1, 2. (α) Καλά ισί μερικές αμφιβολίες σο μπέκιμ τθερένα ο υπηρέτες ι Ιεχωβάσκε; (β) Σο κα ντικχάς ανταλέ μαθημάστε;

 ΣΑΡΕ ο τζενέ, είτε ισί χουρντέ είτε μπαρέ, τθερένα αμφιβολίες a μπάζιμα. Για παράδειγμας, σκεφτίνεν εκχέ τερνέ πφραλές σο νανέ σίγουρος άμα ο Ιεχωβά πφαμπόλα μπαγιά λέσκε. Μπέκιμ νανέ σίγουρος άμα πρέπει τι μπολντιόλ. Ή ανέν τουμαρέ γκοντιάτε εκχέ πφραλές σο κάνα ισινέ τερνό τραμπιντάς τι τσσουβέλ κι πρώτη θέση ι Βασιλεία αντίς τι κερέλ μπουτ λοβέ. Ακανά σο ισί πο μπαρό ντα ο λοβέ ερεσένα σάντε για το αναγκαία ι φαμιλιάκε, μπέκιμ σκεφτίνελα άμα λιντάς μπαγιά ι σωστή απόφαση. Ή σκεφτίνεν εκχέ πφουρέ πφενιά σο ισί μπίζουρανι. Μπέκιμ χασαρντάς πι ζορ επειδή ναστί κερέλα οντουλά σο κερέλας ανγκλέ. Τθερένα κερντό ποτές ερωτήσεις σαρ ακαλά: “Ντέλα-μαν μπαγιά σημασία ο Ιεχωβά; Αξίνενας ο θυσίες σο κερντόμ ι Ιεχωβάσκε; Ισινόμ ατζέ χρήσιμος ι Ιεχωβάσκε;”

² Άμα να αρακχλάμ απαντήσεις ασακέ ερωτησιέντε μπέκιμ τι χασαράς αμαρί πίστη ή ατζέ-ντα τι τσσιναβάς τι υπηρετίνας ι Ιεχωβάς. Ανταλέ μαθημάστε, κα ντικχάς σαρ μπορίνενα τι βοηθίνεν-αμέν μερικές αρχές ι Γραφιάκε άμα σκεφτίνασα (1) ότι ο Ιεχωβά να πφαμπόλα αμένγκε, (2) ότι ο αποφάσεις σο λιντάμ ανγκλέ να ισινέ σωστές ή (3) ότι ακανά να ισινάμ χρήσιμοι ι Ιεχωβάσκε.

 ΣΑΡ ΤΙ ΝΑΚΧΑΒΕΝ ΤΟΥΜΑΡΕ ΑΜΦΙΒΟΛΙΕΣ

3. Καβά ισί εκ τρόπος σο μπορίνασα τι νακχαβάς αμαρέ αμφιβολίες;

³ Εκ τρόπος για τι νακχαβάς αμαρέ αμφιβολίες ισί τι ρόντας αντρέ κο Λάφι κι Ντεβλέσκο για τι αρακχάς απαντήσεις αμαρέ ερωτησιέντε. Άμα κεράσα-λες ανταβά, αμαρί πίστη ντα αμαρί φιλία ι Ιεχωβάσαρ κα αβέλ πο ζουρανί ντα κα μπορίνας πο λατσσές “τι ατσσάς σταθεροί κι πίστη”.​—1 Κορ. 16:13.

4. Σαρ μπορίνασα “τι ρόντας σαρέ ο πράγματα για τι ντικχάς άμα ισί σωστά”; (1 Θεσσαλονικείς 5:21)

⁴ Διαβάνεν 1 Θεσσαλονικείς 5:​21. Τσσουβέν σημασία ότι η Αγία Γραφή βακερέλα αμένγκε “τι ρόντας σαρέ ο πράγματα για τι ντικχάς άμα ισί σωστά”. Σαρ μπορίνασα τι κεράς-λες ανταβά; Μπορίνασα τι αβάς σίγουροι ότι ανταβά σο πακιάσα ισί μπαγιά άμα ντικχάσα σο βακερέλα η Γραφή ανταλέσκε. Για παράδειγμας, σκεφτίνεν ι τερνέ πφραλές σο νανέ σίγουρος άμα τθερέλα αξία κι Ντεβλέσκε γιακχά. Ισί σωστός μα τι αρακχέλ ι απάντηση ντα τι νικαβέλ ο συμπέρασμας ότι μπαγιά να τθερέλα αξία; Νάα, πρέπει “τι ρόντελ σαρέ ο πράγματα για τι ντικχέλ άμα ισί σωστά” ντα τι αγαβέλ σαρ ντικχέλα-λες ο Ιεχωβά.

