1, 2. (α) Καβά σημαντικός διορισμός λιντάς ο Σολομών; (β) Σόσκε ανησυχίνελας ο Δαβίδ για τον Σολομώντα;

Ο ΣΟΛΟΜΩΝ λιντάς εκ ειδικός διορισμός. Ο Ιεχωβά τραμπιντάς-λες τι αβέλ υπεύθυνος για τι χτίντιβελ ο ναός κι Ιερουσαλήμ, σο κα αβέλας εκ κατά πιο σημαντικά κτίρια σο κερντιλέ ποτές! Ο ναός κα μουκχέλας ναβ επειδή κα αβέλας «μπουτ σουκάρ ντα εντυπωσιακός». Ντα ο πιο σημαντικός ισινέ ότι κα αβέλας «ο κχερ ι Ιεχωβάσκο, ι αληθινέ Ντεβλέσκο».​—1 Χρονικών 22:1, 5, 9-11.

² Ο βασιλιάς Δαβίδ ισινέ σίγουρος ότι ο Ντεβέλ κα υποστηρίνελας τον Σολομώντα. Αλλά ο Σολομών ισινέ “τερνό ντα να τθερέλας εμπειρία”. Κα τθερέλας ο θάρρος τι δεχτίνελ ο διορισμός για τι χτίνελ ο ναός; Ή μήπως να κα κερέλας-λες επειδή ισινέ τερνό ντα να τθερέλας εμπειρία; Για τι τθερέλ επιτυχία, ο Σολομών έπρεπε τι τθερέλ θάρρος ντα τι κερέλ μπουτ πράγματα.

3. Σο μπορίνελας τι σικλιόλ ο Σολομών πι νταντέσταρ για το θάρρος;

³ Ο Σολομών μάλλον σικλιλό μπουτ πράγματα για το θάρρος  πι νταντέσταρ, κατά Δαβίδ. Όταν ο Δαβίδ ισινέ μπουτ τερνό, τσσουντάς-λεν με άγρια ζώα σο καπτιντέας λέσκε νταντέσκε μπρακέν. (1 Σαμουήλ 17:​34, 35) Επίσης, σικαντάς μπαρό θάρρος κάνα τσσουντάς-λεν εκχέ μπουτ ζουρανέ στρατιωτίσαρ, με τον γίγαντα Γολιάθ. Βα, με τη βοήθεια ι Ντεβλέσκι ντα εκχέ μπαρέσαρ, ο Δαβίδ νικιντάς τον Γολιάθ.​—1 Σαμουήλ 17:​45, 49, 50.

4. Σόσκε ο Σολομών έπρεπε τι τθερέλ θάρρος;

⁴ Μπορίνασα τι αγαβάς σόσκε ο Δαβίδ ισινέ ο σωστός τζενό για τι βακερέλ κο Σολομών τι τθερέλ θάρρος ντα τι χτίνελ ο ναός. (Διαβάνεν 1 Χρονικών 28:​20) Άμα ο Σολομών να σικαβέλας θάρρος, κα νταρέλας αζόμ μπουτ σο να κα αρχίνελας ιτς ανταγιά μπουτί. Κα αβέλας πιο λατσσό μα τι μπορίνελας τι τελειώνελ ο ναός παρά μα τι αρχίνελας-λες ιτς.

5. Σόσκε χρειαζίντιβασα θάρρος;

⁵ Σαρ ο Σολομών, αντικάς αμέν-ντα χρειαζίντιβασα ι βοήθεια ι Ιεχωβάσκι για τι τθεράς θάρρος ντα τι κεράς ο πράγματα σο μανγκέλα αμένταρ. Οτθάρ, κα ντικχάς ο παραδείγματα μερικέ τζενένγκε σο σικαντέ θάρρος κο πουρανέ μπρεσά. Σοράν, κα σκεφτίνας σαρ μπορίνασα τι σικαβάς θάρρος ντα τι κεράς ο πράγματα σο μανγκέλα αμένταρ.

6. Σο κερέλα τουμένγκε εντύπωση κο θάρρος σο σικαντάς ο Ιωσήφ;

⁶ Ο Ιωσήφ σικαντάς θάρρος όταν ι Πετεφρίσκι ρομνί προσπαθιντάς τι κερέλ-λες τι σοβέλ λάσαρ. Ο Ιωσήφ μπορεί τι τζανέλας ότι λέσκι ζωή κα αβέλας σε κίνδυνος άμα να κα ασουνέλας-λα. Αλλά αντί τι ασουνέλ-λα, σικαντάς θάρρος ντα αμέσως βακερντάς λάκε «όχι».​—Γένεση 39:​10, 12.

