1. Καγιά υπόσχεση ντινάς ο Ιησούς σαρ βακερένα ο εδάφια Ματθαίος 11:​28-30;

Ο ΙΗΣΟΥΣ ντινάς εκ μπουτ σουκάρ υπόσχεση κο τζενέ σο ασουνένας-λες: «Ελάν μάντε, . . . ντα με κα λοκχιαράβ-τουμέν». (Διαβάνεν Ματθαίος 11:​28-30) Ανταλά λάφια να βακερντάς-λεν σινανέ. Για παράδειγμας, ντεν-τουμέν γκοντί σο κερντάς εκχέ τζουβλιάκε σο τθερέλας εκ μπουτ μπέτι νασφαλιπέ.

2. Σο κερντάς ο Ιησούς εκχέ νασφαλέ τζουβλιάκε;

² Οντιά τζουβέλ τθερέλας μπαρί ανάγκη τι βοηθίνεν-λα. Γκιλίας μπουτέ γιατρόντε για τι λιοκχιόλ πι νασφαλιμάσταρ. Τσσιντιντάας 12 μπρεσά ταλαιπωρία, αλλά να αβιλίας λατσσές. Σαρ βακερέλας ο Νόμος, ισινέ μαγαριμέ. (Λευιτ. 15:​25) Ασουντάς ότι ο Ιησούς κερέλας λατσσές οντουλέν σο τσσίντενας ταλαιπωρία, ντα γκιλί τι αρακχέλ-λες. Κάνα αρακχλάς-λες, ασταρντάς ι άκρη λέσκε σεΐνγκι ντα οντιά στιγμή αβιλί λατσσές! Ο Ιησούς να κερντάς-λα απλά λατσσές. Σικαντάς ότι μανγκέλας-λα ντα σεβάνελας-λα κάνα βακερντάς λάκε «μι τσσάι». Καζόμ λοκχιλί ντα καζόμ ζορ λιντάς οντιά τζουβέλ!​—Λουκ. 8:​43-48.

3. Καλέ ερωτησιέντε κα απαντίνας;

³ Ντεν-τουμέν γκοντί ότι η τζουβέλ γκιλί κο Ιησούς. Να μπεσέλας κατά Ιησούς τι τζαλ λάτε. Αντιβές-ντα πρέπει τι κεράς προσπάθεια για τι τζας κο Ιησούς. Αμαρέ ντιβεσέντε, ο Ιησούς να κερέλα θαύματα για τι νασκιαρέλ ο νασφαλίματα οντουλένγκε σο τζάνα λέστε. Αλλά αντιβές-ντα βακερέλα αμένγκε: «Ελάν μάντε, . . . ντα με κα λοκχιαράβ-τουμέν». Ανταλέ μαθημάστε, κα απαντίνας παντζέ ερωτησιέντε: Σο πρέπει τι κεράς για τι τζας κο Ιησούς; Σο μανγκέλας τι  βακερέλ ο Ιησούς κάνα βακερντάς: «Τσσουβέν μο ζυγός οπρά-τουμέντε»; Σο σικλιάσα κατά Ιησούς; Σόσκε λοκχιαρέλα-αμέν ο έργος σο ντινάς-αμέν; Ντα σαρ κα συνεχίνελ τι λοκχιαρέλ-αμέν ο Ιησούς άμα ισινάμ τελάλ κατά ζυγός λέσκο;

4, 5. Καλέ τροπόντζαρ τζάσα κο Ιησούς;

⁴ Εκ τρόπος για τι τζας κο Ιησούς ισί τι σικλιάς καζόμ πιο μπουτ αβέλα-πες οντουλένγκε σο βακερντάς ντα κερντάς. (Λουκ. 1:​1-4) Καέκ γιαβέρ ναστί κερέλα-λες ανταβά αμένγκε. Αμέν πρέπει τι ρόντας τι σικλιάς ι Ιησούσκε. Επίσης, τζάσα κο Ιησούς κάνα αποφασίνασα τι μπολντιάς ντα τι αβάς λέσκε μαθητές.

