1. Σαρ νιωθίνασα οντουλένγκε σο μπολντιόνα σαρ βακερένα ο εδάφια 2 Κορινθίους 3:​1-3; (Ντικχέν ι φωτογραφία κι ανγκλαϊνί σελίδα)

ΣΑΡ νιωθίνενα κάνα ντικχένα εκχέ τζενές τουμαρέ κχανγκιριάταρ τι μπολντιόλ; Σίγουρα χαιρίνενα αντράλ τουμαρέ γκίσταρ. (Ματθ. 28:​19) Ντα άμα τουμέν κερντέν μελέτη ανταλέ τζενές, πφερντιόνα χαρά κάνα ντικχένα-λες τι μπολντιόλ! (1 Θεσ. 2:​19, 20) Ο νεβέ μαθητές ισί μπουτ σουκάρ «επιστολές σο ισαρένα», όχι σάντε οντουλέν σο κερένας-λεν μελέτη, αλλά σαρί ι κχανγκιρί-ντα.​—Διαβάνεν 2 Κορινθίους 3:​1-3.

2. (α) Καγιά σημαντική ερώτηση πρέπει τι σκεφτίνας, ντα σόσκε; (β) Σο μανγκέλα τι βακερέλ μελέτη κατά Γραφή; (Ντικχέν ι υποσημείωση)

² Ισί μπουτ σουκάρ ότι, ο τελευταία σταρ μπρεσά κερντιόνας σαρό κο ντουνιάς περίπου 10.000.000 μελέτες * κάθε μάσεκ. Ανταλά σταρ μπρεσά, πιο μπουτ από 280.000 τζενέ μπολντιόνας κάθε μπρες. Σαρ μπορίνασα τι βοηθίνας πιο μπουτ ανταλέ εκατομμύριε τζενένταρ σο κερένα μελέτη τι μπολντιόν; Καζόμ ο Ιεχωβά ντέλα κο τζενέ ατζέκ ι ευκαιρία τι αβέν λέσκε Μάρτυρες, πρέπει τι κεράς σο νακχέλα αμαρέ βαστέσταρ για τι βοηθίνας-λεν τι ερεσέν κο μπολντιπέ καζόμ πιο σουγκό αβέλα-πες. Ο σαάτι σο ατσσιλό νανέ μπουτ!​—1 Κορ. 7:​29α· 1 Πέτρ. 4:7.

3. Σο κα ντικχάς ανταλέ μαθημάστε;

³ Επειδή ισί μπουτ σημαντικός τι κεράς μαθητέν ακανά, ο  Κυβερνών Σώμας πουτσλάς μερικά γραφεία τμήματος για τι ντικχέλ σαρ κα βοηθίνας πιο μπουτέ τζενέν τι ερεσέν κο μπολντιπέ. Ανταλέ μαθημάστε ντα κο γιαβέρ, κα σικλιάς μερικά πράγματα πφραλένταρ σο ισί μπουτ μπρεσά σκαπανείς, ιεραπόστολοι ντα επίσκοποι περιοχής. * (Παρ. 11:​14· 15:​22) Βον βακερένα σο τι κερέν ο πφραλά σο σικλιαρένα αλλά εμ ο τζενέ σο σικλιόνα για τι τζαλ πιο λατσσές η μελέτη. Ανταλέ μαθημάστε, κα ντικχάς παντς πράγματα σο πρέπει τι κερέλ εκ τζενό σο κερέλα μελέτη για τι ερεσέλ κο μπολντιπέ.

