1. Σο δυσκολίες τθερέλας ο απόστολος Ιωάννης περίπου κο 95 Κ.Χ.;

ΠΕΡΙΠΟΥ κο 95 Κ.Χ., ο απόστολος Ιωάννης τθερέλας μπαρέ δυσκολίες. Ισινέ πφουρό, γκερντέ-λες κι Πάτμος ντα ναστί νασέλας οτθάρ ντα μάλλον ισινέ ο μόνος απόστολος σο τζουβντιόλας. (Αποκ. 1:9) Τζανέλας ότι ο ντουσμάνια χουχαβένας ι πφραλέν ντα κερένας-λεν τι χαν-πες. Μπορεί τι ντικχίντιβελας ότι η κχανγκιρί ισινέ σαρ εκ χουρντί γιακ σο ατζεχάνικ κα μερέλας.​—Ιούδα 4· Αποκ. 2:​15, 20· 3:1, 17.

2. Καγιά φαντασία ντικχλάς ο Ιωάννης σαρ βακερένα ο εδάφια Αποκάλυψη 7:​9-14; (Ντικχ ι φωτογραφία κι ανγκλαϊνί σελίδα)

² Καζόμ αβένας-πες ανταλά μπέτι πράγματα, ο Ντεβέλ σικαντάς κο Ιωάννης εκ φαντασία. Οντουλέ φαντασιάτε, εκ άγγελος βακερέλα σταρέ γιαβερέ αγγελόνγκε τι ατσσικιαρέν ο ζουρανέ μπαρμπαλιά, σο μανγκένα τι σικαβέν ι μπαρί στεναχώρια, μέχρι τι τσσουβντιόλ η τελευταία σφραγίδα κο χρισμέ υπηρέτες. (Αποκ. 7:​1-3) Ανταλά υπηρέτες ισί ο 144.000 σο κα κυβερνίνεν γιεκ ι Ιησούσαρ κο ουρανός. (Λουκ. 12:​32· Αποκ. 7:4) Σοράν ο Ιωάννης ντικχέλα γιαβερέ υπηρετόν, σο ισινέ αζόμ μπουτ, σο βακερέλα: «Ντικχλόμ εκ μπαρό πλήθος, σο να μπορίνελας καέκ τζενό τι γκινέλ-λες, σαρέ κατά τθεμά, κατά φυλές, κατά λαοί ντα κατά τσσιμπά, σο μπεσένας ανγκλάλ κο θρόνος ντα ανγκλάλ κο Μπρακό». (Διαβάνεν Αποκάλυψη 7:​9-14) Ανέν τουμαρέ γκοντιάτε καζόμ μπουτ πρέπει τι χαιρισάλο ο Ιωάννης κάνα σικλιλό ότι κα αβένας ντιβεσά σο κα ντένας λατρεία ι αληθινέ Ντεβλές μπουτ τζενέ!

3. (α) Σόσκε η φαντασία σο ντικχλάς ο Ιωάννης μπαριαρέλα αμαρί πίστη; (β) Σο κα σικλιάς ανταλέ μαθημάστε;

³ Ανταγιά φαντασία σίγουρα μπαριαρντάς ι πίστη ι Ιωαννίσκι. Καζόμ πιο μπουτ πρέπει τι μπαριαρέλ αμαρί πίστη, σόσκε  αμέν τζουβντιάσα κο ντιβεσά σο νικιόλα μπαγιά ανταγιά φαντασία! Ντικχάσα τι γκιντίντιβεν εκατομμύρια τζενέ σο μπεκλεντίνενα ότι κα νακχέν κατά μπαρί στεναχώρια ντα κα τζουβντιόν για πάντα κι πφουβ. Ανταλέ μαθημάστε, κα σικλιάς σαρ σικαντάς ο Ιεχωβά πι λαόσκε πριν ογδόντα ντα πιο μπουτ μπρεσά καλά τζενέ ισί κο μπαρό πλήθος. Σοράν κα ντικχάς (1) καζόμ μπαρό ισί ανταβά πλήθος ντα (2) ότι αβέλα σαρό κατά ντουνιάς. Ανταλά ντούι πράγματα κα μπαριαρέν ι πίστη σαρέ οντουλένγκι σο τθερένα ι ευλογία τι αβέν αντρέ κο μπαρό πλήθος.

