1. Καγιά ισί η πιο λατσσί απόφαση σο μπορίνελα τι λελ εκ τζενό;

ΜΠΟΥΤ φαρ, οντουλά σο τραμπίνενα τι κερέν ο νταντά ντα ο νταγιά επηρεάνενα λένγκε τσσαβέν μπουτ μπρεσά. Άμα να τραμπίνενα γκοντιάσαρ τι κερέν μερικά πράγματα, μπορεί τι ανέν προβλήματα πουμαρέ τσσαβένγκε. Άμα όμως τραμπίνενα γκοντιάσαρ σο κα κερέν, βοηθίνενα πουμαρέ τσσαβέν τι τθερέν εκ ευτυχισμέ ντα σουκάρ ζωή. Σίγουρα, ο τσσαβέ-ντα πρέπει τι λεν σωστές αποφάσεις. Η πιο λατσσί απόφαση σο μπορίνελα τι λελ εκ τζενό ισί τι υπηρετίνελ αμαρέ λατσσέ Νταντές, ι Ιεχωβάς.​—Ψαλμ. 73:28.

2. Καλά λατσσέ πράγματα τραμπιντάς τι κερέλ ο Ιησούς, λέσκο ντατ ντα λέσκι ντάι;

² Ο ντατ ι Ιησούσκο ντα λέσκι ντάι μανγκένας τι βοηθίνεν πουμαρέ τσσαβέν τι υπηρετίνεν ι Ιεχωβάς, ντα ο πράγματα σο τραμπιντέ τι κερέν σικαντέ ότι ανταβά ισινέ ο πιο σημαντικός πράγμας λένγκε ζωγιάτε. (Λουκ. 2:​40, 41, 52) Αλλά ο Ιησούς-ντα τραμπιντάς τι κερέλ λατσσέ πράγματα σο βοηθιντέ-λες τι κερέλ οντουβά σο μανγκέλας ο Ιεχωβά λέσταρ. (Ματθ. 4:​1-10) Κάνα μπαριλό, αβιλό εκ λατσσό, αφοσιωμέ ντα μπίνταρανο μουρς. Κάθε ντατ ντα κάθε ντάι σο μανγκέλα ι Ιεχωβάς κα μανγκέλας τι τθερέλ εκχέ ασακέ τσσαβές.

3. Καλέ ερωτησιέντε κα απαντίνας ανταλέ μαθημάστε;

³ Ανταλέ μαθημάστε, κα ντικχάς ακαλά ερωτήσεις: Σο τραμπιντάς ο Ιεχωβά ι Ιησούσκε; Σο σικλιόνα ο νταντά ντα ο νταγιά σο ισί Χριστιανοί οντουλένταρ σο τραμπιντάς τι κερέλ ο ντατ ι Ιησούσκο ντα λέσκι ντάι; Ντα σο σικλιόνα ο τερνέ Χριστιανοί οντουλένταρ σο τραμπιντάς τι κερέλ ο Ιησούς;

4. Σο τραμπιντάς ο Ιεχωβά πι Τσσαβέσκε;

⁴ Ο Ιεχωβά τραμπιντάς ι Ιησούσκε εκχέ μπουτ λατσσέ νταντές ντα εκχέ μπουτ λατσσέ νταγιά. (Ματθ. 1:​18-23· Λουκ. 1:​26-38) Ο λάφια ι Μαριάκε σο νικιόνας λάκε γκίσταρ ντα αρακχάσα-λεν κι Γραφή σικαβένα καζόμ μπουτ μανγκέλας ι Ιεχωβάς ντα λέσκο Λάφι. (Λουκ. 1:​46-55) Ντα κάνα ο Ιωσήφ ντινάς καν οντουλέντε σο βακερντάς λέσκε ο Ιεχωβά, σικαντάς ότι μανγκέλας-λες ντα μανγκέλας τι κερέλ λέσκο γκι.​—Ματθ. 1:24.

