1. Σόσκε μπουτ τζενέ ισί μπερδεμέ;

ΙΣΙ μπουτ θρησκείες αντιβές σο βακερένα ότι ισί Χριστιανικές ντα ότι υπηρετίνενα ι Ντεβλές αντικάς σαρ μανγκέλα βοβ. Οτθάρ μπουτ τζενέ ισί μπερδεμέ! Πουτσένα: «Ισί σάντε εκ αληθινή θρησκεία ή μήπως κερένα σαρέ ο θρησκείες ι Ντεβλέσκο γκι;» Ισινάμ σίγουροι ότι ο Μάρτυρες ι Ιεχωβάσκε σικλιαρένα ι αλήθεια ντα ότι σάντε ο τρόπος σο υπηρετίνενα βον ι Ιεχωβάς κερέλα λέσκο γκι; Αβέλα-πες μπαγιά τι αβάς αζόμ σίγουροι ανταλέσκε; Για τι ντικχάς καλά πράγματα κερένα-αμέν τι αβάς σίγουροι.

2. Σόσκε ισινέ ο απόστολος Παύλος σίγουρος ότι τθερέλας ι αλήθεια; (1 Θεσσαλονικείς 1:5)

² Ο απόστολος Παύλος ισινέ μπουτ σίγουρος ότι τθερέλας ι αλήθεια. (Διαβάνεν 1 Θεσσαλονικείς 1:5) Να πακιάλας-λες ανταβά σάντε επειδή κερέλας-λες τι νιωθίνελ λατσσές. Οκιά μπάνταρ, ο Παύλος σικλιαρέλας-πες μπουτ λατσσές κατά λάφι ι Ντεβλέσκο. Πακιάλας ότι «ο άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή». (2 Τιμ. 3:​16) Σο σικλιλό; Κι Γραφή, ο Παύλος αρακχλάς σημαντικά πράγματα σο σικαβένας ότι ο Ιησούς ισί ο Μεσσίας σο βακερντάς ο Ντεβέλ ότι κα αβέλας, πράγματα σο ο Ιουδαίοι αρχηγοί ι θρησκειάκε τραμπίνενας μα τι ντικχέν. Βακερένας ότι σικλιαρένας κο τζενέ ι αλήθεια ι Ντεβλέσκε αλλά κερένας πράγματα σο μισίνελα ο Ντεβέλ. (Τίτο 1:​16) Ο Παύλος να ισινέ σαρ οντουλά τζενέ. Να τραμπίνελας καλέ πραγματέντε κα πακιάλ κατά Ντεβλέσκο Λάφι ντα καλέ πραγματέντε να μανγκέλας τι πακιάλ. Ισινέ έτοιμος τι σικλιαρέλ ντα τι κερέλ “σαρέ ο πράγματα σο τθερένας τι κερέν με το σκοπός ι Ντεβλέσκο”.​—Πράξ. 20:27.

3. Πρέπει τι τθεράς σαρέ ο απαντήσεις αμαρέ ερωτησιέντε για τι αβάς σίγουροι ότι τθεράσα ι αλήθεια; (Ντικχέν ο πλαίσιος-ντα « Ο Σουκάρ Πράγματα ντα ο Σκέψεις ι Ιεχωβάσκε Ισί “Αζόμ Μπουτ σο Ναστί Βακεράσα-λεν Σαρέ”»)

 ³ Ισί τζενέ σο πακιάνα ότι η αληθινή θρησκεία πρέπει τι απαντίνελ σαρέ κο ερωτήσεις, ατζέ-ντα οντουλέντε σο να απαντίνελα η Αγία Γραφή. Αβέλα-πες ανταβά; Ανέν τουμαρέ γκοντιάτε ι Παυλός. Βοβ βακερντάς κο γιαβερά Χριστιανοί τι «ρόντεν σαρέ ο πράγματα για τι ντικχέν άμα ισί σωστά», αλλά βακερντάς ότι ισινέ πράγματα-ντα σο να αγαβέλας. (1 Θεσ. 5:​21) «Τζανάσα σάντε χάνικ πράγματα», γραφιντάς ντα σοράν βακερντάς: «Να αβέλα-πες τι ντικχάς λατσσές, ισί σαρ τι ντικχάσα αντράλ εκχέ μεταλλικέ ανιάσταρ». (1 Κορ. 13:9, 12) Ο Παύλος να αγαβέλας-λεν σαρέ. Ούτε αμέν αγαβάσα-λεν σαρέ. Αλλά ο Παύλος αγαβέλας ο βασικές αλήθειες ι Ιεχωβάσκε. Ισινέ σίγουρος ότι τθερέλας ι αλήθεια!

