1, 2. (α) Σαρ ισί διαφορετικός ο τρόπος σο συμπεριφερίντιβελα ο Ιεχωβά κο τζενέ κατά τρόπος σο συμπεριφερίντιβενα λένγκε ο τζενέ σο τθερένα ζορ; (β) Σο κα ντικχάς ανταλέ μαθημάστε;

Ο ΤΖΕΝΕ σο τθερένα ζορ μπουτ φαρ κερένα κουμάντος μπέτι τροπόσαρ ι γιαβερέν ή ατζέ-ντα ζορισκιαρένα-λεν. (Ματθαίος 20:​25· Εκκλησιαστής 8:9) Ο Ιεχωβά ποτές να κερέλα-λες ανταβά! Παρόλο σο ισί ο Παντοδύναμος, ο πιο Ζουρανό κο σύμπαν, σκεφτίνελα μπουτ ι αμαρτωλέ τζενέν. Σικαβέλα λατσσιπέ ντα ενδιαφερίντιβελα οντουλένγκε σο νιωθίνασα ντα οντουλένγκε σο χρειαζίντιβασα. Ντέλα-πες γκοντί ότι ισινάμ ατελείς ντα τζανέλα σο να μπορίνασα τι κεράς, οτθάρ ποτές να μανγκέλα αμένταρ πιο μπουτ οντουλένταρ σο μπορίνασα τι κεράς.​—Ψαλμός 103:​13, 14.

² Κι Αγία Γραφή, σικλιάσα καζόμ μπουτ σκεφτίνελα ο Ιεχωβά πι υπηρετόν. Ατθέ κα ντικχάς τριν παραδείγματα. Πρώτον, σαρ ο Ιεχωβά σικαντάς λατσσιπέ κο χουρντό Σαμουήλ ντα βοηθιντάς-λες τι βακερέλ κο αρχιερέας Ηλεί ι τιμωρία σο κα αβέλας. Δεύτερον, σαρ ο Ιεχωβά τθερέλας υπομονή με τον Μωυσή κάνα ο Μωυσής νιωσάλο ότι να μπορίνελας τι νικαβέλ ι Ισραηλιτέν κατά  Αίγυπτος. Ντα τρίτον, σαρ ο Ιεχωβά σκεφτιντάς ι Ισραηλιτέν κάνα νασένας κατά Αίγυπτος. Σο σικλιάσα ι Ιεχωβάσκε ανταλέ παραδειγματένταρ, ντα σαρ μπορίνασα τι μοιάζας λέστε;

3. Καβά παράξενος πράγμας αβιλό-πες κο χουρντό Σαμουήλ εκ ιράτ, ντα σο μπορεί τι πουτσάς; (Ντικχ ι φωτογραφία σο ισί κι αρχή)

³ Ο Σαμουήλ αρχισάλο τι υπηρετίνελ κι σκηνή της μαρτυρίας κάνα ισινέ μπουτ χουρντό. (1 Σαμουήλ 3:1) Εκ ιράτ σο γκιλό τι σοβέλ, αβιλό-πες κάτι μπουτ παράξενος. * (Ντικχ ι υποσημείωση) (Διαβάνεν 1 Σαμουήλ 3:​2-10) Ασουντάς εκ φωνή τι ντελ-λες βίκος. Ο Σαμουήλ αμντισάλο ότι ισινέ ο πφουρό αρχιερέας Ηλεί. Οτθάρ ιστίντιλο, τθαβντισάλο πασέ λέστε ντα βακερντάς: «Βάκερ μάνγκε! Ντινάν-μαν βίκος;» Ο Ηλεί όμως βακερντάς: «Να ντινόμ-τουτ βίκος». Όταν ανταβά αβιλό-πες ατζέ ντούι φαρ, ο Ηλεί αγαντάς ότι οντουβά σο ντέλας βίκος ι Σαμουηλίς ισινέ ο Ντεβέλ. Οτθάρ, ο Ηλεί βακερντάς κο Σαμουήλ σαρ τι απαντίνελ ι γιαβέρ φαρ, ντα βοβ ντινάς καν. Σόσκε να βακερντάς από την αρχή ο Ιεχωβά κο Σαμουήλ ότι Βοβ ντέλας-λες βίκος; Η Γραφή να βακερέλα. Αλλά μάλλον ο Ιεχωβά κερντάς αντικάς ο πράγματα επειδή ενδιαφερίντιβελας οντουλένγκε σο νιωθίνελας ο Σαμουήλ.

