ΙΣΤΟΡΙΑ ΜΙ ΖΩΓΙΑΚΙ
Ο Ιεχωβά Ευλογιντάς Μπουτ μι Απόφαση
Ισινέ ο μπρες 1939. Ιστίντιλαμ αντρέ κι ιράτ ντα κερντάμ ι κουρσάσαρ πιο μπουτ από εκ σαάτι για τι τζας κι χουρντί πόλη Τζόπλιν, κο Μισούρι κο ΗΠΑ. Οτθέ, χωρίς τι αγαβέν-αμέν, τσσουβάας φυλλάδια τελάλ κατά πόρτες σαρέ κο κχερά. Κάνα τελειωσάλαμ, τσσουντάμ-αμέν κι κούρσα ντα γκιλάμ τι αρακχάς ι γιαβερέν. Ισινέ νωρίς το πρωί. Αλλά σόσκε γκιλάμ κο έργος πριν τι νικιόλ ο κχαμ ντα νασλάμ κατά τομέας αζόμ σουγκό; Κα βακεράβ τουμένγκε ατζεχάνικ.
ΜΠΙΑΝΤΙΛΟΜ κο 1934. Αζομάν, μο ντατ ντα μι ντάι, ο Φρεντ ντα η Έντνα Μόλοχαν, ισινέ 20 μπρεσά Σπουδαστές της Γραφής (Μάρτυρες ι Ιεχωβάσκε). Τθεράβα λένγκε μπαρί εκτίμηση σο σικλιαρντέ-μαν τι μανγκάβ ι Ιεχωβάς. Τζουβντιάας κο Πάρσονς, εκ χουρντί πόλη κο Κάνσας. Σχεδόν σαρέ αμαρέ κχανγκιριάτε ισινέ χρισμέ. Αμαρί φαμιλί να χασαρέλας ο συναθροίσεις ντα ο έργος. Κο πιο μπουτ Σάββατα κο απόγευμας, κεράας έργος κο ντρομ, ανταβά σο αντιβές βακεράσα-λες δημόσια μαρτυρία. Μπάζιμ κχινιάας-αμέν, αλλά μο ντατ πάντα λέλας αμένγκε παγωτός κάνα τελειώναας.
Ο τομέας αμαρέ χουρντέ κχανγκιριάκο ισινέ μπαρό ντα τθερέλας μπερεκέτι χουρντέ πόλεις ντα μπουτ κτήματα. Μερικοί αγρότες, αντίς τι ντεν-αμέν λοβέ για το έντυπα, ντένας-αμέν λαχανικά πουμαρέ κηπόσταρ, φρέσκα βαντρέ (κατευθείαν κατά κοτέτσι) ή ατζέ-ντα τζουβντέ κχανίν. Μο ντατ ποκιντάας ο έντυπα πιο τζανγκλέ, οτθάρ ατσσικιαρέλας οντουλά σο ντένας-αμέν για τι χαλ αμαρί φαμιλί.
ΕΚΣΤΡΑΤΕΙΕΣ ΓΙΑ ΤΙ ΚΕΡΑΣ ΕΡΓΟΣ
Μο ντατ ντα μι ντάι λιντέ εκ φωνογράφος για τι χρησιμοποιήνεν-λες κο έργος. Με ισινόμας μπουτ χουρντό για τι χρησιμοποιήναβ-λες, αλλά χαιρίναβας τι βοηθίναβ μι νταντές ντα μι νταγιά τι τσσουβέν κο επανεπισκέψεις ή κο μελέτες ηχογραφήσεις κατά ομιλίες σο κερντάας ο πφραλ Ρόδερφορντ.
Μι νταντέσαρ ντα μι νταγιάσαρ ανγκλάλ αμαρέ κουρσάταρ σο τθερέλα μεγάφωνα
Αμαρί κούρσα ισινέ εκ Φορντ του 1936 ντα μο ντατ τσσουντάας εκ μπαρό μεγάφωνος οπράλ. Ισινέ μπουτ λατσσό για το έργος. Ο πιο μπουτ φαρ, κι αρχή τσσουβάας μουσική για τι ταρτίνας ι τζενένγκι προσοχή ντα σοράν τσσουβάας εκ ομιλία. Σοράν, ντάας έντυπα κο τζενέ σο σικαβένας ενδιαφέρον.