4. Καγιά αλήθεια ι Γραφιάκι να αγαβένα ο Χριστιανικές θρησκείες, ντα σαρ ισινέ διαφορετικοί ο Σπουδαστές της Γραφής;

⁴ Ο πιο μπουτ Χριστιανικές θρησκείες να σικλιαρένα ι αλήθεια ι Γραφιάκι ότι εκ ντιβές ο πιστά τζενέ κα τζουβντιόν για πάντα κι πφουβ. (2 Κορ. 4:3, 4) Σικλιαρένα ότι σαρέ ο λατσσέ τζενέ τζάνα κο ουρανός κάνα μερένα. Όμως, ο Σπουδαστές της Γραφής, σο νικαβένας ι Σκοπιά κατά 1879, τθερένας γιαβέρ άποψη. Βον αγαβένας ότι ο Ντεβέλ κα ανέλ πάλι ο Παράδεισος κι πφουβ ντα ότι εκατομμύρια πιστά τζενέ κα τζουβντιόν ατθέ κι πφουβ​—όχι κο ουρανός. Όμως, έπρεπε τι νακχέν μπουτ μπρεσά για τι αγαβέν ντιπ λατσσές κον κα αβέν οντουλά πιστά τζενέ.​—Ματθ. 6:10.

5. Σο πακιάνας ο Σπουδαστές της Γραφής για το 144.000;

⁵ Ο Σπουδαστές της Γραφής αγαντέ επίσης κατά Γραφή ότι μερικοί κα “κιντιόνας κατά πφουβ” για τι κυβερνίνεν γιεκ ι Ιησούσαρ κο ουρανός. (Αποκ. 14:3) Βον κα αβένας 144.000 τζενέ σο πφαμπόνας ι Ντεβλέσκε πραγματένγκε ντα ισινέ αφιερωμέ Χριστιανοί σο υπηρετιντέας ι Ντεβλές πιστά καζόμ τζουβντιόνας κι πφουβ. Αλλά καλά τζενέ κα αβένας κο μπαρό πλήθος;

6. Σο πακιάνας ο Σπουδαστές της Γραφής για το μπαρό πλήθος;

⁶ Ο Ιωάννης ντικχλάς οντουβά μπαρό πλήθος τι “μπεσέλ ανγκλάλ κο θρόνος ντα ανγκλάλ κο Μπρακό”. (Αποκ. 7:9) Ο Σπουδαστές της Γραφής αγαντέ ανταλέ λαφίνταρ ότι, σαρ ο 144.000, ο μπαρό πλήθος-ντα κα αβέλας κο ουρανός. Άμα εμ ο 144.000 εμ ο μπαρό πλήθος κα τζουβντιόνας κο ουρανός, σο διαφορά κα τθερένας; Ο Σπουδαστές της Γραφής πακιάνας ότι κο μπαρό πλήθος κα αβένας Χριστιανοί σο να ντινέας καν ι Ντεβλές σαρέ κο πράγματα καζόμ ισινέ κι πφουβ. Παρόλο σο κερένας ο κανόνες ι Ντεβλέσκε, μερικοί λένταρ μπορεί τι ατσσιλέας κο Χριστιανικές θρησκείες κι ντουνιάσκε. Ο Σπουδαστές της Γραφής αμντίνενας ότι ασακέ τζενέ πφαμπόνας ι Ντεβλέσκε πραγματένγκε, αλλά όχι αζόμ μπουτ για τι κυβερνίνεν ι Ιησούσαρ. Επειδή λένγκι αγάπη ι Ντεβλέσκε να ισινέ αζόμ μπαρί, ο τζενέ σο κα αβένας κο μπαρό πλήθος μπορίνενας τι αβέν ανγκλάλ κο θρόνος αλλά όχι τι μπεσέν οπράλ κο θρόνοι.

7. Σαρ πακιάνας ο Σπουδαστές της Γραφής, κον κα τζουβντιόλας κι πφουβ κο Χίλια Μπρεσά, ντα σο κα αβέλας-πες κο πιστά τζενέ κι πουρανέ μπρεσένγκε;

