1. Σαρ τζανάσα ότι ο έργος για τι κεράς μαθητέν σώνελα ζωές;

Ο ΕΡΓΟΣ για τι κεράς μαθητέν σώνελα ζωές! Σαρ τζανάσα-λες ανταβά; Κάνα ο Ιησούς ντινάς ι εντολή σο ισί κο εδάφια Ματθαίος 28:​19, 20, βακερντάς: «Τζαν ντα κερέν μαθητέν . . . , [ντα] μπολέν-λεν». Καζόμ σημαντικός ισί ο μπολντιπέ; Πρέπει τι μπολντιάς άμα μανγκάσα τι τζουβντιάς για πάντα. Ο τζενό σο μανγκέλα τι μπολντιόλ πρέπει τι πακιάλ ότι μπορίνελα τι σώντιβελ σάντε επειδή ο Ιησούς ντινάς πι ζωή αμένγκε ντα αναστισάλο. Άκ’ σόσκε ο απόστολος Πέτρος βακερντάς κο γιαβερά Χριστιανοί: «Ο μπολντιπέ . . . σώνελα τουμέν-ντα ακανά . . . αντράλ κατά ανάσταση ι Ιησού Χριστόσκι». (1 Πέτρ. 3:​21) Οτθάρ, κάνα εκ τζενό μπολντιόλα, τθερέλα ι ευκαιρία τι τζουβντιόλ για πάντα.

2. Σο δάσκαλοι πρέπει τι αβάς σαρ βακερένα ο εδάφια 2 Τιμόθεο 4:1, 2;

² Για τι κεράς μαθητέν, πρέπει τι σικλιάς σαρ τι αβάς “λατσσέ δάσκαλοι”. (Διαβάνεν 2 Τιμόθεο 4:1, 2) Σόσκε; Επειδή ο Ιησούς βακερντάς αμένγκε: «Τζαν ντα κερέν μαθητέν . . . , ντα σικλιαρέν-λεν». Ο απόστολος Παύλος βακερντάς κο Τιμόθεος: «Τι ατσσός σταθερός ανταλέ [εργόστε], σόσκε άμα κα κερές-λες ανταβά κα σώνες εμ τουτ εμ οντουλέν σο ασουνένα-τουτ». Άκ’ σόσκε βακερντάς λέσκε: «Μα τσσίναβ τι ντες προσοχή κο . . . τρόπος σο σικλιαρέσα». (1 Τιμ. 4:​16) Βα, για τι αβέν ο τζενέ μαθητές πρέπει τι σικλιαράς-λεν, οτθάρ αμαρό σικλιαριπέ μανγκάσα τι αβέλ καζόμ αβέλα-πες πιο λατσσό.

3. Σο κα ντικχάς ανταλέ μαθημάστε;

³ Κεράσα εκατομμύρια μελέτες σαρό κο ντουνιάς. Αλλά σαρ ντικχλάμ κο γιαβέρ μάθημας, μανγκάσα τι σικλιάς σαρ τι βοηθίνας καζόμ αβέλα-πες πιο μπουτ ανταλέ τζενένταρ τι μπολντιόν για τι αβέν μαθητές ι Ιησού Χριστόσκε. Ανταλέ  μαθημάστε, κα ντικχάς ατζέ παντς πράγματα σο μπορίνενα τι κερέν οντουλά σο σικλιαρένα ι γιαβερέν για τι βοηθίνεν-λεν τι ερεσέν κο μπολντιπέ.

