1, 2. Σο ισινέ οντουβά σο να κερντέ ίδιος ο Αχαάβ ντα ο Μανασσής, ντα καλά ερωτήσεις κα ντικχάς;

ΚΑ ΚΕΡΑΣ λάφι ντουέ βασιλιαδένγκε σο τζουβντιλέ κο πουρανέ μπρεσά. Ο εκ κερντάς κουμάντος ο ντες φάρες κο Ισραήλ ντα ο γιαβέρ ο ντούι φάρες κο Ιούδας. Παρόλο σο ο εκ να τζουβντιόλας αζομάν σο τζουβντιόλας ο γιαβέρ, κερντέ μπουτ πράγματα σο ισινέ ίδια. Ο ντούι-ντα βασιλιάδες γκιλέ κόντρα κο Ιεχωβά ντα κερντέ λέσκε λαός τι αμαρτίνελ. Ο ντούι-ντα ντινέ λατρεία ψεύτικε ντεβλέντε ντα μουνταρντέ. Όμως, κερντέ κάτι σο να ισινέ ίδιος. Ο εκ τανό συνεχίνελας τι κερέλ μπέτι πράγματα μέχρι σο μουλό, αλλά ο γιαβέρ μετανιωσάλο ντα συγχωρισάλο ι μπουτ μπέτι πραγματένγκε σο κερντάας. Κον ισινέ ανταλά βασιλιάδες;

² Ισινέ ο Αχαάβ, βασιλιάς κο Ισραήλ, ντα ο Μανασσής, βασιλιάς κο Ιούδας. Κατά πράγματα σο να κερένας ίδια σικλιάσα πο μπουτ για τη μετάνοια. (Πράξ. 17:​30· Ρωμ. 3:​23) Σο μανγκέλα τι βακερέλ τι μετανιώνας, ντα σαρ σικαβάσα ότι μετανιωσάλαμ; Χρειαζίντιβελα τι τζανάς-λεν ανταλά σόσκε μανγκάσα τι συγχωρίνελ-αμέν ο Ιεχωβά κάνα αμαρτίνασα. Για τι αρακχάς ο απαντήσεις, κα ντικχάς σο κερντέ ανταλά ντούι βασιλιάδες πουμαρέ ζωγιάτε ντα κα ντικχάς σο σικλιάσα λένταρ. Σοράν, κα ντικχάς σο σικλιαρντάς ο Ιησούς ανταλέσκε.

3. Σο βασιλιάς ισινέ ο Αχαάβ;

³ Ο Αχαάβ ισινέ ο έβδομος βασιλιάς σο κερντάς κουμάντος ο ντες φάρες κο Ισραήλ. Παντρισάλο εκχέ τζουβλιάσαρ σο βακερένας λάκε Ιεζάβελ. Λάκο ντατ ισινέ βασιλιάς κι Σιδώνα, εκ χουλανό τθεμ βόρεια. Κάνα λιντάς ανταλέ ρομνιά, ο Αχαάβ μπέκιμ τι αντάς χουλανιπέ κο Ισραήλ. Αλλά κερντάς πο μπαρό ζιάνι-ντα κι φιλία σο τθερένας ο Ισραηλίτες ι Ιεχωβάσαρ. Η Ιεζάβελ ντέλας λατρεία κο Βάαλ ντα βακερντάς κο Αχαάβ τι κερέλ ι Ισραηλιτέν τι ντεν λατρεία ανταλέ μπέτι θρησκειάτε, σο αντρέ οντουλέντε σο κερένας για τι ντεν λατρεία ισινέ τι κερέν λουμνιπέ ντα τι θυσιάνεν πουμαρέ τσσαβέν. Καέκ προφήτης ι Ιεχωβάσκο να ισινέ αρακχαντό καζόμ κερέλας κουμάντος η Ιεζάβελ.  Βόι μουνταρντάς μπουτέν λένταρ. (1 Βασ. 18:​13) Ο Αχαάβ «ισινέ ο πο γκεραλό τζενό κο γιακχά κι Ιεχωβάσκε σαρέ κατά τζενέ σο τζουβντιλέ πο τζανγκλέ λέσταρ». (1 Βασ. 16:​30) Ο Ιεχωβά να πφάντελας πο γιακχά κο πράγματα σο κερέλας ο Αχαάβ ντα η Ιεζάβελ. Τζανέλας μπουτ λατσσές σαρέ οντουλά σο κερένας. Αλλά ο Ιεχωβά τζιτζισάλο λένγκε ντα μπουτσσαντάς ι Ηλιάς τι βοηθίνελ ι λαός τι αλλάνελ ντα τι υπηρετίνελ-λες καζόμ τθερένας ατζέ βακίτι. Αλλά ο Αχαάβ ντα η Ιεζάβελ να μανγκένας τι ασουνέν.

