ΜΠΙΑΝΤΙΛΟΜ κο Χέμσγουορθ κο 1923, σε εκ πόλη κο Γιόρκσερ, κι Αγγλία. Τθεράβας εκχέ πιο μπαρέ πφραλές, τον Μπομπ. Όταν ισινόμας εννιά μπρεσένγκι, μο ντατ λιντάς μερικά βιβλία σο εξηγίνενας σαρ η ψεύτικη θρησκεία χουχαντάς ι τζενέν. Κερντέ λέσκε μπαρί εντύπωση οντουλά σο διαβαντάς. Βοβ να μπεϊντίνελας σο ο παπάζια γιαβέρ σικλιαρένας ντα γιαβέρ κερένας. Χάνικ μπρεσά πιο σοράν, ο Μπομπ Άτκινσον αβιλό αμαρέ κχερέστε ντα τσσουντάς αμένγκε τι ασουνάς εκ ομιλία σο κερντάς ο πφραλ Ρόδερφορντ. Αγαντάμ ότι οντουλά σο ασουνάας ισινέ κατά ίδια τζενέ σο ντινέας μι νταντέστε ο βιβλία σο διαβαντάας. Μο ντατ ντα μι ντάι βακερντέ κο πφραλ Άτκινσον τι χαλ αμέντζαρ κάθε ιράτ ντα τι απαντίνελ αμαρέ μπουτέ ερωτησιέντε σο τθερένας τι κερέν ι Γραφιάσαρ. Βακερντάς αμένγκε τι τζας κο συναθροίσεις σο αβένας-πες κο κχερ εκχέ πφραλέσκο χάνικ χιλιόμετρα πιο ντουρ. Αρχισάλαμ τι τζας κο συναθροίσεις, ντα αβιλί-πες εκ χουρντί εκκλησία κο Χέμσγουορθ. Χάνικ πιο σοράν, αρχισάλαμ τι φιλοξενίνας πφραλέν σο ισινέ υπηρέτες ζώνης (ακανά βακέρντιβενα επίσκοποι περιοχής) ντα επίσης τι καλίνας χαμάσκε σκαπανείς κατά γιαβερά εκκλησίες. Οντουλά πφραλά ντα πφενιά ισινέ εκ μπουτ λατσσό παράδειγμας μάνγκε.

Οντιά εποχή, αμαρί φαμιλί πουταρντάας εκ επιχείρηση. Αλλά μο ντατ βακερντάς μι πφραλέσκε: «Άμα μανγκέσα τι κερές σκαπανικός, μουκχάσα-λεν ανταλά». Ο Μπομπ συμφωνιντάς ντα νασλό κατά κχερ για τι κερέλ σκαπανικός όταν ισινέ 21 μπρεσένγκο. Ντούι μπρες πιο σοράν, όταν ισινόμας 16 μπρεσένγκι, αβιλόμ με-ντα σκαπάνισσα. Ο σαββατοκύριακα νικιάβας κο έργος γιαβερέντζαρ, ο γιαβερά ντιβεσά όμως συνήθως νικιάβας κορκορί. Χρησιμοποιήναβας εκ φωνογράφος ντα εκ κάρτα μαρτυρίας, δηλαδή εκ χουρντί κάρτα σο βακερέλας χάνικ λαφίντζαρ εκ απλή σκέψη αντράλ κατά Γραφή. Ο Ιεχωβά ευλογιντάς-μαν, ντα αρχισάλομ τι κεράβ μελέτη κατά Γραφή εκχέ τζουβλιά σο κερντάς μπουτ λατσσί πρόοδος. Μάλιστα, μπουτ τζενέ λάκε φαμιλιάταρ τελικά γνωριντέ ι αλήθεια. Ο γιαβέρ μπρες, διορισάλομ ειδική σκαπάνισσα γιεκ με την Μαίρη Χένσαλ. Μπουτσσάντιλαμ κο Τσέσερ, εκχέ τθανέστε σο να ισινέ πφραλά για τι κερέν ο έργος.

