ΜΗΠΩΣ ισί δύσκολος τουμένγκε τι σικλιαρέν-τουμέν κατά Γραφή μπουτ φαρ; Μήπως νιωθίνενα ότι ισί βαρετός τι σικλιαρέν-τουμέν; Σαρέ μπέκιμ νιωθίνασα αντικάς μπάζιμα. Σκεφτίνεν όμως γιαβερά πράγματα σο κεράσα μπουτ φαρ, σαρ ισί τι κεράς μπάνιος. Μανγκέλα σαάτι ντα προσπάθεια για τι τθοβάς-αμέν, αλλά σοράν ανταλέσταρ νιωθίνασα μπουτ πο λατσσές! Κάτι ασακό αβέλα-πες κάνα σικλιαράσα-αμέν κατά Γραφή. Ισί σαρ “τι τθοβάς-αμέν πανίσαρ αντράλ κατά λάφι ι Ντεβλέσκο”. (Εφεσ. 5:​26) Ντικχέν μερικές συμβουλές σο μπορίνενα τι βοηθίνεν-τουμέν:

• Κερέν πρόγραμμας. Ο σικλιαριπέ κατά Γραφή ισί εκ κατά «πο σημαντικά πράγματα» σο πρέπει τι κερέλ εκ Χριστιανός. (Φιλιπ. 1:​10) Κάτι σο μπέκιμ τι βοηθίνελ-τουμέν τι ατσσικιαρέν τουμαρό πρόγραμμας ισί τι γραφίνεν-λες σε εκ χαρτίς ντα τι τσσουβέν-λες σε εκ τθαν σο κα ντικχέν-λες εύκολα, σαρ ισί εκ πίνακας ή κι πόρτα κι ψυγειόσκι. Ή μπορίνενα τι τσσουβέν υπενθύμιση τουμαρέ κινητόστε για τι ντεν-τουμέν γκοντί κάνα ισί τι διαβάνεν.

• Τραμπίνεν ο σαάτι ντα ο τρόπος σο ισί πο λατσσό τουμένγκε. Σο ισί πο εύκολος τουμένγκε; Ισινέν πο συγκεντρωμέ άμα κα διαβάνεν εκ σαάτι ή άμα κα διαβάνεν πο μπουτ φαρ για πο χάνικ σαάτι; Τουμέν τζανένα πο λατσσές σο μπορίνενα τι κερέν. Τι τραμπίνεν ο σαάτι ντα ο τρόπος σο ισί πο λατσσό τουμένγκε. Άμα να τθερένα μπουτ όρεξη κάνα αβέλα ο σαάτι τι σικλιαρέν-τουμέν, προσπαθίνεν τι διαβάνεν σάντε για ντες λεπτά. Ατζέ-ντα άμα κα σικλιαρέν-τουμέν σάντε για ντες λεπτά, μπορίνενα τι σικλιόν μπουτ πράγματα. Ντα άμα κα αρχίνεν τι διαβάνεν, μπέκιμ τι μανγκέν τι συνεχίνεν χάνικ ατζέκ.​—Φιλιπ. 2:13.

• Τραμπίνεν πο τζανγκλέ ο θέματα σο μανγκένα τι διαβάνεν. Άμα ρόντενα σο κα διαβάνεν κο σαάτι σο μπεσένα για τι σικλιαρέν-τουμέν, μπέκιμ να “χρησιμοποιήνενα τουμαρό χρόνος καζόμ πο λατσσές αβέλα-πες”. (Εφεσ. 5:​16) Δοκιμάνεν τι γραφίνεν σαρέ ο θέματα σο κα μανγκένας τι διαβάνεν. Κάνα αβέλα τουμαρέ γκοντιάτε εκ ερώτηση, τι γραφίνεν-λα. Ντα κάθε φαρ σο σικλιαρένα-τουμέν, κο τέλος κα μπορίνενας τι γραφίνεν γιαβερά-ντα θέματα σο κα μανγκένας τι διαβάνεν.

• Κερέν αλλαγές κάνα χρειαζίντιβελα. Τι αβέν έτοιμοι τι κερέν αλλαγές κο πρόγραμμας τουμαρό. Για παράδειγμας κα μπορίνενας τι αλλάνεν ο θέματα σο διαβάνενα ή καζόμ σαάτι σικλιαρένα-τουμέν. Να τθερέλα σημασία κάνα διαβάνενα, καζόμ σαάτι διαβάνενα ή σο διαβάνενα αλλά ο σημαντικός ισί τι κερέν-λες ανταβά κάθε εβδομάδα.

Βοηθίντιβασα μπουτ κάνα τθεράσα εκ πρόγραμμας για τι σικλιαράς-αμέν μπουτ φαρ. Αβάσα πο λατσσέ αμαλά ι Ιεχωβάσαρ, σικλιάσα τι λας γκοντιαβέρ αποφάσεις ντα λάσα ζορ.​—Ιησ. Ναυή 1:8.