1. Σο μανγκέλα τι βακερέλ τι τθεράς «ανάγκη ο πνευματικά πράγματα», ντα σο σχέση τθερέλα η ευτυχία ανταλέσαρ;

 Η ΑΛΗΘΙΝΗ ευτυχία νανέ σάντε εκ σουκάρ συναίσθημας σο αβέλα ντα νασέλα. Εκ τζενό μπορίνελα τι αβέλ ευτυχισμέ σαρί πι ζωή. Σόσκε βακεράσα-λες ανταβά; Ο Ιησούς βακερντάς κι Επί του Όρους Ομιλία σο κερντάς: «Ευτυχισμέ ισί οντουλά σο αγαβένα ότι τθερένα ανάγκη ο πνευματικά πράγματα». (Ματθ. 5:3) O Ιησούς τζανέλας ότι ο τζενέ ισί κερντέ τι μανγκέν τι σικλιόν Οντουλέσκε σο λατσσαρντάς-λεν, ι Ιεχωβά Ντεβλέσκε, ντα τι ντεν-λες λατρεία. Ανταβά μανγκέλα τι βακερέλ τι τθεράς «ανάγκη ο πνευματικά πράγματα». Ντα επειδή ο Ιεχωβά ισί “ο ευτυχισμέ Ντεβέλ”, οντουλά-ντα σο ντένα-λες λατρεία μπορίνενα τι αβέν ευτυχισμέ.​—1 Τιμ. 1:11.

2, 3. (α) Καλά γιαβερά τζενέ μπορίνενα τι αβέν ευτυχισμέ, σαρ βακερντάς ο Ιησούς; (β) Σο κα ντικχάς ανταλέ μαθημάστε, ντα σόσκε χρειαζίντιβασα-λες ανταβά;

² Μήπως χρειαζίντιβελα μα τι τθεράς καέκ πρόβλημας για τι αβάς ευτυχισμέ; Νάα. Πι ομιλιάτε, ο Ιησούς βακερντάς κάτι σο κερέλα αμένγκε εντύπωση. «Οντουλά σο τθερένα λύπη»​—είτε επειδή ισί πφανγκέ γκίσκε ιτιρί κατά αμαρτίες σο κερντέ είτε επειδή τθερένα μπουτ προβλήματα πουμαρέ ζωγιάτε—​μπορίνενα τι αβέν ευτυχισμέ. Ο Ιησούς βακερντάς-λες ανταβά οντουλένγκε-ντα «σο γκιλέ λέντζαρ κόντρα επειδή κερένα ο σωστός» ή οντουλένγκε σο “πρασάνα-λεν” ο γιαβερά επειδή ισί μαθητές ι Χριστόσκε. (Ματθ. 5:4, 10, 11) Αλλά σαρ αβέλα-πες τι αβάς μπαγιά ευτυχισμέ άμα νακχάσα κάτι ασακό;

³ Ανταλέ λαφίντζαρ, ο Ιησούς μανγκέλας τι σικλιαρέλ-αμέν ότι η ευτυχία αβέλα, όχι κάνα να τθεράσα καέκ πρόβλημας αμαρέ ζωγιάτε, αλλά κάνα ιτσσαράσα ι ανάγκη σο τθεράσα πνευματικέ πραγματένγκε ντα τζάσα πο πασέ κο Ντεβέλ. (Ιακ. 4:8) Σαρ μπορίνασα τι κεράς-λες ανταβά; Ανταλέ μαθημάστε, κα ντικχάς  τριν πράγματα σο χρειαζίντιβελα τι κεράς για τι αβάς μπαγιά ευτυχισμέ.

4. Καβά ισί ο πρώτος πράγμας σο πρέπει τι κεράς για τι αβάς μπαγιά ευτυχισμέ; (Ψαλμός 1:​1-3)

