1. Σο μπορίνελα τι κερέλ ο Ιεχωβά για τι αβέλ-πες οντουβά σο μανγκέλα;

Ο ΙΕΧΩΒΑ μπορίνελα τι αβέλ σο-ντα χρειαζίντιβελα για τι κερέλ οντουβά σο μανγκέλα. Για παράδειγμας, αβιλό Δάσκαλος, Ντατ σο κοβλιαρέλα αμαρί ντουκχ ντα Οντουβά σο βακερέλα λατσσέ αμπέρια. Ανταλά ισί σάντε χάνικ κατά μπουτ πράγματα σο αβιλό ο Ιεχωβά. (Ησ. 48:​17· 2 Κορ. 7:6· Γαλ. 3:8) Αλλά μπουτ φαρ τσσουβέλα τζενέν τι κερέν οντουλά σο μανγκέλα. (Ματθ. 24:​14· 28:​19, 20· 2 Κορ. 1:3, 4) Ντα μπορίνελα τι ντελ κο κάθε εκ αμένταρ ι γκοντί ντα ι ζορ σο τθεράσα ανάγκη για τι αβάς σο-ντα χρειαζίντιβελα ντα αντικάς τι αβέλ-πες οντουβά σο μανγκέλα. Ο ναβ ι Ντεβλέσκο, σαρ βακερένα μπουτ σπουδαγμέ τζενέ, μανγκέλα τι σικαβέλ σαρέ ανταλά πράγματα.

2. (α) Σόσκε μπορεί μπάζιμα τι πακιάσα ότι ο Ιεχωβά να χρησιμοποιήνελα-αμέν; (β) Σο κα σικλιάς ανταλέ μαθημάστε;

² Σαρέ μανγκάσα τι αβάς χρήσιμοι ι Ιεχωβάσκε, αλλά ισί τζενέ σο μπορεί τι πακιάνα ότι ο Ιεχωβά να χρησιμοποιήνελα-λεν. Σόσκε; Επειδή νιωθίνενα ότι λένγκι ηλικία, ο πράγματα λένγκε ζωγιάτε ή λένγκε ικανότητες να μουκχένα-λεν τι κερέν πιο μπουτ. Γιαβερά πάλι μπορεί τι πακιάνα ότι οντουλά σο κερένα ερεσένα ντα να αγαβένα καζόμ σημαντικός ισί τι κερέν πιο μπουτ. Ανταλέ μαθημάστε, κα σικλιάς σαρ ο Ιεχωβά ντέλα σο χρειαζίντιβελα κο κάθε εκ αμένταρ για τι κερέλ οντουβά σο μανγκέλα. Σοράν κα ντικχάς ιστορίες κατά Γραφή σο σικαβένα σαρ κερντάς ο Ιεχωβά πι υπηρετόν​—μουρσέν ντα τζουβλίν—​εμ τι μανγκέν εμ τι τθερέν ι ζορ τι κερέν πράγματα. Κο τέλος κα σικλιάς σαρ τι μουκχάς ι Ιεχωβάς τι χρησιμοποιήνελ-αμέν.

3. Σαρ μπορεί τι κερέλ-αμέν ο Ιεχωβά τι μανγκάς τι κεράς πράγματα σαρ βακερέλα ο εδάφιος Φιλιππησίους 2:13;