⁵ Εκ γιαβέρ τρόπος τι τζας κο Ιησούς ισί τι τζας κο πρεσβύτεροι άμα χρειαζίντιβασα βοήθεια. Ο Ιησούς ντινάς ανταλέ «τζενέν σαρ δώρα» για τι αρακχαβέν λέσκε μπρακέν. (Εφεσ. 4:7, 8, 11· Ιωάν. 21:​16· 1 Πέτρ. 5:​1-3) Αμέν πρέπει τι τζας λέντε για τι μανγκάς λένταρ τι βοηθίνεν-αμέν. Ναστί μπεσάσα λένταρ τι τζανέν σο τθεράσα αμαρέ γκοντιάτε ντα σο χρειαζίντιβασα. Ντικχέν σο βακερέλα εκ πφραλ, ο Τζούλιαν: «Έπρεπε τι νασάβ κατά Μπέθελ σόσκε τθεράβας προβλήματα υγείας. Εκ αμάλ βακερντάς μάνγκε τι μανγκάβ κατά πρεσβύτεροι τι αβέν για τι ντεν-μαν ζορ. Κι αρχή, αμντίναβας ότι να χρειαζίντιβαβας λένγκι βοήθεια. Αλλά πιο σοράν μανγκλόμ λένταρ τι αβέν, ντα ανταβά ισινέ εκ κατά πιο λατσσέ δώρα σο λιντόμ μι ζωγιάτε». Ο αφοσιωμέ πρεσβύτεροι, σαρ οντουλά ντούι σο γκιλέ κο Τζούλιαν, βοηθίνενα-αμέν τι σικλιάς «ι γκοντί ι Χριστόσκι», δηλαδή τι αγαβάς σαρ σκεφτίνελας ντα κερέλας ο πράγματα, ντα τι μοιάζας λέστε. (1 Κορ. 2:​16· 1 Πέτρ. 2:​21) Ανταβά ισί μπαγιά εκ κατά πιο λατσσέ δώρα σο μπορίνενα τι ντεν-αμέν.

6. Σο μανγκέλας τι βακερέλ ο Ιησούς κάνα βακερντάς: «Τσσουβέν μο ζυγός οπρά-τουμέντε»;

⁶ Κάνα ο Ιησούς βακερντάς: «Τσσουβέν μο ζυγός οπρά-τουμέντε», μπορεί τι μανγκέλας τι βακερέλ: «Μουκχέν-μαν τι κεράβ-τουμέν κουμάντος» ή «Τσσουβέν-τουμέν τελάλ κατά ζυγός μάντζαρ, ντα γιεκ κα κεράς μπουτί ι Ιεχωβάσκε». Σο-ντα τι μανγκέλας τι βακερέλ, σικαντάς ότι πρέπει τι κεράς μπουτί.

7. Καβά έργος ντιντιλό-αμέν, ντα καλέ πραγμάσκε ισινάμ σίγουροι σαρ βακερένα ο εδάφια Ματθαίος 28:​18-20;

⁷ Κεράσα οντουβά σο βακερντάς αμένγκε ο Ιησούς κάνα ντάσα αμαρό λάφι τι τζουβντιάς ι Ιεχωβάσκε ντα μπολντιάσα. Ο Ιησούς βακερέλα σαρέ ι τζενένγκε τι τζαν λέστε ντα να κα πάλντελ καεκχές σο μανγκέλα μπαγιά τι υπηρετίνελ ι Ντεβλές. (Ιωάν. 6:​37, 38) Σαρέ κο μαθητές κι Χριστόσκε ντιντιλό ο προνόμιος τι κερέν ο έργος σο ντινάς ο Ιεχωβά κο Ιησούς. Μπορίνασα τι αβάς σίγουροι ότι ο Ιησούς κα αβέλ πάντα αμέντζαρ για τι βοηθίνελ-αμέν τι κεράς ανταβά έργος.​—Διαβάνεν Ματθαίος 28:​18-20.

