1. Σαρ βοηθίνενα ο πφενιά κι οργάνωση, αλλά καλά δυσκολίες τθερένα μπουτ λένταρ; (Ντικχέν ι φωτογραφία κι ανγκλαϊνί σελίδα)

ΙΣΙΝΑΜ μπουτ χαρούμενοι σο τθεράσα μπουτέ πφενίν σο κερένα μπουτ μπουτί αντρέ κι κχανγκιρί! Για παράδειγμας, βοηθίνενα μπουτ κο συναθροίσεις ντα κο έργος. Μερικά πφενιά περιποιήνενα ι Αίθουσα Βασιλείας. Κερένα μπουτ πράγματα για τι βοηθίνεν πουμαρέ πφραλέν ντα πφενίν. Όμως, τθερένα δυσκολίες-ντα. Μερικά πφενιά φροντίνενα πουμαρέ πφουρέ νταντέν ντα νταΐν ή τζάνα λέντζαρ κόντρα λένγκε τζενέ. Γιαβερά ισί νταγιά σο μπαριαρένα κορκορέ πουμαρέ τσσαβέν ντα μαρένα-πες κι μπουτί για τι ανέν ο μαντρό κι φαμιλί.

2. Σόσκε πρέπει τι ντας ζορ αμαρέ πφενίν;

² Σόσκε ισί αζόμ σημαντικός τι ντας ζορ αμαρέ πφενίν κι κχανγκιρί; Επειδή ισί φαρ σο ο ντουνιάς να σικαβέλα κο τζουβλιά ο σεβασμός σο πρέπει τι σικαβέλ λένγκε. Επίσης, η Γραφή βακερέλα αμένγκε τι ντας-λεν ζορ. Για παράδειγμας, ο απόστολος Παύλος βακερντάς κο πφραλά κι Ρώμη τι σικαβέν λατσσιπέ κι Φοίβη ντα “τι βοηθίνεν-λα σο-ντα ανάγκη κα τθερέλας”. (Ρωμ. 16:1, 2) Ο Παύλος ισινέ Φαρισαίος ντα ο Φαρισαίοι πακιάνας ότι ο τζουβλιά ισινέ πιο τελέ κατά μουρσά. Όμως, ακανά σο ισινέ Χριστιανός, μοιάζελας κο Ιησούς ντα σικαβέλας ι τζουβλίνγκε σεβασμός ντα λατσσιπέ.​—1 Κορ. 11:1.

3. Σαρ συμπεριφερίντιβελας ο Ιησούς ι τζουβλίνγκε, ντα σαρ ντικχέλας ι τζουβλίν σο κερένας οντουβά σο μανγκέλας λέσκο Ντατ;

³ Ο Ιησούς σεβάνελας σαρέ ι τζουβλίν. (Ιωάν. 4:​27) Να ντικχέλας-λεν σαρ ντικχένας-λεν ο Ιουδαίοι αρχηγοί ι θρησκειάκε αζομάν. Εκ εγκυκλοπαίδεια ι Γραφιάκι βακερέλα: «Ο Ιησούς ποτές να βακερντάς κάτι σο να σικαβέλας σεβασμός ι τζουβλίνγκε». Αλλά ο Ιησούς σεβάνελας ατζέ πιο μπουτ ι τζουβλίν σο κερένας οντουβά σο μανγκέλας λέσκο Ντατ.  Ντικχέλας-λεν σαρ τι αβένας λέσκε πφενιά ντα κάνα βακερντάς κον ισινέ αντρέ λέσκε πνευματικέ φαμιλιάτε, κερντάς λάφι εμ μουρσένγκε εμ τζουβλίνγκε.​—Ματθ. 12:50.

4. Σο κα ντικχάς ανταλέ μαθημάστε;

⁴ Ο Ιησούς πάντα μανγκέλας τι βοηθίνελ πι πνευματικέ πφενίν. Εκτιμίνελας-λεν ντα τσσίντελας λένταρ. Ακανά κα ντικχάς σαρ κα σικαβάς αμέν-ντα ότι πφαμπάσα αμαρέ πφενίνγκε.

