1, 2. (α) Σο κα βακερέν ατζεχάνικ ο τθεμά; (β) Καλέ ερωτησιέντε πρέπει τι λας απάντηση;

ΑΝΕΝ τουμαρέ γκοντιάτε ότι ο τθεμά βακερένα ο λάφι «ειρήνη ντα ασφάλεια» σο μπεκλεντίναας αζόμ μπρεσά. Μπορεί τι βακερένα μπαρικανιμάσαρ ότι ο ντουνιάς ποτές να ισινέ αζόμ ασφαλής. Ο τθεμά κα μανγκέν τι πακιάς ότι ο ντουνιάς ισί λένγκε βαστέντε ντα ότι σαρέ τζάνα λατσσές. Αλλά σο-ντα τι κερέν ναστί κα τσσιναβέν οντουλά σο κα αβέν-πες! Σόσκε; Σαρ βακερέλα η προφητεία ι Γραφιάκι, «ξαφνική καταστροφή κα αβέλ αμέσως οπρά-λέντε . . . ντα να κα μπορίνεν τι νασέν».​—1 Θεσ. 5:3.

² Πρέπει τι λας απάντηση ακαλέ σημαντικέ ερωτησιέντε: Σο κα αβέλ-πες κι «μπαρί στεναχώρια»; Σο κα μανγκέλ ο Ιεχωβά τι κεράς αζομάν; Ντα σαρ κα προετοιμάντιβας ακανά για τι ατσσάς πιστοί κι μπαρί στεναχώρια;​—Ματθ. 24:21.

3. Σαρ κα καταστραφίνελ ο Ντεβέλ ι “Μπαρέ Βαβυλωνά” σαρ βακερένα ο εδάφια Αποκάλυψη 17:5, 15-18;

³ Διαβάνεν Αποκάλυψη 17:5, 15-18. Η «Βαβυλώνα η Μπαρί» κα καταστραφίντιβελ! Σαρ βακερντάμ πιο οπρέ, ο τθεμά ναστί κα τσσιναβέν οντουλά σο κα αβέν-πες αζομάν. Σόσκε; Επειδή «ο Ντεβέλ [κα τσσουβέλ] λένγκε γκίστε τι κερέν λέσκι σκέψη». Καγιά ισί ανταγιά σκέψη; Τι καταστραφίνεν σαρέ ο ψεύτικες θρησκείες, εμ ι Χριστιανικέ ντουνιάς. *  Ο Ντεβέλ κα τσσουβέλ πι σκέψη κο γκι κι “10 σινγκένγκο” σο τθερέλα ο «ντιπ λολό θηρίος». Ο 10 σινγκά μανγκένα τι σικαβέν σαρέ ο κυβερνήσεις σο τσσίντενα κατά «θηρίος», δηλαδή κατά Ηνωμένα Έθνη. (Αποκ. 17:3, 11-13· 18:8) Κάνα οντουλά κυβερνήσεις κα τσσουβέν-λεν ι ψεύτικε θρησκειάσαρ, ανταβά κα σικαβέλ ότι αρχισάλι η μπαρί στεναχώρια. Κα αβέλ μπαρί καταστροφή σαρί κι πφουβ.

4. (α) Σο δικαιολογία μπορεί τι αρακχέν ο τθεμά για τι τσσουβέν-λεν ι ψεύτικε θρησκειάσαρ; (β) Σο κα κερέν μάλλον ο τζενέ σο ισινέ οντουλέ θρησκειέντε;

⁴ Να τζανάσα σο δικαιολογία κα αρακχέν ο τθεμά για τι τσσουβέν-λεν ι Μπαρέ Βαβυλωνάσαρ. Μπορεί τι βακερέν ότι ο θρησκείες ι ντουνιάσκε να μουκχένα ι τθεμέν τι τθερέν ειρήνη ντα ότι πάντα ανακατούντιβενα κο πολιτικά πράγματα. Ή μπορεί τι βακερέν ότι ανταλά θρησκείες γκιντιντέ μπαρό χουλανιπέ ντα κερντέ περιουσίες. (Αποκ. 18:3, 7) Ντικχίντιβελα ότι ο τθεμά να κα καταστραφίνεν σαρέ ι τζενέν οντουλέ θρησκειένγκε, αλλά ότι κα καταστραφίνεν ο θρησκείες. Κάνα κα καταστραφίντιβεν ανταλά θρησκείες, ο τζενέ σο ισινέ λέντε κα αγαβέν ότι λένγκε παπάζια χουχαντέ-λεν ντα μάλλον κα τσσίντεν-πες ντουρ οντουλέ θρησκειένταρ.