7. Σαρ σικαντάς θάρρος η Ραάβ; (Ντικχ ι φωτογραφία σο ισί κι αρχή)

⁷ Η Ραάβ-ντα ντινάς-αμέν λατσσό παράδειγμας επειδή σικαντάς θάρρος. Κάνα γκιλέ λάκε κχερέστε κι Ιεριχώ Ισραηλίτες κατάσκοποι, η Ραάβ κα μπορίνελας τι νταρέλ μπουτ ντα μα τι βοηθίνελ-λεν. Αλλά επειδή τθερέλας εμπιστοσύνη κο Ιεχωβά, γκεραντάς με θάρρος ι ντουέ μουρσέν ντα βοηθιντάς-λεν τι νασέν με ασφάλεια. (Ιησούς του Ναυή 2:4, 5, 9, 12-16) Η Ραάβ πακιάλας ότι ο Ιεχωβά ισί ο αληθινός Ντεβέλ ντα ισινέ σίγουρη ότι κα ντέλας οντουβά τθεμ κο Ισραηλίτες. Να μουκχλάς ι γιαβερέν, ούτε ι βασιλιάς ντα λέσκε υπηρετόν, τι νταραβέν-λα ντα τι κερέν-λα τι χασαρέλ πο θάρρος. Αντικάς, σωντάς εμ πες εμ πι φαμιλί.​—Ιησούς του Ναυή 6:​22, 23.

8. Σαρ βοηθιντάς ι αποστολόν ο θάρρος ι Ιησούσκο;

⁸ Ο πιστοί απόστολοι ι Ιησούσκε-ντα σικαντέ μπαρό θάρρος. Ντικχλέας ο θάρρος σο σικαβέλας ο Ιησούς, ντα ανταβά βοηθιντάς-λεν τι μοιάζεν λέστε. (Ματθαίος 8:​28-32· Ιωάννης 2:​13-17· 18:​3-5) Όταν ο Σαδδουκαίοι προσπαθιντέ τι κερέν-λεν τι τσσιναβέν τι σικλιαρέν ι Ιησούσκε, ο απόστολοι να κερντέ-λες ανταβά.​—Πράξεις 5:​17, 18, 27-29.

9. Σαρ βοηθίνελα-αμέν ο εδάφιος 2 Τιμόθεο 1:7 τι αγαβάς κατάρ αβέλα ο θάρρος;

⁹ Ο Ιωσήφ, η Ραάβ, ο Ιησούς ντα ο απόστολοι  ισινέ αποφασισμέ τι κερέν ο σωστός. Σικαντέ θάρρος, όχι επειδή ντένας μπέσα κο ικανότητες σο τθερένας, αλλά επειδή στηρίντιβενας κο Ιεχωβά. Όταν χρειαζίντιβασα θάρρος, αμέν-ντα πρέπει τι στηρίντιβας κο Ιεχωβά, όχι αμαρέ νεαυτόστε. (Διαβάνεν 2 Τιμόθεο 1:7) Για τι ντικχάς ντούι καταστάσεις σο πρέπει τι σικαβάς θάρρος: αμαρέ φαμιλιάτε ντα κι εκκλησία.

10. Σόσκε χρειαζίντιβενα θάρρος ο τερνέ Χριστιανοί;

¹⁰ Υπαρχίντιβενα μπουτ καταστάσεις σο χρειαζίντιβελα τι σικαβέν θάρρος ο τερνέ Χριστιανοί για τι υπηρετίνεν ι Ιεχωβάς. Μπορίνενα τι σικλιόν κατά Σολομών ντα τι ακολουθίνεν λέσκο παράδειγμας. Βοβ σικαντάς θάρρος όταν λιντάς σωστές αποφάσεις για τι τελειώνελ ο χτίσιμος ι ναόσκο. Παρόλο σο ο τερνέ μπορίνενα ντα πρέπει τι καθοδηγίντιβεν πουμαρέ νταντέσταρ ντα πουμαρέ νταγιάταρ, χρειαζίντιβελα τι λεν πουμαρέ σημαντικές αποφάσεις. (Παροιμίες 27:​11) Πρέπει τι τθερέν θάρρος για τι λεν σωστές αποφάσεις όταν σκεφτίνενα καλέ αμαλέν κα τραμπίνεν, σαρ κα διασκεδάνεν, σαρ κα ατσσόν πάκι κι Ντεβλέσκε γιακχά ντα κάνα κα μπολντιόν. Χρειαζίντιβενα ασακό θάρρος επειδή τζάνα κόντρα κο θέλημας κι Μπενγκέσκο, σο πρασάλα ι Ντεβλές.

