1, 2. Σο χρησιμοποιηντάς ο Μπενγκ για τι κερέλ ο πιο μπαρό κακός κο τζενέ;

ΜΕΡΙΚΑ πράγματα σαρ ο τηλέφωνα, ο λάμπες, ο αυτοκίνητα ντα ο ψυγεία κερντέ αμαρί ζωή πιο λατσσί. Γιαβερά πράγματα, σαρ ο πιστόλια, ο τσιγάρα ντα ο ατομικές μπόμπες κερντέ αμαρί ζωή πιο επικίνδυνη. Αλλά υπαρχίντιβελα κάτι πιο πουρανό σαρέ ανταλένταρ σο κερντάς ο πιο μπαρό κακός κο τζενέ. Σο ισί ανταβά; Ο ψέμας! Ψέμας ισί τι βακεράς κάτι σο τζανάσα ότι νανέ μπαγιά για τι χουχαβάς εκχέ γιαβερές. Κον βακερντάς ο πρώτος ψέμας; Ο Μπενγκ! Ο Ιησούς Χριστός βακερντάς ότι ο Μπενγκ ισί «ο ντατ ι ψεμάσκο». (Διαβάνεν Ιωάννης 8:​44) Κάνα βακερντάς ο πρώτος ψέμας;

² Κερντάς-λες ανταβά χιλιάδες μπρεσά πιο τζανγκλέ κο κήπος της Εδέμ. Ο Αδάμ ντα η Εύα απολαμβάνενας ι ζωή κο σουκάρ Παράδεισος σο κερντάας λένγκε ο Ιεχωβά. Ο Ντεβέλ βακερντάας λένγκε ότι αν κα χάνας κατά «δέντρος σο ντέλα γνώση ι λατσσιμάσκε ντα ι γκεραλιμάσκε» κα μερένας. Παρόλο σο ο Μπενγκ τζανέλας-λες ανταβά, χρησιμοποιηντάς εκχέ σαπές για τι βακερέλ κι Εύα: «Σίγουρα να κα μερέν». Ανταβά ισινέ ο πρώτος ψέμας σο βακέρντιλο. Επίσης, ο Μπενγκ βακερντάς: «Ο Ντεβέλ τζανέλα ότι, οντουβά ντιβές σο κα χαν  ανταλέσταρ, τουμαρέ γιακχά κα πουτάρντιβεν ντα τουμέν κα αβέν σαρ ο Ντεβέλ, ντα κα τζανέν εμ ο λατσσιπέ εμ ο γκεραλιπέ».​—Γένεση 2:​15-17· 3:​1-5.

3. Σόσκε βακεράσα ότι ο ψέμας ι Μπενγκέσκο τθερέλας γκεραλό σκοπός, ντα σο αβιλό-πες ιτιρί ανταλέ ψεμάσταρ;

³ Ο ψέμας ι Μπενγκέσκο τθερέλας γκεραλό σκοπός σόσκε βοβ τζανέλας ότι άμα η Εύα κα πακιάλας-λες ντα κα χάλας ο φρούτος, κα μερέλας. Ντα ανταβά αβιλό-πες. Η Εύα, ντα πιο σοράν ο Αδάμ, να ντινέ καν κι εντολή κι Ιεχωβάσκι ντα τελικά μουλέ. (Γένεση 3:6· 5:5) Ντα ο χειρότερος ισί ότι, επειδή ο Αδάμ κερντάς αμαρτία, «ο μεριπέ γκιλό σαρέ κο τζενέ». Κι πραγματικότητα, «ο μεριπέ κυβερνιντάς σαρ βασιλιάς . . . ατζέ-ντα οντουλέν σο να αμαρτιντέας με το ίδιος τρόπος σο αμαρτιντάς ο Αδάμ». (Ρωμαίους 5:​12, 14) Άκ’ σόσκε να ισινάμ τέλειοι ντα να τζουβντιάσα για πάντα σαρ τθερέλας σκοπός ο Ντεβέλ. Αλλά τζουβντιάσα σάντε «70 μπρεσά, ή 80 άμα εκ τζενό τθερέλα μπουτ λατσσί υγεία», ντα αμαρί ζωή ισί πφερντί «βάσανα ντα στεναχώριες». (Ψαλμός 90:​10) Σαρέ ανταλά αβιλέ-πες ιτιρί ανταλέ ψεμάσταρ σο βακερντάς ο Μπενγκ!

