1, 2. Σο σχέση τθερέλα ο εδάφιος Εκκλησιαστής 11:6 ι εργόσαρ;

ΜΕΡΙΚΕ τθεμέντε, ο τζενέ μανγκένα τι σικλιόν πιο μπουτ κάνα ασουνένα ο λατσσέ αμπέρια. Ισί οντουβά σο μπεκλεντίνενας τι ασουνέν! Γιαβερέ τθεμέντε, ο πιο μπουτ τζενέ να μανγκένα τι ασουνέν ι Ντεβλέσκε ή ι Γραφιάκε. Τουμαρέ τθεμέστε ασουνένα ο τζενέ; Είτε ασουνένα είτε όχι, ο Ιεχωβά μπεκλεντίνελα αμένταρ τι συνεχίνας τι βακεράς ο λατσσέ αμπέρια μέχρι τι βακερέλ βοβ ότι ο έργος αβιλό-πες.

² Κάνα κα αβέλ ο βακίτι ι Ιεχωβάσκο, ο έργος κα τελειώνελ ντα «κα αβέλ ο τέλος». (Ματθ. 24:​14, 36) Μέχρι αζομάν, σαρ μπορίνασα τι ντας καν κο λάφι: «Μα τι ατσσόλ το βας»; *​—Διαβάνεν Εκκλησιαστής 11:6.

3. Σο κα ντικχάς ανταλέ μαθημάστε;

³ Κο γιαβέρ μάθημας ντικχλάμ σταρ πράγματα σο χρειαζίντιβελα τι κεράς για τι αβάς λατσσέ «ψαράδες τζενένγκε». (Ματθ. 4:​19) Ανταλέ μαθημάστε, κα ντικχάς καλά τριν πράγματα κα κερέν-αμέν τι μανγκάς ατζέ πιο μπουτ τι βακεράς ο λατσσέ αμπέρια σαρ-ντα τι αβέν ο πράγματα αμαρέ ζωγιάτε. Κα σικλιάς σόσκε ισί σημαντικός (1) τι τσσουβάς ο έργος κι πρώτη θέση, (2) τι τθεράς υπομονή ντα (3) τι ατσσικιαράς ζουρανί αμαρί πίστη.

4. Σόσκε πρέπει τι τσσουβάς κι πρώτη θέση ο έργος σο ντινάς-αμέν ο Ιεχωβά;

⁴ Ο Ιησούς βακερντάς πι μαθητένγκε σαρ κα αβένας ο πράγματα κο τελευταία ντιβεσά. Τζανέλας ότι ανταλά πράγματα κα μπορίνενας τι κερέν-λεν μα τι τθερέν ο έργος κι πρώτη θέση. Βακερντάς πι μαθητένγκε «τι αβέν τζανγκαντέ». (Ματθ. 24:​ 42) Κο ντιβεσά κι Νωέσκε, ισινέ μπουτ πράγματα σο κερένας ι τζενέν μα τι ντεν σημασία λέσκε λαφίντε. Ασακέ πράγματα μπορεί τι κερέν αμέν-ντα αντιβές μα τι ντας σημασία. (Ματθ. 24:​37-39· 2 Πέτρ. 2:5) Άκ’ σόσκε μανγκάσα τι τσσουβάς κι πρώτη θέση ο έργος σο ντινάς-αμέν ο Ιεχωβά.