4. Σαρ κα αβάς ατζέ πο σίγουροι ότι αρακχλάμ ι αλήθεια, ντα σο κα ντικχάς ι αληθινέ Χριστιανόνγκε;

⁴ Εκ τρόπος για τι αβάς ατζέ πο σίγουροι ότι αρακχλάμ ι αλήθεια ισί τι ντικχάς άμα ο Μάρτυρες ι Ιεχωβάσκε αντιβές ντένα λατρεία ι Ντεβλές σαρ σικλιαρντάς ο Ιησούς. Ανταλέ μαθημάστε, κα ντικχάς ότι ο αληθινοί Χριστιανοί (1) να ντένα λατρεία ψεύτικε ντεβλέντε, (2) σεβάνενα ι Ιεχωβάσκο ναβ, (3) μανγκένα ι αλήθεια ντα (4) μανγκένα μπουτ ο εκ ι γιαβερές.

5. Σαρ σικλιαρντάς-αμέν ο Ιησούς τι ντας λατρεία ι Ντεβλές, ντα σαρ κα κεράς οντουλά σο σικλιαρντάς;

⁵ Επειδή μανγκέλας μπουτ ι Ντεβλές, ο Ιησούς ντέλας λατρεία σάντε ι Ιεχωβάς, εμ κάνα ισινέ κο ουρανός εμ κάνα ισινέ κι πφουβ. (Λουκ. 4:8) Σικλιαρντάς πι μαθητέν-ντα τι κερέν-λες ανταβά. Ούτε ο Ιησούς ούτε ο πιστοί μαθητές λέσκε τθερένας εικόνες ή κάτι ασακό για τι ντεν λατρεία ι Ντεβλές. Αφού ο Ντεβέλ ισί πνεύμας, καέκ  ναστί κερέλα κάτι σο μοιάζελα λέστε! (Ησ. 46:5) Ισί σωστός όμως τι λατσσαράς εικόνες τζενένγκε σο μερικοί πακιάνα ότι ισί άγιοι ντα τι προσευχίντιβας λέντε; Κι δεύτερη κατά Ντες Εντολές, ο Ιεχωβά βακερντάς: «Δεν πρέπει τι κερές τούκε καέκ εικόνα ή τίποτα σο μοιάζελα με κάτι σο ισί οπρέ κο ουρανός ή τελέ κι πφουβ . . . Δεν πρέπει τι προσκυνίνες-λεν». (Έξοδ. 20:4, 5) Οντουλά σο μανγκένα τι κερέν ο γκι ι Ντεβλέσκο αγαβένα ότι βοβ να μανγκέλα αμένταρ τι ντας λατρεία ψεύτικε ντεβλέντε.

6. Κάστε μοιάζενα ο Μάρτυρες ι Ιεχωβάσκε αντιβές κο τρόπος σο ντένα λατρεία ι Ντεβλές;

⁶ Ο ιστορικοί βακερένα ότι κο μπρεσά κι αποστολόνγκε ο Χριστιανοί ντένας λατρεία σάντε κο Ντεβέλ. Για παράδειγμας, ο βιβλίος Ιστορία της Χριστιανικής Εκκλησίας (History of the Christian Church) βακερέλα ότι «να νακχέλας κατά γκοντί» οντουλέ Χριστιανόνγκι τι τθερέν εικόνες κο τθανά σο ντιντιόλας λατρεία. Αντιβές, ο Μάρτυρες ι Ιεχωβάσκε ντένα λατρεία ι Ντεβλές αντικάς σαρ ντένας-λες ο πρώτοι Χριστιανοί. Να προσευχίντιβασα κο εικόνες ή κο άγγελοι. Ατζέ-ντα κο Ιησούς να προσευχίντιβασα. Επίσης, να ντάσα λατρεία κο σύμβολα κι Τθεμέσκε. Σο-ντα τι αβέλ-πες, μανγκάσα αντράλ αμαρέ γκίσταρ τι ντας καν κο λάφια κι Ιησούσκε: «Κο Ιεχωβά τι Ντεβλέστε πρέπει τι ντες λατρεία».​—Ματθ. 4:10.