5, 6. Σο μουκχλάς ο Ιεχωβά τι νακχέλ λέσκο Τσσαβό;

⁵ Ντικχέν ότι ο Ιεχωβά να τραμπιντάς χουλανέ νταντές ντα νταγιά ι Ιησούσκε. Η θυσία σο κερντάς ο Ιωσήφ ντα η Μαρία αφού μπιάντιλο ο Ιησούς σικαντάς ότι ισινέ τσορορέ. (Λουκ. 2:​24) Ο Ιωσήφ ισινέ ξυλουργός ντα μπορεί τι κερέλας πι μπουτί εκχέ χουρντέ τθανέστε πασέ πι κχερέστε κι Ναζαρέτ. Λένγκι ζωή μάλλον ισινέ απλή, ειδικά καζόμ μπαριόλας λένγκι φαμιλί. Ο Ιωσήφ ντα η Μαρία κερντέ σίγουρα εφτά τσσαβέν.​—Ματθ. 13:​55, 56.

⁶ Ο Ιεχωβά αρακχαντάς ι Ιησούς μερικέ πραγματένταρ, αλλά να αρακχαντάς-λες σαρέ κατά δυσκολίες. (Ματθ. 2:​13-15) Για παράδειγμας, ο Ιησούς τθερέλας τζενέν σο να πακιάνας λέστε. Σκεφτίνεν καζόμ μπουτ πρέπει τι στεναχωρίντιβελας κάνα τζενέ αντράλ λέσκε φαμιλιάταρ κι αρχή να πακιαντέ ότι ισινέ ο Μεσσίας. (Μάρκ. 3:​21· Ιωάν. 7:5) Επίσης, ο Ιησούς πρέπει τι ισινέ ατζέ τερνό κάνα μουλό λέσκο μαμοσολό, ο Ιωσήφ. Επειδή ισινέ ο πιο μπαρό τσσαβό, μπορεί τι λιντάς βοβ ι μπουτί πι μαμοσολόσκι. (Μάρκ. 6:3) Καζόμ μπαριόλας, σικλιλό τι φροντίνελ πι φαμιλί. Μάλλον κερέλας μπουτ μπουτί για τι ανέλ ο μαντρό πι φαμιλιάτε. Οτθάρ, τζανέλας μπουτ λατσσές σαρ ισί τι αβέλ εκ τζενό κχινό κο τέλος εκχέ ντιβεσέσκο.

7. (α) Καλά ερωτήσεις κα βοηθίνεν ι αντρογυνόν τι μπαριαρέν πουμαρέ τσσαβέν; (β) Σαρ μπορίνενα ο εδάφια Παροιμίες 2:​1-6 τι βοηθίνεν ι νταντέν ντα ι νταΐν τι σικλιαρέν πουμαρέ τσσαβέν;

⁷ Άμα μανγκένα τι κερέν τσσαβέν, πουτσέν-τουμέν: “Ισινάμ ταπεινά τζενέ σο μανγκένα ι Ιεχωβάς ντα λέσκο Λάφι; Κα τραμπίνελας-αμέν ο Ιεχωβά για τι αρακχαβάς εκχέ χουρντές, σο ισί εκ πολύτιμος δώρος;” (Ψαλμ. 127:3, 4) Άμα τθερένα τσσαβέν, πουτσέν-τουμέν: “Σικλιαράβα μι τσσαβέν καζόμ σημαντική ισί η σκληρή μπουτί;” (Εκκλ. 3:​12, 13) “Κεράβα ο πιο λατσσό για τι  αρακχαβάβ μι τσσαβέν κατά γιαβερά κίνδυνοι ντα κατά πφιρνικανέ πράγματα σο μπορεί τι νακχέν κι Μπενγκέσκο ντουνιάς;” (Παρ. 22:3) Ναστί αρακχαβένα τουμαρέ τσσαβέν σαρέ κατά δυσκολίες. Ανταβά ναστί αβέλα-πες. Μπορίνενα όμως τι σικλιαρέν-λεν μανγκιμάσαρ σαρ τι ρόντεν κι Γραφή για τι αρακχέν συμβουλές ντα αντικάς τι προετοιμάνεν-λεν οντουλένγκε σο κα νακχέν κι ζωή. (Διαβάνεν Παροιμίες 2:​1-6) Για παράδειγμας, άμα εκ τουμαρέ τζενένταρ τραμπιντάς τι νασέλ κατά αλήθεια, βοηθίνεν τουμαρέ τσσαβέν τι σικλιόν κατά Ντεβλέσκο Λάφι σόσκε ισί σημαντικός τι ατσσόν πιστοί κο Ιεχωβά. (Ψαλμ. 31:​23) Ή άμα εκ τζενό σο μανγκένας-λες μπουτ μουλό, σικαβέν τουμαρέ τσσαβένγκε σαρ τι κοβλιαρέν πουμαρί ντουκχ ντα σαρ τι αρακχέν ειρήνη αντράλ κατά Ντεβλέσκο Λάφι.​—2 Κορ. 1:3, 4· 2 Τιμ. 3:16.