4. Σο πρέπει τι τθεράς αμαρέ γκοντιάτε άμα κεράσα εκ μελέτη κι πόρτα;

⁴ Μπουτ αμαρέ πφραλένταρ ντα πφενίνταρ κερένα μελέτες κι πόρτα κι τζενέσκι. Παρόλο σο ανταβά ισί μπουτ λατσσό για τι αρχίνελ ο τζενό τι μανγκέλ τι σικλιόλ ι Γραφιάκε, ανταλά συζητήσεις μπουτ φαρ ισί μπουτ χουρντέ ντα μπορεί μα τι αβένα κάθε εβδομάδα. Για τι κερέν-λες τι μανγκέλ τι σικλιόλ πιο μπουτ πράγματα, μερικά πφραλά ντα πφενιά ντένα πουμαρέ στοιχεία επικοινωνίας κο τζενό σο μανγκέλα τι σικλιόλ ντα, μέχρι τι τζαν πάλι, βακερένα λέσκε εκ λάφι αντράλ κατά Γραφή. Ντα μπορεί τι κερένα ασακέ συζητήσεις ι τζενέντζαρ μπουτ μάσεκ. Αλλά κα ερεσέλ ο τζενό σο κερέλα μελέτη τι ντελ πο λάφι τι τζουβντιόλ ι Ντεβλέσκε ντα τι μπολντιόλ άμα να κα ντελ πιο μπουτ πι σαατίσταρ για τι σικλιόλ κατά Λάφι ι Ντεβλέσκο; Μάλλον όχι.

5. Σο κα βοηθίνελ-αμέν κο έργος για τι κεράς μαθητέν σαρ βακερντάς ο Ιησούς κο εδάφια Λουκάς 14:​27-33;

⁵ Ο Ιησούς σικαντάς σο πρέπει τι κερέλ εκ τζενό άμα μανγκέλα τι αβέλ λέσκο μαθητής. Κερντάς λάφι εκχέ τζενέσκε σο μανγκέλα τι κερέλ εκ μπαρό κχερ ντα εκχέ βασιλιάσκε σο μανγκέλα τι κερέλ τζένγκι. Ο Ιησούς βακερντάς ότι ο τζενό σο μανγκέλα τι κερέλ ο μπαρό κχερ πρέπει “τι μπεσέλ πρώτα τι σκεφτίνελ καζόμ κα χαλαβέλ” για τι τελειώνελ-λες ντα ότι ο βασιλιάς πρέπει “τι μπεσέλ πρώτα τι κερέλ λάφι γιαβερέ-ντα τζενέντζαρ” για τι ντικχέλ άμα λέσκο στρατός κα ντελ-λεν πέρα. (Διαβάνεν Λουκάς 14:​27-33) Αντικάς, ο Ιησούς τζανέλας ότι εκ τζενό σο μανγκέλα τι αβέλ λέσκο μαθητής πρέπει τι σκεφτίνελ μπουτ λατσσές σο μανγκέλα τι βακερέλ ανταβά. Οτθάρ, πρέπει τι βακεράς οντουλένγκε σο μανγκένα τι αβέν μαθητές τι κερέν μελέτη αμέντζαρ κάθε εβδομάδα. Σαρ μπορίνασα τι κεράς-λες ανταβά;

6. Σο μπορίνασα τι κεράς για τι βοηθίνας ι τζενέν τι σικλιόν πιο σουγκό;

⁶ Κι αρχή, κερέν πιο μπουτ σαάτι ι μελέτη  σο κερένα ανγκλάλ κι πόρτα. Κα μπορίνενας τι συζητίνεν όχι σάντε εκ εδάφιος αλλά ντούι ντανέ κάθε φαρ σο τζάνα. Κάνα ο τζενό κα σικλιόλ τι πουτρέλ αμέντζαρ πιο μπαρέ συζητήσεις, πουτσέν-λες άμα μπορίνενα τι μπεσέν καέκ τθανέστε για τι συνεχίνεν τουμαρό λάφι. Λέσκι απάντηση κα σικαβέλ σαρ ντικχέλα πι μελέτη. Σοράν, για τι βοηθίνεν-λες τι σικλιόλ πιο σουγκό, πουτσέν-λες άμα μανγκέλα τι κερέλ μελέτη ντούι φαρ κι εβδομάδα. Όμως, να ερεσέλα σάντε τι κερέλ μελέτη εκ ή ντούι φαρ κι εβδομάδα.

