1. Σαρ νιωθίνελα ο Ιεχωβά ι ταπεινέ τζενένγκε; Εξηγίνεν.

Ο ΙΕΧΩΒΑ μανγκέλα ι ταπεινέ τζενέν. Σάντε οντουλά σο ισί μπαγιά ταπεινοί αβένα λατσσέ αμαλά λέσαρ. Οκιά μπάνταρ, «ι μπαρικανές . . . τζανέλα-λες σάντε ντουράλ». (Ψαλμ. 138:6) Σαρέ μανγκάσα τι κεράς ι Ιεχωβάσκο γκι ντα τι νιωθίνας λέσκι τατί αγάπη, άκ’ σόσκε μανγκάσα τι σικλιάς τι αβάς ταπεινοί.

2. Σο κα ντικχάς ανταλέ μαθημάστε;

² Ανταβά μάθημας κα ντελ απαντήσεις τρινέ ερωτησιέντε: (1) Σο μανγκέλα τι βακερέλ τι αβάς ταπεινοί; (2) Σόσκε πρέπει τι σικλιάς τι αβάς ταπεινοί; (3) Κάνα ισί δύσκολος τι ατσσάς ταπεινοί; Κα ντικχάς ότι, άμα σικλιάσα τι αβάς ταπεινοί, ανάσα χαρά κι Ιεχωβάσκο γκι ντα κεράσα λατσσιπέ αμένγκε.​—Παρ. 27:​11· Ησ. 48:17.

3. Σο μανγκέλα τι βακερέλ τι αβάς ταπεινοί;

³ Ο ταπεινός τζενό να αμντίνελα ότι ισί πιο οπρέ κατά γιαβερά ντα νανέ μπαρικανό. Σαρ σικαβέλα η Αγία Γραφή, εκ ασακό τζενό αγαβέλα ότι ο Ιεχωβά Ντεβέλ ισί μπουτ πιο μπαρό λέσταρ. Ντα τζανέλα ότι κάθε τζενό ισί πιο λατσσό λέσταρ μερικέ πραγματέντε.​—Φιλιπ. 2:3, 4.

4, 5. Σόσκε βακεράσα ότι για τι αβάς μπαγιά ταπεινοί να ερεσέλα σάντε τι ντικχίντιβας ταπεινοί;

⁴ Ισί τζενέ σο ντικχίντιβενα ταπεινοί αλλά νανέ. Μπορεί απλά τι ισί λατζανέ ή τι σικλιλέ χουρντιαρέλα τι σικαβέν σεβασμός ντα λατσσιπέ. Αλλά αντρέ πουμέντε μπορεί τι ισί μπουτ μπαρικανέ. Αβέλα όμως ο σαάτι σο σικαβένα σο τζενέ ισί μπαγιά.​—Λουκ. 6:45.

 ⁵ Οκιά μπάνταρ, άμα εκ τζενό ντικχίντιβελα ότι ντέλα πέσκε μπέσα ντα ότι κερέλα λάφι μπίνταρανες, να μανγκέλα τι βακερέλ ότι ισί μπαρικανό. (Ιωάν. 1:​46, 47) Ισί μπαγιά όμως ότι ανταλά τζενέ επειδή μπορίνενα τι κερέν μπουτ πράγματα πρέπει τι τθερέν πουμαρί γκοντί για μα τι αβέν μπαρικανέ. Είτε ισινάμ λατζανέ είτε να ισινάμ, σαρέ πρέπει τι κεράς ο πιο λατσσό για τι αβάς ταπεινοί αμαρέ γκίστε.

6. Σο σικλιάσα κατά απόστολος Παύλος σαρ βακερέλα ο εδάφιος 1 Κορινθίους 15:10;