4, 5. (α) Σο κερντάς ο Σαμουήλ κάνα ο Ιεχωβά βακερντάς λέσκε τι βακερέλ κο Ηλεί ι τιμωρία σο κα αβέλας; (β) Σο σικλιαρέλα-αμέν ανταγιά ιστορία ι Ιεχωβάσκε;

⁴ Διαβάνεν 1 Σαμουήλ 3:​11-18. Ο Νόμος ι Ιεχωβάσκο ντέλας ι εντολή κο χουρντέ τι σεβάνεν ι πφουρέν, ειδικά οντουλέν σο τθερένας εξουσία. (Έξοδος 22:​28· Λευιτικό 19:​32) Οτθάρ, ισί δύσκολος τι σκεφτίνας ότι εκ χουρντό τσσαβό σαρ ο Σαμουήλ κα τζάλας πρωί κο Ηλεί ντα κα βακερέλας λέσκε με θάρρος ι μπαρί τιμωρία σο κα ανέλας ο Ντεβέλ. Η Γραφή βακερέλα αμένγκε ότι ο Σαμουήλ «νταρέλας . . . τι βακερέλ κο Ηλεί ανταλέ φαντασιάκε». Όμως, ο Ντεβέλ σικαντάς ξεκάθαρα κο Ηλεί ότι Βοβ ντέλας βίκος ι Σαμουηλίς. Οτθάρ, ο Ηλεί μανγκλάς κατά Σαμουήλ μα τι γκεραβέλ τίποτα οντουλένταρ σο βακερντάας ο Ντεβέλ. Ο Σαμουήλ ντινάς καν κο Ηλεί ντα «βακερντάς-λεν λέσκε σαρέ».

⁵ Ανταλά λάφια να κερντέ εντύπωση κο Ηλεί. Ανγκλέ-ντα «εκ τζενό ι Ντεβλέσκο» βακερντάας κο Ηλεί κάτι ασακό. (1 Σαμουήλ 2:​27-36) Ανταγιά ιστορία σικλιαρέλα-αμέν καζόμ μπουτ σκεφτίνελα ο Ιεχωβά ι τζενέν ντα καζόμ σοφία τθερέλα.

6. Σο σικλιάσα κατά τρόπος σο βοηθιντάς ο Ντεβέλ ι χουρντέ Σαμουηλίς;

⁶ Μήπως ισινάν τερνό; Αν βα, η ιστορία ι χουρντέ Σαμουηλίσκι σικαβέλα ότι ο Ιεχωβά αγαβέλα το προβλήματα ντα σαρ νιωθίνεσα. Μπορεί τι λατζάσα ντα μα τι αβέλ τούκε εύκολος τι κερές έργος μπαρέ τζενέντε ή τι αβές διαφορετικός κατά γιαβερά τσσαβέ. Τι αβές σίγουρος ότι ο Ιεχωβά μανγκέλα τι βοηθίνελ-τουτ. Οτθάρ, τι προσευχίντιβες λέστε ντα τι βακερές λέσκε ακριβώς σαρ νιωθίνεσα. (Ψαλμός 62:8) Τι σκεφτίνες προσεκτικά αντράλ κατά Γραφή  παραδείγματα τερνένγκε σαρ ο Σαμουήλ. Ντα τι κερές λάφι πφραλέντζαρ, εμ χουρντέντζαρ εμ μπαρέντζαρ, σο μπορεί τι νακχλέ δυσκολίες σαρ τιρέ. Μπορεί τι βακερέν τούκε ιστορίες σο σικαβένα σαρ βοηθιντάς-λεν ο Ιεχωβά με τρόπους σο να μπεκλεντίνενας.