11, 12. (α) Σαρ σικαντάς θάρρος ο Μωυσής; (β) Σαρ μπορίνενα ο τερνέ τι μοιάζεν κο Μωυσής;

¹¹ Εκ σημαντική απόφαση σο πρέπει τι λεν ο τερνέ τθερέλα τι κερέλ με το στόχοι σο κα τσσουβέν. Μερικέ τθεμέντε, πιένενα ι τερνέν τι σπουδάνεν για τι αρακχέν εκ λατσσί μπουτί σο κα νικαβέν λάταρ μπουτ λοβέ. Γιαβερέ τθεμέντε, η οικονομική κατάσταση ισί δύσκολη, ντα ο τερνέ μπορεί τι πακιάνα ότι ο πιο σημαντικός πράγμας ισί τι κερέν μπουτί για τι βοηθίνεν πουμαρί φαμιλί. Αν νακχένα κάτι ασακό, σκεφτίνεν ι Μωυσής. Επειδή μπαριαρντάς-λες ι τσσάι ι Φαραώσκι, κα μπορίνελας τι τσσουβέλ στόχος τι αβέλ μπουτ χουλανό ντα σπουδαίος. Σκεφτίνεν καζόμ μπουτ μπορεί τι πιένενας-λες λέσκε Αιγύπτιοι τζενέ, λέσκε δάσκαλοι ντα οντουλά σο ντένας-λες συμβουλές! Αλλά ο Μωυσής τθερέλας θάρρος ντα τραμπιντάς τι αβέλ ι Ντεβλέσκε λαόσαρ. Όταν μουκχλάς παλάλ ι Αίγυπτος ντα ο χουλανιπέ σο τθερέλας οτθέ, στηριντάς-πες κο Ιεχωβά σαρέ κο πράγματα. (Εβραίους 11:​24-26) Οτθάρ, ο Ιεχωβά ευλογιντάς-λες μπουτ, ντα κα ευλογίνελ-λες ατζέ πιο μπουτ κο μέλλον.

¹² Όταν ο τερνέ τσσουβένα με θάρρος στόχους κι υπηρεσία κι Ιεχωβάσκι ντα τθερένα πρώτα ι Βασιλεία πουμαρέ ζωγιάτε, βοβ κα ευλογίνελ-λεν. Κα βοηθίνελ-λεν τι φροντίνεν ο ανάγκες πουμαρέ φαμιλιάκε. Κο πρώτος αιώνας, ο Τιμόθεος σο ισινέ τερνό, ισινέ αφοσιωμέ κι υπηρεσία κι Ντεβλέσκι. Τουμέν-ντα μπορίνενα τι κερέν ο ίδιος. * (Ντικχ ι υποσημείωση)​—Διαβάνεν Φιλιππησίους 2:​19-22.

13. Σόσκε εκ τερνί πφεν χρειαζίντιβελας θάρρος για τι πετυχίνελ πο στόχους;

¹³ Εκ πφεν κι Αλαμπάμα, κο ΗΠΑ, χρειαζίντιβελας θάρρος για τι τσσουβέλ στόχους κι υπηρεσία κι Ντεβλέσκι. Βόι βακερέλα: «Χουρντιαρέλα ισινόμας μπουτ λατζανί. Ζορίσαρ κεράβας λάφι κο τζενέ κι Αίθουσα Βασιλείας, ντα ισινέ ατζέ πιο δύσκολος μάνγκε τι μπασκιαράβ ο πόρτες οντουλένγκε σο να τζανάβας ιτς». Λάκο ντατ, λάκι ντάι, ντα ο πφραλά κατά εκκλησία βοηθιντέ οντουλέ τερνέ πφενιά τι  πετυχίνελ ο στόχος σο τθερέλας τι αβέλ τακτική σκαπάνισσα. Βόι βακερέλα: «Ι Μπενγκέσκο ντουνιάς βακερέλα ότι λατσσέ στόχοι ισί τι σπουδάνες, τι τθερές δόξα, λοβέ ντα μπουτ πράγματα». Αλλά βόι αγαντάς ότι ο πιο μπουτ τζενέ να μπορίνενα ποτές τι πετυχίνεν ανταλά στόχους ντα ότι ανένα σάντε άγχος ντα στεναχώρια. Επίσης, βακερέλα: «Η υπηρεσία ι Ιεχωβάσκι όμως ντινάς-μαν ι πιο μπαρί ευτυχία ντα επιτυχία».

