1, 2. (α) Καβά ισινέ ο πιο σημαντικός πράγμας κι Ιησούσκι ζωή, ντα σόσκε; (β) Σο πρέπει τι κεράς για τι τθεράς επιτυχία σαρ «συνεργάτες ι Ντεβλέσκε»;

Ο ΙΗΣΟΥΣ ΧΡΙΣΤΟΣ κερέλας μπουτί σαρ ξυλουργός ντα σοράν κερέλας ο έργος ι Ντεβλέσκο. (Μάρκος 6:3· Ρωμαίους 15:8) Κερέλας-λεν ο ντούι-ντα μπουτ λατσσές. Σαρ ξυλουργός, σικλιλό τι χρησιμοποιήνελ πο εργαλεία λατσσές για τι κερέλ πράγματα καστένταρ. Ντα κάνα κερέλας ο έργος ι Ντεβλέσκο, χρησιμοποιήνελας ο μπουτ πράγματα σο τζανέλας κατά Γραφή για τι βοηθίνελ ι συνηθισμέ τζενέν τι αγαβέν ο αλήθειες σο ισί κι Ντεβλέσκο Λάφι. (Ματθαίος 7:​28· Λουκάς 24:​32, 45) Κάνα ισινέ 30 μπρεσένγκο, μουκχλάς ι μπουτί σο κερέλας σαρ ξυλουργός ντα αρχισάλο τι κερέλ ο έργος επειδή τζανέλας ότι ανταβά ισινέ ο πιο σημαντικός πράγμας σο κα μπορίνελας τι κερέλ. Βακερντάς ότι εκ λόγος σο μπουτσσαντάς-λες ο Ντεβέλ κι πφουβ ισινέ τι βακερέλ ο λατσσέ αμπέρια ι Ντεβλέσκε Βασιλειάκε. (Ματθαίος 20:​28· Λουκάς 3:​23· 4:​43) Ο Ιησούς τσσουντάς ο έργος πρώτα πι ζωγιάτε, ντα μανγκέλας ο γιαβερά-ντα τι κερέν ο ίδιος.​—Ματθαίος 9:​35-38.

² Ο πιο μπουτ αμένταρ να ισινάμ ξυλουργοί, αλλά σαρέ κεράσα ο έργος ντα σικλιαράσα ο λατσσέ αμπέρια κο γιαβερά. Ανταβά έργος ισί μπουτ σημαντικός επειδή ισί ι Ντεβλέσκο. Κι πραγματικότητα, βακέρντιβασα «συνεργάτες ι Ντεβλέσκε».  (1 Κορινθίους 3:9· 2 Κορινθίους 6:4) Συμφωνίνασα ι ψαλμωδόσαρ σο βακερντάς: «Το λάφι ισί μπαγιά». (Ψαλμός 119:​159, 160) Ο λάφι ι Ιεχωβάσκο ισί μπαγιά. Άκ’ σόσκε μανγκάσα τι αβάς σίγουροι ότι “χρησιμοποιήνασα σωστά ο λάφι ι αληθειάκο” κο έργος. (Διαβάνεν 2 Τιμόθεο 2:​15) Οτθάρ, προσπαθίνασα τι χρησιμοποιήνας πιο λατσσές ι Γραφή, ο πιο σημαντικός εργαλείος σο τθεράσα για τι σικλιαράς ι τζενέν ι Ιεχωβάσκε, ι Ιησούσκε ντα ι Βασιλειάκε. Για τι βοηθίνελ-αμέν τι τθεράς επιτυχία κο έργος, η οργάνωση ι Ιεχωβάσκι ντινάς-αμέν γιαβερά-ντα εργαλεία σο χρειαζίντιβελα τι σικλιάς τι χρησιμοποιήνας-λεν. Ανταλά ισί ο Εργαλεία για τι Σικλιαράς.

