1. Σο κερένα μπουτ τζενέ κάνα ασουνένα ο γκοντιαβέρ συμβουλές κατά Γραφή; (Παροιμίες 1:​20, 21)

 ΜΠΟΥΤΕ τθεμέντε, ντικχάσα μπερεκέτι φαρ πφραλέν ντα πφενίν τι αβέν τθανέντε σο νακχένα μπουτ τζενέ, ντα ασαμάσαρ τι ντεν-λεν κάτι τι διαβάνεν. Κερντέν-λες τουμέν-ντα καέκ φαρ ανταβά; Άμα βα, μπέκιμ ανταβά ανέλα τουμαρέ γκοντιάτε ο εδάφιος κο βιβλίος Παροιμίες σο βακερέλα ότι η σοφία ντέλα βίκος ανγκλάλ μπουτέ τζενέντε για τι ασουνέν λάκε συμβουλές. (Διαβάνεν Παροιμίες 1:​20, 21) Η Γραφή ντα αμαρέ εκδόσεις τθερένα «αληθινή σοφία»​—ι σοφία ι Ιεχωβάσκι. Ανταγιά σοφία ισί οντουβά σο χρειαζίντιβενα ο τζενέ για τι λεν ζωή για πάντα. Χαιρίνασα μπουτ κάνα λέλα εκ τζενό εκ έκδοση αμαρί. Αλλά να κερένα-λες σαρέ ανταβά. Ισί τζενέ σο να μανγκένα τι σικλιόν σο βακερέλα η Γραφή. Γιαβερά ασάνα πουμένγκε αμέντζαρ. Αμντίνενα ότι η Γραφή ισί εκ πουρανό βιβλίος. Ντα γιαβερά βακερένα ότι ο τζενέ σο κερένα πουμαρέ ζωγιάτε οντουλά σο βακερέλα η Γραφή ισί σκληροί ντα αμντίνενα-πες πο λατσσέ κατά γιαβερά. Αλλά ο Ιεχωβά μανγκιμάσαρ συνεχίνελα τι ντελ πι σοφία σαριλέντε. Σαρ;

2. Κάι μπορίνασα τι αρακχάς αληθινή σοφία αντιβές, αλλά σο τραμπίνενα ο πο μπουτ τζενέ;

² Εκ τρόπος σο κερέλα ο Ιεχωβά τι ασούντιβελ η αληθινή σοφία ισί αντράλ λέσκε Λαφίσταρ, κατά Αγία Γραφή. Ανταβά βιβλίος μπορίνενα τι τθερέν-λες σχεδόν σαρέ. Ντα ο εκδόσεις σο νικαβάσα αμέν, σο αβέλα-πες λέντζαρ; Ι Ιεχωβάσκε ευλογιάσαρ, νικιόνα 1.000 ντα πο μπουτ τσσιμπέντε. Ο τζενέ σο ασουνένα, δηλαδή διαβάνενα ντα ντένα καν οντουλέντε σο σικλιόνα, ντικχένα λατσσιπέ. Όμως, ο πο μπουτ τζενέ τραμπίνενα μα τι ασουνέν ι Ιεχωβάς. Κάνα τθερένα τι λεν αποφάσεις, μανγκένα τι ντεν μπέσα πουμαρέ νεαυτόστε ή τι ασουνέν γιαβερέ τζενέν.  Μπορεί ατζέ-ντα τι πρασάν-αμέν επειδή τραμπίνασα τι ντας καν οντουλέντε σο βακερέλα η Γραφή. Ανταβά μάθημας κα σικαβέλ σόσκε ισί αντικάς ο τζενέ. Πρώτα όμως κα ντικχάς σαρ μπορίνασα τι λας σοφία κατά Ιεχωβά.