14. Κάνα χρειαζίντιβενα θάρρος ο νταντά ντα ο νταγιά σο ισί Χριστιανοί;

¹⁴ Ο νταντά ντα ο νταγιά σο ισί Χριστιανοί χρειαζίντιβενα βον-ντα θάρρος. Για παράδειγμας, τουμαρό αφεντικός μπορεί μπουτ φαρ τι μανγκέλα τουμένταρ τι κερέν πιο μπουτ σαάτια μπουτί κο ντιβεσά σο τθερένα ι φαμιλιάκι λατρεία, ο έργος ντα ο συναθροίσεις. Χρειαζίντιβενα θάρρος για τι βακερέν «όχι» τουμαρέ αφεντικόσκε ντα για τι ντεν ο λατσσό παράδειγμας τουμαρέ τσσαβένγκε. Ή ίσως μερικά νταντά ντα νταγιά κι εκκλησία μουκχένα πουμαρέ τσσαβέν τι κερέν πράγματα σο τουμέν να μανγκένα τι κερέν τουμαρέ τσσαβέ. Άμα οντουλά νταντά ντα νταγιά πουτσένα-τουμέν ανταλέσκε, κα τθερέν ο θάρρος τι εξηγίνεν λένγκε με σεβασμός σόσκε κερένα-λες ανταβά;

15. Σαρ μπορίνενα ο εδάφια Ψαλμός 37:​25 ντα Εβραίους 13:5 τι βοηθίνεν ι νταντέν ντα ι νταΐν;

¹⁵ Χρειαζίντιβελα θάρρος για τι βοηθίνας αμαρέ τσσαβέν τι τσσουβέν ντα τι πετυχίνεν στόχους κι υπηρεσία κι Ντεβλέσκι. Για παράδειγμας, μερικά νταντά ντα νταγιά μπορεί τι νταρένα τι βακερέν πουμαρέ τσσαβένγκε τι κερέν σκαπανικός, τι τζαν οτθέ σο υπαρχίντιβελα πιο μπουτ ανάγκη, τι υπηρετίνεν κο Μπέθελ ή τι βοηθίνεν τι χτίντιβεν  Αίθουσες Βασιλείας ντα Αίθουσες Συνελεύσεων. Μπορεί τι νταρένα ότι λένγκε τσσαβέ να κα μπορίνεν τι αρακχαβέν-λεν όταν κα πφουριόν. Όμως, ο νταντά ντα ο νταγιά σο τθερένα σοφία σικαβένα θάρρος ντα πακιάνα ότι ο Ιεχωβά κα ατσσικιαρέλ πο υποσχέσεις. (Διαβάνεν Ψαλμός 37:​25· Εβραίους 13:5) Ο νταντά ντα ο νταγιά σο σικαβένα ασακό θάρρος ντα στηρίντιβενα κο Ιεχωβά, βοηθίνενα πουμαρέ τσσαβέν τι κερέν ο ίδιος.​—1 Σαμουήλ 1:​27, 28· 2 Τιμόθεο 3:​14, 15.

16. Σαρ βοηθιντέ μερικά νταντά ντα νταγιά πουμαρέ τσσαβέν τι τσσουβέν στόχους κι υπηρεσία κι Ντεβλέσκι, ντα σαρ βοηθιντάς ανταβά λένγκε τσσαβέν;