8. Σο έπρεπε τι κερέλ ο Ιωσήφ ντα η Μαρία σαρ βακερένα ο εδάφια Δευτερονόμιο 6:6, 7;

⁸ Ο Ιωσήφ ντα η Μαρία βοηθιντέ ι Ιησούς τι μπαριόλ ντα τι τθερέλ ι ευλογία ι Ντεβλέσκι σόσκε κερένας οντουλά σο βακερντάς ο Ιεχωβά κο νταντά ντα κο νταγιά. (Διαβάνεν Δευτερονόμιο 6:6, 7) Ο Ιωσήφ ντα η Μαρία μανγκένας μπουτ ι Ιεχωβάς, ντα ο πιο σημαντικός πράγμας λένγκε ισινέ τι βοηθίνεν πουμαρέ τσσαβέν τι μανγκέν βον-ντα ι Ιεχωβάς.

9. Καλά σημαντικά πράγματα τραμπιντάς τι κερέλ ο Ιωσήφ ντα η Μαρία;

⁹ Ο Ιωσήφ ντα η Μαρία τραμπιντέ τι ατσσικιαρέν εκ λατσσό πνευματικός πρόγραμμας σαρ φαμιλί. Σίγουρα, τζάνας κάθε εβδομάδα κι συναγωγή κι Ναζαρέτ ντα κάθε μπρες κι Ιερουσαλήμ για το Πάσχας. (Λουκ. 2:​41· 4:​16) Κάνα κερένας ανταλά ταξίδια, μπορεί τι σικλιαρένας ι Ιησούς ντα λέσκε πφραλέν ι ιστορία ι Ιεχωβάσκε λαόσκι, μάλλον καζόμ νακχένας τθανένταρ σο βακερέλα η Γραφή. Καζόμ η φαμιλί μπαριόλας, σίγουρα να ισινέ εύκολος ι Ιωσηφίσκε ντα ι Μαριάκε τι ατσσικιαρέν εκ λατσσό πνευματικός πρόγραμμας. Αλλά καζόμ μπαρό λατσσιπέ κερντάς λένγκε ανταβά! Επειδή τσσουβένας ι λατρεία ι Ιεχωβάσκι πρώτη, λένγκι φαμιλί ατσσιλί πασέ κο Ιεχωβά.

10. Σο σικλιόνα ο νταντά ντα ο νταγιά κατά Ιωσήφ ντα κατά Μαρία;

¹⁰ Σο σικλιόνα ο νταντά ντα ο νταγιά κατά Ιωσήφ ντα κατά Μαρία; Ο πιο σημαντικός ισί τι σικαβέν τουμαρέ τσσαβένγκε οντουλέντζαρ  σο βακερένα ντα κερένα ότι μανγκένα μπουτ ι Ιεχωβάς. Αγαβέν ότι ο πιο μπαρό δώρος σο μπορίνενα τι ντεν-λεν ισί τι βοηθίνεν-λεν τι μανγκέν ι Ιεχωβάς. Ντα εκ κατά πιο σημαντικά πράγματα σο μπορίνενα τι σικλιαρέν-λεν ισί τι διαβάνεν ι Γραφή κάθε ντιβές, τι κερέν προσευχή, τι τζαν κο συναθροίσεις ντα τι νικιόν κο έργος. (1 Τιμ. 6:6) Σίγουρα, πρέπει τι ντεν ο αναγκαία τουμαρέ τσσαβέντε. (1 Τιμ. 5:8) Όμως, τι ντεν-τουμέν γκοντί ότι η λατσσί φιλία σο τθερένα τουμαρέ τσσαβέ ι Ιεχωβάσαρ, ντα όχι ο υλικά πράγματα, ισί οντουβά σο κα σώνελ-λεν κατά τέλος ανταλέ πουρανέ ντουνιάσκο ντα κα βοηθίνελ-λεν τι τζουβντιόν κο νεβό ντουνιάς κι Ντεβλέσκο. *​—Ιεζ. 7:​19· 1 Τιμ. 4:8.