4. Καγιά τιμωρία βακερντάς ο Ιεχωβά κο Αχαάβ ότι κα τθερέλας, ντα σο κερντάς ο Αχαάβ;

⁴ Τελικά, αβιλό ο βακίτι σο ο Ιεχωβά αποφασιντάς τι κερέλ κάτι. Μπουτσσαντάς ι Ηλιάς τι βακερέλ κο Αχαάβ ντα κι Ιεζάβελ ι τιμωρία σο κα λένας. Σαρί λένγκι φαμιλί κα μερέλας. Κάνα ασουντάς ο Αχαάβ ο λάφια ι Ηλιάσκε, πφανγκιλό λέσκο γκι! Οντουβά μπαρικανό τζενό «ταπεινωντάς πο νεαυτός», κάτι σο καέκ να μπεκλεντίνελας τι κερέλ.​—1 Βασ. 21:​19-29.

5, 6. Σαρ τζανάσα ότι ο Αχαάβ να μετανιωσάλοας μπαγιά;

⁵ Παρόλο σο Αχαάβ ταπεινωντάς πο νεαυτός αζομάν, οντουλά σο κερντάς σοράν ανταλέσταρ σικαντέ ότι να μετανιωσάλοας μπαγιά. Να κερντάς ο πο λατσσό για τι τσσιναβέλ ι λαός τι ντελ λατρεία κο Βάαλ. Ντα να βακερέλας κο γιαβερά τι ντεν λατρεία κο Ιεχωβά. Γιαβερά-ντα πράγματα σο κερντάας ο Αχαάβ σικαβένας ότι να μετανιωσάλοας.

⁶ Σοράν, ο Αχαάβ βακερντάς κο Ιωσαφάτ σο ισινέ βασιλιάς κο Ιούδας τι τζαν γιεκ τι κερέν τζένγκι ι Συριόντζαρ. Ο Ιωσαφάτ ισινέ εκ λατσσό βασιλιάς σο ντέλας μπέσα κο Ιεχωβά, ντα βακερντάς λέσκε τι πουτσέν εκχέ προφητής ι Ιεχωβάσκο πριν τι τζαν κο τζένγκι. Κι αρχή, ο Αχαάβ να μανγκλάς τι κερέν-λες ανταβά. Βακερντάς: «Ισί ατζέκ εκ τανό σο αντράλ λέσταρ μπορίνασα τι πουτσάς ι Ιεχωβάς· αλλά με μισίναβα-λες, σόσκε ποτές να βακερέλα ότι κα αβέν-πες λατσσέ πράγματα μάνγκε, σάντε μπέτι». Αλλά τελικά πουτσλέ εκχέ προφητής σο βακερένας λέσκε Μιχαΐα. Ο Αχαάβ τθερέλας δίκιος. Ο προφήτης ι Ντεβλέσκο βακερντάς μπέτι αμπέρια κο Αχαάβ! Αντίς τι μετανιώνελ ντα τι μανγκέλ τι συγχωρίνελ-λες ο Ιεχωβά, ο πφιρνό Αχαάβ τσσουντάς ι προφητής κι φυλακή. (1 Βασ. 22:​7-9, 23, 27) Παρόλο σο ο Αχαάβ τσσουντάς κι φυλακή ι Ιεχωβάσκε προφητής, να μπορίνελας τι κερέλ τίποτα για μα τι αβέν-πες οντουλά σο βακερντάας ότι κα αβένας-πες λέσκε. Κο τζένγκι σο γκιλό, ο Αχαάβ μουλό.​—1 Βασ. 22:​34-38.

