1. Σόσκε πρέπει τι αβάς αφοσιωμέ σάντε κο Ιεχωβά;

ΠΡΕΠΕΙ τι αβάς αφοσιωμέ σάντε κο Ιεχωβά επειδή ισί Οντουβά σο κερντάς-αμέν ντα ντινάς-αμέν ζωή. (Αποκ. 4:​11) Αλλά υπαρχίντιβελα εκ κίνδυνος. Παρόλο σο μανγκάσα ντα σεβάνασα ι Ιεχωβάς, μπορεί τι χουχάντιβας ντα μα τι αβάς αφοσιωμέ σάντε λέστε αντικάς σαρ αξίνελα. Χρειαζίντιβελα τι αγαβάς σαρ μπορίνελα τι αβέλ-πες ανταβά. Πρώτα όμως, κα ντικχάς σο μανγκέλα τι βακερέλ τι αβάς αφοσιωμέ κο Ιεχωβά.

2. Σο κα κεράς άμα ισινάμ αφοσιωμέ σάντε κο Ιεχωβά σαρ βακερέλα ο εδάφιος Έξοδος 34:14;

² Σαρ βακερέλα η Αγία Γραφή, για τι αβάς αφοσιωμέ κο Ντεβέλ πρέπει τι τθεράς μπαρί αγάπη λέσκε. Άμα ισινάμ αφοσιωμέ σάντε κο Ιεχωβά, κα ντας λατρεία σάντε λες. Να κα μουκχάς καεκχές ντα τίποτα τι λελ ο τθαν σο τθεράσα Λέσκε αντρέ αμαρέ γκίστε.​—Διαβάνεν Έξοδος 34:14.

3. Σόσκε τθεράσα σημαντικούς λόγους τι αβάς αφοσιωμέ κο Ιεχωβά;

³ Οντουλά σο σικλιλάμ ι Ιεχωβάσκε ντένα-αμέν σημαντικούς λόγους τι αβάς αφοσιωμέ λέστε. Μπεϊντίνασα μπουτ λέσκε σουκάρ ιδιότητες. Τζανάσα σο μανγκέλα ντα σο μισίνελα, ντα ντικχάσα ο πράγματα σαρ ντικχέλα-λεν βοβ. Αγαβάσα ντα υποστηρίνασα ο σκοπός σο τθερέλα αμένγκε ο Ιεχωβά. Ισί μπαρό προνόμιος αμένγκε σο ντέλα-αμέν ι ευκαιρία τι αβάς λέσκε αμαλά. (Ψαλμ. 25:​14) Σο-ντα σικλιάσα Οντουλέσκε σο κερντάς-αμέν ανέλα-αμέν πιο πασέ λέστε.​—Ιακ. 4:8.

4. (α) Σο χρησιμοποιήνελα ο Μπενγκ για μα τι αβάς αφοσιωμέ κο Ιεχωβά; (β) Σο κα ντικχάς ανταλέ μαθημάστε;

 ⁴ Ο Μπενγκ κερέλα κουμάντος ανταλέ ντουνιάς, ντα χρησιμοποιήνελα-λες για τι τσσουβάς πρώτα αμαρέ ζωγιάτε ο πράγματα σο μανγκένα ο τζενέ ντα ο λάθος πράγματα σο μανγκέλα αμαρό σώμας. (Εφεσ. 2:​1-3· 1 Ιωάν. 5:​19) Μανγκέλα τι κερέλ-αμέν τι μανγκάς γιαβερά-ντα πράγματα για μα τι μανγκάς σάντε ι Ιεχωβάς. Για τι ντικχάς καλέ ντουέ τροπόντζαρ κερέλα-λες ανταβά. Πρώτον, προσπαθίνελα τι κερέλ-αμέν τι μανγκάς ο χουλανιπέ ντα, δεύτερον, προσπαθίνελα τι κερέλ-αμέν μα τι τραμπίνας λατσσί διασκέδαση.

