Η συνθήκη βοηθιντάς τι κερντιόλ εκ νεβό οργανισμός σο βακέρντιβελας Κοινωνία των Εθνών. Οντουβά οργανισμός κερντιλό για «τι κερέλ σαρέ ο τθεμά τι συνεργαζίντιβεν ντα για τι ανέλ ειρήνη ντα ασφάλεια σαρί κι πφουβ». Μπουτ κατά θρησκείες ι Χριστιανικέ ντουνιάσκε μανγκλέ ι Κοινωνία των Εθνών. Ο Ομοσπονδιακός Συμβούλιος των Εκκλησιών του Χριστού κι Αμερική βακερντάς ότι ισί «πολιτική οργάνωση σο κυβερνίνελα κι πφουβ κι θέση κι Ντεβλέσκε Βασιλειάκι». Ο συμβούλιος σικαντάς ότι μανγκέλας ι Κοινωνία των Εθνών κάνα μπουτσσαντάς τζενέν κι Διάσκεψη Ειρήνης του Παρισιού. Εκ οντουλένταρ βακερντάς ότι η διάσκεψη «σικαντάς ότι αβιλί εκ μπαρί αλλαγή κι ιστορία κι ντουνιάσκι».

Ισινέ μπαγιά ότι αβιλί εκ μπαρί αλλαγή, αλλά να ανένας-λα ο τζενέ σο γκιντισάλε για τι ντικχέν σαρ κα ανέν ειρήνη. Εκ μπαρί αλλαγή ι εργόσκε αβιλί-πες κο 1919 κάνα ο Ιεχωβά πφερντάς πι λαός ζοριάσαρ για τι κερέν ανταβά έργος πιο μπουτ από ποτές. Πρώτα όμως, έπρεπε τι αβέλ-πες εκ μπαρί αλλαγή κο Σπουδαστές της Γραφής.

Κο Σάββατος 4 Ιανουαρίου 1919 κα τραμπίντιβενας καλά τζενέ κα αβένας κο διοικητικός συμβούλιος σο τθερέλας η Βιβλική ντα Φυλλαδική Εταιρία Σκοπιά. Αζομάν, ο Ιωσήφ Φ. Ρόδερφορντ, σο κερέλας κουμάντος κι Ιεχωβάσκο λαός, πφαντιλόας σινανέ φυλακή εφτά γιαβερέ πφραλέντζαρ κι Ατλάντα κι Τζόρτζια, σο ισί κο ΗΠΑ. Η ερώτηση ισινέ: Σο έπρεπε τι αβέλ-πες ι φυλακισμέ πφραλέντζαρ σο ισινέ κο διοικητικός συμβούλιος; Τι ατσσόν ή τι τσσουβέν λένγκε θεσιάτε γιαβερέ τζενέν;

Αντρέ κι φυλακή, ο πφραλ Ρόδερφορντ σκεφτίνελας σο κα αβέλας-πες κι οργάνωση. Τζανέλας ότι μερικά πφραλά πακιάνας ότι ισινέ πιο λατσσό τι τραμπίντιβελ εκ γιαβέρ τζενό για τι αβέλ πρόεδρος. Οτθάρ, γραφιντάας εκ γράμμας ντα βακερντάς ότι ο Εβάντερ Τζ. Κάουαρντ κα μπορίνελας τι αβέλ πρόεδρος. Ο Ρόδερφορντ βακερντάς ότι ο Κάουαρντ ισινέ εκ τζενό «ήρεμος», «γκοντιαβέρ» ντα «αφοσιωμέ κο Κύριος».  Όμως, μπουτ πφραλά μανγκένας τι αβέλ-πες κάτι γιαβέρ, τι τραμπίντιβελ ο πρόεδρος μετά από σιοβ μάσεκ. Ο δικηγόροι σο υποστηριντέας ι πφραλέν σο ισινέ κι φυλακή συμφωνιντέ. Καζόμ συνεχίνενας τι κερέν λάφι, μερικά πφραλά νευριασάλε.

Αζομάν αβιλό-πες κάτι σο, σαρ βακερντάς πιο σοράν ο Ρίτσαρντ Χ. Μπάρμπερ, ισινέ “σαρ τι ηρεμίνελας κάποιος εκ φουρτουνιασμέ ντεριάβ”. Εκ κατά πφραλά σο ισινέ οτθέ βακερντάς: “Να ισινόμ δικηγόρος για τι τζανάβ λατσσές ο νόμοι, αλλά τζανάβα λατσσές σο πρέπει τι κερέν ο αφοσιωμέ τζενέ. Οντουβά σο μανγκέλα ο Ντεβέλ ισί τι αβάς αφοσιωμέ. Ο πιο λατσσό τρόπος για τι σικαβάς αμαρί εμπιστοσύνη ισί τι τραμπίνας ακανά τι ατσσόλ πρόεδρος ο πφραλ Ρόδερφορντ”.​—Ψαλμ. 18:25.