Κι χουρντί πόλη Τσέριβεϊλ κο Κάνσας, μο ντατ τσσουντάς ι κούρσα κο δημοτικός πάρκος, οτθέ σο μπουτ τζενέ χαλαρώνενας κο Κυριακές. Σοράν, αβιλέ ο ασκέρια ντα βακερντέ λέσκε ότι κα μπορίνελας τι τσσουβέλ-λα σάντε αβρί κατά πάρκος. Μο ντατ γκερντάς ι κούρσα απέναντι κατά πάρκος για τι μπορίνεν ο τζενέ τι ασουνέν λατσσές. Ισινέ πάντα
μπουτ σουκάρ τι κεράβ έργος μι νταντέσαρ ντα μι πιο μπαρέ πφραλέσαρ, τον Τζέρι.Οντουλά μπρεσά κεράας εκστρατείες τθανέντε σο ισινέ μπουτ εναντίωση. Σαρ βακερντόμ κι αρχή, ιστιάας αντρέ κι ιράτ ντα, χωρίς τι αγαβέν-αμέν, τσσουβάας φυλλάδια ή βιβλιάρια τελάλ κατά πόρτες. Σοράν, γκιντίντιβαας αβρί κατά πόλη για τι ντικχάς άμα ο ασκέρια ασταρντέας καέκ τζενές.
Κάτι γιαβέρ μπουτ σουκάρ σο κεράας ισινέ κάνα πφιράας κο ντρομ σαρέ γιεκ για τι ντας μαρτυρία. Ιριάας μπαρέ πινακίδες ντα πφιράας αντρέ κι πόλη. Ντάβα-μαν γκοντί κάνα ο πφραλά αβιλέ κι πόλη σο μπεσάας ντα ιρίνας πινακίδες σο γραφίνενας «Η Θρησκεία Ισί Παγίδα ντα Απάτη». Ξεκινιντέ αμαρέ κχερέσταρ, πφιρντέ περίπου εκ επκάς χιλιόμετρος κι πόλη ντα σοράν βουρτισάλε. Ευτυχώς, καέκ να εμποδιντάς-λεν ντα μπουτ τζενέ σικαντέ ενδιαφέρον.
ΣΥΝΕΛΕΥΣΕΙΣ ΣΟ ΑΒΙΛΕ-ΠΕΣ ΚΑΝΑ ΙΣΙΝΟΜΑΣ ΧΟΥΡΝΤΟ
Αμαρί φαμιλί τζάλας μπουτ φαρ κο Τέξας κάνα αβένας-πες συνελεύσεις. Μο ντατ κερέλας μπουτί κο τρένα, οτθάρ μπορίναας τι τσσουβάς-αμέν κο τρένος χωρίς τι ποκινάς για τι τζας κο συνελεύσεις ντα αμαρέ τζενέντε. Ο πιο μπαρό πφραλ μι νταγιάκο, ο Φρεντ Γουίζμαρ, ντα λέσκι ρομνί, η Γιουλέιλι, τζουβντιόνας κο Τεμπλ κο Τέξας. Μο κακ ο Φρεντ σικλιλό ι αλήθεια χάνικ πιο σοράν κατά 1900, κάνα ισινέ τερνό. Μπολντιλό ντα βακερντάς οντουλά σο σικλιλόας πι πφραλένγκε σο εκ λένταρ ισινέ μι ντάι. Ο πφραλά κο Τέξας τζανένας μπουτ λατσσές μι κακές, σόσκε ισινέας υπηρέτης ζώνης (ακανά βακέρντιβελα επίσκοπος περιοχής). Ισινέ λατσσό, χαρούμενος, υπηρετίνελας αντράλ πι γκίσταρ ντα μουκχλάς μάνγκε μπουτ λατσσό παράδειγμας.