5. Σόσκε πρέπει τι αρακχαβάς-αμέν για μα τι μανγκάς μπουτ ο λοβέ;

⁵ Σαρέ μανγκάσα τι τθεράς χαμπέ τι χας, σέα τι ιριάς ντα εκ τθαν τι μπεσάς. Όμως, πρέπει τι αρακχαβάς-αμέν για μα τι μανγκάς μπουτ ο λοβέ. Μπουτ τζενέ κι Μπενγκέσκο ντουνιάς “μανγκένα μπουτ ο λοβέ” ντα ο πράγματα σο κινένα ι λοβέντζαρ. (2 Τιμ. 3:2) Ο Ιησούς τζανέλας ότι λέσκε μαθητές μπορεί τι αρχίνενας τι τθερέν εκ ασακί αγάπη. Οτθάρ βακερντάς: «Καέκ ναστί υπηρετίνελα σαρ δούλος ντουέ κυριόν· σόσκε ή κα μισίνελ ι εκχές ντα κα μανγκέλ ι γιαβερές ή κα ατσσόλ πασέ κο εκ ντα κα μουκχέλ ι γιαβερές. Ναστί υπηρετίνενα σαρ δούλοι ι Ντεβλές ντα ο Χουλανιπέ». (Ματθ. 6:​24) Εκ τζενό σο ντέλα λατρεία ι Ιεχωβάς ενώ ντέλα μπουτ πι σαατίσταρ ντα μαρέλα-πες για τι αβέλ χουλανό, ισί σαρ τι υπηρετίνελα ντουέ κυριόν. Νανέ αφοσιωμέ σάντε κο Ιεχωβά.

6. Σο σικλιάσα οντουλένταρ σο βακερντάς ο Ιησούς ι κχανγκιριάκε κι Λαοδίκεια;

⁶ Μερικά πφραλά κι Λαοδίκεια ισαρένας-πες: «Ισινόμ χουλανό ντα χουλάνιλομ ντα να χρειαζίντιβαβα τίποτα». Αλλά  κο γιακχά κι Ιεχωβάσκε ντα κι Ιησούσκε, ο κάθε εκ λένταρ ισινέ «ταλαιπωριμέ ντα μπεζαβά ντα τσορορό ντα κορορό ντα νανγκό». Ο Ιησούς ντινάς-λεν συμβουλή, όχι επειδή ισινέ χουλανέ, αλλά επειδή λένγκι αγάπη ι λοβένγκε χαλαβέλας λένγκι φιλία ι Ιεχωβάσαρ. (Αποκ. 3:​14-17) Άμα αγαβάσα ότι αρχίνασα τι μανγκάς αμαρέ γκίστε ο λοβέ, πρέπει τι κεράς κάτι σουγκό για τι αλλάνας ο τρόπος σο σκεφτίνασα. (1 Τιμ. 6:7, 8) Άμα να κα κεράς-λες ανταβά, κα αρχίνας τι μανγκάς γιαβερά-ντα πράγματα ντα ο Ιεχωβά να κα δεχτίνελ αμαρί λατρεία, σόσκε βοβ «μανγκέλα τι αβάς αφοσιωμέ σάντε λέστε». (Δευτ. 4:​24) Σαρ κα μπορίνενας ο λοβέ τι αβέν μπουτ σημαντικά αμαρέ ζωγιάτε;

7-9. Σο σικλιόνα κατά εμπειρία εκχέ πρεσβυτερόσκι σο βακερένα λέσκε Ντέιβιντ;

⁷ Ντικχέν σο κερντάς ο Ντέιβιντ, εκ μπουτιαρνό πρεσβύτερος σο τζουβντιόλα κο Ηνωμένες Πολιτείες. Σαρ βακερέλα βοβ, ισινέ μπουτ λατσσό πι μπουτιάτε. Η εταιρία σο κερέλας μπουτί λάτε ντινάς-λες εκ πιο λατσσί θέση ντα πιο μπουτ λοβέ ντα βακερντάς ότι ισινέ εκ κατά χάνικ τζενέ οντουλέ τθεμέστε σο κερέλας αζόμ λατσσί μπουτί. «Αζομάν πακιάβας ότι ανταλά πράγματα σικαβένας μάνγκε ότι ο Ιεχωβά ευλογίνελας-μαν», βακερέλα ο Ντέιβιντ. Ισινέ όμως αντικάς;