11. (α) Σαρ βοηθίνελα ι νταντέν ντα ι νταΐν η συμβουλή σο ισί κο εδάφια 1 Τιμόθεο 6:​17-19 τι τραμπίνεν τι κερέν λατσσέ πράγματα καζόμ μπαριαρένα πουμαρέ τσσαβέν; (β) Καλά στόχους κα μπορίνενας τι σκεφτίνεν σαρ φαμιλί, ντα καλά ευλογίες κα μπορίνενας τι λεν; (Ντικχέν ο πλαίσιος « Σο Στόχους κα Τσσουβέν;»)

¹¹ Σο σουκάρ ισί τι ντικχάς αζόμ μπουτέ νταντέν ντα νταΐν τι τραμπίνεν τι κερέν λατσσέ πράγματα για τι βοηθίνεν πουμαρέ τσσαβέν τι αβέν πασέ κο Ιεχωβά! Τθερένα πρόγραμμας τι ντεν λατρεία γιεκ ι Ντεβλές. Τζάνα κο συναθροίσεις ντα κο συνελεύσεις. Βακερένα ο λατσσέ αμπέρια. Μερικά φαμιλιά τζάνα τι κερέν έργος τθανέντε σο να βακέρντιβενα μπουτ φαρ ο λατσσέ αμπέρια. Γιαβερά τζάνα τι ντικχέν ο Μπέθελ ή κερένα μπουτί για τι κερντιόν κτίρια σο τθερέλα ι Ιεχωβάσκι οργάνωση. Ο φαμιλιά σο τραμπίνενα τι κερέν ανταλά πράγματα ντένα πουμαρέ λοβένταρ, ντα ανταβά μπορεί τι ανέλ λένγκε κάποιες δυσκολίες. Αλλά ο λατσσίματα σο κα τθερέν κα κερέν-λεν μπαγιά χουλανέ κι Ιεχωβάσκε γιακχά. (Διαβάνεν 1 Τιμόθεο 6:​17-19) Ο τσσαβέ σο μπαριόνα ασακέ φαμιλίντε μπουτ φαρ ατσσικιαρένα ο λατσσέ συνήθειες σο σικλιλέ, ντα να μετανιώνενα! *​—Παρ. 10:22.

12. Σο έπρεπε τι κερέλ ο Ιησούς καζόμ μπαριόλας;

¹² Ο Ντατ ι Ιησούσκο, ο Ιεχωβά, τραμπίνελα πάντα λατσσέ πράγματα, ντα ανταβά κερντάς ο Ιωσήφ ντα η Μαρία. Όμως, καζόμ ο Ιησούς μπαριόλας, έπρεπε τι τραμπίνελ βοβ κάποια πράγματα. (Γαλ. 6:5) Σαρ κεράσα σαρέ αμέν, αντικάς βοβ-ντα μπορίνελας τι τραμπίνελ σο κα κερέλ. Κα μπορίνελας τι τσσουβέλ πρώτα οντουλά σο μανγκέλας. Βοβ όμως τραμπιντάς τι ατσσόλ λατσσό αμάλ ι Ιεχωβάσκο. (Ιωάν. 8:​29) Σαρ βοηθίνελα ο παράδειγμας λέσκο ι τερνέν αντιβές;

13. Καβά σημαντικός πράγμας τραμπιντάς ο Ιησούς καζόμ ισινέ ατζέ τερνό;

¹³ Χουρντιαρέλα, ο Ιησούς τραμπιντάς τι ντελ καν πι νταντές ντα πι νταγιά. Ποτές να  σκεφτιντάς μα τι ασουνέλ-λεν επειδή τζανέλας πιο μπουτ λένταρ. Αλλά «ντέλας καν λέντε». (Λουκ. 2:​51) Ο Ιησούς σίγουρα κερέλας σο νακχέλας λέσκε βαστένταρ για τι κερέλ ο ευθύνες σο τθερέλας σαρ ο πιο μπαρό τσσαβό. Μαρντάς-πες για τι σικλιόλ εκ μπουτί πι μαμοσολόσταρ για τι βοηθίνελ πι φαμιλί.

