«Αν Τζανένα Ανταλά Πράγματα, Ευτυχισμέ κα Αβέν αν κα Κερέν-λεν»
«Μο χαμπέ ισί τι κεράβ ο θέλημας οντουλέσκο σο μπουτσσαντάς-μαν ντα τι τελειώναβ λέσκο έργος».—ΙΩΑΝΝΗΣ 4:34.
ΥΜΝΟΙ: 95, 42
1. Σαρ μπορίνελα τι επηρεάνελ αμαρί ταπεινότητα ο ντουνιάς σο ντικχέλα σάντε πο νεαυτός;
ΣΟΣΚΕ ισί δύσκολος τι κεράς οντουλά σο σικλιάσα κατά Λάφι ι Ντεβλέσκο; Εκ λόγος ισί ότι πρέπει τι αβάς ταπεινοί για τι κεράς ο σωστός. Ανταλέ “τελευταίε ντιβεσέντε”, ισί δύσκολος τι ατσσάς ταπεινοί, επειδή μπουτ τζενέ ντονταλάι αμένταρ “μανγκένα σάντε πουμαρό νεαυτός, μανγκένα μπουτ ο λοβέ, ισί μπαρικανέ, εγωιστές” ντα “να ατσσικιαρένα πουμαρό νεαυτός”. (2 Τιμόθεο 3:1-3) Σαρ υπηρέτες ι Ντεβλέσκε, τζανάσα ότι ασακί συμπεριφορά νανέ λατσσί, αλλά μπορεί τι ντικχίντιβελα ότι οντουλά σο συμπεριφερίντιβενα αντικάς τθερένα επιτυχία ντα απολαμβάνενα μπαγιά πουμαρί ζωή. (Ψαλμός 37:1· 73:3) Μπορεί ατζέ-ντα τι πουτσάς: “Αξίνελα μπαγιά τι τσσουβάβ ο ανάγκες ι γιαβερένγκε πιο οπρέ μιρένταρ; Αν κα αβάβ ταπεινός, κα σεβάνεν-μαν ο τζενέ;” (Λουκάς 9:48) Αν μουκχάσα ι ντουνιάς σο ντικχέλα σάντε πο νεαυτός τι επηρεάνελ-αμέν, μπορεί τι χαλαβάς ο λατσσέ σχέσεις σο τθεράσα αμαρέ πφραλέντζαρ ντα τι αβέλ δύσκολος ι γιαβερένγκε τι αγαβέν ότι ισινάμ Χριστιανοί. Όμως, κάνα εξετάνασα ο παραδείγματα σο μουκχλέ ο ταπεινοί υπηρέτες ι Ντεβλέσκε ντα ακολουθίνασα-λεν, κα τθεράς λατσσέ αποτελέσματα.
2. Σο μπορίνασα τι σικλιάς κατά πιστοί υπηρέτες ι Ντεβλέσκε σο τζουβντιλέ κο πουρανέ μπρεσά;
2 Σο βοηθιντάς ι Ντεβλέσκε πιστέ υπηρετόν κο πουρανέ μπρεσά τι αβέν λέσκε αμαλά; Σαρ κερντέ λέσκο γκι; Κατέ αρακχλέ ι ζορ τι κερέν ο σωστός; Κάνα διαβάνασα λένγκε παραδείγματα κι Γραφή ντα σκεφτίνασα λατσσές οντουλά σο διαβάνασα, αμαρί πίστη κα αβέλ πιο ζουρανί.
ΣΟ ΑΤΣΣΙΚΙΑΡΕΛΑ ΑΜΑΡΙ ΠΙΣΤΗ ΖΟΥΡΑΝΙ
3, 4. (α) Σαρ σικλιαρέλα-αμέν ο Ιεχωβά; (β) Σόσκε να ερεσέλα σάντε τι τζανάς πράγματα για τι ατσσικιαράς αμαρί πίστη ζουρανί;
3 Ο Ιεχωβά ντέλα σαρέ οντουλά σο χρειαζίντιβασα για τι ατσσικιαράς αμαρί πίστη ζουρανί. Λάσα λατσσέ συμβουλές ντα σικλιαριπέ αντράλ κατά Γραφή, κατά Χριστιανικά έντυπα, κατά ιστότοπος, κατά JW Broadcasting, κατά συναθροίσεις ντα κατά συνελεύσεις. Αλλά ο Ιησούς εξηγιντάς ότι να ερεσέλα σάντε τι τζανάς πράγματα. Βακερντάς: «Μο χαμπέ ισί τι κεράβ ο θέλημας οντουλέσκο σο μπουτσσαντάς-μαν ντα τι τελειώναβ λέσκο έργος».—Ιωάννης 4:34.