Κο 1941, γκιλάμ ι τρενόσαρ κο Σεντ Λούις, σο ισί κο Μισούρι, για τι παρακολουθίνας εκ μπαρί συνέλευση. Βακερντέ σαρέ ι τσσαβένγκε ντα ι τσσαΐνγκε τι μπεσάς πασέ κο βήμας για τι ασουνάς ι ομιλία κατά πφραλ Ρόδερφορντ σο τθερέλας ο θέμας «Τσσαβέ ι Βασιλιάσκε». Κο τέλος κι ομιλιάκο, 15.000 τερνέ λιντέ εκ μπουτ σουκάρ δώρος. Ο πφραλ Ρόδερφορντ ντα οντουλά σο βοηθίνενας-λες ντινέ κο κάθε εκ αμένταρ ο νεβό βιβλίος Τέκνα (Children).
Κο 1943, κο Απρίλιος, παρακολουθιντάμ ι συνέλευση «Πρόσκληση σε Δράση», κο Κόφιβιλ, σο ισί κο Κάνσας. Οτθέ, ασουντάμ ι ανακοίνωση ότι σαρέ ο κχανγκιριά κα τθερένας εκ νεβί σχολή, ι Σχολή Θεοκρατικής Διακονίας. Ντα λιντάμ εκ βιβλιάριος σο τθερέλας 52 μαθήματα για τι χρησιμοποιήνας-λες κι σχολή. Οντουβά μπρες, κερντόμ μι πρώτη ομιλία. Οντιά συνέλευση ισινέ ξεχωριστή μάνγκε επειδή, γιεκ χάνικ γιαβερέ τζενέντζαρ, μπολντιλόμ κο σουρντό πανί σε εκ λίμνη οτθέ πασέ.
ΜΑΝΓΚΑΒΑΣ ΤΙ ΥΠΗΡΕΤΙΝΑΒ ΚΟ ΜΠΕΘΕΛ
Τελειωντόμ ο σχολείος κο 1951 ντα έπρεπε τι αποφασίναβ σο κα κεράβας μι ζωγιάτε. Μο πφραλ ο Τζέρι υπηρετιντάας κο Μπέθελ. Μανγκάβας μπουτ τι τζαβ με-ντα κο Μπέθελ, οτθάρ μπουτσσαντόμ αίτηση. Χάνικ πιο σοράν, καλιντέ-μαν κο Μπέθελ ντα αρχισάλομ τι υπηρετίναβ οτθέ στις 10 Μαρτίου 1952. Ανταγιά ισινέ εκ μπουτ λατσσί απόφαση σο βοηθιντάς-μαν τι κεράβ πιο μπουτ πράγματα για τι υπηρετίναβ ι Ντεβλές.
Μανγκάβας τι κεράβ μπουτί κο τυπογραφείος για τι βοηθίναβ τι κερντιόν αμαρέ περιοδικά ντα γιαβερά έντυπα. Όμως, ποτές να κερντόμ μπουτί οτθέ. Αλλά διορισάλομ σερβιτόρος ντα πιο σοράν κι κουζίνα. Μπεϊντιντόμ ανταγιά μπουτί ντα σικλιλόμ μπουτ πράγματα. Κεράας μπουτί με βάρδιες, οτθάρ τθεράβας ελεύθερος χρόνος αντρέ κο ντιβές. Τζάβας μπουτ φαρ κι βιβλιοθήκη σο ισινέ κο Μπέθελ ντα χρησιμοποιήναβας μπουτ βιβλία για τι κεράβ μι προσωπική μελέτη. Ανταβά βοηθιντάς-μαν τι κεράβ μι πίστη ντα μι φιλία ι Ιεχωβάσαρ πιο ζουρανί. Νιωθίναβας ατζέ πιο αποφασισμέ τι υπηρετίναβ ι Ιεχωβάς κο Μπέθελ καζόμ καιρός κα μπορίναβας. Ο Τζέρι νασλόας κατά Μπέθελ κο 1949 ντα παντρισάλο με την Πατρίσια, αλλά μπεσένας οτθέ πασέ, κο Μπρούκλιν. Βοηθίνενας-μαν ντα ενθαρρύνενας-μαν μπουτ καζόμ ισινόμας νεβό κο Μπέθελ.