7. Κάνα μουλό ο Αχαάβ, σο τζενό βακερντάς ο Ιεχωβά ότι ισινέας;

⁷ Αφού ο μουλό ο Αχαάβ, ο Ιεχωβά μουτθαντάς σαρ ντικχέλας οντουλέ τζενές. Κάνα ο λατσσό βασιλιάς Ιωσαφάτ βουρτισάλο παλάλ αρακχαντό, ο Ιεχωβά μπουτσσαντάς ι προφητής Ιηού για τι βακερέλ λέσκε ότι ισινέ λάθος σο βοηθιντάς ι Αχααβίς. Ο προφήτης ι Ιεχωβάσκο βακερντάς: «Ισί σωστός τι βοηθίνες ι πφιρνέν ντα τι μανγκές οντουλέν σο μισίνενα ι Ιεχωβάς;» (2 Χρον. 19:1, 2) Ακανά ανέν τουμαρέ γκοντιάτε ακαβά: Άμα ο Αχαάβ μετανιωσάλοας μπαγιά, σίγουρα ο προφήτης να κα βακερέλας ότι ισινέ πφιρνό τζενό σο μισίνελας ι Ιεχωβάς. Αγαντίντιβελα ότι, παρόλο σο ο Αχαάβ σικαντάας ότι μετανιωσάλοας χάνικ, ποτές να μετανιωσάλοας σαρέ πι γκίσαρ.

8. Σο σικλιάσα κατά Αχαάβ;

⁸ Σο σικλιάσα κατά Αχαάβ; Κάνα ο Ηλίας βακερντάς κο Αχαάβ ότι λέσκι φαμιλί κα τιμωρίντιβελας, ο Αχαάβ ταπεινωντάς πο νεαυτός. Ανταβά σο κερντάς ισινέ λατσσό. Αλλά οντουλά σο κερντάς πο σοράν σικαντέ ότι να μετανιωσάλοας αντρέ πι γκίστε. Άρα, κάνα μετανιώνελα εκ τζενό, να ερεσέλα σάντε τι βακερέλ ότι πφανγκιλό λέσκο γκι οντουλέσκε σο κερντάς. Ακανά κα ντικχάς σο μανγκέλα τι βακερέλ τι μετανιώνας μπαγιά οντουλένταρ σο κερντάς ο Μανασσής.

9. Σο βασιλιάς ισινέ ο Μανασσής;

⁹ Περίπου 200 μπρεσά πο σοράν, ο Μανασσής αβιλό βασιλιάς κο Ιούδας. Λέσκε  αμαρτίες μπέκιμ τι ισινέ μπουτ πο μπαρέ οντουλένταρ σο κερντάς ο Αχαάβ! Η Γραφή βακερέλα: «Κερντάς μπαρό γκεραλιπέ κι Ιεχωβάσκε γιακχά για τι ανέλ λατζ λέσκε ναβέστε». (2 Χρον. 33:​1-9) Ο Μανασσής κερντάς θυσιαστήρια ψεύτικε ντεβλένγκε, ντα τσσουντάς ατζέ-ντα εκ ιερή κολόνα αντρέ κο ναός κι Ιεχωβάσκο. Ανταγιά ιερή κολόνα μανγκέλας τι σικαβέλ ότι ο σεξ ισινέ λένγκο ντεβέλ! Ο Μανασσής ντορικιαρέλας, κερέλας μάγια ντα γιαβερά ασακέ μπενγκαλέ πράγματα. Επίσης, «τσσορντάς μπουτέ αθώε τζενένγκο ρατ». Μουνταρντάς μπουτέ τζενέν, ατζέ-ντα «πφαμπαρντάς πι τσσαβέν κι γιακ για τι κερέλ θυσία» ψεύτικε ντεβλένγκε.​—2 Βασ. 21:6, 7, 10, 11, 16.