14. Σαρ τζανάσα ότι ο Ιησούς ρόντελας αζόμ λατσσές κο Λάφι κι Ντεβλέσκο;

¹⁴ Ο ντατ ι Ιησούσκο ντα λέσκι ντάι μάλλον μουτθαντέ λέσκε ότι μπιάντιλο εκχέ θαυμάσαρ σο κερντάς ο Ντεβέλ ντα σο βακερντέας ο άγγελοι. (Λουκ. 2:​8-19, 25-38) Ο Ιησούς όμως να ατσσιλό οντουλέντε σο ασουντάς. Ρόντελας κορκορό-ντα κο Γραφές. Σαρ τζανάσα ότι ρόντελας αζόμ λατσσές κο Λάφι κι Ντεβλέσκο; Επειδή παρόλο σο ισινέ χουρντό, ο δάσκαλοι κι Ιερουσαλήμ «σαστίνενας οντουλένταρ σο αγαβέλας ντα κατά απαντήσεις σο ντέλας». (Λουκ. 2:​46, 47) Ντα κάνα ισινέ σάντε 12 μπρεσένγκο, ο Ιησούς ροντιντάας αζόμ λατσσές κο Λάφι κι Ντεβλέσκο, σο ισινέ σίγουρος ότι ο Ιεχωβά ισινέ λέσκο Ντατ.​—Λουκ. 2:​42, 43, 49.

15. Σαρ σικαντάς ο Ιησούς ότι τραμπιντάς τι κερέλ οντουβά σο μανγκέλα ο Ιεχωβά;

¹⁵ Κάνα ο Ιησούς σικλιλό σο μανγκέλας ο Ιεχωβά λέσταρ, τραμπιντάς τι κερέλ-λες. (Ιωάν. 6:​38) Τζανέλας ότι μπουτ τζενέ κα μισίνενας-λες, ντα ανταβά νακχέλας μπουτ φαρ λέσκε γκοντιάταρ. Όμως, τραμπιντάς τι ντελ καν ι Ιεχωβάς. Κάνα ο Ιησούς μπολντιλό κο 29 Κ.Χ., ο πιο σημαντικός πράγμας λέσκε ζωγιάτε ισινέ τι κερέλ σο-ντα μπεκλεντίνελας λέσταρ ο Ιεχωβά. (Εβρ. 10:​5-7) Ατζέ-ντα κάνα μερέλας οπράλ κο κας σο βασανίνενας-λες, ο Ιησούς να τσσιναντάς τι κερέλ οντουβά σο μανγκέλας ο Ντεβέλ.​—Ιωάν. 19:30.

16. Καβά ισί εκ πράγμας σο σικλιόνα ο τσσαβέ κατά Ιησούς;

¹⁶ Τι ντεν καν τουμαρέ νταντές ντα τουμαρέ νταγιά. Σαρ ο Ιωσήφ ντα η Μαρία, αντικάς-ντα τουμαρό ντατ ντα τουμαρί ντάι νανέ τέλειοι. Όμως, ο Ιεχωβά ντινάς-λεν ι ευθύνη τι αρακχαβέν-τουμέν ντα τι σικλιαρέν-τουμέν. Άμα εκτιμίνενα λένγκε συμβουλές ντα σεβάνενα λένγκι εξουσία, “κα τζαν τουμένγκε λατσσές ο πράγματα”.​—Εφεσ. 6:​1-4.

