1. Καβά ισί εκ μπουτ λατσσό στόχος σο μπορίνασα τι τσσουβάς καζόμ μπαριάσα;

ΚΑΖΟΜ μπαριάσα, μπέκιμ τι νταράσα ότι ναστί κα ντας τίποτα λατσσό κο Ιεχωβά σαρ ντάας κάνα ισινάμας τερνέ. Παρόλο σο να ισινάμ αζόμ ζουρανέ καζόμ ισινάμας, μπορίνασα οντουλέντζαρ σο τζανάσα ντα οντουλέντζαρ σο νακχλάμ αμαρέ ζωγιάτε τι βοηθίνας ι πο τερνέν τι ντεν ο πο λατσσό σο τθερένα κι οργάνωση κι Ιεχωβάσκι ντα τι λεν πο μπουτ ευθύνες. Εκ πφραλ σο ισινέ μπουτ μπρεσά πρεσβύτερος βακερντάς: «Κάνα ναστί κεράβας αζόμ μπουτ πράγματα σαρ κεράβας ανγκλέ επειδή πφουρίλιλομ, ισινόμας πφερντό εκτίμηση σο τθεράας πο τερνέν για τι κερέν ο έργος».

2. Σο κα ντικχάς ανταλέ μαθημάστε;

² Κο γιαβέρ μάθημας, ντικχλάμ σαρ βοηθίντιβενα ο πο τερνέ κάνα κερένα ο πο λατσσό για τι αβέν αμαλά ι πφουρέ πφραλέντζαρ ντα πφενίντζαρ. Ανταλέ μαθημάστε, κα ντικχάς ότι, άμα ο πφουρέ πφραλά ντα πφενιά ισί ταπεινοί, αγαβένα πουμαρέ όρια, τθερένα εκτίμηση ντα ντένα πουμαρέ βαστένταρ, κα συνεργαζίντιβεν λατσσές ι πο τερνέντζαρ, ντα αντικάς κα βοηθίντιβελ σαρί η κχανγκιρί.

3. Σο μανγκέλα τι βακερέλ ταπεινότητα σαρ βακερένα ο εδάφια Φιλιππησίους 2:3, 4, ντα σαρ βοηθίνελα εκχέ Χριστιανός;

³ Ο πφουρέ πφραλά πρέπει τι αβέν ταπεινοί για τι βοηθίνεν ι πο τερνέν. Ο τζενό σο ισί ταπεινός πακιάλα ότι ο γιαβερά ισί πο οπρέ λέσταρ. (Διαβάνεν Φιλιππησίους 2:3, 4) Ο πφουρέ σο τθερένα ανταγιά ιδιότητα αγαβένα ότι μπουτ φαρ να υπαρχίντιβελα σάντε εκ Γραφικός ντα λατσσό τρόπος για τι  αβέλ-πες εκ διορισμός. Οτθάρ, να μπεκλεντίνενα καεκχέσταρ τι κερέν ο πράγματα αντικάς σαρ κερένας-λεν βον ανγκλέ. (Εκκλ. 7:​10) Μπορίνενα τι βοηθίνεν ι πο τερνέν κάνα βακερένα λένγκε οντουλά σο τζανένα. Αλλά επίσης αγαβένα ότι «ανταβά ντουνιάς αλλάνελα» ντα ότι μπέκιμ τι χρειαζίντιβελα τι σικλιόν τι κερέν ο πράγματα νεβέ τροπόντζαρ.​—1 Κορ. 7:31.

4. Σαρ κερένα ο επίσκοποι περιοχής οντουβά σο κερένας ο Λευίτες;