⁴ ΠΡΩΤΟΣ ΠΡΑΓΜΑΣ: Για τι αβάς μπαγιά ευτυχισμέ, πρέπει τι χας πνευματικός χαμπέ. Εμ ο τζενέ εμ ο ζώα πρέπει τι χαν κανονικός χαμπέ για τι τζουβντιόν. Αλλά σάντε αμέν ο τζενέ μπορίνασα τι χας πνευματικός χαμπέ, ντα ισί κάτι σο τθεράσα-λες ανάγκη. Άκ’ σόσκε ο Ιησούς βακερντάς: «Ο τζενό δεν πρέπει τι τζουβντιόλ σάντε μαντρέσαρ, αλλά ι κάθε λαφίσαρ σο νικιόλα κατά Ιεχωβάσκο μούι». (Ματθ. 4:4) Οτθάρ, μα τι μουκχάς τι νακχέλ καέκ ντιβές χωρίς τι λας πνευματικός χαμπέ κατά Λάφι ι Ντεβλέσκο, κατά Αγία Γραφή σο τθερέλα μπαρί αξία. Ο ψαλμωδός αγαντάς: «Ευτυχισμέ ισί ο τζενό σο . . . αρακχέλα χαρά κο νόμος κι Ιεχωβάσκο ντα λέσκο νόμος διαβάνελα ντα ανέλα πι γκοντιάτε ντισάρα ντα ιράτ».​—Διαβάνεν Ψαλμός 1:​1-3.

5, 6. (α) Σο μπορίνασα τι σικλιάς κατά Αγία Γραφή; (β) Σαρ μπορίνελα τι βοηθίνελ-αμέν ο διάβασμας ι Γραφιάκο;

⁵ Επειδή ο Ιεχωβά μανγκέλα-αμέν, σικαντάς αμένγκε κι Γραφή σο πρέπει τι κεράς για τι τζουβντιάς ευτυχισμέ. Σικλιάσα καβά ισί λέσκο σκοπός αμαρέ ζωγιάκε. Σικλιάσα σαρ τι αβάς πο πασέ λέστε ντα σο τι κεράς για τι συγχωρίντιβεν αμαρέ αμαρτίες. Ντα σικλιάσα ι μπουτ σουκάρ πραγματένγκε σο ντινάς-αμέν πο λάφι τι τθεράς κο ντιβεσά σο κα αβέν. (Ιερ. 29:​11) Ανταλά αλήθειες σο αρακχάσα καζόμ σικλιαράσα-αμέν κατά Γραφή πφερένα αμαρό γκι χαρά!

⁶ Τζανάσα ότι η Αγία Γραφή ισί πφερντί συμβουλές σο βοηθίνενα-αμέν κάθε ντιβές αμαρέ ζωγιάτε. Κάνα κεράσα ανταλά συμβουλές, μπορίνασα τι αβάς ευτυχισμέ. Κάνα-ντα τι νιωθίνεν ότι χασαρντέν τουμαρί ζορ κατά  προβλήματα, ντεν πο μπουτ τουμαρέ σαατίσταρ για τι διαβάνεν ντα τι σκεφτίνεν λατσσές ο Λάφι ι Ιεχωβάσκο. Ο Ιησούς βακερντάς: «Ευτυχισμέ ισί οντουλά σο ασουνένα ο λάφια ι Ντεβλέσκε ντα κερένα-λεν!»​—Λουκ. 11:28.

7. Σαρ κα βοηθίντιβεν καζόμ πο μπουτ αβέλα-πες κατά σαάτι σο ντένα για τι διαβάνεν ο Λάφι ι Ντεβλέσκο;

⁷ Κάνα διαβάνενα ο Λάφι ι Ντεβλέσκο, ντεν τουμαρέ σαατίσταρ για τι απολαμβάνεν οντουλά σο διαβάνενα. Για παράδειγμας, μπέκιμ τι αβιλό-πες τουμένγκε ακαβά: Εκ τζενό κερέλα εκ χαμπέ σο μπεϊντίνενα μπουτ. Αλλά είτε επειδή να ερεσαβένα είτε επειδή τθερένα τουμαρί γκοντί γιαβερτθέ, χάνα-λες αζόμ σουγκό σο να απολαμβάνενα μπαγιά οντουβά σο χάνα. Κάνα μπιτισκιαρένα, αγαβένα καζόμ σουγκό χαλέν ντα μετανιώνενα σο να ντινέν τουμαρέ σαατίσταρ για τι απολαμβάνεν ι κάθε μπουκιά. Κάτι ασακό κα μπορίνελας τι αβέλ-πες κάνα διαβάνασα ι Γραφή. Μπάζιμα, διαβάνασα αζόμ σουγκό σο να αγαβάσα ντα να απολαμβάνασα μπαγιά λάκε λάφια. Ντεν τουμαρέ σαατίσταρ για τι απολαμβάνεν ο διάβασμας ι Ντεβλέσκε Λαφίσκο, ανέν τουμαρέ γκοντιάτε οντουλά σο ισί οτθέ, κερέν φαντασία οντουλά σο ασούντιβενα, ντα σκεφτίνεν οντουλά σο διαβάνενα. Ανταβά κα κερέλ-τουμέν πο ευτυχισμέ.