10. Σαρ διορθωντάς ο Ιεχωβά ι Μανασσής, ντα σο κερντάς ο Μανασσής;

¹⁰ Σαρ ο Αχαάβ, αντικάς ο Μανασσής-ντα να ασουνέλας οντουλά σο βακερέλας λέσκε ο Ιεχωβά αντράλ πι προφητένταρ. Τελικά, «ο Ιεχωβά κερντάς τι τζαν [ι Ιουδαιόντζαρ] κόντρα ο αρχηγοί ι στρατόνγκε σο τθερέλας ο βασιλιάς ι Ασσυριάκο, ντα βον ασταρντέ ι Μανασσής με γάντζα ντα πφαντέ-λες ντουέ χάλκινε τζαντζιρίντζαρ ντα λιντέ-λες κι Βαβυλώνα». Κάνα ισινέ φυλακισμέ κι Βαβυλώνα, ντικχίντιβελα ότι ο Μανασσής σκεφτιντάς μπουτ λατσσές οντουλά σο κερντάας. «Ταπεινωντάς μπουτ πο νεαυτός ανγκλάλ κο Ντεβέλ πι παππουδένγκο». Αλλά να ατσσιλό σάντε οτθέ. «Μολίνελας ι Ιεχωβάς πι Ντεβλές τι σικαβέλ λέσκε λατσσιπέ». Ο Μανασσής «να τσσιναβέλας τι προσευχίντιβελ Λέστε». Ανταβά πφιρνό τζενό αλλάνελας. Αρχισάλο τι ντικχέλ ι Ιεχωβάς σαρ τι αβέλας “λέσκο Ντεβέλ” ντα να τσσιναβέλας τι κερέλ προσευχή λέστε.​—2 Χρον. 33:​10-13.

11. Σαρ σικαντάς ο Μανασσής ότι μετανιωσάλοας μπαγιά σαρ βακερένα ο εδάφια 2 Χρονικών 33:​15, 16;

¹¹ Ο Ιεχωβά απαντιντάς κο προσευχές σο κερέλας ο Μανασσής. Ντικχλάς ο αλλαγές κο γκι οντουλέ τζενέσκο, σο ντικχίντιβενας αντράλ κατά προσευχές σο κερέλας. Οτθάρ, ο Ιεχωβά ασουντάς ι Μανασσής κάνα μανγκλάς λέσταρ τι συγχωρίνελ-λες ντα τι μουκχέλ-λες τι αβέλ πάλι βασιλιάς. Ο Μανασσής κερντάς ο πο λατσσό για τι σικαβέλ ότι μετανιωσάλοας μπαγιά. Κερντάς οντουβά σο να κερντάας ποτές ο Αχαάβ. Αλλαξάλο. Γκιλό κόντρα κι ψεύτικη λατρεία ντα βακερντάς κο τζενέ τι ντεν λατρεία ι Ιεχωβάς. (Διαβάνεν 2 Χρονικών 33:​15, 16) Ο Μανασσής έπρεπε τι αβέλ μπίνταρανο ντα τι τθερέλ πίστη για τι κερέλ-λες ανταβά, σόσκε πριν τι μετανιώνελ, να ισινέ λατσσό παράδειγμας πι φαμιλιάκε, ι τζενένγκε σο αστάρντιβενας βασιλιαδένγκε φαράταρ ντα πι λαόσκε για μπουτ μπρεσά. Αλλά κάνα ο Μανασσής πφουρίλιλο, κερντάς ο πο λατσσό για τι νασκιαρέλ ο προβλήματα σο αντάας. Ανταλέσαρ σο κερντάας, ντικχίντιβελα ότι ισινέ λατσσό παράδειγμας πι χουρντέ αγγονίσκε, ι Ιωσιάσκε, σο πο σοράν αβιλό μπουτ λατσσό βασιλιάς.​—2 Βασ. 22:1, 2.