5. Καζόμ ντουρ κα βακέρντιβενας ο λατσσέ αμπέρια σαρ σικαβένα ο εδάφια Πράξεις 1:​6-8;

⁵ Αντιβές-ντα αξίνελα τι τσσουβάς κι πρώτη θέση ο έργος ι Βασιλειάκο. Ο Ιησούς βακερντάας ότι ανταβά έργος κα κερντιόλας σαρί κι πφουβ ντα κα συνεχίνελας τι αβέλ-πες ατζέ-ντα μπουτ μπρεσά σοράν λέσκε μεριμάσταρ. (Ιωάν. 14:​12) Κάνα μουλό ο Ιησούς, μερικοί λέσκε μαθητένταρ βουρτισάλε πουμαρέ μπουτιάτε. Αφού αναστισάλο, ο Ιησούς κερντάς εκ θαύμας ντα βοηθιντάς μερικέ μαθητέν τι ασταρέν μπουτέ ματσσέν. Σοράν ανταλέσταρ, ο Ιησούς βακερντάς ότι ο πιο σημαντικός σαρέ κατά γιαβερά μπουτιά ισινέ τι βακερέν ο λατσσέ αμπέρια ντα τι κερέν μαθητέν. (Ιωάν. 21:​15-17) Χάνικ πριν τι τζαλ κο ουρανός, ο Ιησούς βακερντάς πι μαθητένγκε ότι ο έργος σο κερντάας βοβ να κα κερντιόλας σάντε κο Ισραήλ αλλά μπουτέ γιαβερέ-ντα τθεμέντε. (Διαβάνεν Πράξεις 1:​6-8) Αφού νακχλέ μερικά μπρεσά, ο Ιησούς κερντάς ι απόστολε Ιωαννής τι ντικχέλ εκ φαντασία για τι σικαβέλ λέσκε σο κα αβέλας-πες «κο ντιβές κι Κυριόσκο». * Εκ κατά πράγματα σο ντικχλάς ο Ιωάννης ισινέ μπουτ εντυπωσιακός: Εκ άγγελος τθερέλας τι βακερέλ «λατσσέ αμπέρια σο κα ατσσόνας για πάντα . . . σαρέ κο τθεμά, κο φυλές, κο τσσιμπά ντα κο λαοί». (Αποκ. 1:​10· 14:6) Άρα, οντουβά σο μανγκέλα ο Ιεχωβά αμένταρ αντιβές ισί τι κεράς ανταβά έργος σο αβέλα-πες σαρί κι πφουβ μέχρι τι τελειώνελ.

6. Σαρ κα τσσουβάς ο έργος κι πρώτη θέση;

⁶ Τσσουβάσα ο έργος κι πρώτη θέση άμα ανάσα αμαρέ γκοντιάτε σαρέ οντουλά σο κερέλα ο Ιεχωβά για τι βοηθίνελ-αμέν.  Για παράδειγμας, ντέλα-αμέν μπουτ πνευματικός χαμπέ αντράλ κατά τυπωμέ ντα κατά ηλεκτρονικές εκδόσεις, κατά ηχογραφήσεις, κατά βίντεα ντα κατά εκπομπές σο ισί κο Ίντερνετ. Σκεφτίνεν ακαβά: Αμαρέ ιστοτοπόστε, τθεράσα πληροφορίες πιο μπουτ από 1.000 τσσιμπέντε! (Ματθ. 24:​45-47) Παρόλο σο ο ντουνιάς ισί τρουγιμέ επειδή ο τζενέ υποστηρίνενα διαφορετικά πολιτικά κόμματα, τθερένα διαφορετικές θρησκείες ντα μερικοί ισί χουλανέ ενώ γιαβερά νανέ, πιο μπουτ από οχτώ εκατομμύρια υπηρέτες ι Ντεβλέσκε ισί μπαγιά ενωμέ σαρ πφραλά. Για παράδειγμας, κι Παρασκευή 19 Απριλίου 2019, ο Μάρτυρες σαρό κο ντουνιάς ντικχλέ εκ βίντεος σο κερέλας λάφι για το εδάφιος ι ντιβεσέσκο. Οντιά ιράτ, 20.919.041 τζενέ γκιντίντιλε για τι ντεν-πες γκοντί ο μεριπέ ι Ιησούσκο. Ισί μπαρό προνόμιος τι ντικχάς τι αβέν-πες ανταλά σουκάρ πράγματα ντα τι συμμετεχίνας αμέν-ντα. Κάνα σκεφτίνασα-λεν ανταλά, μανγκάσα τι τσσουβάς ο έργος κι πρώτη θέση.