7. Σαρ μπορίνελα οντουβά σο σικλιαρέλα τι προετοιμάνελ-πες λατσσές ι κάθε μελετιάκε;

⁷ Τουμέν, σο σικλιαρένα, πρέπει τι προετοιμάνεν-τουμέν λατσσές ι κάθε μελετιάκε. Κι αρχή, διαβάνεν οντουβά σο κα ντικχέν κι μελέτη ντα ο εδάφια. Αρακχέν ο πιο σημαντικά σημεία. Σκεφτίνεν ο τίτλος ι μαθημάσκο, ο υπότιτλοι, ο ερωτήσεις, ο εδάφια σο βακερένα «διαβάνεν», ο φωτογραφίες ντα ο βίντεα σο εξηγίνενα ο θέμας. Σοράν, αφού κα τθερέν τουμαρέ γκοντιάτε ι τζενές, σκεφτίνεν πιο τζανγκλέ σαρ κα βακερέν απλέ ντα ξεκάθαρε τροπόσαρ οντουλά σο κα ντικχέν κι μελέτη για τι μπορίνελ ο τζενό τι αγαβέλ-λεν ντα τι κερέλ-λεν πι ζωγιάτε.​—Νεεμ. 8:8· Παρ. 15:​28α.

8. Καζόμ σημαντικός ισί τι προσευχίντιβας ι τζενένγκε σο κεράσα-λεν μελέτη σαρ βακερέλα ο απόστολος Παύλος κο εδάφια Κολοσσαείς 1:9, 10;

⁸ Καζόμ προετοιμάνενα-τουμέν, τι κερέν προσευχή κο Ιεχωβά ι τζενέσκε ντα για το ανάγκες σο τθερέλα. Τι μανγκέν ι Ιεχωβάσκι βοήθεια για τι ερεσέν κι τζενέσκο γκι κάνα σικλιαρένα-λες κατά Γραφή. (Διαβάνεν Κολοσσαείς 1:9, 10) Προσπαθίνεν τι ντικχέν άμα ισί κάτι σο μπορεί τι δυσκολίνελ ι τζενές τι αγαβέλ ή τι πακιάλ. Τι ντεν-τουμέν γκοντί ότι οντουβά σο μανγκένα ισί τι βοηθίνεν ι τζενές τι ερεσέλ κο μπολντιπέ.

9. Σαρ μπορίνελα οντουβά σο σικλιαρέλα τι βοηθίνελ ι τζενές σο κερέλα-λες μελέτη τι προετοιμάνελ-πες πι μελετιάκε; Εξηγίνεν.

⁹ Πακιάσα ότι αντράλ κατά μελέτη ο τζενό κα εκτιμίνελ οντουλά σο κερντάς ο Ιεχωβά ντα ο Ιησούς ντα κα μανγκέλ τι σικλιόλ πιο μπουτ. (Ματθ. 5:3, 6) Για τι βοηθίντιβελ καζόμ πιο μπουτ αβέλα-πες, ο τζενό σο κερέλα μελέτη πρέπει τι τθερέλ πι γκοντί οντουλέντε σο σικλιόλα. Για τι κερέλ-λες ανταβά, βοηθίνεν-λες τι αγαβέλ καζόμ σημαντικός ισί τι προετοιμάντιβελ ι κάθε μελετιάκε. Για τι προετοιμάντιβελ, ο τζενό σο κεράσα-λες μελέτη πρέπει τι διαβάνελ πιο  τζανγκλέ ο μάθημας ντα τι σκεφτίνελ σαρ τι κερέλ πι ζωγιάτε οντουλά σο σικλιόλα. Σαρ μπορίνελα τι βοηθίνελ οντουβά σο σικλιαρέλα-λες; Προετοιμάνεν-τουμέν λέσαρ εκ φαρ ι μελετιάκε για τι ντικχέλ σαρ αβέλα-πες ανταβά. * Σικαβέν λέσκε σαρ τι αρακχέλ ι απάντηση κι ερώτηση ντα σαρ τι σημειώνελ χάνικ λάφια για τι ντελ-πες γκοντί ι απάντηση. Σοράν μανγκέν λέσταρ τι ντελ απάντηση πιρέ λαφίντζαρ. Αζομάν κα μπορίνεν τι αγαβέν καζόμ λατσσές αγαντάς οντουλά σο διαβαντάς. Μπορίνενα όμως τι βακερέν λέσκε τι κερέλ κάτι γιαβέρ-ντα.

