1, 2. Σο ντιντιλό κο Τιμόθεος σαρ βακερέλα ο εδάφιος 1 Τιμόθεο 6:20;

ΜΠΟΥΤ φαρ μουκχάσα αμαρέ πολύτιμα πράγματα τι αρακχαβέν-λεν ο γιαβερά. Για παράδειγμας, τσσουβάσα αμαρέ λοβέ κι τράπεζα. Κάνα κεράσα-λες ανταβά, μπεκλεντίνασα ότι οτθέ κα αβέν αρακχαντέ ντα ότι να κα χασάρντιβεν ούτε κα τσορέλ-λεν καέκ τζενό. Οτθάρ, αγαβάσα σο μανγκέλα τι βακερέλ τι μουκχάς αμαρέ πολύτιμα πράγματα τι αρακχαβέν-λεν ο γιαβερά.

² Διαβάνεν 1 Τιμόθεο 6:​20. Ο απόστολος Παύλος αντάς κι γκοντί κι Τιμοθεόσκι ότι λιντάας κάτι πολύτιμος​—τζανέλας λατσσές σο κα κερέλ ο Ντεβέλ ι τζενένγκε. Επίσης, ο Ιεχωβά ντινάας-λες ο προνόμιος τι “βακερέλ ο λάφια ι Ντεβλέσκε” ντα τι μουτθαβέλ ο «λατσσέ αμπέρια». (2 Τιμ. 4:2, 5) Ο Παύλος βακερντάς κο Τιμόθεος τι αρακχαβέλ οντουβά σο ντιντιλό-λες. Αντικάς, ντιντιλέ αμέντε-ντα κάποια πολύτιμα πράγματα. Καλά ισί ανταλά; Ντα σόσκε πρέπει τι αρακχαβάς ανταλά πολύτιμα πράγματα σο ντινάς-αμέν ο Ιεχωβά;

3, 4. Σόσκε ο αλήθειες ι Γραφιάκε ισί πολύτιμες;

³ Λατσσιμάσαρ ο Ιεχωβά ντινάς-αμέν τι αγαβάς ντιπ λατσσές ο πολύτιμες αλήθειες σο ισί λέσκε Λαφίστε, κι Αγία Γραφή. Ανταλά αλήθειες ισί πολύτιμες επειδή σικλιαρένα-αμέν σαρ τι αβάς λατσσέ αμαλά ι Ιεχωβάσαρ ντα ντένα-αμέν τι αγαβάς σο ανέλα πραγματική ευτυχία κι ζωή. Κάνα πακιάσα ανταλά αλήθειες ντα κεράσα-λεν αμαρέ ζωγιάτε, αρακχαβάσα-αμέν ψεύτικε λαφίνταρ ντα μπίλατζανε πραγματένταρ.​—1 Κορ. 6:​9-11.

⁴ Ο αλήθειες σο ισί κο Λάφι κι Ντεβλέσκο ισί πολύτιμες για εκ γιαβέρ-ντα λόγος: Ο Ιεχωβά μουτθαβέλα-λεν σάντε ταπεινέ τζενένγκε “σο λένγκο γκι μανγκέλα τι σικλιόλ”. (Πράξ. 13:​48) Ασακέ τζενέ πακιάνα ότι ο πιστός ντα φρόνιμος  δούλος σικλιαρέλα-αμέν ανταλά αλήθειες αντιβές. (Ματθ. 11:​25· 24:​45) Ναστί σικλιάσα ανταλά αλήθειες κορκορέ, ντα καέκ γιαβέρ πράγμας να τθερέλα πιο μπαρί αξία λένταρ.​—Παρ. 3:​13, 15.