5. Καλέ πραγμάσκε ντινάς ο Ιεχωβά πο λάφι, ντα σόσκε;

⁵ Η Αγία Γραφή να βακερέλα καζόμ κα ατσσικιαρέλ η καταστροφή ι Μπαρέ Βαβυλωνάκι, αλλά τζανάσα ότι να κα ατσσικιαρέλ μπουτ. (Αποκ. 18:​10, 21) Ο Ιεχωβά ντινάς πο λάφι ότι κα «τελειώνεν σουγκό ο ντιβεσά» σο κα ατσσικιαρέλ η μπαρί στεναχώρια για τι σώντιβεν ο “τζενέ σο τραμπιντάς” ντα η αληθινή θρησκεία. (Μάρκ. 13:​19, 20) Σο κα μανγκέλ όμως ο Ιεχωβά τι κεράς από αζομάν σο κα αρχίνελ η μπαρί στεναχώρια μέχρι κο Αρμαγεδδώνας;

6. Σόσκε να ερεσέλα σάντε τι τσσιναβάς ντιπ κατά ψεύτικη θρησκεία;

⁶ Σαρ ντικχλάμ κο γιαβέρ μάθημας, ο Ιεχωβά μανγκέλα λέσκε υπηρέτες τι νασέν  κατά Μπαρί Βαβυλώνα. Όμως, να ερεσέλα σάντε τι τσσιναβάς ντιπ κατά ψεύτικη θρησκεία. Πρέπει τι αβάς αποφασισμέ τι ντας λατρεία ι Ιεχωβάς. Κα ντικχάς ντούι τρόπους για τι κεράς-λες ανταβά.

7. (α) Σαρ κα ατσσάς σταθεροί κο δίκαιοι ντα πάκι κανόνες σο τσσουβέλα ο Ιεχωβά; (β) Σαρ σικαβένα ο εδάφια Εβραίους 10:​24, 25 καζόμ σημαντικός ισί τι τζας κο συναθροίσεις, ειδικά ακανά;

⁷ Πρώτον, πρέπει τι ατσσάς σταθεροί κο δίκαιοι ντα πάκι κανόνες σο τσσουβέλα ο Ιεχωβά. Ναστί δεχτίνασα ο τρόπος σο σκεφτίνελα ο ντουνιάς ντα λέσκε κανόνες. Για παράδειγμας, να μπεϊντίνασα καέκ λουμνιπέ, σαρ ισί τι παντρίνεν μουρσά μουρσέντζαρ ή τζουβλιά τζουβλίντζαρ ή ο τρόπος σο τζουβντιόνα οντουλά τζενέ. (Ματθ. 19:4, 5· Ρωμ. 1:​26, 27) Δεύτερον, πρέπει τι συνεχίνας τι ντας λατρεία ι Ιεχωβάς γιεκ αμαρέ πφραλέντζαρ. Κεράσα-λες ανταβά κο Αίθουσες Βασιλείας ντα, άμα κα χρειαζίντιβελ, κχερέντε ή ατζέ-ντα γκεραντέ τθανέντε. Σο-ντα τι αβέλ-πες, ναστί τσσιναβάσα τι τζας κο συναθροίσεις για τι ντας λατρεία. Κι πραγματικότητα, πρέπει τι κεράς-λες ανταβά «ατζέ πιο μπουτ καζόμ [ντικχάσα] τι ερεσέλ ο ντιβές».​—Διαβάνεν Εβραίους 10:​24, 25.

