1, 2. Καγιά ισινέ η κατάσταση ι Ιουδαιόνγκι κι Ιερουσαλήμ κάνα τελειώνελας η έβδομη φαντασία ι Ζαχαριάσκι;

ΚΑΝΑ τελειώνελας η έβδομη φαντασία ι Ζαχαριάσκι, ο προφήτης τθερέλας τι σκεφτίνελ μπουτ πράγματα. Πρέπει τι λιντάς δύναμη κατά υπόσχεση σο ντινάς ο Ιεχωβά τι τιμωρίνελ ι τζενέν σο να ισινέ τίμιοι. Αλλά κι πραγματικότητα τίποτα να αλλαξάλοας. Μπουτ τζενέ συνεχίνενας τι κερέν πράγματα σο να ισινέ λατσσέ ντα τίμια, ντα ο ναός κι Ιερουσαλήμ να κερντιλόας ατζέκ. Σόσκε ο Ιουδαίοι μουκχλέας αζόμ σουγκό ι μπουτί σο ντινάας-λεν ο Ιεχωβά; Μήπως βουρτισάλεας κι Ιερουσαλήμ σάντε για τι τθερέν πιο λατσσί ζωή;

² Ο Ζαχαρίας τζανέλας ότι ο Ιουδαίοι σο βουρτισάλε κι Ιερουσαλήμ ισινέ υπηρέτες ι Ιεχωβάσκε. Ισινέ οντουλά σο “ο αληθινός Ντεβέλ κερντάς-λεν τι μανγκέν” τι μουκχέν πουμαρέ κχερά ντα πουμαρέ μπουτιά κι Βαβυλώνα. (Έσδρας 1:2, 3, 5) Νασλέ εκχέ τθεμέσταρ σο τζανένας-λες λατσσές για τι τζαν εκχέ γιαβερέστε σο ο πιο μπουτ λένταρ να ντικχλέας ποτές.  Οντουλά Ιουδαίοι αγαβένας καζόμ σημαντικός ισινέ τι χτίνεν πάλι ι Ιεχωβάσκο ναός, ντα οτθάρ μανγκλέ τι κερέν ταξίδι περίπου 1.600 χιλιόμετρα παρόλο σο ανταβά ισινέ δύσκολος ντα επικίνδυνος.

3, 4. Καλά δυσκολίες αντιμετωπιντέ ο Ιουδαίοι σο βουρτισάλε πουμαρέ τθεμέστε;

³ Σκεφτίνεν ο μπαρό ταξίδι κατά Βαβυλώνα μέχρι κι Ιερουσαλήμ. Ο Ιουδαίοι τθερένας μπουτ σαάτια για τι σκεφτίνεν ντα τι συζητίνεν ι τθεμέσκε σο κα τζουβντιόνας ατζεχάνικ. Ο πιο μπαρέ βακερντέας λένγκε καζόμ σουκάρ ισινέ η Ιερουσαλήμ ντα ο ναός. (Έσδρας 3:​12) Άμα κερντένας λέντζαρ οντουβά ταξίδι, σαρ κα νιωθίνενας όταν κα ντικχένας για πρώτη φαρ ι Ιερουσαλήμ; Μήπως κα στεναχωρίντιβενας όταν κα ντικχένας ο καταστραφιμέ κτίρια τι αβέν πφερντέ τσαριά ντα ο βουτσσέ ντουβάρια σο πελέας τι τθερέν μπαρέ γούρνες οτθέ σο ισινέ πριν ο μπαρέ πόρτες ντα ο πύργοι; Μπορεί τι συγκρίνενας ανταλά περαντέ ντουβάρια ι μπαρέ ντα ζουρανέ ντουβαρίντζαρ σο τθερέλας ντονταλάι η Βαβυλώνα. Αλλά ο Ιουδαίοι να χασαρντέ πουμαρό θάρρος. Σόσκε; Επειδή καζόμ κερένας ο μπαρό ταξίδι, ο Ιεχωβά βοηθιντάας-λεν ντα αρακχαντάας-λεν. Μόλις ερεσλέ κι Ιερουσαλήμ, κερντέ εκ θυσιαστήριος οτθέ σο ισινέας ο ναός, ντα αρχισάλε τι κερέν θυσίες κο Ιεχωβά κάθε ντιβές. (Έσδρας 3:1, 2) Ισινέ έτοιμοι τι κερέν μπουτί σαρέ πουμαρέ γκίσαρ. Ντικχίντιβελας ότι τίποτα να κα μπορίνελας τι κερέλ-λεν τι χασαρέν πουμαρό θάρρος.

