1. Καγιά ισί η πιο μπαρί αγάπη, ντα σαρ κα εξηγίνενας-λα; (Ντικχ ι φωτογραφία σο ισί κι αρχή)

Η ΑΓΑΠΗ ισί κατά Ιεχωβά. (1 Ιωάννη 4:7) Η πιο μπαρί αγάπη βασίντιβελα κο δίκαια πράγματα σο βακερέλα ο Ιεχωβά. Η Αγία Γραφή σικαβέλα ότι εκ τζενό σο τθερέλα ασακί αγάπη μανγκέλα αντράλ πι γκίσταρ ι γιαβερέν ντα πφαμπόλα λένγκε. Αλλά ανταγιά αγάπη να τθερέλα τι κερέλ σάντε οντουλέντζαρ σο νιωθίνασα. Σικαβάσα-λα όταν κεράσα πράγματα ι γιαβερένγκε χωρίς τι ντικχάς αμαρό συμφέρον. Άμα τθεράσα ασακί αγάπη μανγκάσα τι κεράς λατσσέ πράγματα κο γιαβερά. Ανταγιά αγάπη ντέλα χαρά ντα νόημας αμαρέ ζωγιάτε.

2, 3. Σαρ σικαντάς ο Ιεχωβά αγάπη ι τζενένγκε χωρίς τι ντικχέλ πο συμφέρον;

² Ο Ιεχωβά σικαντάς αγάπη ι τζενένγκε ατζέ-ντα προτού τι κερέλ τον Αδάμ ντα την Εύα. Κερντάς ι πφουβ τι τθερέλ σαρέ οντουλά σο χρειαζίντιβασα για τι τζουβντιάς. Επίσης, κερντάς-λα τι αβέλ αμαρό κχερ για τι μπορίνας τι απολαμβάνας μπαγιά ι ζωή. Ο Ιεχωβά να κερντάς-λες ανταβά πέσκε. Κερντάς-λες αμένγκε. Όταν ετοιμαντάς αμαρό κχερ, κερντάς ι τζενέν ντα ντινάς-λεν ι ελπίδα τι τζουβντιόν για πάντα κο παράδεισος κι πφουβ.

³ Σοράν, χωρίς τι ντικχέλ πο συμφέρον, ο Ιεχωβά σικαντάς  αγάπη ι τζενένγκε με το πιο λατσσό τρόπος. Παρόλο σο ο Αδάμ ντα η Εύα γκιλέ λέσαρ κόντρα, ο Ιεχωβά ισινέ αζόμ σίγουρος ότι μερικοί λένγκε προσαγγονίνταρ κα μανγκένας-λες σο κανονιντάς τι ντιντιόλ ο λύτρος αντράλ κατά θυσία λέσκε Τσσαβέσκι για τι σώνελ-λεν. (Γένεση 3:​15· 1 Ιωάννη 4:​10) Όταν ο Ιεχωβά ντινάς πο λάφι ότι κα ντελ ο λύτρος, ισινέ σαρ τι αβιλίας-πες οντιά θυσία. Μετά από 4.000 περίπου μπρεσά, ο Ιεχωβά θυσιαντάς πι μοναδικέ Τσσαβές ι τζενένγκε. (Ιωάννης 3:​16) Καζόμ μπουτ εκτιμίνασα ι αγάπη ι Ιεχωβάσκι!

4. Σαρ τζανάσα ότι ο ατελείς τζενέ μπορίνενα τι σικαβέν αγάπη χωρίς τι ντικχέν πουμαρό συμφέρον;