Χάνικ πιο σοράν αφού γκιλόμ κο Μπέθελ, ο πφραλά αρχισάλε τι ρόντεν Μπεθελιτένγκε σο κα μπορίνενας τι κερέν δημόσιες ομιλίες. Οντουλά πφραλά διορίντιβενας τι τζαν αμαρέ κχανγκιρίντε
σο ισινέ μέχρι 320 χιλιόμετρα ντουρ κατά Μπρούκλιν. Οτθέ, κα κερένας ομιλία ντα κα τζάνας κο έργος ι πφραλέντζαρ. Ισινόμας εκ κατά πφραλά σο τραμπίντιλε. Παρόλο σο τθεράβας μπουτ άγχος, αρχισάλομ τι τζαβ αμαρέ κχανγκιρίντε ντα τι κεράβ ομιλίες. Αζομάν, ο ομιλίες ατσσικιαρένας εκ σαάτι. Ο πιο μπουτ φαρ τζάβας αμαρέ κχανγκιρίντε ι τρενόσαρ. Ντάβα-μαν γκοντί μπουτ λατσσές εκ Κυριακή κο 1954 σο ισινέ βεν. Τσσουντόμ-μαν εκχέ τρενόστε για τι βουρτίναβ κι Νέα Υόρκη ντα υπολογίναβας τι ερεσάβ κο Μπέθελ απόγευμας. Αλλά κο ντρομ, αρχισάλο τι πφούντελ μπουτ ζουρανές ντα τι ντελ βιβ. Ο μηχανές ι τρενόσκε σταματισάλε ντα ερεσλόμ κι Νέα Υόρκη Δευτέρα πέντε το πρωί. Λιντόμ ο μετρός για τι τζαβ κο Μπρούκλιν ντα γκιλόμ κατευθείαν τι κεράβ μπουτί κι κουζίνα. Αργισάλομας χάνικ ντα ισινόμας μπουτ κχινό, αφού να σοτόμας σαστί ιράτ. Αλλά η χαρά σο τθεράβας επειδή υπηρετίναβας αμαρέ κχανγκιριά ντα γνωρίναβας μπουτέ νεβέ πφραλέν αξίνελας πιο μπουτ σαρέ κατά θυσίες σο κερντόμ.Ετοιμάνασα-αμέν κο στούντιος για εκ εκπομπή κατά σταθμός WBBR
Κο πρώτα μπρεσά σο ισινόμας κο Μπέθελ, αρχισάλομ επίσης τι συμμετεχίναβ σε εκ εκπομπή κο ραδιόφωνος σο αβέλας-πες κατά σταθμός WBBR εκ φαρ κι εβδομάδα ντα τθερέλας τι κερέλ ι Γραφιάσαρ. Ο στούντιος ισινέ αζομάν κο δεύτερος όροφος κι οδός Κολούμπια Χάιτς 124. Ο πφραλ Α. Χ. Μακμίλαν, σο υπηρετιντάας κο Μπέθελ μπουτ μπρεσά, συμμετεχίνελας μπουτ φαρ κο εκπομπές. Ντάας-λες βίκος πφραλ Μακ. Ισινέ μπουτ λατσσό παράδειγμας αμένγκε σο ισινάμας τερνέ Μπεθελίτες σόσκε ατσσιλόας πιστός παρόλο σο νακχλάας μπουτ δυσκολίες.