⁴ Ο πφουρέ πφραλά σο ισί ταπεινοί αγαβένα ότι, καζόμ μπαριόνα, ναστί κερένα σαρέ οντουλά σο κερένας ανγκλέ. Για παράδειγμας, ανέν τουμαρέ γκοντιάτε αμαρέ επισκοπόν περιοχής. Κάνα πφάντενα ο 70, βακέρντιβελα λένγκε τι λεν εκ γιαβέρ διορισμός. Ανταβά μπέκιμ τι αβέλα λένγκε δύσκολος. Μπεϊντίνενας μπουτ τι υπηρετίνεν πουμαρέ πφραλέν. Ισινέ εκ διορισμός σο μανγκένας-λες μπουτ, ντα ατζέκ ατζέκ μανγκένα μπουτ τι κερέν ανταβά διορισμός. Αγαβένα όμως ότι ισί πο λατσσό τι κερέν ο πο τερνέ ανταβά έργος. Οτθάρ, κερένα οντουβά σο κερένας ο Λευίτες κο πουρανό Ισραήλ, σο έπρεπε τι τσσιναβέν τι υπηρετίνεν κι σκηνή της μαρτυρίας κάνα πφάντενας ο 50. Οντουλά πφουρέ Λευίτες ισινέ χαρούμενοι σο-ντα διορισμός τι τθερένας. Αντράλ πουμαρέ γκίσταρ, κερένας σο νακχέλας λένγκε βαστένταρ ντα βοηθίνενας ι πο τερνέν. (Αριθ. 8:​25, 26) Αντιβές, κάνα ο επίσκοποι περιοχής πφάντενα ο 70, τσσιναβένα τι υπηρετίνεν μπουτέ κχανγκιρίντε, αλλά βοηθίνενα ντα ισί μπαρί ευλογία ι κχανγκιριάκε σο ισί διορισμέ.

5. Σο σικλιόνα κατά Νταν ντα κατά Κέιτι;

 ⁵ Για τι ντικχάς σο αβιλό-πες κο Νταν, σο ισινέ επίσκοπος περιοχής 23 μπρεσά. Κάνα πφαντάς ο 70, ο Νταν ντα λέσκι ρομνί, η Κέιτι, αβιλέ ειδικοί σκαπανείς. Σαρ νακχένα πουμαρέ νεβέ διορισμόστε; Ο Νταν βακερέλα ότι ακανά κερέλα πο μπουτ πράγματα από κάθε γιαβέρ φαρ! Κερέλα ο ευθύνες σο τθερέλα αντρέ κι κχανγκιρί, βοηθίνελα πφραλέν τι τθερέν οντουλά σο χρειαζίντιβενα για τι αβέν διακονικοί υπηρέτες ντα σικλιαρέλα γιαβερέν τι κερέν έργος κο μπαρέ πόλεις ντα κο φυλακές. Πφραλάλεν σο ισινέν πφουρέ, είτε ισινέν κι ολοχρόνια υπηρεσία είτε να ισινέν, τθερένα τι κερέν μπουτ πράγματα για τι βοηθίνεν γιαβερέν. Σαρ; Σικλιόν τι αβέν χαρούμενοι κάνα αλλάνενα ο πράγματα τουμαρέ ζωγιάτε, τσσουβέν νεβέ στόχους ντα τθερέν τουμαρέ γκοντιάτε ο πράγματα σο μπορίνενα τι κερέν ντα όχι ο πράγματα σο ναστί κερένα.

6. Σόσκε ισί γκοντιαβέρ τι αγαβάς αμαρέ όρια; Βακερέν εκ παράδειγμας.

⁶ Ο τζενό σο αγαβέλα πο όρια να μπεκλεντίνελα πι νεαυτόσταρ πο μπουτ πράγματα οντουλένταρ σο μπορίνελα τι κερέλ. (Παρ. 11:2) Αντικάς, ατσσόλα χαρούμενος ντα να τσσιναβέλα τι κερέλ ο πο λατσσό. Κα μπορίναας τι βακεράς ότι ο τζενό σο αγαβέλα πο όρια ισί σαρ εκ τζενό σο οδηγίνελα εκχέ ντρομέστε σο ισί ικούσι. Ο τζενό σο οδηγίνελα πρέπει τι γουλιαρέλ ταχύτητα για τι νικλίλ ο ικούσι. Ισί μπαγιά ότι μάλλον κα τζαλ πο σιγά, αλλά αντικάς να κα τσσιναβέλ τι τσσίντελ. Αντικάς ο τζενό-ντα σο αγαβέλα πο όρια, τζανέλα κάνα πρέπει τι γουλιαρέλ ταχύτητα, σαρ τι βακεράας, για τι συνεχίνελ τι υπηρετίνελ ι Ιεχωβάς ντα τι βοηθίνελ γιαβερέν.​—Φιλιπ. 4:5.