12. Σο σικλιάσα κατά Μανασσής;

¹² Σο σικλιάσα κατά Μανασσής; Βοβ ταπεινωντάς πο νεαυτός, αλλά να ατσσιλό σάντε ανταλέστε. Μολίνελας ι Ιεχωβάς, αντράλ κατά προσευχή, τι τζιτζίνελ λέσκε ντα τι συγχωρίνελ-λες. Ντα τσσιναντάς οντουλά σο  κερέλας. Κερντάς ο πο λατσσό για τι νασκιαρέλ ο προβλήματα σο κερντάας, τι ντελ λατρεία κο Ιεχωβά ντα τι βοηθίνελ γιαβερέν-ντα τι κερέν-λες ανταβά. Ο παράδειγμας ι Μανασσίσκο ντέλα ζορ ατζέ-ντα οντουλέν σο κερντέ μπουτ μπαρέ αμαρτίες. Σαρέ οντουλά σο νακχλάς ο Μανασσής σικαβένα ότι ο Ιεχωβά Ντεβέλ “ισί λατσσό ντα έτοιμος τι συγχωρίνελ”. (Ψαλμ. 86:5) Ο Ιεχωβά κα συγχωρίνελ οντουλέν σο μετανιώνενα μπαγιά.

13. Βακερέν εκ παράδειγμας σο σικλιαρέλα-αμέν μπουτ λατσσές σο μανγκέλα τι βακερέλ τι μετανιώνελ μπαγιά εκ τζενό.

¹³ Ο γκι ι Μανασσίσκο πφανγκιλό οντουλένταρ σο κερντάς, αλλά να ατσσιλό σάντε οτθέ. Ανταβά σικλιαρέλα-αμέν μπουτ λατσσές σο μανγκέλα τι βακερέλ τι μετανιώνελ μπαγιά εκ τζενό. Ντικχέν εκ παράδειγμας: Τζάνα εκχέ φουρνόστε ντα μανγκένα εκ κέικ. Αλλά ο τζενό σο κερέλα μπουτί οτθέ, αντίς τι ντελ-τουμέν κέικ, ντέλα-τουμέν εκ βαντρό. Κα μπεϊντίνενας-λες ανταβά; Νάα! Κα αλλάνελας τίποτα άμα ο τζενό κα βακερέλας τουμένγκε ότι ο βαντρό ισί εκ κατά σημαντικά πράγματα σο τθερέλα αντρέ ο κέικ; Νάα! Κάτι ασακό αβέλα-πες ι Ιεχωβάσαρ-ντα. Μανγκέλα εκχέ τζενέσταρ σο κερντάς εκ αμαρτία τι μετανιώνελ μπαγιά. Άμα πφανγκιόλα ο γκι ι τζενέσκο πι αμαρτιάκε, ισί λατσσό. Ανταβά ισί εκ κατά πράγματα σο σικαβένα ότι μετανιωσάλο, αλλά να ερεσέλα σάντε ανταβά. Σο γιαβέρ πρέπει τι κερέλ; Σικλιάσα μπουτ πράγματα κατά παραβολή σο βακερντάς ο Ιησούς για τι ντελ-αμέν ζορ.

