1. Σαρ μπέκιμ τι νιωθίνασα άμα εκ τζενό σο μανγκάσα τσσιναντάς τι υπηρετίνελ ι Ιεχωβάς;

ΜΗΠΩΣ εκ τζενό σο μανγκάσα χαλάς αποκοπή; Ανταβά ανέλα μπαρί ντουκχ! Εκ πφεν, η Χίλντα, βακερέλα: «Κάνα μο ρομ μουλό σοράν από 41 μπρεσά σο ισινάμας παντριμέ, αμντίναβας ότι ανταβά ισινέ ο πο μπέτι πράγμας σο κα μπορίνελας τι αβέλ-πες. * Αλλά κάνα μο τσσαβό χαλάς αποκοπή ντα μουκχλάς πι ρομνιά ντα πι τσσαβέν, ανταβά ισινέ μπουτ πο πφαρό».

2, 3. Σαρ νιωθίνελα ο Ιεχωβά κάνα λέσκε υπηρέτες τσσιναβένα τι υπηρετίνεν-λες σαρ βακερένα ο εδάφια Ψαλμός 78:​40, 41;

² Σκεφτίνεν καζόμ πρέπει τι ντουκχασάλο ο Ιεχωβά κάνα κάποιοι άγγελοι, σο ισινέ αντρέ λέσκε φαμιλιάτε, γκιλέ λέσαρ κόντρα! (Ιούδα 6) Ανέν τουμαρέ γκοντιάτε επίσης καζόμ μπουτ πρέπει τι στεναχωρίντιβελας κάνα ντικχέλας πι αγαπημέ λαός, ι Ισραηλιτέν, τι τζαλ κόντρα λέσαρ παλάλ γιαβερέστε. (Διαβάνεν Ψαλμός 78:​40, 41) Τι αβέν σίγουροι ότι αμαρό Ντατ, ο Ιεχωβά, σο μανγκέλα-αμέν μπουτ στεναχωρίντιβελα κάνα εκ τζενό τουμαρό-ντα τσσιναβέλα τι υπηρετίνελ-λες. Αγαβέλα τουμαρί ντουκχ. Κα ντελ-τουμέν αντράλ πι γκίσταρ ι ζορ ντα ι βοήθεια σο χρειαζίντιβενα.

³ Ανταλέ μαθημάστε, κα ντικχάς σαρ μπορίνασα τι λας ι βοήθεια ι Ιεχωβάσκι κάνα εκ τζενό σο μανγκάσα τσσιναβέλα τι υπηρετίνελ ι Ιεχωβάς. Ντα κα ντικχάς σαρ μπορίνασα τι βοηθίνας γιαβερέν αντρέ κι κχανγκιρί σο νακχένα ανταγιά δυσκολία. Πρώτα όμως για τι ντικχάς σο νανέ λατσσό τι σκεφτίνας.

4. Σαρ νιωθίνενα μπουτ νταντά ντα νταγιά κάνα λένγκο τσσαβό ή λένγκι τσσάι τσσιναβέλα τι υπηρετίνελ ι Ιεχωβάς;

⁴ Κανά εκ τζενό σο μανγκένα αζόμ μπουτ σαρ ισί τουμαρό τσσαβό ή τουμαρί τσσάι τσσιναβέλα τι υπηρετίνελ ι Ιεχωβάς,  μπέκιμ τι σκεφτίνενα σο γιαβέρ κα μπορίνενας τι κερέν για τι βοηθίνεν τουμαρέ τσσαβές ή τσσαγιά τι ατσσόλ κι αλήθεια. Εκ πφραλ, ο Λουκ, βακερντάς σοράν κατά αποκοπή πι τσσαβέσκι: «Τσσουβάβας οπρά-μάντε ο βάρετα. Ντικχάβας μπέτι σουνέ. Μπάζιμα ροβάβας ντα μο γκι ντουκχάλας». Η Ελίζαμπεθ, εκ πφεν σο νακχλάς κάτι ασακό, σκεφτίνελας ντουκχάσαρ: «Σο λάθος κερντόμ σαρ ντάι; Πακιάβας ότι να μπορισάλομ τι τσσουβάβ μι τσσαβέσκε γκίστε ι αλήθεια».