8. Σαρ κερέλα «ο πιστός ντα φρόνιμος δούλος» ι ευθύνη σο τθερέλα; (Ντικχέν ι υποσημείωση-ντα.)

⁸ Ο Ιησούς τσσουντάς ι “πιστέ ντα φρόνιμε δουλός” για τι ντελ χαμπέ αζομάν σο πρέπει τι ντελ-λες, ντα μπαγιά τθεράσα μπουτ λατσσό πνευματικός χαμπέ. * (Ματθ. 24:​45) Σο-ντα νικαβέλα ο πιστός δούλος βασίντιβελα κι Γραφή σο ισί γραμμέ ι Ντεβλέσκε πνευμάσαρ. (1 Θεσ. 2:​13) Άρα, ανταβά πνευματικός χαμπέ βοηθίνελα-αμέν τι σικλιάς ο τρόπος σο σκεφτίνελα ο Ιεχωβά, αντικάς σαρ σικάντιβελα κι Γραφή. Άκ’ σόσκε διαβάνασα ο περιοδικά Σκοπιά ντα Ξύπνα!, αλλά εμ οντουλά σο ισί κο ιστότοπος jw.org. Προετοιμάντιβασα ι συναθροισιάκε σο αβέλα-πες αντρέ κι εβδομάδα ντα ι συναθροισιάκε σο αβέλα-πες κο σαββατοκύριακος. Ντα ντικχάσα κάθε μάσεκ ο JW Broadcasting^® άμα ισί εκχέ τσσιμπάτε σο αγαβάσα. Άμα χάσα μπερεκέτι πνευματικός χαμπέ, κα μπορίνας τι κεράς ο δεύτερος-ντα πράγμας για τι αβάς μπαγιά ευτυχισμέ.

9. Καβά ισί ο δεύτερος πράγμας σο πρέπει τι κεράς για τι αβάς μπαγιά ευτυχισμέ;

⁹ ΔΕΥΤΕΡΟΣ ΠΡΑΓΜΑΣ: Για τι αβάς μπαγιά ευτυχισμέ, χρειαζίντιβελα τι ντας καν κο κανόνες κι Ιεχωβάσκε. Ο ψαλμωδός γραφιντάς: «Ευτυχισμέ ισί οντουβά σο νταρέλα κατά Ιεχωβά ντα πφιρέλα Λέσκε ντρομέστε». (Ψαλμ. 128:1) Νταράσα κατά Ιεχωβά μανγκέλα τι βακερέλ ότι σεβάνασα-λες αζόμ μπουτ σο μαράσα-αμέν μα τι κεράς κάτι σο κα πφανγκέλ λέσκο γκι. (Παρ. 16:6) Οτθάρ, να τσσιναβάσα τι κεράς ο πο λατσσό για τι ντας καν κο κανόνες κι Ντεβλέσκε σο σικαβένα ο σωστός ντα ο λάθος ντα σο βακέρντιβενα κι Αγία Γραφή. (2 Κορ. 7:1) Κα αβάς πο ευτυχισμέ άμα κεράσα ο πράγματα σο μανγκέλα ο Ιεχωβά ντα νασάσα ντουρ οντουλένταρ σο μισίνελα.​—Ψαλμ. 37:​27· 97:​10· Ρωμ. 12:9.

