Ο μάννα ισινέ ο πο συνηθισμέ χαμπέ σο χάνας ο Ισραηλίτες ο 40 μπρεσά σο μπεσένας κι έρημος. (Έξοδ. 16:​35) Ο Ιεχωβά ντινάς επίσης ορτύκια ντουέ περιπτωσιέντε. (Έξοδ. 16:​12, 13· Αριθ. 11:​31) Όμως, ο Ισραηλίτες τθερένας χάνικ γιαβέρ-ντα πράγματα χαμάσκε.

Για παράδειγμας, ο Ιεχωβά μερικές φορές οδηγίνελας πι λαός «εκχέ τθανέσκε για τι ξεκουράντιβεν», σο υπαρχίντιβελας πανί τι πιν ντα χαμπέ τι χαν. (Αριθ. 10:​33) Εκ ανταλέ τθανένταρ ισινέ η όαση κι Αιλίμ, «σο υπαρχίντιβενας 12 πηγές πανίσκε ντα 70 φοίνικες». Ο φοίνικες ισινέ χουρμαδιές, δηλαδή ο δέντρα σο μπορίνενα τι ντικχέν κι φωτογραφία κι σελίδα 31. (Έξοδ. 15:​27) Ο βιβλίος Φυτά της Βίβλου (Plants of the Bible) βακερέλα ότι η χουρμαδιά, σο «υπαρχίντιβελα μπουτέ τθανέντε, . . . ισί ο πο συνηθισμέ φυτός σο χαλιόλα κι έρημος, ντα εκατομμύρια τζενέ λένα λέσταρ χαμπέ, λάδι ντα κερένα πουμαρέ κχερά».

Ο Ισραηλίτες μπορεί επίσης τι σταματισάλε σε εκ μπαρί όαση. (Όαση ισί εκ τθαν αντρέ κι έρημος σο τθερέλα δέντρα ντα πανί) Οντιά όαση αντιβές βακέρντιβελα Φεϊράν ντα ισί εκ χουρντό κομμάτι κατά ουάντι Φεϊράν. a Ανταβά ουάντι, σο ισί εκ λεν σο μπάζιμα τθερέλα πανί, «ισί 130 χιλιόμετρα ζούνι ντα ισί εκ κατά πο μπαρέ, πο σουκάρ ντα πο γνωστά ουάντι κο Σινά», βακερέλα ο βιβλίος Ανακαλύπτοντας τον Κόσμο της Βίβλου (Discovering the World of the Bible). Ο βιβλίος συνεχίνελα: «Αντρέ κο ουάντι, περίπου 45 χιλιόμετρα πριν τι τελειώνελ, υπαρχίντιβελα η όαση Φεϊράν, σο ισί μπουτ σουκάρ ντα πφερντί φοίνικες. Ανταγιά όαση ισί περίπου 5 χιλιόμετρα ζούνι ντα ισί περίπου 600 μέτρα οπρέ κατά ντεριάβ. Ισί αζόμ σουκάρ σο μπουτ τζενέ βακερένα ότι μοιάζελα κο κήπος της Εδέμ. Κατά πουρανέ μπρεσά, ο τζενέ μπεσένας οντουλέ τθανέντε επειδή τθερέλας χιλιάδες χουρμαδιές».

Κάνα νασλέ κατά Αίγυπτος, ο Ισραηλίτες λιντέ πουμέντζαρ βαρό, κοπάνιες για τι κερέν μαντρό ντα μπέκιμ μερικά γκιβά ντα λάδι. Όμως, ανταλά πράγματα να κα ατσσικιαρένας μπουτ. Ο λαός λιντάς επίσης πουμέντζαρ “μπρακέν, μπουσνίν ντα γκουρουβέν, εκ μπαρό αριθμός ζωόνγκο”. (Έξοδ. 12:​34⁠-39) Όμως, επειδή η ζωή κι έρημος ισινέ δύσκολη, μπουτ ζώα μάλλον μουλέ. Ο Ισραηλίτες μπορεί τι χαλέ μερικά ανταλένταρ. Γιαβερά μπορεί τι ντινέ-λεν σαρ θυσία, ατζέ-ντα ψεύτικε ντεβλέντε. b (Πράξ. 7:​39⁠-43) Όμως, ο Ισραηλίτες μπαριαρένας μερικά ζώα, σαρ ντικχίντιβελα κατά  λάφια σο βακερντάς λένγκε ο Ιεχωβά κάνα να σικαντέ πίστη: «Τουμαρέ τσσαβέ κα αβέν τσομπάνια κι έρημος 40 μπρεσά». (Αριθ. 14:​33) Οτθάρ, μάλλον λένγκε κοπάδια ντένας-λεν τθουτ ντα μπάζιμα μας, αλλά όχι αζόμ μπουτ σο κα ερεσένας για τι χαν περίπου τριν εκατομμύρια τζενέ για 40 μπρεσά. c

Κάι αρακχένας ο ζώα χαμπέ ντα πανί; d Οντιά εποχή, μπέκιμ υπαρχίντιβενας πο μπουτ μπρισιμά. Οτθάρ, ντέλας πο μπουτ φυτά κι έρημος. Η εγκυκλοπαίδεια Ενόραση στις Γραφές, Τόμος 1, βακερέλα ότι, πριν από 3.500 μπρεσά, «ο πανί κι Αραβία ισινέ πο μπουτ από ό,τι ακανά. Υπαρχίντιβενα μπουτ αχόρτ ντα σουκέ ουάντι, σο ισινέ λενιά κο πουρανέ μπρεσά. Ανταβά σικαβέλα ότι, κο πουρανέ μπρεσά, ο μπρισιμά ισινέ αζόμ μπουτ σο κερένας λενιά». Βέβαια, η έρημος ισινέ εκ τθαν σο ισινέ μπουτ δύσκολος τι τζουβντιόλ κάποιος. (Δευτ. 8:​14⁠-16) Άμα ο Ιεχωβά να ντέλας-λεν πανί αντράλ κατά θαύματα, εμ ο Ισραηλίτες εμ λένγκε ζώα σίγουρα κα μερένας.​—Έξοδ. 15:​22⁠-25· 17:​1⁠-6· Αριθ. 20:2, 11.

Ο Μωυσής βακερντάς κο Ισραηλίτες ότι ο Ιεχωβά παρβαρέλας-λεν ι μαννάσαρ “για τι κερέλ-λεν τι αγαβέν ότι ο τζενό να τζουβντιόλα σάντε μαντρέσαρ, αλλά ι κάθε λαφίσαρ σο αβέλα κατά Ιεχωβάσκο μούι”.​—Δευτ. 8:3.