14. Κι παραβολή κι Ιησούσκι, καλά πράγματα σο κερντάς κι αρχή ο τερνό σικαβένα ότι μετανιωσάλο;

¹⁴ Ο Ιησούς βακερντάς ι ιστορία ι τσσαβέσκε σο νασλό πι κχερέσταρ, σο ισί γραμμέ κο εδάφια Λουκάς 15:​11-32, για τι ντελ-αμέν ζορ. Εκ τερνό γκιλό κόντρα πι νταντέσαρ, νασλό κατά κχερ ντα γκιλό «εκχέ τθεμέστε ντουρ». Οτθέ, κερντάς εκ μπουτ μπέτι ζωή. Αλλά κάνα λέσκι ζωή αβιλί μπουτ δύσκολη, μπεσλό ντα σκεφτιντάς μπουτ λατσσές οντουλά σο κερντάας. Αγαντάς καζόμ πο λατσσί ζωή τθερέλας κάνα μπεσέλας πι νταντέσκε κχερέστε. Ο Ιησούς βακερντάς ότι ο τερνό «αγαντάς-πες». Αποφασιντάς τι βουρτίνελ πι κχερέστε ντα τι μανγκέλ πι νταντέσταρ τι συγχωρίνελ-λες. Ισινέ μπουτ σημαντικός ι τερνέσκε τι αγαβέλ ότι λιντάας μπουτ μπέτι αποφάσεις. Αλλά ερεσέλας σάντε ανταβά; Νάα. Έπρεπε τι τσσιναβέλ οντουλά σο κερέλας.

15. Σαρ σικαντάς ότι μετανιωσάλοας μπαγιά ο τσσαβό σο νασλό πι κχερέσταρ;

¹⁵ Ο τσσαβό σο νασλό πι κχερέσταρ σικαντάς ότι μετανιωσάλο μπαγιά οντουλένγκε σο κερντάας. Βουρτισάλο παλάλ πι κχερέστε. Σοράν, κάνα κερντάς λάφι πι νταντέσαρ, βακερντάς: «Αμαρτιντόμ ανγκλάλ κο Ντεβέλ ντα ανγκλά-τούτε. Να ισινόμ άξιος τι βακέρντιβαβ το τσσαβό». (Λουκ. 15:​21) Ανταλά λάφια σο βακερντάς ο τερνό σικαντέ ότι μανγκέλας τι αβέλ πάλι λατσσό αμάλ ι Ιεχωβάσκο. Επίσης, αγαντάς ότι οντουλά σο κερντάας πφανγκλέας ο γκι λέσκε νταντέσκο. Ντα ισινέ έτοιμος τι κερέλ ο πο λατσσό  για τι τζαλ-λεν πάλι λατσσές πι νταντέσαρ. Μανγκέλας ατζέ-ντα τι αβέλ εκ οντουλέ τζενένταρ σο κερένας μπουτί λέσκε νταντέσκε! (Λουκ. 15:​19) Ανταγιά παραβολή νανέ σάντε εκ ιστορία σο ντέλα-αμέν ζορ. Ανταγιά ιστορία βοηθίνελα μπουτ ι πρεσβυτερόν. Βοηθίνελα-λεν κάνα προσπαθίνενα τι αρακχέν πράγματα σο σικαβένα άμα εκ τζενό σο κερντάς εκ μπαρί αμαρτία μετανιωσάλο μπαγιά.

16. Σόσκε μπέκιμ τι αβέλ δύσκολος ι πρεσβυτερόνγκε τι αγαβέν άμα εκ τζενό μετανιωσάλο μπαγιά;

¹⁶ Νανέ εύκολος ι πρεσβυτερόνγκε τι αγαβέν άμα εκ τζενό σο κερντάς εκ μπαρί αμαρτία μετανιωσάλο μπαγιά. Σόσκε; Ο πρεσβύτεροι ναστί ντικχένα αντρέ κο γκι κι γιαβερένγκο, οτθάρ πρέπει τι αρακχέν πράγματα σο σικαβένα ότι λένγκο πφραλ σικλιλό μπαγιά τι μισίνελ οντουλά σο κερντάας. Μπάζιμα, εκ τζενό μπέκιμ τι κερντάς εκ αμαρτία αζόμ μπαρί σο ο πρεσβύτεροι σο κερένα λέσαρ λάφι μπέκιμ μα τι μπορίνενα τι πακιάν ότι μετανιωσάλο μπαγιά.