5. Κον φταίνελα κάνα εκ τζενό μουκχέλα ι Ιεχωβάς;

⁵ Πρέπει τι τθεράς αμαρέ γκοντιάτε ότι ο Ιεχωβά ντινάς κο κάθε εκ αμένταρ ι ελευθερία τι τραμπίνας σο κα κεράς. Ανταβά μανγκέλα τι βακερέλ ότι μπορίνασα τι τραμπίνας άμα κα ντας-λες καν ή να κα ντας-λες. Μερικά τερνέ σο λένγκο ντατ ντα λένγκι ντάι να ισινέ λένγκε λατσσό παράδειγμας τραμπιντέ τι υπηρετίνεν ι Ιεχωβάς ντα τι ατσσόν πιστοί λέστε. Γιαβερά τερνέ, σο λένγκο ντατ ντα λένγκι ντάι κερντέ ο πο λατσσό για τι μπαριαρέν-λεν αντικάς σαρ βακερένα ο αρχές ι Γραφιάκε, νασένα κατά αλήθεια κάνα μπαριόνα. Οτθάρ, ο κάθε εκ αμένταρ πρέπει τι αποφασίνελ άμα κα υπηρετίνελ ι Ιεχωβάς. (Ιησ. Ναυή 24:​15) Νταντάλεν ντα νταγιάλεν σο ισινέν πφανγκέ γκίσκε, τσσιναβέν τι πακιάν ότι φταίνενα τουμέν ανταλέσκε σο αβιλό-πες!

6. Σαρ μπέκιμ τι νιωθίνελ εκ τερνό άμα λέσκο ντατ ή λέσκι ντάι κα τσσιναβέλ τι υπηρετίνελ ι Ιεχωβάς;

⁶ Μπάζιμα, εκ ντατ ή εκ ντάι τσσιναβέλα τι υπηρετίνελ ι Ιεχωβάς, μπέκιμ τι νασέλα ατζέ-ντα πι φαμιλιάταρ. (Ψαλμ. 27:​10) Ανταβά μπέκιμ τι ανέλ μπαρί ντουκχ ι τσσαβένγκε σο λένγκο ντατ ντα λένγκι ντάι ισινέ παράδειγμας λένγκε. Η Έστερ, σο λάκο ντατ χαλάς αποκοπή, βακερέλα: «Ροβάβας μπουτ φαρ σόσκε αγαβάβας ότι να νασλόας κατά αλήθεια χωρίς τι αγαβέλ-λες. Τραμπιντάς τι μουκχέλ ι Ιεχωβάς. Μανγκάβα μι νταντές, οτθάρ κάνα χαλάς αποκοπή, τσσουβάβας μι γκίστε λέσκε. Ντα τθεράβας κρίσεις πανικού».

7. Σαρ νιωθίνελα ο Ιεχωβά εκχέ τερνέσκε σο λέσκο ντατ ή λέσκι ντάι χαλάς αποκοπή;

⁷ Τερνάλεν, άμα τουμαρό ντατ ή τουμαρί ντάι χαλάς αποκοπή, αμαρό γκι ντουκχάλα τουμένγκε! Μολίνασα-τουμέν τι αβέν σίγουροι ότι ο Ιεχωβά-ντα τζανέλα λατσσές καζόμ ντουκχάνα. Βοβ μανγκέλα-τουμέν ντα εκτιμίνελα τουμαρί αφοσίωση, σαρ αμέν-ντα, τουμαρέ πφραλά ντα πφενιά. Ντα τι τθερέν τουμαρέ γκοντιάτε ότι να φταίνενα τουμέν για το αποφάσεις τουμαρέ νταντέσκε ή τουμαρέ νταγιάκε. Σαρ βακέρντιλο πο οπρέ, ο Ιεχωβά ντινάς κο κάθε εκ αμένταρ ι ελευθερία τι τραμπίνελ σο κα κερέλ. Κάθε τζενό σο ντινάς πο λάφι τι τζουβντιόλ ι Ιεχωβάσκε ντα μπολντιλό πρέπει τι «βάντελ πο φορτίος».​—Γαλ. 6:5.