8. Σαρ κα αλλάνεν μάλλον ο αμπέρια σο βακεράσα;

⁸ Κι μπαρί στεναχώρια, ο αμπέρια σο βακεράσα μάλλον κα αλλάνεν. Ακανά, βακεράσα ο λατσσέ αμπέρια ι Βασιλειάκε ντα προσπαθίνασα τι κεράς μαθητέν. Αλλά αζομάν, μπορεί τι βακεράς αμπέρια σο κα αβέν πφαρέ ι τζενένγκε σαρ μπαρό χαλάζι. (Αποκ. 16:​21) Μπορεί τι βακεράς ότι ατζεχάνικ ο ντουνιάς ι Μπενγκέσκο κα καταστραφίντιβελ. Κάνα κα αβέλ ο σαάτι, κα σικλιάς σο αμπέρια κα βακεράς ντα σαρ κα βακεράς-λεν. Κα κεράς-λες ανταβά αντικάς σαρ κεράσα αμαρό έργος πιο μπουτ από σελ μπρεσά; Ή κα αρακχάς γιαβερά τρόπους; Πρέπει τι μπεσάς για τι ντικχάς. Σαρ-ντα τι κεράς ανταβά έργος, ντικχίντιβελα ότι κα τθεράς ο προνόμιος τι βακεράς μπίνταρανες ι τιμωρία σο κα ανέλ ο Ιεχωβά!​—Ιεζ. 2:​3-5.

9. Σο μπορεί τι κερέν ο τθεμά κάνα κα ασουνέν ο αμπέρια σο κα βακεράς λένγκε, αλλά καλέ πραγμάσκε μπορίνασα τι αβάς σίγουροι;

⁹ Σαρ ντικχίντιβελα, μάλλον ο αμπέρια σο κα βακεράς κα κερέν ι τθεμέν τι μανγκέν τι πφάντεν αμαρό μούι εκ φαρ ντα λατσσές. Σαρ ντάσα μπέσα κο Ιεχωβά για τι βοηθίνελ-αμέν ακανά κο έργος σο κεράσα, αντικάς κα χρειαζίντιβελ τι ντας λέσκε μπέσα αζομάν-ντα. Μπορίνασα τι αβάς σίγουροι ότι ο Ντεβέλ κα πφερέλ-αμέν ζορ για τι κεράς οντουβά σο μανγκέλα.​—Μιχ. 3:8.

10. Σο κα κερέν ο πιο μπουτ τζενέ κάνα κα ντικχέν οντουλά σο κα αβέν-πες κι μπαρί στεναχώρια σαρ βακέρντιλο κο εδάφια Λουκάς 21:​25-28;

¹⁰ Διαβάνεν Λουκάς 21:​25-28. Κι μπαρί στεναχώρια, ο τζενέ κα ατσσόν πουταρντέ μόσαρ καζόμ κα ντικχέν τι χασάρντιβεν σαρέ ο πράγματα ανταλέ ντουνιάσκε σο αμντίνενας ότι κα ατσσόν για πάντα. Κα τθερέν «πφανγκό γκι» ντα νταρ πουμαρέ ζωγιάκε καζόμ κα ερεσέν κο πιο μπέτι βακίτι σο αβιλό-πες ποτές. (Σοφ. 1:​14, 15) Οντουβά βακίτι, μάλλον η ζωή κα αβέλ πιο δύσκολη ατζέ-ντα ι Ιεχωβάσκε λαόσκε. Επειδή αζομάν-ντα να κα τθεράς σχέση ανταλέ ντουνιάσαρ, μπορεί τι νακχάς δυσκολίες. Μπορεί μα τι τθεράς ατζέ-ντα κάποια αναγκαία πράγματα.

11. (α) Σόσκε κα τσσουβέν κι γιακχ ι Ιεχωβάσκε Μαρτυρέν; (β) Σόσκε να χρειαζίντιβελα τι νταράς κατά μπαρί στεναχώρια;