5. Σο γιαβέρ ντινάς-αμέν ο Ιεχωβά;

⁵ Ο Ιεχωβά ντινάς-αμέν επίσης ο προνόμιος τι σικλιαράς γιαβερέν ι αλήθεια λέσκε ντα οντουλένγκε σο τθερέλα πι γκοντιάτε τι κερέλ. (Ματθ. 24:​14) Ο αμπέρια σο βακεράσα τθερένα μπαρί αξία σόσκε βοηθίνενα ι τζενέν τι αβέν αντρέ κι Ιεχωβάσκι φαμιλί ντα ντένα-λεν ι ευκαιρία τι λεν ζωή για πάντα. (1 Τιμ. 4:​16) Είτε μπορίνασα τι νικιάς μπουτ κο έργος είτε χάνικ, υποστηρίνασα ο πιο σημαντικός έργος σο αβέλα-πες αμαρέ ντιβεσέντε. (1 Τιμ. 2:3, 4) Σο μπαρό προνόμιος ισί τι αβάς συνεργάτες ι Ντεβλέσκε!​—1 Κορ. 3:9.

6. Σο αβιλό-πες μερικέ τζενέντε σο να αρακχαντέ οντουβά σο ντιντιλό-λεν;

⁶ Κο ντιβεσά κι Τιμοθεόσκε, μερικοί Χριστιανοί να εκτιμιντέ ο προνόμιος σο τθερένας τι αβέν συνεργάτες ι Ντεβλέσκε. Επειδή ο Δημάς μανγκλάς ανταλέ ντουνιάς, μουκχλάς ο προνόμιος σο τθερέλας τι υπηρετίνελ γιεκ ι Παυλόσαρ. (2 Τιμ. 4:​10) Ντικχίντιβελα ότι ο Φύγελος ντα ο Ερμογένης μουκχλέ ο έργος σο κερένας επειδή νταρασάλε ότι ο τζενέ κα τζάνας λέντζαρ κόντρα σαρ γκιλέ κο Παύλος-ντα. (2 Τιμ. 1:​15) Ο Υμέναιος, ο Αλέξανδρος ντα ο Φιλητός αβιλέ αποστάτες ντα νασλέ κατά αλήθεια. (1 Τιμ. 1:​19, 20· 2 Τιμ. 2:​16-18) Σαρέ ανταλά τζενέ μανγκένας ι Ιεχωβάς, αλλά τσσιναντέ τι ντικχέν καζόμ πολύτιμα ισινέ ο πράγματα σο τθερένας.

7. Σαρ προσπαθίνελα ο Μπενγκ τι κερέλ-αμέν τι μουκχάς ο πολύτιμα πράγματα σο ντινάς-αμέν ο Ιεχωβά;

⁷ Σαρ προσπαθίνελα ο Μπενγκ τι κερέλ-αμέν τι μουκχάς ο πολύτιμα πράγματα σο ντινάς-αμέν ο Ιεχωβά; Ντικχέν μερικά πράγματα σο κερέλα. Αντράλ κατά τηλεόραση, κατά Ίντερνετ ντα γιαβερέ πραγματένταρ, προσπαθίνελα τι τσσουβέλ αμαρέ γκοντιάτε ντα αμαρέ γκίστε πράγματα σο κα κερέν-αμέν σιγά σιγά τι τσσιναβάς τι ασταράς σικίς ι αλήθεια. Προσπαθίνελα τι νταραβέλ-αμέν οντουλέντζαρ σο βακερένα ο τζενέ αμένγκε ή οντουλέντζαρ σο κερένα για τι τζαν αμέντζαρ κόντρα ντα αντικάς τι τσσιναβάς τι βακεράς ο λατσσέ αμπέρια. Προσπαθίνελα επίσης τι χουχαβέλ-αμέν για τι ασουνάς ο λάφια σο βακερένα ο αποστάτες, «σο αμντίνενα ότι τζανένα πράγματα», ντα αντικάς τι νασάς κατά αλήθεια.​—1 Τιμ. 6:​20, 21.