5. Σόσκε μπορεί τι ισί δύσκολος μερικέ πφενίνγκε τι κερέν παρέες;

⁵ Σαρέ αμέν μανγκάσα τι τθεράς λατσσέ αμαλέν. Όμως, ανταβά μπάζιμα μπορεί τι ισί δύσκολος αμαρέ πφενίνγκε. Σόσκε; Ντικχέν σο βακερένα μερικά πφενιά. Η Τζόρνταν * βακερέλα: «Επειδή να ισινόμ παντριμέ, μπάζιμα να τζανάβα κάσαρ τι κεράβ παρέα ντα αμντίναβα ότι να ισινόμ σημαντική αντρέ κι κχανγκιρί». Η Κρίστεν, εκ σκαπάνισσα σο γκιλί γιαβερτθέ για τι κερέλ πιο μπουτ πράγματα ι Ιεχωβάσκε, βακερέλα: «Κάνα τζάσα εκχέ νεβέ κχανγκιριάτε μπορεί τι νιωθίνεσα κορκορό». Μερικά πφραλά-ντα μπορεί τι νιωθίνενα αντικάς. Επίσης, οντουλά σο λένγκι φαμιλί νανέ κι αλήθεια μπορεί τι νιωθίνενα ντουρ εμ πουμαρέ φαμιλιάταρ εμ κατά πφραλά ντα κατά πφενιά κι κχανγκιρί. Οντουλά σο ναστί νικιόνα πουμαρέ κχερένταρ ντα οντουλά σο φροντίνενα πουμαρέ τζενέν σο ισί νασφαλέ μπορεί τι νιωθίνενα κορκορέ. Η Ανέτ βακερέλα: «Ναστί τζάβας κο παρέες σόσκε έπρεπε τι φροντίναβ μι νταγιά».

6. Σαρ βοηθιντάς ο Ιησούς ι Μαρθά ντα ι Μαριά σαρ βακερένα ο εδάφια Λουκάς 10:​38-42;

⁶ Ο Ιησούς ντέλας πι σαατίσταρ πι πνευματικέ πφενίνγκε, ντα ισινέ λατσσό αμάλ λένγκε. Ανέν τουμαρέ γκοντιάτε καζόμ λατσσέ αμαλά ισινέ ι Μαριάσαρ ντα ι Μαρθάσαρ, σο ισινέ μάλλον μπίπαντριμε ο ντούι-ντα. (Διαβάνεν Λουκάς 10:​38-42) Οντουλέντζαρ σο βακερέλας ντα κερέλας, σίγουρα κερέλας-λεν τι νιωθίνεν άνετα. Η Μαρία να σακιντισάλι τι μπεσέλ πασέ λέσκε πιντρέντε σαρ μαθήτρια. * Ντα κάνα η Μάρθα νευριασάλι σο να βοηθίνελας-λα η Μαρία, να σακιντισάλι τι βακερέλ ι Ιησούσκε οντουβά σο τθερέλας πι γκοντιάτε. Αζομάν, ο Ιησούς σικλιαρντάς ι ντουέν-ντα σημαντικά πράγματα. Σικαντάς επίσης καζόμ μπουτ πφαμπόλας λένγκε ντα λένγκε πφραλέσκε, ι Λαζαρόσκε, κάνα γκιλό τι ντικχέλ-λεν γιαβερά-ντα φαρ. (Ιωάν. 12:​1-3) Άκ’ σόσκε κάνα ο Λάζαρος νασφάλιλο μπουτ, η Μαρία ντα η Μάρθα τζανένας ότι μπορίνενας τι μανγκέν βοήθεια κατά Ιησούς.​—Ιωάν. 11:3, 5.