Αζομάν ήδη αρχισάλοας ο Δεύτερος Παγκόσμιος Πόλεμος, ντα ο τζουβλιά έπρεπε τι κερέν μπουτί για τι υποστηρίνεν ο τζένγκι. Κο γιαβερά θρησκείες ο κράτος  να μανγκέλας κατά τζενέ σο τθερένας υπεύθυνη θέση τι τζαν κο τζένγκι, ντα πακιάας ότι αμέν-ντα σαρ ειδικοί σκαπανείς να κα τθεράας καέκ πρόβλημας. Ο δικαστές όμως τθερένας διαφορετική άποψη, ντα οτθάρ τσσουντέ-μαν φυλακή για 31 ντιβεσά. Εκ μπρες πιο σοράν, όταν πφαντόμ ο 19, γκερντέ-μαν κο δικαστήριος ατζέ ντούι φαρ επειδή μι συνείδηση να μουκχέλας-μαν τι υποστηρίναβ ο τζένγκι. Όμως, ο ντούι-ντα φαρ μουκχλέ-μαν ελεύθερη. Σαρέ ανταλέντε σο νακχλόμ, τζανάβας ότι ο άγιος πνεύμας βοηθίνελας-μαν ντα ότι ο Ιεχωβά στηρίνελας-μαν ντα ντέλας-μαν ζορ.​—Ησαΐας 41:​10, 13.

Κο 1946, γνωριντόμ τον Άρθουρ Μάθιουζ. Ο Άρθουρ κερντάας τριν μάσεκ φυλακή επειδή να μανγκλάας τι τζαλ κο τζένγκι. Μόλις νικίστιλο κατά φυλακή, γκιλό πι πφραλέστε, κο Ντένις, σο υπηρετίνελας σαρ ειδικός σκαπανέας κο Χέμσγουορθ. Λένγκο ντατ σικλιαρντάας-λεν χουρντιαρέλα ι Ιεχωβάσκε, ντα μπολντιλέας όταν ισινέ τερνέ. Χάνικ καιρός αφού αρχισάλεας τι κερέν μαζί σκαπανικός, ο Ντένις διορισάλο κι Ιρλανδία. Οντουλέσκε ο Άρθουρ ατσσιλό χωρίς συνεργάτης. Κερντάς μπαρί εντύπωση μι νταντέσκε ντα μι νταγιάκε η συμπεριφορά σο τθερέλας οντουβά λατσσό σκαπανέας. Οτθάρ, βακερντέ λέσκε τι μπεσέλ λέντζαρ. Όταν τζάβας τι ντικχάβ-λεν, ο Άρθουρ ντα με τθοβάας ο τσαρέ μετά κατά χαμπέ. Τελικά, αρχισάλαμ τι μπουτσσαβάς γράμματα ο εκ ι γιαβερέσκε. Κο 1948, τσσουντέ πάλι τον Άρθουρ φυλακή για τριν μάσεκ. Κο 1949, τον Ιανουάριο παντρισάλαμ, ντα αμαρό στόχος ισινέ τι ατσσάς κι ολοχρόνια υπηρεσία καζόμ πιο μπουτ αβέλας-πες. Προσοχίναας μπουτ καζόμ λοβέ χαλαβάας, ενώ όταν τζάας διακοπές γκίνταας φρούτα για τι νικαβάς χάνικ λοβέ. Με την ευλογία ι Ιεχωβάσκι, μπορισάλαμ τι συνεχίνας ο σκαπανικός.