⁴ Μπορίνασα τι σικαβάς αγάπη χωρίς τι ντικχάς αμαρό συμφέρον, παρόλο σο ισινάμ ατελείς; Βα, μπορίνασα. Ο Ιεχωβά κερντάς-αμέν τι μπορίνας τι μοιάζας λέστε. Νανέ πάντα εύκολος αμένγκε τι σικαβάς αγάπη χωρίς τι ντικχάς αμαρό συμφέρον, αλλά μπορίνασα τι κεράς-λες ανταβά. Ο Άβελ σικαντάς αγάπη ι Ντεβλέσκε όταν ντινάς ο πιο λατσσό οντουλένταρ σο τθερέλας χωρίς τι ντικχέλ πο συμφέρον. (Γένεση 4:3, 4) Ο Νώε σικαντάς ασακί αγάπη όταν συνεχιντάς τι βακερέλ κο τζενέ ο λάφια ι Ντεβλέσκε για μπουτ μπρεσά, παρόλο σο να ασουνένας-λες. (2 Πέτρου 2:5) Επίσης, ο Αβραάμ σικαντάς ότι μανγκέλας ι Ντεβλές πιο μπουτ σαρέ κατά γιαβερά πράγματα όταν ισινέ έτοιμος τι θυσιάνελ πι αγαπημέ τσσαβές, τον Ισαάκ. (Ιακώβου 2:​21) Σαρ οντουλά πιστά μουρσά, αμέν-ντα μανγκάσα τι σικαβάς αγάπη ατζέ-ντα όταν ανταβά νανέ εύκολος.

5. Σαρ μπορίνασα τι σικαβάς αληθινή αγάπη;

⁵ Η Γραφή βακερέλα αμένγκε ότι σικαβάσα αληθινή αγάπη «όχι λαφίντζαρ ούτε μόσαρ, αλλά οντουλέντζαρ σο κεράσα ντα με αλήθεια». (1 Ιωάννη 3:​18) Μήπως ανταβά μανγκέλα τι βακερέλ ότι να μπορίνασα τι σικαβάς αγάπη οντουλέντζαρ σο βακεράσα; Όχι. (1 Θεσσαλονικείς 4:​18) Μανγκέλα τι βακερέλ ότι να ερεσέλα πάντα τι βακεράς απλά «μανγκάβα-τουτ». Πρέπει τι σικαβάς ότι ισί μπαγιά ανταβά σο βακεράσα. Για παράδειγμας, άμα ο πφραλά ή ο πφενιά να τθερένα χαμπέ ή σέα, να ερεσέλα σάντε τι βακεράς λένγκε σουκάρ λάφια. (Ιακώβου 2:​15, 16) Επίσης, επειδή μανγκάσα ι Ιεχωβάς ντα ι τζενέν, να προσευχίντιβασα σάντε για τι αβέν πιο μπουτ τζενέ τι κερέν έργος αμέντζαρ, αλλά αμέν-ντα κεράσα προσπάθειες για τι συμμετεχίνας κο έργος.​—Ματθαίος 9:38.

6, 7. (α) Σο ισί η “αληθινή αγάπη”; (β) Καλά ισί μερικά παραδείγματα σο σικαβένα σο ισί ψεύτικη αγάπη;

⁶ Ο απόστολος Ιωάννης βακερντάς ότι πρέπει τι μανγκάς «οντουλέντζαρ σο κεράσα ντα με αλήθεια». Άρα, αμαρί αγάπη πρέπει τι αβέλ «αληθινή». (Ρωμαίους 12:9· 2 Κορινθίους 6:6) Μερικές φορές εκ τζενό μπορεί τι κερέλα-πες ότι τθερέλα αγάπη. Αλλά ισί λέσκι αγάπη πραγματική ντα νικιόλα λέσκε γκίσταρ; Σόσκε σικαβέλα αγάπη; Να υπαρχίντιβελα ψεύτικη αγάπη. Ασακί αγάπη ισί άχρηστη.

⁷ Σκεφτίνεν μερικά παραδείγματα σο σικαβένα σο ισί ψεύτικη αγάπη. Όταν ο Σατανάς κερντάς λάφι κι Εύα κο κήπος της Εδέμ, οντουλέντζαρ σο βακερντάς σικαντάς ότι μανγκέλας λάκο λατσσιπέ. Όμως, οντουλέντζαρ σο κερντάς σικαντάς ο αντίθετος. (Γένεση 3:4, 5) Όταν ο Δαβίδ ισινέ βασιλιάς, τθερέλας εκχέ αμαλές σο βακερένας  λέσκε Αχιτόφελ. Αλλά ο Αχιτόφελ, επειδή ντικχέλας πο συμφέρον, προδοντάς τον Δαβίδ. Οντουλέντζαρ σο κερντάς σικαντάς ότι να ισινέ πραγματικός αμάλ. (2 Σαμουήλ 15:​31) Αμαρέ ντιβεσέντε, ο αποστάτες ντα γιαβερά σο ανένα διχόνοια κι εκκλησία “κερένα λάφι γκουλντές ντα ισαρένα ι γιαβερέν ψεύτικε λαφίντζαρ”. (Ρωμαίους 16:​17, 18) Μπορεί τι κερένα-πες ότι πφαμπόνα ι γιαβερένγκε, αλλά κι πραγματικότητα, ισί εγωιστές.