7. Σαρ κα ντας ζορ ι πφενίν κι κχανγκιρί;

⁷ Μερικέ πφενίνγκε, ο συναθροίσεις ισί εκ κατά χάνικ ευκαιρίες σο τθερένα τι κερέν παρέα ι γιαβερέντζαρ. Οτθάρ, κάνα ισινάμ κο συναθροίσεις πρέπει τι κεράς ο πιο λατσσό για τι σικαβάς λένγκε λατσσιπέ, τι κεράς λέντζαρ λάφι ντα τι σικαβάς καζόμ μπουτ πφαμπάσα λένγκε. Η Τζόρνταν βακερέλα: «Λάβα μπουτ ζορ κάνα ο γιαβερά ισαρένα-μαν για το απαντήσεις σο ντάβα, κάνα πφάντενα έργος μάντζαρ ή σικαβένα γιαβερέ τροπόντζαρ ότι πφαμπόνα μάνγκε». Πρέπει τι σικαβάς αμαρέ πφενίνγκε ότι ισί σημαντικές αμένγκε. Η Κία βακερέλα: «Τζανάβα ότι, άμα κα χασαράβ εκ συνάθροιση, μερικά πφραλά ντα πφενιά κα μπουτσσαβέν μάνγκε εκ μήνυμας για τι ντικχέν άμα ισινόμ λατσσές. Ανταλέσταρ αγαβάβα ότι ο πφραλά ντα ο πφενιά πφαμπόνα μάνγκε».

8. Σο γιαβέρ μπορίνασα τι κεράς για τι μοιάζας κο Ιησούς;

 ⁸ Σαρ ο Ιησούς, αντικάς αμέν-ντα μπορίνασα τι ντας αμαρέ σαατίσταρ για τι κεράς παρέα αμαρέ πφενίντζαρ. Μπορίνασα τι καλίνας-λεν αμαρέ κχερέστε για τι χας κάτι ή για τι νακχάς λατσσές. Κάνα κεράσα-λες ανταβά, ισί λατσσό τι πουτράς συζητήσεις σο ντένα ζορ ι πφενίν. (Ρωμ. 1:​11, 12) Ο πρεσβύτεροι πρέπει τι μοιάζεν κο Ιησούς. Βοβ τζανέλας ότι μερικά εργένια κα τθερένας προβλήματα, αλλά βακερντάς ότι ούτε ο μπιαβ ούτε ο τσσαβέ νανέ οντουλά σο κερένα εκχέ τζενές τι αβέλ ευτυχισμέ για πάντα. (Λουκ. 11:​27, 28) Αλλά ισινάμ ευτυχισμέ κάνα τσσουβάσα ι υπηρεσία ι Ιεχωβάσκι κι πρώτη θέση.​—Ματθ. 19:12.

9. Σο μπορίνενα τι κερέν ο πρεσβύτεροι για τι βοηθίνεν ι πφενίν κι κχανγκιρί;

⁹ Ειδικά ο πρεσβύτεροι πρέπει τι ντικχέν ι τζουβλίν κι κχανγκιρί σαρ πφενιά ντα νταγιά. (1 Τιμ. 5:1, 2) Ισί λατσσό τι ντεν πουμαρέ σαατίσταρ πριν ή σοράν κατά συναθροίσεις για τι κερέν λάφι ι πφενίντζαρ. Η Κρίστεν βακερέλα: «Εκ πρεσβύτερος ντικχλάς ότι τθεράβας μπουτ πράγματα τι κεράβ κάθε ντιβές ντα πουτσλάς-μαν σαρ ισί μο πρόγραμμας. Χαιρισάλομ σο σικαντάς ότι πφαμπόλας μάνγκε». Κάνα ο πρεσβύτεροι ντένα μπουτ φαρ πουμαρέ σαατίσταρ για τι  κερέν λάφι ι πφενίντζαρ, σικαβένα ότι πφαμπόνα λένγκε. * Η Ανέτ βακερέλα σόσκε ισί λατσσό τι κεράς λάφι μπουτ φαρ ι πρεσβυτερόντζαρ. Βακερέλα: «Σικλιάβα-λεν πιο λατσσές ντα σικλιόνα-μαν βον-ντα. Αντικάς, κάνα τθεράβα εκ πρόβλημας, να σακιντίναβα τι μανγκάβ λένταρ βοήθεια».