4. (α) Καλέ ερωτησιέντε χρειαζίντιβελα τι τζανάς ι απάντηση; (β) Σαρ βακερένα ο εδάφια Ψαλμός 15:1, 2, κον σάντε μπορίνελα τι αβέλ ι Ιεχωβάσκο αμάλ;

⁴ Ο Ιησούς βακερντάς ότι ο Μπενγκ «να ατσσιλό σταθερός κι αλήθεια, επειδή νανέ αλήθεια λέστε». Ο Μπενγκ να αλλαξάλο. Συνεχίνελα τι “χουχαβέλ σαρέ ι ντουνιάς” πι ψεματέντζαρ. (Αποκάλυψη 12:9) Αλλά αμέν να μανγκάσα τι χουχάντιβας κατά Μπενγκ. Οτθάρ, χρειαζίντιβελα τι τζανάς ο απαντήσεις τρινέ ερωτησιέντε. Σαρ χουχαβέλα ο Μπενγκ ι τζενέν αντιβές; Σόσκε βακερένα ψέματα ο τζενέ; Ντα σαρ μπορίνασα τι βακεράς πάντα ι αλήθεια για μα τι χασαράς αμαρί φιλία ι Ιεχωβάσαρ σαρ χασαρντάς-λα ο Αδάμ ντα η Εύα;​—Διαβάνεν Ψαλμός 15:1, 2.

5. Σαρ χουχαβέλα ο Μπενγκ ι τζενέν αντιβές;

⁵ Ισί πράγματα σο μπορίνασα τι κεράς για μα τι χουχαβέλ-αμέν ο Μπενγκ. Ο απόστολος Παύλος βακερντάς: «Τζανάσα οντουλά σο μανγκέλα τι κερέλ». (2 Κορινθίους 2:​11) Τζανάσα ότι ο Μπενγκ τθερέλα πι βαστέντε σαρέ ι ντουνιάς, σο λέστε ισί η ψεύτικη θρησκεία, ο γκεραλέ κυβερνήσεις ντα ο επιχειρήσεις σο ισί μπίτσαλε γιακχίνγκε. (1 Ιωάννη 5:​19) Οτθάρ, να κερέλα αμένγκε εντύπωση σο ο Μπενγκ ντα λέσκε δαίμονες κερένα ι τζενέν σο τθερένα εξουσία τι “βακερέν ψέματα”. (1 Τιμόθεο 4:1, 2) Για παράδειγμας, μερικοί επιχειρηματίες βακερένα ψέματα αντράλ κατά διαφημίσεις για τι μπικινέν πράγματα σο κερένα κακός ή για τι χουχαβέν ι τζενέν ντα τι λεν λένγκε λοβέ.

6, 7. (α) Σόσκε ισί μπουτ γκεραλό πράγμας τι βακερέν ψέματα ο αρχηγοί ι θρησκειάκε; (β) Καλά ψέματα ασουντέν τουμέν κατά αρχηγοί ι θρησκειάκε;

⁶ Ισί μπουτ γκεραλό πράγμας τι βακερέν ψέματα ο αρχηγοί ι θρησκειάκε. Σόσκε; Επειδή αν εκ τζενό πακιάλα λένγκε ψεύτικα λάφια ντα κερέλα πράγματα σο μισίνελα ο Ντεβέλ, μπορεί τι χασαρέλ ι ευκαιρία τι τζουβντιόλ για πάντα. (Ωσηέ 4:9) Ο Ιησούς τζανέλας ότι ο αρχηγοί ι θρησκειάκε σο τζουβντιόνας αζομάν χουχαβένας ι τζενέν. Βακερντάς λένγκε χωρίς τι νταρέλ: «Τιμωρία κα τσσίντεν τουμέν, γραμματείς ντα Φαρισαίοι, υποκριτές, σόσκε ταξιδίνενα κι ντεριάβ ντα κι πφουβ για τι κερέν εκχέ τζενές τι δεχτίνελ τουμαρί θρησκεία, ντα κάνα βοβ αλλάνελα, ισί έτοιμος για τι τζαλ κι Γέεννα», δηλαδή τι καταστραφίντιβελ  για πάντα. (Ματθαίος 23:​15) Ο Ιησούς βακερντάς ότι οντουλά αρχηγοί ι ψεύτικε θρησκειάκε ισινέ σαρ λένγκο Ντατ, ο Μπενγκ, σο “μουνταρέλα τζενέν”.​—Ιωάννης 8:44.