8. Σο μπορίνενα τι κερέν ο γιαβερά αντρέ κι φαμιλί καζόμ μπεκλεντίνενα τι βουρτίνελ κο Ιεχωβά ο τζενό σο μανγκένα; (Ντικχέν ο πλαίσιος-ντα « Βουρτίνεν κο Ιεχωβά»)

⁸ Κάνα εκ τζενό σο μανγκένα τσσιναβέλα τι υπηρετίνελ ι Ιεχωβάς, αγαβάσα ότι μπεκλεντίνενα εκ ντιβές τι βουρτίνελ Λέστε. Σο μπορίνενα τι κερέν όμως μέχρι τι αβέλ-πες ανταβά; Συνεχίνεν τι αβέν ζουρανέ πνευματικά. Αντικάς, κα ντεν λατσσό παράδειγμας κο γιαβερά τζενέ σο ισί αντρέ τουμαρέ φαμιλιάτε, μπέκιμ κο τζενό-ντα σο χαλάς αποκοπή. Επίσης, κα τθερέν ι ζορ σο χρειαζίντιβελα για τι νταϊντίνεν τουμαρί ντουκχ. Για τι ντικχάς μερικά πράγματα σο μπορίνενα τι κερέν.

9. Σαρ μπορίνενα τι λεν ζορ κατά Ιεχωβά; (Ντικχέν ο πλαίσιος-ντα « Εδάφια σο κα Λοκχιαρέν Τουμαρό Γκι άμα εκ Τζενό σο Μανγκένα Τσσιναντάς τι Υπηρετίνελ ι Ιεχωβάς»)

⁹ Κερέν σο νακχέλα τουμαρέ βαστένταρ για τι ατσσόν πνευματικά ζουρανέ. Ισί μπουτ σημαντικός τι κερέν ο πο λατσσό για τι αβέν πνευματικά ζουρανέ εμ τουμέν εμ τουμαρί φαμιλί. Σαρ μπορίνενα τι κερέν-λες ανταβά; Λεν ζορ κατά Ιεχωβά καζόμ διαβάνενα ντα σκεφτίνενα λατσσές κάθε ντιβές λέσκο Λάφι ντα καζόμ τζάνα κο συναθροίσεις. Η Τζοάνα, σο λάκο ντατ ντα λάκι πφεν νασλέ κατά αλήθεια, βακερέλα: «Ηρεμίναβα κάνα διαβάναβα τζενένγκε σο βακερέλα η Γραφή σαρ ισί η Αβιγαία, η Εσθήρ, ο Ιώβ, ο Ιωσήφ ντα ο Ιησούς. Λένγκο παράδειγμας πφερέλα μο γκι ντα μι γκοντί λατσσέ πραγματέντζαρ σο κοβλιαρένα μι ντουκχ. Ντένα-μαν μπουτ ζορ ο σουκάρ γκιλιά-ντα σο ισί αμαρέ ιστοτοπόστε».