10. Σο ντέλα μπουτ χαρά αμαρέ πφενίν;

¹⁰ Σαρέ αμέν, μουρσά ντα τζουβλιά, νιωθίνασα μπουτ σουκάρ κάνα ο γιαβερά εκτιμίνενα αμαρέ ικανότητες ντα ο πράγματα σο κεράσα. Οκιά μπάνταρ, άμα να εκτιμίνενα-λεν σαρέ ανταλά, χασαράσα αμαρί ζορ. Εκ σκαπάνισσα σο νανέ παντριμέ, η Άμπιγκεϊλ, βακερέλα ότι μπάζιμα νιωθίνελα ότι να ντένα-λα σημασία: «Ντικχένα-μαν σαρ ι πφεν ακαλέσκι ή ι τσσάι οκουλέσκι. Μπάζιμα νιωθίναβα σαρ μα τι ντικχέλα-μαν καέκ». Ντικχέν σο βακερέλα η Παμ, εκ εργένη πφεν σο ισινέ ιεραπόστολος μπουτ μπρεσά. Τελικά, βουρτισάλι πι τθεμέστε για τι φροντίνελ πι νταντές ντα πι νταγιά. Ακανά νακχλάς ο 70 ντα ισί ατζέκ ατζέκ σκαπάνισσα. Η Παμ βακερέλα: «Λάβα μπουτ ζορ κάνα ο γιαβερά βακερένα καζόμ μπουτ εκτιμίνενα οντουλά σο κεράβα».

11. Σαρ σικαντάς ο Ιησούς ότι εκτιμίνελας ι τζουβλίν σο υπηρετίνενας-λες;

¹¹ Ο Ιησούς εκτιμίνελας μπουτ ι βοήθεια σο ντένας-λες πιστά τζουβλιά σο υπηρετίνενας-λες «πουμαρέ πραγματένταρ». (Λουκ. 8:​1-3) Να ντινάς-λεν σάντε ο προνόμιος τι υπηρετίνεν-λες, αλλά σικλιαρντάς-λεν μπουτ σημαντικά πράγματα-ντα ι Ντεβλέσκε. Για παράδειγμας, βακερντάς λένγκε ότι κα μερέλας ντα ότι κα τζουβντιόλας πάλι. (Λουκ. 24:​5-8) Βακερντάς οντουλέ τζουβλίνγκε σο έπρεπε τι κερέν για τι νακχαβέν ο δυσκολίες σο κα αβένας, σαρ κερντάας ι αποστολόντζαρ-ντα. (Μάρκ. 9:​30-32· 10:​32-34) Ντα παρόλο σο ο απόστολοι νασλέ κάνα ασταρντέ ι Ιησούς, μερικά τζουβλιά σο βοηθιντέας-λες ισινέ πασέ λέστε κάνα μερέλας κο κας.​—Ματθ. 26:​56· Μάρκ. 15:​40, 41.

12. Καλά μπουτιά ντινάς τζουβλίντε ο Ιησούς;

¹² Ο Ιησούς ντινάς τζουβλίντε σημαντικά μπουτιά τι κερέν. Για παράδειγμας, μερικά πιστά τζουβλιά ισινέ ο πρώτα τζενέ σο ντικχλέ ότι αβιλόας πάλι κι ζωή. Βακερντάς οντουλέ τζουβλίνγκε τι μουτθαβέν ι αποστολόνγκε ότι ιστίντιλοας κατά μουλέ. (Ματθ. 28:5, 9, 10) Κι Πεντηκοστή κο 33 Κ.Χ., μάλλον ισινέ τζουβλιά-ντα οτθέ κάνα ντιντιλό ο άγιος πνεύμας. Άμα ισινέ, οντουλά πφενιά σο λιντέας ο άγιος πνεύμας ίσως μπορίνενας τι κερέν λάφι γιαβερέ τσσιμπέντε ντα τι βακερέν γιαβερένγκε «ι Ντεβλέσκε μπαρέ πραγματένγκε».​—Πράξ. 1:​14· 2:​2-4, 11.