Ντάας ακαλά φυλλάδια για τι διαφημίνας ο σταθμός WBBR
Κο 1958, μο διορισμός αλλαξάλο ντα αρχισάλομ τι συνεργαζίντιβαβ μπουτ οντουλέντζαρ σο τελειώνενας ι Σχολή Γαλαάδ. Βοηθίναβας οντουλέ μουρσέν ντα τζουβλίν σο υπηρετίνενας αντράλ πουμαρέ γκίσταρ τι λεν πουμαρέ βίζες ντα κανονίναβας λένγκο ταξίδι. Ο ταξίδια ι αεροπλανόσαρ ισινέ μπουτ πααλίς αζομάν, οτθάρ ο πιο μπουτ πφραλά σο τελειώνενας ι σχολή ντα μπουτσσάντιβενας κι Αφρική ή κι Ασία τζάνας οτθέ καραβίσαρ. Κάνα νακχλέ ο μπρεσά ντα γουλίστιλε ο τιμές κο αεροπλάνα, ο πιο μπουτ ιεραπόστολοι τζάνας οτθέ σο μπουτσσαβένας-λεν ι αεροπλανόσαρ.
Πριν τι αβέλ η αποφοίτηση, ετοιμάναβα ο διπλώματα ι πφραλένγκε σο τελειωντέ ι Γαλαάδ
ΤΑΞΙΔΙΑ ΣΕ ΣΥΝΕΛΕΥΣΕΙΣ
Κο 1960, κανονιντόμ ταξίδια ι αεροπλανόσαρ κατά Αμερική για Ευρώπη επειδή κα αβένας-πες διεθνείς συνελεύσεις κο 1961. Με-ντα γκιλόμ σε εκ ανταλέ συνελευσιένταρ κο Αμβούργος κι Γερμανία. Σοράν, γιεκ γιαβερέ τρινέ πφραλέντζαρ κατά Μπέθελ νοικιαντάμ εκ αμάξι ντα γκιλάμ κατά Γερμανία κι Ιταλία για τι ντικχάς ο γραφείος τμήματος κι Ρώμη. Οτθάρ, γκιλάμ κι Γαλλία, νακχλάμ ο βεσά σο βακέρντιβενα Πυρηναία ντα ερεσλάμ κι Ισπανία, σο οτθέ ο έργος ισινέ απαγορευμέ. Καταφεριντάμ τι ντας κο πφραλά κι Βαρκελώνη μερικά έντυπα σο πακιαρντάμας-λεν για τι μοιάζεν δώρα. Ισινέ μπουτ σουκάρ σο ντικχλάμ ι πφραλέν! Σοράν, γκιλάμ κο Άμστερνταμ ντα βουρτισάλαμ ι αεροπλανόσαρ κι Νέα Υόρκη.
Κο 1962, διορισάλομ τι κανονίναβ ο ταξίδια σο κα κερένας 583 πφραλά για τι παρακολουθίνεν ι διεθνής συνέλευση «Αιώνιον Ευαγγέλιον» σο αβιλί-πες τθανέντε σαρί κι πφουβ κο 1963. Οντουλά
πφραλά κα τζάνας συνελευσιέντε σο κα αβένας-πες κι Ευρώπη, κι Ασία ντα κο Νότιος Ειρηνικός, ντα σοράν κα τζάνας κι Χονολουλού, σο ισί κι Χαβάη, ντα κι Πασαντίνα, σο ισί κι Καλιφόρνια. Επίσης, κα τζάνας κο Λίβανος ντα κι Ιορδανία για τι ντικχέν πασάλ ο τθανά σο βακέρντιβενα κι Γραφή. Κο Μπέθελ, κανονιντάμ ο εισιτήρια ντα ο ξενοδοχεία ντα λιντάμ σαρέ ο βίζες σο χρειαζίντιβενας.ΕΚ ΝΕΒΟ ΤΖΕΝΟ ΜΙ ΤΑΞΙΔΙΝΤΕ
