1, 2. Καβά ισί ο πο λατσσό τρόπος τι σικλιαράς-αμέν κατά Γραφή; Βακερέν εκ παράδειγμας.

 ΣΚΕΦΤΙΝΕΝ ότι πρέπει τι αποφασίνεν άμα μανγκένα τι κινέν εκ κχερ. Σο κα μανγκένας τι ντικχέν πριν τι αποφασίνεν; Κα ερεσέλας-τουμέν σάντε εκ φωτογραφία σο σικαβέλα ο κχερ αβριάλ; Σίγουρα, κα μανγκένας τι τζαν πασάλ για τι πφιρέν ντονταλάι κατά κχερ, τι τσσουβέν-τουμέν αντρέ ντα τι ντικχέν σαρέ ο δωμάτια ντα καζόμ μπαρό ισί. Μπέκιμ τι μανγκένας ατζέ-ντα τι ντικχέν ο σχέδια ι κχερέσκε για τι αγαβέν ντιπ λατσσές σαρ χτίντιλο. Μάλλον κα μανγκένας τι ντικχέν σαρέ ο πράγματα κο κχερ σο σκεφτίνενα τι κινέν.

² Κάτι ασακό μπορίνασα τι κεράς κάνα διαβάνασα ι Γραφή-ντα. Εκ σπουδαγμέ τζενό σο ασχολίντιβελας ι Γραφιάσαρ βακερντάς ότι η Γραφή ισί σαρ «εκ μπουτ μπαρό κτίριος σο ισί μπουτ βουτσσό ντα ισί χτισμέ οπράλ σε θεμέλια σο ισί αχόρτ». Σαρ μπορίνασα τι τζανάς λατσσές οντουλά σο τθερέλα αντρέ η Γραφή; Άμα απλώς διαβάνενα-λα σουγκό μπορεί τι σικλιόν σάντε ο βασικές αλήθειες​—«ο βασικά πράγματα για το ιερά λάφια ι Ντεβλέσκε». (Εβρ. 5:​12) Αλλά αντικάς σαρ χρειαζίντιβελα τι τσσουβέν-τουμέν αντρέ κο κχερ για τι σικλιόν πο μπουτ λέσκε, χρειαζίντιβελα επίσης τι σικλιαρέν-τουμέν πο αχόρτ κατά Γραφή για τι αγαβέν-λα πο λατσσές. Εκ μπουτ σουκάρ τρόπος για τι σικλιαρέν-τουμέν κατά Γραφή ισί τι ντικχέν σαρ ο λάφια λάκε τθερένα σχέση ο εκ ι γιαβερέσαρ. Προσπαθίνεν τι αγαβέν όχι σάντε καλά αλήθειες πακιάνα, αλλά εμ σόσκε πακιάνα-λεν.

3. Σο βακερντάς ο απόστολος Παύλος πι πφραλένγκε ντα πι πφενίνγκε τι κερέν, ντα σόσκε; (Εφεσίους 3:​14⁠-19)

³ Για τι αγαβάς ντιπ λατσσές σαρέ οντουλά σο ισί κο Λάφι κι Ντεβλέσκο, πρέπει τι σικλιάς ο αχόρτ αλήθειες ι Γραφιάκε. Ο απόστολος Παύλος βακερντάς πι Χριστιανέ πφραλένγκε ντα πι πφενίνγκε τι σικλιαρέν-πες λατσσές κατά Λάφι ι Ντεβλέσκο για τι μπορίνεν τι «αγαβέν ντιπ καζόμ μπουγλί ντα μπαρί ντα  βουτσσί ντα αχόρτ ισί η αλήθεια». Αντικάς, κα “τθερένας [πο μπαρέ] ρίζες ντα κα αβένας σταθεροί” κι πίστη. (Διαβάνεν Εφεσίους 3:​14⁠-19) Αμέν-ντα χρειαζίντιβελα τι κεράς-λες ανταβά. Για τι ντικχάς σαρ μπορίνασα τι σικλιαράς-αμέν λατσσές κατά Λάφι ι Ντεβλέσκο για τι μπορίνας τι αγαβάς πο λατσσές οντουλά σο μανγκέλα τι βακερέλ.

4. Σο κα βοηθίνελ-αμέν τι τζας πο πασέ κο Ιεχωβά; Βακερέν παραδείγματα.