7. Σαρ βοηθίνελα-αμέν ο παράδειγμας ι Ιησούσκο τι τσσουβάς ο έργος κι πρώτη θέση;

⁷ Κάτι γιαβέρ σο βοηθίνελα-αμέν τι τσσουβάς ο έργος κι πρώτη θέση ισί τι κεράς οντουλά σο κερέλας ο Ιησούς. Βοβ να μουκχέλας τίποτα τι ταρτίνελ λέσκι προσοχή κατά έργος. (Ιωάν. 18:​37) Να χουχάντιλο κάνα ο Σατανάς σικαντάς λέσκε «σαρέ ο βασιλείες ι ντουνιάσκε ντα λένγκι δόξα», ούτε πελό κι παγίδα κάνα κάποιοι μανγκλέ τι κερέν-λες βασιλιάς. (Ματθ. 4:8, 9· Ιωάν. 6:​15) Να μανγκλάς τι αβέλ χουλάι, ούτε νταρασάλο κάνα ο γιαβερά τζάνας λέσαρ μπαρί κόντρα. (Λουκ. 9:​58· Ιωάν. 8:​59) Κάνα αμαρί πίστη δοκιμάντιβελα, κα τσσουβάς ο έργος κι πρώτη θέση άμα κα ανάς αμαρέ γκοντιάτε ι συμβουλή ι Παυλόσκι. Βοβ βακερντάς ι Χριστιανόνγκε τι κερέν οντουλά σο κερέλας ο Ιησούς για “μα τι κχινιόν ούτε τι μουκχέν-πες”!​—Εβρ. 12:3.

8. Σο κερένα ο τζενέ σο τθερένα υπομονή, ντα σόσκε ισί αζόμ σημαντική η υπομονή ακανά;

⁸ Ο τζενέ σο τθερένα υπομονή μπεκλεντίνενα μέχρι τι αλλάνεν ο πράγματα λένγκε ζωγιάτε. Χρειαζίντιβελα τι κεράς υπομονή μπουτέ πραγματένγκε. Μπορεί τι μανγκάσα τι τελειώνελ κάτι σο ζορισκιαρέλα-αμέν ή μπορεί τι μπεκλεντίνασα μπουτ καιρός τι αβέλ-πες κάτι λατσσό. Ο προφήτης Αββακούμ μανγκέλας τι τελειώνεν ο μπέτι πράγματα σο αβένας-πες κο Ιούδας. (Αββακ. 1:2) Ο μαθητές ι Ιησούσκε μπεκλεντίνενας ότι η Βασιλεία κα αβέλας-πες αζομάν ντα ότι κα σώνελας-λεν κατά Ρωμαίοι. (Λουκ. 19:​11) Αμέν μπεσάσα σαρ σαρ τι αβέλ ο ντιβές σο η Βασιλεία ι Ντεβλέσκι κα νασκιαρέλ ο πφιρνιπέ ντα κα ανέλ ο νεβό ντουνιάς σο κα αβέλ πφερντό δικαιοσύνη. (2 Πέτρ. 3:​13) Όμως, χρειαζίντιβελα τι μπεκλεντίνας με υπομονή ι Ιεχωβάσκε ντιβεσέσκε. Ντικχέν σαρ σικλιαρέλα-αμέν ο Ιεχωβά τι τθεράς υπομονή.