⁶ Ανέν τουμαρέ γκοντιάτε ι Παυλός. Ο Ιεχωβά βοηθιντάς-λες τι κερέλ νεβέ κχανγκιριά μπουτέ τθανέντε. Ο Παύλος μπορεί τι κερντάς πιο μπουτ πράγματα ι Ιεχωβάσκε σαρέ κατά γιαβερά απόστολοι ι Ιησού Χριστόσκε. Αλλά να βάντελας-πες πιο οπρέ κατά πφραλά. Ατσσιλό ταπεινός ντα βακερντάς: «Με ισινόμ ο πιο χουρντό κατά απόστολοι ντα να ισινόμ άξιος τι βακέρντιβαβ απόστολος, επειδή γκιλόμ κόντρα κι κχανγκιρί κι Ντεβλέσκι». (1 Κορ. 15:9) Αγαβέλας ότι οντουβά σο κερέλας-λες αμάλ ι Ιεχωβάσκο ισινέ ο λατσσιπέ ι Ντεβλέσκο σο να αξίνελας-λες, όχι ο μπουτ πράγματα σο κερντάας. (Διαβάνεν 1 Κορινθίους 15:​10) Ο Παύλος σικαντάς μπουτ λατσσές πι παραδειγμάσαρ σαρ τι αβάς ταπεινοί. Κάνα μπουτσσαντάς πι επιστολή κο πφραλά κι Κόρινθος να ισαρντάς-πες, παρόλο σο οτθέ ισινέ τζενέ σο μανγκένας τι σικαβέν ότι ισινέ πιο οπρέ λέσταρ!​—2 Κορ. 10:10.

7. Σαρ σικαντάς ταπεινότητα εκ πφραλ σο τζανένας-λες μπουτ τζενέ; Βακερέν εκ παράδειγμας.

⁷ Μπουτ πφραλά ντα πφενιά λένα ζορ κατά ιστορία ι πφραλέσκι Κλάιν, σο ισινέ κο Κυβερνών Σώμας. Ο πφραλ Κλάιν ισινέ ταπεινός ντα κι ιστορία πι ζωγιάκι βακερντάς μπουτέ προβληματένγκε σο τθερέλας. Για παράδειγμας, κάνα γκιλό πρώτη  φαρ κο έργος κχερ κχερέστε κο 1922, ντικχίντιλο λέσκε αζόμ δύσκολος σο νακχλέ ντούι μπρες για τι τζαλ πάλι. Πιο σοράν, κάνα ισινέ κο Μπέθελ, ατσσικιαρντάς χολί εκχέ πφραλέσκε σο ντινάς-λες συμβουλή. Επίσης, νασφάλιλο ψυχολογικά αλλά αβιλό λατσσές. Όμως, ντιντιλέ-λες μπουτ σουκάρ ντα σημαντικοί διορισμοί. Καζόμ ταπεινότητα έπρεπε τι τθερέλ εκ ασακό πφραλ, σο τζανένας-λες αζόμ τζενέ, για τι μουτθαβέλ ανταλά πράγματα σο σικαβένας ότι ισινέ μπίζουρανο! Μπουτ πφραλά ντα πφενιά ντένα-πες γκοντί με αγάπη ι πφραλές Κλάιν ντα λέσκι σουκάρ ιστορία σο βακερέλα ο πράγματα αντικάς σαρ ισί. *

8. Σαρ βοηθίνελα-αμέν ο εδάφιος 1 Πέτρου 5:6 τι αγαβάς ότι άμα ισινάμ ταπεινοί κεράσα ι Ιεχωβάσκο γκι;

⁸ Μανγκάσα τι σικλιάς τι αβάς ταπεινοί, ή γιαβέρτουλους τι τσσουβάς αμαρό νεαυτός πιο τελέ, πιο μπουτ για τι κεράς ι Ιεχωβάσκο γκι. Ο απόστολος Πέτρος σικαντάς-λες ξεκάθαρα ανταβά. (Διαβάνεν 1 Πέτρου 5:6) Ο βιβλίος «Έλα να Γίνεις Ακόλουθός Μου» κερέλα λάφι οντουλένγκε σο βακερντάς ο Πέτρος ντα βακερέλα: «Ο μπαρικανιπέ ισί σαρ δηλητήριος. Ανέλα μπαρί καταστροφή. Ατζέ-ντα εκ τζενό σο τζανέλα τι κερέλ πιο μπουτ πράγματα σαρέ κατά γιαβερά, άμα ισί μπαρικανό, αβέλα άχρηστος ι Ντεβλέσκε. Οκιά μπάνταρ, εκ τζενό σο τζανέλα τι κερέλ μπουτ χάνικ πράγματα, άμα κα τσσουβέλ πο νεαυτός πιο τελέ κατά γιαβερά, μπορίνελα τι κερέλ μπουτ ι Ιεχωβάσκε. . . . [Ο Ιεχωβά] μανγκέλα μπουτ τι ευλογίνελ-τουμέν άμα κα τσσουβέν τουμαρό νεαυτός πιο τελέ κατά γιαβερά». * Μπαγιά, ο πιο λατσσό πράγμας σο μπορίνασα τι κεράς ισί τι ανάς χαρά κι Ιεχωβάσκο γκι!​—Παρ. 23:15.