Αφού νακχλό χάνικ πιο μπουτ από εκ μπρες, διορισάλαμ κι Βόρεια Ιρλανδία, πρώτα κο Αρμά ντα σοράν κο Νιούρι, σε ντούι πόλεις σο ο πιο μπουτ τζενέ ισινέ Καθολικοί. Ο τζενέ σο μπεσένας οτθέ τθερένας μπέτι άποψη ι γιαβερέ θρησκειένγκε, οτθάρ έπρεπε τι αβάς μπουτ προσεκτικοί ντα τι σκεφτίνας λατσσές κάνα ντα σαρ κα κεράας λάφι κο τζενέ. Ο συναθροίσεις αβένας-πες κο κχερ εκχέ πφραλέσκο ντα εκχέ πφενιάκο, σο ισινέ 16 χιλιόμετρα πιο ντουρ οτθάρ σο μπεσάας. Παρακολουθίνενας ο συναθροίσεις περίπου οχτώ τζενέ. Μερικές φορές να νασάας αρατί αλλά μπεσάας οτθέ. Σοβάας τελέ ντα πρωί απολαμβάναας εκ λατσσό πρωινός. Χαιρίναβα μπουτ σο ακανά υπαρχίντιβενα μπερεκέτι Μάρτυρες οντουλέ περιοχιάτε.

Μο πφραλ πι ρομνιάσαρ, με τη Λότι, υπηρετίνενας ήδη σαρ ειδικοί σκαπανείς κι Βόρεια Ιρλανδία, ντα κο 1952 αμέν ο σταρ παρακολουθιντάμ εκ συνέλευση περιφερείας κο Μπέλφαστ. Εκ πφραλ μανγκλάς τι μπεσάς λέστε, οτθάρ ο σταρ-ντα μπεσλάμ λέσκε κχερέστε γιεκ με τον Πράις Χιουζ, σο αζομάν βοβ ισινέ υπηρέτης τμήματος κι Βρετανία. Εκ ιράτ κεράας λάφι ι νεβέ βιβλιαριόσκε, Η Οδός του Θεού Είναι Αγάπη, σο ισί κερντό οντουλένγκε σο ισί κατά Ιρλανδία. Ο πφραλ Χιουζ βακερέλας καζόμ δύσκολος ισινέ τι πλησιάνας ι Καθολικόν κι Ιρλανδία. Ο πφραλά αναγκασάλε τι νασέν οτθάρ σο μπεσένας ντα ο παπάζια βακερένας κο τζενέ τι τζαν κόντρα ι πφραλέντζαρ. Ο Πράις βακερντάς: «Χρειαζίντιβασα αντρόγυνα σο τθερένα αυτοκίνητος για τι μπορίνεν τι αβέν κι εκστρατεία σο κα κεράς για τι ντας ο βιβλιάριος σαρό κο τθεμ». * (Ντικχ ι υποσημείωση) Αζομάν ισινέ σο βακερντάμ: «Κα τζας αμέν!»

 Εκ τθαν κο Δουβλίνος σο πάντα μπορίνενας τι μπεσέν ο σκαπανείς ισινέ ο κχερ εκχέ πιστέ πφενιάκο σο υπηρετίνελας ι Ιεχωβάς μπουτ μπρεσά ντα ντένας-λα βίκος «Ντάι» Ρούτλαντ επειδή λένγκε ισινέ σαρ ντάι. Αμέν-ντα μπεσλάμ οτθέ για χάνικ καιρός ντα μπικιντάμ μερικά πράγματα σο τθεράας. Σοράν, τσσουντάμ-αμέν ο σταρ-ντα κι μοτοσικλέτα του Μπομπ σο ενώντιβελας με εκ κουβούκλιος ντα αρχισάλαμ τι ρόντας για αυτοκίνητος. Αρακχλάμ εκ μεταχειρισμέ σο ισινέ σε λατσσί κατάσταση ντα μανγκλάμ οντουλέσταρ σο μπικινέλας-λες τι ανέλ-λες αμένγκε βοβ, επειδή καέκ αμένταρ να τζανέλας τι οδηγίνελ. Ο Άρθουρ σαρό οντουβά απόγευμας μπεσέλας κο κρεβάτι ντα κερέλας ότι αλλάνελας ταχύτητες. Ο γιαβέρ ντιβές, ενώ προσπαθίνελας τι νικαβέλ ο αυτοκίνητος κατά γκαράζ, αβιλί η ιεραπόστολος Μίλντρεντ Γουίλετ (σο μετά παντρισάλι τον Τζον Μπαρ). Βόι τζανέλας τι οδηγίνελ! Βοηθιντάς-αμέν τι σικλιάς τι οδηγίνας, ντα ισινάμας έτοιμοι τι ξεκινίνας.