4. Σόσκε πρέπει οντουβά σο σικλιαρέλα τι ατσσικιαρέλ-πες κάνα κερέλα εκ μελέτη; (Ντικχέν ι υποσημείωση-ντα)

⁴ Μανγκάσα ο αλήθειες σο σικλιαράσα κατά Ντεβλέσκο Λάφι. Οτθάρ, μπορεί τι περάσα κι παγίδα τι κεράς μπουτ λάφι ανταλέ πραγματένγκε. Αλλά οντουβά σο κερέλα ι Σκοπιά, ι Εκκλησιαστική Γραφική Μελέτη ή κερέλα μελέτη εκχέ τζενές, δεν πρέπει τι κερέλ μπουτ λάφι. Για τι μουκχέλ ι Γραφή τι σικλιαρέλ, ο πφραλ πρέπει τι ατσσικιαρέλ-πες ντα μα τι προσπαθίνελ τι ντελ ι τζενές τι αγαβέλ σαρέ οντουλά σο τζανέλα εκχέ εδαφιόσκε ή εκχέ θεμάσκε κατά Γραφή. * (Ιωάν. 16:​12) Σκεφτίνεν καζόμ πράγματα τζανένας κατά Γραφή κάνα μπολντιλέν ντα καζόμ πράγματα τζανένα ακανά. Κάνα μπολντιλέν, μπορεί τι αγαβένας σάντε ο βασικά πράγματα σο σικλιαρέλα η Γραφή. (Εβρ. 6:1) Νακχλέ μπρεσά για τι σικλιόν σαρέ οντουλά σο τζανένα ακανά, οτθάρ μα προσπαθίνεν τι σικλιαρέν εκχέ τζενές σο κερέλα μελέτη χάνικ βακίτι σαρέ ο πράγματα.

5. (α) Σο μανγκάσα τι αγαβέλ ο τζενό σο κεράσα-λες μελέτη σαρ βακερέλα ο εδάφιος 1 Θεσσαλονικείς 2:​13; (β) Σαρ κα βοηθίνας ι τζενές σο κεράσα-λες μελέτη τι κερέλ λάφι οντουλένγκε σο σικλιόλα;

⁵ Μανγκάσα ο τζενό σο κεράσα-λες μελέτη τι αγαβέλ ότι σαρέ οντουλά σο σικλιόλα ισί κατά Ντεβλέσκο Λάφι. (Διαβάνεν 1 Θεσσαλονικείς 2:​13) Σαρ κα κεράς-λες ανταβά; Τι βακερέν ι τζενέσκε τι κερέλ λάφι οντουλένγκε σο σικλιόλα. Αντίς τι βακερέν τουμέν κάθε φαρ σο μανγκένα τι βακερέν ο εδάφια, μπάζιμα μανγκέν λέσταρ τι κερέλ-λες ανταβά. Βοηθίνεν-λες τι αγαβέλ σαρ τι κερέλ πι ζωγιάτε οντουλά σο σικλιόλα κατά Ντεβλέσκο Λάφι. Κερέν ερωτήσεις σο κα βοηθίνεν-λες τι βακερέλ σαρ ντικχέλα ο εδάφια σο διαβάνελα ντα σαρ νιωθίνελα λένγκε. (Λουκ. 10:​25-28) Για παράδειγμας, πουτσέν-λες: «Σαρ βοηθιντάς-τουτ ανταβά εδάφιος τι αγαβές εκ ιδιότητα ι Ιεχωβάσκι;» «Σαρ βοηθίνενα-τουτ ο πράγματα σο σικλιλάν ακανά κατά Γραφή;» «Σαρ νιωθίνεσα ανταλέσκε σο σικλιλάν ακανά;» (Παρ. 20:5) Ο πιο σημαντικός νανέ καζόμ πράγματα τζανέλα εκ τζενό σο κερέλα μελέτη, αλλά καζόμ μπουτ μανγκέλα-λεν ντα κερέλα-λεν πι ζωγιάτε.