9. Σόσκε κα μπεϊντίνεν ο γιαβερά τι αβέν πασ’ αμέντε άμα ισινάμ ταπεινοί;

⁹ Κάνα σικλιάσα τι αβάς ταπεινοί, κεράσα ι Ιεχωβάσκο γκι, αλλά κεράσα μπαρό λατσσιπέ αμένγκε-ντα. Ο γιαβερά κα μανγκέν τι αβέν πασ’ αμέντε. Σόσκε; Ανέν τουμαρέ γκοντιάτε σο τζενέν μανγκένα πασέ τουμέντε. (Ματθ. 7:​12) Ο πιο μπουτ αμένταρ να μπεϊντίνασα τι αβάς τζενέντζαρ σο μανγκένα πάντα τι αβέλ λένγκο ντα να ασουνένα ιτς ι γιαβερέν. Οκιά μπάνταρ, μπεϊντίνασα μπουτ τι αβάς αμαρέ πφραλέντζαρ σο “αγαβένα ι γιαβερέν, μανγκένα-λεν σαρ πφραλά, νιωθίνενα λένγκι ντουκχ ντα ισί ταπεινοί”. (1 Πέτρ. 3:8) Άμα ασακέ τζενέ ταρτίνενα-αμέν πασέ πουμέντε, αμέν-ντα  κα ταρτίνας-λεν πασ’ αμέντε άμα ισινάμ ταπεινοί.

10. Σόσκε κα αβέλ πιο εύκολος τι νταϊντίνας κο προβλήματα άμα ισινάμ ταπεινοί;

¹⁰ Άμα ισινάμ ταπεινοί, κα αβέλ πιο εύκολος τι νταϊντίνας κο προβλήματα. Ισί μπαγιά ότι μπάζιμα αβένα-πες πράγματα σο πακιάσα ότι νανέ σωστά ή δίκαια. Ο γκοντιαβέρ βασιλιάς Σολομών βακερντάς: «Ντικχλόμ υπηρετόν οπράλ γκραστέντε, αλλά αρχοντέν τι τζαν πφιριντός σαρ υπηρέτες». (Εκκλ. 10:7) Οντουλά σο τζανένα τι κερέν μπουτ πράγματα να λένα πάντα ισαριπέ. Ντα ισί φαρ σο ισαρένα πιο μπουτ οντουλέν σο να κερένα ο πράγματα αζόμ λατσσές. Αλλά ο Σολομών αγαντάς ότι ισί λατσσό τι ντικχάς ι πραγματικότητα ντα μα τι ατσσόλ αμαρί γκοντί κο πράγματα σο να αβένα-πες λατσσές. (Εκκλ. 6:9) Άμα ισινάμ ταπεινοί, κα αβέλ πιο εύκολος τι τθεράς χαρά κι ζωή ατζέ-ντα άμα ο πράγματα να τζάνα σαρ κα μανγκάας.

11. Σο πρέπει τι κεράς κάνα ντένα-αμέν συμβουλή;

¹¹ Κάθε ντιβές τθεράσα μπουτ ευκαιρίες τι σικαβάς ταπεινότητα. Ντικχέν χάνικ παραδείγματα. Κάνα ντένα-αμέν συμβουλή. Ισί λατσσό τι ντας-αμέν γκοντί ότι, άμα εκ τζενό κα ντελ πι σαατίσταρ για τι ντελ-αμέν εκ συμβουλή, ο λάθος σο κερντάμ μπορεί τι ισί πιο μπαρό από ό,τι αμντίνασα. Μπορεί τι σιγκιαράς τι βακεράς ότι ανταγιά συμβουλή νανέ αμένγκε. Μπορεί τι κρίνας οντουλές σο ντινάς-λα ντα τι βακεράς ότι να κερντάς λάφι σουκάρ. Αλλά άμα ισινάμ ταπεινοί, κα κεράς σο νακχέλα αμαρέ βαστένταρ για τι ντικχάς πάλι ο πράγματα με το σωστός τρόπος.