3. Σο χρειαζίντιβελα τι κεράς για τι αβάς μπαγιά γκοντιαβέρ;

³ Εκ τρόπος για τι σικαβάς ότι ισινάμ γκοντιαβέρ ισί τι μπορίνας τι χρησιμοποιήνας οντουλά σο τζανάσα για τι λας λατσσέ αποφάσεις. Όμως, για τι αβάς μπαγιά γκοντιαβέρ, χρειαζίντιβελα τι κεράς πο μπουτ ανταλέσταρ. Η Γραφή βακερέλα: «Για τι αρχίνες τι τθερές σοφία πρέπει τι νταρές κατά Ιεχωβά, ντα για τι αγαβές ο πράγματα πρέπει τι τζανές ι ντιπ Αγιός». (Παρ. 9:​10) Οτθάρ, κάνα τθεράσα τι λας εκ σημαντική απόφαση, πρέπει τι αρακχάς σο σκεφτίνελα ο Ιεχωβά ανταλέσκε. Μπορίνασα τι κεράς-λες ανταβά κάνα σικλιαράσα-αμέν κατά Γραφή ντα κατά εκδόσεις σο τθεράσα. Αντικάς κα σικαβάς ότι ισινάμ μπαγιά γκοντιαβέρ.​—Παρ. 2:​5-7.

4. Σόσκε μπορίνελα σάντε ο Ιεχωβά τι κερέλ-αμέν μπαγιά γκοντιαβέρ;

⁴ Σάντε ο Ιεχωβά μπορίνελα τι κερέλ-αμέν μπαγιά γκοντιαβέρ. (Ρωμ. 16:​27) Σόσκε μπορίνασα τι βακεράς ότι η σοφία αβέλα κατά Ιεχωβά; Πρώτον, ο Ιεχωβά λατσσαρντάς-λεν σαρέ, οτθάρ τζανέλα ντα αγαβέλα μπουτ λατσσές σο-ντα λατσσαρντάς. (Ψαλμ. 104:​24) Δεύτερον, σο-ντα κερέλα ο Ιεχωβά σικαβέλα ότι ισί γκοντιαβέρ. (Ρωμ. 11:​33) Τρίτον, ο γκοντιαβέρ συμβουλές ι Ιεχωβάσκε πάντα κερένα λατσσιπέ οντουλένγκε σο κερένα-λεν πουμαρέ ζωγιάτε. (Παρ. 2:​10-12) Άμα μανγκάσα τι αβάς μπαγιά γκοντιαβέρ, πρέπει τι αγαβάς ανταλά σημαντικές αλήθειες ντα τι μουκχάς-λεν τι σικαβέν αμένγκε σο τι τραμπίνας ντα σο τι κεράς αμαρέ ζωγιάτε.

5. Καβά ισί ο αποτέλεσμας κάνα ο τζενέ να μανγκένα τι πακιάν ότι σάντε κατά Ιεχωβά αβέλα η αληθινή σοφία;

⁵ Μπουτ τζενέ σο αρακχάσα κο έργος βακερένα ότι ο πράγματα οπράλ κι πφουβ ισί μπουτ σουκάρ σχεδιασμέ. Αλλά να μανγκένα τι πακιάν ότι κάποιος λατσσαρντάς-λεν. Γιαβερά βακερένα ότι πακιάνα κο Ντεβέλ, αλλά ο κανόνες ι Γραφιάκε ντικχίντιβενα λένγκε μπουτ πουρανέ ντα τραμπίνενα τι τζουβντιόν αντικάς σαρ μανγκένα βον. Καβά ισί ο αποτέλεσμας; Αβιλό πο λατσσό ο ντουνιάς επειδή ο τζενέ ντένα μπέσα κι σοφία σο τθερένα βον ντα όχι κι σοφία κι Ντεβλέσκι; Ισί μπαγιά ευτυχισμέ ή τθερένα κάτι λατσσό τι μπεκλεντίνεν; Σαρέ οντουλά σο ντικχάσα σικαβένα καζόμ μπαγιά ισί ακαλά λάφια: «Να υπαρχίντιβελα σοφία . . . κόντρα κο Ιεχωβά». (Παρ. 21:​30) Ανταβά τσσίντελα-αμέν μα τι τσσιναβάς τι μανγκάς κατά Ιεχωβά τι ντελ-αμέν αληθινή σοφία! Δυστυχώς, ο πο μπουτ τζενέ να κερένα-λες ανταβά. Σόσκε;

