1. Κάνα μπορεί τι αβέλ δύσκολος τι υπηρετίνας ι Ιεχωβάς;

ΚΑΝΑ πακιάνα ότι ισί πιο δύσκολος τι υπηρετίνεν ι Ιεχωβάς; Κάνα τθερένα προβλήματα τουμαρέ ζωγιάτε ή κάνα να τθερένα; Κάνα τθεράσα προβλήματα, ισί αμένγκε εύκολος τι ντας μπέσα κο Ιεχωβά. Σο κεράσα όμως κάνα τζάνα λατσσές ο πράγματα αμαρέ ζωγιάτε; Μήπως αζομάν μπιστράσα-αμέν ντα να τσσουβάσα κι πρώτη θέση ι υπηρεσία ι Ντεβλέσκι; Ο Ιεχωβά βακερντάας κο Ισραηλίτες ότι κα μπορίνελας τι αβέλ-πες ανταβά.​—Δευτ. 6:​10-12.

2. Σο παράδειγμας μουκχλάς ο βασιλιάς Ασά;

² Ο βασιλιάς Ασά ισί μπουτ λατσσό παράδειγμας τζενέσκο σο κερντάς πράγματα γκοντιάσαρ ντα ντέλας μπαρί μπέσα κο Ιεχωβά. Υπηρετίνελας ι Ιεχωβάς όχι σάντε κάνα ισινέ δυσκολίες αλλά κάνα ισινέ ειρήνη-ντα. Κατά πρώτα μπρεσά πι ζωγιάκε, «υπηρετίνελας ι Ιεχωβάς σαστέ γκίσαρ». (1 Βασ. 15:​14) Ο Ασά σικαντάς ότι τθερέλας σαστό γκι κο Ιεχωβά κάνα κερντάς καταστροφή σαρέ ο πράγματα κο Ιούδας σο τθερένας τι κερέν ι ψεύτικε ντεβλέντζαρ. Η Γραφή βακερέλα ότι «καταστραφιντάς ο θυσιαστήρια ι γιαβερέ ντεβλένγκε ντα ο βουτσσέ τθανά, πφανγκλάς ο ιερές στήλες ντα τσσιντάς ο ιερές κολόνες». (2 Χρον. 14:3, 5) Παλντιντάς ατζέ-ντα πι μπαμπά, ι Μααχά, κατά θέση σο τθερέλας σαρ ντάι ι βασιλιάσκι. Σόσκε κερντάς-λες ανταβά; Επειδή η Μααχά βακερέλας  ι τζενένγκε τι ντεν λατρεία εκ είδωλος.​—1 Βασ. 15:​11-13.

3. Σο κα ντικχάς ανταλέ μαθημάστε;

³ Ο Ασά, όχι σάντε νασκιαρντάς ι ψεύτικη θρησκεία, αλλά βοηθιντάς-ντα ι λαός τι βουρτίνελ κο Ιεχωβά. Ο Ιεχωβά ευλογιντάς εμ λες εμ ι Ισραηλιτέν κάνα ντινάς-λεν ειρήνη. * Για ντες μπρεσά, καζόμ ισινέ βασιλιάς ο Ασά, «οντουβά τθεμ να τθερέλας προβλήματα». (2 Χρον. 14:1, 4, 6) Ανταλέ μαθημάστε, κα ντικχάς σο κερντάς ο Ασά κάνα ισινέ ειρήνη. Σοράν κα ντικχάς ο παράδειγμας ι πρώτε Χριστιανόνγκο σο κερντέ πράγματα γκοντιάσαρ κάνα ισινέ ειρήνη σαρ κερντάς ο Ασά-ντα. Κο τέλος, κα απαντίνας κι ερώτηση: Άμα τουμαρέ τθεμέστε ντένα λατρεία ι Ιεχωβάς ελεύθερα, σο μπορίνενα τι κερέν ακανά σο ο πράγματα τζάνα λατσσές;

4. Σο κερντάς ο Ασά κάνα ισινέ ειρήνη σαρ βακερένα ο εδάφια 2 Χρονικών 14:2, 6, 7;