8. Σο σικλιόνα κατά Ντάνιελ;

⁸ Άμα να προσοχίνασα, χωρίς τι αγαβάς-λες, μπορεί τι τσσιναβάς τι ασταράς σικίς ι αλήθεια. Σκεφτίνεν σο αβιλό-πες εκχέ  πφραλέστε κο Ντάνιελ, * σο μπεϊντίνελας μπουτ ο βιντεοπαιχνίδια. Βοβ βακερέλα: «Αρχισάλομ τι κχελάβ βιντεοπαιχνίδια κάνα ισινόμας περίπου ντεσέ μπρεσένγκο. Κι αρχή, ο παιχνίδια σο κχελάβας ντικχίντιβενας λατσσέ. Αλλά σιγά σιγά αρχισάλομ τι κχελάβ παιχνίδια σο σικαβένας άγρια ντα μπενγκαλέ πράγματα». Ερεσλό κο σημείος τι κχελέλ περίπου 15 σαάτια κο ντιβές. «Αντρά-μάντε, τζανάβας ότι ο παιχνίδια σο κχελάβας ντα ο χρόνος σο χαλαβάβας λένας-μαν ντουρ κατά Ιεχωβά. Όμως, μο γκι χουχαβέλας-μαν ντα πακιάβας ότι οντουβά σο κεράβας να τζάλας κόντρα κο λάφια κι Γραφιάκε», βακερέλα ο Ντάνιελ. Άμα να προσοχίνασα, η ψυχαγωγία μπορεί εύκολα τι κερέλ-αμέν μα τι ασταράς σικίς ι αλήθεια. Άμα κα αβέλ-πες ανταβά, μπορεί τι χασαράς ο πολύτιμα πράγματα σο ντινάς-αμέν ο Ιεχωβά.

9. Σαρ μοιασκιαρντάς ο Παύλος ι Τιμοθεός σαρ βακερένα ο εδάφια 1 Τιμόθεο 1:​18, 19;

⁹ Διαβάνεν 1 Τιμόθεο 1:​18, 19. Ο Παύλος μοιασκιαρντάς ι Τιμοθεός εκχέ στρατιωτίσαρ ντα βακερντάς λέσκε “τι κερέλ ο λατσσό τζένγκι”. Ανταβά να ισινέ τζένγκι τζενένγκο, αλλά πνευματικός τζένγκι. Σόσκε βακεράσα ότι ο Χριστιανοί ισί σαρ ο στρατιώτες σο ισί κο τζένγκι; Καλά ιδιότητες πρέπει τι τθεράς σαρ στρατιώτες ι Χριστόσκε; Για τι ντικχάς παντς πράγματα σο σικλιάσα κατά παράδειγμας σο βακερντάς ο Παύλος. Ανταλά πράγματα σο κα σικλιάς κα βοηθίνεν-αμέν τι ασταράς σικίς ι αλήθεια.

10. Σόσκε πρέπει τι αβάς αφοσιωμέ κο Ντεβέλ;

¹⁰ Τι αβέν αφοσιωμέ κο Ντεβέλ. Εκ λατσσό στρατιώτης σικαβέλα αφοσίωση. Μαρέλα-πες για τι αρακχαβέλ εκχέ αγαπημέ τζενές ή εκ πράγμας σο ισί πολύτιμος λέσκε. Ο Παύλος βακερντάς κο Τιμόθεος τι αβέλ αφοσιωμέ κο Ντεβέλ. (1 Τιμ. 4:7) Καζόμ πιο μπαρί ισί αμαρί αγάπη ι Ντεβλέσκε ντα αμαρί αφοσίωση λέστε, αζόμ πιο μπουτ κα μανγκάς τι ασταράς σικίς ι αλήθεια.​—1 Τιμ. 4:​8-10· 6:6.