⁴ Αζομάν σο κερένας ο ναός, ο Ιουδαίοι έπρεπε τι κερέν επίσης πουμαρέ πόλεις ντα πουμαρέ κχερά. Έπρεπε τι σπειρίνεν ο χωράφια για τι παρβαρέν πουμαρέ φαμιλιά. (Έσδρας 2:​70) Η μπουτί σο τθερένας ανγκλά-πουμέντε ντικχίντιβελας μπουτ μπαρί. Να νακχλό μπουτ καιρός ντα ο ντουσμάνια αβιλέ ντα προσπαθιντέ τι σταματίνεν-λεν. Ανταβά ατσσικιαρντάς 15 μπρεσά, ντα ο Ιουδαίοι σιγά σιγά χασαρντέ πουμαρό θάρρος. (Έσδρας 4:​1-4) Εκ γιαβέρ δυσκολία αβιλί κο μπρες 522, όταν ο βασιλιάς της Περσίας ντινάς εντολή τι σταματίνεν τι χτίνεν ι Ιερουσαλήμ. Ντικχίντιβελας ότι η πόλη να κα ξαναχτίντιβελας ποτές.​—Έσδρας 4:​21-24.

5. Σαρ βοηθιντάς ο Ιεχωβά πι λαός;

⁵ Ο Ιεχωβά τζανέλας ότι λέσκο λαός χρειαζίντιβελας δύναμη ντα θάρρος. Ντινάς κο Ζαχαρίας εκ τελευταία φαντασία για τι ντελ κο Ιουδαίοι ι σιγουριά ότι μανγκέλας-λεν ντα ότι εκτιμίνελας ο προσπάθειες σο κερένας για τι υπηρετίνεν-λες. Ντινάς πο λάφι ότι κα αρακχαβέλας-λεν άμα κα βουρτίνενας κι μπουτί σο βακερντάας λένγκε τι κερέν. Ο Ιεχωβά βακερντάς για το χτίσιμος ι ναόσκο: «Ανταβά σίγουρα κα αβέλ-πες, άμα κα ασουνέν ι φωνή ι Ιεχωβάσκι, τουμαρέ Ντεβλέσκι».​—Ζαχαρίας 6:15.

6. (α) Σαρ αρχισάλι η όγδοη φαντασία ι Ζαχαριάσκι; (Ντικχ ι φωτογραφία σο ισί κι αρχή) (β) Σόσκε ο γκραστά τθερένας διαφορετικά χρώματα;

⁶ Η όγδοη ντα τελευταία φαντασία ι Ζαχαριάσκι μπορεί τι ισί οντιά σο μπαριαρέλα ι πίστη πιο μπουτ σαρέ κατά γιαβερά εφτά φαντασίες. (Διαβάνεν Ζαχαρίας 6:​1-3) Προσπαθίνεν τι ανέν τουμαρέ γκοντιάτε σο ντικχλάς ο Ζαχαρίας. «Αντράλ ντουέ βεσένταρ» σο ισινέ χάλκινα νικίστιλε γκραστά σο ταρτίνενας σταρ άμαξες. Ο γκραστά τθερένας διαφορετικά χρώματα, ντα οτθάρ οντουλά σο ισινέ οπράλ κο άμαξες ξεχωρίνενας εύκολα ο εκ κατά γιαβέρ. Ο Ζαχαρίας πουτσλάς: «Σο ισί ανταλά;» (Ζαχαρίας 6:4) Αμέν-ντα μανγκάσα τι σικλιάς-λες ανταβά, επειδή ανταγιά φαντασία επηρεάνελα-αμέν.

7, 8. (α) Σο μανγκένα τι σικαβέν ο ντούι βεσά; (β) Σόσκε ο βεσά ισί χάλκινα;

 ⁷ Κι Αγία Γραφή, ο βεσά μπορεί τι μανγκένα τι σικαβέν βασιλείες, δηλαδή κυβερνήσεις. Ο βεσά σο ντικχλάς ο Ζαχαρίας μοιάζενα ι ντουέ βεσέντζαρ σο διαβάνασα κι προφητεία του Δανιήλ. Ο εκ βες μανγκέλα τι σικαβέλ ι κυριαρχία ι Ιεχωβάσκι σαρό κο σύμπαν σο ατσσόλα για πάντα, ντα ο γιαβέρ μανγκέλα τι σικαβέλ ι Μεσσιανική Βασιλεία σο τθερέλα Βασιλιάς ι Ιησούς. (Δανιήλ 2:​35, 45) Κατά 1914, όταν αβιλό βασιλιάς ο Ιησούς, ανταλά ντούι βεσά τθερένα εκ σημαντικός ρόλος για τι αβέλ-πες ο σκοπός ι Ντεβλέσκο κι πφουβ.