7, 8. Σαρ σικαντάς ο Ιεχωβά ότι ενδιαφερίντιβελας μπουτ οντουλένγκε σο νιωθίνελας ο Μωυσής;

⁷ Όταν ο Μωυσής ισινέ 80 μπρεσένγκο, λιντάς κατά Ιεχωβά εκ μπουτ δύσκολος διορισμός: τι ελευθερώνελ ι Ισραηλιτέν σο ισινέ σκλάβοι κι Αίγυπτος. (Έξοδος 3:​10) Αφού ισινέ 40 μπρεσά τσομπάνης κι Μαδιάμ, σίγουρα σαστισάλο με το διορισμός σο λιντάς. Ο Μωυσής βακερντάς: «Κον ισινόμ με σο κα τζαβ κο Φαραώ ντα κα νικαβάβ ι Ισραηλιτέν κατά Αίγυπτος;» Αλλά ο Ιεχωβά βακερντάς λέσκε: «Με κα αβάβ τούσαρ». (Έξοδος 3:​11, 12) Επίσης, ντινάς-λες πο λάφι ότι ο πρεσβύτεροι κο Ισραήλ “κα ασουνένας-λες σίγουρα”. Αλλά βοβ πουτσλάς: «Σο κα κεράβ όμως άμα να κα πακιάν-μαν ντα να κα ασουνέν;» (Έξοδος 3:​18· 4:1) Ο Μωυσής βακερέλας κι πραγματικότητα ότι ο Ιεχωβά μπορεί τι κερέλας λάθος! Αλλά ο Ιεχωβά κερντάς υπομονή λέσαρ. Ντινάς-λες ατζέ-ντα ι ζορ τι κερέλ θαύματα. Ο Μωυσής ισινέ ο πρώτος τζενό σο βακερέλα η Γραφή ότι τθερέλας ασακί ζορ.​—Έξοδος 4:​2-9, 21.

⁸ Ατζέ-ντα αφού αβιλέ-πες σαρέ ανταλά, ο Μωυσής τθερέλας γιαβέρ-ντα δικαιολογία. Βακερντάς ότι να μπορίνελας τι κερέλ λατσσές λάφι. Οτθάρ, ο Ντεβέλ βακερντάς λέσκε: «Με κα αβάβ τούσαρ κάνα κα κερές λάφι ντα κα σικλιαράβ-τουτ σο πρέπει τι βακερές». Δεχτιντάς τελικά ο Μωυσής; Όχι, μανγκλάς κατά Ντεβέλ τι μπουτσσαβέλ εκχέ γιαβερές! Αζομάν ο Ιεχωβά χολιασάλο. Αλλά συνεχίνελας τι ενδιαφερίντιβελ οντουλένγκε σο νιωθίνελας ο Μωυσής, ντα αντικάς μπουτσσαντάς τον Ααρών για τι κερέλ λάφι αντίς τι κερέλ λάφι ο Μωυσής.​—Έξοδος 4:​10-16.

9. Σαρ βοηθιντάς ι Μωυσής τι αβέλ λατσσό αρχηγός η υπομονή ντα ο λατσσιπέ ι Ιεχωβάσκο;