4 Ι Ιησούσκε, τι κερέλ ο θέλημας ι Ντεβλέσκο ισινέ σαρ χαμπέ. Όταν χάσα εκ λατσσό χαμπέ νιωθίνασα λατσσές ντα αμαρό σώμας λέλα ζορ, αντικάς-ντα κάνα κεράσα ο θέλημας ι Ντεβλέσκο νιωθίνασα λατσσές ντα αμαρί πίστη αβέλα πιο ζουρανί. Για παράδειγμας, τυχισάλο ποτές τι τζαν σε εκ συνάθροιση για το έργος κχινέ, αλλά σοράν κάνα βουρτισάλεν τι νιωθίνεν ευτυχισμέ ντα ότι λοκχιλό τουμαρό γκι;
5. Σαρ βοηθίντιβασα κάνα τθεράσα σοφία;
5 Κάνα κεράσα οντουβά σο μανγκέλα αμένταρ ο Ιεχωβά, τθεράσα σοφία. (Ιακώβου 3:13) Ντα μπουτ λατσσέ πράγματα αβένα-πες οντουλένγκε σο τθερένα σοφία. «Καέκ κατά πράγματα σο μανγκέσα νανέ πιο λατσσό λάταρ. . . . Ισί δέντρος σο ντέλα ζωή οντουλέντε σο ντένα-λα αγκάλι, ντα οντουλά σο ασταρένα-λα σικίς κα βακέρντιβεν ευτυχισμέ». (Παροιμίες 3:13-18) Ο Ιησούς βακερντάς: «Αν τζανένα ανταλά πράγματα, ευτυχισμέ κα αβέν αν κα κερέν-λεν». (Ιωάννης 13:17) Ο μαθητές ι Ιησούσκε κα αβένας χαρούμενοι καζόμ κα συνεχίνενας τι κερέν οντουλά σο βακερντάς λένγκε ο Ιησούς. Τραμπιντέ τι ακολουθίνεν ο λάφια ντα ο παράδειγμας λέσκο, ντα κερντέ-λες ανταβά σαρέ πουμαρέ ζωγιάτε.
6. Σόσκε πρέπει τι συνεχίνας τι κεράς οντουλά σο σικλιάσα;
6 Αντιβές, αμέν-ντα πρέπει τι συνεχίνας τι κεράς οντουλά σο σικλιάσα. Σκεφτίνεν εκχέ μηχανικός σο τθερέλα εργαλεία, υλικά ντα γνώση. Σαρέ ανταλά κα βοηθίνεν-λες τι αβέλ λατσσό μηχανικός σάντε αν κα χρησιμοποιήνελ-λεν. Μπορεί τι κερντάς μπουτ μπρεσά οντιά μπουτί, αλλά πρέπει τι συνεχίνελ τι χρησιμοποιήνελ οντουλά σο σικλιλό αν μανγκέλα τι ατσσόλ λατσσό μηχανικός. Αντικάς αμέν-ντα, κάνα σικλιλάμ ι αλήθεια ισινάμας χαρούμενοι επειδή κεράας οντουλά σο διαβάναας κατά Γραφή. Αλλά για τι αρακχάς ευτυχία σο να χασάρντιβελα, πρέπει τι συνεχίνας τι κεράς κάθε ντιβές οντουλά σο σικλιαρέλα-αμέν ο Ιεχωβά.
7. Σο πρέπει τι κεράς για τι σικλιάς κατά παραδείγματα σο ισί κι Γραφή;
7 Μερικέ περιπτωσιέντε, μπορεί τι αβέλ δύσκολος αμένγκε τι ατσσάς ταπεινοί. Ανταλέ μαθημάστε, κα σικλιάς σαρ ατσσιλέ ταπεινοί ασακέ περιπτωσιέντε μερικά πιστά τζενέ κο πουρανέ μπρεσά. Κα ντικχάς σταρ τρόπους σο σικαβάσα ότι ισινάμ ταπεινοί. Αλλά να ερεσέλα σάντε τι διαβάνας ανταλά πράγματα. Πρέπει τι σκεφτίνας-λεν ντα σοράν τι κεράς-λεν αμαρέ ζωγιάτε.
