι βακερέλ τι αβάς «μετρημέ» ντα “τι τθεράς σε εκ σειρά αμαρί ζωή”;

⁹ Άμα ισινέν «μετρημέ», εξετάνενα προσεκτικά ο κάθε πράγμας σο νακχένα ντα ντικχένα καλά αρχές ι Γραφιάκε μπορίνενα τι βοηθίνεν-τουμέν. Ντικχένα προσεκτικά καλά συμβουλές ι Γραφιάκε ταιριάνενα με το πρόβλημα σο νακχένα. Αντικάς αγαβένα πο λατσσές ο πράγματα ντα λένα λατσσέ αποφάσεις. Κάνα τζανένα σάντε χάνικ πράγματα για εκ κατάσταση να σιγκιαρένα τι λεν απόφαση. Οκιά μπάνταρ, μανγκένα τι τζανέν σαρέ ο πράγματα σο χρειαζίντιβελα για τι λεν εκ απόφαση. (Παρ. 18:13) Αντικάς, λένα γκοντιαβέρ αποφάσεις σο σικαβένα ότι σκεφτίνενα αντικάς σαρ σκεφτίνελα ο Ιεχωβά. Άμα “τθερένα σε εκ σειρά τουμαρί ζωή”, ισινέν οργανωμέ ντα ατσσικιαρένα τουμαρό λάφι. Ο τζενέ τζανένα-τουμέν σαρ μπεσαλήδες τζενέ ντα σαρ τζενέ σο ακολουθίνενα ο οδηγίες. Ανταλά ιδιότητες κα βοηθίνεν-τουμέν τι τθερέν εκ λατσσό ναβ. Ακανά κα ντικχάς ο ιδιότητες σο βακερέλα η Γραφή ότι πρέπει τι τθερέλ εκ πρεσβύτερος για τι αβέλ λατσσό παράδειγμας σαρ σορό ι φαμιλιάκο.

ΤΙ ΑΒΕΝ ΛΑΤΣΣΕ ΠΑΡΑΔΕΙΓΜΑΤΑ ΣΑΡ ΣΟΡΕ Ι ΦΑΜΙΛΙΑΚΕ

10. Σαρ μπορίνελα εκ μουρς τι “κερέλ κουμάντος πι κχερέστε λατσσέ τροπόσαρ”;

¹⁰ Άμα ισινέν παντριμέ ντα μανγκένα τι υπηρετίνεν σαρ πρεσβύτεροι, ο ναβ τουμαρέ φαμιλιάκο κα επηρεάνελ ανταγιά υπηρεσία. Άρα, χρειαζίντιβελα τι αβέν “μουρσά σο κερένα κουμάντος πουμαρέ κχερέστε λατσσέ τροπόσαρ”. Χρειαζίντιβελα τι φροντίνεν με αγάπη τουμαρί φαμιλί ντα τι λεν λατσσέ αποφάσεις λάκε. Ανταβά μανγκέλα τι βακερέλ ότι πρέπει τι κερέν τουμαρί φαμιλιάκι λατρεία τι τζαν κο συναθροίσεις ντα κο έργος γιεκ. Σόσκε ισί αζόμ σημαντικός ανταβά; Ο απόστολος Παύλος βακερντάς: «Άμα εκ τζενό να τζανέλα σαρ τι κερέλ κουμάντος πι κχερέστε, σαρ κα φροντίνελ ι κχανγκιρί ι Ντεβλέσκι;»​—1 Τιμ. 3:5.

