1, 2. (α) Σαρ μπορίνενα τι επηρεάνεν-αμέν ο αλλαγές σο να μπεκλεντίνασα; (Ντικχ ι φωτογραφία σο ισί κι αρχή) (β) Σαρ βακερέλα ο Ψαλμός 131, σο μπορίνελα τι βοηθίνελ-αμέν τι τθεράς ειρήνη αμαρέ γκοντιάτε;

ΑΦΟΥ ο Λόιντ ντα η Αλεξάνδρα υπηρετιντέας κο Μπέθελ πιο μπουτ από 25 μπρεσά, λιντέ γιαβέρ διορισμός. Κι αρχή στεναχωρισάλε. Ο Λόιντ βακερέλα: «Νιωθίναβας ότι ο Μπέθελ ντα μι μπουτί οτθέ ισινέ κομμάτι μι ζωγιάκο. Αγαβάβας σόσκε αβιλί-πες ανταγιά αλλαγή, αλλά μπουτ φαρ νιωθίναβας παρατημέ». Οτθέ σο ντικχέλας ο πράγματα με το σωστός τρόπος, χάνικ πιο σοράν χασαρέλας πο κουράγιος.

² Καζόμ νακχέλα ο καιρός, κα αβέν-πες αλλαγές σο να μπεκλεντίνασα, ντα μπορεί τι ανέν αμένγκε μπαρί νταρ ντα άγχος. (Παροιμίες 12:​25) Κάνα ισί αμένγκε δύσκολος τι δεχτίνας ή τι συνηθίνας κο αλλαγές, σο μπορίνασα τι κεράς για τι ατσσάς ήρεμοι; (Διαβάνεν Ψαλμός 131:​1-3) Κα ντικχάς σαρ μπορισάλε μερικοί υπηρέτες ι Ιεχωβάσκε, εμ κο πουρανέ μπρεσά εμ  αμαρέ ντιβεσέντε, τι τθερέν ειρήνη πουμαρέ γκοντιάτε ατζέ-ντα κάνα αβιλέ αλλαγές σο να μπεκλεντίνενας.

3. Καλά αλλαγές σο να μπεκλεντίνελας νακχλό ο Ιωσήφ;

³ Για παράδειγμας, σκεφτίνεν τον Ιωσήφ. Ο Ιωσήφ ισινέ ο αγαπημέ τσσαβό σο τθερέλας ο Ιακώβ. Ανταβά κερντάς λέσκε πφραλέν τι ζηλίνεν-λες μπουτ. Κάνα ο Ιωσήφ ισινέ 17 μπρεσένγκο, λέσκε πφραλά μπικιντέ-λες σαρ δούλος. (Γένεση 37:​2-4, 23-28) Για 13 περίπου μπρεσά, ταλαιπωρισάλο κι Αίγυπτος, πρώτα σαρ δούλος ντα σοράν σαρ φυλακισμέ. Ο Ιωσήφ ισινέ ντουρ πι αγαπημέ νταντέσταρ. Σαρέ ανταλά κα μπορίνενας τι κερέν-λες τι χασαρέλ πο κουράγιος ντα τι χολιάνελ, αλλά να κερντάς-λες ανταβά. Σο βοηθιντάς-λες;

4. (α) Σο κερέλας ο Ιωσήφ καζόμ ισινέ κι φυλακή; (β) Σαρ απαντιντάς ο Ιεχωβά κο προσευχές σο κερέλας ο Ιωσήφ;

⁴ Καζόμ ο Ιωσήφ τθερέλας δυσκολίες κι φυλακή, πρέπει τι ανέλας πι γκοντιάτε οντουλά σο κερέλας ο Ιεχωβά για τι βοηθίνελ-λες. (Γένεση 39:​21· Ψαλμός 105:​17-19) Μπορεί επίσης τι σκεφτίνελας ο προφητικά σουνέ σο ντικχλάς κάνα ισινέ πιο χουρντό ντα τι νιωθίνελας σίγουρος ότι ο Ιεχωβά ισινέ λέσαρ. (Γένεση 37:​5-11) Πρέπει τι προσευχίντιβελας συνέχεια ντα τι βακερέλας κο Ιεχωβά σαρέ οντουλά σο τθερέλας πι γκίστε. (Ψαλμός 145:​18) Ο Ιεχωβά απαντιντάς λέσκε προσευχιέντε κάνα ντινάς-λες ι σιγουριά ότι κα αβέλας «λέσαρ» σο-ντα τι αβέλας-πες.​—Πράξεις 7:9, 10. * (Ντικχ ι υποσημείωση)