Ο μπρες 1963 ισινέ μπουτ σημαντικός μάνγκε για εκ γιαβέρ-ντα λόγος. Στις 29 Ιουνίου, παντρισάλομ με τη Λάιλα Ρότζερς κατά Μισούρι, σο αρχισάλι τι υπηρετίνελ κο Μπέθελ κο 1960. Αφού νακχλί εκ εβδομάδα αμαρέ μπιαβέσταρ, η Λάιλα ντα με γκιλάμ κο ταξίδι σο κερντέ οντουλά πφραλά ντα γκιλάμ κι Ελλάδα, κι Αίγυπτος ντα κο Λίβανος. Οτθάρ, λιντάμ ο αεροπλάνος για τι τζας κι Ιορδανία. Όμως, αμαρό έργος οτθέ ισινέ απαγορευμέ ντα ο κράτος να ντέλας βίζα κο Μάρτυρες κι Ιεχωβάσκε. Οτθάρ, να τζανάας σο κα αβέλας-πες κάνα κα ερεσάας. Χαιρισάλαμ μπουτ ντα σαστισάλαμ κάνα ντικχλάμ μερικέ πφραλέν κο αεροδρόμιος τι ασταρέν εκ μπαρό πανός σο βακερέλας: «Λατσσιμάσαρ αβιλέν Μάρτυρες ι Ιεχωβάσκε»! Ισινέ μπουτ σουκάρ σο ντικχλάμ ο τθανά σο τζουβντιόλας ο Αβραάμ, ο Ισαάκ ντα ο Ιακώβ, ο τθανά σο κερντάς έργος ο Ιησούς ντα ο απόστολοι ντα ο τθανά σο λένταρ αρχισάλι η Χριστιανοσύνη μέχρι σο ερεσλί «σαρί κι πφουβ».—Πράξεις 13:47.
Για 55 μπρεσά, η Λάιλα υποστηρίνελα-μαν πιστά σαρέ κο διορισμοί σο τθεράσα. Γκιλάμ μπουτ φαρ κι Ισπανία ντα κι Πορτογαλία κάνα ο έργος οτθέ ισινέ απαγορευμέ. Τθεράας ι ευκαιρία τι ενθαρρύνας ι πφραλέν ντα τι γκεράς λένγκε έντυπα ντα γιαβερά πράγματα σο χρειαζίντιβενας. Μπορισάλαμ επίσης τι ντικχάς μερικέ πφραλέν σο ισινέ φυλακισμέ κο Κάδιθ, κι Ισπανία. Χαιρισάλομ μπουτ σο ενθαρρυντόμ-λεν εκχέ ομιλιάσαρ.
Με την Πατρίσια ντα τον Τζέρι τζάσα κι συνέλευση «Επί Γης Ειρήνη» κο 1969
Ο μπρεσά σο αβιλέ σοράν κατά 1963, κανονιντόμ ταξίδια για διεθνείς συνελεύσεις σο αβιλέ-πες κι Κεντρική ντα κι Νότια Αμερική, κι Άπω Ανατολή, κι Αυστραλία, κι Αφρική, κι Ευρώπη, κι Νέα Ζηλανδία, κο Πόρτο Ρίκος ντα κι Χαβάη. Η Λάιλα ντα με γκιλάμ μπουτέ συνελευσιέντε σο να μπιστράσα-λεν, σαρ για παράδειγμας κο 1989 κι Βαρσοβία σο ισί κι Πολωνία. Μπουτ πφραλά κατά Σοβιετική Ένωση μπορισάλε τι τζαν ανταλέ μπαρέ συνελευσιάτε. Ανταγιά ισινέ η πρώτη συνέλευση λένγκε ζωγιάτε! Γνωριντάμ πφραλέν ντα πφενίν σο ισινέ φυλακισμέ μπουτ μπρεσά κι Σοβιετική Ένωση επειδή ατσσιλέ πιστοί.
Μπεϊντιντόμ μπουτ ο προνόμιος τι τζαβ σε γραφεία τμήματος σαρό κο ντουνιάς για τι ενθαρρύναβ ι Μπεθελιτέν ντα ι ιεραποστολόν. Ι τελευταία φαρ, γκιλάμ κι Νότια Κορέα ντα ντικχλάμ 50 πφραλέν σο ισινέ εκχέ φυλακιάτε κι Σουγουόν. Σαρέ οντουλά πφραλά να χασαρντέας πουμαρί ελπίδα ντα μπεσένας σαρ σαρ τι υπηρετίνεν πάλι ι Ιεχωβάς ελεύθερα. Ενθαρρύντιλαμ μπουτ σο γνωριντάμ-λεν!—Ρωμαίους 1:11, 12.