7. Καλά διαφορές τθερένα ο Μάρτυρες ι Ιεχωβάσκε κατά γιαβερά θρησκείες;

⁷ Αντιβές, μπουτ τζενέ μπεϊντίνενα τι ασουνέν ι παπαζίν σο τθερένα νάμι. Μπάζιμα μανγκένα αζόμ μπουτ ανταλέ τζενέν σο ισί σαρ τι ντένα-λεν λατρεία. Μπουτ τζενέ τζάνα λένγκε κχανγκιρίντε, κινένα λένγκε βιβλία ντα ντένα λοβέ λέντε ή κο οργανώσεις λένγκε. Μερικά τζενέ πακιάνα σο-ντα βακερένα λένγκε ανταλά παπάζια. Ισί αζόμ χαρούμενοι σο ντικχένα ανταλέ παπαζίν σο ισί σαρ τι ντικχένα ι Ιησούς! Οκιά μπάνταρ, οντουλά σο ντένα λατρεία ι Ντεβλές αντικάς σαρ μανγκέλα βοβ να ακολουθίνενα τζενέν. Παρόλο σο σεβάνασα οντουλέν σο κερένα κουμάντος, ντάσα καν κο λάφια σο σικλιαρντάς-αμέν ο Ιησούς: «Σαρέ τουμέν ισινέν πφραλά». (Ματθ. 23:​8-10) Να ντάσα λατρεία τζενέντε, είτε ισί παπάζια είτε κερένα κουμάντος κο ντουνιάς. Ντα να τσσίντασα λένγκε θρησκειένταρ ή κατά πολιτικά πράγματα σο μανγκένα τι κερέν. Οκιά μπάνταρ, ατσσάσα ουδέτεροι ντα να τθεράσα καέκ σχέση ανταλέ ντουνιάσαρ. Οτθάρ, ισινάμ μπουτ διαφορετικοί σαρέ κατά θρησκείες σο βακερένα ότι ισί Χριστιανικές.​—Ιωάν. 18:36.

8. Σαρ τζανάσα ότι ο Ιεχωβά μανγκέλα τι δοξάντιβελ λέσκο ναβ ντα τι μουτθάντιβελ σαριλέντε;

⁸ Εκ φαρ, ο Ιησούς κερντάς προσευχή: «Ντάντε, δόξανε το ναβ». Ο ίδιος ο Ιεχωβά απαντιντάς οντουλέ προσευχιάτε εκ ζουρανέ φωνιάσαρ κατά ουρανός ντα ντινάς πο λάφι τι δοξάνελ πο ναβ. (Ιωάν. 12:​28) Καζόμ ισινέ κι πφουβ, ο Ιησούς δοξάνελας πι Νταντέσκο ναβ. (Ιωάν. 17:​26) Οτθάρ, ο αληθινοί Χριστιανοί χαιρίνενα σο βακερένα ο ναβ ι Ντεβλέσκο γιαβερέντε.

