Ανταβά εδάφιος βακερέλα: «Άμα κα ντικχές τι ζορισκιαρέν ι τσορορέν ντα μα τι κερέν τι τθεμέστε ο πράγματα σωστά ντα με δικαιοσύνη, μα τι σαστίνες. Σόσκε ανταλέ αρχοντάς ντικχέλα-λες εκ γιαβέρ σο ισί πιο οπρέ λέσταρ, ντα ισί γιαβερά σο ισί ατζέ πιο οπρέ λένταρ».​—Εκκλ. 5:8.

Μπουτ τζενέ κα βακερένας ότι ανταβά εδάφιος κερέλα λάφι σάντε ι τζενένγκε σο τθερένα εξουσία. Εκτός ανταλέσταρ όμως, βακερέλα αμένγκε εκ αλήθεια-ντα ι Ιεχωβάσκε σο λοκχιαρέλα αμαρό γκι.

Ο εδάφιος Εκκλησιαστής 5:8 κερέλα λάφι εκχέ αρχοντάσκε σο ζορισκιαρέλα ι τσορορέν ντα νανέ δίκαιος. Ανταβά άρχοντας πρέπει τι ντελ-πες γκοντί ότι μάλλον ντικχέλα-λες εκ γιαβέρ σο τθερέλα πιο μπαρί θέση ή πιο μπαρί εξουσία λέσταρ. Ντα μπορεί τι ισί γιαβερά-ντα σο τθερένα ατζέ πιο μπαρέ θέσεις. Δυστυχώς, σαρέ ανταλά άρχοντες σο κυβερνίνενα μπορεί τι ισί μπουτ πφιρνέ, ντα ο τζενέ νακχένα μπουτ δυσκολίες σαρέ ανταλέ άδικε πραγματένταρ.

Όμως, ατζέ-ντα άμα ντικχίντιβελα ότι ο πράγματα να τζάνα λατσσές, λοκχιόλα αμαρό γκι σο τζανάσα ότι ο Ιεχωβά “ντικχέλα ι αρχοντέν” σο κυβερνίνενα ι τζενέν. Μπορίνασα τι μολίνας ι Ντεβλές τι βοηθίνελ-αμέν ντα τι μουκχάς λέστε ο πφαριπέ σο βάντασα. (Ψαλμ. 55:​22· Φιλιπ. 4:6, 7) Τζανάσα ότι «ο γιακχά ι Ιεχωβάσκε ντικχένα σαρί ι πφουβ για τι βοηθίνελ πι ζοριάσαρ οντουλέν σο υπηρετίνενα-λες σαρέ πουμαρέ γκίσαρ».​—2 Χρον. 16:9.

Άρα, ο εδάφιος Εκκλησιαστής 5:8 ανέλα αμαρέ γκοντιάτε ι ντουνιάς σο τζουβντιάσα ντα ότι πάντα υπαρχίντιβελα κάποιος σο τθερέλα πιο μπαρί εξουσία. Ο πιο σημαντικός ισί ότι ο εδάφιος βοηθίνελα-αμέν τι σκεφτίνας ότι ο Ιεχωβά τθερέλα ι πιο Μπαρί Εξουσία σαριλένταρ. Ακανά κυβερνίνελα αντράλ πι Τσσαβέσταρ, κατά Ιησούς Χριστός, σο ισί Βασιλιάς κι Βασιλεία. Ο πιο Ζουρανό, σο ντικχέλα-λεν σαριλέν, ισί δίκαιος σο-ντα κερέλα, ντα αντικάς ισί λέσκο Τσσαβό-ντα.