ΤΘΕΡΑΣΑ ΜΠΑΡΙ ΧΑΡΑ ΣΟ ΜΠΟΥΤ ΤΖΕΝΕ ΣΙΚΛΙΛΕ Ι ΑΛΗΘΕΙΑ
Σαρέ ανταλά μπρεσά, ντικχλόμ σαρ ευλογιντάς ο Ιεχωβά πι λαός. Κάνα μπολντιλόμ κο 1943, ισινέ
περίπου 100.000 ευαγγελιζόμενοι. Ακανά πιο μπουτ από 8.000.000 τζενέ υπηρετίνενα ι Ιεχωβάς 240 τθεμέντε. Πουμαρέ σκληρέ μπουτιάσαρ, ο πφραλά σο νακχλέ κατά Γαλαάδ βοηθιντέ μπουτέ τζενέν τι σικλιόν ι αλήθεια. Σο μπαρί χαρά ισί μάνγκε σο συνεργασάλομ μπουτέ ιεραποστολόντζαρ ντα βοηθιντόμ-λεν τι τζαν οτθέ σο μπουτσσάντιλε!Χαιρίναβα μπουτ σο αποφασιντόμ τι χρησιμοποιήναβ μι ζωή κι υπηρεσία κι Ιεχωβάσκι ντα σο κερντόμ αίτηση για το Μπέθελ κάνα ισινόμας τερνό. Ο Ιεχωβά ευλογιντάς-μαν μπουτ σαρέ ανταλά μπρεσά. Εκτός κατά μπουτ πράγματα σο μπεϊντιντάμ κο Μπέθελ, η Λάιλα ντα με τθεράας ο προνόμιος για πιο μπουτ από 50 μπρεσά τι τζας κο έργος πφραλέντζαρ κατά κχανγκιριά σο ισί κο Μπρούκλιν ντα τι κεράς μπουτέ λατσσέ αμαλέν.
Συνεχίναβα τι υπηρετίναβ κο Μπέθελ με τη βοήθεια σο ντέλα-μαν η Λάιλα κάθε ντιβές. Παρόλο σο ακανά νακχλόμ ο 84, χαιρίναβα σο μπορίναβα τι κεράβ εκ μπουτί πφερντί νόημας ντα τι βοηθίναβ κι αλληλογραφία κο γραφείος τμήματος.
Η Λάιλα ντα με αντιβές
Ισί μπαρί χαρά τι αβάς αντρέ κι μπουτ σουκάρ οργάνωση κι Ιεχωβάσκι ντα τι ντικχάς καζόμ αληθινά ισί ο λάφια σο βακερέλα ο εδάφιος Μαλαχίας 3:18: «Κα ντικχέν πάλι ι διαφορά σο τθερέλα ο δίκαιος κατά πφιρνό, ντα οντουβά σο υπηρετίνελα ι Ντεβλές οντουλέσταρ σο να υπηρετίνελα-λες». Κάθε ντιβές ντικχάσα ότι ι Μπενγκέσκο ντουνιάς αβέλα πιο γκεραλό ντα ότι ο τζενέ να τθερένα ελπίδα ούτε αληθινή χαρά κι ζωή. Αλλά οντουλά σο μανγκένα ντα υπηρετίνενα ι Ιεχωβάς τθερένα ευτυχισμέ ζωή, ατζέ-ντα ανταλέ δύσκολε ντιβεσέντε, ντα εκ σίγουρη ελπίδα για το μέλλον. Ισί μπαρό προνόμιος τι βακεράς κο γιαβερά ο λατσσέ αμπέρια! (Ματθαίος 24:14) Η Βασιλεία ι Ντεβλέσκι κα νασκιαρέλ ανταλέ πουρανέ ντουνιάς ντα κα ανέλ εκ παράδεισος. Καζόμ μπουτ μανγκάσα τι αβέλ ανταβά ντιβές! Αζομάν, σαρέ ο τζενέ κα τθερέν υγεία ντα χαρά ντα κα τζουβντιόν για πάντα.