8, 9. Σόσκε ταρτίντιβενας κο Ιησούς ο ταπεινά τζενέ, ντα σο πρέπει τι πουτσάς-αμέν;

⁸ Ο ταπεινά τζενέ ταρτίντιβενας πασέ κο Ιησούς. (Ματθ. 19:​13, 14· Λουκ. 7:​37, 38) Σόσκε; Σκεφτίνεν καζόμ διαφορετικός ισινέ κατά Φαρισαίοι. Βον ισινέ σουρντέ ντα μπαρικανέ. (Ματθ. 12:​9-14) Ο Ιησούς ισινέ τατέ γκίσκο ντα ταπεινός. Ο Φαρισαίοι μανγκένας τι τθερέν μπαρό ναβ ντα ισαρένας-πες. Ο Ιησούς βακερντάς ότι νανέ λατσσό ανταβά. Σικλιαρέλας πι μαθητέν τι αβέν ταπεινοί ντα τι υπηρετίνεν ι γιαβερέν. (Ματθ. 23:2, 6-11) Ο Φαρισαίοι νταραβένας ι τζενέν για τι κερέν-λεν κουμάντος. (Ιωάν. 9:​13, 22) Ο Ιησούς λοκχιαρέλας ι  γιαβερέν ι λατσσέ πραγματέντζαρ σο κερέλας ντα βακερέλας.

⁹ Τουμέν, σικλιλέν ανταλά πράγματα κατά Ιησούς; Πουτσέν-τουμέν: “Τζανένα-μαν ο γιαβερά σαρ τζενό σο τθερέλα κοβλό γκι ντα ισί ταπεινός; Κεράβα αντράλ μι γκίσταρ ταπεινά μπουτιά για τι υπηρετίναβ ι γιαβερέν; Σικαβάβα λατσσιπέ;”

12-14. Σόσκε λοκχιαρέλα-αμέν ο έργος σο ντινάς-αμέν ο Ιησούς;

¹² Σόσκε λοκχιαρέλα-αμέν ο έργος σο ντινάς-αμέν ο Ιησούς; Μπουτ πράγματα σικαβένα-λες ανταβά, αλλά κα ντικχάς χάνικ ανταλένταρ.

¹³ Τθεράσα ι πιο λατσσέ τσομπανίν. Ο Ιεχωβά, αμαρό πιο Μπαρό Τσομπάνης, νανέ εκ κύριος σο να σικαβέλα εκτίμηση ή να τζιτζίνελα αμένγκε. Εκτιμίνελα οντουλά σο κεράσα. (Εβρ. 6:​10) Ντα ντέλα-αμέν ι ζορ σο χρειαζίντιβασα για τι βάντας αμαρό φορτίος. (2 Κορ. 4:7· Γαλ. 6:5, υποσ.) Ο Ιησούς, αμαρό Βασιλιάς, σικαντάς αμένγκε με το πιο λατσσό τρόπος σαρ τι συμπεριφερίντιβας κο γιαβερά. (Ιωάν. 13:​15) Ο πρεσβύτεροι, σο ισί σαρ τσομπάνια, προσπαθίνενα τι αβέν σαρ “ο μπαρό τσομπάνης”, ο Ιησούς. (Εβρ. 13:​20· 1 Πέτρ. 5:2) Κερένα ο πιο λατσσό για τι σικαβέν λατσσιπέ, τι ντεν-αμέν ζορ ντα τι αβέν μπίνταρανε καζόμ σικλιαρένα-αμέν ντα αρακχαβένα-αμέν.

¹⁴ Τθεράσα ι πιο λατσσέ αμαλέν. Καέκ γιαβέρ να τθερέλα αζόμ πφερντί ζωή ντα αζόμ λατσσέ αμαλέν σαρ αμέν. Σκεφτίνεν: Κεράσα εκ μπουτ σουκάρ έργος τζενέντζαρ σο ισί ο πιο λατσσέ αλλά να αμντίνενα-πες πιο λατσσέ κατά γιαβερά. Τζανένα τι κερέν μπουτ πράγματα, αλλά να ισαρένα-πες ντα τσσουβένα ι γιαβερέν πιο οπρέ πουμένταρ. Να ντικχένα-αμέν σαρ τζενέ σο κερένα αμέντζαρ απλά μπουτί, αλλά σαρ αμαλά. Ντα μανγκένα-αμέν αζόμ μπουτ σο κα ντένας πουμαρί ζωή αμένγκε!