17. (α) Καβά παράδειγμας σικαβέλα ότι εκ τζενό μπέκιμ μα τι μετανιωσάλο μπαγιά ατζέ-ντα άμα βακερέλα ότι πφανγκιλό λέσκο γκι; (β) Σο πρέπει τι κερέλ εκ τζενό για τι σικαβέλ ότι μετανιωσάλο μπαγιά σαρ βακερέλα ο εδάφιος 2 Κορινθίους 7:11;

¹⁷ Ντικχέν εκ παράδειγμας: Εκ πφραλ κερέλα λουμνιπέ μπουτ φαρ ντα μπουτ μπρεσά. Αντίς τι μανγκέλ βοήθεια, γκεραβέλα ανταβά μπίλατζανο πράγμας πι ρομνιάταρ, πι αμαλένταρ ντα κατά πρεσβύτεροι. Τελικά, ο πρεσβύτεροι λένα αμπέρι οντουβά σο κερντάς. Κάνα ο πρεσβύτεροι βακερένα λέσκε ότι σικλιλέ οντουβά σο κερντάς, μουτθαβέλα λένγκε σο κερντάς ντα ντικχίντιβελα τι πφανγκιλό λέσκο γκι. Αλλά σικαβέλα ανταβά ότι μετανιωσάλο; Νάα. Ο πρεσβύτεροι πρέπει τι ντικχέν πο μπουτ πράγματα ανταλέσταρ. Οντουβά πφραλ να κερντάς εκ αμαρτία σάντε εκ φαρ επειδή να λιντάας εκ λατσσί απόφαση. Οκιά μπάνταρ, κερντάς εκ μπαρί αμαρτία μπουτ φαρ ντα μπουτ μπρεσά. Να μουτθαντάς κορκορό πι αμαρτία. Αλλά εκ γιαβέρ σικλιλό λέσκε αμαρτιάκε ντα μουτθαντάς-λα κο πρεσβύτεροι. Οτθάρ, ο πρεσβύτεροι πρέπει τι ντικχέν πράγματα σο σικαβένα ότι κερντάς μπαγιά αλλαγές κο τρόπος σο σκεφτίνελα, σο νιωθίνελα ντα σο κερέλα ο πράγματα. (Διαβάνεν 2 Κορινθίους 7:​11) Μπέκιμ τι λελ οντουλέ τζενές μπουτ βακίτι για τι κερέλ αλλαγές σο σικαβένα ότι μετανιωσάλο μπαγιά. Μπέκιμ κα νασκιαρέν-λες για χάνικ βακίτι κατά κχανγκιρί.​—1 Κορ. 5:​11-13· 6:9, 10.

18. Σαρ μπορίνελα εκ αποκομμέ τι σικαβέλ ότι μετανιωσάλο μπαγιά, ντα σο κα αβέλ-πες άμα μετανιωσάλο μπαγιά;

¹⁸ Για τι σικαβέλ ότι μετανιωσάλο μπαγιά, ο αποκομμέ τζενό πρέπει τι αβέλ σαρέ κο συναθροίσεις ντα τι ντελ καν κο πρεσβύτεροι σο βακερντέ λέσκε μα τι τσσιναβέλ τι κερέλ προσευχή ντα τι σικλιαρέλ-πες κατά Γραφή. Επίσης, πρέπει τι κερέλ ο πο λατσσό για τι νασέλ ντουρ κατά πράγματα σο κερντέας-λες τι αμαρτίνελ. Άμα κα μαρέλ-πες τι αβέλ πάλι λατσσό αμάλ ι Ιεχωβάσκο, μπορίνελα τι αβέλ σίγουρος ότι ο Ιεχωβά κα συγχωρίνελ-λες ντα ότι ο πρεσβύτεροι κα βοηθίνεν-λες τι  αβέλ πάλι αντρέ κι κχανγκιρί. Κάνα ο πρεσβύτεροι μαρένα-πες τι αγαβέν άμα εκ τζενό μετανιωσάλο μπαγιά, τζανένα ότι η κάθε περίπτωση ισί διαφορετική. Οτθάρ, ντικχένα ι κάθε περίπτωση μπουτ λατσσές ντα προσπαθίνενα μα τι αβέν σκληροί κάνα κρίνενα.