5. Σαρ «ασουνάσα» ο απαντήσεις ι Ιεχωβάσκε αμαρέ ερωτησιέντε;

⁵ Καζόμ διαβάνασα ι Γραφή, «ασουνάσα» ι Ιεχωβάς τι κερέλ αμένγκε λάφι. Αλλά για τι σικλιάς σαρ σκεφτίνελα εκχέ πραγμάσκε, μανγκέλα προσπάθεια. Καζόμ διαβάνασα ι Γραφή, χρειαζίντιβελα τι αρακχάς ντα τι σκεφτίνας λατσσές εδάφια σο απαντίνενα κι ερώτηση σο τθεράσα. Για τι κεράς-λες ανταβά, μπορίνασα τι χρησιμοποιήνας ο εργαλεία για τι ρόντας σο ντέλα-αμέν η οργάνωση ι Ιεχωβάσκι. (Παρ. 2:3-6) Μπορίνασα τι προσευχίντιβας κο Ιεχωβά τι βοηθίνελ-αμέν τι αρακχάς ι απάντηση λέσκι κι ερώτηση σο τθεράσα. Σοράν, μπορίνασα τι ρόντας αρχές ι Γραφιάκε ντα πράγματα σο μπορίνασα τι κεράς. Επίσης, ισί λατσσό τι διαβάνας ιστορίες κατά Γραφή τζενένγκε σο σκεφτίνενας ντα νιωθίνενας σαρ αμέντε.

6. Σαρ βοηθίνενα-αμέν ο συναθροίσεις τι νακχαβάς αμαρέ αμφιβολίες;

⁶ Επίσης, «ασουνάσα» ι Ιεχωβάς τι κερέλ αμένγκε λάφι κο συναθροίσεις. Άμα τζάσα σαρέ κο συναθροίσεις, μπέκιμ τι ασουνάς κάτι σε εκ ομιλία ή εκ απάντηση σο ισί ακριβώς ανταβά σο χρειαζίντιβασα για τι νακχαβάς αμαρέ αμφιβολίες. (Παρ. 27:17) Για τι ντικχάς ακανά σαρ μπορίνασα τι νακχαβάς μερικές συγκεκριμέ αμφιβολίες.

“ΠΦΑΜΠΟΛΑ ΜΑΝΓΚΕ Ο ΙΕΧΩΒΑ;”

7. Σο μπέκιμ τι πουτσέν μερικοί;

⁷ Σκεφτιντέν ποτές άμα ο Ιεχωβά ντέλα-τουμέν σημασία; Άμα νιωθίνενα ότι να τθερένα αξία, μπέκιμ πακιάνα ότι να αβέλα-πες με τίποτα τι αβέν αμαλά Οντουλέσαρ σο λατσσαρντάς τα πάντα. Κάτι ασακό μπέκιμ τι σκεφτιντάς ο βασιλιάς Δαβίδ-ντα. Κερέλας λέσκε μπαρί εντύπωση ότι ο Ιεχωβά ντικχέλας ι απλέ τζενέν, οτθάρ πουτσλάς: «Ιεχωβά, σο ισί ο τζενό ντα ντέσα-λες σημασία, ο τσσαβό ι τζενέσκο σο μερέλα ντα τθερέσα το γιακχά οπρά-λέστε;» (Ψαλμ. 144:3) Κατέ μπορίνενα τι αρακχέν ι απάντηση ανταλέ ερωτησιάτε;

8. Σο ντικχέλα ο Ιεχωβά κο τζενέ, σαρ σικαβένα ο εδάφια 1 Σαμουήλ 16:6, 7, 10-12;

⁸ Κατά Γραφή σικλιάσα ότι ο Ιεχωβά ντέλα σημασία οντουλέντε σο ο γιαβερά πακιάνα ότι να τθερένα αξία. Για παράδειγμας, ο Ιεχωβά μπουτσσαντάς ι Σαμουηλίς κο κχερ του Ιεσσαί για τι σικαβέλ ότι εκ κατά τσσαβέ λέσκε κα αβέλας σοράν βασιλιάς κο Ισραήλ. Ο Ιεσσαί τθερέλας οχτώ τσσαβέν, αλλά σικαντάς κο Σαμουήλ σάντε εφτά τσσαβέν, ντα να ντινάς βίκος  ι πο χουρντές, ι Δαβιδίς. b Όμως, ο Ιεχωβά τραμπιντάας ι Δαβιδίς. (Διαβάνεν 1 Σαμουήλ 16:6, 7, 10-12) Ο Ιεχωβά ντικχλάς λέσκο γκι. Τζανέλας ότι ο Δαβίδ μανγκέλας-λες μπουτ.