5. Σαρ μπορίνελα «η ειρήνη ι Ντεβλέσκι» τι κερέλ-αμέν πιο αποφασισμέ τι υπηρετίνας ι Ιεχωβάς;

⁵ Καζόμ δύσκολα-ντα τι αβέν ο πράγματα αμαρέ ζωγιάτε, μπορίνασα τι τθεράς ι «ειρήνη ι Ντεβλέσκι» σο αρακχαβέλα αμαρί «γκοντί» ντα κερέλα-αμέν τι νιωθίνας ήρεμοι. (Διαβάνεν Φιλιππησίους 4:6, 7) Κάνα νιωθίνασα ανησυχία ή άγχος, «η ειρήνη ι Ντεβλέσκι» μπορίνελα τι ντελ-αμέν ζορ για τι συνεχίνας τι υπηρετίνας ι Ιεχωβάς ντα μα τι παρατίνας-λεν. Κα ντικχάς μερικά παραδείγματα πφραλένγκε αμαρέ ντιβεσένταρ σο τζουβντιλέ-λες ανταβά.

6, 7. Σαρ βοηθίνενα-αμέν αμαρέ προσευχές τι τθεράς πάλι ειρήνη αμαρέ γκοντιάτε; Βακερέν εκ παράδειγμας.

⁶ Κάνα ο Ράιαν ντα η Τζουλιέτ λιντέ αμπέρι ότι να κα συνεχίνενας τι υπηρετίνεν σαρ ειδικοί σκαπανείς, στεναχωρισάλε μπουτ. Ο Ράιαν βακερέλα: «Κερντάμ αμέσως προσευχή κο Ιεχωβά. Τζανάας ότι τθεράας εκ ξεχωριστή ευκαιρία τι σικαβάς ότι τθεράσα λέσκε εμπιστοσύνη. Μπουτ τζενέ αμαρέ κχανγκιριάταρ ισινέ νεβέ κι αλήθεια, οτθάρ προσευχίντιλαμ τι βοηθίνελ-αμέν ο Ιεχωβά τι ντας εκ μπουτ λατσσό παράδειγμας πίστης».

⁷ Σαρ απαντιντάς ο Ιεχωβά λένγκε προσευχιάτε; Ο Ράιαν ντέλα-πες γκοντί: «Μόλις κερντάμ ι προσευχή, ο μπέτι αισθήματα ντα ο ανησυχίες σο τθεράας νασλέ. Η ειρήνη ι Ντεβλέσκι αρακχαβέλας αμαρό γκι ντα αμαρί γκοντί. Αγαντάμ ότι, αν κα συνεχίναας τι ντικχάς ο πράγματα με το σωστός τρόπος, ο Ιεχωβά κα συνεχίνελας τι χρησιμοποιήνελ-αμέν».

8-10. (α) Σαρ μπορίνελα τι βοηθίνελ-αμέν ο πνεύμας ι Ντεβλέσκο κάνα ανησυχίνασα; (β) Σαρ μπορεί τι βοηθίνελ-αμέν ο Ιεχωβά κάνα ισινάμ αφοσιωμέ κι υπηρεσία λέσκι;

⁸ Ο πνεύμας ι Ντεβλέσκο μπορίνελα τι  ντελ-αμέν ηρεμία ντα τι γκερέλ-αμέν εδαφιόντε σο κα βοηθίνεν-αμέν τι αγαβάς σο ισί μπαγιά σημαντικός κι ζωή. (Διαβάνεν Ιωάννης 14:​26, 27) Σκεφτίνεν σο αβιλό-πες εκχέ αντρογυνόστε, κο Φίλιπ ντα κι Μαίρη, σο υπηρετιντέας κο Μπέθελ σχεδόν 25 μπρεσά. Αντρέ σε σταρ μάσεκ, χασαρντέ πουμαρέ νταΐν ντα ατζέκ εκχέ αγαπημέ τζενές, ντα αρχισάλε τι φροντίνεν ι Μαιριάκε νταντές σο τθερέλα άνοια.

⁹ Ο Φίλιπ βακερέλα: «Αμντίναβας ότι ντάβας-λεν πέρα λατσσές, αλλά κάτι λειπίνελας. Σε εκ μάθημας ι Σκοπιάκο, ντικχλόμ ο εδάφιος Κολοσσαείς 1:​11. Ισί μπαγιά ότι νταϊντίναβας, αλλά όχι με το πιο λατσσό τρόπος. Χρειαζίντιβελας “τι νταϊντίναβ σαρέ ο πράγματα με υπομονή ντα χαρά”. Ανταβά εδάφιος αντάς μι γκοντιάτε ότι η χαρά να αβέλα όταν τζάνα λατσσές σαρέ ο πράγματα κι ζωή, αλλά αβέλα όταν μουκχάβα ο πνεύμας ι Ντεβλέσκο τι επηρεάνελ μι ζωή».