⁹ Σο σικλιαρέλα-αμέν ανταγιά ιστορία ι  Ιεχωβάσκε; Επειδή ο Ιεχωβά ισί ο Παντοδύναμος, κα μπορίνελας τι χρησιμοποιήνελ πι ζορ για τι νταραβέλ ι Μωυσής ντα τι κερέλ-λες τι ντελ καν. Αντίς τι κερέλ-λες ανταβά, ο Ιεχωβά κερντάς υπομονή, σικαντάς λατσσιπέ ντα βακερντάς πι υπηρετίσκε, σο αγαβέλας πο όρια ντα ισινέ ταπεινός, ότι κα αβέλας λέσαρ. Τθερέλας αποτέλεσμας ανταβά σο κερντάς; Βα! Ο Μωυσής αβιλό εκ μπουτ λατσσό αρχηγός κι Ντεβλέσκο λαός. Προσπαθίνελας τι αβέλ ήρεμος ντα τι σκεφτίνελ ι γιαβερέν, σαρ κερντάας ο Ιεχωβά λέσκε.​—Αριθμοί 12:3.

10. Σαρ βοηθίντιβασα κάνα σκεφτίνασα ι γιαβερέν σαρ ο Ιεχωβά;

¹⁰ Σο σικλιάσα αντιβές αμέν; Άμα ισινάν παντριμέ, ντατ ή πρεσβύτερος, τθερέσα κάποια εξουσία οπράλ κο γιαβερά. Οτθάρ, ισί μπουτ σημαντικός τι σκεφτίνες τι ρομνιά, τι τσσαβέν ντα οντουλέν σο ισί κι κχανγκιρί, τι σικαβές λένγκε λατσσιπέ ντα τι κερές υπομονή λέντζαρ για τι μοιάζες κο Ιεχωβά. (Κολοσσαείς 3:​19-21· 1 Πέτρου 5:​1-3) Αν μοιάζεσα κο Ιεχωβά Ντεβέλ ντα κο Ιησούς Χριστός, σο ισί ο πιο Μπαρό Μωυσής, κα αβέλ εύκολος ι γιαβερένγκε τι πλησιάνεν-τουτ ντα τι κερέν τούσαρ λάφι, ντα κα ενθαρρύνες-λεν. (Ματθαίος 11:​28, 29) Επίσης, κα αβές λατσσό παράδειγμας λένγκε.​—Εβραίους 13:7.

11, 12. Σαρ κερντάς ο Ιεχωβά ι Ισραηλιτέν τι νιωθίνεν ασφάλεια ντα σιγουριά κάνα νικαντάς-λεν κατά Αίγυπτος;

¹¹ Όταν ο Ισραηλίτες νασλέ κατά Αίγυπτος κο 1513 Π.Κ.Χ., μπορεί τι ισινέ πιο μπουτ από τριν εκατομμύρια. Ισινέ χουρντέ, πφουρέ ντα σίγουρα κάποιοι σο ισινέ νασφαλέ ή τθερένας γιαβερά προβλήματα υγείας. Εκ αζόμ μπαρό λαός χρειαζίντιβελας εκχέ Αρχηγός σο κα πφαμπόλας λένγκε ντα κα αγαβέλας-λεν. Ο Ιεχωβά, αντράλ κατά Μωυσής, σικαντάς ότι ισινέ εκ ασακό Αρχηγός. Οτθάρ, ο Ισραηλίτες νιωθίνενας ασφάλεια καζόμ μουκχένας παλά-πουμέντε ο μοναδικός τθαν σο τζανένας.​—Ψαλμός 78:​52, 53.

¹² Σαρ κερντάς ο Ιεχωβά πι λαός τι νιωθίνελ ασφάλεια ντα σιγουριά; Οργανωντάς ι Ισραηλιτέν «σαρ τι αβένας στρατός» κάνα νασλέ κατά Αίγυπτος. (Έξοδος 13:​18) Επειδή ισινέ οργανωμέ ανταλέ τροπόσαρ, μπορίνενας τι ντικχέν ξεκάθαρα ότι λένγκο Ντεβέλ τθερέλας ο πράγματα πι βαστέντε. Επίσης, ο Ιεχωβά τσσουντάς λένγκε «εκ σύννεφος ντισάρα» ντα «ο φως εκχέ γιακάκο» αρατί για τι ντεν-πες γκοντί ότι ισινέ λέντζαρ, ντα ότι οδηγίνελας-λεν ντα αρακχαβέλας-λεν. (Ψαλμός 78:​14) Ο Ισραηλίτες χρειαζίντιβενας-λες ανταβά επειδή σοράν κα αβένας-πες γιαβερά-ντα πράγματα.