3. Σο πρέπει τι προσπαθίνας μπουτ τι κεράς κο έργος, ντα σαρ βοηθίνελα-αμέν ο εδάφιος Πράξεις 13:​48 τι κεράς-λες ανταβά;

³ Ανταλά εργαλεία ισί κερντέ για τι βοηθίνεν-αμέν τι σικλιαράς ι τζενέν. «Σικλιαράβα» μανγκέλα τι βακερέλ ότι εξηγίναβα κο τζενέ οντουλά σο βακεράβα για τι μπορίνεν τι αγαβέν-λεν ντα τι κερέν-λεν πουμαρέ ζωγιάτε. Καζόμ ατσσόλα ατζέκ ανταβά ντουνιάς, πρέπει τι προσπαθίνας μπουτ τι αρχίνας μελέτες ντα τι σικλιαράς ι τζενέν ι αλήθεια για τι μπορίνεν τι αβέν μαθητές ι Χριστόσκε. Ανταβά μανγκέλα τι βακερέλ τι κεράς ο πιο λατσσό για τι αρακχάς οντουλέν “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα” ντα τι βοηθίνας-λεν τι αρχίνεν τι υπηρετίνεν ι Ιεχωβάς.​—Διαβάνεν Πράξεις 13:​44-48.

4. Σαρ μπορίνασα τι αρακχάς οντουλέν “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα”;

⁴ Σαρ μπορίνασα τι αρακχάς οντουλέν “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα”; Ι πρώτε Χριστιανόνγκε, ο μοναδικός τρόπος για τι αρακχένας οντουλέ τζενέν ισινέ τι ντεν-λεν μαρτυρία. Ο Ιησούς βακερντάς πι μαθητένγκε: «Κι κάθε πόλη ή κο κάθε γκαβ σο κα τζαν, ροντέν τι αρακχέν κον οτθάρ αντράλ αξίνελα». (Ματθαίος 10:​11) Αντιβές αμέν-ντα πρέπει τι κεράς ο ίδιος. Σίγουρα, να μπεκλεντίνασα τι ασουνέν ο λατσσέ αμπέρια ο τζενέ σο ισί εγωιστές, σο νανέ ειλικρινείς ή να χάλα-λεν ανάγκη ι Ντεβλέσκε. Ρόντασα τζενένγκε σο ισί ειλικρινείς, ταπεινοί ντα μανγκένα μπαγιά τι σικλιόν ι αλήθεια. Μπορίνασα τι μοιασκιαράς ο έργος σο κεράσα για τι αρακχάς τζενέν ι μπουτιάσαρ σο κερέλας ο Ιησούς σαρ ξυλουργός. Πριν τι κερέλ εκ έπιπλος, εκ πόρτα, εκ ζυγός ή κάτι γιαβέρ, έπρεπε πρώτα τι αρακχέλ ο σωστός κας. Σοράν, λέλας πο εργαλεία, χρησιμοποιήνελας πο ικανότητες ντα κερέλας οντουβά πράγμας σο μανγκέλας. Αντικάς αμέν-ντα αντιβές, πρώτα πρέπει τι αρακχάς ι τζενέν σο ισί ειλικρινείς ντα σοράν τι χρησιμοποιήνας αμαρέ εργαλεία ντα αμαρέ ικανότητες για τι βοηθίνας-λεν τι αβέν μαθητές.​—Ματθαίος 28:​19, 20.

5. Σο χρειαζίντιβελα τι τζανάς για το Εργαλεία για τι Σικλιαράς; Βακερέν εκ παράδειγμας. (Ντικχ ο φωτογραφίες σο ισί κι αρχή)

⁵ Κάθε εργαλείος τθερέλα εκ συγκεκριμέ σκοπός. Σκεφτίνεν για παράδειγμας ο ξυλουργικά εργαλεία σο χρησιμοποιήνελας ο Ιησούς. * (Ντικχ ι υποσημείωση) Χρειαζίντιβελας εργαλεία για τι γκινέλ, τι τσσουβέλ σημάδια, τι τσσινέλ, τι κερέλ γούρνες ντα τι λατσσαρέλ ο καστά, ντα εργαλεία για τι μορέλ-λεν ντα τι ενώνελ-λεν. Αντικάς, ο κάθε εργαλείος κατά Εργαλεία για τι Σικλιαράς τθερέλα εκ συγκεκριμέ σκοπός. Για τι ντικχάς σαρ μπορίνασα τι  χρησιμοποιήνας ανταλά σημαντικά εργαλεία.

