1. Καλά μπουτ σουκάρ πράγματα μπεκλεντίνασα τι ντικχάς τι αβέν-πες κι Βασιλεία κι Χίλιε Μπρεσένγκι;

 ΚΑΖΟΜ σουκάρ κα αβέλ ο ντιβές σο κα αρχίνελ η ανάσταση ατθέ κι πφουβ κο Χίλια Μπρεσά κι Χριστόσκε Βασιλειάκε! Σαρέ οντουλά σο χασαρντέ κο μεριπέ αγαπημέ τζενέν μπεκλεντίνενα σαρ σαρ τι ντικχέν-λεν πάλι. Ανταβά μπεκλεντίνελα ο Ιεχωβά-ντα. (Ιώβ 14:​15) Ανέν τουμαρέ γκοντιάτε καζόμ χαρά κα αβέλ σαρί κι πφουβ κάνα κα ντικχέν πάλι πουμαρέ αγαπημέ τζενέν. Σαρ ντικχλάμ κο γιαβέρ μάθημας, “ο δίκαιοι”, σο λένγκε ναβά ισί γραμμέ κο βιβλίος κι ζωγιάκο, κα “αναστίντιβεν για τι τζουβντιόν”. (Πράξ. 24:​15· Ιωάν. 5:​29) Μπέκιμ μπουτ αμαρέ αγαπημέ τζενένταρ κα ιστίν κατά μεριπέ κάνα κα αρχίνελ η ανάσταση κι πφουβ. * Ατζέ, ο άδικοι, σαρ οντουλά σο να τθερένας ι ευκαιρία τι σικλιόν ι Ιεχωβάσκε ή τι υπηρετίνεν-λες πιστά πριν τι μερέν, “κα αναστίντιβεν για τι κρίντιβεν”.

2, 3. (α) Καβά κα αβέλ ο πο μπαρό πρόγραμμας σικλιαριμάσκο σο αβιλό-πες ποτές σαρ αγαβάσα κατά εδάφια Ησαΐας 11:9, 10; (β) Σο κα ντικχάς ανταλέ μαθημάστε;

² Σαρέ ο αναστημέ κα χρειαζίντιβεν σικλιαριπέ. (Ησ. 26:9· 61:​11) Οτθάρ, κα χρειαζίντιβελ τι κερντιόλ ο πο μπαρό πρόγραμμας σικλιαριμάσκο σο αβιλό-πες ποτές. (Διαβάνεν  Ησαΐας 11:9, 10) Σόσκε; Εκ λόγος ισί ότι ο άδικοι σο κα ιστίν κατά μεριπέ κα χρειαζίντιβελ τι σικλιόν ι Ιησού Χριστόσκε, ι Βασιλειάκε, ι λυτρόσκε, ι Ιεχωβάσκε μπουτ σημαντικέ ναβέσκε ντα ι δικαιωμάσκε σο τθερέλα σάντε Βοβ τι κυβερνίνελ. Ατζέ-ντα ο δίκαιοι κα χρειαζίντιβελ τι σικλιόν σο μουτθαντάς ο Ιεχωβά χάνικ χάνικ κο τζενέ ι σκοπόσκε σο τθερέλα ι πφουβιάκε. Μερικοί ανταλέ πιστέ τζενένταρ μουλέ μπουτ βακίτι πριν τι νικιόλ σαρί η Αγία Γραφή. Εμ ο άδικοι εμ ο δίκαιοι κα τθερέν μπουτ πράγματα τι σικλιόν.

³ Ανταλέ μαθημάστε, κα ντικχάς ακαλά ερωτήσεις: Σαρ κα αβέλ-πες ανταβά μπαρό πρόγραμμας σικλιαριμάσκο; Σο κα αβέλ-πες κο τζενέ σο κα ντεν καν κο σικλιαριπέ ανταλέ προγραμμάσκο ντα κο τζενέ σο να κα ντεν; Ο απαντήσεις ανταλέ ερωτησιέντε ισί μπουτ σημαντικές αμένγκε αντιβές. Σαρ κα ντικχάς, μερικές μπουτ σουκάρ προφητείες σο ισί κο βιβλία Δανιήλ ντα Αποκάλυψη κα βοηθίνεν-αμέν τι αγαβάς πο λατσσές σο κα αβέλ-πες κάνα κα ιστίν ο μουλέ. Πρώτα, κα ντικχάς ο μπουτ σουκάρ πράγματα σο βακέρντιβενα κο εδάφια Δανιήλ 12:1, 2.