10. Σαρ βοηθίνενα-αμέν ο εδάφια Ψαλμός 32:​6-8 τι νταϊντίνας ι ντουκχ σο τθεράσα αμαρέ γκίστε;

¹⁰ Τι πουτρέν τουμαρό γκι κο Ιεχωβά ντα τι μουτθαβέν λέσκε σαρέ οντουλά σο ανησυχίνενα-τουμέν. Κάνα τασαβέλα-τουμέν η στεναχώρια, μα τσσιναβέν τι προσευχίντιβεν λέστε. Τι μολίνεν αμαρέ Ντεβλές σο μανγκέλα-αμέν τι βοηθίνελ-τουμέν τι ντικχέν ο πράγματα σαρ ντικχέλα-λεν βοβ ντα τι “αγαβέν σαρ ισί ο πράγματα ντα τι σικλιαρέλ-τουμέν τι πφιρέν κο ντρομ σο πρέπει τι τζαν”. (Διαβάνεν Ψαλμός 32:​6-8) Όμως, μπέκιμ τι ανέλα τουμένγκε μπαρί ντουκχ τι βακερέν κο Ιεχωβά σο τθερένα μπαγιά αντρέ τουμαρέ γκίστε. Αλλά ο Ιεχωβά αγαβέλα μπουτ λατσσές τουμαρί ντουκχ. Μανγκέλα-τουμέν μπουτ ντα βακερέλα τουμένγκε τι πουτρέν λέσκε τουμαρό γκι.​—Έξοδ. 34:6· Ψαλμ. 62:7, 8.

11. Σόσκε πρέπει τι ντας μπέσα κι διόρθωση σο σικαβέλα ι αγάπη ι Ιεχωβάσκι σαρ βακερέλα ο εδάφιος Εβραίους 12:​11; (Ντικχέν ο πλαίσιος-ντα « Αποκοπή​—Σικαβέλα Καζόμ Μπουτ Μανγκέλα-αμέν ο Ιεχωβά»)

¹¹ Τι υποστηρίνεν ι απόφαση ι πρεσβυτερόνγκι. Η αποκοπή ισί αντρέ κο πράγματα σο  οργανωντάς ο Ιεχωβά τι αβέν-πες. Βοβ ντέλα διόρθωση σόσκε μανγκέλα-αμέν ντα σόσκε αντικάς κερέλα λατσσιπέ σαριλένγκε, εμ οντουλέσκε σο τσσιναντάς τι υπηρετίνελ-λες. (Διαβάνεν Εβραίους 12:​11) Μερικοί κι κχανγκιρί μπέκιμ τι βακερένα ότι ο πρεσβύτεροι να ισινέ σωστός σο κερντέ αποκοπή εκχέ τζενές. Αλλά τι ντεν-τουμέν γκοντί ότι ασακέ τζενέ να μανγκένα τι βακερέν μπέτι πράγματα ι τζενέσκε σο κερντάς λάθος. Απλώς να τζανάσα σαρέ οντουλά σο αβιλέ-πες. Τι αβέν σίγουροι ότι ο πρεσβύτεροι κι δικαστική επιτροπή ισινέ μπουτ προσεκτικοί για τι κερέν οντουλά σο βακερέλα η Γραφή ντα τι κρίνεν «ι Ιεχωβάσκε».​—2 Χρον. 19:6.

12. Σο λατσσιπέ ντικχλέ μερικοί επειδή υποστηριντέ ι διόρθωση ι Ιεχωβάσκι;

¹² Κάνα υποστηρίνενα ι πρεσβυτερόν σο αποφασιντέ τι χαλ αποκοπή εκ τζενό σο μανγκένα μπουτ, μπέκιμ τι βοηθίνεν-λες τι βουρτίνελ κο Ιεχωβά. Η Ελίζαμπεθ βακερέλα: «Ισινέ μπουτ δύσκολος τι τσσιναβάς τι κεράς παρέα αμαρέ τσσαβέσαρ. Αλλά αφού βουρτισάλο κο Ιεχωβά, βακερντάς αμένγκε ότι κερντάς λέσκε λατσσιπέ σο χαλάς αποκοπή. Σοράν, βακερντάς ότι σικλιλόας μπουτ σημαντικά πράγματα. Αγαντόμ καζόμ σημαντική ισί η διόρθωση ι Ιεχωβάσκι». Λάκο ρομ-ντα, ο Μαρκ, βακερέλα: «Μπουτ πο σοράν, αμαρό τσσαβό βακερντάς αμένγκε ότι εκ λόγος σο μανγκέλας τι βουρτίνελ ισινέ ότι αμέν κερντάμας ντιπ οντουβά σο έπρεπε. Χαιρίναβα μπουτ σο ο Ιεχωβά βοηθιντάς-αμέν τι ντας καν».