11. Σόσκε πρέπει τι κεράς-αμέν κουμάντος;

¹¹ Σικλιόν τι κερέν-τουμέν κουμάντος. Εκ στρατιώτης πρέπει τι κερέλ-πες κουμάντος για τι αβέλ πάντα έτοιμος ι τζενγκίσκε. Ο Τιμόθεος ισινέ λατσσές πνευματικά επειδή κερέλας ι συμβουλή ι Παυλόσκι τι νασέλ κατά λάθος πράγματα σο μανγκένα ο τζενέ, τι προσπαθίνελ τι τθερέλ λατσσέ ιδιότητες ντα τι κερέλ παρέα ι γιαβερέ Χριστιανόντζαρ. (2 Τιμ. 2:​22) Για τι κερέλ-λες ανταβά, έπρεπε τι κερέλ-πες κουμάντος. Αμέν-ντα πρέπει τι κεράς-αμέν κουμάντος για τι νικίνας ο τζένγκι σο κεράσα κόντρα ι πραγματέντζαρ σο μανγκέλα αμαρό σώμας. (Ρωμ. 7:​21-25) Επίσης, πρέπει τι κεράς-αμέν κουμάντος για τι προσπαθίνας τι νικαβάς οπρ’ αμένταρ ο πουρανό χαρακτήρας ντα τι ιριάς ο νεβό. (Εφεσ. 4:​22, 24) Ντα άμα ισινάμ κχινέ κο τέλος εκχέ ντιβεσέσκο, μπορεί τι χρειαζίντιβελ τι κεράς μπαρί προσπάθεια για τι τζας κι συνάθροιση.​—Εβρ. 10:​24, 25.

12. Σο μπορίνασα τι κεράς για τι χρησιμοποιήνας πιο λατσσές ι Γραφή;

¹² Εκ στρατιώτης πρέπει τι κερέλ εξάσκηση συνέχεια για τι τζανέλ σαρ τι χρησιμοποιήνελ λατσσές πο όπλα. Αντικάς αμέν-ντα, πρέπει τι τζανάς τι χρησιμοποιήνας λατσσές ο Λάφι ι Ντεβλέσκο. (2 Τιμ. 2:​15) Εκ τρόπος για τι σικλιάς-λες ανταβά ισί ο συναθροίσεις. Αλλά άμα μανγκάσα τι βοηθίνας γιαβερέν τι πακιάν ότι η αλήθεια ι Γραφιάκι μπορίνελα τι βοηθίνελ-λεν, πρέπει πρώτα αμέν τι σικλιαράς-αμέν κατά Γραφή συνέχεια. Πρέπει τι χρησιμοποιήνας ο Λάφι ι Ντεβλέσκο για τι κεράς αμαρί πίστη πιο ζουρανί. Ανταβά να μανγκέλα τι βακερέλ σάντε τι διαβάνας ι Γραφή. Μανγκέλα τι βακερέλ τι σκεφτίνας οντουλά σο  διαβάνασα ντα τι ρόντας κο έντυπα αμαρέ για τι αγαβάς ντα τι κεράς οντουλά σο σικλιάσα κατά Γραφή με το σωστός τρόπος. (1 Τιμ. 4:​13-15) Αζομάν κα μπορίνας τι χρησιμοποιήνας ο Λάφι ι Ντεβλέσκο για τι σικλιαράς ι γιαβερέν. Ντα πάλι να ερεσέλα σάντε τι διαβάνας απλώς εκ εδάφιος. Πρέπει τι ντας ι τζενές τι αγαβέλ ο εδάφιος ντα τι ντικχέλ σο μανγκέλα τι βακερέλ λέσκε. Άμα τθεράσα εκ πρόγραμμας για τι σικλιαράς-αμέν κατά Γραφή, κα χρησιμοποιήνας πιο λατσσές ο Λάφι ι Ντεβλέσκο για τι σικλιαράς ι γιαβερέν.​—2 Τιμ. 3:​16, 17.