6. Καλά τζενέ να μανγκένα τι ασουνέν ο βίκος σο ντέλα η αληθινή σοφία σαρ αγαβάσα κατά εδάφια Παροιμίες 1:​22-25;

⁶ Μπουτ τζενέ πφάντενα πουμαρέ κανά κάνα η αληθινή σοφία «ντέλα βίκος ζουρανές κο ντρομ». Σαρ βακερέλα η Γραφή, ισί τριν ομάδες τζενένγκε σο να μανγκένα τι ασουνέν ι σοφία: οντουλά «σο να τζανένα μπουτ πράγματα», οντουλά «σο πρασάνα» ντα οντουλά «σο να τθερένα γκοντί». (Διαβάνεν Παροιμίες 1:​22-25) Ακανά κα ντικχάς πο λατσσές σόσκε ανταλά τζενέ να μανγκένα τι ασουνέν ι σοφία ι Ντεβλέσκι ντα σο τι κεράς για μα τι αβάς αμέν-ντα σαρ λέντε.

7. Σόσκε μερικά τζενέ τραμπίνενα “μα τι τζανέν μπουτ πράγματα”;

⁷ Οντουλά «σο να τζανένα μπουτ πράγματα» ισί τζενέ σο χουχάντιβενα εύκολα ντα πακιάνα σο-ντα ασουνένα. (Παρ. 14:​15, υποσ.)  Αρακχάσα μπουτ φαρ ασακέ τζενέν κο έργος σο κεράσα. Σκεφτίνεν, για παράδειγμας, ι εκατομμύριε τζενέν σο χουχάντιλε είτε κατά παπάζια είτε οντουλένταρ σο κερένα κουμάντος κο ντουνιάς. Μερικοί σαστίνενα κάνα σικλιόνα ότι χουχάντιλε λένταρ. Αλλά ο τζενέ σο βακέρντιβενα κο εδάφιος Παροιμίες 1:​22 τραμπίνενα τι ατσσόν κο χάνικ πράγματα σο τζανένα σόσκε αντικάς μπεϊντίνενα. (Ιερ. 5:​31) Κερένα οντουβά σο ντέλα λένγκο γκι ντα να μανγκένα τι σικλιόν σο βακερέλα η Γραφή ούτε τι ντεν καν κο κανόνες σο τθερέλα. Μπουτ τζενέ ισί σαρ εκ μπουτ πιστή πι θρησκειάτε τζουβέλ κο Καναδάς, σο βακερντάς εκχέ Μαρτυράσκε: «Άμα αμαρό παπάζι χουχαντάς-αμέν, βοβ φταίνελα, όχι αμέν!» Σίγουρα, αμέν να μανγκάσα τι μοιάζας οντουλέντε σο μπεϊντίνενα τι ατσσόν κο καρανίκι, σαρ τι βακεράας!​—Παρ. 1:​32· 27:12.

8. Σο κα βοηθίνελ-αμέν τι αβάς γκοντιαβέρ;

⁸ Η Γραφή βακερέλα αμένγκε μπουτ σωστά μα τι ατσσάς κο χάνικ πράγματα σο τζανάσα, αλλά “τι μπαριαράς αμαρί ικανότητα τι αγαβάς”. (1 Κορ. 14:​20) Αβάσα γκοντιαβέρ κάνα κεράσα αμαρέ ζωγιάτε ο αρχές ι Γραφιάκε. Χάνικ χάνικ, ντικχάσα σαρ βοηθίνελα-αμέν η Γραφή τι νασάς ντουρ προβληματένταρ ντα τι λας γκοντιαβέρ αποφάσεις. Ισί λατσσό τι σκεφτίνας ο αποφάσεις σο τθεράσα λιντό. Άμα κεράσα μελέτη ντα τζάσα κο συναθροίσεις χάνικ βακίτι ακανά, κα μπορίναας τι πουτσάς-αμέν σόσκε να ντινάμ ατζέκ αμαρό λάφι κο Ιεχωβά τι τζουβντιάς λέσκε ντα να μπολντιλάμ. Άμα ισινάμ μπολντέ, σικλιάσα πο λατσσές τι βακεράς ντα τι σικλιαράς ο λατσσέ αμπέρια; Σικαβένα αμαρέ αποφάσεις ότι ντάσα καν κο αρχές κι Γραφιάκε; Συμπεριφερίντιβασα ι γιαβερένγκε αντικάς σαρ κα συμπεριφερίντιβελας λένγκε ο Ιησούς; Άμα αγαβάσα ότι χρειαζίντιβελα τι κεράς αλλαγές, τι ντας προσοχή κο λάφια κι Ιεχωβάσκε, σο «κερένα οντουλέν σο να τζανένα μπουτ πράγματα τι αβέν γκοντιαβέρ».​—Ψαλμ. 19:7.