15. Σαρ πρέπει τι νιωθίνας για το έργος σο κεράσα;

¹⁵ Τθεράσα ο πιο λατσσό έργος. Σικλιαράσα ι τζενέν ι αλήθεια ι Ιεχωβάσκε ντα πουτσσαράσα ο ψέματα ι Μπενγκέσκε. (Ιωάν. 8:​44) Βοβ τσσουβέλα οπράλ κο τζενέ πφαριπέ σο ναστί βάντενα. Για παράδειγμας, μανγκέλα τι πακιάς ότι ο Ιεχωβά να κα συγχωρίνελ αμαρέ αμαρτίες ντα ότι να αβέλα-πες τι μανγκέλ-αμέν. Σο μπαρό πφαριπέ, ντα σο γκεραλό ψέμας! Κάνα τζάσα κο Χριστός, αμαρέ αμαρτίες συγχωρίντιβενα. Ντα ισί μπαγιά ότι ο Ιεχωβά μανγκέλα-αμέν μπουτ σαριλέν. (Ρωμ. 8:​32, 38, 39) Καζόμ πφερντιόλα αμαρό γκι κάνα βοηθίνασα ι γιαβερέν τι σικλιόν τι μουκχέν-πες κο Ιεχωβά ντα τι ντικχάς-λεν τι κερέν πιο λατσσί πουμαρί ζωή!

16. Σόσκε ο φορτίος σο μανγκέλα ο Ιησούς τι ακχαράς νανέ σαρ ο γιαβερά φορτία σο βάντασα;

¹⁶ Ο φορτίος σο μανγκέλα ο Ιησούς τι ακχαράς νανέ σαρ ο γιαβερά φορτία σο βάντασα. Για παράδειγμας, μπουτ τζενέ σο κερένα μπουτί κο ντουνιάς, κο τέλος κι ντιβεσέσκο, να νιωθίνενα σάντε κχινέ αλλά τσουτσέ-ντα αντρέ πουμέντε. Αλλά κάνα ντάσα αμαρέ σαατίσταρ κι υπηρεσία κι Ιεχωβάσκι ντα κι Χριστόσκι, νιωθίνασα μπαγιά πφερντέ. Μπορεί σοράν κατά μπουτί τι ισινάμ μπουτ κχινέ ντα τι χρειαζίντιβελα τι κεράς μπαρί προσπάθεια για τι τζας αρατί κι συνάθροιση. Αλλά μπουτ φαρ κάνα βουρτίνασα κατά συνάθροιση αγαβάσα ότι λοκχιλάμ ντα λιντάμ ζορ. Ο ίδιος αβέλα-πες κάνα κεράσα σο νακχέλα αμαρέ βαστένταρ για τι βακεράς ο λατσσέ αμπέρια ντα τι σικλιαράς-αμέν κατά Γραφή. Οντουβά σο λάσα ισί μπουτ πιο μπαρό κατά ζορ σο ντάσα!

17. Σο πρέπει τι αγαβάς αμαρέ νεαυτόσκε ντα σο πρέπει τι προσοχίνας;

¹⁷ Πρέπει όμως τι αγαβάς ότι να τθεράσα ι ζορ τι κεράς-λεν σαρέ. Οτθάρ, πρέπει τι προσοχίνας καλέ πραγματέντε χαλαβάσα αμαρί ζορ. Για παράδειγμας, κα μπορίναας τι χαλαβάς αμαρί ζορ για τι γκίντας μπουτ πράγματα ή λοβέ. Ντικχέν σο βακερντάς ο Ιησούς εκχέ χουλανέ τερνέσκε σο πουτσλάς-λες: «Σο πρέπει τι κεράβ για τι τζουβντιάβ για πάντα;» Οντουβά τερνό κερέλας ο Νόμος. Πρέπει τι ισινέ λατσσό τζενό σόσκε κο Ευαγγέλιος κι Μαρκόσκο βακερέλα ότι ο Ιησούς «μανγκλάς-λες». Ο Ιησούς βακερντάς οντουλέ τερνέσκε: «Τζα, μπίκινε σαρέ ο πράγματα σο τθερέσα . . . ντα έλα τι ακολουθίνες-μαν». Οντουβά τερνό μανγκέλας τι ασουνέλ ι Ιησούς, αλλά ντικχίντιβελα ότι ναστί μουκχέλας ο «μπουτ πράγματα» σο τθερέλας. (Μάρκ. 10:​17-22) Οντουλέσκε, να τσσουντάς-πες τελάλ κατά Ιησούσκο ζυγός ντα συνεχιντάς τι υπηρετίνελ σαρ δούλος «ο Χουλανιπέ». (Ματθ. 6:​24) Τουμέν, σο κα κερένας;