9. Καλά παραδείγματα σικαβένα ότι ο Ιεχωβά τθερέλα υπομονή;

⁹ Ο Ιεχωβά σικαβέλα αμένγκε πι τέλειε παραδειγμάσαρ σαρ τι κεράς υπομονή. Ντινάς κο Νώε μπερεκέτι χρόνος για τι κερέλ ι κιβωτός ντα για τι “κερέλ λάφι για το δίκαια πράγματα ι Ντεβλέσκε”. (2 Πέτρ. 2:5· 1 Πέτρ. 3:​20) Ασουνέλας προσεκτικά καζόμ ο Αβραάμ πουτσέλας-λες παλάλ γιαβερέστε για την απόφαση Λέσκι τι κερέλ καταστροφή ι πφιρνέ τζενέν σο μπεσένας κο Σόδομα ντα κο Γόμορρα. (Γέν. 18:​20-33) Για μπουτ μπρεσά, ο Ιεχωβά κερέλας μπαρί υπομονή ι Ισραηλιτέντζαρ σο να ατσσιλέ πιστοί. (Νεεμ. 9:​30, 31) Αντιβές, ντικχάσα λέσκι υπομονή επειδή ντέλα σαρέ κο τζενέ σο μανγκένα τι αβέν λέσκε αμαλά μπερεκέτι χρόνος για «τι μετανιώνεν». (2 Πέτρ. 3:9· Ιωάν. 6:​44· 1 Τιμ. 2:3, 4) Κατά παράδειγμας ι Ιεχωβάσκο αγαβάσα ότι αμέν-ντα τθεράσα λόγους τι κεράς υπομονή καζόμ βακεράσα ντα σικλιαράσα ο λατσσέ αμπέρια. Ο Ιεχωβά  σικλιαρέλα-αμέν ανταβά πράγμας αντράλ εκχέ παραδειγμάσταρ-ντα σο ισί λέσκε Λαφίστε.

10. Σο σικλιάσα κατά γεωργός σαρ ντικχάσα κο εδάφια Ιακώβου 5:7, 8;

¹⁰ Διαβάνεν Ιακώβου 5:7, 8. Ο παράδειγμας ι τζενέσκο σο ισί γεωργός σικλιαρέλα-αμέν ι υπομονή. Ισί μπαγιά ότι κάποια φυτά μπαριόνα σουγκό. Ο πιο μπουτ όμως, ειδικά οντουλά σο νικαβένα καρπός, μανγκένα πιο μπουτ χρόνος για τι μπαριόν. Για τι μπαριόν ο καρποί κο Ισραήλ, νακχένας σιοβ μασεκά. Ο γεωργός σπειρίνελας σοράν κατά πρώτα μπρισιμά κο φθινόπωρος ντα γκίντελας οντουλά σο νικιόνας σοράν κατά τελευταία μπρισιμά κι άνοιξη. (Μάρκ. 4:​28) Κα αβάς γκοντιαβέρ άμα κεράσα υπομονή σαρ ο γεωργός. Σίγουρα, ανταβά μπορεί μα τι αβέλ εύκολος.

11. Σαρ βοηθίνελα-αμέν η υπομονή κο έργος;

¹¹ Μπουτ φαρ, ο ατελείς τζενέ μανγκένα τι ντικχέν σουγκό ο αποτελέσματα πουμαρέ μπουτιάκε. Άμα όμως μανγκάσα αμαρό μπαχτσές τι νικαβέλ καρπός, πρέπει τι φροντίνας-λες συνέχεια. Πρέπει τι χαντζουβάς, τι φυτίνας, τι τσσινάς ο τσαριά ντονταλάι ντα τι ποτίνας. Αντικάς πρέπει τι μαράς-αμέν άμα μανγκάσα τι κεράς μαθητέν-ντα. Χρειαζίντιβελα χρόνος για τι βοηθίνας οντουλέν σο κεράσα-λεν μελέτη τι νικαβέν οπρά-πουμένταρ ο λάθος πράγματα σο πακιάνα ι γιαβερένγκε ντα τι σικαβέν αγάπη. Η υπομονή κα βοηθίνελ-αμέν μα τι χασαράς αμαρί ζορ κάνα ο τζενέ να ασουνένα-αμέν. Αλλά πρέπει τι τθεράς υπομονή ατζέ-ντα κάνα ο τζενέ μανγκένα τι ασουνέν ντα τι σικλιόν. Ναστί τσσουβάσα ζορίσαρ εκχέ τζενές τι μπαριαρέλ πι πίστη. Μπάζιμα, ατζέ-ντα ο μαθητές ι Ιησούσκε να αγαβένας σουγκό οντουλά σο σικλιαρέλας-λεν. (Ιωάν. 14:9) Τι τθεράς αμαρέ γκοντιάτε ότι αμέν μπορεί τι σπειρίνασα ντα τι ποτίνασα, αλλά ο Ντεβέλ κερέλα-λες τι μπαριόλ.​—1 Κορ. 3:6.