19. Σο μανγκέλα τι βακερέλ τι μετανιώνελ μπαγιά εκ τζενό; (Ιεζεκιήλ 33:​14-16)

¹⁹ Σικλιλάμ ότι εκ τζενό σο κερντάς εκ αμαρτία να ερεσέλα σάντε τι βακερέλ ότι πφανγκιλό λέσκο γκι οντουλέσκε σο κερντάς. Πρέπει επίσης τι αλλάνελ ο τρόπος σο σκεφτίνελα ντα νιωθίνελα, ντα οντουλέντζαρ σο κερέλα τι σικαβέλ ότι μετανιωσάλο. Ανταβά μανγκέλα τι βακερέλ ότι πρέπει τι τσσιναβέλ ο μπέτι πράγματα σο κερέλας ντα τι βουρτίνελ πάλι κο ντρομ κι Ιεχωβάσκο. (Διαβάνεν Ιεζεκιήλ 33:​14-16) Ο πο σημαντικός πράγμας ι τζενέσκε σο κερντάς αμαρτία ισί τι αβέλ πάλι αμάλ ι Ιεχωβάσκο.

20, 21. Σαρ κα μπορίναας τι βοηθίνας εκχέ τζενές σο κερντάς εκ μπαρί αμαρτία;

²⁰ Ο Ιησούς κερντάς λάφι εκχέ σημαντικέ πραγμάσκε σο τθερέλας τι κερέλ ατθέ κι πφουβ κάνα βακερντάς: «Αβιλόμ τι καλίναβ . . . αμαρτωλόν για τι μετανιώνεν». (Λουκ. 5:​32) Ανταβά πρέπει τι μανγκάς αμέν-ντα τι κεράς. Βακερέν χάι ότι εκ λατσσό αμάλ αμαρό κερντάς εκ μπαρί αμαρτία. Σο πρέπει τι κεράς;

²¹ Να κα κεράς λέσκε καέκ λατσσιπέ άμα κα γκεραβάς λέσκι αμαρτία. Ναστί αβέλα-πες τι γκεραβάς οντουβά σο κερντάς, σόσκε ο Ιεχωβά ντικχέλα. (Παρ. 5:​21, 22· 28:​13) Κα βοηθίνεν τουμαρέ αμαλές άμα κα ανέν λέσκε γκοντιάτε ότι ο πρεσβύτεροι μανγκένα τι βοηθίνεν-λες. Άμα τουμαρό αμάλ να μανγκέλα τι μουτθαβέλ πι αμαρτία κο πρεσβύτεροι, πρέπει τι μουτθαβέν τουμέν ι πρεσβυτερόνγκε. Αντικάς, κα σικαβέν ότι μανγκένα τι βοηθίνεν-λες μπαγιά. Ανταβά ισί σημαντικός σόσκε, άμα να κα λελ βοήθεια κατά πρεσβύτεροι ντα να κα μετανιώνελ, κα τσσιναβέλ τι αβέλ αμάλ ι Ιεχωβάσκο!

22. Σο κα ντικχάς κο γιαβέρ μάθημας;

²² Σο αβέλα-πες όμως άμα εκ τζενό κερντάς εκ μπουτ μπαρί αμαρτία ντα για μπουτ βακίτι σο ο πρεσβύτεροι αποφασίνενα ότι πρέπει τι χαλ αποκοπή; Μήπως κα σικαβέλας ανταβά ότι να τζιτζισάλε λέσκε; Κο γιαβέρ μάθημας, κα ντικχάς πο λατσσές σόσκε βακεράσα ότι ο Ιεχωβά τζιτζίνελα εκχέ τζενέσκε κάνα διορθώνελα-λες ντα σαρ μπορίνασα τι τζιτζίνας αμέν-ντα σαρ βοβ.