⁸ Ο Ντέιβιντ αρχισάλο τι αγαβέλ ότι λέσκι μπουτί χαλαβέλας λέσκι φιλία ι Ιεχωβάσαρ. «Κο συναθροίσεις, ατζέ-ντα κο έργος, ασταράβας μο νεαυτός τι σκεφτίνελ ο προβλήματα ι μπουτιάκε», βακερέλα. «Νικαβάβας μπουτ λοβέ, αλλά μο άγχος καζόμ τζάλας αβέλας πιο μπαρό ντα μο μπιαβ τθερέλας προβλήματα».

⁹ Ο Ντέιβιντ αγαντάς ότι έπρεπε τι ντικχέλ καλά πράγματα τσσουβέλας πρώτα πι ζωγιάτε. «Τσσουντόμ στόχος τι διορθώναβ  ο πράγματα», βακερέλα. Μανγκέλας τι αλλάνελ ο πρόγραμμας πι μπουτιάκο, οτθάρ βακερντάς πι αφεντικόσκε σο μανγκέλας τι κερέλ. Καβά ισινέ ο αποτέλεσμας; Χασαρντάς πι μπουτί! Σο κερντάς; Βοβ βακερέλα: «Ο γιαβέρ ντιβές ατζέκ, κερντόμ αίτηση για τι λαβ ο βοηθητικός σκαπανικός μπουτ μάσεκ». Για τι νικαβέν ο αναγκαία, ο Ντέιβιντ ντα λέσκι ρομνί αρχισάλε τι κερέν μπουτί σαρ καθαριστές. Σοράν από χάνικ καιρός, βοβ λιντάς ο τακτικός σκαπανικός, ντα πιο σοράν λιντάς-λες λέσκι ρομνί-ντα. Τραμπιντέ εκ μπουτί σο να πφερέλα μπουτέ τζενένγκι γιακχ, αλλά λένγκε ο πιο σημαντικός νανέ σο μπουτί κερένα. Παρόλο σο ο λοβέ σο λένας ανγκλέ ισινέ 10 φαρ πιο μπουτ οντουλένταρ σο λένα ακανά, κάθε μάσεκ τθερένα ακριβώς καζόμ χρειαζίντιβενα για τι ντεν-λεν πέρα. Μανγκένα τι τθερέν ι Ιεχωβάς κι πρώτη θέση, ντα ντικχλέ πουμαρέ ζωγιάτε ότι βοβ φροντίνελα οντουλέν σο τσσουβένα ι Βασιλεία πρώτα πουμαρέ ζωγιάτε.​—Ματθ. 6:​31-33.

10. Σαρ κα αρακχαβάς αμαρό γκι;

¹⁰ Είτε τθεράσα χάνικ είτε μπουτ λοβέ, χρειαζίντιβελα τι αρακχαβάς αμαρό γκι. Σαρ; Μα μπαριαρέν αγάπη ι χουλανιμάσκε. Ντα μα μουκχέν τουμαρί μπουτί τι αβέλ πιο σημαντική κατά υπηρεσία ι Ιεχωβάσκι. Σαρ κα αγαβέν άμα αβέλα-πες κάτι ασακό; Μπορίνενα τι πουτσέν τουμαρό νεαυτός: “Μήπως σκεφτίναβα μπουτ φαρ μι μπουτί κάνα ισινόμ κι συνάθροιση ή κο έργος; Μήπως ανησυχίναβα μπουτ ότι να κα τθεράβ μπερεκέτι λοβέ κο μέλλον; Μήπως ο λοβέ ντα ο υλικά πράγματα ανένα προβλήματα μι μπιαβέστε; Κα κεράβας εκ μπουτί σο να πφερέλα ι γιαβερένγκι γιακχ άμα κα μουκχέλας-μαν τι κεράβ πιο μπουτ πράγματα κι υπηρεσία κι Ιεχωβάσκι;” (1 Τιμ. 6:​9-12) Κάνα σκεφτίνασα ανταλά ερωτήσεις, τι ντας-αμέν γκοντί ότι ο Ιεχωβά μανγκέλα-αμέν ντα ντέλα ακαγιά υπόσχεση οντουλέντε σο ισί αφοσιωμέ λέστε: «Να κα μουκχάβ-τουτ ούτε κα παρατίναβ-τουτ». Άκ’ σόσκε ο απόστολος Παύλος γραφιντάς: «Ο τρόπος σο τζουβντιόνα τι σικαβέλ ότι να τθερένα αγάπη ι λοβένγκε».​—Εβρ. 13:5, 6.