⁷ Αμαρέ ντιβεσέντε-ντα ισί μπουτ αρχηγοί ι θρησκειάκε. Βον μπορεί τι βακέρντιβενα πάστορες, παπάζια, ραβίνοι, σουάμι ή γιαβέρτουλους. Σαρ ο Φαρισαίοι, βον να σικλιαρένα ι αλήθεια κατά Λάφι ι Ντεβλέσκο αλλά «τραμπιντέ τι πακιάν ο ψέμας ντα όχι ι αλήθεια ι Ντεβλέσκι». (Ρωμαίους 1:​18, 25) Μερικά ψέματα σο βακερένα ισί ότι υπαρχίντιβελα κόλαση, ότι ο τζενέ τθερένα γκιά σο να μερένα, ντα ότι ο Ντεβέλ δεχτίνελα τι τζαλ μουρς μουρσέσαρ ντα τζουβέλ τζουβλιάσαρ ντα ότι μουκχέλα-λεν τι παντρίνεν.

8. Καβά ψέμας κα βακερέν ατζεχάνικ ο πολιτικοί αρχηγοί, αλλά σο πρέπει τι κεράς αμέν;

⁸ Ο πολιτικοί-ντα βακερένα ψέματα για τι χουχαβέν ι τζενέν. Εκ κατά πιο μπαρέ ψέματα σο κα βακερέν ατζεχάνικ ισί ότι αντέ «ειρήνη ντα ασφάλεια» κο ντουνιάς. Αλλά «αζομάν ξαφνική καταστροφή κα αβέλ αμέσως οπρά-λέντε». Οτθάρ, δεν πρέπει τι πακιάς οντουλέ πολιτικέ αρχηγόν σο βακερένα ότι ο πράγματα κο ντουνιάς τζάνα πιο λατσσές. Η αλήθεια ισί ότι αμέν τζανάσα «μπουτ λατσσές ότι ο ντιβές ι Ιεχωβάσκο αβέλα ακριβώς σαρ εκ τσορ αντρέ κι ιράτ».​—1 Θεσσαλονικείς 5:​1-4.

9, 10. (α) Σόσκε βακερένα ψέματα ο τζενέ, ντα σο αποτελέσματα ανέλα ανταβά; (β) Σο πρέπει τι ντας-αμέν γκοντί ι Ιεχωβάσκε;

⁹ Αμαρέ ντιβεσέντε, να βακερένα ψέματα σάντε ο τζενέ σο τθερένα εξουσία. Εκ άρθρος με θέμας «Σόσκε Βακεράσα Ψέματα» εξηγίνελα ότι «μπουτ τζενέ ερεσλέ κο σημείος τι δεχτίνεν ότι ο ψέμας τθερένα-λες σαρέ ντιπ αντρέ πουμαρέ γκίστε». Γιαβερέ λαφίντζαρ, ο τζενέ πακιάνα ότι ισί φυσιολογικός τι βακερέν ψέματα. Μπουτ φαρ ο τζενέ βακερένα ψέματα για τι αρακχαβέν-πες, ίσως για τι γκεραβέν πουμαρέ λάθη ή ο εγκλήματα σο κερντέ. Επίσης, βακερένα ψέματα για τι νικαβέν λοβέ ή για τι ωφελίντιβεν γιαβερέ τροπόσαρ. Ο άρθρος επίσης βακερέλα ότι μερικά τζενέ να τθερένα πρόβλημας τι βακερέν ψέματα «τζενέντε σο να τζανένα, οντουλέντε σο κερένα μπουτί λέντζαρ, πουμαρέ αμαλέντε ντα πουμαρέ αγαπημέ τζενέντε».