⁴ Σαρ Χριστιανοί, να ερεσέλα-αμέν τι αγαβάς σάντε ο βασικά πράγματα σο σικλιαρέλα η Γραφή. Ι βοηθειάσαρ σο ντέλα-αμέν ο άγιος πνεύμας ι Ντεβλέσκο, μανγκάσα τι σικλιάς «ατζέ-ντα ο βαθιά πράγματα ι Ντεβλέσκε». (1 Κορ. 2:9, 10) Κάνα σικλιαρένα-τουμέν κατά Γραφή, κα μπορίνενας τι ασχολίντιβεν εκχέ θεμάσαρ σο κα βοηθίνελ-τουμέν τι τζαν πο πασέ κο Ιεχωβά. Για παράδειγμας, κα μπορίνενας τι ρόντεν σαρ σικαβέλας πι αγάπη πι υπηρετόντε κο πουρανέ μπρεσά, ντα σαρ ανταβά σικαβέλα ότι μανγκέλα τουμέν-ντα. Κα μπορίνενας τι σικλιόν σαρ ο Ιεχωβά μανγκέλας τι ντεν-λες λατρεία ο Ισραηλίτες, ντα τι σκεφτίνεν σαρ μανγκέλα τι ντας-λες λατρεία αμέν αντιβές. Ή μπέκιμ κα μπορίνενας τι σικλιόν πο λατσσές ο προφητείες σο κερντάς ο Ιησούς τι νικιόν μπαγιά καζόμ κερέλας πο έργος ατθέ κι πφουβ.

5. Καβά θέμας κα μανγκένας τι ρόντεν καζόμ σικλιαρένα-τουμέν κατά Γραφή;

⁵ Μερικά τζενέ σο μπεϊντίνενα τι ρόντεν κι Γραφή βακερντέ κάποια πράγματα σο κα μανγκένας τι ρόντεν πο μπουτ. Μερικές κατά απαντήσεις λένγκε ισί κο πλαίσιος « Θέματα για τι Σικλιαράς-αμέν». Μπορίνενα τι αρακχέν μπουτ χαρά καζόμ σικλιαρένα-τουμέν ανταλέ θεματένταρ αντράλ κατά Ευρετήριο Εκδόσεων Σκοπιάς ή κατά Οδηγός Έρευνας για τους Μάρτυρες του Ιεχωβά. Κάνα σικλιαρένα-τουμέν κατά αχόρτ πράγματα ι Γραφιάκε μπορίνενα τι μπαριαρέν τουμαρί πίστη ντα “κα μπορίνεν τι σικλιόν ι Ντεβλέσκε”. (Παρ. 2:4, 5) Για τι ντικχάς ακανά μερικές αχόρτ αλήθειες σο μπορίνασα τι ρόντας.

6. (α) Σόσκε βακεράσα ότι γιαβέρ ισί ο σχέδιος ντα γιαβέρ ο σκοπός; (β) Σόσκε μπορίνασα τι βακεράς ότι ο σκοπός ι Ιεχωβάσκο ι τζενέσκε ντα ι πφουβιάκε «ατσσόλα για πάντα»; (Εφεσίους 3:11)

⁶ Σκεφτίνεν για παράδειγμας σο βακερέλα η Γραφή ι Ντεβλέσκε σκοπόσκε. Γιαβέρ ισί τι  τθεράς εκ σχέδιος ντα γιαβέρ ισί τι τθεράς σκοπός. Ο σχέδιος μοιάζελα εκχέ συγκεκριμέ ντρομέσαρ σο μπορίνελα τι γκερέλ-τουμέν οτθέ σο μανγκένα. Όμως ο σχέδιος μπορεί μα τι τζαλ λατσσές άμα κα αβέλ εκ εμπόδιος κο ντρομ. Ο σκοπός μοιάζελα εκχέ συγκεκριμέ τθανέσαρ σο μανγκάσα τι ερεσάς. Τζανάσα ακριβώς κατέ μανγκάσα τι τζας αλλά να υπαρχίντιβελα σάντε εκ ντρομ για τι ερεσάς οτθέ. Άμα εκ ντρομ ισί πφαντό, μπορίνασα τι λας εκ γιαβέρ. Ισινάμ πφερντέ εκτίμηση σο ο Ιεχωβά σικαντάς αμένγκε κι Γραφή χάνικ χάνικ πο “σκοπός σο ατσσόλα για πάντα”. (Εφεσ. 3:​11) Ο Ιεχωβά μπορίνελα τι τραμπίνελ διαφορετικούς τρόπους τι κερέλ πο σκοπός, ντα πάντα κα τζαλ λατσσές σόσκε «κανονιντάς σαρέ ο πράγματα τι κερέν λέσκο σκοπός». (Παρ. 16:4) Σαρέ οντουλά σο κερέλα ο Ιεχωβά κα ανέν λατσσίματα σο κα ατσσόν για πάντα. Καβά ισί ο σκοπός ι Ιεχωβάσκο, ντα καλά αλλαγές κερντάς για τι κερέλ-λες τι νικιόλ μπαγιά;