¹¹ Ο τζενέ σο λένγκε θρησκείες καταστραφισάλε μπορεί τι χολιάνεν μπουτ σο ο Μάρτυρες ι Ιεχωβάσκε κα συνεχίνεν τι τθερέν πουμαρί θρησκεία. Ανταλά τζενέ  μπορεί τι κερέν-λες νταντουλίκι σαριλέντε, κο κοινωνικά δίκτυα-ντα. Ο τθεμά ντα ο αρχηγός λένγκο, ο Μπενγκ, κα μισίνεν-αμέν επειδή σάντε αμαρί θρησκεία κα ατσσόλ. Κα τθερέν πουμαρέ γκοντιάτε τι νασκιαρέν σαρέ ο θρησκείες κατά πφουβ αλλά ναστί κα κερέν-λες. Οτθάρ, κα τσσουβέν-αμέν κι γιακχ. Αζομάν, ο τθεμά κα αβέν Γωγ του Μαγώγ. * Κα γκιντίντιβεν για τι τσσουβέν-λεν σαρέ πουμαρέ ζοριάσαρ ι Ιεχωβάσκε λαόσαρ. (Ιεζ. 38:2, 14-16) Κάνα σκεφτίνασα-λεν ανταλά μπορεί τι ανησυχίνασα επειδή ναστί τζανάσα ο κάθε πράγμας σο κα αβέλ-πες. Αλλά εκχέ πραγμάσκε ισινάμ σίγουροι: Να χρειαζίντιβελα τι νταράς κατά μπαρί στεναχώρια. Ο Ιεχωβά κα ντελ-αμέν οδηγίες σο κα σώνεν-αμέν. (Ψαλμ. 34:​19) Κα μπορίνας τι “ιστιάς ντα τι βάντας αμαρό σορό” επειδή κα τζανάς ότι “ερεσέλα ο ντιβές σο κα ελευθερώντιβας”. *

12. Σαρ προετοιμάνελα-αμέν «ο πιστός ντα φρόνιμος δούλος» οντουλένγκε σο κα αβέν-πες ανγκλ’ αμέντε;

¹² «Ο πιστός ντα φρόνιμος δούλος» προετοιμάνελα-αμέν για τι ατσσάς πιστοί κι μπαρί στεναχώρια. (Ματθ. 24:​45) Ανταβά αβέλα-πες μπουτέ τροπόντζαρ, σαρ για παράδειγμας αντράλ κατά συνελεύσεις σο τθεράας κο μπρεσά 2016-2018. Ανταλά συνελεύσεις βοηθιντέ-αμέν τι μπαριαράς ο ιδιότητες σο χρειαζίντιβασα καζόμ ερεσάσα κο ντιβές κι Ιεχωβάσκο. Για τι ντικχάς χάνικ ανταλά ιδιότητες.

13. Σαρ κα μπαριαράς αμαρί αφοσίωση κο Ιεχωβά, ντα σόσκε πρέπει τι κεράς-λες ανταβά ακανά;

¹³ Αφοσίωση: Ο θέμας σο τθερέλας η συνέλευση κο 2016 ισινέ «Παραμείνετε Όσιοι στον Ιεχωβά!» Ανταγιά συνέλευση σικλιαρντάς-αμέν ότι, άμα ισινάμ λατσσέ αμαλά ι Ιεχωβάσαρ, κα αβάς αφοσιωμέ λέστε. Οτθέ ασουντάμ ότι τζάσα πασέ κο Ιεχωβά κάνα προσευχίντιβασα αντράλ αμαρέ γκίσταρ ντα σικλιαράσα-αμέν καζόμ πιο λατσσές αβέλα-πες λέσκε Λαφίσταρ. Άμα κα κεράς-λες ανταβά, κα τθεράς ι ζορ τι νακχαβάς ατζέ-ντα ο πιο μπαρέ προβλήματα. Καζόμ ερεσέλα κο τέλος ο ντουνιάς ι Μπενγκέσκο, μπεκλεντίνασα ότι η αφοσίωση σο τθεράσα κο Ντεβέλ ντα λέσκε Βασιλειάτε κα δοκιμάντιβελ ατζέ πιο μπουτ. Μάλλον ο τζενέ κα συνεχίνεν τι πρασάν-αμέν. (2 Πέτρ. 3:3, 4) Ανταβά μπορεί τι αβέλ-πες ατζέ πιο μπουτ επειδή να τθεράσα καέκ σχέση ανταλέ ντουνιάσαρ. Πρέπει τι μπαριαράς αμαρί αφοσίωση ακανά για τι ατσσάς αφοσιωμέ κο Ιεχωβά κι μπαρί στεναχώρια.