13. Σο μπορίνελα τι βοηθίνελ-τουμέν τι νταϊντίνεν ι ντουκχ σο τθερένα αντρέ τουμαρέ γκίστε;

¹³ Κερέν λάφι αμαλέντζαρ σο αγαβένα τουμαρό γκι. Κερέν παρέα γκοντιαβέρ πφραλέντζαρ ντα πφενίντζαρ σο μπορίνενα τι βοηθίνεν-τουμέν μα τι τσσιναβέν τι μπεκλεντίνεν τουμαρέ τζενένγκε σο χαλέ αποκοπή. (Παρ. 12:​25· 17:​17) Η Τζοάνα βακερέλα: «Αντρέ μάντε νιωθίναβας ντιπ κορκορί. Αλλά βοηθιντάς-μαν μπουτ σο κεράβας λάφι μπεσαλή αμαλέντζαρ». Σο αβέλα-πες όμως άμα μερικά πφραλά κι κχανγκιρί βακερένα τουμένγκε πράγματα σο κερένα-τουμέν τι νιωθίνεν πο μπέτι;

14. Σόσκε χρειαζίντιβελα τι “νταϊντίνας ο εκ ι γιαβερές ντα τι συγχωρίνας ο εκ ι γιαβερές αντράλ αμαρέ γκίσταρ”;

¹⁴ Τι νταϊντίνεν τουμαρέ πφραλέν ντα πφενίν. Ναστί μπεκλεντίνασα κατά γιαβερά τι βακερέν πάντα ο σωστά λάφια. (Ιακ. 3:2) Σαρέ ισινάμ ατελείς, οτθάρ μα σαστίνεν άμα κάποιοι να τζανένα σο τι βακερέν ή χωρίς τι μανγκέν-λες βακερένα λάφια σο κα ανέν ντουκχ τουμαρέ γκίστε. Τι ντεν-τουμέν γκοντί ι συμβουλή σο βακερντάς ο απόστολος Παύλος: «Τι νταϊντίνεν ο εκ ι γιαβερές ντα τι συγχωρίνεν ο εκ ι γιαβερές αντράλ τουμαρέ γκίσταρ, ατζέ-ντα άμα εκ τζενό τθερέλα παράπονος εκχέ γιαβερέσταρ». (Κολ. 3:​13) Εκ πφεν, σο εκ λάκε τζενένταρ χαλάς αποκοπή, βακερέλα: «Ο Ιεχωβά βοηθίνελας-μαν τι συγχωρίναβ ι πφραλέν σο ενώ μανγκένας τι ντεν-μαν ζορ ντουκχαβένας-μαν». Σαρ μπορίνελα η κχανγκιρί τι ντελ ζορ ι πιστέ τζενέν αντρέ κι κχανγκιρί;

15. Σο μπορίνασα τι κεράς για τι βοηθίνας ι φαμιλί ι τζενέσκι σο χαλάς αποκοπή ακανά σουγκό;