9. Σόσκε μπορίνενα τι αβέν σίγουροι ότι ο Ιεχωβά πφαμπόλα τουμένγκε; (Ντικχέν ι φωτογραφία-ντα)

⁹ Ανέν τουμαρέ γκοντιάτε σαρ σικαντάς ο Ιεχωβά ότι ντέλα-τουμέν σημασία. Ντέλα-τουμέν συμβουλές σο ισί ντιπ τουμένγκε. (Ψαλμ. 32:8) Σαρ κα μπορίνελας τι κερέλ-λες ανταβά άμα να τζανέλας-τουμέν λατσσές; (Ψαλμ. 139:1) Κάνα κερένα ο συμβουλές ι Ιεχωβάσκε ντα ντικχένα σαρ βοηθίνενα-τουμέν, αβένα σίγουροι ότι ο Ιεχωβά πφαμπόλα τουμένγκε. (1 Χρον. 28:9· Πράξ. 17:26, 27) Ο Ιεχωβά ντικχέλα σο-ντα κερένα για τι υπηρετίνεν-λες ντα τι ντεν-λες καν. Ντικχέλα τουμαρέ λατσσέ ιδιότητες ντα αβέλα πο πασέ τουμέντε. (Ιερ. 17:10) Ο Ιεχωβά μανγκέλα τι αβέλ τουμαρό Αμάλ ντα κα χαιρίνελ μπουτ άμα μανγκένα-λες τουμέν-ντα ανταβά.​—1 Ιωάν 4:19.

“ΙΣΙΝΕ ΓΚΟΝΤΙΑΒΕΡ Ο ΑΠΟΦΑΣΕΙΣ ΣΟ ΛΙΝΤΟΜ ΑΝΓΚΛΕ;”

10. Κάνα σκεφτίνασα ο αποφάσεις σο λιντάμ ανγκλέ, σο μπέκιμ τι πουτσάς αμαρό νεαυτός;

¹⁰ Μπάζιμα, καζόμ νακχένα ο μπρεσά, μερικά τζενέ νανέ σίγουροι άμα λιντέ σωστές αποφάσεις ανγκλέ. Μπέκιμ μουκχλέ εκ λατσσί μπουτί σο νικαβένας μπουτ λοβέ ή εκ επιχείρηση σο τζάλας λατσσές για τι κερέν πο μπουτ ι Ιεχωβάσκε. Αλλά ανταβά μπέκιμ αβιλό-πες μπουτ μπρεσά πο τζανγκλέ. Μπέκιμ ανταλά τζενέ ντικχένα τζενέν σο τζανένα-λεν ντα τραμπιντέ τι κερέν γιαβερά πράγματα λένταρ τι ντικχίντιβελ ότι ακανά τθερένα μπουτ λοβέ. Ντα ανταλέσκε μπέκιμ πουτσένα πουμαρό νεαυτός: “Αξίνενας ο θυσίες σο κερντόμ ι  Ιεχωβάσκε; Ή κα αβέλας πο λατσσό τι κεράβας πο μπουτ μπουτί για τι τθεράβ πο μπουτ λοβέ ακανά;”

11. Καλά μπέτι αισθήματα τθερέλας ο τζενό σο γραφιντάς ο Ψαλμός 73;

¹¹ Άμα τουμέν-ντα πουτσένα τουμαρό νεαυτός ασακέ ερωτήσεις, ντικχέν σαρ νιωθίνελας ο τζενό σο γραφιντάς ο Ψαλμός 73. Βοβ ντικχέλας γιαβερέν σο τθερένας λατσσί υγεία, ισινέ χουλανέ ντα ντικχίντιβελας ότι να τθερένας ιτς προβλήματα. (Ψαλμ. 73:3-5, 12) Καζόμ ντικχίντιβελας ότι λένγκι ζωή τζάλας μπουτ λατσσές, νιωσάλο ότι μαρέλας-πες σινανέ τι υπηρετίνελ ι Ιεχωβάς. “Τσσίντελας μπουτ σαρό ο ντιβές” καζόμ σκεφτίνελας-λες ανταβά. (Ψαλμ. 73:13, 14) Σαρ κερντάς κουμάντος ανταλά μπέτι αισθήματα;

12. Σαρ νακχαντάς ο ψαλμωδός πο μπέτι αισθήματα, σαρ σικαβένα ο εδάφια Ψαλμός 73:16-18;