6, 7. (α) Σαρ χρησιμοποιηντέν τουμέν ο κάρτες JW.ORG; (β) Σόσκε χρησιμοποιήνασα ο προσκλήσεις ι συναθροισιένγκε;

⁶ Κάρτες JW.ORG. Ισί χουρντέ αλλά μπουτ χρήσιμα εργαλεία σο σικαβένα κο τζενέ κον ισινάμ ντα γκερένα-λεν αμαρέ ιστοτοπόστε, κο jw.org. Οτθέ, μπορίνενα τι σικλιόν πιο μπουτ αμένγκε ντα μάλιστα τι μανγκέν μελέτη. Μέχρι ακανά πιο μπουτ από 400.000 τζενέ μανγκλέ εκ μελέτη κατά ιστότοπος jw.org, ντα κάθε ντιβές μπουτ τζενέ συνεχίνενα τι κερέν-λες ανταβά! Κα μπορίνενας τι τθερέν πάντα τουμέντζαρ μερικές κάρτες ντα τι χρησιμοποιήνεν-λεν κάνα κερένα λάφι ι τζενέντζαρ σο ντικχένα αντρέ κο ντιβές.

⁷ Προσκλήσεις. Η πρόσκληση ι συναθροισιένγκε βακερέλα: «Μπορίνενα τουμέν-ντα τι σικλιόν κατά Μάρτυρες του Ιεχωβά σο βακερέλα η Αγία Γραφή». Σοράν, βακερέλα ότι ανταβά μπορίνελα τι αβέλ-πες «αμαρέ συναθροισιέντε» «ή εκχέ τζενέσταρ σο κα βοηθίνελ-τουμέν». Άρα, η πρόσκληση σικαβέλα κο τζενέ κον ισινάμ ντα καλίνελα “οντουλέν σο αγαβένα ότι τθερένα ανάγκη ο πνευματικά πράγματα” τι κερέν μελέτη κατά Γραφή αμέντζαρ. (Ματθαίος 5:3) Βέβαια, δεχτίνασα ι τζενέν αμαρέ συναθροισιέντε είτε μανγκένα τι κερέν μελέτη είτε όχι. Κάνα κα αβέν αμαρέ συναθροισιέντε, κα ντικχέν καζόμ πράγματα μπορίνενα τι σικλιόν ι Γραφιάκε.

8. Σόσκε ισί σημαντικός τι αβέν ο τζενέ αμαρέ συναθροισιέντε ατζέ-ντα εκ φαρ σάντε; Βακερέν εκ παράδειγμας.