8. Σο πρέπει τι πουτσάς αμαρό νεαυτός;

⁸ Η ψεύτικη αγάπη ισί μπουτ μπέτι πράγμας επειδή χρησιμοποιήντιβελα για τι χουχαβέλ ι τζενέν. Μπορεί τι χουχαβάς ι τζενέν, αλλά να μπορίνασα τι χουχαβάς ι Ιεχωβάς. Ο Ιησούς βακερντάς ότι ο υποκριτές κα τθερένας «ι πιο μπαρί τιμωρία». (Ματθαίος 24:​51) Σαρ υπηρέτες ι Ιεχωβάσκε, να μανγκάσα ποτές τι αβάς υποκριτές. Οτθάρ, ισί λατσσό τι πουτσάς αμαρό νεαυτός: “Ισί μι αγάπη αληθινή ή ισινόμ εγωιστής ντα βακεράβα ψέματα;” Για τι ντικχάς εννιά τρόπους σο μπορίνασα τι σικαβάς “αληθινή αγάπη”.

9. Σο κα κεράς άμα τθεράσα αληθινή αγάπη;

⁹ Τι υπηρετίνας χαράσαρ ατζέ-ντα όταν καέκ να παρατηρίνελα οντουλά σο κεράσα. Πρέπει τι αβάς έτοιμοι τι κεράς με αγάπη λατσσέ πράγματα ι γιαβερένγκε, πράγματα σο καέκ γιαβέρ να κα λελ αμπέρι. (Διαβάνεν Ματθαίος 6:​1-4) Ο Ανανίας ντα η Σαπφείρα να κερντέ-λες ανταβά. Όταν ντινέ εκ συνεισφορά, μανγκλέ τι λιντιόλ αμπέρι κο γιαβερά-ντα. Βακερντέ ψέματα ι λοβένγκε σο ντινέ ντα τιμωρισάλε επειδή ισινέ υποκριτές. (Πράξεις 5:​1-10) Όμως, άμα μανγκάσα μπαγιά αμαρέ πφραλέν, κα χαιρίνας τι κεράς λατσσέ πράγματα λένγκε χωρίς τι μανγκάς τι λεν αμπέρι ο γιαβερά οντουλά σο κερντάμ. Μπορίνασα τι σικλιάς κατά πφραλά σο ντένα βοήθεια κο Κυβερνών Σώμας για τι ετοιμάνελ ο πνευματικός χαμπέ. Να ταρτίνενα ι προσοχή οπρά-πουμέντε ούτε μουτθαβένα κο γιαβερά σο μπουτιά κερένα.

10. Σαρ μπορίνασα τι ντας τιμή ι γιαβερέν;

¹⁰ Τι ντας τιμή ι γιαβερέν. (Διαβάνεν Ρωμαίους 12:​10) Ο Ιησούς ντινάς τιμή πι αποστολόν όταν τθοντάς λένγκε πιντρέ. (Ιωάννης 13:​3-5, 12-15) Πρέπει τι προσπαθίνας μπουτ για τι αβάς ταπεινοί σαρ ο Ιησούς ντα τι υπηρετίνας ι γιαβερέν. Ο απόστολοι αγαντέ λατσσές οντουβά σο κερντάς ο Ιησούς μπουτ πιο σοράν, όταν λιντέ ο άγιος πνεύμας. (Ιωάννης 13:7) Ντάσα τιμή κο γιαβερά άμα να πακιάσα ότι ισινάμ πιο λατσσέ λένταρ επειδή ισινάμ πιο μορφωμέ, πιο χουλανέ ή τθεράσα ειδικούς διορισμούς. (Ρωμαίους 12:3) Να ζηλίνασα όταν ισαρένα ι γιαβερέν, αλλά χαιρίνασα λέντζαρ, ατζέ-ντα άμα πακιάσα ότι έπρεπε τι ισαρέν αμέν-ντα.