4, 5. Σο σικαβέλα αμένγκε ο εδάφιος Δανιήλ 12:1 ι τελευταίε ντιβεσένγκε;

⁴ Διαβάνεν Δανιήλ 12:1. Ο βιβλίος Δανιήλ σικαβέλα καλέ σειράσαρ κα αβέν-πες μερικά πράγματα κο τελευταία ντιβεσά. Για παράδειγμας, ο εδάφιος Δανιήλ 12:1 σικαβέλα ότι ο Μιχαήλ, σο ισί ο Ιησούς Χριστός, «κερέλα λατσσιπέ [ι Ντεβλέσκε] λαόσκε». Ανταβά κομμάτι ι προφητειάκο αρχισάλο τι νικιόλ μπαγιά κο 1914, κάνα ο Ιησούς αβιλό Βασιλιάς κι Βασιλεία κι Ντεβλέσκι κο ουρανός.

⁵ Όμως, κο Δανιήλ βακέρντιλο επίσης ότι ο Ιησούς “κα ιστίλας” κάνα κα αβέλας ασακό «βακίτι στεναχώριας σο να αβιλό από αζομάν σο κερντιλό ο πρώτος λαός μέχρι οντουλέ βακιτίστε». Ανταβά «βακίτι στεναχώριας» ισί η «μπαρί στεναχώρια» σο βακέρντιβελα κο εδάφιος Ματθαίος 24:​21. Ο Ιησούς ιστίλα, ή γιαβέρτουλους κερέλα πράγματα για τι αρακχαβέλ ι Ντεβλέσκε λαός, κο τέλος ανταλέ στεναχωριάκο, δηλαδή κο Αρμαγεδδώνας. Ο βιβλίος Αποκάλυψη βακερέλα ότι βον ισί ο “μπαρό πλήθος σο αβέλα κατά μπαρί στεναχώρια”.​—Αποκ. 7:9, 14.

6. Σο αβέλα-πες σοράν κατά μπαρί στεναχώρια σο κα σώντιβελ ο μπαρό πλήθος; Εξηγίνεν. (Ντικχέν ο θέμας-ντα «Ο Τζενέ σο Διαβάνενα Πουτσένα» σο ισί ανταλέ περιοδικόστε ντα σο τθερέλα τι κερέλ οντουλέντζαρ σο κα ιστίν κατά μεριπέ για τι τζουβντιόν κι πφουβ)

⁶ Διαβάνεν Δανιήλ 12:2. Σο αβέλα-πες σοράν ανταλέ στεναχωριάταρ σο κα σώντιβελ ο μπαρό πλήθος; Ανταγιά προφητεία να βακερέλα ότι αβέλα-πες εκ συμβολική ή πνευματική ανάσταση ι Ντεβλέσκε υπηρετόνγκι κο τελευταία ντιβεσά, σαρ αγαβάας ανγκλέ. * Οκιά μπάνταρ, ανταλά λάφια βακερένα ότι κα αβέλ-πες ανάσταση μουλένγκι κο νεβό ντουνιάς σο μπεκλεντίνασα. Σόσκε βακεράσα-λες ανταβά; Ο λάφι «τσικ» ισί κο εδάφιος-ντα Ιώβ 17:​16 ντα τθερέλα ο ίδιος νόημας ι λαφίσαρ “Μεζάρι”. Ανταβά μανγκέλα τι βακερέλ ότι κο εδάφιος Δανιήλ 12:2 κερντιόλα λάφι ι μουλένγκε σο κα ιστίν σοράν κατά τέλος ι τελευταίε ντιβεσένγκο ντα σοράν κατά Αρμαγεδδώνας.

7. (α) Σο μανγκέλα τι βακερέλ ότι μερικοί κα ιστίν κατά μεριπέ για «τι τζουβντιόν για πάντα»; (β) Σόσκε ανταγιά ισί «πο λατσσί ανάσταση»;

⁷ Σο μανγκέλα όμως τι βακερέλ ο εδάφιος Δανιήλ 12:2 κάνα βακερέλα ότι μερικοί κα ιστίν κατά μεριπέ για «τι τζουβντιόν  για πάντα»; Ανταβά μανγκέλα τι βακερέλ ότι οντουλά σο κα ιστίν κατά μεριπέ ντα να κα τσσιναβέν τι σικλιόν εμ ι Ιεχωβάσκε εμ ι Ιησούσκε ντα κα ντεν καν λέντε κο 1.000 μπρεσά, κα λεν τελικά ζωή για πάντα. (Ιωάν. 17:3) Ανταγιά κα αβέλ «πο λατσσί ανάσταση» οντουλάταρ σο τθερένας μερικά τζενέ ανγκλέ. (Εβρ. 11:​35) Σόσκε; Σόσκε οντουλά ατελείς τζενέ μουλέ πάλι.