⁸ Ισί σημαντικός τι καλίνας ι τζενέν τι αβέν αμαρέ συναθροισιέντε ατζέ-ντα εκ φαρ σάντε. Σόσκε; Επειδή κάνα κα αβέν, κα ντικχέν ότι ο Μάρτυρες ι Ιεχωβάσκε σικλιαρένα ι αλήθεια ι Γραφιάκι ντα βοηθίνενα ι τζενέν τι σικλιόν ι Ντεβλέσκε, ενώ ο ψεύτικες θρησκείες να κερένα-λες ανταβά. (Ησαΐας 65:​13) Για παράδειγμας, εκ αντρόγυνος κο Ηνωμένες Πολιτείες, ο Ρέι ντα η Λίντα, αγαντέ ανταγιά διαφορά πριν από μερικά μπρεσά. Πακιάνας κο Ντεβέλ ντα μανγκένας τι σικλιόν λέσκε πιο λατσσές. Οτθάρ, αποφασιντέ τι τζαν σαρέ κο κχανγκιριά κι πόλη σο μπεσένας ντα τι ρόντεν ντούι πράγματα για τι ντικχέν καγιά κα τραμπίνεν. Πρώτον, έπρεπε τι σικλιόν κάτι οντουλέ κχανγκιριάταρ, ντα δεύτερον, ο τζενέ σο ισινέ οντουλέ κχανγκιριάτε έπρεπε τι ιριαβέν-πες με τρόπος σο σικαβέλα ότι υπηρετίνενα ι Ντεβλές. Λιντάς-λεν μπουτ μπρεσά επειδή υπαρχίντιβενας μπουτ κχανγκιριά. Αλλά σουρντιλέας σαρέ οντουλέ κχανγκιρίνταρ. Να σικλιλέας τίποτα, ντα ο ιριαϊπέ οντουλέ τζενένγκο σο ισινέ κο κχανγκιριά να σικαβέλας σεβασμός. Αφού γκιλέ κι τελευταία κχανγκιρί, η Λίντα γκιλί πι μπουτιάτε ντα ο Ρέι κχερέ. Κο ντρομ, ο Ρέι νακχλό ι αμαξίσαρ αβριάλ από εκ Αίθουσα Βασιλείας ντα σκεφτιντάς: “Να τζάβα ατθέ-ντα τι ντικχάβ σο αβέλας-πες;” Ανταγιά ισινέ η πιο λατσσί εμπειρία σαριλένταρ! Σαρέ κι Αίθουσα Βασιλείας ισινέ λατσσέ, φιλικοί ντα μπουτ σουκάρ ιριαντέ. Ο Ρέι μπεσλό κι πρώτη σειρά ντα μπεϊντιντάς μπουτ ο πράγματα σο σικλιλό! Ανταβά ανέλα αμαρέ γκοντιάτε ο λάφια σο βακερντάς ο απόστολος Παύλος κο Κορίνθιοι οντουλέ τζενένγκε σο τζάνα πρώτη φαρ σε εκ συνάθροιση ντα βακερένα: «Ο Ντεβέλ ισί μπαγιά τουμέντζαρ». (1 Κορινθίους 14:​23-25) Οτθάρ μπερί, ο Ρέι τζάλας κο συναθροίσεις κάθε Κυριακή. Σοράν, αρχισάλο τι τζαλ σαρέ κο συναθροίσεις. Η Λίντα αρχισάλι βόι-ντα τι τζαλ  κο συναθροίσεις ντα, παρόλο σο ο ντούι-ντα νακχλέας ο 70 μπρεσά, κερντέ μελέτη ντα μπολντιλέ.

9, 10. (α) Σόσκε ισί εύκολος τι χρησιμοποιήνας ο φυλλάδια; (β) Σαρ μπορίνασα τι χρησιμοποιήνας ο φυλλάδιος Σο Ισί η Βασιλεία ι Ντεβλέσκι; Εξηγίνεν.

⁹ Φυλλάδια. Μερικά γιαβερά εργαλεία ισί ο οχτώ φυλλάδια σο τθεράσα. Ισί εύκολος τι χρησιμοποιήνας-λεν ντα βοηθίνενα-αμέν μπουτ τι αρχίνας συζητήσεις. Κατά 2013 σο νικίστιλε ανταλά φυλλάδια, τυπωσάλε περίπου πέντε δισεκατομμύρια! Ο σκέψεις ανταλέ φυλλαδιόντε ισί γραμμέ ι ίδιε σειράσαρ. Άρα, κάνα κα σικλιόν τι χρησιμοποιήνεν εκ ανταλένταρ, κα μπορίνεν τι χρησιμοποιήνεν-λεν σαρέ! Σαρ μπορίνενα τι χρησιμοποιήνεν εκ φυλλάδιος για τι αρχίνεν συζήτηση εκχέ τζενέσαρ;