¹⁰ Σο αποτέλεσμας ανένα σαρέ ανταλά ψέματα; Ο τζενέ να ντένα μπέσα ο εκ κο γιαβέρ ντα λένγκε σχέσεις χαλάντιβενα. Για παράδειγμας, σκεφτίνεν καζόμ πφανγκιόλα ο γκι εκχέ μουρσέσκο σο ισί πιστός πι ρομνιάτε κάνα λέλα αμπέρι ότι βόι γκιλί γιαβερέσαρ ντα σοράν βακερντάς λέσκε ψέματα για τι γκεραβέλ οντουβά σο κερντάς. Ή σκεφτίνεν σο γκεραλό πράγμας ισί κάνα εκ μουρς συμπεριφερίντιβελα μπέτι τροπόσαρ πι ρομνιάκε ντα πι τσσαβένγκε κχερέ, αλλά ανγκλάλ κο γιαβερά κερέλα-πες ότι ισί λατσσό ντα ότι πφαμπόλα λένγκε. Ασακέ τζενέ μπορίνενα τι χουχαβέν ι γιαβερέ τζενέν, αλλά πρέπει τι  ντας-αμέν γκοντί ότι ναστί χουχαβένα ι Ιεχωβάς. Η Γραφή βακερέλα ότι «σαρέ ο πράγματα ντικχιόνα ντα ισί ξεκάθαρα» λέσκε γιακχίντε.​—Εβραίους 4:13.

11. Σο σικλιάσα οντουλέσταρ σο κερντάς ο Ανανίας ντα η Σαπφείρα; (Ντικχ ι φωτογραφία σο ισί κι αρχή)

¹¹ Κι Γραφή αρακχάσα ο παράδειγμας εκχέ αντρογυνόσκο σο ο Μπενγκ κερντάς-λεν τι βακερέν ψέματα κο Ντεβέλ. Ο Ανανίας ντα η Σαπφείρα προσπαθιντέ τι χουχαβέν ι αποστολόν. Μπικιντέ εκ κτήμας σο τθερένας ντα να αντέ κο απόστολοι σαρέ ο λοβέ σο λιντέ. Ο Ανανίας ντα η Σαπφείρα μανγκένας τι εντυπωσιάνεν ι γιαβερέν κι κχανγκιρί, οτθάρ βακερντέ κο απόστολοι ότι ντινέ σαρέ ο λοβέ. Αλλά ο Ιεχωβά τζανέλας ότι βακερένας ψέματα ντα τιμωριντάς-λεν.​—Πράξεις 5:​1-10.

12. Σο κα αβέλ-πες κο τζενέ σο βακερένα ψέματα με γκεραλό σκοπός ντα να μετανιώνενα, ντα σόσκε;

¹² Σαρ νιωθίνελα ο Ιεχωβά ι τζενένγκε σο βακερένα ψέματα; Σαρέ ο τζενέ σο βακερένα ψέματα με γκεραλό σκοπός ντα να μετανιώνενα, κα τζαν κι «λίμνη σο πφαμπόλα με γιακ» γιεκ ι Μπενγκέσαρ. Γιαβερέ λαφίντζαρ, κα καταστραφίντιβεν για πάντα. (Αποκάλυψη 20:​10· 21:8· Ψαλμός 5:6) Σόσκε; Επειδή ο Ιεχωβά ντικχέλα οντουλέ ψευτέν σαρ ντικχέλα σαρέ ι γιαβερέν σο «κερένα πράγματα τζουνγκαλέ κι Ντεβλέσκε γιακχά».​—Αποκάλυψη 22:​15, υποσημείωση.

13. Σο τζανάσα ι Ιεχωβάσκε, ντα σο τσσίντελα-αμέν τι κεράς ανταβά;

¹³ Τζανάσα ότι ο Ιεχωβά «νανέ τζενό για τι βακερέλ ψέματα» ντα ότι «ναστί αβέλα-πες τι βακερέλ ψέματα ο Ντεβέλ». (Αριθμοί 23:​19· Εβραίους 6:​18) Ο Ιεχωβά μισίνελα ι «τσσιπ σο βακερέλα ψέματα». (Παροιμίες 6:​16, 17) Άμα μανγκάσα τι κεράς-λες τι χαιρίνελ, πρέπει τι βακεράς ι αλήθεια. Οτθάρ, “να βακεράσα ψέματα ο εκ κο γιαβέρ”.​—Κολοσσαείς 3:9.

14. (α) Σο κερέλα ι αληθινέ Χριστιανόν τι αβέν διαφορετικοί οντουλένταρ σο πακιάνα ψεύτικε θρησκειέντε; (β) Εξηγίνεν ι αρχή ι Γραφιάκι σο ισί κο εδάφιος Λουκάς 6:45.