9. Σαρ σικαντέ ο Χριστιανοί, χάνικ αφού κερντιλί η Χριστιανική κχανγκιρί, ότι σεβάνενας ο ναβ ι Ντεβλέσκο;

⁹ Χάνικ σοράν αφού κερντιλί η Χριστιανική κχανγκιρί, ο Ιεχωβά «ντινάς πι προσοχή για πρώτη φορά κο τζενέ γιαβερέ τθεμένταρ για τι λελ εκχέ λαός πι ναβέσκε». (Πράξ. 15:​14) Οντουλά Χριστιανοί χαιρίνενας σο βακερένας ντα μουτθαβένας ο ναβ ι Ντεβλέσκο γιαβερέντε. Ο απόστολοι ντα ο μαθητές βακερένας ο ναβ ι Ντεβλέσκο κάνα κερένας έργος ντα κάνα γραφίνενας ο βιβλία ι Γραφιάκε. * Ανταλέσαρ σο κερντέ σικαντέ  ότι σάντε βον τζανένας ο ναβ ι Ντεβλέσκο.​—Πράξ. 2:​14, 21.

10. Σαρ τζανάσα ότι σάντε ο Μάρτυρες ι Ιεχωβάσκε τζανένα ο ναβ ι Ιεχωβάσκο;

¹⁰ Σάντε ο Μάρτυρες ι Ιεχωβάσκε τζανένα ο ναβ ι Ιεχωβάσκο; Ντικχέν μερικά πράγματα σο σικαβένα-λες ανταβά. Αντιβές, μπουτ παπάζια κερντέ σο νακχέλα λένγκε βαστένταρ για τι γκεραβέν ο ναβ ι Ντεβλέσκο. Νικαντέ-λες πουμαρέ Γραφιένταρ ντα, μερικέ περιπτωσιέντε, να μουκχένα τι βακέρντιβελ ο ναβ ι Ντεβλέσκο πουμαρέ κχανγκιρίντε. * Ντικχίντιβελα μπουτ λατσσές ότι σάντε ο Μάρτυρες ι Ιεχωβάσκε σικαβένα καζόμ μπουτ σεβάνενα ο ναβ ι Ντεβλέσκο. Αμέν μουτθαβάσα ο ναβ ι Ντεβλέσκο πο μπουτ σαρέ κατά γιαβερά θρησκείες! Κεράσα σο νακχέλα αμαρέ βαστένταρ για τι αβάς οντουβά σο βακερέλα αμαρό ναβ. Ισινάμ Μάρτυρες ι Ιεχωβάσκε. (Ησ. 43:​10-12) Νικαντάμ πο μπουτ από 240 εκατομμύρια Άγιες Γραφές, κι Μετάφραση Νεβέ Ντουνιάσκι σο τθερέλα ο ναβ ι Ιεχωβάσκο οτθέ σο γιαβερά μεταφραστές νικαντέ-λες. Επίσης, νικαβάσα εκδόσεις ι Γραφιάκε σο τθερένα αντρέ ο ναβ ι Ιεχωβάσκο πο μπουτ από 1.000 τσσιμπέντε!

11. Σαρ σικαβένας ο πρώτοι Χριστιανοί ότι μανγκένας ι αλήθεια;

¹¹ Ο Ιησούς μανγκέλας ι αλήθεια, δηλαδή ι αλήθεια σο τθερέλας τι κερέλ ι Ντεβλέσαρ ντα σαρέ οντουλέντζαρ σο κα κερέλ ο Ντεβέλ. Ο τρόπος σο τζουβντιόλας ο Ιησούς  σικαβέλας ότι τζανέλας ι αλήθεια ντα μουτθαβέλας-λα γιαβερέντε. (Ιωάν. 18:​37) Ο αληθινοί μαθητές-ντα ι Ιησούσκε μανγκένας μπουτ ι αλήθεια. (Ιωάν. 4:​23, 24) Ντα ο απόστολος Πέτρος βακερντάς ότι η Χριστιανική πίστη ισί ο «ντρομ ι αληθειάκο». (2 Πέτρ. 2:2) Επειδή μανγκένας μπουτ ι αλήθεια, ο πρώτοι Χριστιανοί να κερένας πράγματα σο τθερένας τι κερέν ι θρησκειέντζαρ, ι κουλτουράσαρ ντα οντουλέντζαρ σο πακιάνας βον άμα οντουλά πράγματα τζάνας κόντρα κι αλήθεια. (Κολ. 2:8) Αντικάς αντιβές-ντα, ο αληθινοί Χριστιανοί μαρένα-πες τι “πφιρέν κι αλήθεια” ντα προσοχίνενα μπουτ τι αβέν οντουλά σο πακιάνα ντα λένγκι ζωή αντικάς σαρ βακερέλα ο Λάφι ι Ιεχωβάσκο.​—3 Ιωάν. 3, 4.