ΜΑ ΠΑΚΙΑΝ ΟΤΙ ΙΣΙΝΕΝ ΠΙΟ ΟΠΡΕ ΚΑΤΑ ΓΙΑΒΕΡΑ
8, 9. Σο σικλιάσα κατά εδάφια Πράξεις 14:8-15 για την ταπεινότητα σο τθερέλας ο Παύλος; (Ντικχ ι φωτογραφία σο ισί κι αρχή)
8 Ο Ντεβέλ μανγκέλα «τι σώντιβεν σαρέ ο τζενέ ντα τι σικλιόν ντιπ ι αλήθεια». (1 Τιμόθεο 2:4) Σαρ ντικχένα τουμέν σαρέ οντουλέ τζενέν σο να γνωριντέ ατζέκ ι αλήθεια; Ο απόστολος Παύλος κερντάς έργος κο Ιουδαίοι σο τζανένας κάποια πράγματα ι Ιεχωβάσκε. Όμως, κερντάς έργος τζενέντε-ντα σο ντένας λατρεία ψεύτικε ντεβλέντε. Ο έργος σο κερντάς λέντε σικαντάς άμα ισινέ μπαγιά ταπεινός.
9 Κο πρώτος ιεραποστολικός ταξίδι σο κερντάς ο Παύλος, βοβ ντα ο Βαρνάβας γκιλέ κο Λύστρα. Ο Λυκάονες σο τζουβντιόνας οτθέ μανγκένας τι ντεν-λεν δόξα επειδή αμντισάλεας ότι τθερένας πιο μπουτ δυνάμεις κατά γιαβερά τζενέ, ντα βακερντέ ότι ο Παύλος ντα ο Βαρνάβας ισινέ ο Δίας ντα ο Ερμής. Μήπως ο Παύλος ντα ο Βαρνάβας μπεϊντιντέ-λες ανταβά; Μήπως σκεφτιντέ ότι ανταβά ισινέ πιο λατσσό κατά διωγμός σο τθερένας κο γιαβερά ντούι πόλεις σο γκιλέας; Μήπως σκεφτιντέ ότι σαρί ανταγιά προσοχή σο ντιντιόλας-λεν κα βοηθίνελας πιο μπουτ τζενέν τι ασουνέν ο λατσσέ αμπέρια; Όχι! Να μπεϊντιντέ-λες ντα ντινέ βίκος: «Σο ισί ανταλά σο κερένα; Αμέν-ντα τζενέ ισινάμ ντα τθεράσα ο ίδιες αδυναμίες τουμέντζαρ».—Πράξεις 14:8-15.
10. Σόσκε ο Παύλος ντα ο Βαρνάβας να αμντίνενας ότι ισινέ πιο οπρέ κατά Λυκάονες;
10 Κάνα ο Παύλος ντα ο Βαρνάβας βακερντέ ότι βον-ντα ισινέ τζενέ, μανγκένας τι βακερέν ότι ισινέ ατελείς. Να μανγκένας τι βακερέν ότι ντένας λατρεία με το ίδιος τρόπος σαρ ο Λυκάονες. Ο Παύλος ντα ο Βαρνάβας μπουτσσάντιλεας κατά Ντεβέλ σαρ ιεραπόστολοι. (Πράξεις 13:2) Ισινέ χρισμέ με άγιος πνεύμας ντα τθερένας εκ μπουτ σουκάρ ελπίδα. Όμως, ανταβά να ισινέ λόγος για τι νιωθίνεν πιο οπρέ κατά γιαβερά. Αγαβένας ότι οντουλά τζενέ-ντα κα μπορίνενας τι τθερέν ι ελπίδα τι τζουβντιόν κο ουρανός αν κα δεχτίνενας ο λατσσέ αμπέρια.