8. Σο μανγκέλα τι βακερέλ ότι γιαβερά τζενέ κα ιστίν κατά μεριπέ «για τι λατζάντιβεν ντα για τι κερντιόν πέρα για πάντα»;

⁸ Αλλά να κα ντεν καν κο πρόγραμμας σικλιαριμάσκο ι Ιεχωβάσκο σαρέ οντουλά σο κα ιστίν κατά μεριπέ. Η προφητεία ι Δανιηλίσκι βακερέλα ότι μερικοί κα ιστίν «για τι λατζάντιβεν ντα για τι κερντιόν πέρα για πάντα». Επειδή κα τζαν κόντρα, λένγκε ναβά να κα γραφίντιβεν κο βιβλίος κι ζωγιάκο, ντα βον να κα λεν ζωή για πάντα. Οκιά μπάνταρ, κα «κερντιόν πέρα για πάντα», δηλαδή κα καταστραφίντιβεν. Άρα, ο εδάφιος Δανιήλ 12:2 βακερέλα σο κα αβέλ-πες σαρέ κο αναστημέ ιτιρί οντουλένταρ σο κα κερέν σοράν κατά ανάσταση. * (Αποκ. 20:​12) Μερικοί κα τζουβντιόν για πάντα ντα γιαβερά να κα τζουβντιόν.

9, 10. Σο γιαβέρ κα αβέλ-πες σοράν κατά μπαρί στεναχώρια, ντα κον ισί οντουλά σο «κα λεν-πες σαρ ο φως σο ισί κο ουρανός»;

⁹ Διαβάνεν Δανιήλ 12:3. Σο γιαβέρ κα αβέλ-πες σοράν κατά “βακίτι στεναχώριας” σο μπεκλεντίνασα; Σοράν κατά εδάφιος Δανιήλ 12:2, ο εδάφιος 3 βακερέλα κάτι ατζέ σο κα αβέλ-πες σοράν κατά μπαρί στεναχώρια.

¹⁰ Κον ισί οντουλά σο «κα λεν-πες σαρ ο φως σο ισί κο ουρανός»; Ο λάφια ι Ιησούσκε κο εδάφιος Ματθαίος 13:​43 βοηθίνενα-αμέν τι αγαβάς κον ισί: «Οντουβά βακίτι ο δίκαιοι κα λεν-πες αζόμ μπουτ σαρ ο κχαμ κι Βασιλεία λένγκε Νταντέσκι». Πο τζανγκλέ ανταλέ εδαφιόσταρ, ο Ιησούς κερέλας λάφι “ι Βασιλειάκε τσσαβένγκε”, πι χρισμέ πφραλένγκε, σο κα υπηρετίνεν λέσαρ κι Βασιλεία κο ουρανός. (Ματθ. 13:​38) Οτθάρ, κο εδάφιος Δανιήλ 12:3 πρέπει τι κερντιόλα λάφι ι χρισμένγκε ντα ι πραγματένγκε σο κα κερέν κι Βασιλεία κι Χίλιε Μπρεσένγκι.

11, 12. Καλά πράγματα κα κερέν ο 144.000 κο 1.000 μπρεσά;

¹¹ Σαρ κα ανέν ο χρισμέ «ι μπουτέν κι δικαιοσύνη»; Ο χρισμέ κα συνεργαζίντιβεν γιεκ ι Ιησού Χριστόσαρ για τι κερέν κουμάντος ο πρόγραμμας σικλιαριμάσκο σο κα αβέλ-πες ατθέ κι πφουβ κο 1.000 μπρεσά. Ο 144.000 κα αβέν εμ βασιλιάδες εμ ιερείς. (Αποκ. 1:6· 5:​10· 20:6) Οτθάρ, κα βοηθίνεν κο “σαστιαριπέ κι τθεμένγκο” για τι αβέν πάλι ο τζενέ χάνικ χάνικ τέλειοι. (Αποκ. 22:1, 2· Ιεζ. 47:​12) Σο μπαρί χαρά κα τθερέν ο χρισμέ!