¹² Διαβάνεν Ψαλμός 73:​16-18. Ο ψαλμωδός γκιλό κο αγιαστήριος κι Ιεχωβάσκο. Οντουλέ ήσυχε τθανέστε, μπορισάλο τι σκεφτίνελ καθαρά. Αγαντάς ότι, παρόλο σο η ζωή μερικέ τζενένγκι μπέκιμ ντικχίντιβελας εύκολη, βον να τθερένας ελπίδα για το μέλλον. Αφού αγαντάς-λες ανταβά, τθερέλας ειρήνη πι γκοντιάτε επειδή τζανέλας ότι η πο λατσσί επιλογή ισινέ τι τσσουβέλ ο πνευματικά πράγματα κι πρώτη θέση πι ζωγιάτε. Ντα αντικάς, ισινέ πάλι αποφασισμέ τι συνεχίνελ τι υπηρετίνελ ι Ιεχωβάς.​—Ψαλμ. 73:23-28.

13. Σαρ μπορίνενα τι αρακχέν ειρήνη τουμαρέ γκοντιάτε άμα μετανιώνενα για το αποφάσεις σο λιντέν ανγκλέ; (Ντικχέν ι φωτογραφία-ντα)

¹³ Μπορίνενα τουμέν-ντα τι αρακχέν ασακί ειρήνη τουμαρέ γκοντιάτε αντράλ κατά Λάφι ι Ντεβλέσκο. Σαρ; Πρώτα, ανέν τουμαρέ γκοντιάτε ο λατσσέ πράγματα σο τθερένα ντα ο ευλογίες ι Ιεχωβάσκε. Σοράν, συγκρίνεν-λεν ανταλά με το αποτελέσματα σο τθερένα ο  τζενέ σο να υπηρετίνενα ι Ιεχωβάς. Ανταλέ τζενένγκε, ο πο σημαντικός ισί τι τθερέν εκ λατσσί ζωή ακανά επειδή να τθερένα ελπίδα για το μέλλον. Τουμέντε όμως, ο Ιεχωβά ντέλα πο λάφι τι πφερέλ-τουμέν ευλογίες εμ ακανά εμ για πάντα. (Ψαλμ. 145:16) Επίσης, πουτσέν-τουμέν ακαβά: Μπορίνασα σίγουρα τι τζανάς σαρ κα αβέλας αμαρί ζωή άμα λιντάμας διαφορετικές αποφάσεις; Εκ ισί ο σίγουρος: Κάνα λένα αποφάσεις επειδή μανγκένα ι Ιεχωβάς ντα ι γιαβερέν, πάντα κα τθερέν τουμαρέ ζωγιάτε ο πράγματα σο κα κερέν-τουμέν μπαγιά ευτυχισμέ.

“ΙΣΙΝΟΜ ΧΡΗΣΙΜΟΣ Ι ΙΕΧΩΒΑΣΚΕ;”

14. Σο νακχένα μερικά πφραλά, ντα σο μπέκιμ τι πουτσένα;

¹⁴ Μερικοί υπηρέτες ι Ιεχωβάσκε ναστί κερένα σαρέ οντουλά σο μανγκένα επειδή ισί πφουρέ, νασφαλέ ή τθερένα εκ αναπηρία. Ιτιρί ανταλένταρ σο νακχένα μπέκιμ νιωθίνενα ότι να τθερένα αξία κο γιακχά κι Ιεχωβάσκε. Μπέκιμ πουτσένα: “Ισινόμ ατζέ χρήσιμος ι Ιεχωβάσκε;”

15. Καλέ πραγμάσκε ισινέ ντιπ σίγουρος ο τζενό σο γραφιντάς ο Ψαλμός 71;

¹⁵ Ο τζενό σο γραφιντάς ο Ψαλμός 71 σικαντάς ότι τθερέλας ασακέ αισθήματα κάνα προσευχισάλο: «Μα μουκχ-μαν κάνα μι ζορ κα χασάρντιβελ». (Ψαλμ. 71:9, 18) Όμως, ο ψαλμωδός ισινέ ντιπ σίγουρος ότι, άμα υπηρετίνελας πιστά πι Ντεβλές, βοβ κα στηρίνελας-λες. Ο ψαλμωδός σικλιλό ότι ο Ιεχωβά χαιρίνελα οντουλέντζαρ σο κερένα ο πο λατσσό για τι υπηρετίνεν-λες παρόλο σο ναστί κερένα σαρέ οντουλά σο μανγκένα.​—Ψαλμ. 37:23-25.