¹⁰ Μπορεί τι τραμπίνεν ο φυλλάδιος Σο Ισί η Βασιλεία ι Ντεβλέσκι; Σικαβέν κο τζενό ι ερώτηση σο τθερέλα ο φυλλάδιος ανγκλάλ, ντα πουτσέν-λες: «Τθερέσα σκεφτιντό σο ισί η Βασιλεία ι Ντεβλέσκι; Κα βακερέας ότι ισί . . . ;» Σοράν, πουτσέν-λες καγιά απάντηση κατά τριν κα τραμπίνελας. Αντίς τι βακερέν αν λέσκι απάντηση ισί σωστή ή λάθος, πουτρέν οτθέ σο γραφίνελα «Σο Βακερέλα η Αγία Γραφή» ντα σικαβέν ο εδάφια Δανιήλ 2:​44 ντα Ησαΐας 9:6. Κο τέλος, σικαβέν ι ερώτηση κι παλαϊνί σελίδα τελάλ κατά υπότιτλος «Σκεφτίνεν»: «Σαρ κα αβέλ η ζωή όταν η Βασιλεία ι Ντεβλέσκι κα κυβερνίνελ;» Μπορίνενα τι απαντίνεν ανταλέ ερωτησιάτε κι γιαβέρ φαρ σο κα συζητίνεν ι τζενέσαρ. Κάνα κα ντικχέν-λες πάλι, μπορίνενα τι σικαβέν λέσκε ο μάθημας 7 κο βιβλιάριος Ο Λατσσέ Αμπέρια ι Ντεβλέσκε!, σο ισί εκ κατά εργαλεία σο τθεράσα για τι αρχίνας μελέτες.

11. Καλέ πραγμάσκε ισί κερντέ αμαρέ περιοδικά, ντα σο πρέπει τι τζανάς λένγκε;

¹¹ Περιοδικά. Η Σκοπιά ντα ο Ξύπνα! ισί ο πιο γνωστά περιοδικά κο ντουνιάς ντα μεταφράντιβενα σε πιο μπουτ τσσιμπά σαρέ κατά γιαβερά περιοδικά! Επειδή ο τζενέ μπουτέ διαφορετικέ τθεμένταρ διαβάνενα ανταλά περιοδικά, ο θέματα σο ισί κι ανγκλαϊνί σελίδα ισί κερντέ για τι ενδιαφερίνεν σαρέ ι τζενέν. Πρέπει τι χρησιμοποιήνας ανταλά περιοδικά για τι βοηθίνας ι τζενέν τι ντεν προσοχή κο πιο σημαντικά πράγματα κι ζωή αντιβές. Όμως πρώτα, χρειαζίντιβελα τι τζανάς καλέ τζενένγκε ισί κερντό ο κάθε περιοδικός.

12. (α) Κάσκε ισί κερντό ο Ξύπνα!, ντα καβά ισί λέσκο σκοπός; (β) Καλά λατσσέ εμπειρίες τθερένας ακανά σουγκό ανταλέ εργαλειόσαρ;

¹² Ο Ξύπνα! ισί κερντό τζενένγκε σο τζανένα μπουτ χάνικ πράγματα ή τίποτα ι Γραφιάκε. Μπορεί μα τι τζανένα τίποτα οντουλένγκε σο σικλιαρντάς ο Χριστός, μα τι τθερένα εμπιστοσύνη κι θρησκεία ή μπορεί μα τι τζανένα ότι η Γραφή μπορίνελα τι βοηθίνελ-λεν λένγκε ζωγιάτε. Εκ βασικός σκοπός σο τθερέλα ο Ξύπνα! ισί τι κερέλ ι τζενέν τι πακιάν ότι υπαρχίντιβελα Ντεβέλ. (Ρωμαίους 1:​20· Εβραίους 11:6) Επίσης, τθερέλα σκοπός τι βοηθίνελ ι τζενέν τι πακιάν ότι η Γραφή «ισί μπαγιά . . . ο λάφι ι Ντεβλέσκο». (1 Θεσσαλονικείς 2:​13) Ο τριν θέματα σο τθερέλα ο Ξύπνα! κο ανγκλαϊνέ σελίδες για το 2018 ισί: «Ο Δρόμος της Ευτυχίας», «Οικογένεια​—12 Μυστικά Επιτυχίας» ντα «Βοήθεια για Όσους Πενθούν».