13, 14. (α) Σαρ σικαντάς ο Ιεχωβά ότι πφαμπόλας ι Ισραηλιτένγκε κι Ερυθρά Θάλασσα; (β) Σαρ σικαντάς ο Ιεχωβά ότι ισινέ μπουτ πιο ζουρανό κατά Αιγύπτιοι;

 ¹³ Διαβάνεν Έξοδος 14:​19-22. Σκεφτίνεν ότι ισινέν οτθέ ι Ισραηλιτέντζαρ. Ναστί τζάνα πουθενά. Ο αιγυπτιακός στρατός ισί παλά-τουμέντε ντα η Ερυθρά Θάλασσα ανγκλά-τουμέντε. Ντα αζομάν ο Ντεβέλ κερέλα κάτι. Ο σύννεφος σο ισινέ ανγκλά-τουμέντε τζάλα παλάλ κατά στρατόπεδος, ανγκλάλ κο Αιγύπτιοι. Ακανά βον ισί κο καρανίκι, όμως τουμαρό στρατόπεδος ισί πφερντό φως με θαυματουργικός τρόπος! Αζομάν ντικχένα ι Μωυσής τι βάντελ πο βας οπράλ κατά ντεριάβ, ντα εκ ζουρανί ανατολική μπαρμπάλ πουτρέλα εκ μπουγλό ντρομ μέχρι οκιά μπάνταρ. Τουμέν, τουμαρί φαμιλί ντα τουμαρέ ζώα αρχίνενα τι πφιρέν με εκ οργανωμέ τρόπος οτθέ σο ισινέ πριν η ντεριάβ. Ατσσόνα πουταρντέ μόσαρ κάνα ντικχένα ότι η τσικ νανέ σουσλί ντα να γλιστρίνελα. Αλλά ισί σουκί ντα σταθερή σο κερέλα εύκολος ο πφιριπέ. Οτθάρ, ατζέ-ντα οντουλά σο πφιρένα μπουτ πφαρές νακχένα οκιά μπάνταρ με ασφάλεια.

¹⁴ Διαβάνεν Έξοδος 14:​23, 26-30. Καζόμ αβέλα-πες ανταβά, ο Φαραώ σο ισί μπαρικανό ντα ντινιλό, αρχίνελα τι κουλαντίνελ τουμέν ντα ι γιαβερέ Ισραηλιτέν. Αζομάν, ο Μωυσής βάντελα πάλι πο βας οπράλ κατά ντεριάβ ντα ο πανιά σο αβιλέας σαρ ντούι ντουβάρια περένα τελέ. Ο πανιά μουνταρένα ι Φαραώς ντα λέσκε στρατός. Καέκ λένταρ να σώντιβελα!​—Έξοδος 15:​8-10.

15. Σο σικλιαρέλα-τουμέν ανταγιά ιστορία ι Ιεχωβάσκε;

¹⁵ Ανταγιά ιστορία σικλιαρέλα-αμέν κάτι  γιαβέρ-ντα ι Ιεχωβάσκε. Ισί Ντεβέλ σο μανγκέλα τι αβέν ο πράγματα εκχέ σειράσαρ, ντα ανταβά βοηθίνελα-αμέν τι νιωθίνας ασφάλεια ντα σιγουριά. (1 Κορινθίους 14:​33) Σαρ εκ τσομπάνης μανγκέλα ντα αρακχαβέλα πι μπρακέν, αντικάς ο Ιεχωβά-ντα φροντίνελα πι λαός μπουτέ τροπόντζαρ. Ντέλα-λεν ασφάλεια ντα αρακχαβέλα-λεν λένγκε ντουσμανίνταρ. Ανταβά κερέλα-αμέν σίγουρους ντα ντέλα-αμέν μπαρί παρηγοριά καζόμ ερεσάσα πιο πασέ κο τέλος ανταλέ ντουνιάσκο.​—Παροιμίες 1:33.