14. (α) Σο αλλαγή κα αβέλ-πες κο υπεύθυνα πφραλά σο ισί κι πφουβ; (β) Σόσκε κα χρειαζίντιβελ τι αβάς αφοσιωμέ αζομάν;

¹⁴ Κι μπαρί στεναχώρια, κα αβέλ-πες εκ αλλαγή κο υπεύθυνα πφραλά σο ισί κι πφουβ. Σαρέ ο χρισμέ σο κα αβέν ατζέ κι πφουβ κα γκιντίντιβεν κο ουρανός για τι πολεμίνεν κο Αρμαγεδδώνας. (Ματθ. 24:​31· Αποκ. 2:​26, 27) Ανταβά μανγκέλα τι βακερέλ ότι ο Κυβερνών Σώμας να κα συνεχίνελ τι αβέλ αμέντζαρ κι πφουβ. Όμως, ο μπαρό πλήθος κα ατσσόλ οργανωμέ. Πφραλά κατά γιαβερά μπρακέ σο τθερένα ο ικανότητες κα αβέν υπεύθυνοι. Για τι σικαβάς αμαρί αφοσίωση, κα χρειαζίντιβελ τι υποστηρίνας οντουλέ πφραλέν ντα τι ντας καν κο οδηγίες σο κα ντελ ο Ντεβέλ  αντρά-λένταρ. Άμα κα κεράς-λες ανταβά, κα σώντιβας!

15. Σαρ κα μπαριαράς αμαρί υπομονή, ντα σόσκε ισί σημαντικός τι κεράς-λες ανταβά ακανά;

¹⁵ Υπομονή: Ο θέμας σο τθερέλας η συνέλευση κο 2017 ισινέ «Μην Παραιτείστε!» Ανταγιά συνέλευση σικλιαρντάς-αμέν σαρ τι νταϊντίνας κο δοκιμασίες. Σικλιλάμ ότι η υπομονή να αβέλα σάντε κάνα τζάνα λατσσές ο πράγματα. Μπαριαράσα αμαρί υπομονή κάνα μουκχάσα-αμέν κο Ιεχωβά. (Ρωμ. 12:​12) Μα τι μπιστράς ποτές ι υπόσχεση ι Ιησούσκι: «Οντουβά σο κα νταϊντίνελ μέχρι κο τέλος, κα σώντιβελ». (Ματθ. 24:​13) Ανταβά μανγκέλα τι βακερέλ ότι πρέπει τι ατσσάς πιστοί σο-ντα δυσκολίες τι νακχάσα. Άμα κα νταϊντίνας σαρέ ο δοκιμασίες ακανά, κα αβάς πιο ζουρανέ πριν τι αβέλ η μπαρί στεναχώρια.

16. Κατάρ αβέλα ο θάρρος, ντα σαρ κα μπαριαράς αμαρό θάρρος ακανά;

¹⁶ Θάρρος: Ο θέμας σο τθερέλας η συνέλευση κο 2018 ισινέ «Τι Τθερέν Θάρρος!» Ανταγιά συνέλευση αντάς αμαρέ γκοντιάτε ότι θάρρος να σικαβένα σάντε ο τζενέ σο τθερένα ι ζορ τι κερέν μπουτ πράγματα. Σαρ αβέλα-πες με την υπομονή-ντα, για τι τθεράς μπαγιά θάρρος χρειαζίντιβελα τι μουκχάς-αμέν κο Ιεχωβά. Σαρ κα σικλιάς τι μουκχάς-αμέν κο Ιεχωβά ατζέ πιο μπουτ; Άμα κα διαβάνας λέσκο Λάφι κάθε ντιβές ντα άμα κα σκεφτίνας σαρ σωντάς πι λαός κο πουρανέ μπρεσά. (Ψαλμ. 68:​20· 2 Πέτρ. 2:9) Κάνα ο τθεμά κα τσσουβέν-λεν αμέντζαρ κι μπαρί στεναχώρια, κα χρειαζίντιβελ τι σικαβάς αζόμ μπουτ θάρρος ντα εμπιστοσύνη κο Ιεχωβά σο να σικαντάμ γιαβέρ φαρ. (Ψαλμ. 112:7, 8· Εβρ. 13:6) Άμα μουκχάσα-αμέν κο Ιεχωβά ακανά, κα τθεράς ο θάρρος σο χρειαζίντιβασα κάνα ο Γωγ κα τσσουβέλ-λεν αμέντζαρ. *