¹² Καλά τζενέ κα αβέν αντρέ κο “μπουτ” σο αβένα κι δικαιοσύνη; Αντρέ ανταλέντε κα αβέν οντουλά σο κα ιστίν κατά μεριπέ, αλλά οντουλά-ντα σο κα νακχέν τζουβντέ κατά Αρμαγεδδώνας γιεκ ι τσσαβέντζαρ σο μπορεί τι μπιάντιβεν κο νεβό ντουνιάς. Κάνα κα μπιτίνεν ο 1.000 μπρεσά, σαρέ οντουλά σο κα τζουβντιόν κι πφουβ κα αβέν τέλειοι. Κάνα κα γραφίντιβεν λένγκε ναβά κο βιβλίος κι ζωγιάκο μελανίσαρ χωρίς τι σβήντιβεν ντα όχι μολυβίσαρ;

13, 14. Σο κα χρειαζίντιβελ τι σικαβέν σαρέ ο τέλεια τζενέ κι πφουβ πριν τι λεν ζωή για πάντα;

¹³ Πρέπει τι ντας-αμέν γκοντί ότι η τελειότητα  να μανγκέλα τι βακερέλ ότι εκ τζενό κα λελ αυτόματα ζωή για πάντα. Ανέν τουμαρέ γκοντιάτε ι Αδαμίς ντα ι Ευά. Βον ισινέ τέλειοι, αλλά χρειαζίντιβελας τι σικαβέν ότι ντένα καν κο Ιεχωβά Ντεβέλ πριν τι ντιντιόλας-λεν ζωή για πάντα. Ντα δυστυχώς να ντινέ καν.​—Ρωμ. 5:12.

¹⁴ Σαρ κα αβέν οντουλά σο κα τζουβντιόν κι πφουβ κάνα κα μπιτίνεν ο 1.000 μπρεσά; Κα αβέν σαρέ τέλειοι. Κα σικαβέν σαρέ οντουλά τέλεια τζενέ ότι μανγκένα για πάντα σαρέ πουμαρέ γκίσαρ τι κερέλ-λεν κουμάντος ο Ιεχωβά; Ή μερικοί κα αβέν σαρ ο Αδάμ ντα η Εύα​—σο να σικαντέ πίστη παρόλο σο ισινέ τέλειοι; Χρειαζίντιβελα τι ντιντιόλ απάντηση ανταλέ ερωτησιέντε. Αλλά σαρ κα αβέλ-πες ανταβά;

15, 16. (α) Κάνα κα ντιντιόλ σαρέ κο τζενέ η ευκαιρία τι σικαβέν πουμαρί αφοσίωση κο Ιεχωβά; (β) Σο κα αβέλ-πες σοράν ανταλέ τελευταίε δοκιμασιάταρ;

¹⁵ Ο Μπενγκ κα αβέλ πφαντό καζόμ κα ατσσικιαρέν ο 1.000 μπρεσά. Οντουβά βακίτι, ναστί κα χουχαβέλ καεκχές. Όμως, κάνα κα μπιτίνεν ο 1.000 μπρεσά, ο Μπενγκ κα πουτάρντιβελ. Σοράν, κα προσπαθίνελ τι χουχαβέλ ι τέλειε τζενέν. Οντουλέ δοκιμασιάτε, σαρέ ο τέλεια τζενέ κι πφουβ κα τθερέν ι ευκαιρία τι σικαβέν ντιπ λατσσές άμα μανγκένα τι κερέλ-λεν κουμάντος ο Ντεβέλ ντα άμα σεβάνενα λέσκο ναβ. (Αποκ. 20:​7-10) Οντουβά  σο κα κερέλ ο κάθε εκ αζομάν κα σικαβέλ άμα λέσκο ναβ πρέπει τι γραφίντιβελ κο βιβλίος κι ζωγιάκο χωρίς τι σβήντιβελ.

¹⁶ Μερικά τζενέ, σο να τζανάσα καζόμ ντανέ κα αβέν, κα σικαβέν ότι ισί σαρ ο Αδάμ ντα η Εύα ντα να κα μανγκέν τι κερέλ-λεν κουμάντος ο Ιεχωβά. Σο κα αβέλ-πες λέντζαρ; Ο εδάφιος Αποκάλυψη 20:​15 βακερέλα αμένγκε: «Κον να ισινέ γραμμέ κο βιβλίος κι ζωγιάκο φουρτίντιλο κι λίμνη κι γιακάκι». Βα, οντουλά σο κα τζαν κόντρα κα καταστραφίντιβεν ντιπ ντα για πάντα. Αλλά ο πο μπουτ κατά τέλεια τζενέ κα ατσσόν αφοσιωμέ κο Ιεχωβά ανταλέ τελευταίε δοκιμασιάτε. Αζομάν, λένγκε ναβά κα γραφίντιβεν κο βιβλίος κι ζωγιάκο χωρίς τι σβήντιβεν.