12. Σο αβέλα-πες κάνα ο Κυβερνών Σώμας αγαβέλα ότι πρέπει τι αλλάνας ο τρόπος σο αγαβάσα ή κεράσα εκ πράγμας, ντα σόσκε;

¹² Ο Μάρτυρες ι Ιεχωβάσκε να βακερένα ότι πάντα αγαβένα ντιπ λατσσές ι αλήθεια ι Γραφιάκι. Μπάζιμα, κερντέ λάθη κο τρόπος σο εξηγιντέ οντουλά σο σικλιαρέλα η Γραφή ντα κο τρόπος σο ισί οργανωμέ η κχανγκιρί. Ανταβά δεν πρέπει τι κερέλ-αμέν τι σαστίνας. Η Γραφή σικαβέλα μπουτ λατσσές ότι λέσκο λαός αγαβέλα ι αλήθεια πο λατσσές καζόμ νακχέλα ο βακίτι. (Κολ. 1:9, 10) Ο Ιεχωβά σικαβέλα ι αλήθεια χάνικ χάνικ, ντα πρέπει τι μανγκάς τι μπεκλεντίνας για τι αγαβάς ι αλήθεια πο λατσσές. (Παρ. 4:​18) Κάνα ο Κυβερνών Σώμας σικλιόλα ότι πρέπει τι αλλάνας ο τρόπος σο αγαβάσα ή κεράσα εκ πράγμας, αλλάνελα-λες σουγκό. Μπουτ κχανγκιριά αντιβές αλλάνενα οντουλά σο σικλιαρένα σόσκε μανγκένα τι κερέν ο γκι ι πιστέ τζενένγκο ή για τι κερέν ναβ κο ντουνιάς. Αλλά ο Μάρτυρες ι Ιεχωβάσκε κερένα αλλαγές σόσκε μανγκένα τι αβέν πο πασέ κο Ντεβέλ ντα τι υπηρετίνεν-λες σαρ υπηρετίνελας-λες ο Ιησούς. (Ιακ. 4:4) Κάνα κεράσα εκ αλλαγή, να κεράσα-λα επειδή αλλαξάλι η άποψη ι τζενένγκι, αλλά επειδή αγαβάσα πο λατσσές ι Γραφή. Αμέν μανγκάσα ι αλήθεια!​—1 Θεσ. 2:3, 4.

13. Καγιά ισί η πο σημαντική ιδιότητα σο τθερένα ο αληθινοί Χριστιανοί, ντα σαρ ντικχίντιβελα κο Μάρτυρες κι Ιεχωβάσκε αντιβές;

¹³ Σαρέ τζανένας ότι ο πρώτοι Χριστιανοί τθερένας μπουτ λατσσέ ιδιότητες, αλλά η πο σημαντική ιδιότητα σο τθερένας ισινέ η αγάπη. Ο Ιησούς βακερντάς: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε». (Ιωάν. 13:​34, 35) Αντιβές, ο Μάρτυρες ι Ιεχωβάσκε σαρό κο ντουνιάς μανγκένα μπουτ ο εκ ι γιαβερές ντα ισί ενωμέ. Αμέν ισινάμ διαφορετικοί σαρέ κατά γιαβερά θρησκείες σόσκε ισινάμ σαρ φαμιλί παρόλο σο ισινάμ γιαβερέ τθεμένταρ ντα τθεράσα γιαβέρ κουλτούρα. Ντικχάσα-λες ανταβά αμαρέ συναθροισιέντε ντα αμαρέ συνελευσιέντε. Ανταβά κερέλα-αμέν τι αβάς σίγουροι ότι ο τρόπος σο υπηρετίνασα αμέν ι Ιεχωβάς κερέλα λέσκο γκι.