17. Καγιά απόφαση πρέπει τι λεν ο τερνέ σαρ βακερέλα ο εδάφιος Ιησούς του Ναυή 24:15;

¹⁷ Αποφασίνεν κας κα υπηρετίνεν. Πρέπει τι αγαβέν λατσσές κον ισί ο Ιεχωβά, σο μανγκέλα τι κερέλ ντα σαρ ανταβά τθερέλα τι κερέλ τουμέντζαρ. (Ρωμ. 12:2) Αζομάν κα  μπορίνεν τι λεν ι πιο σημαντική απόφαση τουμαρέ ζωγιάτε, ι απόφαση τι υπηρετίνεν ι Ιεχωβάς. (Διαβάνεν Ιησούς του Ναυή 24:​15· Εκκλ. 12:1) Άμα διαβάνενα κάθε ντιβές ι Γραφή ντα ρόντενα λάτε, κα μανγκέν ατζέ πιο μπουτ ι Ιεχωβάς ντα τουμαρί πίστη λέστε κα αβέλ ατζέ πιο ζουρανί.

18. Καβά ισί εκ πράγμας σο πρέπει τι τραμπίνεν τι κερέν ο τερνέ, ντα καβά κα αβέλ ο αποτέλεσμας;

¹⁸ Τραμπίνεν τι τσσουβέν πρώτα τουμαρέ ζωγιάτε οντουβά σο μανγκέλα ο Ιεχωβά. Ο ντουνιάς ι Μπενγκέσκο βακερέλα ότι, άμα χρησιμοποιήνενα τουμαρέ ταλέντα τουμαρέ λατσσιμάσκε, κα αβέν ευτυχισμέ. Αλλά τζανάσα ότι οντουλά σο μανγκένα τι χουλάνιβεν “ντουκχαβένα πουμαρό νεαυτός σαρ τι ντένα-πες τσσουριάσαρ μπουτέ τθανέντε”. (1 Τιμ. 6:9, 10) Οκιά μπάνταρ, άμα ντένα καν ι Ιεχωβάς ντα τραμπίνενα τι τσσουβέν πρώτα τουμαρέ ζωγιάτε οντουβά σο μανγκέλα, κα τζαν-λεν λατσσές ντα “κα κερέν ο πράγματα γκοντιάσαρ”.​—Ιησ. Ναυή 1:8.

19. Σο πρέπει τι ντεν-πες γκοντί ο νταντά ντα ο νταγιά;

¹⁹ Νταντάλεν ντα νταγιάλεν, κερέν ο πιο λατσσό για τι βοηθίνεν τουμαρέ τσσαβέν τι υπηρετίνεν ι Ιεχωβάς. Ντεν λέσκε μπέσα, ντα βοβ κα βοηθίνελ-τουμέν τι τραμπίνεν γκοντιάσαρ σο τι κερέν. (Παρ. 3:5, 6) Τι ντεν-τουμέν γκοντί ότι τουμαρέ τσσαβέ κα επηρεάντιβεν πιο μπουτ οντουλένταρ σο κερένα παρά οντουλένταρ σο βακερένα. Οτθάρ, λεν αποφάσεις σο κα κερέν τουμαρέ τσσαβέν τι τθερέν ι ευλογία ι Ιεχωβάσκι.

20. Καλά ευλογίες κα τθερέν ο τερνέ άμα κα τραμπίνεν τι υπηρετίνεν ι Ιεχωβάς;

²⁰ Τερνάλεν, τουμαρό ντατ ντα τουμαρί ντάι μπορίνενα τι βοηθίνεν-τουμέν τι τραμπίνεν τι κερέν πράγματα γκοντιάσαρ τουμαρέ ζωγιάτε. Αλλά τουμαρέ βαστέστε ισί τι λεν ι ευλογία ι Ντεβλέσκι. Οτθάρ, μοιάζεν κο Ιησούς ντα τραμπίνεν τι υπηρετίνεν τουμαρέ λατσσέ Νταντές, ι Ιεχωβάς. Άμα κα κερέν-λες ανταβά, κα τθερέν εκ σουκάρ ντα πφερντί ζωή ακανά. (1 Τιμ. 4:​16) Ντα κο μέλλον, κα τθερέν ι πιο σουκάρ ζωή σο κα μπορίνενας τι τθερέν!