11. Σόσκε πρέπει τι ισαράς ι γιαβερέν αντράλ αμαρέ γκίσταρ;

¹¹ Τι ισαράς ι γιαβερέν αντράλ αμαρέ γκίσταρ. Τι ροντέν ευκαιρίες για τι ισαρέν ι γιαβερέν. Σαρέ τζανάσα ότι ο ισαριπέ ισί λατσσό για τι “ντας ζορ” ο εκ ι γιαβερές. (Εφεσίους 4:​29) Όμως, πρέπει τι  αβάς σίγουροι ότι οντουλά σο βακεράσα ισί μπαγιά ντα ότι να βακεράσα-λεν απλώς για τι γκουλντιαράς ι γιαβερέν. Δεν πρέπει τι βακεράς ψεύτικα λάφια ή μα τι δεχτίνας ι ευθύνη σο τθεράσα τι ντας συμβουλή όταν χρειαζίντιβελα. (Παροιμίες 29:5) Κα αβάς υποκριτές αν ισαράσα ι γιαβερέν όταν ισί ανγκλ’ αμέντε, αλλά κατηγορίνασα-λεν παλά-λέντε. Η αγάπη σο τθερέλας ο απόστολος Παύλος ισινέ αληθινή. Όταν γραφιντάς κο Χριστιανοί κι Κόρινθος, ισαρντάς-λεν ι πραγματένγκε σο κερένας λατσσές. (1 Κορινθίους 11:2) Αλλά όταν χρειαζίντιβενας συμβουλή, εξηγιντάς λένγκε ο λόγος με λατσσό ντα ξεκάθαρος τρόπος.​—1 Κορινθίους 11:​20-22.

12. Σαρ μπορίνασα τι σικαβάς αληθινή αγάπη όταν φιλοξενίνασα αμαρέ πφραλέν;

¹² Τι αβάς φιλόξενοι. Ο Ιεχωβά ντέλα-αμέν ι εντολή τι ντας αντράλ αμαρέ γκίσταρ κο πφραλά ντα κο πφενιά. (Διαβάνεν 1 Ιωάννη 3:​17) Όμως, πρέπει τι σκεφτίνας σόσκε ισινάμ φιλόξενοι. Μπορίνασα τι πουτσάς αμαρό νεαυτός: “Μήπως καλίναβα μι κχερέστε σάντε μι αμαλέν ή σάντε οντουλέν σο αμντίναβα ότι ισί σημαντικοί κι εκκλησία; Μήπως καλίναβα σάντε οντουλέν σο πακιάβα ότι σοράν κα κερέν μάνγκε κάτι; Ή μήπως ντάβα αντράλ μι γκίσταρ κο πφραλά ντα κο πφενιά σο να τζανάβα-λεν λατσσές ή σο να μπορίνενα τι κερέν μάνγκε κάτι;” (Λουκάς 14:​12-14) Σκεφτίνεν ακαλά περιπτώσεις: Σο κα κερένας άμα εκ πφραλ χρειαζίντιβελα βοήθεια επειδή λιντάς μερικές λάθος αποφάσεις; Ή άμα κάποιος σο καλιντάμ αμαρέ κχερέστε να βακερντάς «ευχαριστώ»; Ο Ιεχωβά βακερέλα: «Τι αβέν φιλόξενοι ο εκ ι γιαβερέσαρ χωρίς τι κερέν παράπονα». (1 Πέτρου 4:9) Κα αβάς χαρούμενοι όταν ντάσα αντράλ αμαρέ γκίσταρ.​—Πράξεις 20:35.

13. (α) Κάνα μπορεί τι χρειαζίντιβασα πιο μπουτ υπομονή; (β) Σο μπορίνασα τι κεράς για τι βοηθίνας οντουλέν σο ισί μπίζουρανε;