Ο Αλεξάντερ Χ. Μακμίλαν, σο ισινέ βοβ-ντα κι φυλακή, βακερντάς πιο σοράν ότι ο γιαβέρ ντιβές ο πφραλ Ρόδερφορντ μπασκιαρντάς ο ντουβάρι ι φυλακιάκο ντα βακερντάς: «Νίκαβ αβρί το βας». Ο πφραλ Ρόδερφορντ ντινάς-λες εκ τηλεγράφημας. Ο Μακμίλαν ντικχλάς ο χάνικ λάφια ντα αγαντάς σο μανγκένας τι βακερέν. Βακερέλας: «ΡΟΔΕΡΦΟΡΝΤ ΓΟΥΑΪΖ ΒΑΝ ΜΠΑΡΜΠΕΡ ΑΝΤΕΡΣΟΝ ΜΠΟΥΛΙ ΝΤΑ ΣΠΙΛ ΠΡΟΕΔΡΟΣ ΤΡΙΝ ΠΡΩΤΟΙ ΘΕΣΕΙΣ ΜΑΝΓΚΑΣΑ ΣΑΡΙΛΕΝ». Ανταβά μανγκέλας τι βακερέλ ότι σαρέ οντουλά σο ισινέ κο διοικητικός συμβούλιος τραμπίντιλεας πάλι ντα ότι ο Ιωσήφ Ρόδερφορντ ντα ο Γουίλιαμ Βαν Άμπουργκ ατσσιλέας πουμαρέ θεσιέντε. Αντικάς, ο πφραλ Ρόδερφορντ ατσσιλό κι θέση σο τθερέλας σαρ πρόεδρος.

Καζόμ ο οχτώ πφραλά ισινέ κι φυλακή, πιστοί Σπουδαστές της Γραφής μανγκλέ κατά τζενέ τι υπογραφίνεν εκ αίτηση για τι νικιόν κατά φυλακή. Οντουλά μπίνταρανε πφραλά ντα πφενιά γκιντιντέ πιο μπουτ από 700.000 υπογραφές. Κι Τετάρτη 26 Μαρτίου 1919, πριν τι μπουτσσαβέν ι αίτηση, ο πφραλ Ρόδερφορντ ντα ο γιαβερά υπεύθυνα πφραλά νικίστιλε κατά φυλακή.

Ο πφραλ Ρόδερφορντ βακερντάς οντουλένγκε σο αβιλέ τι καλωσορίνεν-λες κάνα βουρτισάλο: «Ισινόμ σίγουρος ότι ανταβά σο νακχλάμ σαρέ ισινέ απλά προετοιμασία πιο δύσκολε ντιβεσένγκε. . . . Ο αγώνας σο κερντέν να αβιλό απλά για τι νικιόν τουμαρέ πφραλά κατά φυλακή. Ανταβά να ισινέ ο πιο σημαντικός ζήτημας. . . . Κερντέν ανταβά αγώνας για τι ντιντιόλ μαρτυρία ι Αληθειάκε, ντα οντουλά σο συμμετεχιντέ λιντέ εκ μπαρί ευλογία».

Ο πράγματα σο αβιλέ-πες κι πφραλένγκο δικαστήριος μπορεί τι σικαβένα ότι ο Ιεχωβά κερντάς τι αβέν-πες αντικάς ο πράγματα. 14 Μαΐου 1919, ο εφετείος νικαντάς ι απόφαση: «Ο κατηγορούμενοι ανταλέ υποθεσιάτε να τθερένας . . . δίκαιος δικαστήριος, σαρ τθερένας δικαίωμας, οτθάρ ακυρώντιβελα η δικαστική απόφαση». Ο πφραλά δικάντιλεας μπαρέ πραγματένγκε, ντα ανταλά κα ατσσόνας κο ποινικός μητρώος λένγκο άμα απλά κα χαρίντιβενας λένγκε ποινές ή άμα κα μειώντιβενας. Να βακέρντιλε γιαβερά κατηγορίες. Οντουλέσκε, ο Δικαστής Ρόδερφορντ συνεχίνελας τι αβέλ δικηγόρος ντα αντικάς μπορίνελας τι υποστηρίνελ ι Ιεχωβάσκε λαός ανγκλάλ κο Ανώτατος Δικαστήριος  των Ηνωμένων Πολιτειών, ντα ανταβά κερντάς-λες μπουτ φαρ κάνα νικίστιλο κατά φυλακή.

«Να μανγκάας τι ατσσάς πφαντέ βαστέντζαρ ντα τι μπεκλεντίνας τι λελ-αμέν ο Κύριος κο ουρανός», βακερντάς ο πφραλ Μακμίλαν. «Αγαβάας ότι έπρεπε τι κεράς κάτι για τι σικλιάς σο μανγκέλας μπαγιά ο Κύριος».

Αλλά ο πφραλά κο κεντρικά γραφεία να μπορίνενας τι συνεχίνεν ο έργος σο κερένας αζόμ μπρεσά. Σόσκε; Επειδή αζομάν σο ισινέ πφαντέ κι φυλακή σαρέ ο τυπογραφικές πλάκες σο χρησιμοποιήνενας για τι νικαβέν έντυπα καταστραφισάλεας. Ανταβά κερντάς-λεν τι χασαρέν πουμαρό θάρρος, ντα μερικά πφραλά σκεφτίνενας μήπως ο έργος τελειωσάλοας.