11. Σαρ ανέλα μπέτι αποτελέσματα εκχέ τζενέσκε η διασκέδαση;

¹¹ Ο Ιεχωβά μανγκέλα τι απολαμβάνας ι ζωή, ντα η διασκέδαση μπορίνελα τι βοηθίνελ-αμέν τι κεράς-λες ανταβά. Μάλιστα ο Λάφι ι Ντεβλέσκο βακερέλα ότι «ο πιο λατσσό πράγμας εκχέ τζενέσκε ισί τι χαλ ντα τι πιλ ντα τι μπεϊντίνελ ι μπουτί σο κερέλα». (Εκκλ. 2:​24) Όμως, μπουτ κατά  διασκέδαση σο ισί ανταλέ ντουνιάστε ανέλα μπέτι αποτελέσματα. Κερέλα ι τζενέν τι δεχτίνεν ή ατζέ-ντα τι μανγκέν πράγματα σο να μανγκέλα-λεν ο Ντεβέλ, ντα ερεσένα κο σημείος τι μαγαρίνεν πουμαρί ζωή.

12. Σόσκε πρέπει τι τραμπίνας με προσοχή αμαρί διασκέδαση σαρ βακερένα ο εδάφια 1 Κορινθίους 10:​21, 22;

¹² Μανγκάσα τι αβάς αφοσιωμέ σάντε κο Ιεχωβά, οτθάρ ναστί χάσα εμ κατά «τραπέζι ι Ιεχωβάσκο» εμ κατά «τραπέζι ι δαιμονένγκο». (Διαβάνεν 1 Κορινθίους 10:​21, 22) Κάνα χάσα εκχέ τζενέσαρ ανταβά σικαβέλα ότι ισινάμ αμαλά. Άμα τραμπίνασα διασκέδαση σο τθερέλα βία, μπενγκαλέ πράγματα, λουμνιπέ ή γιαβερά μπέτι πράγματα, ισί σαρ τι χάσα εκ χαμπέ σο ετοιμαντέ ο ντουσμάνια ι Ντεβλέσκε. Αντικάς, κεράσα κακός όχι σάντε αμαρέ νεαυτόστε αλλά κι φιλία-ντα σο τθεράσα ι Ιεχωβάσαρ.

13, 14. Σόσκε πρέπει τι τραμπίνας με προσοχή αμαρί διασκέδαση σαρ βακερένα ο εδάφια Ιακώβου 1:​14, 15; Βακερέν εκ παράδειγμας.

¹³ Σκεφτίνεν σαρ μοιάζελα η διασκέδαση ι χαμπέσαρ. Κάνα χάσα, ισί αμαρέ βαστέστε τι τραμπίνας σο τσσουβάσα αμαρέ μόστε. Αλλά κάνα μπιλιαβάσα ο χαμπέ, ναστί τραμπίνασα σαρ κα επηρεάνελ αμαρό σώμας. Εκ λατσσό χαμπέ κερέλα αμένγκε λατσσιπέ, αλλά εκ χαμπέ σο νανέ λατσσό κερέλα αμένγκε κακός. Ο αποτελέσματα μπορεί μα τι αγαντίντιβεν αμέσως, αλλά καζόμ κα νακχέλ ο καιρός κα αγαντίντιβεν.