11, 12. Σόσκε η συμπεριφορά ι τσσαβένγκι ισί σημαντική άμα εκ ντατ μανγκέλα τι αβέλ πρεσβύτερος; (Ντικχέν ι φωτογραφία-ντα)

¹¹ Άμα ισινέν νταντά, ντα τθερένα τσσαβέν πρέπει “τουμαρέ τσσαβέ τι ντεν-τουμέν καν ντα τι συμπεριφερίντιβεν λατσσές”. Χρειαζίντιβελα τι σικλιαρέν-λεν ντα τι διορθώνελ-λεν με αγάπη. Σίγουρα, κα μπεϊντίνεν τι ασάν ντα τι κχελέν σαρ ο γιαβερά-ντα χουρντέ. Αλλά επειδή σικλιαρντέν-λεν λατσσές, κα ντεν-τουμέν καν, κα σικαβέν σεβασμός ντα κα συμπεριφερίντιβεν λατσσές. Επίσης, πρέπει τι κερέν ο πο λατσσό σο μπορίνενα για τι βοηθίνεν τουμαρέ τσσαβέν τι τθερέν λατσσί σχέση ι Ιεχωβάσαρ, τι τζουβντιόν σαρ βακερέλα η Γραφή ντα τι τθερέν στόχος τι ερεσέν κο μπολντιπέ.

¹² “Τθερένα πιστέ τσσαβέν σο να κατηγορίντιβενα ότι κερένα μπέτι πράγματα ή ότι τζάνα κόντρα”. Άμα εκ κατά τσσαβέ κερντάς εκ σοβαρή αμαρτία, σαρ κα επηρεάνελ ανταβά λέσκε νταντές; Άμα ο ντατ να κερντάς ο πο λατσσό για τι σικλιαρέλ ντα τι διορθώνελ πι τσσαβές μπέκιμ να κα μπορίνελ τι υπηρετίνελ σαρ πρεσβύτερος.​—Ντικχέν Σκοπιά 15 Οκτωβρίου 1996, σελ. 21, παρ. 6, 7.

 ΤΙ ΥΠΗΡΕΤΙΝΕΝ Ι ΚΧΑΝΓΚΙΡΙ

13. Σαρ μπορίνενα τι αβέν “λογικοί”, “όχι πφαρέ σορέσκε”;

¹³ Ο πφραλά σο σικαβένα σουκάρ Χριστιανικές ιδιότητες βοηθίνενα μπουτ ι κχανγκιρί. Ο «λογικός» τζενό τθερέλα ειρήνη ι γιαβερέντζαρ ντα βοηθίνελα ι γιαβερέν-ντα τι κερέν ειρήνη ο εκ ι γιαβερέσαρ. Επίσης εκ λογικός τζενό ασουνέλα ι γιαβερέν ντα προσπαθίνελα τι αγαβέλ ο τρόπος σο σκεφτίνενα βον. Για παράδειγμας, άμα ο πο μπουτ πρεσβύτεροι μανγκένα τι λεν εκ απόφαση σο να τζάλα κόντρα κι Γραφή, κα υποστηρίνενας τουμέν ανταγιά απόφαση ατζέ-ντα άμα να συμφωνίνενα; “Όχι πφαρέ σορέσκε” μανγκέλα τι βακερέλ ότι να επιμίνενα τι αβέν ο πράγματα αντικάς σαρ μανγκένα. Αγαβένα καζόμ σημαντικός ισί τι ασουνέν ι άποψη ι γιαβερένγκι. (Γέν. 13:8, 9· Παρ. 15:22) “Να ισινέν καβγατζίδες” ούτε “χολιάνενα εύκολα”. Ανταβά μανγκέλα τι βακερέλ ότι σικαβένα σεβασμός ντα λατσσιπέ κο γιαβερά ατζέ-ντα κάνα να συμφωνίνενα λέντζαρ. Σαρ ειρηνικά τζενέ, κερένα πρώτα τουμέν ειρήνη, ατζέ-ντα κάνα υπαρχίντιβενα νεύρα. (Ιακ. 3:17, 18) Κερένα λάφι λατσσιμάσαρ κο γιαβερά ντα ανταβά βοηθίνελα-λεν τι ατσσόν ήρεμοι, ατζέ-ντα ι τζενέν σο τζάνα αμέντζαρ κόντρα ιτιρί οντουλένταρ σο πακιάσα.​—Κριτ. 8:1-3· Παρ. 20:3· 25:15· Ματθ. 5:23, 24.