⁸ Σόσκε ο βεσά ισί χάλκινα; Ο χαλκός ισί εκ πολύτιμος ντα λαμπερός μέταλλος. Ο Ιεχωβά βακερντάς κο Ισραηλίτες τι χρησιμοποιήνεν χαλκός όταν κερντέ ι σκηνή της μαρτυρίας ντα πιο σοράν ο ναός κι Ιερουσαλήμ. (Έξοδος 27:​1-3· 1 Βασιλέων 7:​13-16) Ο ντούι βεσά ισί χάλκινα για τι σικαβέν καζόμ τέλεια ισί ι Ιεχωβάσκι κυριαρχία σαρό κο σύμπαν ντα η Μεσσιανική Βασιλεία, σο κα κερέν ι τζενέν τι νιωθίνεν ασφάλεια ντα κα ανέν λένγκε μπουτ ευλογίες.

9. Κον ισί οντουλά σο ισί οπράλ κο άμαξες, ντα καβά ισί λένγκο διορισμός;

⁹ Σο μανγκένα τι σικαβέν ο άμαξες ντα οντουλά σο ισί οπρά-λέντε; Οντουλά σο ισί οπράλ κο άμαξες ισί άγγελοι, μάλλον διαφορετικές ομάδες αγγέλων. (Διαβάνεν Ζαχαρίας 6:​5-8) Νικιόνα «αφού πρώτα ατσσιλέ ανγκλάλ κο Κύριος σαρέ κι πφουβιάκο» ντα τθερένα εκ ειδικός διορισμός. Ο άγγελοι μπουτσσάντιβενα συγκεκριμέ τθεμέντε για τι αρακχαβέν ι Ντεβλέσκε λαός, ειδικά κατά «τθεμ σο ισί κο βορράς», δηλαδή κατά Βαβυλώνα. Ανταλέ φαντασιάσαρ, ο Ιεχωβά σικαβέλα πι λαόσκε ότι να κα αβένας ποτές ξανά δούλοι κι Βαβυλώνα. Σκεφτίνεν καζόμ παρηγοριντάς ανταβά ι τζενέν σο χτίνενας ο ναός κι Ζαχαριάσκε ντιβεσά! Τζανένας ότι λένγκε ντουσμάνια να μπορίνενας τι σταματίνεν-λεν.

10. Σαρ μπορίνελα η προφητεία ι Ζαχαριάσκι για το άμαξες ντα οντουλένγκε σο ισί οπρά-λέντε τι βοηθίνελ-αμέν αμαρέ ντιβεσέντε;

¹⁰ Αμαρέ ντιβεσέντε, ο Ιεχωβά συνεχίνελα τι χρησιμοποιήνελ πι αγγελόν για τι αρακχαβέλ ντα τι ντελ δύναμη πι λαός. (Μαλαχίας 3:6· Εβραίους 1:7, 14) Κατά 1919, αζομάν σο ο λαός ι Ιεχωβάσκο ελευθερωσάλο με συμβολικός τρόπος κατά Μπαρί Βαβυλώνα, ο ντουσμάνια κερντέ μπαρέ προσπάθειες για τι εμποδίνεν ι πρόοδος κο έργος. (Αποκάλυψη 18:4) Αλλά να καταφεριντέ τι κερέν-λες ανταβά. Επειδή ο άγγελοι αρακχαβένα ι Ιεχωβάσκι οργάνωση, να χρειαζίντιβελα τι νταράς ότι ο λαός ι Ιεχωβάσκο κα ξαναβέλ αιχμάλωτος κι ψεύτικη θρησκεία. (Ψαλμός 34:7) Αλλά κα συνεχίνας τι αβάς χαρούμενοι ντα τι κεράς μπουτ πράγματα καζόμ υπηρετίνασα ι Ιεχωβάς. Η προφητεία ι Ζαχαριάσκι βοηθίνελα-αμέν τι αγαβάς ότι ισινάμ ασφαλείς ντα αρακχαντέ οντουλέ ντουέ βεσένταρ.