12. Σόσκε πρέπει τι εκτιμίνας εκχέ τζενές σο ντέλα-αμέν συμβουλή, σαρ βακερένα ο εδάφια Παροιμίες 27:5, 6; Βακερέν εκ παράδειγμας.

¹² Ο ταπεινός τζενό εκτιμίνελα ο συμβουλές. Βακερέν ότι ισινέν κι συνάθροιση ντα κερένα λάφι μπουτέ πφραλέντζαρ. Πιο σοράν, εκ λένταρ λέλα-τουμέν χάνικ πιο οκόρινγκ ντα βακερέλα τουμένγκε ότι τθερένα κάτι τουμαρέ ντανέντε. Σίγουρα κα λατζάνας. Αλλά να κα εκτιμίνενας ο λάφι σο βακερντάς τουμένγκε; Ντα μπορεί τι σκεφτίνενας καζόμ πιο λατσσό κα αβέλας άμα κα βακερέλας-λες πιο τζανγκλέ! Αντικάς πρέπει τι αβάς ταπεινοί ντα τι τθεράς εκτίμηση εκχέ πφραλέσκε σο αρακχλάς ι ζορ τι ντελ-αμέν συμβουλή αζομάν σο χρειαζίντιβασα-λα. Ντικχάσα ανταλέ τζενές σαρ αμάλ, όχι σαρ ντουσμάνι.​—Διαβάνεν Παροιμίες 27:5, 6· Γαλ. 4:16.

13. Σαρ κα σικαβάς ταπεινότητα κάνα ντιντιόνα διορισμοί κο γιαβερά;

¹³ Κάνα ντιντιόνα διορισμοί κο γιαβερά. «Κάνα ντικχάβα ι γιαβερέν τι λεν  διορισμούς, ισί φαρ σο πουτσάβα σόσκε να τραμπίντιλομ με», βακερέλα εκ πρεσβύτερος, ο Τζέισον. Νακχλάς ποτές ανταβά τουμαρέ γκοντιάταρ; Ισί λατσσό τι μανγκάς τι κεράς πιο μπουτ ι Ιεχωβάσκε. (1 Τιμ. 3:1) Αλλά πρέπει τι αρακχαβάς αμαρί γκοντί. Άμα να κα κεράς-λες ανταβά, μπορεί τι μουκχάς ο μπαρικανιπέ τι μπαριόλ αμαρέ γκίστε. Για παράδειγμας, εκ πφραλ μπορεί τι αρχίνελ τι πακιάλ ότι βοβ ισί ο πιο λατσσό για τι κερέλ εκ διορισμός. Ή εκ πφεν μπορεί τι σκεφτίνελ: “Μο ρομ κα κερέλας-λες ανταβά μπουτ πιο λατσσές ακαλέσταρ!” Άμα όμως ισινάμ μπαγιά ταπεινοί, κα νασκιαράς ανταβά μπαρικανιπέ αμαρέ γκίσταρ.

14. Σο σικλιάσα οντουλένταρ σο κερντάς ο Μωυσής κάνα ο γιαβερά λιντέ διορισμούς;

¹⁴ Σικλιάσα μπουτ πράγματα οντουλένταρ σο κερντάς ο Μωυσής κάνα ο γιαβερά λιντέ διορισμούς. Ο Μωυσής εκτιμίνελας ο διορισμός σο τθερέλας σαρ αρχηγός ι Ισραηλιτένγκο. Κάνα ο Ιεχωβά μουκχλάς γιαβερέν-ντα τι υπηρετίνεν ι Μωυσίσαρ, σο κερντάς βοβ; Να ζηλισάλο. (Αριθ. 11:​24-29) Ισινέ ταπεινός ντα μουκχλάς γιαβερέν-ντα τι κρίνεν ι λαός γιεκ λέσαρ. (Έξοδ. 18:​13-24) Ανταβά ισινέ λατσσό ι Ισραηλιτένγκε επειδή να κα μπεκλεντίνενας μπουτ για τι νικιόλ εκ απόφαση. Ανταλέσταρ αγαβάσα ότι ο Μωυσής τσσουβέλας ο λατσσιπέ ι γιαβερένγκο πιο οπρέ κατά διορισμοί σο τθερέλας. Σο σουκάρ παράδειγμας αμένγκε! Να μπιστράσα ότι, για τι αβάς μπαγιά χρήσιμοι ι Ιεχωβάσκε, ισί πιο σημαντικός τι αβάς ταπεινοί παρά τι τζανάς τι κεράς μπουτ λατσσές μερικά πράγματα. Παρόλο σο «ο Ιεχωβά ισί οπρέ, τθερέλα πο γιακχά κο ταπεινός».​—Ψαλμ. 138:6.