10. Καγιά ευθύνη τθεράσα σαρ βακερέλα ο εδάφιος Ρωμαίους 12:2;

¹⁰ Διαβάνεν Ρωμαίους 12:2. Εκ τζενό μπέκιμ τζανέλα ότι ο Ιεχωβά τθερέλα ο δικαίωμας τι βακερέλ σο ισί σωστός ντα σο ισί λάθος, αλλά πρέπει επίσης τι μανγκέλ τι ντελ καν κο κανόνες κι Ντεβλέσκε. Για παράδειγμας, εκ τζενό μπέκιμ τζανέλα ότι η κυβέρνηση τθερέλα ο δικαίωμας τι βακερέλ μέχρι καζόμ σουγκό τι νασέν ο αμάξια εκχέ ντρομέστε. Αλλά μπέκιμ να μανγκέλα τι ντελ καν. Οτθάρ, τζάλα πο σουγκό από ό,τι πρέπει. Αμέν σικαβάσα οντουλέντζαρ σο κεράσα ότι μπαγιά αμαρί ζωή ισί  πο λατσσί κάνα ντάσα καν κο κανόνες κι Ιεχωβάσκε. (Παρ. 12:​28) Αντικάς νιωθίνελας ο Δαβίδ-ντα. Άκ’ σόσκε βακερντάς ι Ιεχωβάσκε: «Σικλιαρέσα-μαν ο ντρομ ι ζωγιάκο. Οτθέ σο ισινάν τούι ισί μπαρί χαρά· κο δεξιά τούταρ ισί ευτυχία για πάντα».​—Ψαλμ. 16:11.

11, 12. (α) Σο πρέπει τι προσοχίνας κάνα ισινάμ στεναχωριμέ ή χασαρντάμ αμαρί ζορ; (β) Σαρ βοηθίνελα-αμέν ο εδάφιος Φιλιππησίους 4:8 κάνα τραμπίνασα διασκέδαση;

¹¹ Κάνα ισινάμ στεναχωριμέ ή χασαρντάμ αμαρί ζορ, μπορεί τι τθεράς ι ανάγκη τι διασκεδάνας για τι νασέλ αμαρί γκοντί κατά προβλήματα σο νακχάσα. Ανταβά ισί λογικός, αλλά πρέπει τι προσοχίνας μα τι χουχάντιβας ντα τι κεράς κάτι σο μισίνελα ο Ιεχωβά.​—Εφεσ. 5:​10-12, 15-17.

¹² Κι επιστολή σο μπουτσσαντάς κο Φιλιππησίους, ο απόστολος Παύλος βακερντάς ι Χριστιανόνγκε τι τθερέν πουμαρέ γκοντιάτε οντουλά σο ισί «δίκαια, . . . πάκι, . . . τσσίντενα ι τζενέν τι μανγκέν ι γιαβερέν . . . [ντα] ισί λατσσέ». (Διαβάνεν Φιλιππησίους 4:8) Παρόλο σο ο Παύλος να κερέλας λάφι για τη διασκέδαση, οντουλά σο γραφιντάς πρέπει τι κερέν-αμέν τι σκεφτίνας σο τραμπίνασα για τι διασκεδάνας. Σκεφτίνεν άμα ο γκιλιά, ο σιναμάδες, ο βιβλία ντα ο βιντεοπαιχνίδια σο τραμπίνενα ταιριάνενα ι λαφίντζαρ σο γραφιντάς ο Παύλος. Ανταβά κα βοηθίνελ-τουμέν τι αγαβέν καλά πράγματα ανταλένταρ κερένα ι Ντεβλέσκο γκι ντα καλά να κερένα-λες. Μανγκάσα τι τζουβντιάς αντικάς σαρ βακερένα ο κανόνες ι Ιεχωβάσκε. (Ψαλμ. 119:​1-3) Σοράν, με πάκι συνείδηση, μπορίνασα τι κεράς ο γιαβέρ πράγμας για τι αβάς μπαγιά ευτυχισμέ.​—Πράξ. 23:1.

13. Καβά ισί ο τρίτος πράγμας σο πρέπει τι κεράς για τι αβάς μπαγιά ευτυχισμέ; (Ιωάννης 4:​23, 24)