9. Σαρ σικαβένα οντουλά «σο πρασάνα» ότι να μανγκένα τι ασουνέν ι σοφία;

⁹ Η δεύτερη ομάδα τζενένγκι σο να μανγκένα τι ασουνέν ι Ντεβλέσκι σοφία ισί οντουλά «σο πρασάνα». Μπάζιμα, αρακχάσα ασακέ τζενέν κο έργος. Μπεϊντίνενα τι πρασάν. (Ψαλμ. 123:4) Η Γραφή βακερντάας ότι κο τελευταία ντιβεσά κα αβένας μπουτ ασακέ τζενέ. (2 Πέτρ. 3:3, 4) Σαρ ο τζαμουτρέ ι δίκαιε Λωτίσκε, ο τζενέ αντιβές να ασουνένα οντουλά σο βακερντάς ο Ντεβέλ. (Γέν. 19:​14) Μπουτ λένταρ, ασάνα πουμένγκε οντουλέντζαρ σο ντένα καν κο αρχές κι Γραφιάκε. Κερένα-λες ανταβά σόσκε μανγκένα μπέτι πράγματα. (Ιούδα 7, 17, 18) Οντουλά σο βακερέλα η Γραφή λένγκε ταιριάνενα ντιπ ι αποστατόνγκε ντα γιαβερένγκε σο γκιλέ κόντρα κο Ιεχωβά!

10. Σο μπορίνασα τι κεράς για μα τι λας ο ντρομ οντουλένγκο σο πρασάνα σαρ βακερέλα ο εδάφιος Ψαλμός 1:1;

¹⁰ Σαρ μπορίνασα τι αρακχαβάς-αμέν για μα τι λας ο ντρομ οντουλένγκο σο πρασάνα; Εκ τρόπος ισί μα τι κεράς παρέα οντουλέντζαρ σο πάντα κερένα παράπονα. (Διαβάνεν Ψαλμός 1:1) Ανταβά μανγκέλα τι βακερέλ ότι να ασουνάσα ούτε διαβάνασα τίποτα σο αβέλα κατά αποστάτες. Αγαβάσα ότι, άμα να κα τθεράς αμαρί γκοντί, εύκολα κα αρχίναας τι κεράς παράπονα ντα τι χασαράς αμαρί μπέσα κο Ιεχωβά ντα κο οδηγίες σο λάσα αντράλ κατά οργάνωση λέσκι. Οτθάρ, κα αβέλας λατσσό τι πουτσάς-αμέν: “Μήπως ισινόμ σικλό τι κεράβ παράπονα κάνα λάσα νεβέ οδηγίες ή αβέλα εκ αλλαγή κο τρόπος σο αγαβάσα κάτι; Μήπως νικιόλα μάνταρ μα τι κεράβ λατσσό λάφι οντουλένγκε σο τθερένα ευθύνη;” Κάνα σιγκιαράσα τι τσσιναβάς ασακέ πράγματα, αβέλα ο γκι ι Ιεχωβάσκο.​—Παρ. 3:​34, 35.