13. Καλά πράγματα κερένα ο πφενιά αντιβές, ντα σαρ κα σικαβάς ότι εκτιμίνασα οντουλά σο κερένα;

¹³ Αμαρέ πφενιά αξίνενα ισαριπέ σαρέ οντουλένγκε σο κερένα ι Ιεχωβάσκε. Για παράδειγμας, βοηθίνενα τι χτίντιβεν ντα τι λατσσάρντιβεν κτίρια, βοηθίνενα όμιλοι σο κερντιόλα λάφι εκ γιαβέρ τσσιπ ντα κερένα μπουτί κο Μπέθελ. Βοηθίνενα κάνα αβένα-πες καταστροφές, μεταφράνενα ντα ισί σκαπάνισσες ντα ιεραπόστολοι. Σαρ ο πφραλά, αντικάς ο πφενιά-ντα νακχένα ι σχολή σκαπανέων, ι Σχολή για Ευαγγελιστές της Βασιλείας ντα ι Σχολή Γαλαάδ. Επίσης, ο πφενιά σο ισί παντριμέ βοηθίνενα πουμαρέ ρομέν τι κερέν σαρέ ο ευθύνες σο τθερένα κι κχανγκιρί ντα κι οργάνωση. Οντουλά πφραλά ισί «σαρ δώρα» ντα κερένα μπουτ πράγματα για τι βοηθίνεν ι γιαβερέν. Όμως, ανταβά κα αβέλας πιο δύσκολος λένγκε άμα να κα βοηθίνενας-λεν λένγκε ρομνιά. (Εφεσ. 4:8) Μπορίνενα τι σκεφτίνεν σαρ κα βοηθίνεν ανταλέ πφενίν σαρέ οντουλέντε σο κερένα;

14. Σο βακερέλα ο εδάφιος Ψαλμός 68:​11 ι πφενίνγκε, ντα σο κερένα ο πρεσβύτεροι σο ισί γκοντιαβέρ;

 ¹⁴ Ο πρεσβύτεροι σο ισί γκοντιαβέρ αγαβένα ότι ο πφενιά ισί εκ «μπαρό στρατός» σο κερένα πουμαρί μπουτί αντράλ πουμαρέ γκίσταρ ντα μπουτ φαρ ισί μπουτ λατσσέ κο έργος. (Διαβάνεν Ψαλμός 68:​11) Οντουλέσκε, ο πρεσβύτεροι προσπαθίνενα τι σικλιόν κατά πφενιά. Η Άμπιγκεϊλ λέλα μπουτ ζορ κάνα ο πφραλά πουτσένα-λα καλά τρόπους αρακχλάς για τι πουτρέλ συζητήσεις κο έργος. Βόι βακερέλα: «Ανταβά βοηθίνελα-μαν τι ντικχάβ ότι ο Ιεχωβά τθερέλα εκ σημαντική μπουτί μάνγκε πι οργανωσιάτε». Επίσης, ο πρεσβύτεροι αγαβένα ότι ο πφενιά σο ισί ζουρανέ κι πίστη μπορίνενα τι βοηθίνεν ι πιο τερνέ πφενίν κάνα τθερένα δυσκολίες. (Τίτο 2:​3-5) Σίγουρα, αμαρέ πφενιά αξίνενα αμαρί εκτίμηση!

15. Κάνα μπορεί ο πφενιά τι τθερένα ανάγκη εκχές για τι τσσίντελ λένταρ;

¹⁵ Μπάζιμα, ο πφενιά μπορεί τι τθερένα ανάγκη εκχέ τζενές για τι βοηθίνελ-λεν κάνα τθερένα εκ πρόβλημας. (Ησ. 1:​17) Για παράδειγμας, εκ πφεν σο μουλό λάκο ρομ ή εκ χωρισμέ πφεν μπορεί τι τθερέλα ανάγκη εκχέ τζενές τι κερέλ λάφι αντίς λάκε ντα τι βοηθίνελ-λα τι κερέλ μερικά μπουτιά σο κερέλας-λεν λάκο ρομ. Εκ πφουρί πφεν μπορεί τι χρειαζίντιβελα τι κερέλ λάφι γιατρόντζαρ. Ή εκ σκαπάνισσα σο κερέλα γιαβερά-ντα πράγματα κι Ιεχωβάσκι οργάνωση μπορεί τι τθερέλα ανάγκη εκχέ τζενές τι τσσίντελ λάταρ κάνα γιαβερά μπορεί τι βακερένα λάκε ότι να νικιόλα αζόμ μπουτ κο έργος σαρ ο γιαβερά σκαπανείς. Σο γιαβέρ μπορίνασα τι κεράς για τι βοηθίνας αμαρέ πφενίν; Για τι ντικχάς πάλι ο παράδειγμας ι Ιησούσκο.