³ Διαβάνεν Φιλιππησίους 2:​13. * Ο Ιεχωβά μπορίνελα τι κερέλ-αμέν τι μανγκάς τι κεράς πράγματα. Σαρ; Μπορεί τι λας αμπέρι ότι ισί εκ συγκεκριμέ ανάγκη αμαρέ κχανγκιριάτε. Ή μπορεί ο πρεσβύτεροι τι διαβάνεν εκ επιστολή κατά γραφείος τμήματος σο κα βακερέλ ότι χρειαζίντιβελα τι βοηθίνας γιαβερτθέ. Ανταβά μπορεί τι κερέλ-αμέν τι πουτσάς: “Σο κα κεράβ με για τι βοηθίναβ;” Ή μπορεί τι βακερντέ αμένγκε τι λας εκ δύσκολος διορισμός ντα μα τι τζανάς άμα μπορίνασα τι κεράς-λες. Ή μπορεί τι διαβάνας χάνικ εδάφια κατά Ντεβλέσκο Λάφι ντα τι πουτσάς-αμέν: “Σαρ κα κεράβ οντουβά σο σικλιλόμ ανταλέ εδαφιόνταρ για τι βοηθίναβ γιαβερέν;” Ο Ιεχωβά να τσσουβέλα-αμέν τι κεράς τίποτα ζορίσαρ. Αλλά κάνα ντικχέλα ότι τθεράσα αμαρέ γκοντιάτε τι κεράς πράγματα, κερέλα-αμέν τι μανγκάς τι κεράς οντουβά σο τθεράσα αμαρέ γκοντιάτε.

4. Σαρ μπορεί τι ντελ-αμέν ο Ιεχωβά ι ζορ τι κεράς πράγματα;

⁴ Ο Ιεχωβά μπορίνελα τι ντελ-αμέν ι ζορ-ντα τι κεράς πράγματα. (Ησ. 40:​29) Μπορίνελα τι ντελ-αμέν πο άγιος πνεύμας για τι μπαριαράς ατζέ πιο μπουτ ο ικανότητες σο τθεράσα. (Έξοδ. 35:​30-35) Αντράλ κατά οργάνωση, ο Ιεχωβά μπορεί τι σικλιαρέλ-αμέν σαρ τι κεράς μερικά μπουτιά. Άμα καέκ φαρ κα νιωθίνεν ότι να τζανένα σαρ τι κερέν εκ διορισμός, μανγκέν βοήθεια. Ντα μα σακιντίνεν τι μανγκέν αμαρέ Νταντέσταρ, σο ντέλα αντράλ πι γκίσταρ, ι «ζορ σο ισί πιο μπαρί αμαρέ ζοριάταρ». (2 Κορ. 4:7· Λουκ. 11:​13) Κι Γραφή ισί μπουτ ιστορίες μουρσένγκε ντα τζουβλίνγκε σο σικαβένα σαρ ντινάς-λεν ο Ιεχωβά οντουλά σο χρειαζίντιβενας ντα κερντάς-λεν εμ τι μανγκέν εμ τι τθερέν ι ζορ τι κερέν πράγματα. Καζόμ κα ντικχάς χάνικ ανταλέ ιστοριένταρ, ανέν τουμαρέ γκοντιάτε σαρ μπορίνελα ο Ιεχωβά τι χρησιμοποιήνελ-τουμέν για τι κερέν πράγματα σαρ οντουλά σο κερντέ βον.

5. Σο σικλιάσα κάνα ανάσα αμαρέ γκοντιάτε σαρ ντα κάνα χρησιμοποιηντάς ο Ιεχωβά ι Μωυσής για τι ελευθερώνελ πι λαός;

⁵ Ο Ιεχωβά κερντάς ι Μωυσής τι αβέλ οντουβά σο ελευθερωντάς ι Ισραηλιτέν. Αλλά κάνα χρησιμοποιηντάς-λες; Μήπως αζομάν σο ο Μωυσής πακιάλας ότι ισινέ έτοιμος, αφού σικλιλόας “σαρί ι σοφία ι Αιγυπτιόνγκι”; (Πράξ. 7:​22-25) Νάα, ο Ιεχωβά πρώτα σικλιαρντάς-λες ντα κερντάς-λες τι αβέλ ταπεινός ντα κοβλέ γκίσκο, ντα σοράν χρησιμοποιηντάς-λες. (Πράξ. 7:​30, 34-36) Κερντάς-λες τι κερέλ λάφι μπίνταρανες ανγκλάλ κο πιο ζουρανό άρχοντας κι Αιγυπτιόνγκο. (Έξοδ. 9:​13-19) Σο σικλιάσα κάνα ανάσα αμαρέ γκοντιάτε σαρ ντα κάνα χρησιμοποιηντάς ο Ιεχωβά ι Μωυσής; Ο Ιεχωβά χρησιμοποιήνελα οντουλέν σο τθερένα λέσκε ιδιότητες ντα ντένα λέσκε μπέσα ότι κα ντελ-λεν ζορ.​—Φιλιπ. 4:13.