6. Σόσκε μπορεί τι ισί λατσσό τι λεν τουμέντζαρ κι μελέτη εκχέ πφραλές ή εκχέ πφενιά σο σικλιαρέλα μπουτ μπρεσά;

⁶ Κάνα κερένα εκ μελέτη, λένα τουμέντζαρ πφραλέν σο σικλιαρένα μπουτ μπρεσά; Άμα κερένα-λες ανταβά, πουτσέν-λεν σαρ ντικχένα ο τρόπος σο τουμέν κερένα ι  μελέτη ντα άμα μουκχένα ι Γραφή τι σικλιαρέλ. Πρέπει τι αβέν ταπεινοί άμα μανγκένα τι σικλιαρέν πιο λατσσές. (Ντικχέν Πράξεις 18:​24-26) Σοράν, πουτσέν ι πφραλές ή ι πφενιά σο ισί τουμέντζαρ άμα πακιάλα ότι ο τζενό σο κερένα-λες μελέτη αγαβέλα οντουλά σο σικλιόλα. Μπορίνενα τι βακερέν ι πφραλέσκε τι κερέλ βοβ ι μελέτη άμα κα λειπίνεν εκ ή πιο μπουτ εβδομάδες. Αντικάς, ο τζενό να κα χασαρέλ πι μελέτη ντα κα ατσσόλ λέσκε γκοντιάτε καζόμ σημαντική ισί. Ποτές μα βακερέν ότι η μελέτη ισί τουμαρί ντα ότι καέκ γιαβέρ ναστί κερέλα-λα. Οντουβά σο μανγκένα ισί τι βοηθίνεν ι τζενές σο κερένα-λες μελέτη τι σικλιόλ πιο μπουτ πράγματα ι αληθειάκε.

7. Σο κα βοηθίνελ ι τζενές σο κερένα-λες μελέτη τι μανγκέλ οντουλά σο σικλιόλα;

⁷ Ο τζενό σο κερένα-λες μελέτη πρέπει τι ντικχέλ ότι μανγκένα ντα πακιάνα ο αλήθειες σο σικλιαρέλα η Γραφή. (1 Θεσ. 1:5) Αζομάν κα μανγκέλ οντουλά σο σικλιόλα. Μπέκιμ κα μπορίνενας τι βακερέν λέσκε σαρ βοηθιντάς-τουμέν η Γραφή τουμαρέ ζωγιάτε. Αζομάν κα αγαβέλ ότι η Γραφή μπορίνελα τι βοηθίνελ λες-ντα.

8. Σο γιαβέρ μπορίνενα τι κερέν κι μελέτη, ντα σόσκε;

⁸ Κάνα κερένα μελέτη εκχέ τζενές, πουτρέν πφραλένγκε ντα πφενίνγκε σο τθερένας ο ίδια προβλήματα λέσαρ ντα σαρ νακχαντέ-λεν. Κα μπορίνενας τι λεν τουμέντζαρ κι μελέτη εκχέ πφραλές τουμαρέ κχανγκιριάταρ σο λέσκο παράδειγμας κα βοηθίνελ ι τζενές. Ή μπορίνενα τι αρακχέν εμπειρίες σο κα ντεν-λες ζορ κο ιστότοπος jw.org, κι ενότητα «Η Αγία Γραφή Αλλάζει Ζωές». * Ασακέ θέματα ντα βίντεα κα βοηθίνεν ι τζενές σο κερένα-λες μελέτη τι αγαβέλ ότι η Γραφή μπορίνελα τι βοηθίνελ-λες τι κερέλ πι ζωή πιο λατσσί.

9. Σαρ κα βοηθίνεν ι τζενές σο κερένα-λες μελέτη τι μουτθαβέλ οντουλά σο σικλιόλα πι τζενένγκε ντα πι αμαλένγκε;