¹⁶ Εκ αντρόγυνος κο Ηνωμένες Πολιτείες βοηθιντάς πι τσσαβέν τι αβέν αφοσιωμέ κι υπηρεσία κι Ιεχωβάσκι. Ο μουρς βακερέλα: «Προτού τι αρχίνεν αμαρέ τσσαβέ τι πφιρέν ντα τι κερέν λάφι, βακεράας λένγκε ότι ο σκαπανικός ντα η υπηρεσία κι εκκλησία ανένα χαρά. Ακανά τθερένα ανταβά στόχος». Βακερέλα επίσης ότι, επειδή λένγκε τσσαβέ τσσουντέ ντα πετυχιντέ ασακέ στόχους, βοηθίντιλε τι τζαν κόντρα κο πειρασμοί σο τσσουβέλα ο ντουνιάς ι Μπενγκέσκο ντα τι αβέν αφοσιωμέ κι υπηρεσία κι Ιεχωβάσκι. Εκ πφραλ σο τθερέλα ντουέ τσσαβέν βακερντάς: «Μπουτ νταντά ντα νταγιά κερένα προσπάθειες ντα χαλαβένα μπουτ λοβέ για τι βοηθίνεν πουμαρέ τσσαβέν τι πετυχίνεν στόχους πραγματέντε σαρ ισί ο αθλητισμός, η μουσική, η ζωγραφική ντα η εκπαίδευση. Ισί μπουτ πιο λογικός τι κεράς προσπάθειες ντα τι χαλαβάς λοβέ για τι βοηθίνας αμαρέ τσσαβέν τι πετυχίνεν στόχους σο κα βοηθίνεν-λεν τι τθερέν εκ λατσσί σχέση ι Ιεχωβάσαρ. Χαιρίνασα μπουτ όχι σάντε τι ντικχάς αμαρέ τσσαβέν τι πετυχίνεν πνευματικούς στόχους αλλά τι κεράς-ντα ανταβά ταξίδι γιεκ λέντζαρ». Μπορίνενα τι αβέν σίγουροι ότι ο Ντεβέλ κα ευλογίνελ ι νταντέν ντα ι νταΐν σο βοηθίνενα πουμαρέ τσσαβέν τι τσσουβέν ντα τι πετυχίνεν στόχους κι υπηρεσία λέσκι.

17. Βακερέν παραδείγματα τζενένγκε σο σικαβένα θάρρος αντρέ κι Χριστιανική Εκκλησία.

¹⁷ Πρέπει επίσης τι σικαβάς θάρρος αντρέ κι εκκλησία. Για παράδειγμας, ο πρεσβύτεροι χρειαζίντιβενα θάρρος για τι λεν σωστές αποφάσεις όταν αβένα-πες σοβαρές αμαρτίες ή όταν βοηθίνενα οντουλέν σο παθισάλε κάτι ντα λένγκι ζωή ισί σε κίνδυνος. Μερικοί πρεσβύτεροι τζάνα κο φυλακές για τι κερέν μελέτες ή συναθροίσεις. Επίσης, σο κα βακεράς ι πφενίνγκε σο ισί εργένια; Τθερένα μπουτ ευκαιρίες τι σικαβέν θάρρος ντα τι υπηρετίνεν ι Ιεχωβάς. Μπορίνενα τι κερέν σκαπανικός, τι τζαν οτθέ σο υπαρχίντιβελα πιο μπουτ ανάγκη, τι συνεργαζίντιβεν με το Τοπικός Τμήμας Σχεδιασμού/Οικοδόμησης ντα τι κερέν αίτηση για τη Σχολή για Ευαγγελιστές ι Βασιλειάκε. Μάλιστα, μερικέ πφενίν καλίνενα-λεν τι νακχέν ι Σχολή Γαλαάδ.

18. Σαρ μπορίνενα ο πφουρέ πφενιά τι σικαβέν θάρρος;

¹⁸ Μανγκάσα ι πφουρέ πφενίν ντα χαιρίνασα σο τθεράσα-λεν κι εκκλησία! Παρόλο σο μερικές να μπορίνενα τι κερέν οντουλά σο κερένας κι υπηρεσία κι Ντεβλέσκι, μπορίνενα τι σικαβέν θάρρος ντα τι κερέν πράγματα για τι βοηθίνεν κι εκκλησία. (Διαβάνεν Τίτο 2:​3-5) Για παράδειγμας, εκ πφουρί πφεν πρέπει τι σικαβέλ θάρρος άμα ο πρεσβύτεροι κα βακερέν λάκε τι κερέλ λάφι εκχέ τερνέ πφενιάκε για το σεμνός ιριαϊπέ. Να κα κερέλ λάφια κι πιο τερνί πφεν ι σεΐνγκε σο ιρίλα, αλλά με σουκάρ τρόπος, κα βοηθίνελ-λα τι σκεφτίνελ σαρ μπορεί τι επηρεάνελ ι γιαβερέν ο τρόπος σο ιριαβέλα-πες. (1 Τιμόθεο 2:9, 10) Όταν ο πφουρέ πφενιά κερένα ασακέ πράγματα  για τι σικαβέν πουμαρί αγάπη, μπορίνενα τι κερέν ι εκκλησία πιο ζουρανί.