11. Σαρ ντικχένα οντουλά «σο να τθερένα γκοντί» ο πάκι κανόνες ι Ιεχωβάσκε;

¹¹ Η τρίτη ομάδα τζενένγκι σο να μανγκένα τι ασουνέν ι σοφία ισί οντουλά «σο να τθερένα γκοντί». Να τθερένα γκοντί σόσκε να μανγκένα  τι κερέν πουμαρέ ζωγιάτε ο πάκι νόμοι ι Ντεβλέσκε. Οκιά μπάνταρ, κερένα οντουβά σο ντικχίντιβελα σωστός λένγκε γιακχίντε. (Παρ. 12:​15) Ανταλά τζενέ τζάνα κόντρα κο Ιεχωβά, Οντουλέστε σο λέσταρ αβέλα η σοφία. (Ψαλμ. 53:1) Κάνα αρακχάσα-λεν κο έργος, μπουτ φαρ κερένα αμένγκε μπουτ μπέτι λάφι επειδή σεβάνασα ο κανόνες ι Γραφιάκε. Αλλά βον να τθερένα τι ντεν-αμέν πο λατσσί ζωή. Η Γραφή βακερέλα: «Οντουβά σο να τθερέλα γκοντί ναστί ερεσέλα κι αληθινή σοφία· κι μπαρί πόρτα κι τθεμέσκι να τθερέλα καέκ λάφι τι βακερέλ». (Παρ. 24:7) Ασακέ τζενέ ναστί ντένα καέκ γκοντιαβέρ συμβουλή. Άκ’ σόσκε ο Ιεχωβά βακερέλα αμένγκε τι “ατσσάς ντουρ οντουλέσταρ σο να τθερέλα γκοντί”!​—Παρ. 14:7.

12. Σο κα βοηθίνελ-αμέν μα τι αβάς σαρ οντουλά σο να τθερένα γκοντί;

¹² Αμέν να ισινάμ σαρ ο τζενέ σο μισίνενα ι Ιεχωβάσκε συμβουλές. Οκιά μπάνταρ, σικλιάσα τι μανγκάς ο τρόπος σο σκεφτίνελα ο Ντεβέλ, σο αντρέ ισί σαρέ λέσκε κανόνες-ντα. Σικλιάσα τι μανγκάς ατζέ πο μπουτ ο τρόπος σο σκεφτίνελα ο Ιεχωβά κάνα ανάσα αμαρέ γκοντιάτε σο αβέλα-πες οντουλένγκε σο ντένα καν ντα σο αβέλα-πες οντουλένγκε σο να ντένα καν. Ντικχέν ο προβλήματα σο ανένα ο τζενέ πουμαρέ νεαυτόσκε επειδή να τθερένα γκοντί ντα να μανγκένα τι ασουνέν ο γκοντιαβέρ συμβουλές ι Ιεχωβάσκε. Σοράν, σκεφτίνεν καζόμ πο λατσσί ισί τουμαρί ζωή επειδή ντένα καν κο Ντεβέλ.​—Ψαλμ. 32:8, 10.

13. Ζορισκιαρέλα-αμέν ο Ιεχωβά τι ντας καν λέσκε γκοντιαβέρ συμβουλέντε;

¹³ Ο Ιεχωβά ντέλα πο γκοντιαβέρ συμβουλές σαριλέντε, αλλά να ζορισκιαρέλα καεκχές τι ασουνέλ-λεν. Όμως, βακερέλα σο αβέλα-πες κάνα ο τζενέ να ασουνένα λέσκι σοφία. (Παρ. 1:​29-32) Οντουλά σο τραμπίνενα μα τι ασουνέν ι Ιεχωβάς «κα ντικχέν ο μπέτι αποτελέσματα σο κα ανέλ λένγκε ο ντρομ σο λιντέ». Σοράν, ο τρόπος σο τζουβντιόνα κα ανέλ λένγκε σάντε στεναχώρια, προβλήματα ντα κο τέλος καταστροφή. Οκιά μπάνταρ, οντουλένγκε σο ασουνένα ο γκοντιαβέρ συμβουλές ι Ιεχωβάσκε ντα κερένα-λεν, βακέρντιβελα ακαβά: «Οντουβά σο ασουνέλα-μαν κα αβέλ αρακχαντό οτθέ σο μπεσέλα ντα να κα νταρέλ μα τι καταστραφίντιβελ».​—Παρ. 1:33.