17. Σο βακερντάς ο άγγελος κο Δανιήλ ότι κα αβέλας-πες αμαρέ ντιβεσέντε; (Δανιήλ 12:4, 8-10)

¹⁷ Σο σουκάρ ισί τι σκεφτίνας σαρέ ανταλά πράγματα σο κα αβέν-πες! Όμως, ο Δανιήλ σικλιλό κατά άγγελος μερικά πράγματα-ντα σο κα αβέν-πες αμαρέ ντιβεσέντε, κο «τελευταία ντιβεσά». (Διαβάνεν Δανιήλ 12:4, 8-10· 2 Τιμ. 3:​1-5) Ο άγγελος βακερντάς λέσκε: «Ο αληθινός σικλιαριπέ κα αβγατίντιβελ». Βα, ο λαός ι Ντεβλέσκο κα αγαβέλας πο  λατσσές ο προφητικά λάφια σο γραφιντάς ο Δανιήλ πι βιβλιόστε. Ο άγγελος βακερντάς επίσης ότι ανταλέ βακιτίστε “ο πφιρνέ κα κερένας πράγματα πφιρνιμάσαρ, ντα καέκ πφιρνό να κα αγαβέλας”.

18. Σο κα αβέλ-πες ατζεχάνικ κο πφιρνέ;

¹⁸ Αντιβές, μπέκιμ ντικχίντιβελα ότι ο πφιρνέ να τιμωρίντιβενα οντουλένγκε σο κερένα. (Μαλ. 3:​14, 15) Ατζεχάνικ όμως ο Ιησούς κα κρίνελ ι τζενέν σο ισί σαρ “μπουσνιά” ντα κα χωρίνελ-λεν κατά τζενέ σο ισί σαρ “μπρακέ”. (Ματθ. 25:​31-33) Ανταλά πφιρνέ να κα νακχέν κατά μπαρί στεναχώρια, ούτε κα ιστίν κατά μεριπέ για τι τζουβντιόν κο νεβό ντουνιάς. Λένγκε ναβά να κα αβέν κο “βιβλίος οντουλένγκε σο τθερέλα-λεν ο Ιεχωβά πι γκοντιάτε” σο βακέρντιβελα κο εδάφιος Μαλαχίας 3:16.

19. Σο πρέπει τι κεράς ακανά, ντα σόσκε; (Μαλαχίας 3:​16-18)

¹⁹ Ακανά ισί ο βακίτι τι σικαβάς ότι να ισινάμ αντρέ κο πφιρνέ. (Διαβάνεν Μαλαχίας 3:​16-18) Ο Ιεχωβά γκίντελα οντουλέν σο ισί “σάντε λέσκε”, δηλαδή οντουλέν σο ισί πολύτιμοι λέσκε. Σίγουρα, μανγκάσα τι αβάς αμέν-ντα αντρέ οντουλέ τζενέντε.

20. Καβά τελευταίος λάφι ντινάς ο Ιεχωβά κο Δανιήλ, ντα σόσκε μπεκλεντίνενα τι νικιόλ μπαγιά ανταβά λάφι;

²⁰ Μπαγιά, τζουβντιάσα μπουτ σουκάρ βακιτίστε, αλλά οντουλά σο κα αβέν-πες ισί μπουτ πο σουκάρ. Ατζεχάνικ, κα ντικχάς τι καταστραφίντιβελ σαρό ο πφιρνιπέ. Σοράν, κα ντικχάς τι νικιόλ μπαγιά ο λάφι σο ντινάς ο Ιεχωβά κο Δανιήλ: «Κα ιστίς τι λες ι θέση σο κα ντιντιόλ-τουτ κάνα κα τελειώνεν ο ντιβεσά». (Δαν. 12:​13) Μπεκλεντίνενα τουμέν σαρ σαρ τι αβέλ ο ντιβές σο ο Δανιήλ, γιεκ τουμαρέ αγαπημέ τζενέντζαρ, κα “ιστίλ” πάλι; Άμα βα, κερέν σο νακχέλα τουμαρέ βαστέσταρ ακανά για τι αβέν πιστοί, ντα μπορίνενα τι αβέν σίγουροι ότι ο Ιεχωβά κα ατσσικιαρέλ τουμαρό ναβ κο βιβλίος κι ζωγιάκο.