13. Σόσκε πρέπει τι τσσουβάς αμαρί γκοντί τι κχελέλ σαρ βακερέλα ο εδάφιος Εβραίους 5:14;

¹³ Τι τσσουβέν τουμαρί γκοντί τι κχελέλ. Εκ στρατιώτης πρέπει τι ντικχέλ ο κίνδυνοι ντα τι νασέλ λένταρ. Αμέν-ντα πρέπει τι σικλιάς τι αγαβάς σο κα μπορίνελας τι κερέλ αμένγκε ζιάνι ντα τι κεράς πράγματα για τι νασάς κατά κίνδυνοι. (Παρ. 22:3· διαβάνεν Εβραίους 5:​14) Για παράδειγμας, πρέπει τι τραμπίνας γκοντιάσαρ σαρ κα νακχάς λατσσές ντα σαρ κα διασκεδάνας. Μπουτ φαρ η τηλεόραση ντα ο σινεμάδες σικαβένα μπίλατζανε πράγματα. Ανταλά πράγματα προσβαλίνενα ι Ντεβλές ντα σίγουρα κερένα ζιάνι. Οτθάρ, να διασκεδάνασα τροπόσαρ σο κα σουρντιαρέλας αμαρί αγάπη ι Ντεβλέσκε σιγά σιγά.​—Εφεσ. 5:5, 6.

14. Σαρ τσσουντάς πι γκοντί τι κχελέλ ο Ντάνιελ;

¹⁴ Ο Ντάνιελ αγαντάς ότι ο βιντεοπαιχνίδια σο σικαβένας άγρια ντα μπενγκαλέ πράγματα κερένας λέσκε ζιάνι. Ροντιντάς κι Βιβλιοθήκη της Σκοπιάς για τι αρακχέλ πράγματα σο κα βοηθίνενας-λες τι νακχαβέλ πο πρόβλημας. Σαρ επηρεαντάς-λες ανταβά; Τσσιναντάς τι κχελέλ ασακέ βιντεοπαιχνίδια. Τσσιναντάς ο παιχνίδια σο κχελέλας ι γιαβερέντζαρ κο Ίντερνετ. Ο Ντάνιελ βακερέλα: «Αντίς τι κχελάβ βιντεοπαιχνίδια, αρχισάλομ τι νταβ μι σαατίσταρ για τι κεράβ γιαβερά πράγματα αβρί ντα παρέες ι πφραλέντζαρ κατά κχανγκιρί». Ακανά ο Ντάνιελ ισί σκαπανέας ντα πρεσβύτερος.

15. Σόσκε μπορεί τι κερέν αμένγκε ζιάνι ο ψεύτικες ιστορίες;

¹⁵ Σαρ ο Τιμόθεος, αντικάς αμέν-ντα πρέπει τι αγαβάς ο ζιάνι σο κερένα ο αποστάτες ι ψεματέντζαρ σο βακερένα. (1 Τιμ. 4:1, 7· 2 Τιμ. 2:​16) Για παράδειγμας, μπορεί τι βακερένα ψεύτικες ιστορίες αμαρέ πφραλένγκε ή τι κερέν-αμέν μα τι αβάς σίγουροι για την οργάνωση ι Ιεχωβάσκι. Ασακέ λάφια σο νανέ μπαγιά κα μπορίνενας τι κερέν αμαρί πίστη μα τι αβέλ ζουρανί. Δεν πρέπει τι  χουχάντιβας ανταλέ λαφίνταρ. Σόσκε; Επειδή ασακέ ιστορίες βακέρντιβενα «τζενένταρ σο ισί πφιρνέ γκοντιάκε ντα τσσιναντέ τι αγαβέν ι αλήθεια». Ανταλά τζενέ “μερένα καβγκάσκε ντα μανγκένα τι χαν-πες”. (1 Τιμ. 6:4, 5) Μανγκένα τι πακιάς λένγκε ψέματα ντα τι τσσιναβάς τι ντας μπέσα αμαρέ πφραλένγκε.