¹⁰ Επειδή ο Φίλιπ ντα η Μαίρη ατσσιλέ αφοσιωμέ κι υπηρεσία κι Ιεχωβάσκι, ευλογισάλε μπουτέ τροπόντζαρ. Χάνικ πιο σοράν αφού νασλέ κατά Μπέθελ, ο ντούι-ντα αρχισάλε μελέτες τζενέντζαρ σο κερένας πρόοδος ντα σο μανγκένας τι κερέν μελέτη πιο μπουτ από εκ φαρ κι εβδομάδα. Η Μαίρη βακερέλα: «Ανταλά τζενέ ντένας-αμέν μπουτ μπαρί χαρά, ντα ανταλέ τροπόσαρ ο Ιεχωβά βακερέλας αμένγκε ότι σαρέ κα τζαν λατσσές».

11, 12. (α) Σαρ ντινάς ο Ιωσήφ κο Ιεχωβά κάτι για τι ευλογίνελ; (β) Σαρ ευλογιντάς ο Ιεχωβά τον Ιωσήφ;

¹¹ Κάνα αβένα-πες αλλαγές αμαρέ ζωγιάτε σο να μπεκλεντίνασα, αγχώντιβασα αζόμ μπουτ σο σκεφτίνασα σάντε αμαρέ προβλήματα. Ανταβά κα μπορίνελας τι αβέλ-πες κο Ιωσήφ-ντα. Αλλά βοβ τραμπιντάς τι κερέλ ο πιο λατσσό σο μπορίνελας. Αντικάς σαρ κερντάας σκληρή μπουτί ι Πετεφρίσκε, κερντάς σκληρή μπουτί κι φυλακή-ντα για τι κερέλ σο-ντα βακερέλας λέσκε ο υπεύθυνος ι φυλακιάκο.​—Γένεση 39:​21-23.

¹² Εκ ντιβές, ο Ιωσήφ διορισάλο τι φροντίνελ ντουέ φυλακισμέ μουρσέν σο υπηρετιντέας ι Φαραώς. Ο Ιωσήφ σικαβέλας λένγκε λατσσιπέ, ντα ο ντούι μουρσά νιωσάλε μπουτ άνετα τι βακερέν λέσκε πουμαρέ ανησυχίες ντα ο σουνέ σο ντικχλέ ι ιράτ σο νακχλί. (Γένεση 40:​5-8) Παρόλο σο ο Ιωσήφ να τζανέλας-λες αζομάν, οντιά συζήτηση κα βοηθίνελας-λες τι ελευθερώντιβελ. Ντούι μπρεσά πιο σοράν, νικίστιλο κατά φυλακή ντα αβιλό άρχοντας κι Αίγυπτος με μπουτ μπαρί εξουσία. Σάντε ο Φαραώ τθερέλας πιο μπαρί εξουσία λέσταρ!​—Γένεση 41:1, 14-16, 39-41.

13. Σο-ντα τι αβέλα-πες αμαρέ ζωγιάτε, σαρ μπορίνασα τι ντας κο Ιεχωβά κάτι τι ευλογίνελ;

 ¹³ Σαρ κο Ιωσήφ, αντικάς αμένγκε-ντα μπορεί τι αβέλ-πες κάτι σο ναστί ελεγχίνασα. Αν όμως τθεράσα υπομονή ντα κεράσα ο πιο λατσσό σο μπορίνασα, ο Ιεχωβά κα ευλογίνελ-αμέν. (Ψαλμός 37:5) Ατζέ-ντα κάνα νιωθίνασα μπερδεμέ ντα ανησυχίνασα, “να κα ατσσάς χωρίς ελπίδα”. (2 Κορινθίους 4:8) Ο Ιεχωβά κα αβέλ αμέντζαρ, ειδικά αν κα ατσσάς αφοσιωμέ κο έργος.