6. Σο σικλιάσα κατά τρόπος σο ο Ιεχωβά χρησιμοποιηντάς τον Βαρζελαΐ για τι βοηθίνελ ι Δαβιδίς;

⁶ Μπουτ μπρεσά πιο σοράν, ο Ιεχωβά χρησιμοποιηντάς τον Βαρζελαΐ για τι βοηθίνελ ι Δαβιδίς. Ο Δαβίδ ντα ο τζενέ σο γκιλέ παλά-λέστε κάνα νασλό ιτιρί πι τσσαβέσταρ κατά Αβεσσαλώμ ισινέ “μποκχαλέ, κχινέ ντα μπι-πανίσκε”. Γιεκ γιαβερέντζαρ, ο Βαρζελαΐ, σο αζομάν ισινέ πφουρό, τσσουντάς σε κίνδυνος πι ζωή για τι ντελ ο αναγκαία κο Δαβίδ ντα οντουλέντε σο ισινέ λέσαρ. Ο Βαρζελαΐ να αμντίνελας ότι τσσιναντάας τι αβέλ χρήσιμος ι Ιεχωβάσκε επειδή ισινέ πφουρό. Ντινάς αντράλ πι γκίσταρ σο-ντα τθερέλας για τι  βοηθίνελ ι Ντεβλέσκε υπηρετόν σο τθερένας ανάγκη. (2 Σαμ. 17:​27-29) Σο σικλιάσα αμέν ανταλέσταρ; Καζόμ μπρεσένγκε-ντα τι αβάς, ο Ιεχωβά μπορίνελα τι χρησιμοποιήνελ-αμέν για τι ντελ ο αναγκαία αμαρέ πφραλέντε είτε ατθέ είτε εκχέ γιαβερέ τθεμέστε. (Παρ. 3:​27, 28· 19:​17) Ατζέ-ντα άμα ναστί βοηθίνασα αμέν ο ίδιοι, μπορεί τι τσσουβάς λοβέ κο κουτίς για τι ντιντιόλ βοήθεια κάνα ντα κάι χρειαζίντιβελα.​—2 Κορ. 8:​14, 15· 9:11.

7. Σαρ χρησιμοποιηντάς ο Ιεχωβά τον Συμεών, ντα σόσκε ντέλα-αμέν ζορ ανταβά;

⁷ Ο Ιεχωβά ντινάς πο λάφι εκχέ αφοσιωμέ πφουρέστε σο μπεσέλας κι Ιερουσαλήμ, κο Συμεών, ότι να κα μερέλας άμα να κα ντικχέλας ι Μεσσιάς. Ανταβά λάφι πρέπει τι ντινάς μπουτ ζορ κο Συμεών, σόσκε μπεσέλας μπουτ μπρεσά τι αβέλ ο Μεσσίας. Ο Ιεχωβά ευλογιντάς τον Συμεών για την πίστη ντα την υπομονή σο σικαντάς. Εκ ντιβές, «ι Ντεβλέσκε πνευμάσαρ» γκιλό κο ναός. Οτθέ ντικχλάς ι χουρντέ Ιησούς, ντα ο Ιεχωβά κερντάς-λες τι βακερέλ εκ προφητεία οντουλέ τσσαβέσκε σο κα αβέλας ο Χριστός. (Λουκ. 2:​25-35) Παρόλο σο ο Συμεών μάλλον να τζουβντιλό για τι ντικχέλ ι Ιησούς τι κερέλ πο έργος κι πφουβ, εκτιμιντάς ανταβά προνόμιος. Ντα κα λελ ατζέκ ευλογίες κο ντιβεσά σο κα αβέν! Κο νεβό ντουνιάς, οντουβά πιστός μουρς κα ντικχέλ σαρ ι Ιησούσκι κυβέρνηση κα ανέλ ευλογίες σαρέ κο φαμιλιά κι πφουβιάκε. (Γέν. 22:​18) Αμέν-ντα εκτιμίνασα σο-ντα προνόμιος ντέλα-αμέν ο Ιεχωβά κι υπηρεσία λέσκι.