⁹ Άμα ο τζενό σο κερένα-λες μελέτη ισί παντριμέ, κερέλα μελέτη λέσκι ρομνί-ντα; Άμα να κερέλα, βακερέν λάκε-ντα τι αβέλ κι μελέτη. Βακερέν ι τζενέσκε σο κερένα-λες μελέτη τι μουτθαβέλ οντουλά σο σικλιόλα πι τζενένγκε ντα πι αμαλένγκε. (Ιωάν. 1:​40-45) Σαρ κα κερέν-λες ανταβά; Μπορίνενα τι πουτσέν-λες: «Σαρ κα ντέας τι τζενέντε τι αγαβέν ανταβά πράγμας;» ή «Καβά εδάφιος κα βακερέας για τι σικαβές εκχέ αμαλέσκε ότι ανταβά ισί μπαγιά;» Αντικάς, σικλιαρένα ι τζενές για τι σικλιαρέλ βοβ-ντα. Σοράν, κάνα κα αβέλ μπίμπολντο ευαγγελιζόμενος, κα μπορίνελ τι κερέλ έργος ι  πφραλέντζαρ ντα ι πφενίντζαρ. Κα μπορίνενας ατζέ-ντα τι πουτσέν-λες άμα τζανέλα καεκχέ γιαβερέ τζενές σο κα μανγκέλας τι κερέλ μελέτη κατά Γραφή. Άμα τζανέλα, μπέκιμ μπορίνελα τι γκερέλ-τουμέν λέστε για τι σικαβέν λέσκε ο βίντεος Σαρ Αβέλα-πες η Μελέτη Κατά Αγία Γραφή; *

10. Σαρ κα κεράς οντουβά σο κερέλας ο Παύλος σαρ ντικχάσα κο εδάφια 1 Θεσσαλονικείς 2:7, 8;

¹⁰ Ο πφραλά πρέπει τι πφαμπόν ι τζενένγκε σο κερένα-λεν μελέτη. Ντικχέν-λεν σαρ τζενέ σο κα αβέν τουμαρέ πφραλά ντα πφενιά. (Διαβάνεν 1 Θεσσαλονικείς 2:7, 8) Νανέ λένγκε εύκολος τι μουκχέν πουμαρέ αμαλέν κατά ντουνιάς ντα τι κερέν σαρέ ο αλλαγές σο πρέπει τι κερέν για τι υπηρετίνεν ι Ιεχωβάς. Πρέπει τι βοηθίνας-λεν τι αρακχέν λατσσέ αμαλέν αντρέ κι κχανγκιρί. Τι αβέν αμαλά ι τζενέντζαρ σο κερένα-λεν μελέτη. Τι νακχέν σαάτι λέσαρ, όχι σάντε κι μελέτη, αλλά γιαβερά-ντα φαρ. Λεν-λες εκ τηλέφωνος, μπουτσσαβέν λέσκε εκ μήνυμας ή τζαν τι ντικχέν-λες για χάνικ εκ γιαβέρ φαρ αντρέ κι εβδομάδα για τι σικαβέν ότι πφαμπόνα λέσκε μπαγιά.

11. Σο μανγκάσα τι αρακχέν αντρέ κι κχανγκιρί ο τζενέ σο κεράσα-λεν μελέτη, ντα σόσκε;

¹¹ Κι Αφρική ο τζενέ βακερένα: «Σαρό ο γκαβ μπαριαρέλα ι χουρντές». Αμέν κα μπορίναας τι βακεράς: «Σαρί η κχανγκιρί βοηθίνελα εκχέ τζενές τι αβέλ μαθητής». Οντουλέσκε, μπουτ πφραλά σο σικλιαρένα λατσσές βοηθίνενα ι τζενέν σο κερένα-λεν μελέτη τι γνωρίνεν γιαβερέν-ντα αντρέ κι κχανγκιρί. Αντικάς, ο τζενέ σο κεράσα-λεν μελέτη κα αρακχέν λατσσέ αμαλέν κι Ντεβλέσκο λαός, ντα οντουλά πφραλά ντα πφενιά κα βοηθίνεν-λεν τι αβέν πιο λατσσέ αμαλά ι Ιεχωβάσαρ ντα κα ντεν-λεν ζορ κάνα τθερένα προβλήματα. Μανγκάσα κάθε τζενό σο κεράσα-λες μελέτη τι νιωθίνελ σουκάρ κι κχανγκιρί ντα ότι ο πφραλά ντα ο πφενιά ισί σαρ εκ φαμιλί σο μανγκέλα-λες μπουτ. Αζομάν κα αβέλ λέσκε πιο εύκολος τι τσσιναβέλ τι κερέλ μπουτ παρέα τζενέντζαρ σο να βοηθίνενα-λες τι μανγκέλ ι Ιεχωβάς. (Παρ. 13:​20) Άμα λέσκε πουρανέ αμαλά κα κερέν-λες πέρα, κα τζανέλ ότι κα αρακχέλ λατσσέ αμαλέν αντρέ κι Ιεχωβάσκι οργάνωση.​—Μάρκ. 10:​29, 30· 1 Πέτρ. 4:4.