15. Σαρ αλλαξάλε ο πράγματα κι ζωή μπουτέ πφραλένγκι;

¹⁵ Κάνα αλλάνενα ο πράγματα. Μπουτ πφραλά ντα πφενιά σο υπηρετίνενα ι Ιεχωβάς μπουτ μπρεσά λιντέ ακανά νεβό διορισμός. Για παράδειγμας, κο 2014, ο επίσκοποι περιφερείας ντα λένγκε ρομνιά  τσσιναντέ ανταλέ διορισμόσταρ. Οντουλέ μπρεσέσταρ, ο επίσκοποι περιοχής τσσιναβένα βον-ντα πουμαρέ διορισμόσταρ κάνα ερεσένα 70 μπρεσένγκε. Ντα ο πφραλά σο ισί 80 μπρεσένγκε ή πιο μπαρέ ναστί αβένα συντονιστές του πρεσβυτερίου. Επίσης, ο τελευταία μπρεσά, μπουτ πφραλά κατά φαμιλί Μπέθελ μπουτσσάντιλε γιαβερτθέ σαρ σκαπανείς. Γιαβερά πφραλά τσσιναντέ κατά ειδική ολοχρόνια υπηρεσία επειδή ισινέ νασφαλέ, λένγκι φαμιλί μανγκέλας βοήθεια ή τθερένας γιαβερά λόγους.

16. Σαρ σικαντέ αμαρέ πφραλά ντα πφενιά ταπεινότητα κάνα αβιλέ-πες αλλαγές;

¹⁶ Ανταλά αλλαγές να ισινέ εύκολες οντουλέ πφραλένγκε ντα πφενίνγκε. Σικλιντίνενας ι πουρανέ διορισμόσκε σο μπουτ λένταρ κερένας-λες μπουτ μπρεσά. Μερικοί ισινέ μπουτ στεναχωριμέ μέχρι τι αρακχέν πάλι πουμαρί χαρά. Σιγά σιγά όμως αβιλέ πάλι χαρούμενοι. Σόσκε; Επειδή, πιο μπουτ σαριλένταρ, μανγκένας ι Ιεχωβάς. Τζανένας ότι ντινέας πουμαρό λάφι τι τζουβντιόν ι Ντεβλέσκε, όχι εκχέ μπουτιάκε ή εκχέ διορισμόσκε. (Κολ. 3:​23) Ισί χαρούμενοι σο συνεχίνενα τι υπηρετίνεν ταπεινά ι Ιεχωβάς κάι-ντα τι αβέν. «Μουκχένα οπρά-λέστε σο-ντα στεναχώρια τθερένα» ντα τζανένα ότι βοβ πφαμπόλα λένγκε.​—1 Πέτρ. 5:6, 7.

17. Σόσκε τθεράσα μπαρί εκτίμηση ι Ντεβλέσκε σο βακερέλα αμένγκε αντράλ πι Λαφίσταρ τι αβάς ταπεινοί;

¹⁷ Καζόμ μπαρί εκτίμηση τθεράσα ι Ντεβλέσκε σο αντράλ πι Λαφίσταρ βακερέλα αμένγκε τι αβάς ταπεινοί! Κάνα σικλιάσα τι τθεράς ανταγιά μπουτ σουκάρ ιδιότητα, κεράσα λατσσιπέ εμ αμένγκε εμ ι γιαβερένγκε. Βοηθίντιβασα πιο μπουτ τι νταϊντίνας ο προβλήματα ι ζωγιάκε. Ντα ο πιο σημαντικός ισί ότι αβάσα ατζέ πιο πασέ αμαρέ Νταντέστε σο ισί κο ουρανός. Καζόμ χαιρίνασα σο τζανάσα ότι, παρόλο σο ισί «μπουτ οπρέ ντα μπουτ Μπαρό», μανγκέλα ντα εκτιμίνελα πι ταπεινέ υπηρετόν!​—Ησ. 57:15.