7. Κάνα γκιλέ κόντρα ο πρώτα τζενέ, σο αλλαγές κερντάς ο Ιεχωβά για τι κερέλ πο σκοπός; (Ματθαίος 25:34)

⁷ Ο Ντεβέλ βακερντάς κο πρώτα τζενέ καβά ισινέ λέσκο σκοπός λένγκε. Βακερντάς λένγκε: «Τι κερέν μπουτέ τσσαβέν ντα τι αβγατίντιβεν, τι πφερέν ι πφουβ ντα τι τθερέν-λα τουμένγκε, ντα τι κερέν κουμάντος . . . σαρέ ο ζώα σο ισί οπράλ κι πφουβ». (Γέν. 1:​28) Κάνα ο Αδάμ ντα η Εύα γκιλέ κόντρα κο Ιεχωβά, ντα αντικάς αβιλί η αμαρτία κο τζενέ, ανταβά να τσσιναντάς ι Ιεχωβάς τι κερέλ πο σκοπός. Βοβ κερντάς αλλαγές κο τρόπος σο κα κερέλας-λες τι νικιόλ μπαγιά. Αποφασιντάς τι τσσουβέλ εκ Βασιλεία κο ουρανός σο κα κερέλας τι νικιόλ μπαγιά ο σκοπός σο τθερέλας βοβ κατά αρχή ι τζενένγκε ντα ι πφουβιάκε. (Διαβάνεν Ματθαίος 25:​34) Κο σωστός βακίτι, ο Ιεχωβά μπουτσσαντάς μανγκιμάσαρ πι πρώτε Τσσαβές κι πφουβ για τι σικλιαρέλ ι τζενέν ι Βασιλειάκε ντα τι ντελ πι ζωή για τι ελευθερώνελ-αμέν κατά αμαρτία ντα κατά μεριπέ. Σοράν, ο Ιησούς αναστισάλο ντα βουρτισάλο κο ουρανός για τι κερέλ κουμάντος σαρ Βασιλιάς κι Βασιλεία κι Ντεβλέσκι. Αλλά ισί γιαβερά-ντα πράγματα σο μπορίνασα τι σκεφτίνας ι Ντεβλέσκε σκοπόσκε.

8. (α) Καβά ισί ο θέμας ι Γραφιάκο; (β) Σο γιαβέρ κα κερέλ ο Ιεχωβά, σαρ εξηγίνενα ο εδάφια Εφεσίους 1:​8⁠-11; (Ντικχέν ι φωτογραφία κι ανγκλαϊνί σελίδα)

⁸ Ο πο σημαντικός θέμας ι Γραφιάκο ισί ότι ο ναβ ι Ιεχωβάσκο κα δικαιώντιβελ καζόμ βοβ κα κερέλ τι νικιόλ μπαγιά λέσκο σκοπός ι πφουβιάκε αντράλ πι Βασιλειάταρ σο κα τθερέλ Βασιλιάς ι Χριστός. Ο σκοπός ι Ιεχωβάσκο να αλλάνελα. Βοβ ντινάς πο λάφι ότι σο-ντα βακερντάς κα νικιόλ μπαγιά. (Ησ. 46:​10, 11, υποσημειώσεις· Εβρ. 6:​17, 18) Κα αβέλ ο βακίτι σο η πφουβ κα αβέλ παράδεισος, σο ο τέλεια ντα δίκαια προσάγγονα ι Αδαμίσκε ντα ι Ευάκε κα «τθερέν μπουτ σουκάρ ζωή για πάντα». (Ψαλμ. 22:​26) Αλλά ο Ιεχωβά τθερέλα πι γκοντιάτε κάτι ατζέ πο μπαρό ανταλέσταρ. Μανγκέλα επίσης τι κερέλ τι αβέν γιεκ σαρέ λέσκε υπηρέτες κο ουρανός ντα κι πφουβ. Αζομάν σαρέ κα ντεν καν ντα κα αβέν αφοσιωμέ κο Ιεχωβά σο κα κερέλ-λεν κουμάντος. (Διαβάνεν Εφεσίους 1:​8⁠-11) Να σαστίνενα ι μπουτ σουκάρ τροπόσαρ σο κερέλα ο Ιεχωβά πο σκοπός τι νικιόλ μπαγιά;