19. (α) Σαρ μπορίνενα ο μπολντέ πφραλά τι σικαβέν θάρρος; (β) Σαρ μπορίνενα ο εδάφια Φιλιππησίους 2:​13 ντα 4:​13 τι βοηθίνεν ι πφραλέν τι τθερέν θάρρος;

¹⁹ Ο μπολντέ πφραλά-ντα πρέπει τι τθερέν θάρρος ντα τι κερέν πράγματα κι εκκλησία. Όταν μανγκένα τι υπηρετίνεν σαρ διακονικοί υπηρέτες ντα πρεσβύτεροι, η εκκλησία βοηθίντιβελα μπουτ. (1 Τιμόθεο 3:1) Όμως, μερικοί μπορεί τι νταρένα τι κερέν-λες ανταβά. Εκ πφραλ μπορεί τι κερντάς λάθη ντα ακανά νιωθίνελα ότι να αξίνελα λέσκε τι αβέλ διακονικός υπηρέτης ή πρεσβύτερος. Εκ γιαβέρ πφραλ μπορεί τι νιωθίνελα ότι να τθερέλα ο ικανότητες σο χρειαζίντιβενα για τι υπηρετίνελ. Άμα νιωθίνενα αντικάς, ο Ιεχωβά μπορίνελα τι βοηθίνελ-τουμέν τι τθερέν θάρρος. (Διαβάνεν Φιλιππησίους 2:​13· 4:​13) Ντεν-τουμέν γκοντί ι Μωυσής. Βοβ-ντα νιωθίνελας ότι να μπορίνελας τι κερέλ οντουλά σο μανγκέλας λέσταρ ο Ιεχωβά. (Έξοδος 3:​11) Αλλά ο Ιεχωβά βοηθιντάς-λες τι τθερέλ θάρρος ντα τι κερέλ οντουβά σο έπρεπε τι κερέλ. Σαρ μπορίνελα εκ μπολντό πφραλ τι αρακχέλ ασακό θάρρος; Μπορίνελα τι προσευχίντιβελ κο Ιεχωβά για βοήθεια ντα τι διαβάνελ ι Αγία Γραφή κάθε ντιβές. Μπορίνελα τι σκεφτίνελ παραδείγματα τζενένγκε κατά Γραφή σο σικαντέ θάρρος. Με ταπεινότητα, μπορίνελα τι μανγκέλ κατά πρεσβύτεροι τι σικλιαρέν-λες σαρ τι κερέλ κάποια πράγματα ντα τι αβέλ έτοιμος τι βοηθίνελ κατέ-ντα χρειαζίντιβελα κι εκκλησία. Βακεράσα σαρέ κο μπολντέ πφραλά τι τθερέν θάρρος ντα τι κερέν πράγματα για τι βοηθίνεν κι εκκλησία!

20, 21. (α) Σο βακερντάς ο Δαβίδ κο Σολομών; (β) Καλέ πραγμάσκε μπορίνασα τι αβάς σίγουροι;

²⁰ Ο βασιλιάς Δαβίδ βακερντάς κο Σολομών ότι ο Ιεχωβά κα αβέλας λέσαρ μέχρι τι τελειώνελ ο χτίσιμος ι ναόσκο. (1 Χρονικών 28:​20) Ο Σολομών σίγουρα σκεφτίνελας προσεκτικά ανταλά λάφια, ντα να τσσιναντάς τι κερέλ πράγματα παρόλο σο ισινέ τερνό ντα να τθερέλας εμπειρία. Αντίθετα, σικαντάς μπαρό θάρρος ντα με τη βοήθεια ι Ιεχωβάσκι τελειωντάς οντουβά μπαρό ντα σουκάρ ναός αντρέ σε εφτάμισι μπρεσά.

²¹ Ο Ιεχωβά βοηθιντάς τον Σολομώντα, ντα μπορίνελα τι βοηθίνελ αμέν-ντα τι τθεράς θάρρος ντα τι κεράς οντουβά σο μανγκέλα αμένταρ, εμ αμαρέ φαμιλιάτε εμ κι εκκλησία. (Ησαΐας 41:​10, 13) Άμα σικαβάσα θάρρος καζόμ υπηρετίνασα ι Ιεχωβάς, μπορίνασα τι αβάς σίγουροι ότι κα ευλογίνελ-αμέν ακανά ντα κο μέλλον. Οτθάρ, “τι τθερέν θάρρος ντα τι κερέν μπουτ πράγματα”.