¹³ Τι βοηθίνας οντουλέν σο ισί μπίζουρανε. Η εντολή ι Γραφιάκι σο βακερέλα “τι βοηθίνας οντουλέν σο ισί μπίζουρανε [ντα] τι κεράς υπομονή σαριλέντζαρ”, μπορίνελα τι σικαβέλ άμα αμαρί αγάπη ισί αληθινή. (1 Θεσσαλονικείς 5:​14) Μπουτ πφραλά σο να ισινέ ζουρανέ κι πίστη, αφού νακχλό κάποιος καιρός, αβιλέ ζουρανέ. Γιαβερά, όμως, συνεχίνενα τι τθερέν ανάγκη τι βοηθίνας-λεν με υπομονή ντα αγάπη. Σαρ μπορίνασα τι βοηθίνας-λεν; Μπορίνασα τι χρησιμοποιήνας ι Γραφή για τι ενθαρρύνας-λεν, τι βακεράς λένγκε τι νικιάς λέντζαρ κο έργος ή μπορίνασα απλά τι ασουνάς-λεν. Επίσης, δεν πρέπει τι τθεράς ι άποψη ότι αμαρέ πφραλά ντα αμαρέ πφενιά ισί είτε «ζουρανέ» είτε «μπίζουρανε». Αλλά πρέπει τι αγαβάς ότι σαρέ, μερικέ πραγματέντε ισινάμ ζουρανέ ενώ γιαβερέντε όχι. Ατζέ-ντα ο απόστολος Παύλος αγαβέλας ότι τθερέλας αδυναμίες.  (2 Κορινθίους 12:9, 10) Σαρέ χρειαζίντιβασα βοήθεια ντα ενθάρρυνση ο εκ κατά γιαβέρ.

14. Σο πρέπει τι αβάς έτοιμοι τι κεράς για τι ατσσικιαράς ι ειρήνη σο τθεράσα αμαρέ πφραλέντζαρ;

¹⁴ Τι κεράς ειρήνη. Ισί μπουτ σημαντικός τι τθεράς ειρήνη αμαρέ πφραλέντζαρ. Ατζέ-ντα άμα νιωθίνασα ότι παρεξηγιντέ-αμέν ή αδικιντέ-αμέν, πρέπει τι κεράς σο νακχέλα αμαρέ βαστέσταρ για τι κεράς ειρήνη. (Διαβάνεν Ρωμαίους 12:​17, 18) Άμα στεναχωριντάμ εκχέ τζενές, μπορεί απλά τι χρειαζίντιβελα τι μανγκάς λέσταρ συγνώμη. Αλλά πρέπει τι κεράς-λες ανταβά αντράλ αμαρέ γκίσταρ. Για παράδειγμας, αντί τι βακεράς: «Στεναχωρίντιβαβα σο νιωθίνεσα αντικάς», κα αβέλας πιο λατσσό τι παραδεχτίνας αμαρό λάθος, ντα τι βακεράς: «Συγνώμη σο πληγωντόμ-τουτ μι λαφίντζαρ». Η ειρήνη ισί μπουτ σημαντική ειδικά κι παντριά. Κα αβέλας λάθος εκ μουρς ντα εκ τζουβέλ τι κερέν-πες ότι μανγκένα-πες ανγκλάλ κο γιαβερά ενώ όταν ισί κορκορέ να κερένα λάφι ο εκ ι γιαβερέσαρ, πληγώνενα ο εκ ι γιαβερές πουμαρέ λαφίντζαρ ή ατζέ-ντα ισί βίαιοι.

15. Σαρ μπορίνασα τι σικαβάς ότι συγχωρίνασα μπαγιά;

¹⁵ Τι συγχωρίνας αντράλ αμαρέ γκίσταρ. Άμα εκ τζενό προσβαλίνελα-αμέν, συγχωρίνασα-λες ντα φουρτίνασα οπρ’ αμένταρ ο μπέτι αισθήματα. Πρέπει τι κεράς-λες ανταβά ατζέ-ντα άμα οντουβά τζενό να αγαβέλα ότι προσβαλιντάς-αμέν. Συγχωρίνασα αντράλ αμαρέ γκίσταρ όταν “νταϊντίνασα ο εκ ι γιαβερές με αγάπη ντα κεράσα μπαρέ προσπάθειες για τι ατσσικιαράς ι ενότητα ι πνευμάσκι με την ειρήνη σο κερέλα-αμέν τι αβάς γιεκ”. (Εφεσίους 4:2, 3) Για τι συγχωρίνας μπαγιά, δεν πρέπει τι συνεχίνας τι σκεφτίνας σο κερντάς αμένγκε οντουβά τζενό. Η αγάπη «να ατσσικιαρέλα χολί για το κακός». (1 Κορινθίους 13:4, 5) Κι πραγματικότητα, αν κα ατσσικιαράας χολί, κα μπορίναας τι χαλαβάς ι σχέση σο τθεράσα εμ οντουλέ πφραλέσαρ ή οντουλέ πφενιάσαρ αλλά εμ ι Ιεχωβάσαρ. (Ματθαίος 6:​14, 15) Σικαβάσα  ότι συγχωρίνασα μπαγιά όταν προσευχίντιβασα ι τζενέσκε σο προσβαλιντάς-αμέν.​—Λουκάς 6:​27, 28.