13. (α) Κάσκε ισί κερντί Η Σκοπιά σο ντάσα κο τζενέ; (β) Καλά λατσσέ εμπειρίες τθερένας ακανά σουγκό ανταλέ εργαλειόσαρ;

¹³ Ο βασικός σκοπός σο τθερέλα Η Σκοπιά σο ντάσα κο τζενέ ισί τι εξηγίνελ ο λάφια ι Γραφιάκε κο τζενέ σο σεβάνενα ι Ντεβλές  ντα ι Γραφή. Παρόλο σο οντουλά τζενέ μπορεί τι τζανένα κάποια πράγματα ι Γραφιάκε, ναστί αγαβένα ακριβώς οντουλά σο σικλιαρέλα. (Ρωμαίους 10:2· 1 Τιμόθεο 2:3, 4) Ο τριν θέματα σο τθερέλα Η Σκοπιά κο ανγκλαϊνέ σελίδες για το 2018 ντένα απαντήσεις ακαλέ ερωτησιέντε: «Είναι η Αγία Γραφή Χρήσιμη στην Εποχή Μας;», «Τι θα Φέρει το Μέλλον;» ντα «Ενδιαφέρεται ο Θεός για Εσάς;»

14. (α) Σο σκοπός τθερένα ο σταρ βίντεα σο τθεράσα κο Εργαλεία για τι Σικλιαράς; (β) Καλά λατσσέ εμπειρίες τθερένας κάνα χρησιμοποιηντέν ανταλά βίντεα;

¹⁴ Βίντεα. Κάνα ισινέ ο Ιησούς κι πφουβ, ο ξυλουργοί να τθερένας ηλεκτρικά εργαλεία. Ακανά όμως τθερένα ηλεκτρικά εργαλεία για τι τσσινέν, τι κερέν γούρνες ντα τι μορέν. Αμαρέ ντιβεσέντε, εκτός κατά τυπωμέ εκδόσεις, τθεράσα σουκάρ βίντεα σο μπορίνασα τι σικαβάς κο τζενέ. Σταρ ανταλέ εργαλειένταρ ισί: Σόσκε Αξίνελα τι Κερέν Μελέτη Κατά Αγία Γραφή;, Σαρ Αβέλα-πες η Μελέτη Κατά Αγία Γραφή;, Σο Αβέλα-πες κο Αίθουσες Βασιλείας; ντα Μάρτυρες του Ιεχωβά​—Κον Ισινάμ; Μερικά βίντεα μπορίνασα τι χρησιμοποιήνας-λεν κι πρώτη φαρ σο τζάσα ντα γιαβερά μπορίνασα τι χρησιμοποιήνας-λεν κο επανεπισκέψεις. Ανταλά βίντεα ισί μπουτ σουκάρ εργαλεία επειδή μπορίνενα τι βοηθίνεν ι τζενέν τι αρχίνεν μελέτη ντα τι αβέν αμαρέ συναθροισιέντε.

15. Σαρ επηρεάντιβενα ο τζενέ κάνα ντικχένα πουμαρέ τσσιμπάτε εκ κατά βίντεα σο τθεράσα; Βακερέν παραδείγματα.