10. Σόσκε ισί σημαντικός ο τζενό σο κερέλα μελέτη τι διαβάνελ ι Γραφή κάθε ντιβές, ντα σαρ κα βοηθίντιβελ καζόμ πιο μπουτ αβέλα-πες ανταλέσταρ;

¹⁰ Εκτός κατά μελέτη σο κερέλα κάθε εβδομάδα, ο τζενό σο κερέλα μελέτη κα βοηθίντιβελ άμα κα κερέλ κάποια πράγματα κάθε ντιβές κορκορό. Καλά πράγματα; Πρέπει τι ασουνέλ ι Ιεχωβάς ντα τι κερέλ λέσαρ λάφι. Κα ασουνέλ ι Ντεβλές άμα διαβάνελα ι Γραφή κάθε ντιβές. (Ιησ. Ναυή 1:8· Ψαλμ. 1:​1-3) Σικαβέν λέσκε σαρ τι χρησιμοποιήνελ ο «Πρόγραμμα Ανάγνωσης της Γραφής» σο μπορίνελα τι αρακχέλ κο ιστότοπος jw.org ντα τι εκτυπώνελ-λες. * Για τι βοηθίντιβελ καζόμ πιο μπουτ αβέλα-πες κατά διάβασμας ι Γραφιάκο, βακερέν λέσκε τι σκεφτίνελ λατσσές σο σικλιαρέλα-λες η Γραφή ι Ιεχωβάσκε ντα σαρ τι κερέλ πι ζωγιάτε οντουλά σο σικλιόλα.​—Πράξ. 17:​11· Ιακ. 1:25.

11. Σαρ κα σικλιόλ ο τζενό σο κερέλα μελέτη τι προσευχίντιβελ σωστά, ντα σόσκε ισί σημαντικός τι προσευχίντιβελ κο Ιεχωβά μπουτ φαρ;

¹¹ Τι βακερέν κο τζενό σο κερένα-λες μελέτη τι κερέλ λάφι κο Ιεχωβά αντράλ κατά προσευχή κάθε ντιβές. Τι κερέν προσευχή αντράλ τουμαρέ γκίσταρ πριν ντα σοράν κατά μελέτη λέσαρ ντα λέσκε. Καζόμ ασουνέλα τουμαρέ προσευχές, κα σικλιόλ τι πουτρέλ πο γκι κο Ιεχωβά Ντεβέλ ντα τι μπουτσσαβέλ ανταλά προσευχές αντράλ κατά Ιησούς Χριστός. (Ματθ. 6:9· Ιωάν. 15:​16) Άμα ο τζενό σο κερένα-λες μελέτη διαβάνελα ι Γραφή κάθε ντιβές (ασουνέλα ι Ιεχωβάς) ντα προσευχίντιβελα (κερέλα λάφι κο Ιεχωβά), σκεφτίνεν καζόμ κα βοηθίντιβελ τι τζαλ πασέ λέστε! (Ιακ. 4:8) Άμα κα κερέλ-λεν σαρέ ανταλά κάθε ντιβές, κα βοηθίντιβελ τι ερεσέλ κι αφιέρωση ντα κο μπολντιπέ.