⁷ Άρα κον κα τζουβντιόλας κι πφουβ; Ο Σπουδαστές της Γραφής πακιάνας ότι, αφού πρώτα κα γκιντίντιβενας κο ουρανός ο 144.000 ντα ο μπαρό πλήθος, εκατομμύρια γιαβερά κα τζουβντιόνας κι πφουβ για τι λεν ο ευλογίες κατά Βασιλεία ι Χριστόσκι σο κα ατσσικιαρέλ χίλια μπρεσά. Να μπεκλεντίνενας ότι οντουλά εκατομμύρια τζενέ κα υπηρετίνενας ι Ιεχωβάς πριν τι αρχίνελ η Βασιλεία ι Χριστόσκι. Πακιάνας ότι οντουλά τζενέ κα σικλιόνας ι Ιεχωβάσκε κο Χίλια Μπρεσά. Σοράν, οντουλά σο κα κερένας ο κανόνες ι Ιεχωβάσκε κα τζουβντιόνας για πάντα κι πφουβ ντα οντουλά σο κα τζάνας κόντρα λέσαρ κα καταστραφίντιβενας. Ο Σπουδαστές της Γραφής πακιάνας  επίσης ότι μπορεί κάποιοι σο κα αβένας αζομάν «άρχοντες» ι πφουβιάκε τι τζάνας κο ουρανός κάνα κα τελειώνενας ο Χίλια Μπρεσά, ντα αντρέ οντουλέντε κα αβένας ο πιστά μουρσά-ντα σο μουλέ πριν κατά Χριστός ντα αναστισάλε.​—Ψαλμ. 45:16.

8. Καλά τριν ομάδες ντικχίντιβελας ότι ισί αντρέ κο σκοπός κι Ντεβλέσκο;

⁸ Ο Σπουδαστές της Γραφής αμντίνενας ότι υπαρχίντιβενας τριν ομάδες: (1) ο 144.000, σο κα κυβερνίνενας ι Ιησούσαρ κο ουρανός, (2) ο μπαρό πλήθος ι Χριστιανόνγκο σο κα πφαμπόνας πιο χάνικ ι Ντεβλέσκε πραγματένγκε, ντα κα μπεσένας ανγκλάλ κο θρόνος κι Ιησούσκο κο ουρανός, ντα (3) εκατομμύρια τζενέ σο κα σικλιόνας ι Ιεχωβάσκε κι πφουβ κι Βασιλεία κι Χριστόσκι σο κα ατσσικιαρέλ χίλια μπρεσά. * Όμως πι βακιτίστε, ο Ιεχωβά ντινάς-λεν τι αγαβέν πιο λατσσές ανταβά πράγμας.​—Παρ. 4:18.

9. (α) Σαρ κα μπεσέλ «ανγκλάλ κο θρόνος ντα ανγκλάλ κο Μπρακό» ο μπαρό πλήθος σο κα αβέλ κι πφουβ; (β) Σόσκε ισί λογικός ο τρόπος σο αγαντίντιλο ο εδάφιος Αποκάλυψη 7:9;

⁹ Κο 1935, αγαντίντιλο πιο λατσσές καλά τζενέ ισί κο μπαρό πλήθος σο ντικχλάς ο Ιωάννης. Ο Μάρτυρες ι Ιεχωβάσκε αγαντέ ότι ο μπαρό πλήθος να χρειαζίντιβελα τι αβέλ κο ουρανός για τι μπεσέλ «ανγκλάλ κο θρόνος ντα ανγκλάλ κο Μπρακό». Μπεσέλα οτθέ με συμβολικός τρόπος. Παρόλο σο ο μπαρό πλήθος κα τζουβντιόλ κι πφουβ, κα μπεσέλ «ανγκλάλ κο θρόνος» επειδή κα δεχτίνελ ότι ο Ιεχωβά κερέλα κουμάντος σαρέ ο πράγματα ντα επειδή κα ντελ-λες καν. (Ησ. 66:1) Κα μπεσέλ «ανγκλάλ κο Μπρακό» επειδή κα πακιάλ κι θυσία κι Ιησούσκι. Ο εδάφια-ντα Ματθαίος 25:​31, 32, βακερένα ότι «σαρέ ο τθεμά»​—εμ ο πφιρνέ τζενέ​—“κα γκιντίντιβεν ανγκλάλ” κο Ιησούς σο μπεσέλα πι δοξασμέ θρονόστε. Αγαντίντιβελα ότι σαρέ οντουλά τθεμά νανέ κο ουρανός αλλά ισί κι πφουβ. Ο νεβό τρόπος σο αγαντίντιλο ο εδάφιος Αποκάλυψη 7:9 ισί λογικός. Σικαβέλα σόσκε η Γραφή να βακερέλα ότι ο μπαρό πλήθος κα τζαλ κο ουρανός. Σάντε κο 144.000 ντινάς πο λάφι ο Ιεχωβά ότι κα τζουβντιόν για πάντα κο ουρανός. Βον κα «κυβερνίνεν ι πφουβ» γιεκ ι Ιησούσαρ.​—Αποκ. 5:10.