14-16. Σαρ ατσσιλό αφοσιωμέ κο έργος ο ευαγγελιστής Φίλιππος παρόλο σο αβιλέ-πες αλλαγές λέσκε ζωγιάτε;

¹⁴ Ο ευαγγελιστής Φίλιππος ισί εκ μπουτ λατσσό παράδειγμας τζενέσκο σο ατσσιλό αφοσιωμέ κο έργος παρόλο σο αβιλέ-πες αλλαγές λέσκε ζωγιάτε. Κι Ιερουσαλήμ, ο Φίλιππος τθερέλας εκ νεβό διορισμός. (Πράξεις 6:​1-6) Σοράν σαρέ αλλαξάλε. Αφού μουνταρντέ ι Στεφανός, ο Χριστιανοί τθερένας μπαρό διωγμός ντα οτθάρ νασλέ κατά Ιερουσαλήμ. Επειδή ο Φίλιππος μανγκέλας τι συνεχίνελ τι κερέλ μπουτ πράγματα κι υπηρεσία κι Ιεχωβάσκι, γκιλό κι Σαμάρεια, εκ πόλη σο ο τζενέ τθερένας ανάγκη τι ασουνέν ο λατσσέ αμπέρια.​—Ματθαίος 10:5· Πράξεις 8:1, 5.

¹⁵ Ο Φίλιππος μανγκέλας αντράλ πι γκίσταρ τι τζαλ κατέ-ντα τι σικαβέλας λέσκε ο πνεύμας ι Ντεβλέσκο. Οτθάρ, ο Ιεχωβά χρησιμοποιηντάς-λες για τι κερέλ έργος τθανέντε σο ο τζενέ να ασουντέας ο λατσσέ αμπέρια. Μπουτ Ιουδαίοι να μανγκένας ι Σαμαρειτέν ντα συμπεριφερίντιβενας λένγκε μπέτι τροπόσαρ. Αλλά ο Φίλιππος να ξεχωρίνελας ι τζενέν ντα βακερέλας λένγκε ο λατσσέ αμπέρια χαράσαρ. Ο Σαμαρείτες ασουνένας-λες «σαρέ γιεκ»!​—Πράξεις 8:​6-8.

¹⁶ Σοράν, ο πνεύμας ι Ντεβλέσκο γκερντάς ι Φιλιππός κι Άζωτος ντα κι Καισάρεια για τι βακερέλ ο λατσσέ αμπέρια οτθέ σο ισινέ μπουτ τζενέ γιαβερέ τθεμένταρ. (Πράξεις 8:​39, 40) Αζομάν, η ζωή ι Φιλιππόσκι αλλαξάλι πάλι. Μπεσλό οτθέ ντα πουταρντάς φαμιλί. Αλλά σο-ντα αλλαγές αβιλέ-πες λέσκε ζωγιάτε, ο Φίλιππος ατσσιλό αφοσιωμέ κο έργος ντα ο Ιεχωβά συνεχιντάς τι ευλογίνελ εμ λες εμ λέσκι φαμιλί.​—Πράξεις 21:8, 9.

17, 18. Κάνα αμαρέ ζωγιάτε αβένα-πες αλλαγές, σαρ κα βοηθίντιβας άμα κα αβάς αφοσιωμέ κο έργος;

¹⁷ Μπουτ τζενέ σο ισί κι ολοχρόνια υπηρεσία βακερένα ότι επειδή ισί αφοσιωμέ κο έργος ισί χαρούμενοι ντα ντικχένα ο  πράγματα με σωστός τρόπος ατζέ-ντα κάνα αβένα-πες αλλαγές λένγκε ζωγιάτε. Για παράδειγμας, κάνα ο Όσμπορν ντα η Πολάιτ, εκ αντρόγυνος κατά Νότια Αφρική, νασλέ κατά Μπέθελ, αμντισάλε ότι κα αρακχένας σουγκό εκ μπουτί χάνικ σαατίντζαρ ντα εκ τθαν για τι μπεσέν. Αλλά ο Όσμπορν βακερέλα: «Δυστυχώς, να αρακχλάμ μπουτί αζόμ σουγκό καζόμ αμντίναας». Η Πολάιτ βακερέλα: «Τριν μάσεκ να μπορίναας τι αρακχάς μπουτί, ντα να τθεράας τίποτα κι νάκρη. Ο πράγματα ισινέ μπουτ δύσκολα».

¹⁸ Σο βοηθιντάς ανταλέ αντρογυνός οντουλέ δύσκολε περιπτωσιάτε; Ο Όσμπορν βακερέλα: «Τζάας κο έργος ι πφραλέντζαρ ντα ανταβά βοηθιντάς-αμέν μπουτ τι ατσσικιαράς αμαρί γκοντί σημαντικέ πραγματέντε ντα τι σκεφτίνας ο λατσσέ πράγματα σο τθεράας». Αντίς τι μπεσέν κχερέ ντα τι ανησυχίνεν, αποφασιντέ τι κερέν μπουτ πράγματα κο έργος. Ανταβά αντάς λένγκε μπαρί χαρά! Ντα ο Όσμπορν βακερέλα: «Ρόνταας παντού μπουτιάκε, ντα τελικά αρακχλάμ».