7. Σαρ σικαντάς ο Βαρζελαΐ ότι ισινέ εκ τζενό σο αγαβέλας πο όρια;

⁷ Σκεφτίνεν σο κερντάς ο Βαρζελαΐ, σο ισινέ 80 μπρεσένγκο κάνα ο βασιλιάς Δαβίδ βακερντάς λέσκε τι αβέλ εκ κατά γκοντιαβέρ τζενέ σο τθερέλας πασέ πέστε. Επειδή ισινέ εκ τζενό σο αγαβέλας πο όρια, να μανγκλάς τι κερέλ οντουβά σο βακερντάς λέσκε ο βασιλιάς. Ο Βαρζελαΐ τζανέλας ότι ναστί κερέλας μπουτ πράγματα σόσκε ισινέ μπαρό, οτθάρ βακερντάς τι τζαλ λέσκε θεσιάτε εκ πο τερνό μουρς, ο Χιμάμ. (2 Σαμ. 19:​35-37) Σαρ ο Βαρζελαΐ, ο πφουρέ πφραλά χαιρίνενα τι μουκχέν ι πο τερνέ μουρσέν τι κερέν ο έργος.

8. Σαρ σικαντάς ο βασιλιάς Δαβίδ ότι αγαβέλας πο όρια κάνα μανγκέλας τι κερέλ ο ναός;

⁸ Ο βασιλιάς Δαβίδ-ντα ισινέ εκ τζενό σο αγαβέλας πο όρια. Μανγκέλας σαρέ πι γκίσαρ τι κερέλ εκ κχερ ι Ιεχωβάσκε. Αλλά κάνα ο Ιεχωβά βακερντάς λέσκε ότι ανταβά προνόμιος κα ντιντιόλας κο τερνό Σολομώντας, ο Δαβίδ ντινάς καν ι Ιεχωβάς ντα κερντάς σο νακχέλας λέσκε βαστένταρ για τι βοηθίνελ τι κερντιόλ ο ναός. (1 Χρον. 17:4· 22:5) Ο Δαβίδ να πακιάλας ότι βοβ κα αβέλας πο λατσσό ανταλέ διορισμόστε επειδή ο Σολομών ισινέ “τερνό ντα να τζανέλας μπουτ πράγματα”. (1 Χρον. 29:1) Ο Δαβίδ τζανέλας ότι ο πο σημαντικός για τι κερντιόλ ο ναός ισινέ τι τθερέν ι ευλογία ι Ιεχωβάσκι, όχι εκχέ μπαρέ τζενές σο κα τζανέλας τι κερέλ μπουτ πράγματα. Σαρ ο Δαβίδ, αντικάς ο πφουρέ πφραλά-ντα αντιβές κερένα ο πο λατσσό κι υπηρεσία κι Ιεχωβάσκι ατζέ-ντα κάνα αλλάνελα λένγκο διορισμός. Ντα τζανένα ότι ο Ιεχωβά κα ευλογίνελ ι τερνέν σο κερένα οντουβά σο κερένας βον ανγκλέ.

9. Σαρ σικαντάς εκ πφραλ σο ισί κι Επιτροπή Τμήματος ότι αγαβέλα πο όρια;

⁹ Αμαρέ ντιβεσέντε, εκ πφραλ σο βακερένα λέσκε Σίγκεο σικαντάς ότι αγαβέλα πο όρια. Κο 1976, σο ισινέ 30 μπρεσένγκο, υπηρετιντάς σε εκ Επιτροπή Τμήματος. Κο 2004, αβιλό συντονιστής κι Επιτροπή Τμήματος. Σοράν, αγαντάς ότι να ισινέ αζόμ ζουρανό καζόμ ισινέ ανγκλέ ντα ότι λέλας-λες  πο μπουτ σαάτι για τι κερέλ πι μπουτί. Κερντάς προσευχή ανταλέσκε ντα σκεφτιντάς σόσκε κα αβέλας πο λατσσό τι λελ λέσκε ευθύνες εκ πο τερνό πφραλ. Παρόλο σο ακανά νανέ συντονιστής, ο Σίγκεο ατζέκ ατζέκ ισί κι Επιτροπή Τμήματος ντα κερέλα μπουτί γιεκ ι γιαβερέ πφραλέντζαρ. Κατά Βαρζελαΐ, κατά βασιλιάς Δαβίδ ντα κατά Σίγκεο αγαβάσα ότι εκ τζενό σο ισί ταπεινός ντα αγαβέλα πο όρια ντικχέλα, όχι οντουλά σο να τζανένα τι κερέν ο πο τερνέ, αλλά οντουλά σο τζανένα μπουτ λατσσές τι κερέν. Να ντικχέλα-λεν σαρ ντουσμάνια, αλλά σαρ συνεργάτες.​—Παρ. 20:29.