8. Σαρ μπορεί τι χρησιμοποιήνελ-αμέν ο Ιεχωβά σαρ κερντάς ι Βαρναβάσαρ;

⁸ Κο πρώτος αιώνας Κ.Χ., ο Ιωσήφ, εκ τζενό σο ντέλας αντράλ πι γκίσταρ, μουκχλάς ι Ιεχωβάς τι χρησιμοποιήνελ-λες. (Πράξ. 4:​36, 37) Μάλλον ο Ιωσήφ κοβλιαρέλας μπουτ λατσσές ι γιαβερένγκι ντουκχ, οτθάρ ο απόστολοι νικαντέ λέσκε Βαρνάβα, σο μανγκέλα τι βακερέλ «τσσαβό σο ντέλα παρηγοριά». Για παράδειγμας, κάνα ο Σαύλος αβιλό Χριστιανός, μπουτ πφραλά νταρένας τι τζαν πασέ λέστε επειδή γκιλόας κόντρα ι Χριστιανόντζαρ. Αλλά ο Βαρνάβας, σο τθερέλας λατσσό γκι, βοηθιντάς ι Σαυλός, ντα ο Σαύλος πρέπει τι εκτιμιντάς μπουτ λέσκο λατσσιπέ. (Πράξ. 9:​21, 26-28) Πιο σοράν, ο πρεσβύτεροι κι Ιερουσαλήμ μανγκένας τι ντεν ζορ ι πφραλέν σο μπεσένας ντουρ, κι Αντιόχεια κι Συρία. Κας μπουτσσαντέ; Ι Βαρναβάς! Ντα κερντέ λατσσές σο τραμπιντέ-λες. Η Γραφή βακερέλα ότι ο Βαρνάβας «αρχισάλο τι βακερέλ σαριλένγκε τι ατσσόν πιστοί κο Κύριος σαρέ πουμαρέ γκίσαρ». (Πράξ. 11:​22-24) Αντιβές-ντα ο Ιεχωβά μπορίνελα τι βοηθίνελ-αμέν τι αβάς τζενέ σο κοβλιαρένα ι ντουκχ αμαρέ πφραλένγκι, σαρ για παράδειγμας ι ντουκχ οντουλένγκι σο χασαρντέ αγαπημέ τζενέν κο μεριπέ. Ή άμα εκ τζενό ισί νασφαλό ή τθερέλα πφανγκό γκι, ο Ιεχωβά μπορεί τι κερέλ-αμέν τι τζας τι ντικχάς-λες ή τι λας-λες εκ τηλέφωνος για τι βακεράς λέσκε χάνικ σουκάρ λάφια. Τουμέν, κα μουκχέν ι Ιεχωβάς τι χρησιμοποιήνελ-τουμέν σαρ κερντάς ι Βαρναβάσαρ;​—1 Θεσ. 5:14.

9. Σο σικλιάσα κατά τρόπος σο βοηθιντάς ο Ιεχωβά εκχέ πφραλές τι αβέλ λατσσό πρεσβύτερος;

⁹ Ο Ιεχωβά βοηθιντάς εκχέ πφραλές σο βακερένα λέσκε Βασίλι τι αβέλ λατσσό πρεσβύτερος. Ο Βασίλι αβιλό πρεσβύτερος κάνα ισινέ 26 μπρεσένγκο. Αζομάν νταρέλας ότι ναστί βοηθίνελας ι πφραλέν, ντα ατζέ πιο μπουτ οντουλέν σο νακχένας δυσκολίες. Όμως, λιντάς λατσσό σικλιαριπέ πφραλένταρ σο ισινέ μπουτ μπρεσά πρεσβύτεροι ντα κατά Σχολή Διακονίας της Βασιλείας. Ο Βασίλι κερντάς σο νακχέλας λέσκε βαστένταρ για τι αβέλ πιο λατσσό. Για παράδειγμας, γραφιντάς χουρντέ πράγματα σο τθερέλας πι γκοντιάτε τι κερέλ. Καζόμ κερέλας ανταλά πράγματα, νασέλας λέσκι νταρ. Ακανά βακερέλα: «Οντουβά σο νταραβέλας-μαν αζομάν, ακανά ανέλα μάνγκε  μπαρί χαρά. Κάνα ο Ιεχωβά βοηθίνελα-μαν τι αρακχάβ εκ λατσσό εδάφιος για τι κοβλιαράβ ι ντουκχ εκχέ πφραλέσκι ή εκχέ πφενιάκι κι κχανγκιρί, νιωθίναβα μπαγιά πφερντό». Πφραλάλεν, άμα σαρ ο Βασίλι μουκχένα ι Ιεχωβάς τι χρησιμοποιήνελ-τουμέν, κα ντελ-τουμέν ζορ τι κερέν πιο μπουτ πράγματα κι κχανγκιρί.