¹³ ΤΡΙΤΟΣ ΠΡΑΓΜΑΣ: Αβέν σίγουροι ότι η λατρεία ι Ιεχωβάσκι ισί πρώτη τουμαρέ ζωγιάτε. Ο Ιεχωβά λατσσαρντάς-αμέν, οντουλέσκε-ντα αξίνελα αμαρί λατρεία. (Αποκ. 4:​11· 14:6, 7) Οτθάρ, ο πο σημαντικός πράγμας αμαρέ ζωγιάτε πρέπει τι αβέλ τι ντας-λες λατρεία αντικάς σαρ μανγκέλα, «με πνεύμας ντα αλήθεια». (Διαβάνεν Ιωάννης 4:​23, 24) Μανγκάσα τι σικαβέλ αμένγκε ο άγιος πνεύμας ι Ντεβλέσκο σαρ τι ντας λατρεία για τι αβέλ αντικάς σαρ βακερένα ο αλήθειες σο ισί Λέσκε Λαφίστε. Αμαρί λατρεία πρέπει τι αβέλ πρώτη ατζέ-ντα άμα τζουβντιάσα εκχέ τθεμέστε σο να μουκχένα-αμέν τι κεράς κάποια πράγματα ή τσσιναβένα ντιπ ο έργος. Ακανά, πο μπουτ από 100 πφραλά ντα πφενιά ισί φυλακισμέ σάντε επειδή ισί Μάρτυρες ι Ιεχωβάσκε. * Αλλά ατζέ-ντα αντικάς, κερένα χαράσαρ σο νακχέλα λένγκε βαστένταρ για τι προσευχίντιβεν, τι σικλιαρέν-πες κατά Γραφή ντα τι βακερέν γιαβερένγκε αμαρέ Ντεβλέσκε ντα λέσκε Βασιλειάκε! Κάνα ο γιαβερά πρασάνα-αμέν ή τζάνα αμέντζαρ κόντρα, μπορίνασα τι αβάς ευτυχισμέ σόσκε τζανάσα ότι ο Ιεχωβά ισί αμέντζαρ ντα ότι κα ευλογίνελ-αμέν.​—Ιακ. 1:​12· 1 Πέτρ. 4:14.

14. Σο αβιλό-πες εκχέ τερνέ πφραλέσκε κο Τατζικιστάν, ντα σόσκε;

¹⁴ Ισί αληθινές εμπειρίες σο σικαβένα ότι ο τριν πράγματα σο ντικχλάμ ακανά μπορίνενα μπαγιά τι κερέν-αμέν ευτυχισμέ, ατζέ-ντα άμα ο πράγματα αμαρέ ζωγιάτε ισί δύσκολα. Λεν για παράδειγμας οντουβά σο αβιλό-πες εκχέ πφραλέσκε σο ισί 19 μπρεσένγκο κο Τζοβιντόν Μπομποτζόνοφ κατά Τατζικιστάν, επειδή να μανγκλάς τι τζαλ κο στρατός. Κο ντιβές 4 Οκτωβρίου 2019, λιντέ-λες ζορίσαρ λέσκε κχερέσταρ, τσσουντέ-λες κι φυλακή για μασεκά ντα συμπεριφερίντιβενας λέσκε σαρ τι ισινέ εγκληματίας. Ανταγιά αδικία ασούντιλι  σαρό κο ντουνιάς. Λιντιλό αμπέρι ότι νταπλέ-λες καζόμ προσπαθίνενας τι κερέν-λες τι χαλ σοβέλ σαρ στρατιώτης ντα τι ιρίλ στρατιωτικά σέα. Σοράν ανταλέσταρ, καταδικασάλο ντα μπουτσσάντιλο εκχέ στρατοπεδόστε για τι κερέλ μπουτί μέχρι σο τελικά ο πρόεδρος ι τθεμέσκο σικαντάς λέσκε λατσσιπέ ντα ντινάς διαταγή τι νικιόλ κατά φυλακή. Σαρό οντουβά βακίτι, ο Τζοβιντόν ατσσικιαρντάς σαστό πο γκι ντα να τσσιναντάς τι αβέλ ευτυχισμέ. Σαρ; Να τσσιναντάς ποτές τι αγαβέλ ότι τθερέλα ανάγκη ο πνευματικά πράγματα.

15. Σαρ χάλας πνευματικός χαμπέ ο Τζοβιντόν καζόμ ισινέ κι φυλακή;

¹⁵ Καζόμ ισινέ κι φυλακή, ο Τζοβιντόν χάλας πνευματικός χαμπέ, ατζέ-ντα κάνα να τθερέλας ι Γραφή ή αμαρέ έντυπα. Σαρ; Πφραλά ντα πφενιά οτθάρ, γκερένας λέσκε χαμπίματα ντα γραφίνενας ο εδάφιος ι ντιβεσέσκο οπράλ κο τσάντες ι ψωνίντζαρ. Αντικάς, μπορίνελας τι διαβάνελ ι Γραφή ντα τι σκεφτίνελ-λα λατσσές κάθε ντιβές. Κάνα νικίστιλο κατά φυλακή, ντινάς ακαγιά συμβουλή οντουλένγκε σο ατζέ να νακχλέ αζόμ μπαρέ δοκιμασίες: «Ισί μπουτ σημαντικός ακανά σο ισινέν ελεύθεροι τι κερέν ο πο λατσσό για τι σικλιόν πο μπουτ ι Ιεχωβάσκε αντράλ λέσκε Λαφίσταρ ντα κατά έντυπα σο τθεράσα».