10. Σαρ ντικχένα ο πφουρέ πφραλά ι πο τερνέν κι κχανγκιρί;

¹⁰ Ο πφουρέ πφραλά ντικχένα ι πο τερνέν σαρ δώρα κατά Ιεχωβά ντα εκτιμίνενα οντουλά σο κερένα. Καζόμ λένγκι ζορ αβέλα πο χάνικ, ο πφουρέ πφραλά ισί πφερντέ εκτίμηση σο ο πο τερνέ μανγκένα αντράλ πουμαρέ γκίσταρ τι κερέν ο έργος ντα τι υπηρετίνεν ι κχανγκιρί.

11. Σαρ σικαβένα ο εδάφια Ρουθ 4:​13-16 ότι ο πφουρέ πφραλά ντα πφενιά κα ευλογίντιβεν κάνα μουκχένα ι πο τερνέν τι βοηθίνεν-λεν;

¹¹ Κι Γραφή, η Ναομί ισί εκ μπουτ λατσσό παράδειγμας πφουρέ τζενιάκο σο εκτιμιντάς ι βοήθεια εκχέ πο τερνέ τζουβλιάκι. Κι αρχή, η Ναομί βακερντάς πι μποριάκε, κι Ρουθ, τι βουρτίνελ πι φαμιλιάτε. Αλλά κάνα βόι μανγκλάς τι τζαλ κι Βηθλεέμ λάσαρ, η Ναομί μουκχλάς-λα τι βοηθίνελ-λα. (Ρουθ 1:7, 8, 18) Ντα ανταβά ισινέ μπαρί ευλογία ι ντουένγκε-ντα! (Διαβάνεν Ρουθ 4:​13-16) Ο πφουρέ πφραλά ντα πφενιά σο ισί ταπεινοί κα κερέν βον-ντα οντουβά σο κερντάς η Ναομί.

12. Σαρ σικαντάς ο απόστολος Παύλος πι εκτίμηση;

¹² Ο απόστολος Παύλος εκτιμίνελας μπουτ ι βοήθεια σο ντένας-λες ο πφραλά. Για παράδειγμας, βακερντάς ευχαριστώ ι  Χριστιανόνγκε κο Φιλίππους ι πραγματένγκε σο μπουτσσαντέας λέσκε. (Φιλιπ. 4:​16) Βακερντάς καζόμ μπουτ εκτιμίνελας ι βοήθεια σο ντινάας-λες ο Τιμόθεος. (Φιλιπ. 2:​19-22) Ντα βακερντάς ευχαριστώ κο Ντεβέλ ι πφραλένγκε σο αβιλέας για τι ντεν-λες ζορ καζόμ τζάλας κι Ρώμη φυλακισμέ. (Πράξ. 28:​15) Ο Παύλος ισινέ εκ τζενό σο τθερέλας τι κερέλ μπουτ πράγματα ντα κερντάας χιλιάδες χιλιόμετρα για τι βακερέλ ο λατσσέ αμπέρια ντα τι ντελ ζορ κο κχανγκιριά. Αλλά ισινέ ταπεινός ντα μανγκέλας βοήθεια πι πφραλένταρ ντα πι πφενίνταρ.