⁴ Διαβάνεν 2 Χρονικών 14:2, 6, 7. Ο Ασά βακερντάς κο λαός ότι ο Ιεχωβά ισινέ οντουβά σο “ατσσικιαρντάς ντουρ σαρέ λένγκε ντουσμανίν”. Ο Ασά να πακιάλας ότι, επειδή ισινέ ειρήνη, έπρεπε τι μπεσέν πέσκε. Αλλά αρχισάλο τι κερέλ πόλεις, μπαρέ ντουβάρια, πύργοι ντα μπαρέ πόρτες. Βακερντάς κο λαός: «Ο τθαν ισί ατζέκ αμαρό». Σο μανγκέλας τι βακερέλ ο Ασά; Ότι μπορίνενας τι τζαν κάι μανγκένας κο τθεμ σο ντινάας-λεν ο Ντεβέλ ντα τι κερέν ανταλά μπουτιά χωρίς τι τζαν λέντζαρ κόντρα λένγκε ντουσμάνια. Βακερντάς κο λαός τι κερέλ πράγματα γκοντιάσαρ κο ντιβεσά σο ισινέ ειρήνη.

5. Σόσκε ο Ασά κερντάς πιο ζουρανό πι στρατός;

⁵ Επίσης κάνα ισινέ ειρήνη, ο Ασά κερντάς πι στρατός πιο ζουρανό. (2 Χρον. 14:8)  Μανγκέλα τι σικαβέλ ανταβά ότι να ντέλας μπέσα κο Ιεχωβά; Νάα. Σικαβέλας ότι τζανέλας ι ευθύνη σο τθερέλας σαρ βασιλιάς τι ετοιμάνελ ι λαός ι προβληματένγκε σο κα αβένας. Ο Ασά τζανέλας ότι η ειρήνη σο τθερέλας ο Ιούδας να κα ατσσικιαρέλας για πάντα, ντα αντικάς αβιλό-πες.

6. Σο κερντέ ο πρώτοι Χριστιανοί κάνα ισινέ ειρήνη;

⁶ Παρόλο σο μπουτ φαρ ο τζενέ τζάνας κόντρα κο πρώτοι Χριστιανοί, ισινέ ντιβεσά σο τθερένας ειρήνη-ντα. Σο κερένας αζομάν; Οντουλά πιστά μουρσά ντα τζουβλιά βακερένας ο λατσσέ αμπέρια σαρέ πουμαρέ γκίσαρ ντα τσσουβένας κι πρώτη θέση ι υπηρεσία ι Ιεχωβάσκι. Οτθάρ, αβγατίντιβενας. Ανταβά σικαντάς ότι ο Ιεχωβά ευλογιντάς ο έργος σο κερένας σαρέ πουμαρέ γκίσαρ κάνα ισινέ ειρήνη.​—Πράξ. 9:​26-31.

7, 8. Σο κερντάς ο Παύλος ντα γιαβερά κάνα τθερένας ι ευκαιρία; Εξηγίνεν.

⁷ Ο πρώτοι Χριστιανοί κερένας έργος κάνα-ντα τι αρακχένας ευκαιρία. Για παράδειγμας, κάνα ο απόστολος Παύλος αγαντάς ότι μπορίνελας τι κερέλ έργος μπουτέ τζενέντε κι Έφεσος, καπτιντάς ι ευκαιρία τι κερέλ έργος ντα μαθητέν οτθέ.​—1 Κορ. 16:8, 9.

⁸ Επίσης, ο Παύλος ντα γιαβερά Χριστιανοί μπορισάλε τι κερέν έργος μπουτέ τζενέντε κο 49 Κ.Χ. κάνα ο απόστολοι ντα ο πρεσβύτεροι κι Ιερουσαλήμ αποφασιντέ σο κα αβέλας-πες με την περιτομή. (Πράξ. 15:​23-29) Κάνα βακερντέ κο κχανγκιριά ι απόφαση, ο Χριστιανοί κερντέ μπαρί προσπάθεια για τι “βακερέν ο λατσσέ αμπέρια ι Ιεχωβάσκε λαφίνγκε”. (Πράξ. 15:​30-35) Σο αβιλό-πες; Η Γραφή βακερέλα ότι «ο κχανγκιριά συνεχίνενας τι αβέν πιο σταθερά κι πίστη ντα τι αβγατίντιβεν κάθε ντιβές».​—Πράξ. 16:4, 5.