14. Σο μανγκέλα τι βακερέλ ότι “νανέ νεβό κι αλήθεια” ντα ότι ισί «αφοσιωμέ»;

¹⁴ Εκ πφραλ μπορίνελα τι αβέλ πρεσβύτερος άμα “νανέ νεβό κι αλήθεια”. Παρόλο σο να χρειαζίντιβελα τι αβέν μπολντέ μπουτ μπρεσά, χρειαζίντιβελα χρόνος για τι αβέν ώριμοι Χριστιανοί. Πριν τι αβέν πρεσβύτεροι, πρέπει τι σικαβέν σαρ ο Ιησούς ότι ισινέν ταπεινοί ντα έτοιμοι τι δεχτίνεν σο-ντα διορισμός κα ντελ-τουμέν ο Ιεχωβά. (Ματθ. 20:23· Φιλιπ. 2:5-8) Μπορίνενα τι σικαβέν ότι ισινέν «αφοσιωμέ» κάνα ατσσόνα πασέ κο Ιεχωβά ντα ντένα καν κο δίκαιοι κανόνες λέσκε. Επίσης σικαβένα ότι ισινέν αφοσιωμέ κάνα ακολουθίνενα ο οδηγίες σο ντέλα-αμέν λέσκι οργάνωση.​—1 Τιμ. 4:15.

15. Χρειαζίντιβελα εκ πρεσβύτερος τι αβέλ τέλειος ομιλητής; Εξηγίνεν.

¹⁵ Η Γραφή βακερέλα ξεκάθαρα ότι εκ επίσκοπος πρέπει τι τθερέλ «ο ικανότητες ντα ο ιδιότητες τι σικλιαρέλ». Μήπως μανγκέλα τι βακερέλ  ανταβά ότι πρέπει τι κερέν ντιπ λατσσέ ομιλίες; Νάα. Υπαρχίντιβενα μπουτ λατσσέ πρεσβύτεροι, σο νανέ ο πο λατσσέ ομιλητές. Όμως, κάνα νικιόνα κο έργος ντα κάνα κερένα ποιμαντικές επισκέψεις, ο πρεσβύτεροι χρειαζίντιβελα τι μπορίνεν τι χρησιμοποιήνεν ι Γραφή λατσσές για τι σικλιαρέν ντα τι ντεν ζορ κο πφραλά ντα κο πφενιά. (Ντικχέν 1 Κορινθίους 12:28, 29 ντα Εφεσίους 4:11) Παρόλο σο να χρειαζίντιβελα τι αβέν τέλειοι ομιλητές, χρειαζίντιβελα τι μαρέν-τουμέν τι σικλιαρέν πο λατσσές. Σαρ κα καταφερίνεν-λες ανταβά;

16. Σαρ μπορίνενα τι σικλιαρέν πο λατσσές; (Ντικχέν ι φωτογραφία-ντα)

¹⁶ «Τι ασταρέλ ζουρανές ο πιστός λάφι». Για τι σικλιαρέν πο λατσσές, πρέπει οντουλά σο σικλιαρένα ντα ο συμβουλές σο ντένα τι βασίντιβεν κι Αγία Γραφή. Για τι κερέν-λες ανταβά, χρειαζίντιβελα τι διαβάνεν λατσσές ι Γραφή ντα ο έντυπα σο νικαβέλα αμαρί οργάνωση. (Παρ. 15:28· 16:23) Κάνα διαβάνενα, τι ντικχέν προσεκτικά σαρ εξηγίνενα αμαρέ έντυπα ο εδάφια ι Γραφιάκε για τι εξηγίνεν-λεν τουμέν-ντα ι σωστέ τροπόσαρ. Ντα κάνα σικλιαρένα, τι προσπαθίνεν τι βοηθίνεν ι τζενέν τι μανγκέν ι Ιεχωβάς ατζέ πο μπουτ ντα τι κερέν οντουλά σο σικλιόνα. Μπορίνενα τι σικλιαρέν πο λατσσές κάνα μανγκένα συμβουλές γιαβερέ έμπειρε πρεσβυτερόνταρ ντα σοράν κερένα-λεν. (1 Τιμ. 5:17) Ο πρεσβύτερος χρειαζίντιβελα τι «μπορίνελ . . . τι ντελ ζορ» πι πφραλέντε ντα πι πφενίντε. Όμως, μπάζιμα πρέπει τι βοηθίνελ-λεν τι σκεφτίνεν πο σωστά ή ατζέ-ντα τι “διορθώνελ-λεν”. Όμως σαρ-ντα τι αβέλ-πες, ο πρεσβύτεροι πρέπει πάντα τι σικαβέν λατσσιπέ. Άμα ισινέν ήρεμοι ντα σικαβένα αγάπη ντα στηρίνενα τουμαρέ λάφια κο Λάφι κι Ντεβλέσκο, κα τθερέν λατσσέ αποτελέσματα επειδή κα μοιάζεν κο Μπαρό Δάσκαλος, κο Ιησούς.​—Ματθ. 11:28-30· 2 Τιμ. 2:24.