14, 15. Σο σικλιάσα κατά εδάφιος Παροιμίες 4:23;

¹⁴ Κάνα κεράσα αμαρέ ζωγιάτε ι σοφία ι Ντεβλέσκι, ντικχάσα πάντα λατσσιπέ. Σαρ ντικχλάμ, ο Ιεχωβά κερντάς τι αρακχίντιβεν εύκολα λέσκε γκοντιαβέρ συμβουλές. Για παράδειγμας, κο βιβλίος Παροιμίες, ντέλα συμβουλές σο πάντα κα κερέν πο λατσσί αμαρί ζωή άμα ντάσα καν λέντε. Κα ντικχάς σάντε σταρ παραδείγματα.

¹⁵ Αρακχαβέν τουμαρό γκι. Η Γραφή βακερέλα: «Πο μπουτ σαρέ οντουλένταρ σο αρακχαβέσα, αράκχαβ το γκι, σόσκε λέσταρ ισί ο πηγές ι ζωγιάκε». (Παρ. 4:​23) Ανέν τουμαρέ γκοντιάτε σο χρειαζίντιβελα τι κεράς για τι αρακχαβάς  αμαρί καρδιά. Πρέπει τι χας χαμπέ σο κερέλα λατσσιπέ, τι γυμνάντιβας καζόμ χρειαζίντιβελα ντα τι τσσιναβάς πράγματα σο κερένα ζιάνι. Κάτι ασακό κεράσα για τι αρακχαβάς αμαρό γκι-ντα. Παρβαράσα-αμέν κάθε ντιβές κατά Λάφι ι Ντεβλέσκο. Προετοιμάντιβασα ι συναθροισιένγκε, τζάσα οτθέ ντα ντάσα απαντήσεις. Να τσσιναβάσα τι κεράς σαρέ αμαρέ γκίσαρ μπουτ πράγματα κο έργος. Ντα ατσσάσα ντουρ πραγματένταρ σο κερένα ζιάνι κο τρόπος σο σκεφτίνασα, σαρ ισί η διασκέδαση σο τθερέλα λουμνικανέ πράγματα ντα ο μπέτι παρέες.

16. Σόσκε ο εδάφια Παροιμίες 23:4, 5 βοηθίνενα-αμέν αζόμ μπουτ αντιβές;

¹⁶ Τι ερεσέν-τουμέν οντουλά σο τθερένα. Η Γραφή ντέλα ακαγιά συμβουλή: «Μα μαρ-τουτ αζόμ μπουτ τι χουλάνιβες. . . . Κάνα κα βουρτίνες τι ντικχές ο χουλανιπέ, να κα αβέλ οτθέ, σόσκε σίγουρα κα νικαβέλ πακά σαρ αετός ντα κα ιριάλ οπρέ». (Παρ. 23:4, 5) Ο χουλανιπέ χασάρντιβελα εύκολα. Όμως, μπουτέ χουλανένγκι ντα τσορορένγκι γκοντί αντιβές ισί κο λοβέ. Ανταβά κερέλα-λεν μπουτ φαρ τι συμπεριφερίντιβεν τροπόσαρ σο κερέλα ζιάνι λένγκε ναβέστε, κο σχέσεις σο τθερένα ι γιαβερέντζαρ, ατζέ-ντα λένγκε υγειάτε. (Παρ. 28:​20· 1 Τιμ. 6:9, 10) Οκιά μπάνταρ, η σοφία βοηθίνελα-αμέν μα τι τθεράς αζόμ μπουτ αμαρί γκοντί κο λοβέ. Ντα ανταβά κα βοηθίνελ-αμέν μα τι αβάς μπίτσαλε γιακχάκε, αλλά τι ερεσέν-αμέν οντουλά σο τθεράσα ντα τι αβάς ευτυχισμέ.​—Εκκλ. 7:12.