¹⁴ Ο ίδιος αβέλα-πες κάνα τραμπίνασα διασκέδαση. Ισί αμαρέ βαστέστε τι τραμπίνας σο τσσουβάσα αμαρέ γκοντιάτε. Σοράν ανταλέσταρ, ναστί τραμπίνασα σαρ κα επηρεάνελ αμαρί γκοντί ντα αμαρό γκι. Η λατσσί διασκέδαση κα κερέλ αμένγκε λατσσιπέ, αλλά εκ μπέτι διασκέδαση κα κερέλ αμένγκε κακός. (Διαβάνεν Ιακώβου 1:​14, 15) Ο αποτελέσματα κατά μπέτι διασκέδαση μπορεί μα τι αγαντίντιβεν αμέσως, αλλά καζόμ κα νακχέλ ο καιρός κα αγαντίντιβεν. Άκ’ σόσκε η Γραφή προειδοποιήνελα-αμέν: «Μα χουχάντιβεν: καέκ ναστί κχελέλα πέσκε ι Ντεβλέσαρ. Επειδή σο φυτίνελα ο τζενό, οντουβά κα γκίντελ· επειδή κάνα οντουβά σο φυτίνελα σκεφτίνελα πο σώμας κα γκίντελ καταστροφή πι σωμάσταρ». (Γαλ. 6:7, 8) Καζόμ σημαντικός ισί μα τι μανγκάς ιτς ι διασκέδαση σο τθερέλα τι κερέλ πραγματέντζαρ σο μισίνελα ο Ιεχωβά!​—Ψαλμ. 97:10.

15. Καβά δώρος κερντάς αμένγκε ο Ιεχωβά;

¹⁵ Μπουτ υπηρέτες ι Ιεχωβάσκε ντικχένα χαράσαρ ο JW Broadcasting^®, αμαρό κανάλι κο Ίντερνετ σο κερέλα αμένγκε λατσσιπέ. Εκ πφεν σο βακερένα λάκε Μέριλιν βακερέλα: «Ο JW Broadcasting βοηθίνελα-μαν τι αβάβ πιο ευτυχισμέ, ντα μπορίναβα τι ντικχάβ σαρέ οντουλά σο τθερέλα σόσκε κερέλα μάνγκε λατσσιπέ. Κάνα νιωθίναβα ότι ισινόμ κορκορί ή ότι χασαρντόμ μι ζορ, αρακχάβα εκ ομιλία ή εκ Πρωινή Λατρεία ντα ντικχάβα-λα. Ανταβά κερέλα-μαν τι αβάβ πιο πασέ κο Ιεχωβά ντα κι οργάνωση λέσκι. Ο JW Broadcasting αλλαντάς σαρί μι ζωή». Βοηθίντιβενα τουμέν κατά Ιεχωβάσκο δώρος; Εκτός κατά νεβό πρόγραμμας κάθε μάσεκ, ο JW Broadcasting τθερέλα μπουτ ηχογραφήσεις ντα βίντεα αλλά εμ ύμνοι ντα γκιλιά σο ντένα-αμέν ζορ, ντα μπορίνασα τι τσσουβάς-λεν κάνα-ντα τι χρειαζίντιβας-λεν.

16, 17. Σόσκε πρέπει τι προσοχίνας καζόμ σαάτι κα χαλαβάς κι διασκέδαση, ντα σαρ κα κεράς-λες ανταβά;