11. Σόσκε να χρειαζίντιβελα τι νταράς οντουλένταρ σο κα πολεμίνεν ι Ντεβλέσκε λαός;

¹¹ Μπουτ σουγκό, ο κυβερνήσεις σο ισί κι Μπενγκέσκο ντουνιάς κα γκιντίντιβεν  για τι προσπαθίνεν τι καταστραφίνεν ι Ντεβλέσκε λαός. (Ιεζεκιήλ 38:2, 10-12· Δανιήλ 11:​40, 44, 45· Αποκάλυψη 19:​19) Κι προφητεία του Ιεζεκιήλ, ντικχάσα ανταλά κυβερνήσεις τι ιτσσαρέν ι πφουβ σαρ σύννεφα. Ισί οπράλ γκραστέντε ντα αβένα χολιάσαρ για τι πολεμίνεν ι Ντεβλέσκε λαός. (Ιεζεκιήλ 38:​15, 16) * (Ντικχ ι υποσημείωση) Πρέπει τι νταράς λένταρ; Όχι! Ο στρατός ι Ιεχωβάσκο ισί αμέντζαρ. Κι μπαρί στεναχώρια, ο άγγελοι ι Ιεχωβάσκε κα αρακχαβέν λέσκε λαός ντα κα καταστραφίνεν σαρέ οντουλέν σο τζάνα κόντρα κι κυριαρχία λέσκι. (2 Θεσσαλονικείς 1:7, 8) Σαβό ντιβές κα αβέλ ανταβά! Αλλά κον κα κερέλ κουμάντος κι Ιεχωβάσκο στρατός κο ουρανός;

12, 13. (α) Σο βακερντάς ο Ιεχωβά τι κερέλ σοράν ο Ζαχαρίας; (β) Σαρ τζανάσα ότι ο μουρς σο βακέρντιβελα Βλαστάρι μανγκέλα τι σικαβέλ ι Ιησού Χριστός;

¹² Ο Ζαχαρίας ισινέ ο μόνος σο ντικχλάς οντουλά οχτώ φαντασίες. Αλλά σοράν κερντάς κάτι σο κα μπορίνενας τι ντικχέν ο γιαβερά, κάτι σο κα ενθαρρύνελας οντουλέν σο ξαναχτίνενας ι Ντεβλέσκο ναός. (Διαβάνεν Ζαχαρίας 6:​9-12) Τριν μουρσά, ο Χελδαΐ, ο Τωβιγίας ντα ο Ιεδαΐας, αβιλέ κατά Βαβυλώνα. Ο Ιεχωβά βακερντάς κο Ζαχαρίας τι λελ ασήμι ντα χρυσάφι οντουλέ μουρσένταρ ντα τι κερέλ εκ «στέμμας». (Ζαχαρίας 6:​11) Μήπως ανταβά στέμμας ισινέ για το κυβερνήτης Ζοροβάβελ, σο ισινέ κατά φυλή του Ιούδα ντα  αστάρντιβελας κατά Δαβίδ; Όχι. Ο Ιεχωβά βακερντάς κο Ζαχαρίας τι τσσουβέλ ο στέμμας κο σορό εκχέ τζενέσκο σο βακέρντιβελας Ιησούς ντα ισινέ αρχιερέας. Ανταβά μάλλον ντικχίντιλο παράξενος σαρέ οντουλένγκε σο παρατηρίνενας.

¹³ Μήπως ο αρχιερέας Ιησούς αβιλό βασιλιάς επειδή ο Ζαχαρίας τσσουντάς λέσκε ο στέμμας; Όχι. Ο Ιησούς να αστάρντιβελας κατά Δαβίδ, οτθάρ να τθερέλας οντουλά σο χρειαζίντιβελας για τι αβέλ βασιλιάς. Τσσουντάς λέσκε ο στέμμας για τι σικαβέλ σο κα αβέλας-πες κο μέλλον σε εκ βασιλιάς ντα ιερέας σο κα υπηρετίνελας για πάντα, ντα κα βακέρντιβελας Βλαστάρι. Η Γραφή εξηγίνελα ότι ο Βλαστάρι ισί ο Ιησούς Χριστός. * (Ντικχ ι υποσημείωση)​—Ησαΐας 11:1· Ματθαίος 2:23.