¹⁵ Τι σικαβέν μπαρό λατσσιπέ ντα αγάπη κο  πιστά τζενέ αντρέ κι φαμιλί. Εκ πφεν, η Μίριαμ, βακερέλα ότι αγχώντιβελας κάνα σκεφτίνελας ότι κα τζάλας κι συνάθροιση σοράν κατά αποκοπή πι πφραλέσκι. «Νταράβας σο κα βακερένας ο γιαβερά. Αλλά ισινέ μπουτ πφραλά ντα πφενιά σο ισινέ βον-ντα στεναχωριμέ ανταλέσκε σο αβιλό-πες. Επειδή κερντέ-λες ανταβά, να νιωθίναβας ότι νακχάβας κορκορί ανταγιά ντουκχ». Εκ γιαβέρ πφεν ντέλα-πες γκοντί: «Κάνα χαλάς αποκοπή αμαρό τσσαβό, αμαρέ πφραλά ντα πφενιά σο μανγκένα-αμέν μπουτ αβιλέ τι κοβλιαρέν αμαρί ντουκχ. Μερικοί μουτθαβένας αμένγκε ότι να τζανένας σο τι βακερέν. Ροβένας μάντζαρ ή γραφίνενας μάνγκε ντούι λάφια. Βοηθιντέ-μαν μπουτ!»

16. Σαρ μπορίνελα η κχανγκιρί μα τι τσσιναβέλ τι αβέλ πασέ κο τζενέ οντουλένγκε σο χαλέ αποκοπή;

¹⁶ Συνεχίνεν τι αβέν πασέ κο τζενέ κι φαμιλιάκε. Ακανά πο μπουτ από ποτές, τθερένα ανάγκη τι μανγκέν-λεν ντα τι ντεν-λεν ζορ. (Εβρ. 10:​24, 25) Μπάζιμα ο τζενέ οντουλένγκε σο χαλέ αποκοπή βακερένα ότι μερικοί κι κχανγκιρί τσσιναντέ τι κερέν λέντζαρ λάφι, σαρ τι αβένας βον-ντα αποκομμέ. Μα μουκχέν τι αβέλ-πες ανταβά! Μερικά τερνέ σο λένγκο ντατ ή λένγκι ντάι νασλέ κατά αλήθεια τθερένα ανάγκη τι ισαράς-λεν ντα τι ντας-λεν ζορ. Η Μαρία, σο λάκο ρομ χαλάς αποκοπή ντα μουκχλάς πι φαμιλί, βακερέλα: «Μερικά πφραλά ντα πφενιά αβένας μι κχερέστε για τι κερέν χαμπέ ντα τι βοηθίνεν-μαν τι κεράβ μι τσσαβένγκι μελέτη. Αγαβένας μι ντουκχ ντα ροβένας γιεκ μάντζαρ. Τσσίντενας μάνταρ κάνα ασουνένας τι βακέρντιβεν μάνγκε λάφια σο να ισινέ μπαγιά. Ανταβά ντέλας-μαν μπουτ ζορ!»​—Ρωμ. 12:​13, 15.

17. Σο μπορίνενα τι κερέν ο πρεσβύτεροι για τι λοκχιαρέν οντουλέν σο τθερένα πφανγκό γκι;

¹⁷ Πρεσβύτεροι, μα χασαρέν καέκ ευκαιρία τι ντεν ζορ κο τζενέ οντουλένγκε σο χαλέ αποκοπή. Ο Ιεχωβά τσσουντάς-τουμέν τι λοκχιαρέν ο γκι τουμαρέ πφραλένγκο σο εκ λένγκε τζενένταρ τσσιναντάς τι υπηρετίνελ ι Ιεχωβάς. (1 Θεσ. 5:​14) Τι ντεν-λεν ζορ ντα τι κερέν λέντζαρ λάφι πριν ντα σοράν κατά συναθροίσεις. Τι τζαν λένγκε κχερέντε ντα τι προσευχίντιβεν λένγκε. Τι νικιόν λέντζαρ κο έργος ή τι καλίνεν-λεν μπάζιμα κι φαμιλιάκι λατρεία σο κερένα. Ο πρεσβύτεροι πρέπει τι αρακχαβέν οντουλέν σο ισί πφανγκέ γκίσκε ντα τι σικαβέν λένγκε ότι πφαμπόνα λένγκε ντα ότι μανγκένα-λεν.​—1 Θεσ. 2:7, 8.

