Για τι μπορίνελ εκ τζενό τι ντελ αντρέ κο άγια ι ναόσκε έπρεπε τι νακχέλ κατά πόρτες ανταλά. Σαρ βακερέλας η Μετάφραση Νέου Κόσμου πριν κατά 2023, «ο πόρτες ισινέ 20 πήχεις μπουγλέ, καζόμ μπουγλό ισινέ εμ ο ναός ντα 120 πήχεις βουτσσέ». (2 Χρον. 3:4) Γιαβερά μεταφράσεις επίσης βακερένα ότι ο πόρτες ισινέ «120 πήχεις βουτσσέ», ανταβά μανγκέλα τι βακερέλ ότι ισινέ σαρ εκ πύργος 53 μέτρα!

Όμως, κι εκτύπωση της Μετάφρασης Νέου Κόσμου κο 2023 αβιλί εκ αλλαγή. Ακανά βακερέλα ότι ο ναός ι Σολομωντάσκο ισινέ «20 πήχεις βουτσσό», δηλαδή περίπου 9 μέτρα. a Ντικχέν σόσκε αβιλί-πες ανταγιά αλλαγή.

Κο εδάφιος 1 Βασιλέων 6:3 να βακερέλα καζόμ βουτσσέ ισινέ ο πόρτες. Ανταλέ εδαφιόστε ο Ιερεμίας βακερέλα καζόμ μπουγλέ ντα τθουλέ ισινέ ο πόρτες αλλά να βακερέλα καζόμ βουτσσέ ισινέ. Σοράν κο γιαβέρ κεφάλαιος, βακερέλα μπουτ λεπτομέρειες ι γιαβερέ πραγματένγκε σο τθερέλας ο ναός σαρ η Θάλασσα σο ισινέ κερντί ι μεταλλόσταρ, ο ντες καρότσια ντα ο ντούι χάλκινες κολόνες σο ισινέ αβρί κατά πόρτες. (1 Βασ. 7:15-37) Άμα ο πόρτες ισινέ μπαγιά πο μπουτ από 50 μέτρα βουτσσέ ντα τζάνας πο οπρέ κατά γιαβέρ ναός, σόσκε ο Ιερεμίας να βακερέλα καζόμ βουτσσέ ισινέ; Ατζέ-ντα μπουτ μπρεσά σοράν, ο Ιουδαίοι σο ασχολίντιβενας με την ιστορία βακερένα ότι ο πόρτες να ισινέ πο βουτσσέ κατά ναός ι Σολομωντάσκο.

Ο σπουδαγμέ τζενέ να πακιάνα ότι ο ντουβάρια ι ναόσκε κα μπορίνενας τι αντιχίνεν πόρτες 120 πήχεις βουτσσέ. Κο πουρανέ μπρεσά, κάνα λατσσαρένας κάτι μπαρέσταρ ντα από τούβλα, σαρ πόρτες ναόνγκε κι Αίγυπτος, τελέ τελέ ισινέ μπουγλέ ντα καζόμ τζάλας σανιόνας. Αλλά ο ναός ι Σολομωντάσκο ισινέ διαφορετικός. Ο σπουδαγμέ τζενέ πακιάνα ότι λέσκε ντουβάρια να ισινέ πο μπουτ από 6 πήχεις τθουλέ, δηλαδή 2,7 μέτρα. Σαρ βακερέλα ο Τέοντορ Μπούσινκ-ντα, σο ισινέ ιστορικός σο ασχολίντιβελας κτιριόντζαρ: «Να κα αβέλας-πες ο πόρτες τι αβένας 120 πήχεις βουτσσέ σόσκε ο ντουβάρια ι ναόσκε [σο ισινέ πασέ κο πόρτες] να ισινέ αζόμ τθουλέ για τι αντιχίνεν-λεν».

Μπορεί τι αβιλόας-πες εκ λάθος κάνα κερένας αντιγραφή ο εδάφιος 2 Χρονικών 3:4. Παρόλο σο κάποια πουρανέ κομμάτια ι Γραφιάκε βακερένα «120» ανταλέ εδαφιόστε, γιαβερά πο σωστά κομμάτια, σαρ ο Αλεξανδρινός Κώδικας του πέμπτου αιώνα ντα ο ο Αμβροσιανός Κώδικας του έκτου αιώνα, βακερένα «20 πήχεις». Σόσκε κα μπορίνελας εκ τζενό σο κερέλας ανταγιά αντιγραφή τι γραφίνελ κατά λάθος «120»; Κι εβραϊκή τσσιπ, ο λέξεις «εκατό» ντα «πήχεις» μοιάζενα. Οτθάρ εκ τζενό σο κερέλας αντιγραφή κα μπορίνελας τι γραφίνελ η λέξη «εκατό» αντίς κατά λέξη «πήχεις».

Σίγουρα, ισί μπουτ λατσσό σο προσπαθίνασα τι αγαβάς σαρέ ανταλά λεπτομέρειες ντα τι τθεράς αμαρέ γκοντιάτε ντιπ σαρ ισινέ ο ναός ι Σολομωντάσκο. Όμως ο πο σημαντικός ισί τι αγαβάς λατσσές σο μανγκέλας τι σικαβέλ ανταβά ναός, δηλαδή ο μπαρό πνευματικός ναός. Καζόμ μπουτ εκτιμίνασα σο ο Ιεχωβά καλιντάς σαρέ πι υπηρετόν τι ντεν-λες λατρεία ανταλέ ναόστε!​—Εβρ. 9:11-14· Αποκ. 3:12· 7:9-17.