16. Καλά πράγματα δεν πρέπει τι ταρτίνεν αμαρί προσοχή;

¹⁶ Μα μουκχέν γιαβερά πράγματα τι ταρτίνεν τουμαρί προσοχή. Σαρ «λατσσό στρατιώτης ι Ιησού Χριστόσκο», ο Τιμόθεος έπρεπε τι τθερέλ πρώτα πι ζωγιάτε ο έργος ντα μα τι μουκχέλ ο πράγματα ι ντουνιάσκε ή ο υλικά πράγματα τι ταρτίνεν λέσκι προσοχή. (2 Τιμ. 2:3, 4) Σαρ ο Τιμόθεος, αντικάς αμέν-ντα δεν πρέπει τι μουκχάς αμαρό νεαυτός τι μανγκέλ πιο μπουτ υλικά πράγματα. «Η ζορ ι λοβένγκι σο χουχαβέλα» ι τζενέν κα μπορίνελας τι κερέλ-αμέν τι τσσιναβάς τι μανγκάς ι Ιεχωβάς, μα τι εκτιμίνας ο Λάφι ι Ντεβλέσκο ντα μα τι μανγκάς αζόμ μπουτ τι βακεράς-λες γιαβερένγκε. (Ματθ. 13:​22) Πρέπει τι ατσσικιαράς απλή αμαρί ζωή ντα τι ντας αμαρέ σαατίσταρ ντα αμαρέ ζοριάταρ για τι “συνεχίνας τι μανγκάς πρώτα ι Βασιλεία”.​—Ματθ. 6:​22-25, 33.

17, 18. Σο μπορίνασα τι κεράς για μα τι αβέλ-πες αμένγκε πνευματικός ζιάνι;

¹⁷ Τι αβέν έτοιμοι τι κερέν κάτι σουγκό. Εκ στρατιώτης πρέπει τι τζανέλ σο κα κερέλ για τι αρακχαβέλ πι ζωή. Για τι αρακχαβάς ο πράγματα σο ντινάς-αμέν ο Ιεχωβά, πρέπει τι κεράς κάτι σουγκό κάνα ντικχάσα εκ κίνδυνος. Σο κα βοηθίνελ-αμέν τι κεράς κάτι σουγκό; Πρέπει τι τζανάς από πριν σο κα κεράς κάνα κα τθεράς ανγκλ’ αμέντε εκ κίνδυνος.

¹⁸ Για παράδειγμας, μπάζιμα, κάνα γκιντίντιβενα μπουτ τζενέ εκχέ τθανέστε, βακερένα λένγκε πιο τζανγκλέ τι ρόντεν τι αρακχέν ι πόρτα σο ισί πιο πασέ λέντε. Σόσκε; Για τι μπορίνεν τι νασέν σουγκό άμα κα αβέλ-πες κάτι. Αντικάς αμέν-ντα, μπορίνασα τι σικλιάς από ακανά κατάρ τι νασάς, σαρ τι βακεράας, άμα κα ντικχάς ξαφνικά κο Ίντερνετ, κο κινηματογράφος ή κι τηλεόραση κάτι λουμνικανό, άγρια πράγματα ή κάτι σο αβέλα κατά αποστάτες. Άμα κα ετοιμάνας-αμέν από ακανά, κα κεράς κάτι σουγκό για μα τι αβέλ-πες αμένγκε πνευματικός ζιάνι ντα για τι ατσσάς πάκι κο γιακχά κι Ιεχωβάσκε.​—Ψαλμ. 101:3· 1 Τιμ. 4:12.

19. Καλά ευλογίες κα τθεράς άμα κα αρακχαβάς ο πολύτιμα πράγματα σο ντινάς-αμέν ο Ιεχωβά;

¹⁹ Πρέπει τι αρακχαβάς ο πολύτιμα πράγματα σο ντινάς-αμέν ο Ιεχωβά​—ο αλήθειες ι Γραφιάκε ντα ο προνόμιος τι σικλιαράς-λεν γιαβερέντε. Άμα κεράσα-λες ανταβά, κα τθεράς πάκι συνείδηση, ζωή σο κα τθερέλ πραγματικός νόημας ντα ι χαρά τι βοηθίνας γιαβερέν τι σικλιόν ι Ιεχωβάς. Με τη βοήθεια λέσκι, κα μπορίνας τι αρακχαβάς ανταβά σο ντιντιλό-αμέν.​—1 Τιμ. 6:​12, 19.