17. Σόσκε να χρειαζίντιβελα τι νταράς κατά Αρμαγεδδώνας; (Ντικχ ι φωτογραφία κι ανγκλαϊνί σελίδα)

¹⁷ Σαρ ντικχλάμ κο γιαβέρ μάθημας, ο πιο μπουτ αμένταρ τζουβντιάσα σαρί αμαρί ζωή κο τελευταία ντιβεσά. Μπεκλεντίνασα τι νακχάς τζουβντέ αντράλ κατά μπαρί στεναχώρια. Ο Αρμαγεδδώνας κα αβέλ ο  τελευταίος πράγμας σο κα αβέλ-πες κο τέλος ανταλέ ντουνιάσκο. Αλλά αμέν να κα νταράς τίποτα. Σόσκε; Επειδή ανταβά τζένγκι ισί ι Ντεβλέσκο. (Παρ. 1:​33· Ιεζ. 38:​18-20· Ζαχ. 14:3) Κάνα κα βακερέλ ο Ιεχωβά, ο Ιησούς Χριστός κα γκερέλ ι Ντεβλέσκε στρατός κο τζένγκι. Κα τθερέλ πασέ πέστε ι χρισμέ τζενέν σο αναστισάλε ντα μπουτέ αγγελόν. Γιεκ κα πολεμίνεν ι Μπενγκές, λέσκε δαιμονέν ντα λένγκε στρατός σο ισί κι πφουβ.​—Δαν. 12:1· Αποκ. 6:2· 17:14.

18. (α) Καλέ πραγμάσκε ντινάς πο λάφι ο Ιεχωβά; (β) Σαρ πφερένα-τουμέν σιγουριά ο εδάφια Αποκάλυψη 7:9, 13-17 οντουλένγκε σο κα αβέν-πες ανγκλ’ αμέντε;

¹⁸ Ο Ιεχωβά ντινάς πο λάφι: «Καέκ όπλος σο κα κερντιόλ για τι κερέλ τούκε κακός να κα τθερέλ επιτυχία». (Ησ. 54:​17) «Εκ μπαρό πλήθος» τζενένγκο σο ισί πιστοί κο Ιεχωβά κα νικιόν «κατά μπαρί στεναχώρια» τζουβντέ! Σοράν, κα συνεχίνεν τι υπηρετίνεν-λες. (Διαβάνεν Αποκάλυψη 7:9, 13-17) Καζόμ σιγουριά πφερέλα-αμέν η Γραφή οντουλένγκε σο κα αβέν-πες ανγκλ’ αμέντε! Τζανάσα ότι «ο Ιεχωβά αρακχαβέλα ι πιστέν». (Ψαλμ. 31:​23) Σαρέ οντουλά σο μανγκένα ντα δοξάνενα ι Ιεχωβάς κα χαιρίνεν μπουτ κάνα κα ντικχέν-λες τι δικαιώνελ πο πάκι ναβ.​—Ιεζ. 38:23.

19. Καλά σουκάρ ντιβεσά κα τθεράς ατζεχάνικ;

¹⁹ Σκεφτίνεν σο κα βακερένας ο εδάφια 2 Τιμόθεο 3:​2-5 άμα κα κερένας λάφι ι τζενένγκε κο νεβό ντουνιάς, σο να κα τθερέν ι Μπενγκές. (Ντικχ ο πλαίσιος « Σαρ κα Αβέν ο Τζενέ Αζομάν») Ο πφραλ Γιώργος Γάγκας, * σο υπηρετιντάς κο Κυβερνών Σώμας, βακερντάς: «Σο ντουνιάς κα αβέλ ανταβά κάνα κα αβέν σαρέ πφραλά ντα πφενιά! Ατζεχάνικ κα τθερέν ο προνόμιος τι τζουβντιόν κο νεβό ντουνιάς. Κα τζουβντιόν καζόμ τζουβντιόλα ο Ιεχωβά. Κα τζουβντιάς για πάντα». Σο σουκάρ ντιβεσά κα αβέν ανταλά!