13. Σαρ μπορίνενα ο πφουρέ πφραλά τι σικαβέν πουμαρί εκτίμηση ι πο τερνένγκε;

¹³ Πφραλάλεν σο ισινέν πφουρέ, μπορίνενα τι σικαβέν τουμαρί εκτίμηση ι πο τερνένγκε κι κχανγκιρί μπουτέ τροπόντζαρ. Άμα ο πο τερνέ μανγκένα τι γκερέν-τουμέν κάπου, τι βοηθίνεν-τουμέν τι ψωνίνεν ή τι κερέν κάτι γιαβέρ σο τθερένα ανάγκη, μουκχέν-λεν τι βοηθίνεν-τουμέν ντα τι αβέν πφερντέ εκτίμηση ανταλέσκε. Τι ντεν-τουμέν γκοντί ότι λένγκι βοήθεια ισί εκ τρόπος για τι σικαβέλ ο Ιεχωβά ότι μανγκέλα-τουμέν. Μπέκιμ τι αρχίνεν τι αβέν μπουτ λατσσέ αμαλά οντουλέντζαρ σο βοηθίνενα-τουμέν. Τι κερέν πάντα ο πο λατσσό για τι βοηθίνεν τουμαρέ τερνέ πφραλέν τι αβέν πο πασέ κο Ιεχωβά ντα τι βακερέν λένγκε καζόμ μπουτ χαιρίνενα σο ντικχένα τερνέν τι κερέν πο μπουτ πράγματα για τι βοηθίνεν κι κχανγκιρί. Ντα τι μανγκέν αντράλ τουμαρέ γκίσταρ τι ντεν τουμαρέ σαατίσταρ για τι βακερέν λένγκε πράγματα τουμαρέ ζωγιάταρ. Κάνα κερένα-λες ανταβά, κα «σικαβέν εκτίμηση» κο Ιεχωβά ι πο τερνένγκε σο τραμπιντάς τι τθερέλ κι κχανγκιρί.​—Κολ. 3:​15· Ιωάν. 6:​44· 1 Θεσ. 5:18.

14. Σαρ σικαντάς ο βασιλιάς Δαβίδ ότι ντέλας πι βαστένταρ;

¹⁴ Κατά παράδειγμας ι Δαβιδίσκο αγαβάσα ατζέκ εκ σημαντική ιδιότητα σο πρέπει τι τθερέν ο πφουρέ πφραλά​—τι ντεν πουμαρέ βαστένταρ. Ο Δαβίδ ντινάς μπουτ λοβέ ντα πολύτιμα πράγματα σο τθερέλας για τι κερντιόλ ο ναός. (1 Χρον. 22:​11-16· 29:3, 4) Κερντάς-λες ανταβά παρόλο σο ο τζενέ κα βακερένας ότι ο Σολομώντας κερντάς ο ναός. Κάνα να ισινάμ ζουρανέ για τι βοηθίνας τι κερντιόν κτίρια κι οργάνωση κι Ιεχωβάσκι, μπορίνασα τι βοηθίνας καζόμ αβέλα-πες αμαρέ λοβέντζαρ. Επίσης, μπορίνασα τι βοηθίνας ι πο τερνέν τι βοηθίντιβεν οντουλένταρ σο σικλιλάμ ο μπρεσά σο νακχλέ.

15. Καλά σημαντικά δώρα ντινάς ο απόστολος Παύλος κο Τιμόθεος;

¹⁵ Σκεφτίνεν σαρ ντέλας πι βαστένταρ ο απόστολος Παύλος. Ο Παύλος βακερντάς κο Τιμόθεος τι τζαλ λέσαρ κο ιεραποστολικά ταξίδια ντα σικλιαρντάς ανταλέ πο τερνέ μουρσές μπουτ τρόπους για τι βακερέλ ντα τι σικλιαρέλ ο λατσσέ αμπέρια. (Πράξ. 16:​1-3) Ο σικλιαριπέ ι Παυλόσκο βοηθιντάς ι Τιμοθεός τι βακερέλ ντα τι σικλιαρέλ ο λατσσέ αμπέρια εκχέ μπουτ λατσσέ τροπόσαρ. (1 Κορ. 4:​17) Σοράν, ο Τιμόθεος χρησιμοποιηντάς οντουλά σο σικλιλό κατά Παύλος για τι σικλιαρέλ γιαβερέν.