¹⁴ Καβά ισί εκ τρόπος σο ο αληθινοί Χριστιανοί ισί διαφορετικοί οντουλένταρ σο πακιάνα ψεύτικε θρησκειέντε; “Βακεράσα ι αλήθεια”. (Διαβάνεν Ζαχαρίας 8:​16, 17) Ο Παύλος βακερντάς: “Σικαβάσα ότι ισινάμ υπηρέτες ι Ντεβλέσκε . . . [κάνα] βακεράσα αληθινά λάφια”. (2 Κορινθίους 6:4, 7) Ντα ο Ιησούς βακερντάς: «[Ι τζενέσκο] μούι κερέλα λάφι ι πραγματένγκε σο πφερένα λέσκο γκι». (Λουκάς 6:​45) Ανταβά μανγκέλα τι βακερέλ ότι εκ τζενό σο ισί τίμιος κα βακερέλ ι αλήθεια. Κα βακερέλ ι αλήθεια κο τζενέ σο να τζανέλα, οντουλέντε σο κερέλα λέντζαρ μπουτί, πι αμαλέντε ντα πι αγαπημέ τζενέντε. Ακανά κα ντικχάς μερικά παραδείγματα σο σικαβένα σαρ μπορίνασα τι αβάς τίμιοι σαρέ κο πράγματα.

15. (α) Σόσκε νανέ λατσσό τι τζουβντιόλ κάποιος διπλή ζωή; (β) Σο μπορίνελα τι βοηθίνελ ι τερνέν τι τζαν κόντρα κι πίεση κι γιαβερέ τερνένγκι; (Ντικχ ι υποσημείωση)

¹⁵ Άμα ισινάν τερνό, μπορεί τι μανγκέσα τι ταιριάνες ι γιαβερέ τερνέντζαρ. Επειδή νιωθίνενα αντικάς, μερικά τερνέ τζουβντιόνα διπλή ζωή. Κερένα-πες ότι ισί πάκι κι Ντεβλέσκε γιακχά κάνα ισί πουμαρέ φαμιλιάσαρ ντα ι πφραλέντζαρ αλλά ισί μπουτ διαφορετικοί κο κοινωνικά δίκτυα ή κάνα ισί τζενέντζαρ σο να υπηρετίνενα ι Ιεχωβάς. Μπορεί τι κουσένα, τι ιρίνα σέα σο νανέ σεμνά, τι ασουνένα γκιλιά σο τθερένα μπέτι λάφια, τι ματιόνα, τι λένα ναρκωτικά, τι νικιόνα ραντεβού αποτσοράλ ή τι κερένα γιαβερά μπέτι πράγματα. Βακερένα ψέματα πουμαρέ νταντέστε ντα νταγιάτε, πουμαρέ πφραλέντε ντα κο Ιεχωβά. (Ψαλμός 26:4, 5) Όμως, ο Ιεχωβά τζανέλα κάνα βακεράσα ότι ντάσα-λες δόξα αλλά σοράν κεράσα πράγματα σο μισίνελα. (Μάρκος 7:6) Ισί μπουτ πιο λατσσό τι κεράς οντουβά σο βακερέλα ακαγιά παροιμία: «Το γκι μα τι ζηλίνελ ι αμαρτωλόν, αλλά τι νταρές κατά Ιεχωβά σαρό ο ντιβές».​—Παροιμίες 23:​17. * (Ντικχ ι υποσημείωση)

16. Σαρ πρέπει τι απαντίνας κο ερωτήσεις σο ισί κο αιτήσεις για ολοχρόνια υπηρεσία;

¹⁶ Άμα μανγκέσα τι αβές τακτικός σκαπανέας ή τι αρχίνες ι ειδική ολοχρόνια υπηρεσία, σαρ για παράδειγμας τι υπηρετίνες κο Μπέθελ, πρέπει τι κερές εκ αίτηση. Ισί μπουτ σημαντικός τι απαντίνες τίμια κο ερωτήσεις ντα τι γραφίνες σαρ ισί μπαγιά τι υγεία, σο διασκέδαση τραμπίνεσα ντα άμα ισινάν πάκι κι Ντεβλέσκε γιακχά. (Εβραίους 13:​18) Αλλά σο αβέλα-πες άμα κερντάν κάτι σο μισίνελα ο Ιεχωβά ή κάτι σο ενοχλίνελα τι συνείδηση ντα να βακερντάν-λες ανταβά κο πρεσβύτεροι; Μανγκ λένταρ βοήθεια για τι μπορίνες τι υπηρετίνες ι Ιεχωβάς με πάκι συνείδηση.​—Ρωμαίους 9:1· Γαλάτες 6:1.