18. Σο πρέπει τι κεράς μπάζιμα, ντα σόσκε;

¹⁸ Μπάζιμα, ισί λατσσό τι ντικχάς σο τσσουβάσα πρώτα αμαρέ ζωγιάτε. Σόσκε; Για τι αβάς σίγουροι ότι χρησιμοποιήνασα αμαρί ζορ γκοντιάσαρ. Ντικχέν σο βακερέλα εκ τερνό, ο Μαρκ: «Μπουτ μπρεσά, αμντίναβας ότι τζουβντιάβας απλά. Κεράβας σκαπανικός, αλλά μι γκοντιάτε τθεράβας σάντε τι νικαβάβ λοβέ ντα τι τζουβντιάβ ατζέ πιο σουκάρ. Ναστί αγαβάβας σόσκε μι ζωή αβιλίας αζόμ δύσκολη. Αζομάν αγαντόμ ότι πιο μπουτ μανγκάβας τι κεράβ οντουλά σο μανγκάβας με ντα μουκχάβας ι Ιεχωβάσκε σάντε οντουβά σο ατσσόλας μι σαατίσταρ ντα μι ζοριάταρ». Ο Μαρκ αλλαντάς ο τρόπος σο σκεφτίνελας ντα τζουβντιόλας, ντα αντικάς κερντάς πιο μπουτ ι Ιεχωβάσκε. Βοβ βακερέλα: «Ισί φαρ σο ανησυχίναβα, αλλά επειδή ο Ιεχωβά βοηθίνελα-μαν ντα ο Ιησούς ισί μάντζαρ, νακχαβάβα ο δυσκολίες».

19. Σόσκε ισί αζόμ σημαντικός τι ντικχάς ο πράγματα με το σωστός τρόπος;

¹⁹ Κα συνεχίνας τι λοκχιάς τελάλ κατά ζυγός ι Ιησούσκο άμα κεράσα τριν πράγματα. Πρώτον, τι ντικχάς ο πράγματα με το σωστός τρόπος. Ο έργος σο κεράσα ισί ι Ιεχωβάσκο, οτθάρ πρέπει τι κεράς-λες σαρ μανγκέλα βοβ. Αμέν ισινάμ οντουλά σο κερένα μπουτί, ντα ο Ιεχωβά ισί ο Κύριος. (Λουκ. 17:​10) Άμα προσπαθίνασα τι κεράς ο έργος σαρ μανγκάσα αμέν, κα τζας κόντρα κο ζυγός. Ατζέ-ντα εκ ζουρανό γκουρούβ κα ντέλας-πες ντα κα κχινιόλας άμα κα λέλας γιαβέρ ντρομ ντα κα τζάλας κόντρα κο ζυγός πι κυριόσκο. Οκιά μπάνταρ, κα κεράς μπαρέ πράγματα ντα κα νακχαβάς μπουτ δυσκολίες άμα κεράσα ι Ιεχωβάσκο έργος αντικάς σαρ μανγκέλα βοβ. Μα μπιστρέν ότι καέκ ναστί τσσιναβέλα-λες τι κερέλ οντουβά σο μανγκέλα!​—Ρωμ. 8:​31· 1 Ιωάν. 4:4.