10. Σο κερντάς η Αβιγαία, ντα σο σικλιόνα λάταρ;

¹⁰ Ο Δαβίδ ντα λέσκε μουρσά χρειαζίντιβενας βοήθεια κάνα κουλαντίνελας-λεν ο βασιλιάς Σαούλ. Ο μουρσά ι Δαβιδίσκε μανγκλέ κατά χουλανό Ισραηλίτης Νάβαλ τι ντελ-λεν κάτι τι χαν. Να λατζασάλε τι κερέν-λες ανταβά σόσκε αρακχαντέας λέσκε μπρακέν κι έρημος. Όμως, ο Νάβαλ ντικχέλας σάντε πο νεαυτός ντα να ντινάς-λεν τίποτα. Ο Δαβίδ πφερντιλό χολί ντα μανγκλάς τι μουνταρέλ εμ λες εμ σαρέ ι μουρσέν λέσκε κχερέσκε. (1 Σαμ. 25:​3-13, 22) Αλλά ο Νάβαλ τθερέλας εκχέ σουκάρ ρομνιά, ι Αβιγαιά, σο ισινέ μπουτ γκοντιαβέρ. Βόι σικαντάς μπαρό θάρρος κάνα πελί κο πιντρέ κι Δαβιδίσκε ντα μολιντάς-λες μα τι μουνταρέλ για μα τι τθερέλ οπρά-πέστε ο ρατ οντουλέ τζενένγκο. Βακερντάς λέσκε σουκάρ λαφίντζαρ τι μουκχέλ ο πράγματα κι Ιεχωβάσκε βαστά. Ο ταπεινά λάφια ι Αβιγαιάκε ντα οντουλά σο κερντάς γκοντιάσαρ ερεσλέ κι Δαβιδίσκο γκι. Αγαντάς ότι μπουτσσαντάας-λα ο Ιεχωβά. (1 Σαμ. 25:​23-28, 32-34) Η Αβιγαία τθερέλας ιδιότητες σο κερντέ-λα χρήσιμη ι Ιεχωβάσκε. Αντιβές-ντα ο Ιεχωβά τσσουβέλα πφενίν, σο ισί γκοντιαβέρ ντα σικλιόνα τι ντεν συμβουλές σουκάρ τροπόσαρ, για τι ντεν ζορ πουμαρέ φαμιλίντε ντα γιαβερέντε κι κχανγκιρί.​—Παρ. 24:3· Τίτο 2:​3-5.

11. Σο κερντέ ο τσσαγιά ι Σαλλουμίσκε, ντα κον κερένα αντιβές οντουβά σο κερντέ βον;