11. Σαρ μπορίνασα τι αβάς ταπεινοί σαρ ο Παύλος όταν κεράσα έργος;
11 Κα ντικχάς εκ τρόπος σο σικαβάσα ότι ισινάμ ταπεινοί σαρ ο Παύλος. Ποτές δεν πρέπει τι νιωθίνας ότι αμαρό διορισμός τι βακεράς ο λατσσέ αμπέρια ή ο πράγματα σο βοηθίνελα-αμέν ο Ιεχωβά τι καταφερίνας κερένα-αμέν τι ξεχωρίνας. Ισί λατσσό τι πουτσάς-αμέν: “Σαρ ντικχάβα ι τζενέν μι τομεάστε; Μήπως μερικέ τζενένγκε τθεράβα ρατσισμός;” Σαρό κο ντουνιάς, ο Μάρτυρες ι Ιεχωβάσκε προσπαθίνενα τι αρακχέν ι τζενέν σο κα ασουνέν ο λατσσέ αμπέρια. Μερικοί προσπαθίνενα ατζέ-ντα τι σικλιόν ι τσσιπ ή ο έθιμα τζενένγκε σο ο γιαβερά πακιάνα ότι νανέ σημαντικοί. Αλλά ποτές να νιωθίνενα ότι ισί πιο λατσσέ λένταρ. Προσπαθίνενα τι αγαβέν κάθε τζενές για τι βοηθίνεν καζόμ πιο μπουτ τζενέν αβέλα-πες τι δεχτίνεν ο λατσσέ αμπέρια ι Βασιλειάκε.
ΤΙ ΠΡΟΣΕΥΧΙΝΤΙΒΕΝ Ι ΓΙΑΒΕΡΕΝΓΚΕ ΛΕΝΓΚΕ ΝΑΒΕΝΤΖΑΡ
12. Σαρ σικαβέλας ο Επαφράς ότι πφαμπόλας μπαγιά ι γιαβερένγκε;
12 Εκ γιαβέρ τρόπος σο σικαβάσα ότι ισινάμ ταπεινοί ισί τι προσευχίντιβας αμαρέ πφραλένγκε ντα πφενίνγκε, «σο λένγκι πίστη ισί αζόμ πολύτιμη καζόμ ισί αμαρί». (2 Πέτρου 1:1) Ο Επαφράς κερντάς-λες ανταβά. Η Γραφή κερέλα λάφι λέσκε σάντε τριν φαρ. Κάνα ο Παύλος ισινέ φυλακισμέ πι κχερέστε κι Ρώμη, γραφιντάς κο Χριστιανοί σο τζουβντιόνας κο Κολοσσές: «[Ο Επαφράς] μαρέλα-πες πάντα μάξους τουμένγκε πι προσευχιέντε». (Κολοσσαείς 4:12) Ο Επαφράς τζανέλας λατσσές ι πφραλέν ντα πφαμπόλας μπουτ λένγκε. Ο Παύλος βακερντάς ότι ο Επαφράς ισινέ “φυλακισμέ σαρ ισινέ βοβ”, άρα ο Επαφράς-ντα τθερέλας προβλήματα. (Φιλήμονα 23) Αλλά συνεχίνελας τι πφαμπόλ για το ανάγκες ι γιαβερένγκε ντα κερέλας πράγματα για τι βοηθίνελ-λεν. Ο Επαφράς προσευχίντιβελας ι πφραλένγκε ντα ι πφενίνγκε. Αμέν-ντα μπορίνασα τι κεράς ο ίδιος ντα τι βακεράς ατζέ-ντα λένγκε ναβά. Ασακέ προσευχές τθερένα μπαρί ζορ.—2 Κορινθίους 1:11· Ιακώβου 5:16.
13. Σαρ μπορίνενα τι μοιάζεν κο Επαφράς κάνα προσευχίντιβενα;
13 Σκεφτίνεν εκχέ τζενές σο κα μπορίνενας τι προσευχίντιβεν λέσκε, λέσκε ναβέσαρ. Μπορεί τι τζανένα ότι κάποια αμαλά κι κχανγκιρί ή φαμιλιά νακχένα προβλήματα. Βον μπορεί τι τθερένα τι λεν δύσκολες αποφάσεις ή τι αντιμετωπίνενα πειρασμοί. Μπορίνενα επίσης τι προσευχίντιβεν πφραλένγκε σο ο ναβά λένγκε ισί κο ιστότοπος jw.org, κο θέμας «Μάρτυρες του Ιεχωβά Φυλακίζονται για την Πίστη Τους». (Τραμπίνεν ΑΙΘΟΥΣΑ ΣΥΝΤΑΞΗΣ > ΝΟΜΙΚΕΣ ΕΞΕΛΙΞΕΙΣ) Επίσης, μπορίνενα τι προσευχίντιβεν οντουλένγκε σο χασαρντέ αγαπημέ τζενέν κο μεριπέ, οντουλένγκε σο σωσάλε κατά καταστροφές ή κατά τζένγκια σο αβιλέ-πες ακανά τελευταία ντα οντουλένγκε σο τθερένα οικονομικά προβλήματα. Υπαρχίντιβενα αζόμ μπουτ πφραλά ντα πφενιά σο τθερένα ανάγκη αμαρέ προσευχές! Κάνα προσευχίντιβασα λένγκε σικαβάσα ότι να ντικχάσα σάντε αμαρέ ανάγκες αλλά ι γιαβερένγκε-ντα. (Φιλιππησίους 2:4) Ο Ιεχωβά ασουνέλα ασακέ προσευχές.