Ο γιαβέρ πράγμας σο μανγκάας ισινέ εκ τθαν για τι μπεσάς. Ο πφραλά βακερντέ αμένγκε ότι κα αβέλας λατσσό μα τι μπεσάς σε τροχόσπιτος σόσκε οντουλά σο τζάνας αμέντζαρ κόντρα μπορεί τι τσσουβένας-λες γιακ. Οτθάρ, ροντιντάμ τι αρακχάς εκ κχερ αλλά να μπορισάλαμ. Οντιά ιράτ σοτάμ ο σταρ-ντα κο αυτοκίνητος. Ο γιαβέρ ντιβές, οντουβά σο μπορισάλαμ τι αρακχάς ισινέ εκ χουρντό τροχόσπιτος σο τθερέλας ντούι χουρντέ κρεβάτια σο ισινέ οπράλ γιαβερέστε. Ανταβά αβιλό αμαρό κχερ. Κερντάς αμένγκε μπαρί εντύπωση, σο μουκχλέ-αμέν κάποια τζενέ σο ισινέ φιλικοί τι τσσουβάς ο τροχόσπιτος λένγκε χωραφίντε. Τζάας σε τομέας σο ισινέ 16 με 24 χιλιόμετρα πιο ντουρ οτθάρ σο μουκχάας ο τροχόσπιτος. Σοράν, γκεράας ο τροχόσπιτος σε γιαβέρ περιοχή ντα βουρτίναας οτθέ σο ισινέ πριν για τι βακεράς ο λατσσέ αμπέρια οντουλέ τζενένγκε σο μπεσένας οντουλέ περιοχιάτε.

Γκιλάμας σαρέ κο κχερά σο ισινέ κι νοτιοανατολική Ιρλανδία χωρίς τι τθεράς μπουτ δυσκολίες. Ντινάμ πιο μπουτ από 20.000 βιβλιάρια ντα μπουτσσαντάμ κο γραφείος τμήματος κι Βρετανία οντουλένγκε ναβά σο σικαντέ ενδιαφέρον. Σο μπαρί ευλογία ισί τι τθεράς ακανά εκατοντάδες Μαρτυρέν κι Ιρλανδία!

Αφού νακχλέ μερικά μπρεσά, διορισάλαμ κο νότιος Λονδίνος. Μετά από χάνικ εβδομάδες, ο πφραλά σο ισινέ κο γραφείος τμήματος κι Βρετανία λιντέ τηλέφωνος τον Άρθουρ ντα μανγκλέ λέσταρ τι αρχίνελ ο έργος περιοχής ο γιαβέρ ντιβές! Λιντάμ εκπαίδευση εκ εβδομάδα, ντα σοράν γκιλάμ οτθέ σο διορισάλαμ, κι Σκωτία. Ο Άρθουρ να τθερέλας μπουτ χρόνος τι ετοιμάνελ πο ομιλίες, αλλά μανγκέλας αντράλ πι γκίσταρ τι κερέλ πάντα σο-ντα διορισμός τθερέλας κι υπηρεσία κι Ντεβλέσκι, καζόμ-ντα δύσκολος τι αβέλας. Λέσκο παράδειγμας βοηθιντάς-μαν μπουτ. Ο διορισμός σο τθεράας κο έργος περιοχής μπεϊντίναας-λες μπουτ. Ισινάμας για μερικά μπρεσά εκχέ τθανέστε σο να ισινέ πφραλά για τι κερέν ο έργος, ντα ακανά η παρέα αζόμ μπουτέ πφραλέντζαρ ντα πφενίντζαρ ισινέ εκ μπουτ σουκάρ ευλογία.