12. Σαρ μπορίνελα οντουβά σο σικλιαρέλα τι βοηθίνελ ι τζενές σο κερέλα-λες μελέτη τι αβέλ λατσσό αμάλ ι Ιεχωβάσαρ;

¹² Ο πράγματα σο σικλιόλα ο τζενό σο κεράσα-λες μελέτη πρέπει τι ερεσέν, όχι σάντε λέσκε γκοντιάτε, αλλά λέσκε γκίστε-ντα. Ο Ιησούς σικλιαρέλας ι τζενέν μπουτ πράγματα ντα βον μπεϊντίνενας τι σικλιόν λέσταρ. Αλλά ο τζενέ τζάνας παλά-λέστε επειδή οντουλά σο βακερέλας ερεσένας λένγκε γκιέντε. (Λουκ. 24:​15, 27, 32) Ο τζενό σο κερένα-λες μελέτη πρέπει τι αγαβέλ ότι ο Ιεχωβά ισί πραγματικός, ντα ότι μπορίνελα τι ντικχέλ-λες σαρ Ντατ, Ντεβέλ ντα Αμάλ. (Ψαλμ. 25:4, 5) Καζόμ κερένα ι μελέτη, τι ανέν κι τζενέσκι γκοντί σο Ντεβέλ ισί ο Ιεχωβά. (Έξοδ. 34:5, 6· 1 Πέτρ. 5:6, 7) Κερέν-λες ανταβά κάθε φαρ σο κερένα μελέτη. Βοηθίνεν ι τζενές σο κερένα-λες μελέτη τι ντικχέλ καζόμ μανγκέλα-αμέν ο Ιεχωβά, καζόμ λατσσό ισί ντα καζόμ τζιτζίνελα αμένγκε. Ο Ιησούς βακερντάς ότι «η πιο μπαρί ντα πρώτη εντολή» ισί «τι μανγκές ι Ιεχωβάς τι Ντεβλές». (Ματθ. 22:​37, 38) Προσπαθίνεν τι βοηθίνεν ι τζενές σο κερένα-λες μελέτη τι μανγκέλ ι Ιεχωβάς.

13. Σικαβέν εκχέ παραδειγμάσαρ σαρ μπορίνενα τι βοηθίνεν ι τζενές σο κερένα-λες μελέτη τι σικλιόλ σο Ντεβέλ ισί ο Ιεχωβά.

¹³ Κάνα κερένα λάφι ι τζενέσαρ, τι σικαβέν λέσκε καζόμ μπουτ μανγκένα ι Ιεχωβάς. Ανταβά μπορεί τι βοηθίνελ-λες τι αγαβέλ ότι πρέπει τι αβέλ βοβ-ντα αμάλ ι Ντεβλέσαρ ντα τι σικλιόλ τι μανγκέλ-λες. (Ψαλμ. 73:​28) Για παράδειγμας, μήπως αρακχλέν καέκ λάφι κο έντυπος σο κερένα ι τζενέσαρ μελέτη ή εκχέ εδαφιόστε σο σικαβέλα ι Ιεχωβάσκι αγάπη, σοφία, δικαιοσύνη ή ζορ ντα πφερέλα τουμαρό γκι; Βακερέν-λες κο τζενό, ντα ντεν-λες τι αγαβέλ ότι ανταβά ισί εκ κατά μπουτ λόγους σο μανγκένα αμαρέ Νταντές, ι Ιεχωβάς. Ισί κάτι γιαβέρ-ντα σο πρέπει τι κερέλ κάθε τζενό σο κερέλα μελέτη για τι ερεσέλ κο μπολντιπέ.

14. Σο βακερένα αμένγκε ο εδάφια Εβραίους 10:​24, 25 ι συναθροισιένγκε;