18. Σο μανγκέλα ο Ντεβέλ τι κερέν οντουλά σο τσσιναντέ τι υπηρετίνεν-λες σαρ βακερέλα ο εδάφιος 2 Πέτρου 3:9;

¹⁸ Ο Ιεχωβά «να μανγκέλα τι καταστραφίντιβελ καέκ τζενό αλλά σαρέ τι μετανιώνεν». (Διαβάνεν 2 Πέτρου 3:9) Ατζέ-ντα άμα εκ τζενό κερντάς εκ σοβαρή αμαρτία, η ζωή λέσκι συνεχίνελα τι αβέλ πολύτιμη ι Ντεβλέσκε. Ανέν τουμαρέ γκοντιάτε ότι ο Ιεχωβά ποκιντάς πι αγαπημέ Τσσαβέσκε ζωγιάσαρ για τι σώνελ ι κάθε εκχές αμένταρ. Ο Ιεχωβά προσπαθίνελα αντράλ πι γκίσταρ τι βοηθίνελ ασακέ τζενέν τι βουρτίνεν λέστε. Μπεκλεντίνελα ότι κα τραμπίνεν τι κερέν-λες ανταβά σαρ ντικχάσα κι ιστορία σο βακερντάς ο Ιησούς ι τσσαβέσκε σο χασάρντιλο. (Λουκ. 15:​11-32) Μπουτ σο νασλέ κατά αλήθεια βουρτισάλε σοράν πουμαρέ Νταντέστε σο μανγκέλα-λεν μπουτ κο Ιεχωβά. Ντα η κχανγκιρί πουταρντάς λένγκε πι τατί ανγκάλι. Η Ελίζαμπεθ τθερέλας ι χαρά τι ντικχέλ πι τσσαβές τι βουρτίνελ κι αλήθεια. Καζόμ ντέλα-πες γκοντί οντουβά βακίτι, βακερέλα: «Ισινόμ πφερντί εκτίμηση οντουλέ πφραλένγκε ντα πφενίνγκε σο βακερένας αμένγκε μα τι τσσιναβάς τι μπεκλεντίνας αμαρέ τσσαβέσκε».

19. Σόσκε μπορίνασα τι συνεχίνας τι ντας μπέσα κο Ιεχωβά;

¹⁹ Μπορίνασα πάντα τι ντας μπέσα κο Ιεχωβά. Ποτές να βακερέλα αμένγκε τι κεράς κάτι σο κα κερέλ αμένγκε ζιάνι. Ισί εκ Ντατ σο ντέλα πι βαστένταρ, πφαμπόλα αμένγκε ντα τθερέλα μπαρί αγάπη σαρέ οντουλένγκε σο μανγκένα-λες ντα ντένα-λες λατρεία. Τι αβέν σίγουροι ότι ο Ιεχωβά να κα μουκχέλ-τουμέν κάνα νακχένα προβλήματα σο ανένα ντουκχ τουμαρέ γκίστε. (Εβρ. 13:5, 6) Ο Μαρκ βακερέλα: «Ο Ιεχωβά ποτές να μουκχλάς-αμέν. Νανέ ποτές ντουρ αμένταρ κάνα νακχάσα δυσκολίες». Ο Ιεχωβά κα συνεχίνελ τι ντελ-τουμέν ι “ζορ σο ισί πο μπαρί τουμαρέ ζοριάταρ”. (2 Κορ. 4:7) Βα, μπορίνενα τι ατσσικιαρέν τουμαρί πίστη ντα μα τι τσσιναβέν τι μπεκλεντίνεν ατζέ-ντα κάνα εκ τζενό σο μανγκένα μπουτ μουκχέλα ι Ιεχωβάς.