10. Σόσκε ο μπαρό πλήθος πρέπει τι σικλιόλ ι Ιεχωβάσκε ντα τι πακιάλ λέστε πριν τι αρχίνεν ο Χίλια Μπρεσά;

¹⁰ Άρα, κατά 1935 ο Μάρτυρες ι Ιεχωβάσκε αγαντέ ότι ο μπαρό πλήθος σο ντικχλάς κι φαντασία ο Ιωάννης ισί πιστοί Χριστιανοί σο κα τζουβντιόν για πάντα κι πφουβ. Για τι νακχέν κατά μπαρί στεναχώρια, ο τζενέ σο ισί κο μπαρό πλήθος πρέπει τι σικλιόν ι Ιεχωβάσκε ντα τι πακιάν λέστε πριν τι αρχίνεν ο Χίλια Μπρεσά. Πρέπει τι σικαβέν μπαρί πίστη για τι «μπορίνεν τι σώντιβεν σαρέ οντουλένταρ σο πρέπει τι αβέν-πες» πριν κατά Βασιλεία ι Χριστόσκι σο κα ατσσικιαρέλ χίλια μπρεσά.​—Λουκ. 21:​34-36.

11. Σόσκε μπορεί τι πακιάνας μερικοί Σπουδαστές της Γραφής ότι μερικά πιστά τζενέ κι πφουβ κα τζάνας κο ουρανός σοράν κατά Χίλια Μπρεσά;

¹¹ Σο κα βακεράς οντουλέσκε σο πακιάνας ο Σπουδαστές της Γραφής, ότι μερικά πιστά τζενέ κι πφουβ κα τζάνας κο ουρανός σοράν κατά Χίλια Μπρεσά; Ανταβά βακέρντιλοας κι Σκοπιά 15 Φεβρουαρίου 1913 (κι αγγλική). Μερικοί μπορεί τι σκεφτίνενας: “Σόσκε ο πιστά τζενέ ι πουρανέ μπρεσένγκε τι τζουβντιόν κι πφουβ ενώ ο Χριστιανοί σο να ισινέ αζόμ πιστοί τι τζαν κο ουρανός;” Ανταβά μπορεί τι σκεφτίνενας-λες επειδή πακιάνας ακαλά ντούι λάθος πράγματα: (1) ότι ο μπαρό πλήθος κα τζουβντιόλας κο ουρανός ντα (2) ότι κο μπαρό πλήθος κα αβένας Χριστιανοί  σο να πφαμπόνας αζόμ μπουτ ι Ντεβλέσκε πραγματένγκε.

12, 13. Σο αγαβένα εμ ο χρισμέ εμ ο μπαρό πλήθος για την ευλογία σο κα λεν;

¹² Σαρ ντικχλάμ όμως, κο 1935 ο Μάρτυρες ι Ιεχωβάσκε αγαντέ ότι οντουλά σο κα νακχέν κατά Αρμαγεδδώνας ισί ο μπαρό πλήθος σο ντικχλάς κι φαντασία ο Ιωάννης. Βον κα “αβέν κατά μπαρί στεναχώρια”, ατθέ κι πφουβ, ντα κα ντεν βίκος ζουρανές, ντα κα βακερέν: «Σωσάλαμ χάρη αμαρέ Ντεβλέσταρ, σο μπεσέλα κο θρόνος, ντα χάρη κο Μπρακό». (Αποκ. 7:​10, 14) Επίσης, η Γραφή σικλιαρέλα ότι οντουλά σο τζάνα κο ουρανός λένα «κάτι πιο λατσσό» κατά πιστά τζενέ ι πουρανέ μπρεσένγκε. (Εβρ. 11:​40) Οντουλέσκε, αμαρέ πφραλά αρχισάλε μπαρέ χαράσαρ τι βακερέν κο τζενέ τι υπηρετίνεν ι Ιεχωβάς ντα ότι κα τζουβντιόν για πάντα κι πφουβ.

¹³ Ο τζενέ σο ισί κο μπαρό πλήθος χαιρίνενα σο κα τζουβντιόν κι πφουβ. Αγαβένα ότι ο Ιεχωβά αποφασίνελα κάι κα υπηρετίνεν-λες λέσκε πιστοί υπηρέτες, κο ουρανός ή κι πφουβ. Εμ ο χρισμέ εμ ο μπαρό πλήθος αγαβένα ότι μπορίνενα τι λεν ανταγιά ευλογία σάντε επειδή ο Ιεχωβά σικαντάς λένγκε λατσσιπέ σο να αξίνενα-λες αντράλ κατά λύτρος ι Ιησού Χριστόσκο.​—Ρωμ. 3:24.