17. Σο πρέπει τι κεράς άμα οντουλά σο τζάνα αμέντζαρ κόντρα κερένα αμένγκε ερωτήσεις αμαρέ πφραλένγκε;

¹⁷ Σο πρέπει τι κερέν άμα ο έργος ισί απαγορευμέ οτθέ σο τζουβντιόνα ντα ο τζενέ σο τθερένα εξουσία κα ασταρέν-τουμέν ντα κα κερέν τουμένγκε ερωτήσεις τουμαρέ πφραλένγκε; Πρέπει τι βακερέν λένγκε σαρέ οντουλά σο τζανένα; Σο κερντάς ο Ιησούς κάνα εκ Ρωμαίος κυβερνήτης κερντάς-λες ανάκριση; Ο Ιησούς  ακολουθίνελας ι αρχή ι Γραφιάκι σο βακερέλα ότι «ισί βακίτι μα τι κερέλ λάφι εκ τζενό ντα βακίτι τι κερέλ λάφι», ντα μερικές φορές να βακερέλας τίποτα! (Εκκλησιαστής 3:1, 7· Ματθαίος 27:​11-14) Άμα κα αβέλ-πες κάτι ασακό αμένγκε-ντα, πρέπει τι αβάς γκοντιαβέρ ντα προσεκτικοί για μα τι τσσουβάς αμαρέ πφραλέν σε κίνδυνος.​—Παροιμίες 10:​19· 11:12.

18. Σο ευθύνη τθεράσα άμα ο πρεσβύτεροι κερένα αμένγκε ερωτήσεις αμαρέ πφραλένγκε;

¹⁸ Σο αβέλα-πες άμα εκ τζενό κι κχανγκιρί κερντάς εκ μπαρί αμαρτία ντα τουμέν τζανένα σο αβιλό-πες; Ο πρεσβύτεροι τθερένα ι ευθύνη τι ατσσικιαρέν ι κχανγκιρί πάκι κι Ντεβλέσκε γιακχά, οτθάρ μπορεί τι πουτσέν-τουμέν σο τζανένα. Σο κα κερέν, ειδικά άμα ισινέν τζενέ ή λατσσέ αμαλά ι τζενέσαρ σο αμαρτιντάς; Η Γραφή βακερέλα: «Ο πιστός μάρτυρας βακερέλα ι αλήθεια». (Παροιμίες 12:​17· 21:​28) Άρα, τθερένα ι ευθύνη τι βακερέν κο πρεσβύτεροι σαρί ι αλήθεια χωρίς τι γκεραβέν τίποτα. Ο πρεσβύτεροι τθερένα ο δικαίωμας τι τζανέν σο αβιλό για τι μπορίνεν τι αρακχέν ο πιο λατσσό τρόπος τι βοηθίνεν ι τζενές τι τθερέλ πάλι λατσσί σχέση ι Ιεχωβάσαρ.​—Ιακώβου 5:​14, 15.

19. Σο κα ντικχάς κο γιαβέρ μάθημας;

¹⁹ Ο Δαβίδ προσευχισάλο κο Ιεχωβά: «Αρακχέσα χαρά κι αλήθεια σο τθερέλα κάποιος πι γκίστε». (Ψαλμός 51:6) Ο Δαβίδ τζανέλας ότι οντουβά σο τθερέλα σημασία ισί σο ισινάμ αντρ’ αμέντε. Ο αληθινοί Χριστιανοί πάντα “βακερένα ι αλήθεια ο εκ κο γιαβέρ”. Εκ γιαβέρ τρόπος για τι σικαβάς ότι ισινάμ διαφορετικοί οντουλένταρ σο πακιάνα ψεύτικε θρησκειέντε ισί τι σικλιαράς κο τζενέ ι αλήθεια ι Γραφιάκι. Κο γιαβέρ μάθημας, κα ντικχάς σαρ μπορίνασα τι κεράς-λες ανταβά κο έργος.