12. Σαρ μπορίνασα τι σικαβάς υπομονή κάνα κεράσα λάφι ι Ντεβλέσκε αμαρέ τζενέντζαρ σο νανέ Μάρτυρες;

¹² Μπορεί τι αβέλ αμένγκε δύσκολος τι  τθεράς υπομονή κάνα κεράσα λάφι ι Ντεβλέσκε αμαρέ τζενέντζαρ σο νανέ Μάρτυρες. Ανταλέστε μπορεί τι βοηθίνελ-αμέν η συμβουλή σο ισί κο εδάφια Εκκλησιαστής 3:1, 7: «Ισί βακίτι μα τι κερέλ λάφι εκ τζενό ντα βακίτι τι κερέλ λάφι». Ι λατσσέ πραγματέντζαρ σο κεράσα μπορίνασα τι βοηθίνας αμαρέ τζενέν τι μανγκέν τι ασουνέν-αμέν. Αλλά ισινάμ πάντα τζανγκαντέ για μα τι χασαράς καέκ ευκαιρία τι κεράς λάφι ι αληθειάκε. (1 Πέτρ. 3:1, 2) Τθεράσα υπομονή σαριλέντζαρ, αμαρέ τζενέντζαρ-ντα, καζόμ βακεράσα ντα σικλιαράσα ο λατσσέ αμπέρια αντράλ αμαρέ γκίσταρ.

13, 14. Καλέ τζενέντε σο τθερένα υπομονή μπορίνασα τι μοιάζας;

¹³ Σικλιάσα μπουτ πράγματα κατά υπομονή πιστέ τζενένγκι σο ισί κι Γραφή αλλά κατά τζενένγκι-ντα σο ισί αμαρέ ντιβεσέντε. Ο Αββακούμ μπεσέλας σαρ σαρ τι νασέλ ο πφιρνιπέ, αλλά βακερντάς με σιγουριά: «Μι σκοπιάτε κα αβάβ». (Αββακ. 2:1) Ο απόστολος Παύλος βακερντάς ότι μανγκέλας τι “τελειώνελ” πο έργος. Όμως, συνεχιντάς με υπομονή “τι βακερέλ ο λατσσέ αμπέρια καζόμ πιο μπουτ ντα πιο λατσσές αβέλα-πες”.​—Πράξ. 20:24.