16. Σο τθερέλας πι γκοντιάτε ο Τζοβιντόν;

¹⁶ Αμαρό πφραλ ντέλας καν κο κανόνες κι Ιεχωβάσκε.  Αντίς τι μανγκέλ ντα τι κερέλ μπέτι πράγματα, τθερέλας πι γκοντιάτε ι Ιεχωβάς ντα οντουλά σο ισί σημαντικά Λέσκε. Ο Τζοβιντόν μπεϊντίνελας μπουτ τι ντικχέλ ο σουκάρ πράγματα σο λατσσαρντάς ο Ντεβέλ. Κάθε πρωί ιστικιαρένας-λες ο τσιρικλέ σο μπασένας. Αρατί ντικχέλας ο τσσιμούτ ντα ο τσεργανιά. Βοβ βακερντάς: «Ανταλά δώρα ι Ιεχωβάσκε ντένας-μαν χαρά ντα ζορ». Κάνα εκτιμίνασα ο πνευματικά ντα ο υλικά πράγματα σο ντέλα-αμέν ο Ιεχωβά, αμαρό γκι χαιρίνελα, ντα ανταγιά χαρά βοηθίνελα-αμέν τι νταϊντίνας.

17. Άμα εκ τζενό μπορεί τι νακχέλα οντουβά σο νακχλάς ο Τζοβιντόν, σαρ βοηθίνενα-λες ο εδάφια 1 Πέτρου 1:6, 7;

¹⁷ Επίσης, ο Τζοβιντόν τσσουβέλας ι λατρεία ι Ιεχωβάσκι πρώτη. Τζανέλας καζόμ σημαντικός ισινέ τι ατσσικιαρέλ σαστό πο γκι κο αληθινός Ντεβέλ. Ο Ιησούς βακερντάς: «Κο Ιεχωβά τι Ντεβλέστε πρέπει τι ντες λατρεία ντα σάντε λες πρέπει τι υπηρετίνες». (Λουκ. 4:8) Διοικητές ντα στρατιώτες μανγκένας ζορίσαρ τι κερέν-λες τι μουκχέλ πι θρησκεία. Βοβ όμως ντισάρα ντα ιράτ προσευχίντιβελας αντράλ πι γκίσταρ ντα μανγκέλας κατά Ιεχωβά τι βοηθίνελ-λες τι ατσσόλ πιστός. Παρόλο σο νακχλάς αζόμ μπαρί αδικία, ο Τζοβιντόν να χασαρντάς ποτές πο πακιαϊπέ, ή γιαβέρτουλους πι πίστη. Οτθάρ, ακανά μπορίνελα τι χαιρίνελ μπουτ σόσκε τθερέλα κάτι σο να τθερέλας πριν τι λεν-λες ζορίσαρ κατά κχερ, τι νταπέν-λες ντα τι τσσουβέν-λες κι φυλακή. Ακανά λέσκο πακιαϊπέ ισί μπουτ ζουρανό σόσκε δοκιμασάλο.​—Διαβάνεν 1 Πέτρου 1:6, 7.

18. Σαρ μπορίνασα τι ατσσάς ευτυχισμέ;

¹⁸ Ο Ιεχωβά τζανέλα σο χρειαζίντιβασα για τι αβάς μπαγιά ευτυχισμέ. Άμα κα κερέν ο τριν πράγματα σο ντικχλάμ, μπορίνενα τι ατσσόν ευτυχισμέ παρόλο σο ισί μπαρέ δυσκολίες. Αζομάν κα μπορίνεν τι βακερέν τουμέν-ντα: «Ευτυχισμέ ισί ο λαός σο λέσκο Ντεβέλ ισί ο Ιεχωβά!»​—Ψαλμ. 144:15.