14. Σο πράγματα κερέλα ο Ιησούς σαρ Βασιλιάς ντα Αρχιερέας;

¹⁴ Ο Ιησούς ισί εμ Βασιλιάς εμ Αρχιερέας. Ισί αρχηγός κι Ιεχωβάσκο στρατός σο τθερέλα αγγελόν, ντα κερέλα μπουτ πράγματα για τι βοηθίνελ ι Ντεβλέσκε λαός τι νιωθίνελ ασφάλεια αντρέ ανταλέ γκεραλέ ντουνιάστε. (Ιερεμίας 23:5, 6) Μπουτ σουγκό, ο Χριστός κα νικίνελ ι τθεμέν, ντα αντικάς κα υποστηρίνελ ι Ιεχωβάσκι κυριαρχία ντα κα αρακχαβέλ λέσκε λαός. (Αποκάλυψη 17:​12-14· 19:​11, 14, 15) Αλλά πριν τι αβέλ οντουβά ντιβές, ο Ιησούς, ή γιαβέρσοϊ ο Βλαστάρι, τθερέλα εκ μπουτ σημαντικός διορισμός τι κερέλ.

15, 16. (α) Αμαρέ ντιβεσέντε, κον καθαριντάς ι Ντεβλέσκε λαός ντα αντάς πάλι ι Χριστιανική εκκλησία, ντα σαρ κερντάς-λες ανταβά; (β) Σαρ κα αβέλ η πφουβ όταν κα τελειώνελ η Βασιλεία ι Χριστόσκι σο κα ατσσικιαρέλ χίλια μπρεσά;

¹⁵ Εκτός από Βασιλιάς ντα Αρχιερέας, ο Ιησούς διορισάλο επίσης τι «χτίνελ ο ναός ι Ιεχωβάσκο». (Διαβάνεν Ζαχαρίας 6:​13) Κο 1919, κερντάς-λες ανταβά όταν ελευθερωντάς ι Ντεβλέσκε λαός κατά Μπαρί Βαβυλώνα, δηλαδή κατά ψεύτικη θρησκεία. Ο Ιησούς αντάς πάλι ι αληθινή Χριστιανική εκκλησία ντα διοριντάς εκχέ “πιστέ ντα φρόνιμε δουλός”. Ανταλά χρισμέ πφραλά κατευθίνενα ο σημαντικός έργος σο αβέλα-πες κο μπαρό πνευματικός ναός ατθέ κι πφουβ, δηλαδή κατευθίνενα ι αληθινή λατρεία. (Ματθαίος 24:​45) Επίσης, ο Ιησούς καθαρίνελα ι Ντεβλέσκε λαός ντα βοηθίνελα-λες τι ντελ πάκι λατρεία.​—Μαλαχίας 3:​1-3.

¹⁶ Ο Ιησούς ντα ο 144.000 βασιλιάδες ντα ιερείς σο κα αβέν γιεκ λέσαρ κα κυβερνίνεν για χίλια μπρεσά. Αζομάν, κα βοηθίνεν ι πιστέ τζενέν τι αβέν τέλειοι. Όταν οντουλά  βασιλιάδες ντα ιερείς κα τελειώνεν ανταβά διορισμός, σάντε ο αληθινοί υπηρέτες ι Ιεχωβάσκε κα ατσσόν οπράλ κι πφουβ. Τελικά, η αληθινή λατρεία κα αβέλ πάλι παντού!

17. Καγιά σιγουριά ντινάς ο Ιεχωβά κο Ιουδαίοι, ντα σαρ επηρεαντέ-λεν λέσκε λάφια;