12. Σόσκε πρέπει τι βακεράς ι τζενέσκε καζόμ σημαντικός ισί τι κερέλ αφιέρωση κο Ιεχωβά ντα τι μπολντιόλ;

¹² Τι βακερέν ι τζενέσκε καζόμ σημαντικός ισί τι κερέλ αφιέρωση κο Ιεχωβά ντα τι  μπολντιόλ. Κεράσα μελέτη εκχέ τζενές για τι βοηθίνας-λες τι ερεσέλ κο μπολντιπέ. Εκ τζενό σο κερέλα μελέτη χάνικ μάσεκ ντα αβέλα κο συναθροίσεις, πρέπει τι αγαβέλ ότι οντουβά σο μανγκάσα τι κεράς αντράλ κατά μελέτη ισί τι βοηθίνας-λες τι αβέλ εκ Μάρτυρας ι Ιεχωβάσκο.

13. Σο πρέπει τι κερέλ εκ τζενό για τι ερεσέλ κο μπολντιπέ;

¹³ Εκ τζενό σο μανγκέλα τι ερεσέλ κο μπολντιπέ, κερέλα μερικά πράγματα. Κι αρχή, σικλιόλα ι Ιεχωβάς, μανγκέλα-λες ντα πακιάλα Λέστε. (Ιωάν. 3:​16· 17:3) Σοράν, αβέλα αμάλ ι Ιεχωβάσαρ, ι πφραλέντζαρ ντα ι πφενίντζαρ κι κχανγκιρί. (Εβρ. 10:​24, 25· Ιακ. 4:8) Τελικά, νιωθίνελα μπέτι ι γκεραλέ πραγματένγκε σο κερντάς ντα τσσιναβέλα τι κερέλ-λεν. (Πράξ. 3:​19) Καζόμ κερέλα ανταλά πράγματα, λέσκι πίστη τσσίντελα-λες τι βακερέλ γιαβερένγκε οντουλά σο σικλιόλα. (2 Κορ. 4:​13) Σοράν, ντέλα πο λάφι κο Ιεχωβά τι τζουβντιόλ λέσκε ντα μπολντιόλα. (1 Πέτρ. 3:​21· 4:2) Καζόμ μπαρί χαρά τθεράσα σαρέ οντουβά ντιβές! Κάθε φαρ σο ο τζενό ερεσέλα πιο πασέ κο μπολντιπέ, τι ισαρέν-λες ντα τι ντεν-λες ζορ για μα τι τσσιναβέλ τι κερέλ ανταλά πράγματα.

14. Σαρ κα αγαβέλ εκ πφραλ σαρ τζάλα εκ τζενό πι μελετιάτε;

¹⁴ Πρέπει τι κεράς υπομονή καζόμ βοηθίνασα εκχέ τζενές τι ντελ πο λάφι κο Ιεχωβά ότι κα τζουβντιόλ λέσκε ντα τι μπολντιόλ. Όμως, πρέπει τι αγαβάς-ντα άμα μανγκέλα τι υπηρετίνελ ι Ιεχωβά Ντεβλές. Σικαβέλα ο τζενό ότι κερέλα ο πιο λατσσό για τι ντελ καν κο εντολές κι Ιησούσκε; Ή μανγκέλα σάντε τι σικλιόλ πράγματα κατά Γραφή;

15. Καλά πράγματα πρέπει τι ντικχέλ οντουβά σο σικλιαρέλα για τι αγαβέλ άμα ο τζενό τζάλα λατσσές πι μελετιάτε;