¹⁵ Για παράδειγμας, εκ πφεν αρακχλάς εκχέ τζουβλιά σο αβιλίας κατά Μικρονησία ντα λάκι τσσιπ ισί η γιαπική. Ανταγιά πφεν σικαντάς λάκε ο βίντεος Σόσκε Αξίνελα τι Κερέν Μελέτη Κατά Αγία Γραφή; λάκε τσσιμπάτε. Κάνα αρχισάλο ο βίντεος, η τζουβέλ βακερντάς: «Ανταγιά ισί μι τσσιπ. Να πακιάβα-λες! Κατά τρόπος σο κερέλα λάφι αγαντόμ ότι βοβ ισί μι νησίσταρ. Κερέλα λάφι μι τσσιπ!» Σοράν ανταλέσταρ, βακερντάς ότι κα διαβάνελας ντα κα ντικχέλας σο-ντα υπαρχίντιβελας λάκε τσσιμπάτε κο ιστότοπος jw.org. (Ντικχ Πράξεις 2:8, 11) Ντικχέν ατζέκ εκ παράδειγμας. Εκ πφεν κο Ηνωμένες Πολιτείες μπουτσσαντάς πι ανιψιόσκε σο μπεσέλας γιαβερέ τθεμέστε εκ σύνδεσμος σο γκερέλα κο ίδιος βίντεος λέσκε τσσιμπάτε. Βοβ ντικχλάς-λες ντα μπουτσσαντάς λάκε εκ e-mail σο γραφίνελας: «Ταρτιντάς πιο μπουτ μι προσοχή ο σημείος σο βακερέλας ότι εκ πφιρνό πλάσμας κερέλα κουμάντος ι ντουνιάς. Κερντόμ αίτηση για τι κεράβ μελέτη κατά Γραφή». Ανταβά ισί μπουτ σουκάρ επειδή βοβ τζουβντιόλα εκχέ τθεμέστε σο αμαρό έργος ισί απαγορευμέ!

16. Εξηγίνεν ο συγκεκριμέ σκοπός σο τθερέλα ο κάθε βιβλιάριος: (α) Τι Ασουνέν ι Ντεβλές ντα κα Τζουβντιόν για Πάντα. (β) Ο Λατσσέ Αμπέρια ι Ντεβλέσκε! (γ) Κον Κερέλα Οντουβά σο Μανγκέλα ο Ιεχωβά Αμαρέ Ντιβεσέντε;

¹⁶ Βιβλιάρια. Σαρ μπορίνασα τι σικλιαράς ι αλήθεια εκχέ τζενέστε σο να τζανέλα τι διαβάνελ λατσσές ή σο να υπαρχίντιβενα έντυπα λέσκε τσσιμπάτε; Μπορίνασα τι χρησιμοποιήνας ο βιβλιάριος Τι Ασουνέν ι Ντεβλές ντα κα Τζουβντιόν για Πάντα. * (Ντικχ ι υποσημείωση) Εκ μπουτ λατσσό εργαλείος για τι αρχίνας μελέτες ισί ο βιβλιάριος Ο Λατσσέ Αμπέρια ι Ντεβλέσκε! Μπορίνενα τι σικαβέν κο τζενό ο 14 θέματα σο τθερέλα κι παλαϊνί σελίδα ντα τι πουτσέν-λες καλέσκε μανγκέλα τι σικλιόλ  πιο μπουτ. Σοράν, αρχίνεν μελέτη οντουλέ μαθημάσταρ. Δοκιμαντέν τι κερέν-λες ανταβά κο επανεπισκέψεις; Ο τρίτος εργαλείος σο τθεράσα ισί ο βιβλιάριος Κον Κερέλα Οντουβά σο Μανγκέλα ο Ιεχωβά Αμαρέ Ντιβεσέντε; Ισί κερντό για τι σικλιαρέλ ι τζενέν σο κερένα μελέτη ι πραγματένγκε σο κερέλα αμαρί οργάνωση. Για τι σικλιόν σαρ τι χρησιμοποιήνεν-λες σε κάθε μελέτη, ντικχέν Ι Χριστιανόνγκι Ζωή ντα ο Έργος​—Πρόγραμμας για τη Συνάθροιση, Μάρτιος 2017.