9. Καζόμ ανγκλάλ μπορίνασα τι ντικχάς κάνα διαβάνασα ι Γραφή;

⁹ Σκεφτίνεν ι προφητεία σο βακερντάς ο Ιεχωβά κο κήπος της Εδέμ, σο ισί κο εδάφιος Γένεση 3:​15. b Οντιά προφητεία γκερέλας ι προσοχή πραγματέντε σο κα κερένας ο σκοπός ι Ιεχωβάσκο τι νικιόλ μπαγιά, αλλά ανταλά πράγματα κα αβένας-πες χιλιάδες μπρεσά πο σοράν. Για παράδειγμας, ο Ντεβέλ βακερντάς κο Αβραάμ ότι, σοράν μπουτέ μπρεσένταρ, εκ λέσκε προσαγγονίνταρ κα αβέλας ο Χριστός. (Γέν. 22:​15⁠-18)  Σοράν, κο 33 Κ.Χ., ο Ιησούς ντιντιλό κι πατούμ, σαρ βακέρντιλοας. (Πράξ. 3:​13⁠-15) Ο τελευταίος πράγμας ι προφητειάκο ισί τι καταστραφίντιβελ ο σορό ι Μπενγκέσκο. Ανταβά κα αβέλ-πες σε πο μπουτ από 1.000 μπρεσά. (Αποκ. 20:​7⁠-10) Η Γραφή σικαβέλα ατζέ πο μπουτ πράγματα οντουλένγκε σο κα αβέν-πες κάνα ο ντουσμανλίκι σο τθερέλα ο ντουνιάς ι Μπενγκέσκο ι Ιεχωβάσκε οργανωσιάκε κα αβέλ πο μπαρό σαρέ κατά γιαβερά μπρεσά.

10. (α) Καλά πράγματα κα αβέν-πες ανγκλ’ αμέντε μπουτ σουγκό; (β) Σαρ μπορίνασα τι προετοιμάνας αμαρί γκοντί ντα αμαρό γκι; (Ντικχέν ι υποσημείωση-ντα)

¹⁰ Σκεφτίνεν ανταλά μπουτ μπαρέ πράγματα σο βακερέλα η Γραφή ότι κα αβέν-πες. Πρώτον, ο τθεμά κα βακερέν «ειρήνη ντα ασφάλεια!» (1 Θεσ. 5:2, 3) «Αμέσως» κα αρχίνελ η μπαρί στεναχώρια κάνα ο τθεμά κα κερέν επίθεση κι ψεύτικη θρησκεία. (Αποκ. 17:​16) Σοράν ανταλέσταρ, μπέκιμ εκχέ ξεχωριστέ τροπόσαρ, “ι τζενέσκο Τσσαβό κα αβέλ ζοριάσαρ ντα μπαρέ δοξάσαρ οπράλ κο σύννεφα κι ουρανόσκε”. (Ματθ. 24:​30) Ο Ιησούς κα κρίνελ ι τζενέν ντα κα χωρίνελ ι μπρακέν κατά μπουσνίν. (Ματθ. 25:​31⁠-33, 46) Ο Μπενγκ όμως να κα ατσσόλ πφαντέ βαστέντζαρ. Πφερντό χολί, κα κερέλ ι τθεμέν σο κα γκιντίντιβεν σαρέ γιεκ, σο βακέρντιβενα κι Γραφή Γωγ του Μαγώγ, τι τζαν κόντρα οντουλέντε σο ντένα πάκι λατρεία κο Ιεχωβά. (Ιεζ. 38:2, 10, 11) Κάποια στιγμή αντρέ κι μπαρί στεναχώρια, ο χρισμέ σο ατσσιλέ ατθέ κι πφουβ κα γκιντίντιβεν κο ουρανός για τι κερέν τζένγκι γιεκ ι Χριστόσαρ ντα λέσκε στρατόσαρ σο ισί κο ουρανός κο τζένγκι σο βακέρντιβελα Αρμαγεδδώνας, ντα αντικάς κα τελειώνελ η μπαρί στεναχώρια. c (Ματθ. 24:​31· Αποκ. 16:​14, 16) Αζομάν κα αρχίνελ η Βασιλεία ι Χριστόσκι ατθέ κι πφουβ σο κα ατσσικιαρέλ χίλια μπρεσά.​—Αποκ. 20:6.