16. Σόσκε σικλιαρέλας γιαβερέν ο Σίγκεο;

¹⁶ Ο πφουρέ πφραλά αντιβές να νταρένα ότι να κα μπορίνεν τι ντεν τίποτα λατσσό κο Ιεχωβά άμα κα σικλιαρέν ι πο τερνέν τι κερέν ο μπουτιά σο κερένας βον ανγκλέ κι κχανγκιρί. Για παράδειγμας, για μπουτ μπρεσά, ο Σίγκεο σικλιαρέλας ι πο τερνέν σο ισινέ κι Επιτροπή Τμήματος. Κερντάς-λες ανταβά για τι βοηθίνελ τι αβέλ-πες ο έργος ι Βασιλειάκο κο τθεμ σο υπηρετίνελας. Οτθάρ, κάνα τσσιναντάς τι αβέλ συντονιστής, λιντάς λέσκι θέση εκ πφραλ σο σικλιλόας μπουτ λατσσές ι μπουτί. Ο Σίγκεο ισί κι Επιτροπή Τμήματος πο μπουτ από 45 μπρεσά ντα να τσσιναντάς τι βακερέλ οντουλά σο σικλιλό για τι βοηθίνελ ι πο τερνέ πφραλέν. Σο μπαρί ευλογία ισί ασακέ τζενέ ι Ντεβλέσκε λαόσκε!

17. Σο μπορίνενα τι ντεν ο πφουρέ πφραλά κο γιαβερά σαρ βακερέλα ο εδάφιος Λουκάς 6:38;

 ¹⁷ Πφραλάλεν ντα πφενιάλεν σο ισινέν πφουρέ σικαβένα μπουτ λατσσές ότι για τι τθερέλ εκ τζενό ι πο λατσσί ζωή πρέπει τι υπηρετίνελ πιστά ντα σαστέ γκίσαρ ι Ιεχωβάς. Τουμαρέ παραδειγμάσαρ, σικαβένα ότι αξίνελα τι σικλιόλ εκ τζενό ο αρχές ι Γραφιάκε ντα τι κερέλ-λεν πι ζωγιάτε. Τζανένα μπουτ λατσσές σαρ αβένας-πες ο πράγματα ανγκλέ, αλλά αγαβένα ότι πρέπει τι σικλιόν τι κερέν ο πράγματα εκχέ νεβέ τροπόσαρ. Τουμέν-ντα πφραλάλεν σο μπολντιλέν ακανά σο ισινέν πφουρέ μπορίνενα τι βοηθίνεν μπουτέ τροπόντζαρ. Μπορίνενα τι βακερέν καζόμ χαρούμενος ισί εκ τζενό σο σικλιλό ι Ιεχωβάσκε πο σοράν πι ζωγιάτε. Ο πο τερνέ κα χαιρίνεν τι ασουνέν οντουλά σο νακχλέν ντα σικλιλέν τουμαρέ ζωγιάτε. Άμα βακερένα οντουλά σο σικλιλέν τουμαρέ ζωγιάτε για τι σικλιαρέν γιαβερέν, ο Ιεχωβά κα ευλογίνελ-τουμέν μπουτ!​—Διαβάνεν Λουκάς 6:38.

18. Σαρ μπορίνενα ο πφουρέ ντα ο πο τερνέ πφραλά τι βοηθίνεν ο εκ ι γιαβερές;

¹⁸ Κάνα τουμέν πφραλάλεν σο ισινέν πφουρέ αβένα λατσσέ αμαλά ι πο τερνέντζαρ, κα μπορίνεν τι βοηθίνεν ο εκ ι γιαβερές. (Ρωμ. 1:​12) Ο κάθε εκ τθερέλα κάτι σημαντικός σο να τθερέλα-λες ο γιαβέρ. Ο πφουρέ πφραλά τζανένα ντα νακχλέ μπουτ πράγματα πουμαρέ ζωγιάτε. Ο πο τερνέ ισί ζουρανέ. Κάνα ο τερνέ ντα ο πφουρέ κερένα μπουτί σαρ αμαλά, δοξάνενα αμαρέ Νταντές, ι Ιεχωβάς, σο μανγκέλα-αμέν μπουτ ντα ισί ευλογία σαριλένγκε κι κχανγκιρί.