9. Σο αβέλα-πες μπουτέ τθεμέντε αντιβές, ντα σο μπορίνασα τι πουτσάς-αμέν;

⁹ Αντιβές, μπουτέ τθεμέντε κεράσα έργος χωρίς τι τζαν αμέντζαρ κόντρα. Μήπως οτθέ σο τζουβντιόνα ισινέν ελεύθεροι τι ντεν λατρεία ι Ντεβλές; Άμα βα, πουτσέν-τουμέν: “Σο κεράβα ακανά σο τθεράβα ελευθερία;” Ανταλέ τελευταίε ντιβεσέντε, ο υπηρέτες ι Ιεχωβάσκε τθερένα τι κερέν ο πιο μπαρό έργος σο κερντιόλα ανταλέ ντουνιάστε, τι βακερέν ντα τι σικλιαρέν ο λατσσέ αμπέρια. (Μάρκ. 13:​10) Ο λαός ι Ντεβλέσκο τθερέλα τι κερέλ μπουτ πράγματα ανταλέ εργόστε.

10. Σο βακερέλα αμένγκε τι κεράς ο εδάφιος 2 Τιμόθεο 4:2;

¹⁰ Σο μπορίνενα τι κερέν κάνα ισί ειρήνη; (Διαβάνεν 2 Τιμόθεο 4:2) Σκεφτίνεν άμα μπορίνενα τουμέν ή εκ γιαβέρ τζενό τουμαρέ φαμιλιάταρ τι κερέν πιο μπουτ έργος ή ατζέ-ντα σκαπανικός. Ακανά νανέ βακίτι τι κεράς λοβέ ή τι γκίντας μπουτ πράγματα σο ναστί κα λας-λεν παλ’ αμέντε κάνα κα νακχάς κατά μπαρί στεναχώρια.​—Παρ. 11:4· Ματθ. 6:​31-33· 1 Ιωάν. 2:​15-17.

11. Σο κερντέ μπουτ πφραλά για τι βακερέν ο λατσσέ αμπέρια καζόμ πιο μπουτ τζενένγκε αβέλα-πες;

¹¹ Μπουτ πφραλά σικλιλέ εκ νεβί τσσιπ για τι βακερέν ο λατσσέ αμπέρια ντα τι σικλιαρέν γιαβερέ τζενέν. Η οργάνωση ι Ντεβλέσκι νικαβέλα εκδόσεις για τι βοηθίνελ-αμέν τι κεράς έργος ατζέ πιο μπουτ τσσιμπέντε. Για παράδειγμας, κο 2010 αμαρέ εκδόσεις ισινέ περίπου 500 τσσιμπέντε. Ακανά, ισί πιο μπουτ από 1.000 τσσιμπέντε!

12. Σαρ βοηθίντιβενα ο τζενέ κάνα ασουνένα ο αμπέρια ι Βασιλειάκε πουμαρέ τσσιμπάτε; Βακερέν εκ παράδειγμας.

¹² Σαρ νιωθίνενα ο τζενέ κάνα ασουνένα ι Ιεχωβάσκε πουμαρέ τσσιμπάτε; Ντικχέν ι εμπειρία εκχέ πφενιάκι σο βοηθίντιλι εκχέ περιφερειακέ συνελευσιάταρ σο αβιλί-πες  κο Ηνωμένες Πολιτείες της Αμερικής. Η συνέλευση αβιλί-πες κι τσσιπ κινιαρουάντα, σο κερντιόλα λάφι πιο μπουτ κι Ρουάντα, κο Κονγκό (Κινσάσα) ντα κι Ουγκάντα. Σοράν κατά συνέλευση, ανταγιά πφεν βακερντάς: «Πρώτη φαρ αγαντόμ ντιπ εκ συνέλευση από αζομάν σο αβιλόμ τι μπεσάβ κο Ηνωμένες Πολιτείες πριν από 17 μπρεσά». Ντικχίντιβελα ότι οντουλά σο ασουντάς πι τσσιμπάτε κι συνέλευση ερεσλέ λάκε γκίστε. Άμα αβέλα-πες, μήπως μπορίνενα τι σικλιόν εκ γιαβέρ τσσιπ για τι βοηθίνεν μερικέ τζενέν οτθέ σο μπεσένα; Μήπως μερικά τζενέ οτθέ σο κερέλα έργος τουμαρί κχανγκιρί κα μανγκένας τι ασουνέν ο λατσσέ αμπέρια άμα κα κερένας λέντζαρ λάφι λένγκε τσσιμπάτε; Τουμαρέ προσπάθειες κα ανέν τουμένγκε μπαρί χαρά.