¹¹ Μπουτ μπρεσά πιο σοράν, ο τσσαγιά ι Σαλλουμίσκε ισινέ οντουλένταρ σο τσσουντάς ο Ιεχωβά τι λατσσαρέν ο βουτσσέ ντουβάρια κι Ιερουσαλήμ. (Νεεμ. 2:​20· 3:​12) Παρόλο σο λένγκο ντατ ισινέ άρχοντας, βον κερντέ αντράλ πουμαρέ γκίσταρ ανταγιά πφαρί ντα επικίνδυνη μπουτί. (Νεεμ. 4:​15-18) Καζόμ διαφορετικές ισινέ κατά σημαντικά μουρσά ι Θεκωιτένγκε σο «να τσσουντέ πουμαρό νεαυτός πιο τελέ για τι κερέν βον-ντα μπουτί»! (Νεεμ. 3:5) Ανέν τουμαρέ γκοντιάτε καζόμ μπαρί χαρά τθερένας οντουλά τσσαγιά κάνα ντικχλέ ότι νακχλέ σάντε 52 ντιβεσά για τι αβέλ-πες η μπουτί! (Νεεμ. 6:​15) Αμαρέ ντιβεσέντε, πφενιά σο κερένα μπουτί αντράλ πουμαρέ γκίσταρ βοηθίνενα χαράσαρ σε εκ ειδική υπηρεσία​—τι κερντιόν ντα τι λατσσάρντιβεν κτίρια σο ντιντιλέ κο Ιεχωβά. Για τι αβέλ-πες ανταβά, χρειαζίντιβασα ανταλέ αφοσιωμέ πφενίν σο κερένα λατσσί μπουτί σαρέ πουμαρέ γκίσαρ.

12. Σαρ μπορεί τι χρησιμοποιήνελ-αμέν ο Ιεχωβά σαρ κερντάς ι Ταβιθάσαρ;

¹² Ο Ιεχωβά τσσουντάς κο γκι κι Ταβιθάκο τι κερέλ «μπερεκέτι λατσσέ πράγματα ντα δώρα ι τσορορένγκε», ντα πιο μπουτ ι χηρένγκε. (Πράξ. 9:​36) Η Ταβιθά ισινέ μπουτ λατσσί τζενί σο ντέλας αντράλ πι γκίσταρ, οτθάρ λάκο μεριπέ πφαμπαρντάς ο γκι μπουτέ τζενένγκο. Αλλά λιντέ μπουτ μπαρί χαρά κάνα ο απόστολος Πέτρος τζουβντιαρντάς-λα. (Πράξ. 9:​39-41) Σο σικλιάσα κατά Ταβιθά; Είτε ισινάμ τερνέ είτε πφουρέ, μουρσά ή τζουβλιά, σαρέ μπορίνασα τι κεράς πράγματα για τι βοηθίνας αμαρέ πφραλέν ντα πφενίν.​—Εβρ. 13:16.

13. Σαρ χρησιμοποιηντάς ο Ιεχωβά εκχέ λατζανέ πφενιά, ντα σο βακερντάς βόι;

¹³ Εκ λατζανί πφεν, η Ρουθ, μανγκέλας τι αβέλ ιεραπόστολος. Κάνα ισινέ χουρντί, τθάβντελας κχερ κχερέστε ντα ντέλας φυλλάδια. Βόι βακερντάς: «Μπεϊντίναβας μπαγιά ανταβά έργος». Αλλά ισινέ μπουτ δύσκολος λάκε τι τζαλ κο κχερά ντα τι κερέλ λάφι κο τζενέ ι Ντεβλέσκε Βασιλειάκε.  Παρόλο σο ισινέ λατζανί, αβιλί τακτική σκαπάνισσα κάνα ισινέ 18 μπρεσένγκι. Κο 1946, νακχλάς ι Βιβλική Σχολή Γαλαάδ της Σκοπιάς ντα σοράν μπουτσσάντιλι κι Χαβάη ντα κι Ιαπωνία. Ο Ιεχωβά χρησιμοποιηντάς-λα για τι κερέλ μπουτ έργος οντουλέ τθεμέντε. Κάνα πφαντάας περίπου 80 μπρεσά κο έργος, η Ρουθ βακερντάς: «Ο Ιεχωβά ντέλας-μαν μπαρί ζορ. Βοηθιντάς-μαν τι νασκιαράβ μι λατζ. Πακιάβα σαρέ μι γκίσαρ ότι ο Ιεχωβά μπορίνελα τι χρησιμοποιήνελ σαρέ οντουλέν σο ντένα λέσκε μπέσα».