16. Σαρ πρέπει τι ντικχάς εκ ειδικός διορισμός κι υπηρεσία κι Ιεχωβάσκι;

¹⁶ Τι τσσουβάς αμαρό συμφέρον κι άκρη. Όταν λάσα εκ ειδικός διορισμός κι υπηρεσία κι Ιεχωβάσκι, μπορίνασα τι σικαβάς ότι αμαρί αγάπη ισί αληθινή όταν “ντικχάσα όχι αμαρό συμφέρον, αλλά ι γιαβερέσκο”. (1 Κορινθίους 10:​24) Για παράδειγμας, ο ταξιθέτες τσσουβένα-πες πρώτοι οτθέ σο αβένα-πες ο συνελεύσεις ντα μπορεί τι περέν κο πειρασμός τι ασταρέν πέσκε ντα πουμαρέ φαμιλιάκε ο πιο λατσσέ θέσεις. Όμως, μπουτ λένταρ τραμπίνενα τι μπεσέν κο θέσεις σο νανέ αζόμ λατσσέ, οτθέ σο τσσουντέ-λεν τι αβέν υπεύθυνοι. Όταν κερένα-λες ανταβά, σικαβένα αγάπη χωρίς τι ντικχέν πουμαρό συμφέρον. Σαρ κα μπορίνενας τι μοιάζεν λέντε;

17. Σο κα κερέλ εκ Χριστιανός σο κερντάς εκ σοβαρή αμαρτία άμα τθερέλα αληθινή αγάπη;

¹⁷ Τι μουτθαβάς ντα τι μουκχάς ο αμαρτίες σο ισί γκεραντέ. Μερικοί Χριστιανοί σο κερντέ εκ σοβαρή αμαρτία προσπαθιντέ τι γκεραβέν-λα. Μπορεί τι λατζάνα ή μα τι μανγκένα τι στεναχωρίνεν ι γιαβερέν. (Παροιμίες 28:​13) Όμως, άμα γκεραντέ ι αμαρτία, να σικαβένα αγάπη, επειδή κερένα κακός εμ πουμένγκε εμ ι γιαβερένγκε. Σαρ; Ο Ιεχωβά μπορεί τι σταματίνελ τι ευλογίνελ ι εκκλησία με το άγιος πνεύμας, ντα αντικάς η εκκλησία να κα τθερέλ ειρήνη. (Εφεσίους 4:​30) Άρα, άμα εκ Χριστιανός κερντάς εκ σοβαρή αμαρτία, η αληθινή αγάπη κα κερέλ-λες τι μουτθαβέλ κο πρεσβύτεροι σο κερντάς για τι λελ ι βοήθεια σο χρειαζίντιβελα.​—Ιακώβου 5:​14, 15.

18. Καζόμ σημαντική ισί η αληθινή αγάπη;

¹⁸ Η αγάπη ισί η πιο μπαρί ιδιότητα. (1 Κορινθίους 13:​13) Βοηθίνελα ι τζενέν τι ντικχέν κον ισί ο πραγματικοί μαθητές ι Ιησούσκε ντα τι αγαβέν κον ισί οντουλά σο μοιάζενα μπαγιά κο Ιεχωβά, σο λέσταρ ισί η αγάπη. (Εφεσίους 5:1, 2) Ο Παύλος βακερντάς ότι άμα να τθερέλας αγάπη, να κα αβέλας τίποτα. (1 Κορινθίους 13:2) Τι συνεχίνας σαρέ τι σικαβάς αμαρί αγάπη όχι σάντε «λαφίντζαρ», αλλά επίσης «οντουλέντζαρ σο κεράσα ντα με αλήθεια».