13. Σο κερντέ αμαρέ πφραλά κι Ρωσία κάνα ισινέ ειρήνη;

¹³ Ναστί κερένα σαρέ ο πφραλά έργος ελεύθερα. Μερικέ τθεμέντε, ο κυβερνήσεις τσσιναντέ αμαρό έργος. Σκεφτίνεν για παράδειγμας ι πφραλέν κι Ρωσία. Ο τζενέ τζάνας λέντζαρ κόντρα μπουτ μπρεσά, αλλά κο Μάρτιος 1991, αρχισάλε τι ντεν λατρεία ελεύθερα. Αζομάν ισινέ περίπου 16.000 Μάρτυρες κι Ρωσία. Είκοσι μπρεσά σοράν, αβιλέας 160.000 ντα πιο μπουτ! Αγαβάσα ότι αμαρέ πφραλά κερντέ πράγματα γκοντιάσαρ καζόμ τθερένας ι ευκαιρία τι κερέν έργος αζομάν σο να τζάνας λέντζαρ κόντρα. Οντιά ειρήνη να ατσσικιαρντάς. Αλλά παρόλο σο αλλαξάλε ο πράγματα οντουλέ τθεμέστε, βον συνεχίνενα τι αβέν πιστοί κο Ιεχωβά ντα τι κερέν έργος αντράλ πουμαρέ γκίσταρ. Ατζέκ ατζέκ κερένα σο νακχέλα λένγκε βαστένταρ για τι υπηρετίνεν-λες.

14, 15. Σαρ χρησιμοποιηντάς ο Ιεχωβά πι ζορ για τι ντελ βοήθεια κο Ασά;

¹⁴ Καζόμ τζουβντιόλας ο Ασά, η ειρήνη να  ατσσικιαρντάς για πάντα. Εκ μπαρό στρατός σο ισινέ εκ εκατομμύριος στρατιώτες αβιλό κατά Αιθιοπία. Λέσκο διοικητής, ο Ζερά, ισινέ σίγουρος ότι βοβ ντα λέσκο στρατός κα νικίνενας ι Ιουδαιόν. Αλλά ο βασιλιάς Ασά ντινάς μπέσα κο Ιεχωβά. Ο Ασά προσευχισάλο: «Βοήθινε-αμέν, Ιεχωβά, τούι σο ισινάν αμαρό Ντεβέλ, επειδή στηρίντιβασα τούτε ντα πολεμίνασα σαρέ οντουλέ τζενέν τι ναβέστε».​—2 Χρον. 14:11.

¹⁵ Παρόλο σο ο στρατός σο τθερένας ο Αιθίοπες ισινέ περίπου ντούι φαρ πιο μπαρό, ο Ασά τζανέλας ότι ο Ιεχωβά ισινέ ζουρανό ντα μπορίνελας τι βοηθίνελ πι λαός. Ντα ο Ιεχωβά βοηθιντάς πι λαός. Ο Αιθίοπες χασαρντέ.​—2 Χρον. 14:​8-13.

16. Σαρ τζανάσα ότι η ειρήνη σο τθεράσα ακανά να κα ατσσικιαρέλ;

¹⁶ Παρόλο σο να τζανάσα ντιπ σο κα αβέλ-πες κο κάθε εκ αμένταρ, τζανάσα ότι η ειρήνη σο τθεράσα ακανά να κα ατσσικιαρέλ. Ντεν-τουμέν γκοντί ότι ο Ιησούς βακερντάας ότι κο τελευταία ντιβεσά “σαρό ο ντουνιάς κα μισίνελας” λέσκε μαθητέν. (Ματθ. 24:9) Ο απόστολος Παύλος-ντα βακερντάς ότι “κα τζαν κόντρα σαρέ οντουλέ τζενέντζαρ σο μανγκένα τι αβέν αφοσιωμέ κο Ντεβέλ ντα τζουβντιόνα σαρ μανγκέλα ο Χριστός Ιησούς”. (2 Τιμ. 3:​12) Ο Μπενγκ «ισί μπουτ χολιαμέ», ντα χουχάντιβασα άμα πακιάσα ότι μπορίνασα τι αρακχαβάς-αμέν λέσκε χολιάταρ.​—Αποκ. 12:12.