Όταν καλιντέ τον Άρθουρ τι νακχέλ ι Σχολή Γαλαάδ κο 1962, έπρεπε τι λας εκ μπαρί απόφαση. Ο μαθήματα κα ασταρένας ντες μάσεκ, αλλά με να μπορίναβας τι τζαβ παλά-λέστε επειδή να καλιντέ-μαν. Αποφασιντάμ ότι ο σωστός ισινέ τι τζαλ ο Άρθουρ. Επειδή να κα τθεράβας εκχέ τζενές τι κεράβ ο σκαπανικός, μπουτσσαντέ-μαν πάλι κο Χέμσγουορθ σαρ ειδική σκαπάνισσα. Όταν βουρτιντάς ο Άρθουρ εκ μπρες πιο σοράν, διορισάλαμ κο έργος περιφερείας. Έπρεπε τι τζας τι κεράς ανταβά έργος κι Σκωτία, κι βόρεια Αγγλία ντα κι Βόρεια Ιρλανδία.

Κο 1964, ο Άρθουρ διορισάλο υπηρέτης τμήματος κι Δημοκρατία της Ιρλανδίας. Κι αρχή, ανησυχίναβας μπουτ σο κα τζάβας κο Μπέθελ επειδή απολαμβάναβας μπουτ ο έργος περιοχής ντα περιφερείας. Ακανά όμως, όταν σκεφτίναβα οντουλά σο αβιλέ-πες, εκτιμίναβα μπουτ ο προνόμιος τι υπηρετίναβ κο Μπέθελ. Πακιάβα ότι, όταν δεχτίνεσα εκ διορισμός ατζέ-ντα άμα να μπεϊντίνεσα-λες μπουτ, ο Ιεχωβά πάντα ευλογίνελα-τουτ. Κο Μπέθελ κεράβας μπουτί κο γραφείος, ετοιμάναβας έντυπα, κεράβας χαμπέ ντα καθαρίναβας. Για χάνικ καιρός, υπηρετίναας κο έργος περιφερείας-ντα, ντα ανταβά ντέλας-αμέν ι ευκαιρία τι γνωρίνας πφραλέν ντα πφενίν σαρέ οντουλέ τθεμέσταρ. Επειδή κεράας ανταβά έργος, ντα επειδή ντικχάας οντουλέν σο κεράας-λεν μελέτη τι κερέν πρόοδος, μανγκλάμ μπουτ αμαρί πνευματική φαμιλί κι Ιρλανδία. Σο ευλογία ισινέ ανταγιά!

Η πρώτη διεθνής συνέλευση κι Ιρλανδία αβιλί-πες κο Δουβλίνος κο 1965. * (Ντικχ ι υποσημείωση) Παρόλο σο υπαρχίντιβελας μπουτ εναντίωση, η συνέλευση τθερέλας μπαρί επιτυχία. Γκιντισάλε 3.948 τζενέ ντα μπολντιλέ 65. Ο 3.500 σο αβιλέ κατά εξωτερικός μπεσλέ κι πφραλένγκε κχερά κο Δουβλίνος. Σαρέ ανταλά πφραλά σο φιλοξενιντέ-λεν λιντέ εκ γράμμας σο βακερέλας για την εκτίμηση σο νιωθίνενας ο πφραλά κατά εξωτερικός. Ντα οντουλά σο φιλοξενιντέ-λεν βακερένας καζόμ λατσσί συμπεριφορά τθερένας ο πφραλά κατά εξωτερικός. Ισινέ μπαγιά εκ μπουτ σουκάρ αλλαγή κι Ιρλανδία.