¹⁷ Σαρ επηρεαντέ ι Ιουδαιόν αζομάν ο λάφια ι Ζαχαριάσκε; Ο Ιεχωβά ντινάας πο λάφι ότι κα βοηθίνελας ντα κα αρακχαβέλας-λεν για τι μπορίνεν τι τελειώνεν ο ναός. Ανταβά ντινάς-λεν ελπίδα. Αλλά μπορεί τι σκεφτίνενας σαρ κα μπορίνενας αζόμ χάνικ τζενέ τι κερέν εκ αζόμ μπαρί μπουτί. Οτθάρ, ο Ζαχαρίας βακερντάς λένγκε κάτι σο κα λέλας λένταρ ι νταρ ντα ο αμφιβολίες. Εκτός κατά τζενέ σαρ ισινέ ο Χελδαΐ, ο Τωβιγίας ντα ο Ιεδαΐας, σο αβιλέας για τι βοηθίνεν-λεν, ο Ιεχωβά βακερντάς ότι μπουτ γιαβερά-ντα κα “αβένας ντα κα βοηθίνενας τι χτίντιβελ ο ναός ι Ιεχωβάσκο”. (Διαβάνεν Ζαχαρίας 6:​15) Ο Ιουδαίοι ισινέ σίγουροι ότι ο Ιεχωβά υποστηρίνελας λένγκι μπουτί. Με θάρρος, αρχισάλε τι χτίνεν πάλι ο ναός, παρόλο σο ο βασιλιάς της Περσίας ντινάας εντολή τι τσσιναβέν τι χτίνεν. Ανταγιά εντολή ισινέ σαρ εκ μπαρό βες λένγκε ντρομέστε, αλλά ο Ιεχωβά νασκιαρντάς-λες σουγκό. Τελικά, ο ναός κερντιλό κο μπρες 515 Π.Κ.Χ. (Έσδρας 6:​22· Ζαχαρίας 4:6, 7) Όμως, ο λάφια ι Ιεχωβάσκε σικαβένα επίσης κάτι μπουτ πιο σημαντικός σο αβέλα-πες αμαρέ ντιβεσέντε.

18. Σαρ νικιόλα μπαγιά αμαρέ ντιβεσέντε ο εδάφιος Ζαχαρίας 6:15;

¹⁸ Αμαρέ ντιβεσέντε, εκατομμύρια τζενέ ντένα λατρεία ι Ιεχωβάς. Ισί χαρούμενοι σο ντένα-λες πουμαρέ “σημαντικέ πραγματένταρ”, δηλαδή πουμαρέ σαατίσταρ, πουμαρέ ζοριάταρ ντα πουμαρέ λοβένταρ. Ανταλέ τροπόσαρ, υποστηρίνενα ο μπαρό πνευματικός ναός ι Ιεχωβάσκο. (Παροιμίες 3:9) Ντα μπορίνασα τι αβάς σίγουροι ότι ο Ιεχωβά εκτιμίνελα οντουλά σο κεράσα για τι υποστηρίνας πιστά ι αληθινή λατρεία. Ντεν-τουμέν γκοντί ότι ο Χελδαΐ, ο Τωβιγίας ντα ο Ιεδαΐας αντέ ασήμι ντα χρυσάφι ντα ότι ο Ζαχαρίας χρησιμοποιηντάς-λεν ανταλά για τι κερέλ εκ στέμμας. Οντουβά στέμμας σικαβέλας ότι ο Ιεχωβά “τθερέλας πι γκοντιάτε” ι συνεισφορά σο κερντέ οντουλά μουρσά για την αληθινή λατρεία. (Ζαχαρίας 6:​14) Ο Ιεχωβά ποτές να κα μπιστρέλ οντουλά σο κεράσα ντα ι αγάπη σο σικαβάσα λέσκε.​—Εβραίους 6:10.

19. Σαρ πρέπει τι επηρεάνεν-αμέν ο φαντασίες σο ντικχλάς ο Ζαχαρίας;

¹⁹ Ανταλέ τελευταίε ντιβεσέντε, ι Ιεχωβάσκο λαός τθερέλα κερντό εκ μπουτ σημαντικός έργος. Ανταβά μπορισάλο τι αβέλ-πες χάρη κι ευλογία κι Ιεχωβάσκι ντα κι καθοδηγία κι Χριστόσκι. Χαιρίνασα σο ισινάμ αντρέ σε εκ οργάνωση σο ισί σταθερή, ασφαλής ντα κα ατσσόλ για πάντα, ντα τζανάσα ότι ο σκοπός ι Ιεχωβάσκο για την αληθινή λατρεία κα νικιόλ μπαγιά. Οτθάρ, τι εκτιμίνεν τουμαρί θέση αντρέ κο λαός κι Ιεχωβάσκο, ντα τι «ασουνέν ι φωνή ι Ιεχωβάσκι, τουμαρέ Ντεβλέσκι». Αντικάς, αμαρό Βασιλιάς ντα Αρχιερέας, αλλά ο άγγελοι-ντα κα αρακχαβέν-τουμέν. Κερέν ο πιο λατσσό σο μπορίνενα για τι υποστηρίνεν ι αληθινή λατρεία. Ο Ιεχωβά κα αρακχαβέλ-τουμέν μέχρι κο τέλος ανταλέ ντουνιάσκο, ντα για πάντα!