17. (α) Καβά συγκεκριμέ σκοπός τθερέλα ο κάθε βιβλίος σο χρησιμοποιήνασα για τι κεράς μελέτες; (β) Σο πρέπει τι κερέν σαρέ οντουλά σο μπολντιόνα, ντα σόσκε;

¹⁷ Βιβλία. Άμα κα αρχίνεν εκ μελέτη εκχέ βιβλιαριόσταρ, μπορίνενα κάνα μανγκένα τι τζαν κο βιβλίος Σο Μπορίνελα τι Σικλιαρέλ-αμέν η Αγία Γραφή; Ανταβά εργαλείος κα βοηθίνελ ι τζενές τι σικλιόλ πιο μπουτ για το βασικά πράγματα ι Γραφιάκε. Αν ο τζενό κερέλα πνευματική πρόοδος ντα τελειωντάς ανταβά βιβλίος, μπορίνενα τι συνεχίνεν ι μελέτη κατά βιβλίος Πώς να Παραμείνετε στην Αγάπη του Θεού. Ανταβά εργαλείος κα σικλιαρέλ ι τζενές σο κερέλα μελέτη σαρ τι ακολουθίνελ ο αρχές ι Γραφιάκε κάθε ντιβές. Τι ντεν-τουμέν γκοντί ότι εκ νεβό τζενό, ατζέ-ντα αφού κα μπολντιόλ, χρειαζίντιβελα τι συνεχίνελ πι μελέτη μέχρι τι τελειώνελ ο ντούι-ντα βιβλία. Ανταβά κα βοηθίνελ-λες τι τθερέλ ζουρανί πίστη κο Ιεχωβά ντα τι ατσσόλ πιστός λέστε.​—Διαβάνεν Κολοσσαείς 2:6, 7.

18. (α) Σο τσσίντελα-αμέν τι κεράς ο εδάφιος 1 Τιμόθεο 4:​16 σαρ δάσκαλοι σο σικλιαράσα ι αλήθεια, ντα καβά κα αβέλ ο αποτέλεσμας; (β) Καζόμ χρησιμοποιήνασα ο Εργαλεία για τι Σικλιαράς, καβά πρέπει τι αβέλ αμαρό στόχος;

¹⁸ Ισινάμ Μάρτυρες ι Ιεχωβάσκε ντα τθεράσα ι ευθύνη τι σικλιαράς ι τζενέν «ι αλήθεια, δηλαδή ο λατσσέ αμπέρια» σο μπορίνενα τι οδηγίνεν-λεν κι αιώνια ζωή. (Κολοσσαείς 1:5· διαβάνεν 1 Τιμόθεο 4:​16) Για τι κεράς-λες ανταβά, τθεράσα ο Εργαλεία για τι Σικλιαράς. (Ντικχ ο πλαίσιος « Εργαλεία για τι Σικλιαράς») Τι χρησιμοποιήνας ανταλά εργαλεία καζόμ αβέλα-πες πιο λατσσές. Ο κάθε εκ αμένταρ μπορίνελα τι αποφασίνελ καβά εργαλείος κα χρησιμοποιήνελ ντα κάνα κα κερέλ-λες ανταβά. Αλλά πρέπει τι τθεράς αμαρέ γκοντιάτε ότι αμαρό στόχος νανέ σάντε τι ντας έντυπα ντα οτθάρ να μουκχάσα έντυπα τζενέντε σο να χάλα-λεν ανάγκη οντουλένγκε σο βακεράσα. Αμαρό στόχος ισί τι κεράς μαθητέν τζενέν σο ισί ειλικρινείς, ταπεινοί ντα μανγκένα μπαγιά τι γνωρίνεν ι Ντεβλές, τζενέν “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα”.​—Πράξεις 13:​48· Ματθαίος 28:​19, 20.