11. Σο μανγκέλα τι βακερέλ τουμένγκε η αιώνια ζωή; (Ντικχέν ι φωτογραφία-ντα)

¹¹ Ακανά σκεφτίνεν σο κα αβέλ-πες αφού κα νακχέν ο 1.000 μπρεσά. Η Γραφή βακερέλα ότι αμαρό Δημιουργός “τσσουντάς αντρέ αμαρέ γκίστε ι επιθυμία τι τζουβντιάς για πάντα”. (Εκκλ. 3:​11) Σκεφτίνεν σο μανγκέλα τι βακερέλ ανταβά τουμένγκε ντα για τη σχέση σο τθερένα ι Ιεχωβάσαρ. Ο βιβλίος Πλησιάστε τον Ιεχωβά, σελίδα 319, βακερέλα κάτι μπουτ σουκάρ: «Σοράν  από εκατοντάδες, χιλιάδες, εκατομμύρια ή ατζέ-ντα δισεκατομμύρια μπρεσά, κα τζανάς ατζέ πο μπουτ πράγματα ι Ιεχωβά Ντεβλέσκε οντουλένταρ σο τζανάσα ακανά. Αλλά πάλι κα πακιάς ότι ισί μπουτ γιαβερά-ντα πράγματα τι σικλιάς, σο να γκιντιόνα.... Ναστί νακχέλα αμαρέ γκοντιάταρ καζόμ σουκάρ κα αβέλ η αιώνια ζωή κο παράδεισος. Ντα ο πο σουκάρ πράγμας κα αβέλ πάντα τι τζας πο πασέ κο Ιεχωβά». Μέχρι αζομάν, καζόμ σικλιαράσα-αμέν ι Ντεβλέσκε Λαφίσταρ, σο γιαβέρ μπορίνασα τι ρόντας;

12. Σαρ μπορίνασα τι ντικχάς οπρέ κο ουρανός; Βακερέν εκ παράδειγμας.

¹² Ο Λάφι ι Ντεβλέσκο σικαβέλα χάνικ σαρ ισί τι αβές οτθέ «οπρέ» σο ισί ο Ιεχωβά. (Ησ. 33:5) Η Γραφή σικαβέλα μπουτ σουκάρ πράγματα για το κομμάτι ι Ιεχωβάσκε οργανωσιάκο σο ισί κο ουρανός. (Ησ. 6:​1⁠-4· Δαν. 7:9, 10· Αποκ. 4:​1⁠-6) Για παράδειγμας, μπορίνασα τι διαβάνας οντουλένγκε σο ντικχλάς ο Ιεζεκιήλ ντα κερντέ-λες τι σαστίνελ κάνα “πουτάρντιλο ο ουρανός ντα αρχισάλο τι ντικχέλ ο φαντασίες ι Ντεβλέσκε”.​—Ιεζ. 1:1.

13. Σο εκτιμίνενα πο μπουτ οντουλένταρ σο κερέλα ο Ιησούς κο ουρανός, σαρ σικαβένα ο εδάφια Εβραίους 4:​14⁠-16;

¹³ Σκεφτίνεν επίσης σο κα κερέλ ο Ιησούς αμένγκε κατά ουρανός σαρ αμαρό Βασιλιάς ντα Αρχιερέας σο αγαβέλα-αμέν μπουτ. Αντράλ κατά Ιησούς, μπορίνασα τι πλησιάνας «ο θρόνος ι [Ντεβλέσκε] λατσσιμάσκο σο να αξίνασα-λες» αντράλ κατά προσευχή ντα τι μανγκάς λέσταρ τι τζιτζίνελ αμένγκε ντα τι βοηθίνελ-αμέν “αζομάν σο χρειαζίντιβασα-λες”. (Διαβάνεν Εβραίους 4:​14⁠-16) Μα τι μουκχάς ποτές ούτε εκ ντιβές τι νακχέλ χωρίς τι σκεφτίνας οντουλά σο ο Ιεχωβά ντα ο Ιησούς κερντέ ντα συνεχίνενα τι κερέν αμένγκε κατά ουρανός. Η αγάπη σο τθερένα αμένγκε συγκινίνελα-αμέν μπουτ ντα τσσίντελα-αμέν τι πφαμπάς αμαρέ εργόσκε ντα για τη λατρεία σο ντάσα-λες.​—2 Κορ. 5:​14, 15.