16. Καλέ τροπόντζαρ ισί ο πφουρέ χρήσιμοι ι Ιεχωβάσκε; (Ψαλμός 92:12-15)

¹⁶ Πφραλάλεν σο ισινέν πφουρέ, τι σκεφτίνεν σαρ ντικχέλα-τουμέν ο Ιεχωβά. Βοβ μπορίνελα τι βοηθίνελ-τουμέν τι αβέν ζουρανέ πνευματικά παρόλο σο ναστί κερένα μπουτ  πράγματα. (Διαβάνεν Ψαλμός 92:​12-15) Αντίς τι ντεν προσοχή οντουλέντε σο ναστί κερένα ακανά, τι σκεφτίνεν οντουλά σο μπορίνενα τι κερέν. Για παράδειγμας, μπορίνενα τι ντεν ζορ ι γιαβερέν τουμαρέ πιστέ παραδειγμάσαρ ντα κάνα σικαβένα ότι πφαμπόνα λένγκε. Μπορίνενα τι βακερέν λένγκε σαρ βοηθιντάς-τουμέν ο Ιεχωβά σαρέ ανταλά μπρεσά ντα καζόμ σίγουροι ισινέν ότι ο υποσχέσεις λέσκε κα νικιόν μπαγιά. Ντα ποτές μα μπιστρέν ότι ο προσευχές σο κερένα αντράλ τουμαρέ γκίσταρ ι γιαβερένγκε τθερένα ζορ. (1 Πέτρ. 3:12) Σαρ-ντα τι αβέν ο πράγματα αμαρέ ζωγιάτε, σαρέ τθεράσα τι ντας κάτι κο Ιεχωβά ντα κο γιαβερά.

17. Σόσκε δεν πρέπει τι περάς κι παγίδα τι συγκρίνας αμαρό νεαυτός ι γιαβερέντζαρ;

¹⁷ Άμα χασαρένα τουμαρί ζορ επειδή ναστί κερένα πο μπουτ ι Ιεχωβάσκε, τι αβέν σίγουροι ότι σο-ντα κερένα τθερέλα μπαρί αξία λέσκε. Μπέκιμ περένα κι παγίδα τι συγκρίνεν ανταλά σο κερένα τουμέν οντουλέντζαρ σο κερένα ο γιαβερά. Μα κερέν-λες ανταβά! Σόσκε; Επειδή ο Ιεχωβά να κερέλα-λες. (Γαλ. 6:4) Για παράδειγμας, η Μαρία τσσουντάς ι Ιησούσκε εκ μπουτ πααλίς λάδι σο κχάντελας μίσκι. (Ιωάν. 12:3-5) Οκιά μπάνταρ, η τσορορί χήρα τσσουντάς κο ναός ντούι χουρντέ κέρματα σο τθερένας μπουτ χάνικ αξία. (Λουκ. 21:1-4) Ο Ιησούς όμως ντικχλάς ότι ο ντούι-ντα τζουβλιά σικαντέ πίστη. Λέσκο Ντατ, ο Ιεχωβά, εκτιμίνελα μπαγιά σο-ντα κερένα επειδή τθερένα πίστη ντα αγάπη λέσκε, ατζέ-ντα άμα τουμένγκε ντικχίντιβελα χουρντό.

18. Σο κα βοηθίνελ-αμέν τι νακχαβάς ο αμφιβολίες; (Ντικχέν ο πλαίσιος-ντα « Ο Λάφι ι Ιεχωβάσκο Μπορίνελα τι Βοηθίνελ-τουμέν τι Νακχαβέν Τουμαρέ Αμφιβολίες»)

¹⁸ Σαρέ τθεράσα αμφιβολίες μπάζιμα. Σαρ ντικχλάμ όμως, η Αγία Γραφή μπορίνελα τι βοηθίνελ-αμέν τι νακχαβάς-λεν. Οτθάρ, μαρέν-τουμέν για τι νακχαβέν τουμαρέ αμφιβολίες, ντα κα νιωθίνεν σιγουριά αντίς τι χασαρέν τουμαρί ζορ. Ο Ιεχωβά σίγουρα ντέλα σημασία τουμέντε προσωπικά. Εκτιμίνελα τουμαρέ θυσίες ντα κα ατσσικιαρέλ πο λάφι τι ευλογίνελ-τουμέν. Τι αβέν σίγουροι ότι ο Ιεχωβά νιωθίνελα ότι σαρέ λέσκε υπηρέτες αξίνενα λέσκι αγάπη ντα λέσκι προσοχή.