¹⁵ Τι μπεσέν ντα τι σκεφτίνεν σαρ τζάλα ο τζενό πι μελετιάτε. Για παράδειγμας, βακερέλα κο γιαβερά σαρ νιωθίνελα ι Ιεχωβάσκε; Κερέλα προσευχή κο Ιεχωβά; (Ψαλμ. 116:1, 2) Μπεϊντίνελα τι διαβάνελ ι Γραφή; (Ψαλμ. 119:​97) Αβέλα σαρέ κο συναθροίσεις; (Ψαλμ. 22:​22) Κερντάς ο αλλαγές σο πρέπει τι κερέλ πι ζωγιάτε; (Ψαλμ. 119:​112) Μουτθαβέλα οντουλά σο σικλιόλα πι τζενένγκε ντα πι αμαλένγκε; (Ψαλμ. 9:1) Ντα ο πιο σημαντικός, μανγκέλα τι αβέλ Μάρτυρας ι Ιεχωβάσκο; (Ψαλμ. 40:8) Άμα να κερέλα τίποτα ανταλένταρ, χωρίς τι ανέν-λες σε δύσκολη θέση, προσπαθίνεν τι σικλιόν  σόσκε ντα σοράν κερέν λέσαρ λάφι λατσσιμάσαρ αλλά ξεκάθαρα. *

16. Καλά πράγματα μπορεί τι σικαβένα ότι πρέπει τι τσσιναβέν εκ μελέτη;

¹⁶ Μπάζιμα, τι μπεσέν ντα τι σκεφτίνεν άμα πρέπει τι συνεχίνεν εκ μελέτη. Πουτσέν-τουμέν: “Μήπως ο τζενό να προετοιμάντιβελα πι μελετιάκε; Μήπως να μανγκέλα τι αβέλ κο συναθροίσεις; Τθερέλα ατζέκ ατζέκ μπέτι συνήθειες; Τζάλα ατζέκ ατζέκ κο κχανγκιριά κι ντουνιάσκε;” Άμα η απάντηση ισί βα ντα τουμέν συνεχίνενα τι κερέν-λες μελέτη, ισί σαρ τι προσπαθίνενα τι σικλιαρέν εκχέ τζενές τι κερέλ μπάνιος κι ντεριάβ, αλλά βοβ να μανγκέλα τι σουσλιόλ! Άμα ο τζενό να εκτιμίνελα μπαγιά οντουλά σο σικλιόλα ντα να μανγκέλα τι κερέλ αλλαγές, σόσκε τι συνεχίνεν τι κερέν-λες μελέτη;

17. Σο πρέπει τι κερέν σαρέ οντουλά σο σικλιαρένα σαρ βακερέλα ο εδάφιος 1 Τιμόθεο 4:16;

¹⁷ Ισί μπουτ σημαντική αμένγκε η εντολή τι κεράς μαθητέν, ντα μανγκάσα τι βοηθίνας ι τζενέν σο κεράσα-λεν μελέτη τι ερεσέν κο μπολντιπέ. Οντουλέσκε, μουκχάσα ι Γραφή τι σικλιαρέλ ντα σικαβάσα ότι μανγκάσα ντα πακιάσα ο πράγματα σο σικλιαράσα. Βοηθίνασα ι τζενές τι αρακχέλ αμαλέν αντρέ κι κχανγκιρί. Βακεράσα λέσκε καζόμ σημαντικός ισί τι κερέλ αφιέρωση κο Ιεχωβά ντα τι μπολντιόλ, ντα μπεσάσα τι σκεφτίνας σαρ τζάλα πι μελετιάτε. (Ντικχέν ο πλαίσιος « Σο Πρέπει τι Κερέν για τι Βοηθίνεν ι Τζενέν σο Κερένα-λεν Μελέτη τι Ερεσέν κο Μπολντιπέ» κι σελίδα 13) Ισινάμ μπουτ χαρούμενοι σο κεράσα ανταβά έργος σο σώνελα ζωές! Μανγκάσα τι κεράς σο νακχέλα αμαρέ βαστέσταρ για τι βοηθίνας ι τζενέν σο κεράσα-λεν μελέτη τι ερεσέν κο μπολντιπέ.