14. Σοράν κατά 1935, σόσκε μπουτ τζενέ σκεφτίνενας σαρ κα νικιόλας μπαγιά η προφητεία για το μπαρό πλήθος;

¹⁴ Αφού ο Μάρτυρες ι Ιεχωβάσκε κο 1935 αγαντέ πιο λατσσές ι αλήθεια, μπουτ λένταρ να τζανένας σαρ κα γκιντίντιβενας μπουτ τζενέ σο κα τζουβντιόνας κι πφουβ. Για παράδειγμας, ο Ρόναλντ Πάρκιν ισινέ 12 μπρεσένγκο κάνα αγαντίντιλο πιο λατσσές καλά τζενέ ισί κο μπαρό πλήθος. Βοβ βακερέλα: «Οντουλά μπρεσά, ισινέ περίπου 56.000 πφραλά σαρό κο ντουνιάς, ντα μπουτ λένταρ, ίσως ο πιο μπουτ, ισινέ χρισμέ. Οντουλέσκε, ο μπαρό πλήθος να ντικχίντιβελας αζόμ μπαρό».

15. Σαρ γκιντισάλο ο μπαρό πλήθος;

¹⁵ Όμως, κο μπρεσά σο αβιλέ πιο σοράν, μπουτσσάντιλε ιεραπόστολοι μπουτέ τθεμέντε, ντα ο Μάρτυρες ι Ιεχωβάσκε αβιλέ πιο μπουτ. Σοράν, κατά 1968 κεράας μελέτη ι τζενέν κατά βιβλίος Η Αλήθεια που Οδηγεί στην Αιώνιο Ζωή. Ο απλός τρόπος σο εξηγίνελας ι αλήθεια ι Γραφιάκι ταρτίνελας πιο μπουτ από ποτές ι τζενέν σο τθερένας κοβλό γκι. Αντρέ σε σταρ μπρεσά, μπολντιλέ πιο μπουτ από 500.000 νεβέ μαθητές. Καζόμ η Καθολική Κχανγκιρί χασαρέλας πι ζορ κι Λατινική Αμερική ντα γιαβερέ τθεμέντε, ντα καζόμ αρχίνενας τι  μουκχέν ι πφραλέν κι Ανατολική Ευρώπη ντα μερικέ τθεμέντε κι Αφρική τι κερέν έργος, εκατομμύρια γιαβερά τζενέ μπολντιόνας. (Ησ. 60:​22) Ο τελευταία μπρεσά, η οργάνωση ι Ιεχωβάσκι ετοιμαντάς γιαβερά-ντα λατσσέ εργαλεία για τι βοηθίνελ ι τζενέν τι σικλιόν ι Αγία Γραφή. Ντικχίντιβελα ξεκάθαρα ότι γκιντισάλο εκ μπαρό πλήθος, σο ακανά τθερέλα πιο μπουτ από οχτώ εκατομμύρια τζενέν.

16. Κατάρ ισί ο μπαρό πλήθος;

¹⁶ Κάνα ο Ιωάννης γραφιντάς ι φαντασία σο ντικχλάς, βακερντάς ότι ο μπαρό πλήθος κα αβέλας «σαρέ κατά τθεμά, κατά φυλές, κατά λαοί ντα κατά τσσιμπά». Κάτι ασακό βακερντάας ο προφήτης Ζαχαρίας-ντα, σο γραφιντάς: «Οντουλά ντιβεσά 10 μουρσά σαρέ κατά τσσιμπά ι τθεμένγκε κα ασταρέν, βα, κα ασταρέν σικίς ο σέα εκχέ Ιουδαιόσκε ντα κα βακερέν: “Μανγκάσα τι αβάς τουμέντζαρ, σόσκε ασουντάμ ότι ο Ντεβέλ ισί τουμέντζαρ”».​—Ζαχ. 8:23.