Ισινέ τζενέ σο μανγκένας ατζέκ ατζέκ τι σικλιόν οντουλένγκε σο βακερένας ο Σπουδαστές της Γραφής; Για τι ντιντιόλ απάντηση ανταλέ ερωτησιάτε, ο πφραλ Ρόδερφορντ αποφασιντάς τι κερέλ εκ ομιλία σο κα καλίνενας τζενέν. «Άμα να κα αβέλας καέκ, κα αγαβάας ότι ο έργος τελειωσάλοας», βακερντάς ο πφραλ Μακμίλαν.

Οτθάρ, κι Κυριακή 4 Μαΐου 1919, παρόλο σο ισινέ μπουτ νασφαλό, ο πφραλ Ρόδερφορντ κερντάς κο Λος Άντζελες κι Καλιφόρνια ι ομιλία με θέμας «Η Ελπίδα για την Καταθλιμμένη Ανθρωπότητα». Περίπου 3.500 τζενέ παρακολουθιντέ ι ομιλία, ενώ μπουτ γιαβερά νασλέ σόσκε να ισινέ τθαν σαριλένγκε. Ο γιαβέρ ντιβές, αβιλέ γιαβερά 1.500 τζενέ. Η ερώτηση ι πφραλένγκι απαντισάλιας​—ισινέ τζενέ σο μανγκένας τι σικλιόν!

Οντουβά σο κερντέ σοράν ο πφραλά επηρεαντάς ο τρόπος σο κερένα ο έργος ο Μάρτυρες ι Ιεχωβάσκε μέχρι αντιβές.

Η Σκοπιά 1 Αυγούστου 1919 βακερντάς ότι κο αρχές Σεπτεμβρίου κα αβέλας εκ μπαρί συνέλευση κο Σίνταρ Πόιντ κο Οχάιος. «Σαρέ  νιωθίνενας ότι έπρεπε τι τζαν», βακερντάς ο Κλάρενς Μπ. Μπίτι, εκ τερνό Σπουδαστής της Γραφής κατά Μισούρι. Γκιλέ πιο μπουτ από 6.000 πφραλά ντα πφενιά, κάτι σο να μπεκλεντίνελας καέκ. Η χαρά μπαριλί ατζέ πιο μπουτ κάνα 200 ντα πιο μπουτ τζενέ μπολντιλέ κι λίμνη Ίρι σο ισινέ οτθέ πασέ.

5 Σεπτεμβρίου 1919, κο πέμπτος ντιβές κι συνελευσιάκο, κι ομιλία με θέμας «Ομιλία προς τους Συνεργάτες», ο πφραλ Ρόδερφορντ βακερντάς ότι νικίστιλο εκ νεβό περιοδικός σο τθερέλας θέμας Ο Χρυσούς Αιών. * Ανταβά περιοδικός κα “κερέλας λάφι ι σημαντικέ ντιβεσένγκε σο τζουβντιάσα ντα κα εξηγίνελας-λεν αντράλ κατά Αγία Γραφή”.

Σαρέ κο Σπουδαστές της Γραφής βακέρντιλο τι κερέν λάφι ι Ντεβλέσκε μπίνταρανες ανταλέ νεβέ περιοδικόσαρ. Εκ επιστολή σο εξηγίνελας σαρ κα οργανώντιβελας ο έργος βακερέλας: «Τι ντελ-πες γκοντί κάθε μπολντό τζενό ότι η υπηρεσία ισί μπαρό προνόμιος, ντα τι καπτίνελ ακανά ι ευκαιρία τι κερέλ βοβ-ντα ο μπουτ μπαρό έργος σο αβέλα-πες κο ντουνιάς». Ο αποτέλεσμας ισινέ μπουτ λατσσό! Μέχρι κο Δεκέμβριος, ο τζενέ σο κερένας λάφι ι Βασιλειάκε σαρέ πουμαρέ γκίσαρ κερντέας πιο μπουτ από 50.000 συνδρομές κο νεβό περιοδικός.

Κο τέλος κι μπρεσέσκο 1919, ι Ιεχωβάσκο λαός οργανωσάλο πάλι ντα ισινέ έτοιμος τι κερέλ μπουτί. Επίσης, μπουτ σημαντικές προφητείες σο κερένας λάφι ι τελευταίε ντιβεσένγκε νικίστιλεας μπαγιά. Ο βακίτι σο δοκιμασάλο ντα καθαρισάλο ι Ντεβλέσκο λαός, σαρ βακερένα ο εδάφια Μαλαχίας 3:​1-4, τελειωσάλοας. Ι Ιεχωβάσκο λαός ελευθερωσάλοας κατά αιχμαλωσία κι “Βαβυλώνα κι Μπαρί” ντα ο Ιησούς τσσουντάς “τον πιστό ντα φρόνιμο δούλο”. * (Αποκ. 18:2, 4· Ματθ. 24:​45) Ακανά ο Σπουδαστές της Γραφής ισινέ έτοιμοι για το έργος σο μανγκέλας ο Ιεχωβά τι κερέν.