17. Σαρ μπορίνασα τι τθεράς ι «τσσιπ ι γκοντιαβέρ τζενένγκι» σο βακέρντιβελα κο εδάφιος Παροιμίες 12:18;

¹⁷ Σκεφτίνεν πριν τι κερέν λάφι. Άμα να τθεράσα αμαρί γκοντί, κα κεράς μπαρό ζιάνι αμαρέ λαφίντζαρ. Η Γραφή βακερέλα: «Κάνα εκ τζενό κερέλα λάφι χωρίς τι σκεφτίνελ ισί σαρ τι ντέλα ι γιαβερέν τσσουριάσαρ, αλλά η τσσιπ ι γκοντιαβέρ τζενένγκι κερέλα λατσσιπέ». (Παρ. 12:​18) Τζάσα-λεν λατσσές ι γιαβερέντζαρ κάνα να κεράσα κουτσομπολιός ι ελαττωματένγκε σο τθερένα ο γιαβερά. (Παρ. 20:​19) Άμα μανγκάσα αμαρέ λάφια τι κοβλιαρέν ι ντουκχ ι γιαβερένγκι ντα μα τι κερέν-λεν τι ντουκχάν, πρέπει τι μουκχάς ο Λάφι ι Ντεβλέσκο τι πφερέλ αμαρό γκι πι σικλιαριμάσαρ. (Λουκ. 6:​45) Κάνα σκεφτίνασα λατσσές οντουλά σο βακερέλα η Γραφή, αμαρέ λάφια μπορίνενα  τι αβέν γκοντιαβέρ ντα αντικάς τι ντεν ζορ ι γιαβερέν.​—Παρ. 18:4.

18. Σαρ κα τθεράς επιτυχία κο έργος άμα κεράσα ο εδάφιος Παροιμίες 24:6;

¹⁸ Ντεν καν κο οδηγίες. Η Γραφή ντέλα ακαγιά σημαντική συμβουλή για τι τθεράς επιτυχία: «Γκοντιαβέρ συμβουλέντζαρ κα κερές το τζένγκι, ντα ισί επιτυχία κάνα μπουτ τζενέ σο τθερένα σοφία βακερένα πουμαρέ απόψεις ο εκ κο γιαβέρ». (Παρ. 24:6, υποσ.) Σκεφτίνεν σαρ βοηθίνελα-αμέν ανταβά εδάφιος τι τθεράς επιτυχία κάνα βακεράσα ντα σικλιαράσα ο λατσσέ αμπέρια. Αντίς τι κεράς έργος ντα τι σικλιαράς αντικάς σαρ μανγκάσα αμέν, μαράσα-αμέν τι κεράς οντουλά σο βακέρντιβενα αμένγκε. Λάσα γκοντιαβέρ οδηγίες αμαρέ συναθροισιέντε, σο οτθέ σικλιάσα κατά σουκάρ τρόπος σο σικλιαρένα γιαβερά αντράλ κατά Γραφή. Επίσης, η οργάνωση ι Ιεχωβάσκι ντέλα-αμέν μπουτ λατσσέ εργαλεία​—εκδόσεις ντα βίντεα—​σο βοηθίνενα ι τζενέν τι αγαβέν ι Γραφή. Σικλιόνα τουμέν τι χρησιμοποιήνεν λατσσές ανταλά εργαλεία;

19. Σαρ νιωθίνενα τουμέν ι γκοντιαβέρ συμβουλένγκε σο ντέλα ο Ιεχωβά; (Παροιμίες 3:​13-18)

¹⁹ Διαβάνεν Παροιμίες 3:​13-18. Καζόμ μπαρί εκτίμηση τθεράσα ι λατσσέ συμβουλένγκε σο ισί κο Λάφι κι Ντεβλέσκο! Κάι κα αβάας άμα να κα τθεράας-λεν; Ανταλέ μαθημάστε, ντικχλάμ χάνικ γκοντιαβέρ συμβουλές κατά βιβλίος Παροιμίες. Σίγουρα, ο Ιεχωβά πφερντάς ι Γραφή γκοντιαβέρ λαφίντζαρ. Μανγκάσα σαρέ αμαρέ γκίσαρ τι ντας πάντα καν κο γκοντιαβέρ συμβουλές σο ντέλα ο Ιεχωβά. Ι πο μπουτ τζενένγκε, να τθερέλα αξία ι Ντεβλέσκι σοφία. Αλλά αμέν ισινάμ σίγουροι ότι «οντουλά σο ασταρένα-λα σικίς κα βακέρντιβεν ευτυχισμέ».