Κο 1966, η βόρεια ντα η νότια Ιρλανδία αβιλέ εκ ντα ο γραφείος τμήματος κο Δουβλίνος τθερέλας ι ευθύνη ανταλέ τθεμέσκι. Ο πφραλά ισινέ ενωμέ ντα ανταβά ισινέ μπουτ διαφορετικός οντουλέσταρ σο αβέλας-πες κο νησίς, σο οτθέ η θρησκεία ντα η πολιτική αντέας διχόνοια κο τζενέ. Συγκινίντιβαας κάνα ντικχάας αζόμ μπουτέ Καθολικόν τι σικλιόν ι αλήθεια ντα τι υπηρετίνεν ι Ιεχωβάς γιεκ ι πφραλέντζαρ σο ισινέ πριν Προτεστάντες.

Κο 2011, σαρί αμαρί ζωή αλλαξάλι όταν ο γραφεία τμήματος κι Βρετανία ντα κι Ιρλανδία αβιλέ εκ, ντα διορισάλαμ κο Μπέθελ κο Λονδίνος. Οντιά εποχή, αρχισάλομας τι ανησυχίναβ για την υγεία του Άρθουρ. Σικλιλάμ ότι τθερέλας εκ νασφαλιπέ σο βακέρντιβελα Πάρκινσον. Δυστυχώς, στις 20 Μαΐου 2015, μο ρομ μουλό. Ισινάμας μαζί 66 μπρεσά.

Ανταλά τελευταία μπρεσά, νιωσάλομ ντουκχ, κατάθλιψη ντα στεναχώρια. Κο παρελθόν, ο Άρθουρ ισινέ πάντα πασέ μάντε. Σικλιντίναβα λέσκε μπουτ! Όταν όμως κάποιος νακχέλα ασακέ προβλήματα, πλησιάνελα πιο μπουτ ι Ιεχωβάς. Επίσης, συγκινίντιβαβα όταν ασουνάβα ότι μπουτ τζενέ μανγκένας τον Άρθουρ. Μπουτσσαντέ μάνγκε γράμματα πφραλά ντα πφενιά κατά Ιρλανδία, κατά Βρετανία, ατζέ-ντα κατά Ηνωμένες Πολιτείες. Ναστί μπορίναβα τι βακεράβ λαφίντζαρ καζόμ βοηθιντέ-μαν ανταλά γράμματα ντα καζόμ ενθάρρυνση ντινάς-μαν ο πφραλ του Άρθουρ, ο Ντένις, λέσκι ρομνί η Μέιβις ντα μο ανιψιές, η Ρουθ ντα η Τζούντι.

Εκ εδάφιος σο ενθαρρύνελα-μαν μπουτ ισί ο Ησαΐας 30:​18, σο βακερέλα: «Ο Ιεχωβά μπεκλεντίνελα με υπομονή για τι σικαβέλ τουμένγκε λατσσιπέ, ντα κα ιστίλ για τι σικαβέλ τουμένγκε έλεος. Επειδή ο Ιεχωβά ισί δίκαιος Ντεβέλ. Ευτυχισμέ ισί σαρέ οντουλά σο μπεκλεντίνενα λέσκε». Αρακχάβα μπαρί παρηγοριά σο τζανάβα ότι ο Ιεχωβά μπεκλεντίνελα με υπομονή για τι διορθώνελ σαρέ αμαρέ προβλήματα ντα τι ντελ-αμέν μπουτ σουκάρ διορισμούς κο νεβό ντουνιάς.

Όταν σκεφτίναβα ο παρελθόν, ντικχάβα σαρ οδηγιντάς ντα ευλογιντάς ο Ιεχωβά ο έργος κι Ιρλανδία! Ισί μάνγκε μπαρό προνόμιος σο ισινόμ εκ κατά μπουτ πφραλά ντα πφενιά σο βοηθιντέ κο έργος ανταλέστε. Ισί σίγουρος ότι πάντα ευλογίντιβασα όταν κεράσα σο-ντα μανγκέλα αμένταρ ο Ιεχωβά.