20. Καβά πράγμας πρέπει τι τσσίντελ-αμέν τι τσσουβάς-αμέν τελάλ κατά Ιησούσκο ζυγός;

 ²⁰ Δεύτερον, τι τζανάς σόσκε μανγκάσα τι τσσουβάς-αμέν τελάλ κατά Ιησούσκο ζυγός. Οντουβά σο μανγκάσα ισί τι δοξάνας αμαρέ λατσσέ Νταντές, ι Ιεχωβάς. Κο πρώτος αιώνας, οντουλά σο ισινέ μπίτσαλε γιακχίνγκε ή μανγκένας πιο μπουτ πουμαρό νεαυτός, χασαρντέ σουγκό πουμαρί χαρά ντα μουκχλέ ο ζυγός ι Ιησούσκο. (Ιωάν. 6:​25-27, 51, 60, 66· Φιλιπ. 3:​18, 19) Αλλά οντουλά σο μανγκένας ι Ντεβλές πιο μπουτ πουμένταρ ντα μανγκένας ι γιαβερέν-ντα ακχαρντέ χαράσαρ οντουβά ζυγός καζόμ τζουβντιόνας κι πφουβ, ντα μπεκλεντίνενας τι υπηρετίνεν ι Χριστόσαρ κο ουρανός. Σαρ βον, κα ατσσικιαράς αμέν-ντα αμαρί χαρά άμα ακχαράσα ο ζυγός ι Ιησούσκο επειδή μανγκάσα τι δοξάνας ι Ιεχωβάς.

21. Σο μπεκλεντίνασα ότι κα κερέλ ο Ιεχωβά σαρ βακερένα ο εδάφια Ματθαίος 6:​31-33;

²¹ Τρίτον, τι μπεκλεντίνας σωστέ πραγματένγκε. Αμέν τραμπιντάμ τι τζουβντιάς για τι βοηθίνας ι γιαβερέν ντα για τι κεράς μπουτ μπουτί ι Ιεχωβάσκε. Ο Ιησούς βακερντάς ότι ο γιαβερά κα τζαν αμέντζαρ κόντρα. Αλλά μπορίνασα τι μπεκλεντίνας ότι ο Ιεχωβά κα ντελ-αμέν ι ζορ τι νταϊντίνας σαρέ ο δυσκολίες. Καζόμ πιο μπουτ υπομονή κεράσα, αζόμ πιο ζουρανέ κα αβάς. (Ιακ. 1:​2-4) Ντα μπορίνασα τι μπεκλεντίνας ότι ο Ιεχωβά κα ντελ-αμέν σο χρειαζίντιβασα, ότι ο Ιησούς κα αβέλ αμαρό τσομπάνης ντα ότι ο πφραλά ντα ο πφενιά κα ντεν-αμέν ζορ. (Διαβάνεν Ματθαίος 6:​31-33· Ιωάν. 10:​14· 1 Θεσ. 5:​11) Μπαγιά, σο γιαβέρ χρειαζίντιβασα;

22. Καλέ πραγμάσκε τθεράσα χαρά;

²² Η τζουβέλ σο κερντάς-λα λατσσές ο Ιησούς λοκχιλί οντουβά ντιβές σο αβιλί λατσσές. Αλλά ανταβά λοκχιπέ κα ατσσόλας σάντε άμα κα αβέλας αφοσιωμέ μαθήτρια ι Χριστόσκι. Σο πακιάνα ότι κερντάς; Άμα τραμπιντάς τι τσσουβέλ-πες τελάλ κατά ζυγός ι Ιησούσκο, ανέν τουμαρέ γκοντιάτε σο ευλογία κα τθερέλας: Κα υπηρετίνελας ι Ιησούσαρ κο ουρανός! Σο-ντα τι μουκχέλας παλάλ για τι αβέλ ι Χριστόσαρ κα αβέλας μπουτ χουρντό ανγκλάλ κι ευλογία ανταγιά. Είτε μπεκλεντίνασα τι τζουβντιάς κο ουρανός είτε κι πφουβ, καζόμ χαρά τθεράσα σο ασουντάμ ακαλά λάφια ι Ιησούσκε: «Ελάν μάντε»!