14. Σαρ μπορίνασα τι σικαβάς ότι μανγκάσα μπουτ ο εκ ι γιαβερές σαρ βακερένα ο εδάφια Κολοσσαείς 3:​12-14;

¹⁴ Η Γραφή βακερέλα αμένγκε “τι μανγκάς μπουτ ο εκ ι γιαβερές”. (1 Πέτρ. 4:8) Εκ τρόπος για τι σικαβάς ασακί αγάπη ισί τι συγχωρίνας ο εκ ι γιαβερές ντα τι νταϊντίνας ο ατέλειες ο εκ ι γιαβερέσκε. Επίσης, ρόντασα ευκαιρίες για τι ντας αμαρέ βαστένταρ ντα τι σικαβάς φιλοξενία σαριλέντε κι κχανγκιρί, ατζέ-ντα οντουλέντε σο μπέκιμ τι προσβαλιντέ-αμέν. (Διαβάνεν Κολοσσαείς 3:​12-14) Κάνα μανγκάσα ι γιαβερέν αντικάς, σικαβάσα ότι ισινάμ αληθινοί Χριστιανοί.

15. Καλέ γιαβερέ τροπόντζαρ σικαβάσα ότι ντάσα λατρεία ι Ντεβλές αντικάς σαρ ντένας-λες ο πρώτοι Χριστιανοί;

¹⁵ Κεράσα γιαβερά-ντα πράγματα για τι  ντας λατρεία ι Ντεβλές αντικάς σαρ ντένας-λες ο πρώτοι Χριστιανοί. Για παράδειγμας, ισινάμ οργανωμέ αντικάς σαρ ισινέ οντουλά Χριστιανοί. Τθεράσα επισκοπόν, πρεσβυτερόν ντα διακονικέ υπηρετόν, αντικάς σαρ τθερένας βον. (Φιλιπ. 1:1· Τίτο 1:5) Ντα σαρ βον, σεβάνασα ο νόμοι ι Ιεχωβάσκε για το σεξ, ι μπιαβέσκε, ι ρατέσκε ντα αρακχαβάσα ι κχανγκιρί οντουλένταρ σο να μανγκένα τι κερέν ο νόμους ι Ντεβλέσκε.​—Πράξ. 15:​28, 29· 1 Κορ. 5:​11-13· 6:9, 10· Εβρ. 13:4.

16. Σο σικλιάσα κατά λάφια σο ισί κο εδάφια Εφεσίους 4:​4-6;

¹⁶ Ο Ιησούς βακερντάς ότι μπουτ τζενέ κα βακερένας ότι ισί λέσκε μαθητές, αλλά να κα αβένας μπαγιά σαρέ λέσκε μαθητές. (Ματθ. 7:​21-23) Η Γραφή βακερέλα αμένγκε επίσης ότι κο τελευταία ντιβεσά μπουτ τζενέ κα “βακερένας ότι μανγκένα ι Ντεβλές”. (2 Τιμ. 3:1, 5) Όμως, η Γραφή βακερέλα αμένγκε ότι σάντε «εκ πίστη» κερέλα ι Ντεβλέσκο γκι.​—Διαβάνεν Εφεσίους 4:​4-6.

17. Κον ισί οντουλά σο τζάνα παλάλ κο Ιησούς ντα σο τθερένα ι εκ αληθινή πίστη αντιβές;

¹⁷ Κον τθερέλα ι εκ αληθινή πίστη αντιβές; Ντικχλάμ ο πράγματα σο σικαβένα-λες ανταβά. Ντικχλάμ σαρ ντέλας λατρεία ο Ιησούς ντα ο πρώτοι Χριστιανοί ι Ντεβλές. Εκ τανί ισί η απάντηση​—ο Μάρτυρες ι Ιεχωβάσκε. Σο μπαρό προνόμιος τθεράσα τι αβάς αντρέ κο λαός κι Ιεχωβάσκο ντα τι τζανάς ι αλήθεια ι Ιεχωβάσκε ντα οντουλένγκε σο κα κερέλ! Οτθάρ, κεράσα σο νακχέλα αμαρέ βαστένταρ για τι αβάς σίγουροι ότι τθεράσα ι αλήθεια.