ΣΥΝΕΧΙΝΕΝ ΤΙ ΚΕΡΕΝ ΠΡΟΟΔΟΣ

17. (α) Σο μπορίνελα τι βοηθίνελ ι διακονικέ υπηρετόν τι συνεχίνεν τι κερέν πρόοδος; (β) Σο δεν πρέπει τι μπιστρέν ο πρεσβύτεροι κάνα σκεφτίνενα άμα κα διορίνεν εκχέ πφραλές σαρ πρεσβύτερος; (Ντικχέν ο πλαίσιος « Τι Αβέν Λογικοί Κάνα Συζητίνενα άμα εκ Πφραλ Μπορίνελα τι Υπηρετίνελ σαρ Πρεσβύτερος»)

¹⁷ Μερικοί διακονικοί υπηρέτες μπορεί τι νιωθίνενα ότι ποτές να κα μπορίνεν τι αβέν πρεσβύτεροι, επειδή χρειαζίντιβενα τι κερέν μπουτ μπουτί ανταλέσκε. Αλλά τι ντεν-τουμέν γκοντί  ότι ούτε ο Ιεχωβά ούτε η οργάνωση λέσκι μανγκέλα τουμένταρ τι σικαβέν τέλεια ανταλά ιδιότητες. (1 Πέτρ. 2:21) Επίσης, ο ζουρανό πνεύμας ι Ιεχωβάσκο ισί οντουβά σο κα βοηθίνελ-τουμέν τι μπαριαρέν ανταλά ιδιότητες. (Φιλιπ. 2:13) Υπαρχίντιβελα καέκ ιδιότητα σο κα μανγκένας τι μπαριαρέν-λα ατζέ πο μπουτ; Κερέν προσευχή κο Ιεχωβά, ρόντεν ανταλέσκε ντα μανγκέν συμβουλές από εκ πρεσβύτερος για τι πετυχίνεν-λες ανταβά.

18. Καβά πράγμας ισί λατσσό τι κερέν σαρέ ο διακονικοί υπηρέτες;

¹⁸ Τι συνεχίνας σαρέ, ατζέ-ντα οντουλά σο ισί ήδη πρεσβύτεροι, τι μπαριαράς ο ιδιότητες σο ντικχλάμ κο μάθημας ανταβά. (Φιλιπ. 3:16) Ισινέν διακονικός υπηρέτης; Συνεχίνεν τι κερέν πρόοδος! Μανγκέν κατά Ιεχωβά τι σικλιαρέλ-τουμέν για τι αβέν ατζέ πο χρήσιμοι καζόμ υπηρετίνενα εμ Λες εμ ι κχανγκιρί. (Ησ. 64:8) Μακάρι ο Ιεχωβά τι ευλογίνελ ο προσπάθειες σο κα κερέν για τι μπορίνεν τι τθερέν ο ιδιότητες ντα ο ικανότητες σο χρειαζίντιβενα για τι αβέν πρεσβύτεροι.