¹⁴ Σαρέ μανγκάσα τι ερεσέν κο μπολντιπέ ο τζενέ σο κεράσα-λεν μελέτη. Εκ σημαντικός τρόπος για τι βοηθίνας-λεν ισί τι βακεράς λένγκε τι αβέν κο συναθροίσεις. Ο πφραλά σο κερένα μελέτες μπουτ μπρεσά βακερένα ότι ο τζενέ σο τζάνα κο συναθροίσεις ερεσένα κο μπολντιπέ πιο σουγκό. (Ψαλμ. 111:1) Μερικά πφραλά βακερένα ι τζενένγκε σο κερένα-λεν μελέτη ότι ο επκάς σικλιαριπέ κα λεν-λες κατά μελέτη ντα ο γιαβέρ επκάς κατά συναθροίσεις. Ντικχέν ι τζενέσαρ ο εδάφια Εβραίους 10:​24, 25  (διαβάνεν) ντα ντεν-λες τι αγαβέλ σαρ κα βοηθίντιβελ άμα κα αβέλ κο συναθροίσεις. Τσσουβέν τι ντικχέλ ο βίντεος Σο Αβέλα-πες κο Αίθουσες Βασιλείας; * Βοηθίνεν-λες τι μανγκέλ τι αβέλ σαρέ κο συναθροίσεις.

15. Σαρ κα βοηθίνας εκχέ τζενές σο κερέλα μελέτη μα τι χασαρέλ ο συναθροίσεις;

¹⁵ Σο μπορίνενα τι κερέν άμα ο τζενό σο κερένα-λες μελέτη να αβιλό ούτε εκ φαρ κι συνάθροιση ή αβέλα σάντε χάνικ φαρ; Βακερέν λέσκε καζόμ μπεϊντιντέν εκ σουκάρ πράγμας σο σικλιλέν ακανά σουγκό κι συνάθροιση. Ανταβά μπορεί τι τσσίντελ-λες πιο μπουτ τι μανγκέλ τι αβέλ. Ντεν-λες ι Σκοπιά ή ο Πρόγραμμας για τη Συνάθροιση Ι Χριστιανόνγκι Ζωή ντα ο Έργος σο κερένα ακανά κι συνάθροιση. Σικαβέν λέσκε σο κα ντικχέν κι γιαβέρ συνάθροιση ντα πουτσέν-λες καβά μέρος μπεϊντίνελα πιο μπουτ. Οντουλά σο κα ασουνέλ ντα κα ντικχέλ ο τζενό κι πρώτη συνάθροιση κα αβέν μπουτ πιο λατσσέ οντουλένταρ σο ντικχλάς ντα ασουντάς κο γιαβερά θρησκείες. (1 Κορ. 14:​24, 25) Κα ντικχέλ γιαβερέν-ντα σο μπορίνελα τι σικλιόλ λένγκε λατσσέ παραδειγμάσταρ ντα κα βοηθίνεν-λες τι ερεσέλ κο μπολντιπέ.

16. Σαρ κα βοηθίνας ι τζενές σο κεράσα-λες μελέτη τι ερεσέλ κο μπολντιπέ, ντα σο κα σικλιάς κο γιαβέρ μάθημας;

¹⁶ Σαρ κα βοηθίνας ι τζενές τι ερεσέλ κο μπολντιπέ; Για τι βοηθίνας-λες τι ντικχέλ καζόμ σημαντική ισί η μελέτη, μπορίνασα τι βακεράς λέσκε τι κερέλ μελέτη κάθε εβδομάδα ντα τι προετοιμάντιβελ κάθε φαρ πι μελετιάκε. Πρέπει επίσης τι βακεράς λέσκε τι ασουνέλ ι Ιεχωβάς ντα τι κερέλ λέσαρ λάφι κάθε ντιβές ντα τι αβέλ αμάλ Λέσαρ. Πρέπει τι βοηθίνας-λες τι αβέλ κο συναθροίσεις. (Ντικχέν ο πλαίσιος « Σο Πρέπει τι Κερέν ο Τζενέ σο Κερένα Μελέτη για τι Ερεσέν κο Μπολντιπέ» κι σελίδα 12) Όμως, σαρ κα ντικχάς κο γιαβέρ μάθημας, ισί ατζέ παντς πράγματα σο μπορίνενα τι κερέν οντουλά σο κερένα μελέτη ι γιαβερέν για τι βοηθίνεν-λεν τι ερεσέν κο μπολντιπέ.