16. Σαρ βοηθίντιβασα κάνα σκεφτίνασα ο τρόπος σο σωντάς ο Ιεχωβά ι Ισραηλιτέν;

¹⁶ Αντιβές, ο Ιεχωβά συνεχίνελα τι φροντίνελ πι υπηρετόν σαρ ομάδα. Βοηθίνελα-λεν τι ατσσικιαρέν πουμαρί λατσσί φιλία λέσαρ ντα αρακχαβέλα-λεν λένγκε ντουσμανίνταρ. Ντα κα συνεχίνελ τι κερέλ-λες ανταβά κι μπαρί στεναχώρια σο ερεσέλα σουγκό. (Αποκάλυψη 7:9, 10) Άρα, είτε ισί τερνέ είτε πφουρέ, είτε τθερένα λατσσί υγεία είτε να τθερένα, ο υπηρέτες ι Ντεβλέσκε να κα αναστατώντιβεν ούτε κα νταρέν κι μπαρί στεναχώρια. * (Ντικχ ι υποσημείωση) Μάλιστα, κα κερέν ακριβώς ο αντίθετος! Κα τθερέν πουμαρέ γκοντιάτε ακαλά λάφια σο βακερντάς ο Ιησούς: «Ιστίν ντα βάντεν τουμαρό σορό, σόσκε ερεσέλα ο ντιβές σο κα ελευθερώντιβεν». (Λουκάς 21:​28) Ο υπηρέτες ι Ντεβλέσκε κα αβέν σίγουροι ότι ο Ιεχωβά κα αρακχαβέλ-λεν ατζέ-ντα κάνα κα τζαλ λέντζαρ κόντρα ο Γωγ, δηλαδή ο κράτη σο κα συμφωνίνεν τι πολεμίνεν σαρέ γιεκ ντα κα τθερέν μπουτ πιο μπαρί ζορ κατά Φαραώ. (Ιεζεκιήλ 38:2, 14-16) Σόσκε; Επειδή τζανένα ότι ο Ιεχωβά να αλλάνελα. Βοβ κα σικαβέλ πάλι ότι ισί Σωτήρας σο μανγκέλα πι λαός ντα πφαμπόλα λέσκε.​—Ησαΐας 26:3, 20.

17. (α) Σαρ μπορίνασα τι βοηθίντιβας κατά ιστορίες ι Γραφιάκε σο σικαβένα σαρ φροντίνελα ο Ιεχωβά πι λαός; (β) Σο κα σικλιάς κο γιαβέρ μάθημας;

¹⁷ Ανταλέ μαθημάστε, ντικχλάμ μερικά παραδείγματα σο σικαβένα ότι ο Ιεχωβά σκεφτίνελα πι λαός ντα σικαβέλα λέσκε λατσσιπέ κάνα φροντίνελα-λες, οδηγίνελα-λες ντα σώνελα-λες. Καζόμ σκεφτίνενα ασακέ ιστορίες, ρόντεν λεπτομέρειες σο μπορεί μα τι ντικχλένας πριν για τι σικλιόν κάτι νεβό ι Ιεχωβάσκε. Καζόμ πιο μπουτ κα σικλιόν ο σουκάρ ιδιότητες ι Ιεχωβάσκε, τουμαρί αγάπη λέσκε ντα τουμαρί πίστη λέστε κα αβέν πιο ζουρανέ. Κο γιαβέρ μάθημας, κα σικλιάς τρόπους σο μπορίνασα τι μοιάζας κο Ιεχωβά κάνα σκεφτίνασα αμαρί φαμιλί, αμαρέ πφραλέν ντα πφενίν ντα οντουλέν σο αρακχάσα κο έργος.