17. Σαρ μπορεί τι δοκιμάντιβελ αμαρί πίστη;

¹⁷ Ατζεχάνικ, σαρέ κα νακχάς δυσκολίες σο κα δοκιμάνεν αμαρί πίστη. Κα αβέλ «μπαρί στεναχώρια, ασακί σο να αβιλί κατά αρχή ι ντουνιάσκι μέχρι ακανά ούτε κα αβέλ ποτές ξανά». (Ματθ. 24:​21) Αζομάν, ατζέ-ντα αμαρέ τζενέ μπορεί τι τζαν αμέντζαρ κόντρα ντα ο κυβερνήσεις μπορεί τι τσσιναβέν αμαρό έργος. (Ματθ. 10:​35, 36) Κα αβάς σαρ ο Ασά ντα κα ντας μπέσα κο Ιεχωβά ότι κα βοηθίνελ-αμέν ντα κα αρακχαβέλ-αμέν;

18. Σο κα βοηθίνελ-αμέν τι αβάς έτοιμοι ι ντιβεσένγκε σο να κα τθεράς ειρήνη σαρ βακερένα ο εδάφια Εβραίους 10:​38, 39;

¹⁸ Από ακανά, ο Ιεχωβά ετοιμάνελα-αμέν για τι τθεράς ζουρανί πίστη. Αντράλ κατά «πιστός ντα φρόνιμος δούλος» ντέλα-αμέν «χαμπέ αζομάν σο πρέπει τι ντελ-λες» για τι βοηθίνελ-αμέν τι ατσσάς ζουρανέ. (Ματθ. 24:​45) Αλλά ο κάθε εκ αμένταρ-ντα  πρέπει τι μαρέλ-πες για τι τθερέλ ζουρανί πίστη κο Ιεχωβά.​—Διαβάνεν Εβραίους 10:​38, 39.

19, 20. Σο πρέπει τι πουτσάς-αμέν, ντα σόσκε σαρ βακερέλα ο εδάφιος 1 Χρονικών 28:9;

¹⁹ Σαρ ο βασιλιάς Ασά, αντικάς αμέν-ντα πρέπει τι “ρόντας ι Ιεχωβάσκε”. (2 Χρον. 14:4· 15:1, 2) Αρχίνασα τι ρόντας ι Ιεχωβάσκε κάνα σικλιάσα λέσκε ντα μπολντιάσα. Να χασαράσα καέκ ευκαιρία τι μπαριαράς αμαρί αγάπη ι Ιεχωβάσκε. Οτθάρ, κα αβέλας λατσσό τι πουτσάς-αμέν: “Τζάβα σαρέ κο συναθροίσεις;” Κο συναθροίσεις, αβάσα πιο ζουρανέ πνευματικά ντα λάσα ζορ αμαρέ πφραλένταρ ντα πφενίνταρ. (Ματθ. 11:​28) Επίσης, κα μπορίναας τι πουτσάς-αμέν: “Διαβάναβα ι Γραφή κάθε ντιβές;” Άμα μπεσένα τουμαρέ φαμιλιάσαρ, κερένα κάθε εβδομάδα ι φαμιλιάκι λατρεία; Ή άμα μπεσένα κορκορέ, αρακχένα σαάτι για τι ρόντεν πιο μπουτ κι Γραφή; Ντα κερένα ο πιο λατσσό για τι βακερέν ντα τι σικλιαρέν ο λατσσέ αμπέρια;

²⁰ Σόσκε πρέπει τι κεράς ανταλά ερωτήσεις; Η Γραφή βακερέλα αμένγκε ότι ο Ιεχωβά ρόντελα σο τθεράσα αμαρέ γκοντιάτε ντα αμαρέ γκίστε, οτθάρ πρέπει τι κεράς-λες αμέν-ντα ανταβά. (Διαβάνεν 1 Χρονικών 28:9) Άμα κα ντικχάς ότι χρειαζίντιβελα τι αλλάνας οντουλά σο τθεράσα αμαρέ γκοντιάτε τι κεράς ντα ο τρόπος σο σκεφτίνασα, πρέπει τι μανγκάς κατά Ιεχωβά τι βοηθίνελ-αμέν τι κεράς ανταλά αλλαγές. Ακανά ισί ο βακίτι τι ετοιμάντιβας οντουλένγκε σο κα αβέν-πες. Μα μουκχέν καέκ πράγμας τι τσσιναβέλ-τουμέν τι κερέν πράγματα γκοντιάσαρ κάνα ισί ειρήνη!