“ΤΙ ΑΣΟΥΝΕΝ ΜΕ ΠΡΟΣΟΧΗ”
14. Σαρ ντέλα ο Ιεχωβά ο πιο λατσσό παράδειγμας επειδή ασουνέλα;
14 Εκ γιαβέρ τρόπος σο σικαβάσα ότι ισινάμ ταπεινοί ισί τι ασουνάς ι γιαβερέν. Ο εδάφιος Ιακώβου 1:19 βακερέλα αμένγκε τι “ασουνάς με προσοχή”. Ο Ιεχωβά ντέλα ο πιο λατσσό παράδειγμας οπράλ ανταλέστε. (Γένεση 18:32· Ιησούς του Ναυή 10:14) Για παράδειγμας, διαβάνεν ι συζήτηση σο ισί κο εδάφια Έξοδος 32:11-14. (Διαβάνεν) Παρόλο σο ο Ιεχωβά να τθερέλας ανάγκη ι Μωυσίσκι άποψη, μουκχλάς-λες τι βακερέλ οντουλά σο νιωθίνελας. Τουμέν κα ασουνένας με υπομονή ντα κα κερένας οντουβά σο κα βακερέλας τουμένγκε εκ τζενό σο ανγκλέ κερντάας λάθη; Ο Ιεχωβά ασουνέλα με υπομονή σαρέ ι τζενέν σο προσευχίντιβενα με πίστη.
15. Σαρ μπορίνασα τι σικαβάς σεβασμός ι γιαβερένγκε ντα αντικάς τι μοιάζας κο Ιεχωβά;
Γένεση 30:6· Κριτές 13:9· 1 Βασιλέων 17:22· 2 Χρονικών 30:20.
15 Πουτσέν-τουμέν: “Αν ο Ιεχωβά ισί αζόμ ταπεινός σο πφαμπόλα ι τζενένγκε ντα ασουνέλα-λεν σαρ κερντάς με τον Αβραάμ, τη Ραχήλ, τον Μωυσή, τον Ιησού του Ναυή, τον Μανωέ, τον Ηλία ντα τον Εζεκία, δεν πρέπει τι προσπαθίναβ με-ντα τι κεράβ ο ίδιος; Για τι σικαβάβ πιο μπουτ σεβασμός σαρέ μι πφραλένγκε, μήπως πρέπει τι ασουνάβ-λεν ντα κάνα αβέλα-πες τι ακολουθίναβ λένγκε ιδέες; Μήπως υπαρχίντιβελα κάποιος μι κχανγκιριάτε ή μι φαμιλιάτε σο κα μπορίναβας τι νταβ-λες πιο μπουτ προσοχή; Σο τθεράβα σκοπός τι κεράβ ανταλέσκε;”—«ΜΠΟΡΕΙ Ο ΙΕΧΩΒΑ ΤΙ ΝΤΙΚΧΕΛ ΣΟ ΤΣΣΙΝΤΑΒΑ»
Ο Δαβίδ βακερντάς: «Μουκχέν-λες!» Τουμέν σο κα κερένας; (Ντικχ ο παράγραφοι 16, 17)
16. Σο κερντάς ο βασιλιάς Δαβίδ κανά ο Σιμεΐ συμπεριφερισάλο λέσκε μπέτι;
16 Η ταπεινότητα επίσης βοηθίνελα-αμέν τι ατσσικιαράς αμαρό νεαυτός κάνα ο γιαβερά συμπεριφερίντιβενα αμένγκε μπέτι. (Εφεσίους 4:2) Ντικχάσα εκ μπουτ σουκάρ παράδειγμας οπράλ ανταλέστε κο εδάφια 2 Σαμουήλ 16:5-13. (Διαβάνεν) Ο Σιμεΐ, σο ισινέ τζενέ με το βασιλιάς Σαούλ, προσβαλιντάς ι Δαβιδίς ντα λέσκε υπηρετόν ντα γκιλό λέντζαρ κόντρα. Ο Δαβίδ κα μπορίνελας τι τσσιναβέλ τον Σιμεΐ, αλλά αντίς τι κερέλ-λες ανταβά νταϊντιντάς με υπομονή λέσκε προσβολές. Σαρ μπορισάλο ο Δαβίδ τι ατσσικιαρέλ πο νεαυτός; Μπορίνασα τι σικλιάς-λες ανταβά αν κα διαβάνας ο Ψαλμός 3.