¹⁴ Ντικχέν ο παράδειγμας εκχέ αντρογυνόσκο σο νακχλάς ι Σχολή Γαλαάδ ντα μπουτσσάντιλο εκχέ τθεμέστε σο νανέ μπουτ πφραλά ντα ο πιο μπουτ τζενέ οτθέ νανέ Χριστιανοί. Σάντε χάνικ τζενέ μανγκένας τι κερέν μελέτη. Όμως, οντουλά σο νακχλέ λέντζαρ ι Γαλαάδ ντα υπηρετίνενας γιαβερέ τθεμέντε βακερένας λένγκε καζόμ τζενέν κερένας μελέτη ντα καζομέν βοηθίνενας τι αβέν Μάρτυρες. Αλλά ο αντρόγυνος να τσσιναντάς τι κερέλ έργος παρόλο σο ο πιο μπουτ τζενέ οτθέ να μανγκένας τι ασουνέν. Αφού κερένας έργος οχτώ μπρεσά εκχέ τθανέστε σο ντικχίντιβελας ότι ο τζενέ να μανγκένας τι ασουνέν, χαιρισάλε σο ντικχλέ εκχέ τζενιά σο κερένας-λα μελέτη τι μπολντιόλ. Σο σικλιάσα κατά τζενέ σο βακερέλα λένγκε η Γραφή ντα κατά τζενέ αμαρέ ντιβεσέντε; Ανταλά πιστά τζενέ να τσσιναντέ τι κερέν έργος ούτε ατσσιλό λένγκο βας, ντα ο Ιεχωβά ευλογιντάς-λεν σο κερντέ υπομονή. Οντουλέσκε, τι μοιάζας «οντουλέντε σο τθερένα πίστη ντα υπομονή, ντα οτθάρ λένα ο υποσχέσεις».​—Εβρ. 6:​10-12.

15. Σαρ κερέλα-αμέν η πίστη τι μανγκάς ατζέ πιο μπουτ τι βακεράς ο λατσσέ αμπέρια;

¹⁵ Πακιάσα ο λατσσέ αμπέρια σο βακεράσα, οτθάρ μανγκάσα τι βακεράς-λεν καζόμ πιο μπουτ τζενέντε αβέλα-πες. Τθεράσα εμπιστοσύνη κο υποσχέσεις σο αρακχάσα κο Λάφι κι Ντεβλέσκο. (Ψαλμ. 119:​42· Ησ. 40:8) Ντικχλάμ προφητείες αντράλ κατά Γραφή τι νικιόν μπαγιά αμαρέ ντιβεσέντε. Ντικχλάμ τζενέν τι κερέν πιο λατσσί πουμαρί ζωή κάνα αρχίνενα τι κερέν ο συμβουλές ι Γραφιάκε. Ανταλά πράγματα κερένα-αμέν τι αβάς ατζέ πιο σίγουροι ότι σαρέ ο τζενέ πρέπει τι ασουνέν ο λατσσέ αμπέρια ι Βασιλειάκε.

16. Καζόμ τθερένα τουμαρέ γκοντιάτε ο εδάφια Ψαλμός 46:​1-3, βακερέν σαρ αμαρί πίστη κο Ιεχωβά ντα κο Ιησούς κερέλα-αμέν τι μανγκάς ατζέ πιο μπουτ τι βακεράς ο λατσσέ αμπέρια.

¹⁶ Επίσης πακιάσα κο Ιεχωβά, Οντουλέστε σο λέσταρ αβένα ο λατσσέ αμπέρια, ντα κο Ιησούς, σο ο Ιεχωβά τσσουντάς-λες Βασιλιάς κι Βασιλεία. (Ιωάν. 14:1) Σαρ-ντα τι αβέν ο πράγματα αμαρέ ζωγιάτε, ο Ιεχωβά κα αβέλ πάντα αμαρό καταφύγιος ντα αμαρί ζορ. (Διαβάνεν Ψαλμός 46:​1-3) Επίσης, ισινάμ σίγουροι ότι ο Ιησούς χρησιμοποιήνελα ι ζορ ντα ι εξουσία σο ντινάς-λες ο Ιεχωβά για τι οδηγίνελ κατά ουρανός ο έργος σο κεράσα.​—Ματθ. 28:​18-20.

17. Βακερέν εκ παράδειγμας σο σικαβέλα σόσκε πρέπει τι συνεχίνας τι κεράς έργος.