16. Σαρ τσσιντιντάς ο Ιησούς κατά Μαρία σαρ βακερένα ο εδάφια Μάρκος 14:​3-9;

¹⁶ Ο Ιησούς κερέλας ο πιο λατσσό για τι τσσίντελ πι πνευματικέ πφενίνταρ. Για παράδειγμας, τσσιντιντάς κατά Μαρία κάνα η Μάρθα βακερντάς ότι να βοηθίνελας-λα ι μπουτιέντζαρ. (Λουκ. 10:​38-42) Τσσιντιντάς κατά Μαρία εκ γιαβέρ-ντα φαρ, κάνα ο γιαβερά βακερντέ ότι οντουβά σο κερντάς ισινέ λάθος. (Διαβάνεν Μάρκος 14:​3-9) Ο Ιησούς αγαντάς σόσκε η Μαρία κερντάς-λες ανταβά ντα ισαρντάς-λα, κάνα βακερντάς: «Κερντάς κάτι λατσσό μάνγκε. . . . Κερντάς ο πιο λατσσό». Βακερντάς ατζέ-ντα ότι κα κερένας λάφι οντουλέσκε σο κερντάς “κάι-ντα τι βακέρντιβενας ο λατσσέ αμπέρια σαρό κο ντουνιάς”, σαρ κερέλα ανταβά μάθημας-ντα ακανά. Ισί σημαντικός ότι ο Ιησούς βακερντάς ότι ο λατσσέ αμπέρια κα βακέρντιβενας σαρό κο ντουνιάς κάνα ισαρντάς ι Μαριά οντουλέσκε σο κερντάς αντράλ πι γκίσταρ. Καζόμ μπουτ ζορ πρέπει τι λιντάς κατά λάφια ι Ιησούσκε σοράν κατά μπέτι λάφια ι γιαβερένγκε!

17. Βακερέν εκ παράδειγμας σο σικαβέλα κάνα μπορεί τι χρειαζίντιβελ τι τσσίντας εκχέ πφενιάταρ.

¹⁷ Τσσίντενα κατά πφενιά σο ισί κι κχανγκιρί κάνα τθερένα-τουμέν ανάγκη; Για παράδειγμας, ανέν τουμαρέ γκοντιάτε ακαβά: Μερικά πφραλά ντικχένα ότι εκ πφεν σο λάκο ρομ νανέ κι αλήθεια να αβέλα πι σαατίστε κο συναθροίσεις ντα κο τέλος νασέλα σουγκό. Ντικχένα ότι ο πιο μπουτ φαρ να λέλα παλά-πέστε πι τσσαβέν. Βακερένα ότι ανταβά σο κερέλα νανέ λατσσό επειδή πακιάνα ότι πρέπει τι μανγκέλ πι ρομέσταρ τι μουκχέλ ι τσσαβέν τι τζαν λάσαρ κο συναθροίσεις. Όμως, η αλήθεια ισί ότι η πφεν κερέλα ο πιο λατσσό σο μπορίνελα. Να κερέλα σάντε βόι κουμάντος πο πρόγραμμας ντα νανέ λάκε βαστέστε σο κα αβέλ-πες ι τσσαβέντζαρ. Σο μπορίνενα τι κερέν; Άμα ισαρένα ι πφενιά ντα βακερένα κο γιαβερά ο λατσσέ πράγματα σο κερέλα, μπορεί ο γιαβερά τι τσσιναβέν τι βακερέν μπέτι λάφια λάκε.