14. Καβά ισί εκ κατά πο λατσσέ τρόποι για τι σικαβάς καζόμ εκτιμίνασα ι Ιεχωβάς ντα ι Ιησούς; (Ντικχέν ο φωτογραφίες-ντα)

 ¹⁴ Εκ κατά πο λατσσέ τρόποι για τι σικαβάς καζόμ μπουτ εκτιμίνασα αμαρέ Ντεβλές ντα λέσκε Τσσαβές ισί τι προσπαθίνας τι βοηθίνας γιαβερέν τι αβέν Μάρτυρες ι Ιεχωβάσκε ντα μαθητές ι Ιησούσκε. (Ματθ. 28:​19, 20) Ανταβά κερέλας ο απόστολος Παύλος επειδή τθερέλας εκτίμηση ι Ντεβλέσκε ντα ι Χριστόσκε. Τζανέλας ότι ο Ντεβέλ μανγκέλα «τι σώντιβεν σαρέ ο τζενέ ντα τι σικλιόν ντιπ ι αλήθεια». (1 Τιμ. 2:3, 4) Μαρέλας-πες πι εργόστε για τι βοηθίνελ καζόμ πο μπουτ τζενέν αβέλας-πες ντα για “τι σώνελ με κάθε τρόπος μερικέ τζενέν”.​—1 Κορ. 9:​22, 23.

15. Σο κα κερέλ-αμέν ευτυχισμέ, σαρ σικαβέλα ο εδάφιος Ψαλμός 1:2;

¹⁵ Ο τζενό σο γραφιντάς ο πρώτος ψαλμός βακερντάς ότι ο ευτυχισμέ ντα επιτυχιμέ τζενό ισί οντουβά σο «αρακχέλα χαρά κο νόμος κι Ιεχωβάσκο» ντα «Λέσκο νόμος σκεφτίνελα λατσσές ντισάρα ντα ιράτ». (Ψαλμ. 1:​1⁠-3· υποσ.) Εκ μεταφραστής ι Γραφιάκο βακερντάς ανταλέ εδαφιόνγκε ότι εκ τζενό πρέπει «τι μανγκέλ αζόμ μπουτ τι οδηγίνελ-λες ο Ντεβέλ σο ανταβά κα κερέλ-λες τι ρόντελ λέσκε οδηγιένγκε, τι σικλιόλ-λεν ντα τι ντελ πι σαατίσταρ για τι σκεφτίνελ-λεν λατσσές». Βακερντάς επίσης ότι «άμα κα νακχέλ εκ ντιβές σο να διαβαντάς ι Γραφή, οντουβά ντιβές γκιλό χαμέ». Μπορίνενα τι αρακχέν χαρά καζόμ σικλιαρένα-τουμέν κατά Γραφή άμα κα τσσουβέν σημασία σαρέ κο λεπτομέρειες λάκε ντα κα ντικχέν σο σχέση τθερένα η εκ ι γιαβεράσαρ. Σο μπαρί χαρά ισί τι σικλιαράς-αμέν αχόρτ κατά Λάφι ι Ντεβλέσκο!

16. Σο κα ντικχάς κο γιαβέρ μάθημας;

¹⁶ Ο μπουτ σουκάρ αλήθειες σο σικλιαρέλα-αμέν ο Ιεχωβά πι Λαφίσταρ νανέ αζόμ δύσκολες σο ναστί αγαβάσα-λεν. Κο γιαβέρ μάθημας, κα ντικχάς εκ κατά πο αχόρτ αλήθειες ανταλά​—ο μπαρό πνευματικός ναός ι Ιεχωβάσκο, σο σικαντάς ο Παύλος κι επιστολή σο γραφιντάς κο Εβραίοι Χριστιανοί. Μανγκάσα τι λεν μπαρί χαρά καζόμ ρόντενα ανταβά θέμας.