17. Σο κεράσα για τι βοηθίνας τζενέν σαρέ κατά τθεμά ντα κατά τσσιμπά;

¹⁷ Ο Μάρτυρες ι Ιεχωβάσκε αγαβένα ότι, για τι γκιντίντιβεν τζενέ σαρέ κατά τσσιμπά, πρέπει τι βακέρντιβεν ο λατσσέ αμπέρια μπουτέ τσσιμπέντε. Πιο μπουτ από  130 μπρεσά μεταφράνασα έντυπα σο σικλιαρένα ι τζενέν κατά Γραφή, αλλά ακανά κεράσα ο πιο μπαρό μεταφραστικός έργος σο αβιλό-πες ποτές, σόσκε μεταφράνασα εκατοντάδες τσσιμπέντε. Ντικχίντιβελα ξεκάθαρα ότι ο Ιεχωβά κερέλα εκ θαύμας: Γκίντελα εκ μπαρό πλήθος σαρέ κατά τθεμά. Επειδή, καζόμ τζάλα, η Γραφή ντα ο έντυπα νικιόνα πιο μπουτ τσσιμπέντε, ο τρόπος σο υπηρετίνενα ι Ιεχωβάς σαρέ ανταλά τζενέ ισί ο ίδιος. Σαρέ ντικχένα ότι ο Μάρτυρες βακερένα ο λατσσέ αμπέρια σαρέ πουμαρέ γκίσαρ ντα μανγκένα ο εκ ι γιαβερές σαρ πφραλά. Καζόμ μπουτ μπαριαρέλα ανταβά αμαρί πίστη!​—Ματθ. 24:​14· Ιωάν. 13:35.

18. (α) Καζόμ τθεράσα αμαρέ γκοντιάτε ο εδάφια Ησαΐας 46:​10, 11, σόσκε να κερέλα αμένγκε εντύπωση ότι ο Ιεχωβά κερντάς τι νικιόλ μπαγιά η προφητεία για το μπαρό πλήθος; (β) Σόσκε οντουλά σο κα τζουβντιόν κι πφουβ να νιωθίνενα ότι κι Ντεβλέσκε γιακχά νανέ αζόμ πιστοί;

¹⁸ Μπεϊντίνασα μπουτ ι προφητεία για το μπαρό πλήθος! Να κερέλα αμένγκε εντύπωση ότι ο Ιεχωβά κερντάς τι νικιόλ μπαγιά ανταγιά προφητεία αζόμ σουκάρ τροπόσαρ. (Διαβάνεν Ησαΐας 46:​10, 11) Οντουλά σο ισί κο μπαρό πλήθος χαιρίνενα μπουτ σο ο Ιεχωβά ντινάς-λεν ι ελπίδα τι τζουβντιόν κι πφουβ. Να νιωθίνενα ότι κι Ντεβλέσκε γιακχά νανέ αζόμ πιστοί επειδή λέσκο πνεύμας να τραμπιντάς-λεν τι υπηρετίνεν ι Ιησούσαρ κο ουρανός. Κι Γραφή διαβάνασα πιστέ μουρσένγκε ντα τζουβλίνγκε σο οδηγίντιβενας κατά άγιος πνεύμας αλλά νανέ αντρέ κο 144.000. Εκ παράδειγμας ισί ο Ιωάννης ο Βαφτιστής. (Ματθ. 11:​11) Εκ γιαβέρ ισί ο Δαβίδ. (Πράξ. 2:​34) Βον ντα μπουτ γιαβερά κα αναστίντιβεν για τι τζουβντιόν κο Παράδεισος κι πφουβ. Σαρέ βον ντα ο μπαρό πλήθος κα τθερέν ι ευκαιρία τι σικαβέν πουμαρί αφοσίωση κο Ιεχωβά ντα κι κυριαρχία λέσκι.

19. Σαρ τζανάσα ότι τζουβντιάσα κο τελευταία ντιβεσά κάνα ντικχάσα τι νικιόλ μπαγιά η φαντασία ι Ιωαννίσκι;

¹⁹ Ποτές ξανά να γκιντιντάας ο Ντεβέλ εκατομμύρια τζενέν σαρέ κατά τθεμά. Είτε μπεκλεντίνασα τι τζουβντιάς κο ουρανός είτε κι πφουβ, χρειαζίντιβελα τι βοηθίνας καζόμ αβέλα-πες πιο μπουτ τζενέν τι αβέν αντρέ κο μπαρό πλήθος κι “γιαβερέ μπρακένγκο”. (Ιωάν. 10:​16) Ατζεχάνικ, ο Ιεχωβά κα ανέλ ι μπαρί στεναχώρια σο κα καταστραφίνελ ο κυβερνήσεις ντα ο θρησκείες σο βασανίνενα ι τζενέν. Σο σουκάρ προνόμιος κα τθερέν σαρέ οντουλά σο ισί κο μπαρό πλήθος​—τι υπηρετίνεν ι Ιεχωβάς κι πφουβ για πάντα!​—Αποκ. 7:14.