18. Σο γιαβέρ μπορίνασα τι κεράς για τι βοηθίνας αμαρέ πφενίν;

¹⁸ Σικαβάσα καζόμ μπουτ πφαμπάσα αμαρέ  πφενίνγκε κάνα κεράσα πράγματα για τι βοηθίνας-λεν. (1 Ιωάν. 3:​18) Η Ανέτ, η πφεν σο φροντίνελας πι νταγιά σο ισινέ νασφαλί, βακερέλα: «Μερικά πφραλά ντα πφενιά αβένας τι μπεσέν χάνικ μι νταγιάσαρ για τι ξεκουράντιβαβ ή ανένας χαμπέ. Ανταβά κερέλας-μαν τι νιωθίναβ ότι μανγκένα-μαν ντα ότι ισινόμ σημαντική κι κχανγκιρί». Η Τζόρνταν-ντα λιντάς βοήθεια. Εκ πφραλ σικλιαρντάς-λα σαρ τι λατσσαρέλ πο αυτοκίνητος. Η Τζόρνταν βακερέλα: «Ισί σουκάρ τι τζανάβ ότι μο πφραλά ντα μο πφενιά πφαμπόνα μάνγκε ντα μανγκένα τι αβάβ λατσσές».

19. Καλά γιαβερά πράγματα κερένα ο πρεσβύτεροι για τι βοηθίνεν ι πφενίν κι κχανγκιρί;

¹⁹ Ο πρεσβύτεροι-ντα προσπαθίνενα τι βοηθίνεν ι πφενίν. Τζανένα ότι ο Ιεχωβά μανγκέλα τι συμπεριφερίντιβεν λένγκε λατσσιμάσαρ. (Ιακ. 1:​27) Οντουλέσκε, ισί λογικοί σαρ ο Ιησούς, ντα να τσσουβένα κανόνες οτθέ σο κα αβέλας πιο λατσσό τι αγαβέν-λεν ντα τι σικαβέν λένγκε λατσσιπέ. (Ματθ. 15:​22-28) Κάνα ο πρεσβύτεροι κερένα ο πιο λατσσό για τι βοηθίνεν-λεν, ο πφενιά νιωθίνενα ότι ο Ιεχωβά ντα λέσκι οργάνωση πφαμπόνα λένγκε. Η Κία ντέλα-πες γκοντί ότι, κάνα ο πφραλ σο ισί υπεύθυνος λάκε ομιλόστε ασουντάς ότι κα ακχαρέλας-πες γιαβερέ κχερέστε, κανονιντάς σουγκό τι βοηθίνεν-λα. «Νασλό οπρά-μάνταρ εκ μπουτ μπαρό πφαριπέ», βακερέλα η Κία. «Ο πρεσβύτεροι ντινέ-μαν ζορ πουμαρέ λαφίντζαρ ντα ι βοήθεια σο τθεράβας ανάγκη ντα αντικάς σικαντέ μάνγκε ξεκάθαρα ότι ισινόμ σημαντική κι κχανγκιρί ντα να ισινόμ κορκορί κο δυσκολίες».

20, 21. Σαρ κα σικαβάς ότι σαρέ ο πφενιά κι κχανγκιρί ισί σημαντικές;

²⁰ Αμαρέ κχανγκιρίντε αντιβές, ισί μπερεκέτι πφενιά σο ισί μπουτιαρνέ ντα αξίνενα αμαρί βοήθεια. Σαρ σικλιλάμ κατά παράδειγμας ι Ιησούσκο, βοηθίνασα-λεν κάνα ντάσα αμαρέ σαατίσταρ λένγκε ντα προσπαθίνασα τι σικλιάς-λεν πιο λατσσές. Μπορίνασα τι σικαβάς αμαρί εκτίμηση σαρέ οντουλένγκε σο κερένα κι υπηρεσία κι Ντεβλέσκι. Μπορίνασα επίσης τι τσσίντας λένταρ κάνα χρειαζίντιβελα.

²¹ Κο τελευταία λάφια κι επιστολή Ρωμαίους, ο απόστολος Παύλος γραφιντάς ο ναβά εννιά πφενίνγκε. (Ρωμ. 16:1, 3, 6, 12, 13, 15) Οντουλά τζουβλιά σίγουρα λιντέ μπουτ ζορ κάνα κερντάς λένγκε σελιάμι ντα ισαρντάς-λεν. Τι ντας αμέν-ντα ζορ σαρέ αμαρέ πφενίν σο ισί κι κχανγκιρί. Αντικάς, σικαβάσα ότι ισί σημαντικές αμαρέ πνευματικέ φαμιλιάκε.