¹⁷ Η πίστη κερέλα-αμέν τι αβάς πιο σίγουροι ότι ο Ιεχωβά κα ευλογίνελ αμαρέ προσπάθειες, μπάζιμα τροπόντζαρ σο να μπεκλεντίνασα-λεν. (Εκκλ. 11:6) Για παράδειγμας,  κάθε ντιβές χιλιάδες τζενέ νακχένα ανγκλάλ κατά πάγκους ντα κατά σταντ σο τθερένα αμαρέ έντυπα. Ισί ανταβά εκ λατσσό τρόπος για τι κεράς έργος; Βα! Η Διακονία μας της Βασιλείας Νοέμβριος 2014 βακερέλας ι εμπειρία εκχέ τερνέ πφενιάκι σο τζάλας κο πανεπιστήμιος ντα μανγκέλας τι γραφίνελ εκ εργασία σο κα βακερέλας ι Ιεχωβάσκε Μαρτυρένγκε. Ναστί αρακχλάς εκ Αίθουσα Βασιλείας, αλλά κο πανεπιστήμιος αρακχλάς εκ πάγκος σο τθερέλας αμαρέ έντυπα, ντα αντικάς αρακχλάς σαρέ ο πληροφορίες σο χρειαζίντιβελας για τι γραφίνελ πι εργασία. Τελικά, μπολντιλί σαρ Μάρτυρας ι Ιεχωβάσκι ντα ακανά ισί τακτική σκαπάνισσα. Ασακέ εμπειρίες βοηθίνενα-αμέν μα τι τσσιναβάς τι κεράς έργος, επειδή σικαβένα ότι ατζέκ ατζέκ ισί τζενέ σο πρέπει τι ασουνέν ο λατσσέ αμπέρια ι Βασιλειάκε.

18. Σόσκε ισινάμ σίγουροι ότι ο έργος κα τελειώνελ αντικάς σαρ μανγκέλα ο Ιεχωβά;

¹⁸ Μπορίνασα τι αβάς σίγουροι ότι ο έργος κα τελειώνελ κο σωστός σαάτι. Ανέν τουμαρέ γκοντιάτε σο αβιλό-πες κο ντιβεσά κι Νωέσκε. Ο Ιεχωβά σικαντάς ότι πάντα κερέλα ο πράγματα κο σωστός σαάτι. Περίπου 120 μπρεσά πριν τι αβέλ ο Κατακλυσμός, βακερντάς κάνα ακριβώς κα αρχίνελας. Μπουτ μπρεσά πιο σοράν, βακερντάς κο Νώε τι κερέλ ι κιβωτός. Περίπου 40 με 50 μπρεσά πριν τι αβέλ ο Κατακλυσμός, ο Νώε συνεχιντάς τι κερέλ μπουτ μπουτί. Παρόλο σο ο τζενέ να ασουνένας-λες, να τσσιναντάς τι προειδοποιήνελ-λεν μέχρι σο ο Ιεχωβά βακερντάς ότι αβιλόας ο σαάτι τι τσσουβέλ ο ζώα κι κιβωτός. Αζομάν, κο σωστός σαάτι, «ο Ιεχωβά πφαντάς ι πόρτα».​—Γέν. 6:3· 7:1, 2, 16.

19. Καλέ πραγματένγκε μπορίνασα τι μπεκλεντίνας άμα να μουκχλάμ αμαρό βας τι ατσσόλ;

¹⁹ Ατζεχάνικ ο Ιεχωβά κα βακερέλ αμένγκε τι τσσιναβάς τι βακεράς ο λατσσέ αμπέρια ι Βασιλειάκε. Κα “πφάντελ ι πόρτα”, σαρ τι βακεράας, κο ντουνιάς κι Μπενγκέσκο ντα κα ανέλ εκ δίκαιος νεβό ντουνιάς. Μέχρι αζομάν, τι μοιάζας κο Νώε, κο Αββακούμ ντα γιαβερέντε σο να μουκχλέ πουμαρό βας τι ατσσόλ. Τι τσσουβάς κι πρώτη θέση ο έργος, τι τθεράς υπομονή ντα τι ατσσικιαράς ζουρανί πίστη κο Ιεχωβά ντα κο υποσχέσεις λέσκε.