14. Σο πρέπει τι κεράς άμα μανγκάσα τι χρησιμοποιήνελ-αμέν ο Ιεχωβά σαρ βακερέλα ο εδάφιος Κολοσσαείς 1:29;

¹⁴ Κατά πουρανέ μπρεσά, ο Ιεχωβά χρησιμοποιηντάς πι υπηρετόν μπουτέ διαφορετικέ τροπόντζαρ. Σο κα κερέλ-τουμέν τι αβέν; Ανταβά κα σικάντιβελ κατά προσπάθειες σο μανγκένα τι κερέν. (Διαβάνεν Κολοσσαείς 1:​29) Άμα κα μουκχέν ι Ιεχωβάς τι χρησιμοποιήνελ-τουμέν, βοβ μπορίνελα τι κερέλ-τουμέν τι αβέν τζενέ σο βακερένα ο λατσσέ αμπέρια αντράλ πουμαρέ γκίσταρ, σικλιαρένα λατσσές, κοβλιαρένα ι γιαβερένγκι ντουκχ, κερένα λατσσί μπουτί, ισί λατσσέ αμαλά ή σο-ντα γιαβέρ χρειαζίντιβελα για τι κερέλ οντουβά σο μανγκέλα.

15. Καλέ πραγμάσκε πρέπει τι μολίνεν ι Ιεχωβάς ο τερνέ πφραλά αντιβές σαρ βακερένα ο εδάφια 1 Τιμόθεο 4:​12, 15;

¹⁵ Σο κα κερέν τουμέν, τερνάλεν; Τθεράσα μπαρί ανάγκη μπουτιαρνέ μουρσένγκε σο κα βοηθίνεν κι κχανγκιρί σαρ διακονικοί υπηρέτες. Μπουτέ κχανγκιρίντε ο πρεσβύτεροι ισί πιο μπουτ κατά διακονικοί υπηρέτες. Τερνάλεν, σόσκε μα τι μανγκέν τι κερέν πιο μπουτ κι κχανγκιρί; Ισί πφραλά σο βακερένα μπάζιμα: «Ερεσέλα-μαν σάντε τι βακεράβ ο λατσσέ αμπέρια». Άμα ντικχένα τουμέν-ντα αντικάς ο πράγματα, μολίνεν ι Ιεχωβάς τι βοηθίνελ-τουμέν τι μανγκέν τι αβέν διακονικοί υπηρέτες ντα τι ντελ-τουμέν ι ζορ τι κερέν ο πιο λατσσό για τι υπηρετίνεν-λες αντράλ τουμαρέ γκίσταρ. (Εκκλ. 12:1) Χρειαζίντιβασα τουμαρί βοήθεια!​—Διαβάνεν 1 Τιμόθεο 4:​12, 15.

16. Σο πρέπει τι μανγκάς κατά Ιεχωβά, ντα σόσκε;

¹⁶ Ο Ιεχωβά μπορίνελα τι κερέλ-τουμέν τι αβέν σο-ντα χρειαζίντιβελα για τι κερέλ οντουβά σο μανγκέλα. Οντουλέσκε, τι μανγκέν λέσταρ τι κερέλ-τουμέν τι μανγκέν τι κερέν λέσκο έργος ντα σοράν τι μανγκέν λέσταρ τι ντελ-τουμέν ι ζορ σο χρειαζίντιβενα. Είτε ισινέν τερνέ είτε πφουρέ, ντεν τουμαρέ σαατίσταρ, τουμαρέ ζοριάταρ ντα τουμαρέ πραγματένταρ για τι δοξάνεν ι Ιεχωβάς ακανά. (Εκκλ. 9:​10) Ατζέ-ντα άμα νταρένα ή πακιάνα ότι να ισινέν αζόμ λατσσέ, ποτές μα χασαρέν ο σουκάρ ευκαιρίες σο ντιντιόνα-τουμέν για τι κερέν ο πιο λατσσό κι Ιεχωβάσκι υπηρεσία. Σο σουκάρ ισί τι κεράς ατζέ-ντα κάτι χουρντό για τι ντας αμαρέ λατσσέ Νταντέστε ι δόξα σο αξίνελα!