19-21. (α) Σο κα βοηθίνελ-αμέν τι τθεράς ειρήνη αμαρέ γκοντιάτε; (β) Σαρ μπορίνασα τι βοηθίντιβας κάνα δεχτίνασα εκ αλλαγή σο να μπεκλεντίνασα;

¹⁹ Σαρ ντικχλάμ, αν κεράσα ο πιο λατσσό σο μπορίνασα σαρ-ντα τι αβέν ο πράγματα αμαρέ ζωγιάτε ντα τθεράσα εμπιστοσύνη κο Ιεχωβά σαρέ κο πράγματα, κα τθεράς ειρήνη αμαρέ γκοντιάτε σο-ντα τι αβέλ-πες. (Διαβάνεν Μιχαίας 7:7) Μπορεί τι αγαβάς ότι αμαρί φιλία ι Ιεχωβάσαρ αβιλί πιο ζουρανί επειδή δεχτιντάμ εκ αλλαγή σο αβιλί-πες. Η Πολάιτ εξηγίνελα ότι κάνα αλλαντάς διορισμός ντα νασλί κατά Μπέθελ σικλιλί σο μανγκέλα τι βακερέλ μπαγιά τι στηρίντιβες κο Ιεχωβά ατζέ-ντα κάνα η ζωή ντικχίντιβελα μπουτ δύσκολη. Βόι βακερέλα: «Πλησιαντόμ πιο μπουτ ι Ιεχωβάς».

²⁰ Η Μαίρη σο βακερντάμ λάκε πιο τζανγκλέ, συνεχίνελα τι φροντίνελ πι πφουρέ νταντές ντα κερέλα σκαπανικός. Βόι βακερέλα: «Σικλιλόμ ότι κάνα ανησυχίναβα,  χρειαζίντιβελα τι σταματίναβ οντουβά σο κεράβα, τι προσευχίντιβαβ ντα τι ηρεμίναβ. Ο πιο σημαντικός πράγμας σο σικλιλόμ ισί τι μουκχάβ ο πράγματα κο βαστά κι Ιεχωβάσκε, ντα ανταβά κα βοηθίνελ-μαν ατζέ πιο μπουτ κο μέλλον».

²¹ Ο Λόιντ ντα η Αλεξάνδρα βακερένα ότι ο αλλαγές λένγκε ζωγιάτε δοκιμαντέ λένγκι πίστη τροπόντζαρ σο να μπεκλεντίνενας. Όμως, μπορίνενα τι ντικχέν σαρ βοηθιντέ-λεν κι πραγματικότητα ανταλά δοκιμασίες. Ακανά τζανένα ότι λένγκι πίστη ισί μπουτ ζουρανί ντα ντέλα-λεν παρηγοριά κάνα τθερένα προβλήματα. Επίσης, νιωθίνενα ότι αβιλέ πιο λατσσέ τζενέ.

22. Άμα προσπαθίνασα τι κεράς ο πιο λατσσό σο μπορίνασα σαρ-ντα τι αβέν ο πράγματα αμαρέ ζωγιάτε, καλέ πραγμάσκε μπορίνασα τι αβάς σίγουροι;

²² Ανταλέ ντουνιάστε, μπορεί τι αβέν-πες αμαρέ ζωγιάτε αλλαγές σο να μπεκλεντίνασα. Μπορεί τι λας εκ νεβό διορισμός κι υπηρεσία κι Ιεχωβάσκι, τι τθεράς προβλήματα υγείας ή τι χρειαζίντιβελ τι φροντίνας αμαρί φαμιλί με εκ νεβό τρόπος. Αλλά σο-ντα τι αβέλ-πες, τι αβέν σίγουροι ότι ο Ιεχωβά πφαμπόλα τουμένγκε ντα ότι κα βοηθίνελ-τουμέν κο σωστός σαάτι. (Εβραίους 4:​16· 1 Πέτρου 5:6, 7) Κερέν ο πιο λατσσό σο μπορίνενα σαρ-ντα τι αβέν ο πράγματα τουμαρέ ζωγιάτε. Τι προσευχίντιβεν τουμαρέ Νταντέστε, κο Ιεχωβά, ντα σικλιόν τι τθερέν εμπιστοσύνη λέστε σαρέ κο πράγματα. Αντικάς, καζόμ-ντα τι αλλάνεν ο πράγματα τουμαρέ ζωγιάτε, κα τθερέν πάντα τουμαρέ γκοντιάτε ειρήνη κατά Ιεχωβά.