17. Σαρ μπορισάλο ο Δαβίδ τι ατσσικιαρέλ πο νεαυτός, ντα σαρ μπορίνασα αμέν τι μοιάζας λέστε;
17 Ο Δαβίδ γραφιντάς ο Ψαλμός 3 κάνα λέσκο τσσαβό, ο Αβεσσαλώμ, προσπαθίνελας τι μουνταρέλ-λες. Αζομάν, ο Σιμεΐ γκιλό κόντρα κο Δαβίδ, αλλά ο Δαβίδ αρακχλάς ι ζορ τι ατσσόλ ήρεμος. Σαρ; Κο εδάφιος Ψαλμός 3:4, διαβάνασα ο λάφια ι Δαβιδίσκε: «Κα νταβ βίκος ζουρανές κάρινγκ κο Ιεχωβά, ντα κα απαντίνελ μάνγκε πι άγιε βεσέσταρ». Κάνα συμπεριφερίντιβενα αμένγκε μπέτι, πρέπει τι προσευχίντιβας σαρ κερντάς ο Δαβίδ-ντα. Σοράν, ο Ιεχωβά κα ντελ-αμέν πο άγιος πνεύμας για τι μπορίνας τι νταϊντίνας. Μπορίνενα τι ατσσικιαρέν ατζέ πιο μπουτ τουμαρό νεαυτός ή τι συγχωρίνεν πιο μπουτ κάνα κάποιος συμπεριφερίντιβελα τουμένγκε μπέτι; Ισινέν σίγουροι ότι ο Ιεχωβά ντικχέλα οντουλά σο τσσίντενα ντα ότι κα βοηθίνελ-τουμέν ντα κα ευλογίνελ-τουμέν;
«Η ΣΟΦΙΑ ΙΣΙ Ο ΠΙΟ ΣΗΜΑΝΤΙΚΟΣ ΠΡΑΓΜΑΣ»
18. Σαρ κα βοηθίντιβας κάνα κεράσα οντουλά σο σικλιαρέλα ο Ιεχωβά;
18 Αν κεράσα οντουβά σο τζανάσα ότι ισί σωστός, κα τθεράς σοφία ντα ο Ιεχωβά κα ευλογίνελ-αμέν. Κο εδάφιος Παροιμίες 4:7 η Γραφή βακερέλα: «Η σοφία ισί ο πιο σημαντικός πράγμας». Για τι τθεράς σοφία, πρέπει τι τζανάς ντα τι αγαβάς ο πράγματα, αλλά η σοφία νανέ σάντε ανταβά. Η σοφία τθερέλα τι κερέλ με το αποφάσεις σο λάσα. Ατζέ-ντα ο κιριά σικαβένα σοφία σόσκε γκίντενα ι τροφή σο κα χρειαζίντιβεν κο βεν. (Παροιμίες 30:24, 25) Ο Χριστός, σο βακέρντιβελα «η σοφία ι Ντεβλέσκι», πάντα κερέλα ο πράγματα σο κερένα λέσκε Νταντές χαρούμενος. (1 Κορινθίους 1:24· Ιωάννης 8:29) Ο Ντεβέλ κα ευλογίνελ-αμέν κάνα αμέν-ντα ατσσάσα ταπεινοί ντα τραμπίνασα τι κεράς οντουβά σο τζανάσα ότι ισί σωστός. (Διαβάνεν Ματθαίος 7:21-23) Οτθάρ, συνεχίνεν τι προσπαθίνεν για τι κερέν ι κχανγκιρί εκ τθαν σο σαρέ μπορίνενα τι υπηρετίνεν ταπεινά ι Ιεχωβάς. Μανγκέλα χρόνος ντα υπομονή για τι κεράς οντουβά σο τζανάσα ότι ισί σωστός. Αλλά κάνα κεράσα-λες ανταβά, σικαβάσα ότι ισινάμ ταπεινοί, ντα η ταπεινότητα κα κερέλ-αμέν ευτυχισμέ ακανά ντα για πάντα.