¹⁶ Πρέπει τι προσοχίνας, όχι σάντε σο διασκέδαση τραμπίνασα, αλλά καζόμ σαάτι-ντα χαλαβάσα λάτε. Άμα να κα κεράς-λες ανταβά, μπορεί τι αρχίνας τι χαλαβάς μπουτ σαάτι κι διασκέδαση ντα πιο χάνικ κι υπηρεσία κι Ιεχωβάσκι. Μπουτ τζενέ δυσκολίντιβενα τι τραμπίνεν καζόμ σαάτι κα  χαλαβέν κι διασκέδαση. Η Άμπιγκεϊλ σο ισί 18 μπρεσένγκι βακερέλα: «Η τηλεόραση βοηθίνελα-μαν τι χαλαρώναβ κο τέλος εκχέ πφερντέ ντιβεσέσκο. Άμα όμως να προσοχίναβα, μπορεί τι χαβόναβ μπουτ σαάτια οτθέ ανγκλάλ». Εκ πφραλ σο βακερένα λέσκε Σάμιουελ βακερέλα: «Ασταρντόμ μο νεαυτός τι ντικχέλ μπουτ βιντεάκια κο Ίντερνετ. Αρχίναβα εκχέσαρ, ντα χωρίς τι αγαβάβ νακχλέ τριν ή σταρ σαάτια».

¹⁷ Σαρ κα τραμπίνεν καζόμ σαάτι κα χαλαβέν κι διασκέδαση; Πρώτα πρέπει τι ντικχέν καζόμ σαάτι χαλαβένα. Κα μπορίνενας για εκ εβδομάδα τι γραφίνεν καζόμ σαάτι νασέλα τουμένταρ κι τηλεόραση, κο Ίντερνετ ντα κο παιχνίδια σο τθερένα κο τάμπλετ ή κο κινητός. Άμα ντικχένα ότι χαλαβένα μπουτ σαάτι, δοκιμάνεν τι κερέν εκ πρόγραμμας. Τσσουβέν πρώτα ο πιο σημαντικά πράγματα, ντα σοράν ι διασκέδαση. Σοράν, μανγκέν κατά Ιεχωβά τι βοηθίνελ-τουμέν τι κερέν ανταβά πρόγραμμας τουμαρέ ζωγιάτε. Αντικάς κα τθερέν σαάτι ντα ζορ για τι σικλιαρέν-τουμέν κατά Γραφή, τι κερέν φαμιλιάκι λατρεία, τι τζαν κο συναθροίσεις ντα τι υπηρετίνεν ι Ιεχωβάς κο έργος. Επίσης, κα απολαμβάνεν πιο μπουτ ο σαάτι σο χαλαβένα κι διασκέδαση επειδή κα τσσουβέν πρώτα ι Ιεχωβάς τουμαρέ ζωγιάτε.

18, 19. Σαρ σικαβάσα ότι ισινάμ αφοσιωμέ σάντε κο Ιεχωβά;

¹⁸ Αφού γραφιντάς για το τέλος σο κα τθερέλ ι Μπενγκέσκο ντουνιάς ντα ι νεβέ ντουνιάσκε σο κα αβέλ, ο απόστολος Πέτρος βακερντάς: «Πφραλάλεν, καζόμ μπεκλεντίνενα ανταλέ πραγματένγκε, τι κερέν ο πιο λατσσό σο μπορίνενα για τι αρακχέλ βοβ κο τέλος ότι να τθερένα καέκ μελ ντα καέκ σημάδι ντα ότι τθερένα ειρήνη». (2 Πέτρ. 3:​14) Κάνα ασουνάσα ανταγιά συμβουλή ντα κεράσα ο πιο λατσσό για τι τζουβντιάς ντα τι ντας λατρεία ι Ιεχωβάς αντικάς σαρ μανγκέλα βοβ, σικαβάσα ότι ισινάμ αφοσιωμέ σάντε κο Ιεχωβά.

¹⁹ Ο Σατανάς ντα λέσκο ντουνιάς κα προσπαθίνελ τι κερέλ-αμέν τι τσσουβάς γιαβερά πράγματα πρώτα αμαρέ ζωγιάτε ντα όχι ι Ιεχωβάς. (Λουκ. 4:​13) Αλλά σο-ντα δυσκολίες τι νακχάς, να κα μουκχάς καεκχές ντα τίποτα τι λελ ο τθαν σο τθερέλα ο Ιεχωβά αμαρέ γκίστε. Τι αβάς αποφασισμέ τι ντας κο Ιεχωβά οντουβά σο αξίνελα σάντε βοβ​—αμαρί αφοσίωση!